Kuvandudza Unyanzvi Hwedu Muushumiri—Kufarira Munhu

Nei Zvichikosha? Jesu aiona munhu mumwe nemumwe sezvaari, achiratidza kuti anomufarira. Somuenzaniso, pane imwe nguva Jesu anofanira kunge akaona kunyara kwaiita mumwe murume aiva matsi, saka akamubvisa pane boka revanhu, ndokumurapa ari oga. (Mako 7:31-35) Akaratidza kuti aiziva zvaisagona kuitwa nevadzidzi vake, saka haana kuvadzidzisa zvakawandisa. (Joh. 16:12) Kunyange zvazvo iye zvino ava mambo kudenga, Jesu anofarira munhu mumwe nemumwe. (2 Tim. 4:17) Sevateveri vaKristu, tinoda kumutevedzera. (1 Pet. 2:21; 1 Joh. 3:16, 18) Uyewo, tichabatsira vanhu zvikuru muushumiri kana tikaratidza kuti tinonzwisisa saimba, tichifunga nezvemamiriro ake ezvinhu, zvaanofarira, uye zviri kumunetsa. Kazhinji kacho anoteerera kana akaona kuti hatina kungouya kuti timuudze shoko kana kuti timupe mabhuku, asi kuti tinomufarira.

Maitirwo Azvo:

Nyatsogadzirira. Iva munhu akasununguka, nyemwerera, uye iva neushamwari.
Ona zviripo. Pane here zvinoratidza kuti ane vana, anofarira zvegadheni kana kuti mhuka dzinochengetwa pamba, kana kuti ane dzidziso dzechitendero dzaanotenda? Zvimwe unogona kuchinja sumo yako kuti ienderane nezvawaona.
Mubvunze zvaanofunga, wonyatsoteerera usingamudimburiri pasina chikonzero. Mutarise chiso zvinoratidza kuti uri kuteerera. Mutende nezvaataura, uye murumbidze kana uchigona kuzviita nemwoyo wese. Usaite nharo naye.
Chinja mharidzo yako maererano nezviripo. Kana zvichiita, chinja nyaya yako kuti mutaure zviri kumunetsa. Izvi zvinogona kuva nyore kupfuura zvaungafunga nokuti mumaturakiti, mumabhurocha uye mumagazini edu munobuda nyaya dzakasiyana-siyana. Kana wasvika panguva isina kukodzera, sepaya pekuti saimba anenge akabatikana, ratidza kuti unonzwisisa, wopa mharidzo yako muchidimbu.

Edza Izvi Mwedzi Uno:

Pamunenge muchiita kunamata kwemhuri, kana kuti pamunenge muri muushumiri, dzidzirai muchiita kuti muparidzi achinje mharidzo yake kuti ienderane nenyaya yataurwa nasaimba.
Pane mimwe misangano yebasa romumunda, hama inenge ichitungamirira inogona kukurukura kana kuti kuenzanisira kuratidza kwatingaita kuti tiri kufarira saimba.