Shandisa Rarama Nekusingaperi Uchifara! Muushumiri Hwako

Tinofara chaizvo kuti tava nebhurocha idzva nebhuku idzva rekushandisa pakuitisa zvidzidzo zveBhaibheri! Tinonyengetera kuti Jehovha akomborere zvatinoita pakuita kuti vakawanda vave vadzidzi. (Mt 28:18-20; 1VaK 3:6-9) Tingashandisa sei maturusi matsva aya?

Sezvo kudzidza nevanhu Bhaibheri tichishandisa Rarama Nekusingaperi Uchifara! iri nzira itsva yekudzidzisa, tevedzera mirayiridzo iyi paunenge uchigadzirira uye paunenge uchiitisa zvidzidzo zveBhaibheri.a

• Verengai mashoko acho uye kurukurai mibvunzo yacho

• Verengai mavhesi akanzi “verengai,” uye batsira mudzidzi kuti anzwisise kushanda kwawo

• Onai mavhidhiyo mobva maakurukura muchishandisa mibvunzo iripo

• Pese pamunodzidza edzai kupedza chidzidzo chimwe chete

Paunenge uri muushumiri, tanga nekupa munhu bhurocha kuti uone kuti anofarira zvakadii. (Ona bhokisi rakanzi “Zvekuita Paunopa Munhu Bhurocha raRarama Nekusingaperi Uchifara! Paunoona Munhu Kekutanga.”) Kana mapedza kudzidza bhurocha uye mudzidzi achida kuenderera mberi, chibva wamupa bhuku, motangira pachidzidzo 04. Kana uri kutodzidza nemumwe munhu bhuku raBhaibheri Rinotidzidzisei? kana kuti Ramba Uri Murudo rwaMwari, chinjirai kune raRarama Nekusingaperi Uchifara! woona kuti mungatangira papi.

ONA VHIDHIYO INONZI TINOKUGAMUCHIRA KUKOSI YEBHAIBHERI, WOZOPINDURA MIBVUNZO INOTEVERA:

• Vadzidzi vachadzidzei mubhuku idzva iri?

• Nei uchifanira kuratidza vadzidzi vatsva vhidhiyo iyi?

• Zvinangwa zvipi zvaunofanira kukurudzira mudzidzi kuti ave nazvo uye azvizadzise?—Ona chati rakanzi “Zvichadzidzwa Uye Kubatsira Kwaungaita Mudzidzi Pachikamu Chimwe Nechimwe”