Ba nsongualume: Ekitshisheyi bua kufika bu balume bena Nkidishitu banyingie mu kikudi

1. Abitungu mulume muina Nkidishitu akite kinyi buadia koobesha?

NFUMU Davide balangile Solomone’shi: ‘Ikala munyingie, naa oleshe’shi we muana mulume.’ (1 Bf. 2:​1-3) Lelo uno balume boso bena Nkidishitu bakuete kutumikila dino elango. Bua kuibikita, abitungu balongie bia kukookiela miiya ya Efile Mukulu na kutumikila mayi a kulonda a mu Bible mu nshalelo aabo ooso mushima. (Luk. 2:52) Buakinyi bi na muulo bua’shi bakuetu ba nsongualume bafikie bu balume bena Nkidishitu banyingie mu kikudi?

2-3. Buakinyi bi na muulo bua ba nsongualume kufika bu bena Nkidishitu banyingie mu kikudi?

² Balume bena Nkidishitu abalombashaa midimo i bungi mu bifuko biabo na mu kakongie. Bakuetu ba nsongualume, kushi mpaka nui bapue kunangushena pabitale mashito anudi balombene kupeta mu mafuku aafiki. Nui kuiatshila kepatshila ka kuikala bu ba mbala-mashinda ba mieshi yoso, bafubi ba midimo mu kakongie, na kunyima nuikale bu bakulu mu tukongie. Nui balombene dingi kukumiina kuibakila na kutanda bana. (Ef. 6:4; 1 Ti. 3:1) Bua kulombasha tuno tuipatshila kalolo, abitungu nuikale bena Nkidishitu banyingie mu kikudi.b

³ Nkinyi akikenukuasha buanudia kufika bena Nkidishitu banyingie mu kikudi? Kui ngobesha ayitungu’shi nuikale nayo sunga kuiyitamisha. Nkinyi dingi kianudi balombene kuilumbuluila kubanga binobino na buanudia kumona bia kobesha ingi midimo y’anukalomba mu mafuku aafiki?

KIA KUKITA BUA KUFIKA MUINA NKIDISHITU MUNYINGIE MU KIKUDI

4. Mbalo kinyi yodi mulombene kupeta bileshesho bi buwa bia kuambula? (Tala dingi kifuatulo.)

⁴ Sangula bileshesho bi buwa bia kuambula. Mu Bible mui bilesheho bia bana balume bi bungi bi buwa bia kuambula. Bano bana balume boso ba kala babaadi bafule Efile Mukulu na babaadi na mashito elekeenelekeene pa babaadi abakunkusha muilo waye. We kupeta dingi bileshesho bi buwa bia bana balume banyingie mu kikudi munkatshi mua kifuko kiobe na mu kakongie keenu. (Eb. 13:7) Na dingi nui na kileshesho kipuidikie kia Yesu Nkidishtu. (1 Mp. 2:21) P’anulongo bino bileshesho kalolo, talayi ngikashi i buwa ya bano bana balume. (Eb. 12:​1, 2) Dingi atayi kitshibilo kia mushindo wanudi balombene kuambula bano bana balume.

5. We kutamisha ngobesha ya kunangushena naminyi, na buakinyi bi na muulo? (Misambo 119:9)

⁵ Tamishayi na “lamayi ngobesha yenu . . . ya kunangeshena.” (Nki. 3:​21, NWT) Muntu e na ngobesha ya kunangushena, t’akitaa mianda lubilo lubilo. Kadi anangushenaa kalolo kumpala kuadia kuata kitshibilo kia kiadia kukita. Biabia, ekitshisheyi ngofu buanudia kupeta ino ngobesha na kuiyilama. Buakinyi? Muanda mu ino nsenga mmuule na ba nsongualume abakunkushibua na binangu biabo abo banabene sunga abatadiila biabapusha muishimba bua’shi bikunkushe bikitshino biabo. (Nki. 7:7; 29:11) Na dingi televizio, ma video, na internete, mbilombene kuikala na bukitshishi mu kunangushena na ku bikitshino bienu. Biabia, nui kupeta ngobesha ya kunangushena mushindo kinyi? Bangayi kulonga mayi a kulonda a mu Bible na kunangeshena pabitale mushindo waadi alombene kuinukuasha. Dingi kufubisha ano mayi a kulonda kui kuinukuasha buanudia kuata bitshibilo abisankisha Yehowa. (Badika Misambo 119:9.) Su nubalongo bia kunangushena mu uno mushindo, abikenukuasha ngofu buanudia kufika bu balume bena Nkidishitu banyingie mu kikudi. (Nki. 2:​11, 12; Eb. 5:14) Taluulayi bilombene ngobesha ya kunangushena kuinukuasha mu ino mianda ibidi: (1) Muikeelo wenu pabitale bakuenu bakashi na (2) Nfuadilo eenu na ntshibilo eenu a nyene na bi’anumueneka ku meeso.

6. Ngobesha ya kunangushena i kukuasha ba nsongualume buabadia kuneemeka bakuetu bakashi naminyi?

⁶ Ngobesha ya kunangushena ayikenukuasha buanudia kunemeka bakuenu bakashi. Ta bi bubi su nsongualume muina Nkidishitu ekala mu bu kuuku na mukuetu nsonguakashi muina Nkidishitu. Anka ku bukuashi bua ngobesha ya kunangushena, abitungu mukuetu mulume alekie kuakula sunga kufunda, sunga kukita kintu kampanda kilombene kuibuesha lukalo lui bubi munda mua mukuetu mukashi na afika mu kunangushena’shi uno mukuetu mulume akiebe kungiila sunga kungibakila. Nka su abeyidishena na bapu kumumona’shi ngi mukashi mulombene adia kuibakila. (1 Ti. 5:​1, 2) Su anukiebe kuenda mu kutemba na mukuetu mukashi, abitungu okimbe bia kulama nkumo yaye i buwa pa kupela kuikala nka bubidi buenu kushii muntu a kuinulama.—1 Ko. 6:18.

7. Ngobesha ya kunangushena i kukuasha bakuetu ba nsongualume nsaa y’abakiebe kuata kitshibilo pabitale ntshibilo a nyene na nfuadilo naminyi?

⁷ Nsongualume mulongie bia kunangushena abinangushenaa Yehowa, aleshaa bianka ku ntshibilo aaye a nyene na ku nfuadilo aaye akuifuku n’efuku. Kebungi bantu abatelaa bilamba na abatshibaa nyene, bakuete kutshiba na kutela sunga kutshiba nyene y’abakumiina kui bantu be bungi bashi na kaneemo bua Yehowa na bena muikeelo wi butete. Binangu biabo bi butete, abimuenekiela ku bilamba biabo bi’abafuala mu nshalelo aabo, abituesha kabulakanyi p’atuibatala, bana balume abamueneka bu bana bakashi. Bakuetu ba nsongualume bakuete kuenda na kutama mu kikudi, pabakiebe kusangula bilamba bia kufuala, abitungu bakunkushibue na mayi a kulonda a mu Bible na bantu ba bileshesho bi buwa be mu kakongie. Nsongualume mmulombene kuiyipusha aye nabene’shi: ‘Bitshibilo biande, abilesha namu’shi ne muntu anangushenaa kalolo na anangushena bilombene kupusha bangi su? Mushindo wa kutshibisha nyene, aukuasha bangi buabadia kukumiina’shi ami ne mufubi a Efile Mukulu?’ (1 Ko. 10:​31-33; Tt. 2:6) Nsongualume e na ngobesha ya kunangushena, t’apete kineemo nka penda kui bakuabo balume na bakashi nya, kadi apete dingi kineemo kui Nshaye e muiyilu.

8. Mukuetu nsongualume e kulonga biadia kuikala bu muntu a kukulupilua naminyi?

⁸ Ikala muntu akukulupilua. Nsongualume a kukulupilua, ataa mashito ooso abamupa na muulo. (Luk. 16:10) Tubandeyi kutaluula kileshesho kipuidikie kia Yesu. Ta baadi abepuula mudimo sunga kukutua kuiwata na muulo. Anka baadi alombasha mudimo ooso ubaabadi abamupa kui Yehowa, sunga nsaa i babidi bukopo bua kui bikita. Baadi mufule bantu, bikishekishe balongi baaye, na baadi mukumiine kutusha muwa waye pa muanda wabo. (Yo. 13:1) Bua kuifuana Yesu, ekitshishe bua kukita mudimo ooso w’abakupa. Su we mushinkamishe’shi tue na ngobesha ya kuiukita, ikala muiyishe, teka bukuashi kui bakuenu banyingie mu kikudi. Nsaa y’ofubu mudimo, toyimeenanga muishinda ekitshishe bodia kufudiisha. (Lom. 12:11) Mu kuilekeena na biabia, fudiisha mudimo ooso, weukite “bua Yehowa, kushi bu’be eukitshina bantu.” (Kol. 3:23) Biabia tue mupuidikie’be, ikala muipeeleshe na kumiina bilubilo bioso bi’okitshi.—Nki. 11:2.

LONGA MIANDA AYIKAKUKUASHA MU NSHALELO OOBE A EFUKU DIOSO

9. Buakinyi abitungu mukuetu nsongualume atamishe ngobesha ya kunangushena?

⁹ Bua kufika mulume muina Nkidishitu munyingie mu kikudi, abitungu otamishe ngobesha yodi mulombene kufubisha. Ino ngobesha ayikakukuasha bodia kupeta mashito mu kakongie, kukita mudimo wa ku mbidi bua kulombasha nkalo yobe na ya kifuko kiobe, na kuikala mu kipuano ki buwa na bangi. Tutaluuleyi mianda ipeela ya ku mianda ayitungu kulonga.

10-11. Su mukuetu nsongualume balongo bia kubadika na bia kufunda, abimukuasha aye nabene na kukuasha kakongie naminyi? (Misambo 1:​1-3) (Tala dingi kifuatulo.)

¹⁰ Longa kubadika na kufunda. Bible amba’shi bua kuikala na muloo na kobesha mu nshalelo, abitungu kukisha nsaa efuku dioso mu kuibadikila Bible na kunangushena ku bi’obadika. (Badika Misambo 1:​1-3.) P’obadika Bible efuku dioso ouku mushindo aunangushenaa Yehowa, na abikakukuasha bodia kunangushena kalolo na kutumikila biolongo mu Bifundue. (Nki. 1:​3, 4) Kakongie ke na lukalo na bantu abakitshi biabia. Buakinyi?

¹¹ Bakuetu balume na bakashi be na lukalo na bukuashi bua bana balume be na mushindo wa kulongiesha na kuibapa malango aatukila mu Bible. (Tt. 1:9) P’obadika na kufunda kalolo, wekala na mushindo wa kulumbuula miisambo, kutusha ngaluulo ayikuasha bangi, na kunyingisha lukumiino luabo. Okekala dingi na mushindo wa kufunda mianda ikata nsaa yuelongiela, p’oteemesha miisambo ya mu bisangilo bia kakongie, ya ku bikongeno bia kifunda na bia mafuku asatu. Yaya mianda ikata y’ofundu, ayikakukuasha bodia kunyingisha lukumiino lobe obe nabene na kunyingisha namu bangi.

12. Nkinyi akikakukuasha bodia kuikala muntu ateemeshaa na akulaa na bangi na kalolo kooso?

¹² Longa mushindo wa kuteemesha na kuakula na kalolo kooso. Abitungu mulume muina Nkidishitu ekale ateemesha na kuakula na kalolo kooso. Muntu ateemeshaa na kuakula na kalolo kooso, aukaa bi binangu bia bangi na bi’abapusha. (Nki. 20:5) E kulonga bia kubadika eyi diakule nadio muntu, bi’amueneka ku mpala, sunga bi ludimi luakula. Tue bia kuuka kukita bino su tue mukishe nsaa pamune na bangi bantu. Su wekala wesamba nka na bantu nsaa yooso ku kaamo sunga kuibafundila mesaje, mbi kuelela bukopo bua kuisamba na bantu pu’emoneena nabo mpala kua mpala. Biabia, ekitshishe bua kupeta mishindo yooso ayimueneka ya kuisamba na bangi mpala kua mpala.—2 Yo. 12.

13. Abitungu nsongualume alongie dingi kinyi? (1 Timote 5:8) (Tala dingi kifuatulo.)

¹³ Longa mudimo odia kupeta makuta alombene nkupuila nkalo yoobe. Abitungu mulume muina Nkidishitu munyingie mu kikudi, alongie bia kuikala na mudimo ulombene kumukuasha aye nabene na kukuasha kifuko kiaye. (Badika 1 Timote 5:8.) Mu angi maumbo, bakuetu ba nsongualume abakambaa kulonga midimo ya maasa y’abamono baledi baabo abakitshi sunga bakuabo ba mu kifuko. Mu angi maumbo namu ba nsongualume mbalombene kulonga ingi midimo ya maasa sunga ingi ngobesha nka pabatuele ku tulaasa tukata. Sunga mbiabia, kintu ki na muulo ukata, nkulonga kalaasa ka mianda yabadi balombene nkuata ku mudimo. (Bik. 18:​2, 3; 20:34; Ef. 4:28) Peta nkumo ya muntu afubu ngofu na w’ekitshishe bua kufudiisha wawa mudimo okitshi. Su bokitshi biabia, onyiisha kuikala na muabi wa kupeta mudimo na kuiulama. Ngikashi na ngobesha bibatuisambila mu uno muisambo bi na muulo ukata kui mulume muina Nkidishitu munyingie mu kikudi, muanda ayimukuasha buadia nkalombasha ingi midimo mu mafuku aafiki. Biabia tuisambileyi ingi ya ku ino midimo.

ELUMBUULE BUA MIDIMO YA MU MAFUKU AAFIKI

14. Mukuetu nsongualume e kuilumbuula bua kufika mufubi a nsaa yooso mushindo kinyi?

¹⁴ Mufubi a nsaa yooso. Bana balume be bungi bena Nkidishitu banyingie mu kikudi, ababangaa kukita mudimo wa nsaa yooso abo bakii bana bakinga. Mudimo wa bu mbala-mashinda aukuasha ba nsongualume bua kuuka mushindo wa kufuba ngofu na kuiwubidishena na bantu belekeelekeene. Aumukuasha dingi buadia kutshiba bungi bua makuta alombene kumukuasha, na kuneemeka kiakia kitshibilo kiaye. (Fid. 4:​11-13) Mushindo wi buwa wa kubanga mudimo wa nsaa yooso, nkukita mudimo wa bu mbala-mashinda mukuashi. Be bungi abafubaa bu ba mbala-mashinda bakuashi munda mua kipungo kampanda. Bino abibakuashaa buabadia kuilumbuula bua kukita mudimo wa bu mbala-mashinda a mieshi yooso. Kukita mudimo wa bu mbala-mashinda aufungulaa mashinda a kukita midimo ya nsaa yooso ilekeenelekeene, bu mudimo wa luibako lua teokrasi, na ku Betele.

15-16. Mukuetu nsongualume e kulombasha ngikashi itekibue buadia kufika bu mufubi a midimo sunga bu mukulu naminyi?

¹⁵ Mudimo wa bu mufubi a midimo na bu mukulu. Abitungu balume bena Nkidishitu bekadikie na kepatshila ka kulombasha ngikashi itekibue buabadia kufubila bakuabo balume na bakashi mu kakongie bu bakulu. Bible amba’shi, bana balume abalombasha tuipatshila tuabo bua kukita uno mudimo, “akimbi mufubo wibuwa.” (1 Ti. 3:1) Kumpala kua’shi mukuetu mulume afube bu mukulu, abitungu alombashe ngikashi itekibue bua kubanda kufuba bu mufubi a midimo. Bafubi ba midimo abakuashaa bakulu mu mishindo i bungi. Bakulu boso na bafubi ba midimo beyishe, abafubila bakuabo balume na bakashi na kulungula mukandu wibuwa na kishima. Abitungu ba nsongualume balombashe ngikashi itekibue buabadia kufuba bu bafubi ba midimo sunga pa bakii na bipua ekumi na bungi. Su atungunuka na kuenda kumpala mu mianda ya mu kikudi, kumpala kua’shi alombashe bipua 25, mulombene kupeta mashito a bu mukulu.

¹⁶ Mmushindo kinyi odia kulombasha ngikashi itekibue bodia kufuba bu mufubi a midimo na kunyima bu mukulu? Bible mmuleshe kalolo ngikashi yooso ayitungu’shi olombashe bua kuikala bu mufubi a midimo sunga bu mukulu. Ngikashi yooso itekibue mu Bible ngimeene nka pa kifulo. Kifulo bua Yehowa, kifulo bua kifuko kiobe, na kifulo bua bakuetu balume na bakashi ba mu kakongie. (1 Ti. 3:​1-13; Tt. 1:​6-9; 1 Mp. 5:​2, 3) Ekitshishe bua kupusha eyikashi dioso ki’adilesha. Teka Yehowa akukuashe bua kulombasha ino ngikashi yooso.c

17. Mukuetu nsongualume e kuilumbuula buadia kufika mulume na nfumu a kifuko mushindo kinyi? (Tala dingi kifuatulo.)

¹⁷ Mulume na nfumu a kifuko. Yesu bakuile’shi bangi bana balume bena Nkidishitu banyingie mu kikudi mbalombene kushaala bukupi. (Mat. 19:12) Biabia su buata kitshibilo kia kuibakila, botenteka ungi mudimo kunundu kua kuikala mulume na nfumu a kifuko. (1 Ko. 11:3) Yehowa akumiina’shi balume bafule bakashi baabo, be bapasukile ku nkalo yabo ya ku mbidi, ya mu binangu na ya mu kikudi. (Ef. 5:​28, 29) Ngikashi na ngobesha biatudi bapue kuisambila kunundu mu uno muisambo, bu kutamisha ngobesha ya kunangushena, kuneemeka bakuetu bakashi, na kuikala muntu akukulupilua, abikakukuasha bodia kuikala mulume e buwa muiyibakishi. Biabia okekala muilumbule kalolo bua kulombasha midimo ya bu muana mulume na bu nfumu a kifuko.

18. Mukuetu nsongualume e kuilumbuula buadia kufika nshe bana naminyi?

¹⁸ Nshe bana. Kunyima koobe kuibakila, we kufika nshe bana. We kulongiela kinyi pabitale kuikala nshe bana e buwa? Kui malongiesha e bungi. (Ef. 6:4) Yehowa balunguile Muana aaye mulume Yesu pa butooka’shi mumufule na’shi mumukumiine. (Mat. 3:17) Su buekala nshe bana, abitungu wekale mushinkamishe’shi okuete kulungula bana bobe nsaa yooso’shi we muibafule. Ikala we batumbula na kalolo kooso bua mianda i buwa ya bakuete kukita. Ba nshe bana abambula kileshesho kia Yehowa, abakuasha bana baabo buabadia kufika balume sunga bakashi bena Nkidishitu banyingie mu kikudi. We kubanga kuilumbuula kubanga binobino bua uno mudimo pa kukumiina kupasukila bangi mu kifuko kiobe, mu kakongie na kulonga bia kulungula bangi’shi we muibafule na kuibatumbula. (Yo. 15:9) Bino abikakukuasha bua kulombasha midimo yoobe ya mu mafuku aafiki p’okekala mulume na she bana. P’okiotengiela, ikala muipaane bua kufubila Yehowa, kukuasha kifuko kiobe, na kakongie.

OKITSHI KINYI KUBANGA BINOBINO?

19-20. Nkinyi kilombene kukuasha ba nsongualume buabadia kufika balume be na Nkidishitu banyingie mu kikudi? (Tala kifuatulo ki ku kipusu.)

¹⁹ Bakuetu ba nsongualume, abitungu kuikitshisha ngofu bua kufika bu bakuetu bena Nkidishitu banyingie mu kikudi. Abitungu kusangula bileshesho biodi mulombene kuambula, kutamisha ngobesha ya kunangushena, kuikala muntu a kukulupilua, kukimba mudimo ulombene nkukuasha mu nshalelo oobe na kuilumbuula bua midimo y’okekala nayo mu mafuku aafiki.

²⁰ P’opuandikisha bungi bua midimo y’okakitshi mu mafuku aafiki, ingi nsaa bi nkukalakasha. Anka we koobesha kuiyikita. Tentekiesha’shi Yehowa e kuanka bua nkukuasha. (Yesh. 41:​10, 13) Bakuenu balume na bakashi mu kakongie, abakakukuasha n’abo namu. Su bolombasha kepatshila ka kuikala mulume muina Nkidishitu munyingie mu kikudi, nshalelo oobe akekala buwa na a muloo. Bakuetu ba nsongualume, tui be nufule bikata! Yehowa e nuelele miabi i bungi bu bianukuete kuikitshisha ngofu buanudia kufika balume bena Nkidishitu banyingie mu kikudi.—Nki. 22:4.