Kongresi krahinor i Dëshmitarëve të Jehovait për vitin 2001 «Mësues të Fjalës së Perëndisë»
1 Profeti Isaia e përshkroi Perëndinë Jehova si Mësuesi i Madh, që në mënyrë atërore nxit: «Kjo është udha. Ecni në të.» (Isa. 30:20, 21, BR) Por si i dëgjojmë fjalët e thëna nga Jehovai për dobinë tonë? Jehovai i flet popullit të tij nëpërmjet faqeve të Biblës si edhe nëpërmjet botimeve me bazë biblike, mbledhjeve, aktiviteteve qarkore dhe kongreseve krahinore, të siguruara të gjitha këto nga «skllavi i besueshëm e i matur». (Mat. 24:45) Mund t’i jemi mirënjohës Perëndisë Jehova që vazhdon të na drejtojë në udhën nëpër të cilën duhet të ecim.
2 Çdo vit, kongresi krahinor na jep mundësi të mblidhemi me besimtarët e tjerë dhe të dëgjojmë me vëmendje udhëzimet e Jehovait. Vitin e kaluar, 3.672 persona ndoqën kongreset krahinore freskuese frymësisht «Zbatues të Fjalës së Perëndisë». Në vitin 2001, Kongresi Krahinor treditor «Mësues të Fjalës së Perëndisë» do të mbahet në të gjithë Shqipërinë. Ne e dimë se ju tashmë po mendoni që të bëni rregullimet për të qenë të pranishëm, prandaj po ju sigurojmë udhëzimet e mëposhtme për t’ju ndihmuar.
3 Rregullimi i strehimit: Që nga janari i vitit 2001, në qytetet ku do të mbahet kongresi, do të organizohen grupe me vëllezër që do të angazhohen për kërkimin e vendeve të strehimit. Këta vëllezër do të jenë të stërvitur për të gjetur hotele, konvikte ose dhoma të tjera të përshtatshme me një çmim të arsyeshëm. Në bazë të marrëveshjeve të bëra me pronarët e këtyre lokaleve, Reparti i Strehimit do të ketë në dispozicion dhoma fjetjeje me një çmim të caktuar për çdo person që dëshiron të marrë pjesë në kongresin e atij qyteti.
4 Ndërkohë, në qytetin ku mbahet kongresi, Komiteti i Kongresit do të ftojë kongregacionet lokale që të ofrojnë ndihmë për të strehuar ata vëllezër që kanë më shumë nevojë. Në një Mbledhje të Shërbimit, pleqtë do të njoftojnë vëllezërit dhe personat e interesuar që të bëjnë një përpjekje për të ofruar strehim falas. Në fund të mbledhjes, pleqtë do të bëjnë një listë me emrat e atyre që ofrojnë strehim dhe do t’ia dërgojnë sa më shpejt Komitetit të Kongresit. A ke mundësi të ofrosh ndihmë në këtë çështje? Jehovai bekon mikpritjen bujare të shërbëtorëve të tij.—Zan. 18:1-5, 18; 1 Mbret. 17:8-16; Vep. 16:14, 15.
5 Në këtë mënyrë, disa muaj përpara kongresit, Reparti i Strehimit do të informojë kongregacionet për çmimet e lokaleve që janë gjetur. Gjithashtu, do të ketë në dispozicion disa vende fjetjeje falas për ata që kanë nevoja të veçanta. Ky rregullim i parakohshëm do t’u japë mundësi vëllezërve dhe personave të interesuar që të bëjnë planet e duhura dhe të «llogaritin shpenzimet», të cilat, përveç strehimit, përfshijnë udhëtimin dhe ushqimin. (Luka 14:28) Sugjerojmë që individët dhe familjet të bëjnë një program të mirë për të kursyer paratë e nevojshme. Duke bërë një përpjekje të veçantë për të marrë pjesë në çdo ditë të kongresit, do t’i tregoni Jehovait çmueshmërinë për ftesën që ju ka drejtuar.—Psal. 84:10.
6 Në kohën e caktuar, Reparti i Strehimit do të kërkojë nga çdo kongregacion listat me emrat e atyre që kërkojnë strehim. Pleqtë do të marrin udhëzime lidhur me informacionet që duhet të dërgojnë për çdo person që bën këtë kërkesë. Pas kësaj, Reparti i Strehimit do të caktojë një vend strehimi për çdonjërin që ka bërë kërkesë dhe do ta njoftojë secilin me anë të një letre. Si rezultat, para se të shkojë në vendin e kongresit, çdo pjesëmarrësi do t’i jetë siguruar një strehim.
7 Kur ndiqet një kongres tjetër: Nëse ju nevojitet strehim ose informacion për një tjetër kongres, sekretari i kongregacionit mund t’ju sigurojë adresën e Komitetit të Kongresit përkatës. Ai mund t’ia kërkojë adresën Zyrës së Shoqatës.
8 Çfarë mendon personeli në vendet e strehimit për Dëshmitarët e Jehovait? Pasi komentoi për sjelljen e mirë të popullit të Jehovait, drejtuesi i përgjithshëm i një hoteli tha: «Kur shoh Dëshmitarët e Jehovait që bëjnë regjistrimin të enjten, unë nuk shihem më në hotel deri të hënën në mëngjes. E di se edhe sikur të ketë ndonjë problem, do të jetë mjaft i vogël. Është gjithmonë një kënaqësi t’ju kesh këtu.» Një shitëse në një hotel tha me entuziazëm: «Grup i shkëlqyer! Të gjithë të thoshin vazhdimisht, ‘Faleminderit’.» A nuk na bën të ndihemi krenarë kur dëgjojmë të flitet në këtë mënyrë për vëllezërit tanë? Të imagjinojmë se sa i lumtur është Perëndia Jehova kur na sheh duke vepruar në një mënyrë që i sjell lavdi emrit të tij!
9 Përfundimi: Ndërsa afrohet koha për të ndjekur kongresin krahinor, ta bëjmë një çështje në lutjet tona drejtuar Jehovait që të mund të jemi të pranishëm në të gjitha sesionet gjatë të tria ditëve dhe që të nxjerrim sa më shumë dobi nga programi. A kemi kërkuar tashmë kohë të lirë nga puna, për të tria ditët e kongresit që planifikojmë të ndjekim? Nëse jo, le ta bëjmë këtë sa më shpejt që është e mundur. Kërkesat për leje nga puna të bëra minutën e fundit zakonisht nuk pranohen. Skllavi i besueshëm e i matur ka marrë masa që Kongresi Krahinor i këtij viti, «Mësues të Fjalës së Perëndisë», të sigurojë udhëzime frymore për ne dhe të na ndërtojë në besim. Ndaj le të fillojmë që tani të bëjmë planet për të qenë të pranishëm, duke ndjekur këshillën e psalmistit: «Në turmat e mbledhura bekoni Perëndinë!»—Psal. 68:26, BR.
[Kutia në faqen 3]
Oraret e programit
E premte dhe e shtunë
9.30 paradite – 17.00 pasdite
E diel
9.30 paradite – 16.00 pasdite