Kongresi Krahinor i Dëshmitarëve të Jehovait për vitin 2006 «Çlirimi është afër»

1. Si e tregonte vlerësimin populli i Perëndisë për adhurimin e vërtetë në kohët e lashta dhe çfarë mundësie të ngjashme kemi sot?

¹ Mbreti Hezekia në Judenë e lashtë përdorte vrapuesit për të dërguar letrat që i bënin thirrje popullit të mblidhej në Jerusalem. (2 Kron. 30:6, 13) Përgjigjja e popullit tregonte se ç’qëndrim kishte ndaj adhurimit të vërtetë. (2 Kron. 30:10-12) Në muajt e ardhshëm, shërbëtorët e sotëm të Jehovait do të kenë një mundësi të ngjashme për të treguar mirënjohjen e thellë për këtë privilegj që kanë për t’u mbledhur së bashku e për të adhuruar Jehovain. Kongregacioneve u është dërguar një letër me anë të cilës ftohen të ndjekin Kongresin Krahinor me temë «Çlirimi është afër». Si do t’i përgjigjeni kësaj ftese?

2. Çfarë duhet të bëjmë tani që të përfitojmë plotësisht nga kongresi?

² T’i marrim masat që tani: Që të përfitojmë plotësisht nga programi frymor i përgatitur me dashuri, duhet të jemi të pranishëm gjatë gjithë programit. Është e mençur të filloni që tani me përgatitjet e duhura, që ti dhe familja jote të jeni të pranishëm në të tria ditët. (Prov. 21:5) Këto përgatitje mund të përfshijnë t’i merrni leje pronarit të punës, të bisedoni për planet tuaja me bashkëshortin që nuk është në të vërtetën, të bëni rezervimin në hotel dhe të ndihmoni studentët biblikë që të jenë të pranishëm çdo ditë të kongresit. Mos i lini këto gjëra të rëndësishme për minutën e fundit. Por lutjuni për to Jehovait me besim se «ai do të veprojë».​—Psal. 37:5.

3. Pse duhet të veprojmë sipas udhëzimeve që janë dhënë në lidhje me strehimin?

³ Organizata e Jehovait ka bërë çmos që në çdo qytet ku zhvillohet kongresi, të gjendet strehim për të gjithë. Mirënjohja për përpjekjet vetëmohuese të vëllezërve të palodhur që kujdesen për këtë gjë, vlerësimi për delegatët e tjerë në kongres dhe respekti për rregullin teokratik, duhet të na nxitë që të veprojmë plotësisht sipas udhëzimeve që jepen në këtë artikull.​—1 Kor. 13:5; 1 Sel. 5:12, 13; Hebr. 13:17.

4-6. Çfarë pikash të rëndësishme duhet të kemi parasysh kur bëjmë një rezervim në hotel dhe pse? (Përfshi kutinë në faqen 4.)

⁴ Rezervimi në hotel: Pasi kjo pjesë të jetë trajtuar në Mbledhjen e Shërbimit, në tabelën e informacionit do të vendoset një listë e strehimeve të rekomanduara në hotelet që janë gjetur. Duke përdorur udhëzimet në kutinë e faqes 4, ju lutemi, rezervoni dhoma vetëm në hotelet që janë në listë dhe pranoni të paguani vetëm tarifat e treguara aty. Ju lutemi mos telefononi në hotelet që nuk janë në listë për të pyetur nëse kanë tarifa të reduktuara për rastin e kongresit. Shpesh disa nga këto hotele thonë se bëjnë ulje për Dëshmitarët e Jehovait. Bashkëpunimi juaj do të ndihmojë që të arrihet qëllimi për të gjetur çdo vit afër vendit ku mbahet kongresi hotele cilësorë me çmim sa më të arsyeshëm.​—1 Kor. 14:40.

⁵ Është e rëndësishme të rezervoni vetëm dhomat që do t’i përdorni vërtet gjatë kongresit. Ju lutemi, mos rezervoni dhoma për delegatët e tjerë nëse nuk keni rënë dakord më parë me ta dhe nëse nuk keni dhënë përfundimisht emrat e tyre. Në të kundërt, rritet më kot numri i dhomave të rezervuara dhe pakësohen mundësitë për delegatët e tjerë që duan të rezervojnë. Çdo dhomë duhet të rezervohet në emrin e njërit prej personave që do të qëndrojë në atë dhomë.

⁶ Nëse kërkohet nga hoteli, për të siguruar rezervimin, duhet t’i jepni hotelit një paradhënie për çdo dhomë të rezervuar. Nëse jo, hoteli mund t’ia japë dhomën tuaj dikujt tjetër. Nëse, pasi jeni interesuar, nuk ka asnjë dhomë të lirë te asnjë nga hotelet që ndodhen në listë ose nëse keni ndonjë problem me një nga hotelet, flisni me sekretarin e kongregacionit. Ai nuk duhet të lidhet me zyrën e degës, por me Repartin e Strehimit të Kongresit, duke përdorur informacionin në krye të listës. Në vend që t’i telefononi një hoteli që nuk është në listë, ju lutemi, pritni sa të merrni një listë të përditësuar për kongresin.

7, 8. Çfarë kujdesi mund të marrin individët me nevoja të veçanta?

⁷ Nevoja të veçanta: Te Proverbat 3:27 thuhet: «Mos ua mbaj të mirën atyre që u takon, kur e ke në dorë ta bësh.» Si mund t’u bësh mirë të tjerëve në lidhje me kongresin? Lajmëtarët e moshuar, të sëmurët, ata që janë në shërbimin e plotkohor ose të tjerë mund të kenë nevojë për ndihmë praktike, si në rastin e transportit, ashtu edhe në rastin e strehimit. Përgjegjësinë kryesore për t’u kujdesur për nevojat e tyre, e kanë të afërmit e tyre. (1 Tim. 5:4) Nëse ata nuk mund t’i ndihmojnë, atëherë të bashkëkrishterët mund t’u vijnë në ndihmë. (Gal. 6:10) Mbikëqyrësit e studimit të librit duhet të sigurohen që, individët me nevoja të veçanta në grupin e tyre, t’i kenë planifikuar gjërat mjaft kohë para kongresit.

⁸ Kërkesa e strehimit për individët me nevoja të veçanta është vetëm për lajmëtarët nevojat e të cilëve nuk mund të plotësohen nga anëtarët e familjes ose nga kongregacioni i tyre. Komiteti i Shërbimit i Kongregacionit duhet ta shqyrtojë këtë kërkesë duke përdorur udhëzimet që ndodhen në formularin Kërkesë strehimi për ata me nevoja të veçanta dhe në letrën e datës 14 dhjetor 2005 drejtuar të gjithë trupave të pleqve. Kjo masë vlen vetëm për ata lajmëtarë që kanë një qëndrim të mirë dhe për fëmijët e tyre që kanë një sjellje të mirë.

9. (a) Pse duhet të ndjekim kongresin ku jemi caktuar? (b) Çfarë duhet të bëjmë nëse për shkak të rrethanave duhet të ndjekim një kongres tjetër?

⁹ Pjesëmarrja në një kongres tjetër: Për t’u siguruar se vendet në kongres, literatura, strehimi e gjëra të tjera do të jenë të mjaftueshme, jeni të inkurajuar që të ndiqni kongresin ku është caktuar kongregacioni juaj. Nëse, për shkak të rrethanave, duhet të ndiqni një kongres tjetër, ju lutemi flisni me sekretarin e kongregacionit tuaj për datat e kongreseve krahinore që do të zhvillohen në Shqipëri dhe Kosovë, si edhe adresat e vendeve ku do të zhvillohen ato. Sigurohu që, përveç kërkesës për listën e strehimeve të rekomanduara dhe ndonjë informacioni shtesë, të japësh edhe një zarf me pullë dhe me adresën tënde. Nëse në atë qytet do të mbahet më shumë se një kongres, trego se në cilat data do ta ndiqni kongresin.

10. Në ç’mënyrë mund ta shtojmë gëzimin tonë gjatë kongresit të ardhshëm?

¹⁰ Vullnetarët: Nuk diskutohet që të gjithë ata që do të jenë të pranishëm dhe do të nxjerrin dobi nga ushqimi frymor e nga rastet për të qëndruar në një shoqëri ndërtuese, do të gëzohen shumë. Po gëzimi ynë do të jetë edhe më i madh, nëse dalim vullnetarë për të ndihmuar që kongresi të dalë me sukses. (Vep. 20:35) Komiteti i Kongresit shumë shpejt do të kërkojë vullnetarë për të ndihmuar. A mund të tregoheni të gatshëm?​—Psal. 110:3.

11. Çfarë vlerësoni nga kongresi krahinor që mbahet çdo vit dhe për çfarë duhet të jeni të vendosur?

¹¹ Kur ishte në një kongres krahinor, një 5-vjeçar tha: «Kongresi Krahinor është pjesa ime e preferuar në adhurimin e Jehovait.» Ky koment i bërë nga zemra na bën që ta kuptojmë se sa shumë kënaqemi kur ndjekim kongresin krahinor çdo vit. Janë më se të vërteta fjalët e psalmistit që tha: «Një ditë në oborret e tua, është më mirë se një mijë gjetiu.» (Psal. 84:10) Davidi e shprehu me këngë dëshirën e tij ‘për të banuar në shtëpinë e Jehovait gjatë gjithë jetës së tij, që të sodiste me ëndje tempullin e Jehovait’. (Psal. 27:4) Davidit i pëlqente vërtet të qëndronte me adhuruesit e Jehovait. Le ta imitojmë vlerësimin e tij për adhurimin e vërtetë, duke qenë të pranishëm të tria ditët në Kongresin Krahinor me temë «Çlirimi është afër».

[Kutia në faqen 3]

Oraret e programit

E premte dhe e shtunë

9:30 - 17:05

E diel

9:30 - 16:10

[Kutia në faqen 4]

Si duhet bërë rezervimi i hotelit?

1. Merrni në telefon hotelet gjatë orarit të rregullt të punës, duke përdorur numrat e telefonit të shënuar në listën e strehimeve të rekomanduara.

2. Bëjuni të ditur se do të ndiqni kongresin e Dëshmitarëve të Jehovait.

3. Jepni datat kur do të regjistroheni në hotel dhe kur do të largoheni prej tij.

4. Në rast se nuk ka dhoma të lira, telefononi një hotel tjetër të shënuar në listë.

5. Mos pranoni një tarifë më të lartë se ajo e treguar në listë.

6. Bëni rezervimin dhe kërkoni një konfirmim për të.

7. Nëse kërkohet, jepni një paradhënie sipas mënyrës së caktuar nga hoteli.

Ju lutemi:

◼ Qëndroni vetëm në hotelet e shënuara në listën e strehimeve të rekomanduara.

◼ Rezervoni aq dhoma sa do të përdorni.

◼ Mbani rezervimin e parë.​—Mat. 5:37.

◼ Nëse në listë nuk tregohet ndryshe, planifikoni të qëndroni jo më shumë se katër persona në një dhomë, përfshirë edhe fëmijët.