Kongresi krahinor i Dëshmitarëve të Jehovait për vitin 2004 «Të ecim me Perëndinë»
1 Si mendoni? Çfarë i bën të veçanta kongreset krahinore që mbahen çdo vit? Fjalimet ndërtuese dhe drama, të cilat përgatiten për ne nga «skllavi i besueshëm dhe i matur»? (Mat. 24:45-47) Botimet e reja që përmbajnë ushqim frymor në kohën e duhur? Përvojat e vëllezërve e të motrave që tregojnë se si i ka ndihmuar Bibla që të përmirësojnë jetën e tyre? Raportet se si po përparon vepra e predikimit të Mbretërisë në vende të tjera? Shoqëria me bashkëbesimtarët e të gjitha moshave? Po, mezi i presim kongreset për këto dhe për shumë arsye të tjera.
2 Të marrim pjesë në të tria ditët: Nëpërmjet Moisiut Jehovai urdhëroi: «Do të mbledhësh popullin . . . që të dëgjojnë dhe të mësojnë.» (Ligj. 31:12) Me anë të klasës së skllavit të besueshëm e të matur Jehovai ka përgatitur për ne një program të veçantë arsimimi për çdo ditë të kongresit. Meqë ai po na mëson ‘për të mirën tonë’, duam të jemi të pranishëm për të marrë të gjitha udhëzimet e tij. (Isa. 48:17) Nëse duhet t’i kërkoni leje punëdhënësit, lutjuni Jehovait dhe flitni me punëdhënësin, duke ndjekur shembullin e guximshëm të Nehemisë. (Neh. 1:11; 2:4) Gjithashtu do të ishte një gjë e dashur t’u thoshit sa më shpejt edhe pjesëtarëve jobesimtarë të familjes për planet tuaja në lidhje me kongresin.
3 Strehimi: Për dobinë tuaj në çdo qytet të kongresit tashmë janë marrë masa për strehimin. Pasi të jetë trajtuar kjo shtojcë në Mbledhjen e Shërbimit, në tabelën e informacionit të kongregacionit tuaj do të vendoset një listë e strehimeve të rekomanduara të hoteleve që janë gjetur. Vëllezërit që ndihmojnë zyrën e degës arrijnë të gjejnë këto tarifa të ulura të hoteleve falë bashkëpunimit tuaj të shkëlqyer. Prandaj ju lutemi të rezervoni dhoma vetëm në hotelet që ndodhen në listë dhe të pranoni të paguani vetëm tarifat e treguara. Kjo do të ndihmojë që çdo vit të sigurohen hotele të cilësisë së lartë pranë vendit të kongresit me tarifa sa më të mira. Edhe hotelet që ndodhen paksa më larg se vendi i kongresit janë shumë të mira. Përpara se të telefononi për të bërë rezervimin, rishikoni pikat që ndodhen në kutinë në faqen 4, me titull «Si mund të mbështetni organizimin e strehimit». Kur të telefononi ndiqni hapat që tregohen në kutinë «Cila është mënyra më e mirë për të rezervuar një dhomë hoteli?»
4 Nevoja të veçanta: Apostulli Pavël u kujtoi kongregacioneve në Galati që ‘të bënin atë që ishte e mirë ndaj të gjithëve, por sidomos ndaj atyre që ishin të lidhur me ta në besim’. (Gal. 6:10) Vëllezërit e moshuar dhe motrat e moshuara, të sëmurët, prindërit e vetëm ose ata që janë në shërbim të plotkohor ndoshta nuk ju kërkojnë ndihmë, por atyre mund t’u duhet të kapërcejnë disa vështirësi që të marrin pjesë në kongres. A jeni në gjendje ‘të bëni atë që është e mirë’ ndaj tyre dhe t’i ndihmoni në ndonjë mënyrë? Në veçanti duhet të jenë të vëmendshëm për rrethanat e këtyre individëve të afërmit e krishterë dhe pleqtë.
5 Në qoftë se një lajmëtar plotëson një kërkesë strehimi për ata me nevoja të veçanta, Komiteti i Shërbimit të kongregacionit do ta shqyrtojë atë duke përdorur udhëzimet që ndodhen në formularin e kërkesës. Ata duhet të shqyrtojnë nëse mund të kujdesen ata vetë si kongregacion për këtë nevojë. Kjo masë është vetëm për ata lajmëtarë që kanë një qëndrim të mirë, bashkë me fëmijët e tyre që kanë një sjellje të mirë. Në rast se Reparti i Strehimit ka ndonjë pyetje për ndonjërën nga kërkesat për ata me nevoja të veçanta, do të kontaktojë sekretarin e kongregacionit.
6 Pjesëmarrja në një kongres tjetër: Për shkak të rrethanave mund të kërkoni që të merrni pjesë në një kongres tjetër, në vend se në kongresin ku është caktuar kongregacioni juaj. Në qoftë se keni nevojë për informacione në lidhje me një kongres tjetër, ju lutemi flitni me sekretarin e kongregacionit tuaj. Në anën e pasme të kërkesës së strehimit për ata me nevoja të veçanta janë radhitur sipas datës kongreset krahinore që do të zhvillohen në Shqipëri dhe Kosovë, si edhe adresat e vendeve ku do të zhvillohen ato. Postojeni kërkesën në adresën e përshtatshme dhe në zarf vini edhe adresën tuaj të shkruar me germa shtypi. Sigurohuni që në kërkesë të keni shënuar datat e kongresit në të cilin doni të merrni pjesë. Reparti i Strehimit për atë kongres do t’ju dërgojë listën e tyre më të fundit të strehimeve të rekomanduara.
7 Në një grumbullim të popullit të Jehovait që u mbajt gati 2.500 vjet më parë, Ezdra dhe shokët e tij levitë lexuan nga Fjala e Perëndisë dhe ua shpjeguan njerëzve që ishin mbledhur. Cili ishte rezultati? Nehemia 8:12 na thotë se «tërë populli shkoi . . . të kremtojë me hare të madhe, sepse ata i kishin kuptuar fjalët që u ishin shpjeguar». A nuk jemi mirënjohës që klasa e skllavit të mirosur, ashtu si Ezdra dhe levitët, përdor Fjalën e Perëndisë, e shpjegon atë dhe na tregon se si ta zbatojmë në jetë? Duke vepruar kështu ky skllav pasqyron dashurinë dhe interesimin e vërtetë të Jehovait për të gjithë popullin e Tij. Jini të vendosur që të merrni pjesë në të tria ditët e kongresit krahinor «Të ecim me Perëndinë»!
[Kutia në faqen 3]
Oraret e programit
E premte dhe e shtunë
9:30 - rreth orës 17:10
E diel
9:30 – rreth orës 16:05
[Kutia në faqen 4]
Si mund të mbështetni organizimin e strehimit?
◼ Qëndroni vetëm në hotelet e shënuara në listën e strehimeve të rekomanduara të këtij viti. Mos u telefononi hoteleve që nuk janë në listë dhe mos i pyetni nëse kanë ndonjë tarifë të veçantë për kongresin. Hotelet që nuk janë në listë shpesh përgjigjen se kanë një tarifë të veçantë për Dëshmitarët e Jehovait.
◼ Në rast se nuk ka dhoma të lira pasi t’u keni telefonuar të gjitha hoteleve të shënuara në listë ose në qoftë se keni ndonjë problem me ndonjë hotel, njoftoni sekretarin e kongregacionit. Ai duhet të lidhet me Repartin e Strehimit të kongresit, duke përdorur informacionin në krye të listës. Në vend që t’i telefononi një hoteli që nuk është në listë, ju lutemi të pritni sa të merrni një listë të përditësuar për kongresin.
◼ Rezervoni aq dhoma sa do të përdorni.
◼ Për të garantuar rezervimin, nëse kërkohet nga hoteli, dërgoni një paradhënie për çdo dhomë të rezervuar.
◼ Mbani rezervimin e parë.
◼ Nuk duhet të bëhen kopje të listës së strehimeve të rekomanduara për çdo lajmëtar.
[Kutia në faqen 4]
Cila është mënyra më e mirë për të rezervuar një dhomë hoteli?
1. Merrni në telefon hotelet gjatë orarit të rregullt të punës, duke përdorur numrat e telefonit të shënuar në listën e strehimeve të rekomanduara.
2. Bëjini të ditur hotelit se do të ndiqni kongresin e Dëshmitarëve të Jehovait.
3. Jepni datat kur do të regjistroheni në hotel dhe kur do të largoheni nga hoteli.
4. Në rast se nuk ka dhoma të lira, merrni në telefon një hotel tjetër të shënuar në listë.
5. Sigurohuni që të paguani tarifën që tregohet në listën e strehimeve. Mos pranoni një tarifë më të lartë.
6. Bëni rezervimin dhe kërkoni një konfirmim për të.
7. Nëse kërkohet, jepni një paradhënie sipas mënyrës së caktuar nga hoteli.