Të synojmë për të bërë më shumë në shërbim
1 Apostulli Pavël i këshilloi të krishterët të ecnin në rrugën e Perëndisë dhe ‘të vazhdonin ta bënin këtë edhe më shumë’. (1 Sel. 4:1) Çfarë do të thotë kjo për ne? Ndër të tjera, do të thotë se duhet të kërkojmë vazhdimisht mënyra për të marrë pjesë sa më shumë në veprimtaritë frymore, duke u përpjekur gjithmonë të ‘kryejmë plotësisht shërbimin tonë’.—2 Tim. 4:5.
2 Motivi: Synimi për të bërë më shumë vjen nga dëshira për t’i shërbyer në mënyrë më të plotë Krijuesit tonë. Duam të rritemi frymësisht dhe kërkojmë mënyra për të përmirësuar shërbimin. Mbajtja e një rutine të mirë me motivin e duhur, do të na ndihmojë të arrijmë synimet teokratike.—Psal. 1:1, 2; Filip. 4:6; Hebr. 10:24, 25.
3 Të përpiqemi të zgjerojmë shërbimin do të thotë të kultivojmë frymën e dhënies dhe të vetëmohimit. Kjo frymë mund të zhvillohet me anë të lutjes dhe duke medituar për shembullin e shkëlqyer të Jezuit. (Mat. 20:28) Jezui provoi shumë gëzim duke u shërbyer të tjerëve gjatë gjithë shërbimit të tij. (Vep. 20:35) Mund ta imitojmë Jezuin duke treguar interes për njerëzit dhe duke u treguar të vëmendshëm ndaj rasteve që na jepen për të bërë më shumë në shërbim.—Isa. 6:8.
4 Roli i prindërve: Që në vogëli, fëmijëve mund t’u ngulitet dëshira për t’u shërbyer të tjerëve dhe për të bërë më shumë në shërbim. Fëmijët do ta vënë re zellin e pjesëtarëve të familjes dhe se si përpiqen të bëjnë sa më shumë në shërbim. Kur ishte i vogël, një vëlla u nxit të bënte më shumë si rezultat i bashkëpunimit me gjyshin në veprimtaritë e kongregacionit. Zelli dhe kënaqësia me të cilën shërbente gjyshi e shtyu të kërkonte mundësi për t’u shërbyer vëllezërve. Tani ai është një shërbëtor ndihmës.
5 Nevoja për vëllezër: ‘Kush synon një detyrë, dëshiron një punë të shkëlqyer’. (1 Tim. 3:1) Këto fjalë i inkurajojnë vëllezërit të synojnë të kualifikohen për privilegje të mëtejshme shërbimi në organizatën e Jehovait. Dhe kjo nuk kërkon të kesh ndonjë aftësi të veçantë apo dhunti të jashtëzakonshme. Një vëlla që ka synime duhet të kërkojë në radhë të parë Mbretërinë dhe të jetë i zellshëm në shërbim. (Mat. 6:33; 2 Tim. 4:5) Ai duhet të përpiqet të jetë një shembull i mirë për të tjerët.
6 Në mbarë botën: Jehovai po e përshpejton mbledhjen e njerëzve. (Isa. 60:22) Është urgjente që, të gjithë ata që ndjekin shembullin e Jezuit, ta kryejnë sa më plotësisht shërbimin e tyre. Raporti botëror tregon se gjatë vitit të shërbimit 2006 u pagëzuan 248.327 lajmëtarë. Kjo do të thotë mesatarisht 680 Dëshmitarë të rinj çdo ditë. Le të vazhdojmë të gjithë të kërkojmë mënyra për të shërbyer në mënyrë sa më të plotë.