Të inkurajojmë njëri-tjetrin kur jemi në shërbim
1 Të gjithë e vlerësojmë kur inkurajohemi nga «një fjalë e thënë në kohën e duhur». (Prov. 25:11) Si të sigurohemi që bisedat tona janë inkurajuese kur jemi me të tjerë në shërbim?
2 Biseda inkurajuese: Sa inkurajuese është të flasim për gjëra frymore kur jemi në predikim! (Psal. 37:30) Mund të flasim për prezantimet ose të tregojmë përvojat e bukura që kemi pasur kohët e fundit në shërbim. (Vep. 15:3) A kemi veçuar ndonjë pikë interesante nga leximi personal i Biblës, nga revistat e fundit ose nga mbledhjet e kongregacionit? Gjithashtu mund të flasim edhe për pika nga një fjalim publik që kemi dëgjuar kohët e fundit në Sallën e Mbretërisë.
3 Ndoshta shkurajohemi disi kur i zoti i një shtëpie ngre një kundërshtim që nuk dimë ta kapërcejmë. Do të ishte mirë që, pasi të largohemi nga ajo shtëpi, të flasim me shokun e shërbimit se si mund të kapërcehet ky lloj kundërshtimi në të ardhmen, ndoshta duke parë edhe librin Të arsyetojmë. Ose, nëse na ka pëlqyer diçka në prezantimin e shokut të shërbimit, një përgëzim i sinqertë do ta inkurajonte mjaft.
4 Të marrim iniciativën: A ka nga ata në grupin e studimit të librit me të cilët kemi kohë pa dalë në shërbim? Mund të ftojmë dikë të dalë me ne në shërbim dhe kështu mund të «inkurajojmë njëri-tjetrin». (Rom. 1:12) Pionierët e rregullt ose ndihmës e vlerësojnë nëse kanë dikë që i shoqëron në shërbim, sidomos në mëngjes herët ose pasdite vonë kur nuk ka shumë lajmëtarë që dalin në shërbim. Kjo mund të jetë një mbështetje për pionierët. A ka ndonjë lajmëtar me probleme shëndetësore që e kufizojnë të bëjë shumë në shërbim. Do të ishte me dobi për të dy po të lëmë takim me të që të na shoqërojë në shërbim, ndoshta në një studim biblik.—Prov. 27:17.
5 Lavdërimet dhe shprehjet e mirënjohjes, edhe për gjëra të vogla, janë gjithmonë inkurajuese. Duhet ta mbajmë parasysh këtë kur jemi me të tjerë në shërbim, sepse ne duam ‘të vazhdojmë . . . të ndërtojmë njëri-tjetrin’.—1 Sel. 5:11.