MINI

Mbretëri e lashtë, së cilës Perëndia i bëri thirrje që të luftonte kundër Babilonisë. Asokohe Mini ishte aleate me mbretëritë e Araratit dhe Ashkenazit, e të gjitha ishin nën komandën e Kirit.​—Jr 51:27-29.

Vendndodhja e saktë e kësaj mbretërie të lashtë nuk dihet. Disa hartografë e vendosin në rajonin mes liqenit Van dhe lumit Arakses. Mirëpo shumica e komentuesve janë të mendimit se ndodhej në juglindje të liqenit Van.

Nëse «manai» ose manaitët ishin banorë të Minit, siç thonë disa studiues, atëherë, sipas mbishkrimeve kuneiforme, Minin e pushtoi në fillim Asiria e pastaj Perandoria Mede. Një kronikë babilonase tregon se në vitin e dhjetë të mbretërimit (636 p.e.s.), Nabopolasari «zuri rob manaitët që u vajtën në ndihmë atyre (d.m.th. asirianëve)». (Assyrian and Babylonian Chronicles, nga A. K. Grejsëni, 1975, f. 91) Por në kohën kur ra Babilonia, në vitin 539 p.e.s., Mini ishte nën sundimin e Perandorisë Medo-Perse.