Programi i ri i Asamblesë Speciale Njëditore

Masat për mbajtjen e asambleve speciale njëditore filluan në vitin 1987. Këto grumbullime njëditore kanë dalë se janë ndërtuese për shërbëtorët e Jehovait dhe për personat e interesuar që marrin pjesë në to. Duke filluar nga shtatori i vitit 1998, do të prezantohet programi i ri i Asamblesë Speciale Njëditore. Të nëntë fjalimet, intervistat dhe përvojat e shumta do të dalin se janë të një dobie frymore për ju.

«Trego çmueshmëri për tryezën e Jehovait» është tema e programit të ri. (Isa. 65:14; 1. Kor. 10:21) Ajo do të forcojë vendimin tonë për ta mbajtur adhurimin që i japim Jehovait në vendin e parë në jetën tonë. (Psal. 27:4) Pjesa e mbikëqyrësit me temë «Të shqyrtojmë prirjet e zemrës sonë» do të trajtojë qëndrimin që kemi në lidhje me pjesëmarrjen në mbledhje. Një orator i ftuar do të na tregojë se si «Të ruajmë gjendjen tonë frymore, duke u ushqyer në tryezën e Jehovait». Inkurajim praktik do t’u jepet edhe të rinjve në organizatën e Jehovait, që të qëndrojnë të palëkundur në shërbimin ndaj Perëndisë. Fjalimi kryesor i oratorit vizitues me titull, «Të forcuar frymësisht për të dhënë një dëshmi të guximshme», do të tregojë se në ç’mënyrë masat e marra përmes kongregacionit na pajisin për të dëshmuar me guxim në lidhje me Mbretërinë. Kush nuk do të donte të përfitonte nga një program i tillë?!

Të sapodedikuarit që duan të pagëzohen, duhet ta informojnë mbikëqyrësin drejtues sa më shpejt që është e mundur. Jemi të bindur se ndërsa fillojmë vitin e 12 të mbajtjes së Asamblesë Speciale Njëditore, çdo pjesëmarrës do të forcohet frymësisht për veprën që e pret përpara.