Kongresi Krahinor i Dëshmitarëve të Jehovait për vitin 2000 «Zbatues të Fjalës së Perëndisë»
1 «Unë do të të kremtoj në kuvendin e madh, do të lavdëroj në mes të një populli të shumtë.» (Psal. 35:18) Le të imagjinojmë se sa i emocionuar do të ndihej sot Davidi po të shihte këta mijëra të shumtë të mbledhur së bashku në paqe, për të marrë udhëzimin hyjnor në kongreset tona! A ishim mes atyre 3547 vetave që ndoqën një prej kongreseve krahinore «Fjala profetike e Perëndisë»? Në korrik të vitit 1999, në Shqipëri u mbajtën katër kongrese. Kongresi krahinor për vitin 2000, do të na sigurojë mundësi të reja për t’u mbledhur me lavdëruesit e tjerë të Jehovait që janë «të vetëdijshëm për nevojën e tyre frymore» dhe të lumtur e të etur për të «dëgjuar atë që fryma u thotë kongregacioneve».—Mat. 5:3, BR; Zbul. 2:29, BR.
2 Rregullimi i strehimit: Që nga janari i vitit 2000, në qytetet ku do të mbahet kongresi, do të organizohen grupe me vëllezër që do të angazhohen në kërkimin e vendeve të strehimit. Këta vëllezër do të jenë të stërvitur për të gjetur hotele, konvikte ose dhoma të tjera të përshtatshme me një çmim të arsyeshëm. Në bazë të marrëveshjeve të bëra me pronarët e këtyre lokaleve, Reparti i Strehimit do të ketë në dispozicion dhoma fjetjeje me një çmim të caktuar për çdo person që dëshiron të marrë pjesë në kongresin e atij qyteti.
3 Ndërkohë, në qytetin ku mbahet kongresi, Komiteti i Kongresit do të ftojë kongregacionet lokale që të ofrojnë ndihmë për të strehuar ata vëllezër që kanë më shumë nevojë. Në një Mbledhje të Shërbimit, pleqtë do të njoftojnë vëllezërit dhe personat e interesuar që të bëjnë një përpjekje për të ofruar strehim falas. Në fund të mbledhjes, pleqtë do të bëjnë një listë me emrat e atyre që ofrojnë strehim dhe do t’ia dërgojnë sa më shpejt Komitetit të Kongresit. A ke mundësi të ofrosh ndihmë në këtë çështje? Jehovai bekon mikpritjen bujare të shërbëtorëve të tij.—Zan. 18:1-5, 18; 1. Mbret. 17:8-16; Vep. 16:14, 15.
4 Në këtë mënyrë, disa muaj përpara kongresit, Reparti i Strehimit do të informojë kongregacionet për çmimet e lokaleve që janë gjetur. Gjithashtu, do të ketë në dispozicion disa vende fjetjeje falas për ata që kanë nevoja të veçanta. Ky rregullim i parakohshëm do t’u japë mundësi vëllezërve dhe personave të interesuar që të bëjnë planet e duhura dhe të «llogaritin shpenzimet», të cilat, përveç strehimit përfshijnë udhëtimin dhe ushqimin. (Luka 14:28) Sugjerojmë që individët dhe familjet të bëjnë një program të mirë për të kursyer paratë e nevojshme. Duke bërë një përpjekje të veçantë për të marrë pjesë në çdo ditë të kongresit, do t’i tregoni Jehovait çmueshmërinë për ftesën që ju ka drejtuar.—Psal. 84: 10.
5 Në kohën e caktuar, Reparti i Strehimit do të kërkojë nga çdo kongregacion listat me emrat e atyre që kërkojnë strehim. Pleqtë do të marrin udhëzime lidhur me informacionet që duhet të dërgojnë për çdo person që bën këtë kërkesë. Pas kësaj, Reparti i Strehimit do të caktojë një vend strehimi për çdonjërin që ka bërë kërkesë dhe do ta njoftojë secilin me anë të një letre. Si rezultat, para se të shkojë në vendin e kongresit, çdo pjesëmarrësi do t’i jetë siguruar një strehim.
6 Të marrim masa që të jemi të pranishëm në të tria ditët: A është përpjekur Satanai të na shpërqendrojë që të mos u kushtojmë vëmendje gjërave frymore? Mjerisht, shumë motra, vëllezër si edhe familjet e tyre, po lënë që t’u humbasë ky ushqim jetësor frymor. Në ç’mënyrë? Duke mos ndjekur sesionet e ditës së premte të kongresit krahinor. Në disa raste është vënë re një përqindje e madhe vëllezërish që nuk arrijnë të marrin stërvitjen frymore dhe shoqërinë që sigurojnë sesionet e ditës së premte.
7 Mund të jetë që disa vëllezër ngurrojnë t’u afrohen punëdhënësve të tyre për t’u kërkuar leje nga puna që të ndjekin kongresin. A është kështu dhe me ne? Përse të mos i lutemi Jehovait rreth kësaj çështjeje dhe të marrim guximin për t’i shpjeguar situatën punëdhënësit tonë? Le të kujtojmë përfundimin e mirë që pati Nehemia, i cili ndodhej në një situatë të ngjashme. (Neh. 2:1-6) Le të kemi besim në Atin tonë qiellor, që është i gatshëm për të na ndihmuar, duke ditur se nëse vëmë në vend të parë interesat e Mbretërisë, ai do të na sigurojë gjërat e tjera të nevojshme për jetën!—Mat. 6:32b, 33.
8 Si ndikojnë te ne kongreset tona? Një motër nga pjesa lindore e Shteteve të Bashkuara shkroi: «Faleminderit shumë për Kongresin Krahinor të vitit 1999. Shoqërimi me vëllezërit që i shoh vetëm një herë çdo vit më sjell shumë gëzim. Të vërtetën e njoha kur isha një adoleshente plot me ide në kokë dhe akoma e kujtoj me dashuri të madhe ditën kur drejtuesi im i studimit të Biblës më mori me vete në një kongres që ishte i pari për mua. Unë shikoja retë sipër kokës në atë stadium të hapur, ndërsa këndonim këngën e Mbretërisë ‘Mijëra vëllezër’ dhe qaja. ‘Me gjithë këtë popull të mrekullueshëm përreth meje,—pyeta veten:—si mund të më dojë mua Jehovai?’ Atë ditë vendosa t’i shërbeja plotësisht Jehovait.» Ç’fjalë që të ngrohin zemrën! Sigurisht që është një kënaqësi të shoqërohesh me popullin e pastër të Jehovait, apo jo?
9 Në këtë pjesë përfundimtare të ditëve të fundit, kemi më shumë nevojë se kurrë për kongresin krahinor vjetor. Ai është një masë që ka marrë Jehovai me qëllim që të ruajmë ekuilibrin dhe shëndetin tonë frymor. Prandaj, le të jemi të vendosur që të ndjekim të tria ditët e Kongresit Krahinor të këtij viti me temë «Zbatues të Fjalës së Perëndisë»! Çfarë mund të bëjmë për ta arritur këtë? Le t’i kërkojmë që më përpara punëdhënësit leje nga puna për të ndjekur të gjithë kongresin. Nëse kemi të ardhura të kufizuara, të fillojmë që tani të vëmë diçka mënjanë për shpenzimet e nevojshme. T’i kërkojmë ndihmë Jehovait për të kapërcyer ndonjë pengesë. Ndërsa i bëjmë këto, mund të presim me padurim që të gëzojmë shoqërinë e ngrohtë të vëllezërve tanë dhe motrave tona, si edhe të dëgjojmë fjalët e jetës së përhershme nga Ati ynë qiellor, Jehovai.—Krahaso Gjoni 6:68.
[Kutia në faqen 3]
Oraret e programit
E premte dhe e shtunë
9.30 paradite – 17.00 pasdite
E dielë
9.30 paradite – 16.00 pasdite