Kongresi krahinor i Dëshmitarëve të Jehovait për vitin 2003 «T’i japim lavdi Perëndisë»
1 Me anë të profetit të tij besnik Isaisë, Jehovai urdhëroi: «Kushtomëni vëmendje, o populli im, ma vini veshin, o kombi im.» (Isa. 51:4, BR) Në këto kohë të fundit që sa vjen e bëhen më kritike, a nuk jemi në të njëjtën mendje se është më e rëndësishme se kurrë ndonjëherë që t’u kushtojmë vëmendje urdhërimeve të Jehovait. Një nga mënyrat për ‘t’ia vënë veshin’ Jehovait është duke iu bindur urdhrit të tij që të mblidhemi për ta adhuruar. Vërtet, mezi e presim këtë mundësi të veçantë që na ofrojnë kongreset krahinore vit pas viti! Për vitin 2003 po planifikohet një kongres kombëtar në Tiranë për gjithë Shqipërinë dhe Kosovën.
2 Siç tregonte numri i Kullës së Rojës së 1 korrikut, 2002, do të mbahen edhe kongrese ndërkombëtare në disa shtete të tjera me delegatë nga e gjithë bota. Atmosfera ndërkombëtare do të ndihet në të gjitha kongreset krahinore. Në shumë vende gjatë këtyre kongreseve do të jenë të pranishëm misionarët dhe kështu do të jetë e mundur të dëgjohen disa nga përvojat e tyre. Çfarë mund të bëjmë për të nxjerrë dobi sa më plotësisht nga rregullimet që po bëhen tani për kongreset që do të mbahen në verë?
3 Të jemi të pranishëm çdo ditë: Për të nxjerrë dobi plotësisht nga udhëzimet që na jep klasa e skllavit të besueshëm dhe të matur, duam të sigurohemi që të jemi atje gjatë gjithë programit. (Mat. 24:45) A të duhet t’i kërkosh punëdhënësit tënd leje që të ndjekësh çdo ditë të kongresit? Para se t’i kërkonte leje mbretit Artakserks që të shkonte në Jerusalem për të ndërtuar muret, Nehemia ‘iu lut Perëndisë së qiellit.’ (Neh. 2:4) Edhe ti duhet t’i lutesh Jehovait për të të dhënë guxim që t’i kërkosh leje punëdhënësit që të ndjekësh të tria ditët e kongresit. Po nëse punëdhënësi ngurron të të japë leje? Ndoshta po t’i shpjegosh se udhëzimet që marrim në kongres na ndihmojnë të jemi punëtorë të ndershëm, të zellshëm dhe të besueshëm mund ta bëjë atë të përgjigjet në mënyrë të favorshme. Përveç kësaj, në rast se kemi pjesëtarë të familjes që janë jobesimtarë do të ishte diçka e dashur t’i informonim sa më shpejt të ishte e mundur për përgatitjet rreth kongresit.
4 Të përdorim listën e strehimeve të rekomanduara për të bërë rezervime: Reparti i Strehimit i ka kaluar muajt e fundit duke siguruar dhoma hoteli të mjaftueshme për kongresin. Kongregacioni do të marrë një listë të strehimeve, e cila do të vendoset në tabelën e informacionit pas shqyrtimit të kësaj shtojce në Mbledhjen e Shërbimit. Nuk duhet të bëhen kopje të kësaj liste për çdo lajmëtar.
5 Duke përdorur udhëzimet e kutisë në faqen 4, sigurohu që t’i bësh rezervimet vetëm në hotelet e shënuara në këtë listë. Të lutemi të mos telefonosh në hotelet që nuk janë në listë dhe të mos i pyetësh nëse kanë ndonjë çmim të caktuar për kongresin e Dëshmitarëve të Jehovait. Numri i lejuar për të qëndruar në një dhomë tregohet në listë poshtë nëntitullit «Të rritur» me numrin maksimal që zakonisht është 4 veta, përfshirë edhe fëmijët. Të lutemi t’i përmbahesh kësaj kërkese!
6 Për të garantuar rezervimin tënd, mund të të kërkohet t’i dërgosh një paradhënie hotelit për çdo dhomë të rezervuar brenda një periudhe të caktuar. Përndryshe hoteli mund t’ia japë dhomën dikujt tjetër. Disa hotele përveç konfirmimit gojor në telefon, mund të dërgojnë një konfirmim të shkruar në faks.
7 Në rast se nuk ka dhoma në dispozicion, pasi të kesh telefonuar në të gjitha hotelet e shënuara në listë ose në qoftë se del ndonjë problem me ndonjë hotel, informo sekretarin e kongregacionit. Ai duhet të lidhet me Repartin e Strehimit të kongresit, duke përdorur numrin e telefonit në krye të listës. Në vend që të telefonosh në një hotel që nuk është në listë, prit sa të marrësh një listë të përditësuar për kongresin.
8 Të ndihmojmë ata me nevoja të veçanta: A ka në kongregacionin tonë disa persona që mund të kenë nevojë për ndihmë që të ndjekin kongresin? Nevojat e veçanta të personave të moshuar, të dobët fizikisht, të atyre në gjendje të keqe ekonomike ose të atyre që janë në shërbimin e plotkohor plotësohen kryesisht nga të afërmit e tyre të krishterë. Por, pleqtë si dhe të tjerët që janë në dijeni të rrethanave të këtyre personave mund t’u sigurojnë ndihmë të dashur.
9 Komiteti i Shërbimit i Kongregacionit do të shqyrtojë të gjitha kërkesat e strehimit për ata me nevoja të veçanta, të bëra nga lajmëtarët. Duke përdorur udhëzimet e dhëna në formular, komiteti i shërbimit duhet të përcaktojë nëse secila kërkesë është një nevojë e veçantë që nuk mund të plotësohet nga vëllezërit e kongregacionit. Një masë e tillë është vetëm për lajmëtarët që kanë një reputacion të mirë dhe për fëmijët e tyre me sjellje të lavdërueshme. Reparti i Strehimit do të lidhet me sekretarin e kongregacionit nëse në kongregacion ka ndonjë pyetje rreth kërkesës së strehimit për ata me nevoja të veçanta.
10 Jemi një teatër për të tjerët: A e shohin njerëzit kontrastin midis Dëshmitarëve të Jehovait dhe atyre në botë? Sigurisht që po. Vini re disa komente nga disa drejtues hotelesh në një qytet: «Gjithmonë kemi pasur marrëveshje me ata që zhvillojnë kongrese të ndryshme, por ju keni qenë nga më bashkëpunuesit dhe më të sjellshmit.» «Javën e kaluar këtu kishim një grup tjetër fetar. Dallimi midis jush dhe atyre është i dukshëm.» «E dimë që gjithnjë mund të mbështetemi te ju për ndihmë dhe bashkëpunim.» A nuk na bëjnë komente të tilla të çmojmë faktin se «mençuria nga lart» ka një ndikim pozitiv në personalitetin tonë? (Jak. 3:17) Meqë jemi «një teatër për botën», sjellja jonë pasqyroftë kurdoherë dinjitetin dhe madhështinë e Perëndisë tonë, Jehovait.—1 Kor. 4:9.
11 Meqenëse «skena e kësaj bote po ndryshon», kemi nevojë për kongreset krahinore që të qëndrojmë të përqendruar te gjërat frymore. (1 Kor. 7:31) Kërkon përpjekje, por ia vlen që të marrim masa për të ndjekur të tria ditët e kongresit. Kongresi krahinor për vitin 2003 ‘T’i japim lavdi Perëndisë’ është përgatitur që të na ndihmojë të jemi të palëkundur, ndërsa presim ekzekutimin e gjykimit të Jehovait kundër botës së Satanait. Le të mos lejojmë asgjë të na pengojë për të marrë udhëzimet që Jehovai ka përgatitur për ne.—Isa. 51:4, 5.
[Kutia në faqen 3]
Oraret e programit
E premte dhe e shtunë
9.30 paradite - 17.00 pasdite
E diel
9.30 paradite - 16.05 pasdite
[Kutia në faqen 4]
Si të bësh rezervimet në hotel
1. Telefonoju hoteleve gjatë orarit të rregullt të punës, duke përdorur numrat e telefonit të shënuara në listën e strehimeve të rekomanduara.
2. Informo hotelin se do të ndjekësh kongresin e Dëshmitarëve të Jehovait.
3. Jep datat kur do të regjistrohesh në hotel dhe kur do të largohesh nga hoteli.
4. Sigurohu që do të paguash tarifën që tregohet në listën e strehimeve. Mos prano një çmim më të lartë.
5. Nëse nuk ka dhoma në dispozicion, telefonoji një hoteli tjetër.
6. Bëj rezervimin dhe kërko një konfirmim për të.
7. Në rast se të kërkohet, jep një paradhënie, brenda kohës së caktuar nga hoteli.
8. Nëse ke ndonjë problem, fol me sekretarin e kongregacionit.
Të lutemi:
◼ Qëndro vetëm në hotelet e shënuara në listën e strehimeve.
◼ Rezervo aq dhoma sa do të përdorësh.
◼ Mbaj rezervimin e parë.