Programi i asamblesë speciale njëditore për vitin 2010
1. (a) Çfarë temash biblike janë shqyrtuar në asambletë speciale njëditore vitet e fundit? (b) A ju ka ndihmuar në shërbim ndonjë pikë e veçantë nga asambletë speciale njëditore të mëparshme?
1 «Sigurohuni për gjërat më të rëndësishme», «Të qëndrojmë të patundur si një kope», «Vazhdoni të jepni dëshmi për të vërtetën» dhe «Ne jemi argjila—Jehovai është Poçari ynë». (Filip. 1:9, 10, 27; Gjoni 18:37; Isa. 64:8) Këto janë vetëm disa nga temat e shumta që janë shqyrtuar në asambletë speciale njëditore në të kaluarën. A prisni me padurim të ndiqni asamblenë speciale njëditore për vitin e shërbimit 2010? Ajo do të shqyrtojë temën: «Koha që mbetet është shkurtuar», e cila është marrë nga 1 Korintasve 7:29.
2. Si mund të kultivohet entuziazmi për këtë asamble?
2 Filloni të kultivoni entuziazmin tuaj për asamblenë speciale njëditore sapo të njoftohet data e saj në kongregacion. Disa prindër i ndihmojnë fëmijët që ta presin me padurim asamblenë duke shënuar në kalendarin e familjes datën kur do të mbahet, bashkë me një listë të gjërave që duhet t’i marrin me vete në asamble, dhe pastaj numërojnë ditët e mbetura. Gjatë Adhurimit Familjar mund të rishikoni shënimet nga asambletë speciale njëditore në të kaluarën. Gjithashtu, mund të përgatitni zemrën për këtë ngjarje duke rishikuar faqet 13-16 në librin Të nxjerrim dobi nga arsimimi në Shkollën e Shërbimit Teokratik, i cili do t’ju ndihmojë personalisht dhe si familje ‘t’i kushtoni vëmendje mënyrës se si dëgjoni’.—Luka 8:18.
3. Si mund të nxjerrim plotësisht dobi nga programi i asamblesë?
3 Zbatojeni atë që mësoni: Pas një asambleje, dëgjohet shpesh shprehja: «Ç’program i mrekullueshëm!» Kjo është gjithmonë e vërtetë, pasi është një nga bekimet e shumta nga Jehovai. (Prov. 10:22) Por, që ato informacione të jenë frytdhënëse, duhet të meditoni për to dhe ‘t’i mbani’. (Luka 8:15) Rrugës për në shtëpi bisedoni për programin me familjen tuaj ose me ata që po bëni rrugën. Flisni për synimet që keni dhe për ato pika që do t’ju ndihmojnë në shërbim. Kjo do t’ju ndihmojë që të nxirrni dobi nga asambleja edhe shumë kohë pasi të ketë mbaruar.—Jak. 1:25.
4. Pse do të jetë speciale për ne kjo asamble?
4 Gjithmonë ndihemi të veçantë kur marrim ndonjë dhuratë të dobishme për të cilën kemi vërtet nevojë. A nuk e presim me padurim atë që Jehovai ka përgatitur për ne në asamblenë e ardhshme speciale njëditore? Mund të jemi të sigurt se do të jetë e dobishme në çdo drejtim. Mund të presim nga Ati ynë qiellor, Jehovai, që të na japë pikërisht dhuratën e duhur me anë të inkurajimit dhe stërvitjes për të kryer veprën që ai na ka caktuar.—2 Tim. 4:2; Jak. 1:17.