Programi i asamblesë së re speciale njëditore

Tema e programit të asamblesë së re speciale njëditore për vitin e ri të shërbimit ka një bazë të fortë biblike: «Nënshtrojuni Perëndisë​—Kundërvijuni Djallit!» (Jak. 4:7) Kjo është një udhëheqje e shëndoshë për këto kohë kritike. Duke iu bindur urdhërimeve të Perëndisë vihemi drejtpërdrejt përballë Satanait. Programi do të na mësojë si të qëndrojmë të patundur ndaj planeve besimshkatërruese të Djallit. Cilët janë disa nga xhevahirët frymorë që do të marrim në këtë asamble?

Duke trajtuar temën «Të shfaqim nënshtrim hyjnor si pjesëtarë të familjes» Mbikëqyrësi qarkor do të tregojë se si kjo e forcon familjen që t’u bëjë ballë presioneve të botës. Fjalimi i parë i oratorit vizitues për atë ditë të asamblesë, me temë «Çfarë do të thotë të kundërshtojmë Djallin?», do të shpjegojë pse dhe si duhet të ndërmarrim veprime të vendosura që t’u bëjmë ballë synimeve të Satanait për të shkatërruar gjendjen tonë frymore. Dy pjesë u janë përshtatur veçanërisht të rinjve, të cilët duhet të jenë po ashtu syhapur ndaj planeve të Djallit. Shumë të krishterë që sot janë të rritur, nuk pranuan të jepen pas dëshirave të botës kur ishin të rinj. Do të kënaqemi duke dëgjuar disa nga përvojat e tyre personale.

T’i nënshtrohesh autoritetit është një kërkesë për të gjithë ata që formojnë shoqërinë njerëzore. Kështu, fjalimi përmbyllës i oratorit vizitues do të nxjerrë në pah katër fushat ku duhet të tregojmë nënshtrim hyjnor: (1) ndaj qeverive, (2) në kongregacion, (3) në qendrën e punës dhe (4) në rrethin familjar. Çfarë programi praktik!

Ata që duan të pagëzohen në këtë asamble speciale njëditore duhet të njoftojnë sa më shpejt që është e mundur mbikëqyrësin drejtues. Që të gjithë duhet të shënojmë datën në kalendar dhe të bëjmë plane për të ndjekur të gjithë programin e asamblesë. Bekimet që marrim do të jenë të përhershme, ndërkohë që i nënshtrohemi Jehovait përjetësisht.