Kongresi Krahinor i Dëshmitarëve të Jehovait për vitin 2002, «Lajmëtarë të zellshëm të Mbretërisë»
1 «U gëzova kur më thanë: ‘Të shkojmë në shtëpinë e Zotit [Jehovait, BR].’» (Psal. 122:1) Duke shqyrtuar shprehjen e psalmistit vërejmë: (1) se si ndihej kur u ftua për t’u bashkuar me të tjerët në adhurimin e Jehovait, (2) shoqëritë e mira që kishte, të cilat ishin po ashtu thellësisht të interesuara për adhurimin e vërtetë dhe (3) planin që duhet të ketë qenë i nevojshëm për të bërë ftesën, për t’u mbledhur së bashku dhe për të udhëtuar drejt shtëpisë së Perëndisë.
2 A nuk pasqyrojnë fjalët e psalmistit vetë ndjenjat tona kur dëgjojmë që po bëhen plane për kongresin e ardhshëm? Na pushton padurimi ndërsa kujtojmë gëzimet e kongreseve të kaluara dhe mundësinë që të jemi sërish në një grumbullim të veçantë me personat që e duan Jehovain. Janë bërë rregullime që për tri ditë Kongresi Krahinor për vitin 2002, «Lajmëtarë të zellshëm të Mbretërisë», të mbahet në të gjithë Shqipërinë. Tani është koha të bëjmë planet për të ndjekur dhe për të nxjerrë sa më shumë dobi nga gostia frymore që na pret.
3 «Kujdestari i besueshëm, i maturi», ka filluar të përgatitë ushqimin në kohën e duhur për ta ofruar në kongres. (Luka 12:42) Që të shmanget grumbullimi i tepërt, për çdo vend ku mbahet kongresi, caktohet që më përpara se cilët kongregacione do të marrin pjesë në të. Veç kësaj, shumë vëllezër kanë filluar të organizojnë repartet e ndryshme të kongresit që ‘çdo gjë të ndodhë siç ka hije dhe me rregull’. (1 Kor. 14:40) Me kaq shumë gjëra që tashmë kanë filluar të organizohen për dobinë dhe lehtësinë tonë, çfarë mund të bëjmë personalisht që të përgatitemi për kongresin?
4 Të bëjmë plane që tani për t’i ndjekur të tria ditët: A na duhet t’i kërkojmë leje punëdhënësit tonë për të ndjekur të gjithë kongresin ku jemi caktuar? Jehovai e kupton që disa punëdhënës «vështirë se kënaqen». (1 Pjet. 2:18) Por kongreset tona janë shumë të rëndësishme dhe ne duam të bëjmë një përpjekje të zellshme për të ndjekur të gjithë programin. T’i flasim Jehovait në lutje për çështje të tilla, duke kërkuar udhëheqjen e tij që të kemi një përfundim të mirë.—Neh. 2:4.
5 Rregullimi i strehimit: Që nga janari i vitit 2002, në qytetet ku do të mbahet kongresi, do të organizohen grupe me vëllezër që do të merren me kërkimin e vendeve të strehimit. Këta vëllezër janë të stërvitur për të gjetur hotele, konvikte ose dhoma të tjera të përshtatshme me një çmim të arsyeshëm. Në bazë të marrëveshjeve të bëra me pronarët e këtyre lokaleve, Reparti i Strehimit do të ketë në dispozicion dhoma fjetjeje me një çmim të caktuar për çdo person që dëshiron të marrë pjesë në kongresin e atij qyteti.
6 Ndërkohë, në qytetin ku mbahet kongresi, Komiteti i Kongresit do të ftojë kongregacionet lokale që të japin ndihmë për të strehuar ata vëllezër që kanë më shumë nevojë. Në një Mbledhje të Shërbimit, pleqtë do të njoftojnë vëllezërit dhe personat e interesuar që të bëjnë një përpjekje për të dhënë strehim falas. Në fund të mbledhjes, pleqtë do të bëjnë një listë me emrat e atyre që japin strehim dhe do t’ia dërgojnë sa më shpejt Komitetit të Kongresit. A kemi mundësi të ndihmojmë në këtë çështje? Jehovai e bekon mikpritjen bujare të shërbëtorëve të tij.—Zan. 18:1-5, 18; 1 Mbret. 17:8-16; Vep. 16:14, 15.
7 Në këtë mënyrë, disa muaj përpara kongresit, Reparti i Strehimit do të informojë kongregacionet për çmimet e lokaleve që janë gjetur. Gjithashtu, do të ketë në dispozicion disa vende fjetjeje falas për ata që kanë nevoja të veçanta. Ky rregullim i parakohshëm do t’u japë mundësi vëllezërve dhe personave të interesuar që të bëjnë planet e duhura dhe të «llogaritin shpenzimet», të cilat, përveç strehimit, përfshijnë udhëtimin dhe ushqimin. (Luka 14:28) Sugjerojmë që individët dhe familjet të bëjnë një program të mirë për të kursyer paratë e nevojshme. Duke bërë një përpjekje të veçantë për të marrë pjesë në çdo ditë të kongresit, do t’i tregojmë Jehovait çmueshmërinë për ftesën që na ka drejtuar.—Psal. 84:10.
8 Në kohën e caktuar, Reparti i Strehimit do të kërkojë nga çdo kongregacion listat me emrat e atyre që kërkojnë strehim. Pleqtë do të marrin udhëzime lidhur me informacionet që duhet të dërgojnë për çdo person që bën këtë kërkesë. Pas kësaj, Reparti i Strehimit do të caktojë një vend strehimi për çdonjërin që ka bërë kërkesë dhe do ta njoftojë secilin me anë të një letre. Si përfundim, para se të shkojë në vendin e kongresit, çdo pjesëmarrësi do t’i jetë siguruar një strehim.
9 Të vështrojmë kongregacionin: Nëse jemi të vetëdijshëm që një vëlla ose një motër ka ndonjë nevojë fizike a materiale që mund t’ia bëjë të vështirë të ndjekë kongresin, a mund ‘të zgjerohemi’ në dashurinë tonë dhe të japim njëfarë ndihme? (2 Kor. 6:12, 13; Ligj. 15:7) Kjo është fryma që inkurajoi Pavli në 2 Korintasve 8:14. Përse të mos i ftojmë këta individë të udhëtojnë bashkë me ne për në kongres? Nëse janë pionierë, ka të ngjarë të kenë shumë përvoja të mira për të ndarë me ne rrugës. Nëse janë pjesëtarë më të vjetër në kongregacion, mund të kenë një histori të mrekullueshme teokratike që nuk e kemi dëgjuar ndonjëherë. A nuk do të ishte një ndikim i mirë për ne dhe familjen tonë shoqërimi me këta vëllezër e motra? Fryma jonë bujare do të çmohet prej tyre dhe do të shpërblehet nga Jehovai.—Prov. 28:27; Mat. 10:42.
10 Megjithëse për ata me nevoja të veçanta kujdesen së pari të afërmit e tyre të krishterë, pleqtë dhe të tjerët në kongregacion që janë në dijeni të këtyre nevojave, mund të ndihmojnë me dashuri për të bërë rregullimet e nevojshme. (1 Tim. 5:4)
11 Të përgjigjemi me gatishmëri si vullnetarë: Gjatë kongresit, qindra vullnetarë ndihmojnë për të lehtësuar punën e reparteve. Përcjellësit në sallë dhe në vendet e parkimit japin udhëzime për vendet ku ulemi dhe kujdesen për automjetet tona gjatë ditës. Reparti i pastrimit ka privilegjin të mbajë lart reputacionin e shkëlqyer që kemi për pastërtinë, duke e lënë vendin tonë të përkohshëm të adhurimit më të pastër sesa e gjetëm. A mund t’i ndihmojmë këto ose repartet e tjera me mbështetjen tonë? A do të ofrojmë vullnetarisht ndihmën tonë për të shërbyer «sup më sup» me vëllezërit tanë?—Sof. 3:9, BR.
12 A e vërejnë vërtet njerëzit atë që bëjmë? Gjatë një kongresi krahinor të vitit që kaloi, në një hotel po punonte një burrë që e kishte ndërprerë studimin me Dëshmitarët e Jehovait më shumë se 20 vjet më parë. Ai u tha disa Dëshmitarëve se po mendonte ta fillonte përsëri studimin e Biblës dhe të shkonte përsëri në mbledhje. Përse? Sepse Dëshmitarët e kishin trajtuar në mënyrë të dashur gjatë ditëve që ishin në hotel.
13 Një shitës në një hotel u tha vëllezërve tanë: «Grupi juaj është grupi më i mirë që qëndron në hotelet tona. Njerëzit tuaj janë kaq të durueshëm dhe të sjellshëm.» Sa krenar duhet të ndihet Ati ynë qiellor tek na sheh që ndjekim këshillën e Jezuit: «Le të ndriçojë drita juaj para njerëzve, që të shohin veprat tuaja të shkëlqyera dhe t’i japin lavdi Atit tuaj që është në qiej.»—Mat. 5:16.
14 Le të shfaqim qëndrimin e Mbretit David, i cili me gëzim mezi priste të shkonte në shtëpinë e adhurimit të Jehovait. Kongreset tona krahinore, janë një burim jetësor i ushqimit frymor dhe një mundësi e pashoqe për të shijuar shoqërinë e dashur. Prandaj, me entuziazëm ju ftojmë që të filloni të bëni rregullimet tuaja për të ndjekur të gjitha sesionet e të tria ditëve të Kongresit Krahinor të këtij viti «Lajmëtarë të zellshëm të Mbretërisë»!
[Kutia në faqen 3]
Oraret e programit
E premte dhe e shtunë
9.30 paradite – 17.00 pasdite
E diel
9.30 paradite – 16.00 pasdite