Rregullim i ri për rishikimin e programit të asambleve
Ndërsa bota e Satanait shkon keq e më keq, Jehovai na forcon që «të hedhim poshtë paperëndishmërinë dhe dëshirat e botës e të jetojmë me mendje të shëndoshë, drejtësi dhe devocion hyjnor mes këtij sistemi të tanishëm». (Titit 2:12) Një nga gjërat që Ai siguron nëpërmjet ‘skllavit të besueshëm dhe të matur’ është edhe asambleja e përvitshme qarkore dhe ajo speciale njëditore. (Mat. 24:45) Sa forcë na japin këto mbledhje frymore!
Për të na ndihmuar që t’i mbajmë mend dhe t’i vëmë në zbatim udhëzimet që jepen atje, gjatë vitit të shërbimit 2005, do të bëhet një rregullim i ri për të rishikuar programet e këtyre asambleve. Faqet 5 dhe 6 të kësaj shtojce përmbajnë disa pjesë që i bëjnë një përmbledhje asaj që do të paraqitet në secilën nga asambletë, si dhe pyetjet e rishikimit për çdo program. Kongregacionet do ta shqyrtojnë këtë informacion gjatë Mbledhjes së Shërbimit një ose dy javë para asamblesë dhe pak javë pas asamblesë. Si do të bëhet kjo?
Një ose dy javë para se të zhvillohet asambleja qarkore, në Mbledhjen e Shërbimit do të mbahet një fjalim 10-minutash që bazohet në pjesën «Programi i asamblesë së re qarkore». Kjo do të na nxitë ndjenjën e pritjes për programin e asamblesë. Oratori duhet ta drejtojë vëmendjen e auditorit edhe te pyetjet e rishikimit dhe t’i inkurajojë të gjithë që gjatë asamblesë të mbajnë shënime për rishikimin që do të zhvillohet pak javë pas asamblesë.
Pak javë pas asamblesë, në Mbledhjen e Shërbimit, për 15 minuta do të mbahet një rishikim i programit të ditës së parë të asamblesë qarkore. Javën e mëpasshme, 15 minuta të tjera do t’i kushtohen rishikimit të programit të ditës së dytë. Diskutimet do të bazohen në pyetjet e rishikimit që ndodhen në këtë shtojcë. Rishikimi duhet të përqendrohet në vlerën praktike të informacionit. Për të gjetur kohë për këto rishikime, pleqtë mund t’i shkurtojnë, mund t’i eliminojnë ose mund t’i programojnë për një herë tjetër pjesët e tjera të Mbledhjes së Shërbimit.
E njëjta gjë do të bëhet edhe me asamblenë speciale njëditore, veçse për të do të jetë vetëm një pjesë prej 15 minutash ku do të përfshihet i gjithë programi. Të gjithë duhet ta ruajmë këtë shtojcë në mënyrë që ta përdorim dhe të nxjerrim plotësisht dobi nga mësimet e mrekullueshme që Jehovai na jep.—Isa. 48:17, 18.