Programi i asamblesë së re qarkore

Në këto «kohë kritike, të vështira për t’u përballuar», kemi nevojë për mençurinë hyjnore që të fitojmë miratimin e Perëndisë dhe që ta kemi këtë miratim përgjithmonë. (2 Tim. 3:1) Programi i asamblesë qarkore për vitin e shërbimit 2005 do të na japë këshilla praktike dhe do të na inkurajojë pasi programi bazohet në temën «Të udhëhiqemi prej ‘mençurisë nga lart’».​—Jak. 3:17.

Simpoziumi i parë «Ta shfaqim në jetën tonë ‘mençurinë nga lart’», do të na ndihmojë të kuptojmë se ç’do të thotë të jemi të dëlirë, paqësorë, të arsyeshëm dhe gati për t’u bindur. Pastaj mbikëqyrësi qarkor do të përqendrohet në tri aspekte të tjera të mençurisë hyjnore. Në mbyllje të ditës së parë, mbikëqyrësi krahinor do të tregojë se si shërbëtorët e krishterë, edhe pse konsiderohen nga disa «të pashkolluar e të thjeshtë», janë të aftë për të shfaqur mençuri që vjen nga Perëndia.​—Vep. 4:13.

Në ditën e dytë, një simpozium me titull «Të ndjekim gjërat që janë ndërtuese», do të na ndihmojë të njohim dhe të shmangim gjërat që mund të na rrëzojnë nga ana frymore. Ai do të tregojë edhe se si mund t’i inkurajojmë të tjerët në mbledhjet e kongregacionit, në shërbim dhe në rrethin familjar. Fjalimi publik «Si nxjerrim dobi nga mençuria hyjnore?» do ta shtojë vlerësimin tonë për dobitë që nxjerrim kur i zbatojmë parimet hyjnore në jetën tonë. Fjalimi përmbyllës «Jemi të mbrojtur kur veprojmë sipas mençurisë hyjnore» do të na bëjë më të vendosur që në këto ditë të fundit t’i drejtohemi Jehovait për të marrë mençuri.

Një pjesë shumë e rëndësishme e çdo asambleje është pagëzimi i dishepujve të rinj. Shkolla e Shërbimit Teokratik dhe studimi i Kullës së Rojës që ishin në program për t’u zhvilluar atë javë, do të jenë gjithashtu pjesë e programit të asamblesë. Jehovai dëshiron që të gjithë të nxjerrim dobi nga mençuria që ai na jep. Këshillat dhe inkurajimi që do të marrim në asamblenë qarkore do të jenë për ne një pasuri e madhe frymore.​—Prov. 3:13-18.