Kongresi Krahinor i Dëshmitarëve të Jehovait për vitin 2009
1. (a) Ç’bekime do të kemi po t’i ndjekim të tria ditët e kongresit krahinor? (b) Ç’plane duhet të bëjmë që tani?
1 Të gjithë mezi e presim kongresin krahinor të vitit 2009 dhe mundësinë për t’u mbledhur me lavdërues të tjerë të Jehovait, të cilët janë «të vetëdijshëm se kanë nevojë të mësojnë për Perëndinë». (Mat. 5:3) Duke pasur parasysh ditën e Jehovait që po afron me të shpejtë, i nxitim të gjithë të jenë në të tria ditët që të përfitojnë plotësisht nga shoqëria e ngrohtë e krishterë dhe nga inkurajimi frymor që të qëndrojnë të fortë në besim. (Sof. 1:14) Tregojuni punëdhënësve dhe mësuesve që kongresi është pjesë thelbësore e adhurimit tuaj. Merrni guximin t’i bëni planet sa më shpejt dhe kërkoni bekimin e Jehovait; jini të sigurt për mbështetjen e tij.—Isa. 50:10.
2. Ç’atmosferë ndërkombëtare mund të presim edhe nëse nuk jemi ftuar në një kongres ndërkombëtar?
2 Kongreset ndërkombëtare: Meqë këto kongrese do të mbahen në pak vende dhe qytete, vetëm ata që janë caktuar mund të shkojnë. Nëse i respektojmë këto udhëzime, do të shmangim dyndjet. (1 Kor. 14:40; Hebr. 13:17) Megjithatë, një sërë kongresesh krahinore do të kenë atmosferën e kongreseve ndërkombëtare, pasi shumë misionarë, bethelitë që shërbejnë në vende të huaja, dhe shërbëtorë ndërkombëtarë do ta ndjekin kongresin në vendet e tyre.
3. Si mund ta tregojmë dashurinë e krishterë ndaj disave në kongregacion?
3 T’i ndihmojmë të tjerët të jenë të pranishëm: A ka në kongregacionin tuaj nga ata që kanë nevojë për ndihmë që të shkojnë në kongres? Nëse i ndihmon, ‘po sheh me interes jo vetëm çështjet e tua, por edhe ato të të tjerëve’.—Filip. 2:4.
4, 5. Çfarë duhet të bëni nëse do ta ndiqni kongresin diku tjetër?
4 Marrja e informacionit: Që të mos bëhen shumë telefonata në zyrën e degës për datat dhe vendet e kongresit, ju lutemi të shihni më parë Kullën e Rojës të 1 marsit 2009, ose të flisni me sekretarin e kongregacionit për informacionin që ju nevojitet.
5 Nëse do ta ndiqni kongresin diku tjetër dhe jo atje ku është caktuar kongregacioni juaj, mund të merrni listën e strehimeve të rekomanduara duke i shkruar një letër Komitetit të Kongresit përkatës në adresën që ndodhet në faqen e pasme të formularit Kërkesë strehimi për ata me nevoja të veçanta. Ky formular do t’u dërgohet së shpejti sekretarëve të kongregacioneve. Që të merrni përgjigje, sigurohuni që bashkë me letrën të futni një zarf me pullë ku keni shkruar edhe adresën tuaj.
6. Çfarë procedure duhet ndjekur kur një lajmëtar me nevoja të veçanta ka nevojë për një vend strehimi?
6 Nevoja të veçanta: Kur një lajmëtar kërkon ndihmë për të gjetur një vend strehimi, Komiteti i Shërbimit i Kongregacionit duhet të vendosë nëse lajmëtari kualifikohet për të plotësuar formularin Kërkesë strehimi për ata me nevoja të veçanta. Para se sekretari i kongregacionit t’ia dërgojë formularin Repartit të Strehimit, ata duhet të rishikojnë udhëzimet në formular dhe në letrën që iu dërgua të gjithë trupave të pleqve më 14 dhjetor 2008.
7. (a) Si mund të veprojmë kur bëjmë rezervimin në një hotel? (b) Cilët përkujtues do të na ndihmojnë të ruajmë reputacionin tonë të mirë me administratorët e hoteleve? (Shih kutinë «Udhëzime për strehimin».)
7 Rezervimi i hotelit: Në fund të Mbledhjes së Shërbimit për javën që fillon më 5 janar, ose sapo të jetë e mundur, në tabelën e informacionit do të vendoset lista e strehimeve të rekomanduara të hoteleve që janë në dispozicion. Para se të bëni rezervimin në hotel, lexoni me kujdes kutinë «Udhëzime për strehimin». Kur të bëni rezervimin:
◼ Merrni në telefon hotelet gjatë orarit të punës, duke përdorur numrat e telefonit të shënuar në listë.
◼ Bëjuni të ditur hoteleve se do të ndiqni kongresin e Dëshmitarëve të Jehovait.
◼ Jepni datat kur do të mbërrini në hotel dhe kur do të largoheni prej tij.
◼ Në rast se nuk ka dhoma të lira, telefononi një hotel tjetër të shënuar në listë.
◼ Bëni rezervimin dhe kërkoni numrin e konfirmimit, nëse e japin.
◼ Nëse kërkohet prej hotelit, depozitimin e shumës bëjeni brenda kohës së caktuar dhe në mënyrën e duhur.
8. Si të ndihmojmë që të gjithë të gjejnë një dhomë hoteli me tarifa të arsyeshme?
8 E kuptojmë se disa mund të parapëlqejnë hotele të tjera. Megjithatë, kur rezervojmë në hotele që nuk ndodhen në listën e strehimeve të rekomanduara ose pranojmë një tarifë më të lartë sesa ajo në listë, ua bëjmë më të vështirë vëllezërve të gjejnë tarifa të arsyeshme për dhomat. Ju lutemi të mos rezervoni dhoma që nuk keni ndër mend t’i përdorni dhe të mos anuloni rezervimin në çastet e fundit që të rezervoni në një hotel tjetër. Duke i respektuar këto masa do t’i ndihmoni të gjithë që të gjejnë një dhomë hoteli me tarifa të arsyeshme.—1 Kor. 10:24.
9. Cili duhet të jetë shqetësimi ynë kryesor kur përgatitemi për kongresin krahinor të vitit 2009 dhe kur e ndjekim atë?
9 Vepra që lëvdojnë Perëndinë: Kur shfaqim frytin e frymës në gjithçka bëjmë, sidomos kur flasim dhe kur na lidh puna me personelin e hotelit dhe me të tjerë në qytetin ku mbahet kongresi, përforcojmë reputacionin e mirë që ka populli i Jehovait dhe nuk pengojmë të tjerët. (1 Kor. 10:31; 2 Kor. 6:3, 4) Lëvdofshin Perëndinë pjesëmarrja dhe sjellja juaj në kongresin krahinor të vitit 2009!—1 Pjet. 2:12.
[Kutia në faqen 5]
Oraret e programit:
E enjte (Vetëm kongreset ndërkombëtare)
13.20 - 16.55
E premte dhe e shtunë
9.20 - 16:55
E diel
9.20 - 16.00
[Kutia në faqen 6]
Udhëzime për strehimin:
◼ Mos telefononi për të bërë rezervimin në hotele para se të bëhet Mbledhja e Shërbimit për javën që fillon më 5 janar 2009.
◼ Përpiquni ta bëni rezervimin gjatë muajve janar dhe shkurt.
◼ Rezervoni vetëm në hotelet e shënuara në listën e strehimeve të rekomanduara.
◼ Pranoni vetëm tarifat që tregohen në listë.
◼ Çdo dhomë e rezervuar duhet të jetë në emër të atij që do të qëndrojë në atë dhomë.
◼ Mbani rezervimin e parë.—Mat. 5:37.
◼ Mos telefononi në hotele që nuk janë në listë, për të pyetur nëse kanë tarifa të reduktuara për rastin e kongresit.
◼ Nëse nuk ka dhoma në dispozicion pasi keni folur me TË GJITHA hotelet në listë ose nëse keni probleme me ndonjë hotel, flitni me sekretarin e kongregacionit. Ai duhet të komunikojë me Repartin e Strehimit të kongresit duke përdorur informacionet në listën e strehimeve të rekomanduara.
◼ Nëse duhet ta anuloni rezervimin, bëjeni sa më shpejt të jetë e mundur.