Kongresi Krahinor i Dëshmitarëve të Jehovait për vitin 2008
1. (a) Pse është kaq urgjente në ditët e sotme këshilla që u dha Pavli të krishterëve hebrenj? (Lexo Hebrenjve 10:24, 25.) (b) Çfarë rasti për të zbatuar këshillën e Pavlit do të kemi së shpejti?
1 Apostulli Pavël i nxiti të krishterët hebrenj që të mblidheshin së bashku dhe të inkurajonin njëri-tjetrin «aq më tepër» ndërsa shihnin që dita po afrohej. (Hebr. 10:24, 25) Shenjat po tregojnë gjithnjë e më shumë se «dita» për të cilën po fliste Pavli është shumë afër. Prandaj, mezi i presim rastet për t’u mbledhur me vëllezërit dhe motrat për të marrë udhëzime frymore që mund të na udhëheqin gjatë këtyre ‘ditëve të fundit’ tepër të rrezikshme. (2 Tim. 3:1) Një rast i tillë do të jetë edhe Kongresi Krahinor i vitit 2008.
2. (a) Pse është shumë e rëndësishme të jemi të pranishëm në të tria ditët e kongresit? (b) Çfarë duhet të bëjmë për t’u përgatitur për kongresin?
2 Të pranishëm në të tria ditët: Ju inkurajojmë të jeni të pranishëm në të tria ditët. Nëse nuk i ‘braktisim mbledhjet tona’ nuk do të humbasim ushqimin frymor që është jetësor. (Hebr. 10:25) Filloni të bëheni gati për kongresin sa më shpejt të jetë e mundur. Është mirë ta informoni punëdhënësin sa më parë, që të bëjë rregullimet e nevojshme. Në qoftë se fëmijët do të jenë në shkollë në periudhën e kongresit, flisni me mësuesit e tyre për planet tuaja. Bëjuni të ditur se kongresi është pjesë e adhurimit që e bëjmë rregullisht. Të jeni të sigurt se Jehovai do t’i bekojë përpjekjet tuaja për të vënë interesat e Mbretërisë në radhë të parë.—Mat. 6:33.
3. Në ç’mënyrë mund të interesohemi për njëri-tjetrin?
3 T’i ndihmojmë të tjerët që të jenë të pranishëm: Pavli u bëri thirrje vëllezërve edhe që ‘të interesoheshin për njëri-tjetrin’. (Hebr. 10:24) A ka motra e vëllezër në Studimin e Librit e Kongregacionit të cilët kanë nevojë për ndihmë që të jenë të pranishëm në kongres? A mund t’i ndihmoni studentët tuaj biblikë që ta ndjekin kongresin bashkë me ju, edhe nëse mund të vijnë vetëm për një ditë? Kur u flisni pjesëtarëve jobesimtarë të familjes për kongresin, ftojini të vijnë me ju. Përpjekjet tuaja të dashura mund të sjellin bekime të papritura.
4. Si mund të marrim informacion në lidhje me datat dhe vendin ku do të mbahet kongresi?
4 Marrja e informacionit: Zyra e degës merr çdo vit qindra telefonata për të pyetur se kur dhe ku do të mbahet kongresi. Gati të gjitha telefonatat janë nga vëllezër e motra të cilëve tashmë u janë dhënë këto informacione. Para se t’i telefononi zyrës së degës, ju sugjerojmë që të lexoni Kullën e Rojës të 1 marsit 2008.
5. Çfarë duhet të bëjmë nëse duam informacion për strehimin në rast se do ta ndjekim kongresin në një vend tjetër dhe jo aty ku është caktuar kongregacioni ynë?
5 Nëse do të ndiqni një kongres tjetër dhe jo atë ku është caktuar kongregacioni juaj, mund të merrni informacion në lidhje me strehimin, duke i shkruar një letër Komitetit të Kongresit përkatës në adresën që ndodhet në faqen e pasme të formularit Kërkesë strehimi për ata me nevoja të veçanta. Ky formular do t’u dërgohet së shpejti sekretarëve të kongregacioneve. Që letra juaj të marrë përgjigje, sigurohuni që bashkë me letrën të futni një zarf me pullë ku keni shkruar edhe adresën tuaj.
6. Çfarë duhet të kemi parasysh në lidhje me formularin Kërkesë strehimi për ata me nevoja të veçanta?
6 Nevoja të veçanta: Në rast se dikush në kongregacion ka nevojë të gjejë një vend strehimi, Komiteti i Shërbimit i Kongregacionit duhet të vendosë nëse lajmëtari kualifikohet për të plotësuar formularin Kërkesë strehimi për ata me nevoja të veçanta. Para se sekretari i kongregacionit t’ia dërgojë formularin Repartit të Strehimit, duhet të shikoni me kujdes udhëzimet që jepen në formular dhe në letrën që më 14 dhjetor 2007 iu dërgua të gjithë trupave të pleqve.
7. Si mund të bashkëpunojmë me rregullimet që janë bërë në lidhje me strehimin? (Shih kutinë «Udhëzime për strehimin.»)
7 Rezervimi i hotelit: Në fund të Mbledhjes së Shërbimit për javën që fillon më 7 janar, ose sapo të dërgohet nga Komiteti i Kongresit pas kësaj date, në tabelën e informacionit të kongregacionit do të vendoset lista e strehimeve të rekomanduara të hoteleve që janë në dispozicion. Para se të bëni rezervimin në hotel, lexoni me kujdes kutinë «Udhëzime për strehimin» dhe «Hapa për të bërë rezervimin në hotel». Në vend që të pranoni një tarifë më të lartë nga hoteli ose t’i telefononi një hoteli tjetër që nuk është në listë, ju lutemi prisni për listën e përditësuar të hoteleve.
8. (a) Në ç’mënyra mund ta lëvdojmë Jehovain gjatë kohës së kongresit? (b) Si kanë komentuar disa punonjës të hotelit për shkak të sjelljes së shkëlqyer të vëllezërve tanë?
8 Vepra të shkëlqyera: Bindja ndaj urdhërimit të Jehovait për t’u mbledhur së bashku për ta adhuruar na jep mundësinë ‘të nxjerrim dobi për vete’. Ç’është më e rëndësishme, këto janë mundësi të mira për të lavdëruar emrin e Jehovait. (Isa. 48:17) «Veprat e shkëlqyera duken sheshit» për shumë persona në kongreset krahinore, dhe disa kanë shprehur mendimet e tyre. (1 Tim. 5:25) Në një qytet ku për shumë vjet janë mbajtur kongreset tona, një administrues hoteli pranoi: «Flitet shumë në këtë qytet për Dëshmitarët e Jehovait dhe për rëndësinë që kanë kongreset tuaja për ne. E dimë si e pastroni qendrën kulturore dhe ju shohim kur pastroni vendet e parkimit. Për ne është kënaqësi t’ju kemi gjatë verës këtu. Shpresojmë të kemi të njëjtën marrëdhënie me ju edhe në vitet në vazhdim.» Pasi tregoi problemet që kishte pasur me grupe të tjera dhe me artistë të ndryshëm, një administrues hoteli u shpreh për frymën e bashkëpunimit dhe durimin që kanë treguar vëllezërit gjatë qëndrimit në hotelin e tij. Pastaj tha: «Do të donim që të gjithë klientët në hotel të ishin si Dëshmitarët e Jehovait!» Sjellja e vëllezërve që shkaktoi këto komente dhe shumë tjera të ngjashme me to, me siguri i sjell shumë gëzim Perëndisë tonë, Jehovait.
9. Si thekson Mateu 4:4 rëndësinë e vëmendjes që duhet t’i kushtojmë çdo pjese të programit?
9 Jezui tha se vetë jeta jonë varet nga sa ia vëmë veshin ‘çdo fjale që del nga goja e Jehovait’. (Mat. 4:4) Në kongreset tona të përvitshme, Jehovai na siguron «ushqim në kohën e duhur» të përgatitur nga «skllavi i besueshëm dhe i matur». (Mat. 24:45) Shumë punë është bërë për ta përgatitur dhe për ta mbajtur këtë gosti frymore. E tregofshim mirënjohjen tonë për kujdesin e dashur të Jehovait duke qenë të pranishëm në kongres dhe duke i kushtuar vëmendje çdo pjese të programit!
[Kutia në faqen 3]
Oraret e programit:
E premte dhe e shtunë
9.20 - 16.55
E diel
9.20 - 16.00
[Kutia në faqen 4]
Udhëzime për strehimin:
◼ Mos telefononi për të bërë rezervimin në hotele para se të bëhet Mbledhja e Shërbimit për javën që fillon më 7 janar 2008.
◼ Nëse është e mundur, bëjeni rezervimin gjatë muajit janar. Mos e bëni rezervimin nëpërmjet Internetit, pasi nuk është kjo metoda që përdorim.
◼ Qëndroni vetëm në hotelet e shënuara në listën e strehimeve të rekomanduara.
◼ Mos pranoni tarifa më të larta se ato që tregohen në listë.
◼ Çdo dhomë e rezervuar duhet të jetë në emër të atij që do të qëndrojë në atë dhomë.
◼ Që të veprojmë në përputhje me rregullat e mbrojtjes kundër zjarrit, mos e kaloni numrin e të rriturve që lejohet të qëndrojë në dhomën e hotelit, siç tregohet edhe në listën e hoteleve.
◼ Mbani rezervimin e parë.—Mat. 5:37.
◼ Mos telefononi në hotele që nuk janë në listë, për të pyetur nëse kanë tarifa të reduktuara për rastin e kongresit.
◼ Nëse nuk ka dhoma në dispozicion pasi keni folur me TË GJITHA hotelet në listë ose nëse keni probleme me ndonjë hotel, flisni me sekretarin e kongregacionit. Ai duhet të komunikojë me Repartin e Strehimit të kongresit duke përdorur informacionet në fillim të listës.
◼ Nëse ju duhet ta anuloni rezervimin, bëjeni sa më shpejt të jetë e mundur.
Hapat për të bërë rezervimin në hotel:
1. Merrni në telefon hotelet gjatë orarit normal të punës, duke përdorur numrat e telefonit të shënuar në listën e strehimeve të rekomanduara në mënyrë që t’ju bëhet ulja e tarifës.
2. Bëjuni të ditur se do të ndiqni kongresin e Dëshmitarëve të Jehovait.
3. Jepni datat kur do të regjistroheni në hotel dhe kur do të largoheni prej tij.
4. Në rast se nuk ka dhoma të lira, telefononi një hotel tjetër të shënuar në listë.
5. Bëni rezervimin dhe kërkoni numrin e konfirmimit, nëse ka një të tillë.
6. Nëse kërkohet, jepni një paradhënie sipas mënyrës së caktuar nga hoteli.