Wan njunjun pei nanjan

I SA konda andi dee sëmbë ta ba tei a goon aki ö? Soni u njan wë e. A dë wetiweti faan sö, nöö a finu kuma boon.

Boo taa wan liba nöö bi pasa di dee Isaëli sëmbë kumutu a Egepiti köndë. De dë a di sabana dendu. Soni an bi ta göö hia naandë, nöö dee sëmbë bi ta guunjan taa: ’A bi o möön bunu ee Jehovah bi kii u a Egepiti köndë, biga ala u bi ta feni hii pei njanjan di u bi kë.’

Fëën mbei Jehovah taki taa: ’Mi o mbei njanjan kai kumutu a liba ko a goon.’ Nöö di soni dë Jehovah du tuu. Debooko fëën dee Isaëli sëmbë si di wetiweti soni di kai dë, hën de hakisi de na de: ’Andi disi?’

Hën Mosesi taki taa: ’Di njanjan aki Jehovah da unu fuun njan.’ Dee sëmbë kai ën MANA. Tesi fëën dë kuma kuku di de mbei ku höniwata.

’Un musu ba ën kumafa hiniwan sëmbë sa njan’, sö Mosesi piki de. Di soni dë de ta du hiniwan mamate. Nöö te di sonu ko kendi kaa, nöö di mana di fika a goon ta jö.

Mosesi taki söseei taa: ’Na wan sëmbë musu tjubi di mana te dou di woto daka.’ Ma so u dee sëmbë an bi ta haika. I saandi pasa u? Debooko fëën di mana de bi tjubi ko fuu ku bitju, nöö a bigi ta tingi!

Ma wan daka dë a di wiki dendu di Jehovah piki dee sëmbë taa de sa ba di mana tu toon möön hia. Hën da di u sikisi daka. Nöö Jehovah taki taa de musu tjubi pikisö fëën te dou di woto daka, biga an o mbei mana kai a di u seibi daka. Di de tjubi di mana dou di u seibi daka, di mana an fuu ku bitju, nöö an ta tingi tu! Di soni aki da wan foombo soni möön!

Hii dee jaa dee Isaëli sëmbë dë a di sabana, Jehovah da de mana u njan.