I sa dë seiki taa Jehovah o da i kötöhati

1. Unfa soni bi dë da dee Dju dee bi dë a katibo a Babilon?

SÖMËNI jaa longi dee Dju bi ta pasa Jehovah buka. De bi ta du sömëni hogi, söseei de an bi ta kë piki Jehovah buka möönsö. Fëën mbei Jehovah disa dee Babilon sëmbë u ko booko di köndë u de, hën de tei de tja go a katibo a Babilon. Wë unfa soni bi dë da de a Babilon? (2 Klon. 36:15, 16, 20, 21) Tuu taa de bi sa libi fiifii kumafa de bi kë a Babilon (Jel. 29:4-7). Ma tökuseei di libi bi ta taanga da de, biga na a di köndë dë de bi kë libi. Wë unfa de bi ta fii a di ten dë? Buta pakisei a di soni di wan u de bi taki. A bi taki taa: „U bi ta sindo a dee lio u Babilon bandja. Nöö u bi ta këë te u bi ta pakisei soni u Sion” (Ps. 137:1). Dee Dju bi abi kötöhati fanöudu seei. Ma ambë bi o da de kötöhati?

2-3. (a) Andi Jehovah bi du da dee Dju dee bi dë a katibo a Babilon? (b) Fuun soni woo taki a di woto aki?

² A Jehovah „hii kötöhati ta kumutu” (2 Kol. 1:3). U di Jehovah lobi dee dinima fëën, mbei a kë da de kötöhati. Jehovah bi sabi taa so u dee Dju dee de bi o tja go a katibo a Babilon, bi o tjali u dee soni di de du, nöö de bi o toona ko ta dini ën kumafa a kë (Jes. 59:20). Fëën mbei Jehovah bi mbei Jesaaja piki dee Dju möön leki 100 jaa a fesi, taa de bi o tja de go a katibo a Babilon. Di soni di Jehovah bi piki de sikifi a di buku u Bëibel de kai Jesaaja. Unfa di buku u Jesaaja bi o sa heepi de? Wë Jesaaja bi taki taa: „’Kötö dee sëmbë u mi hati, da de kötöhati’, sö di Gadu fuunu taki” (Jes. 40:1). Awa, Jehovah bi wooko ku di tjabukama Jesaaja u sikifi wan buku, u heepi dee sëmbë fëën u de feni kötöhati.

³ Useei ta abi kötöhati fanöudu so juu, leti kuma dee Dju dee bi dë a katibo a Babilon. A di woto aki, woo taki u dii fasi fa Jehovah bi da dee sëmbë fëën kötöhati di de bi dë a katibo a Babilon, söseei woo si unfa a ta da u kötöhati a di ten aki tu. Di fosu soni di woo luku, da di paamusi di a bi paamusi taa a o da dee sëmbë dee ta tjali u dee zöndu u de paadon. Di u tu, da di lei di a bi lei de taa de sa dë seiki taa soni o waka bunu da de a di ten di ta ko. Nöö di u dii soni di woo luku, da di heepi di a bi heepi de u de an ta booko de hedi möön.

JEHOVAH ABI TJALIHATI FUU, NÖÖ A TA DA U PAADON

4. Unfa Jehovah bi lei taa hën da wan Gadu di abi tjalihati? (Jesaaja 55:7)

⁴ Jehovah ’da u Tata, nöö a abi tjalihati fuu’ (2 Kol. 1:3). A bi lei taa a abi di fasi dë, di a bi paamusi dee Dju dee bi dë a katibo a Babilon, taa a o da de paadon ee de lei taa de ta tjali u dee zöndu u de. (Lesi Jesaaja 55:7.) A bi taki taa: „Mi o lei i taa mi lobi i u teego, söseei taa mi abi tjalihati fii” (Jes. 54:8). Unfa Jehovah bi o lei de taa a abi tjalihati u de? Hii fa dee Dju bi musu tja sitaafu u dee soni dee de bi du, tökuseei Jehovah bi paamusi de taa de o toona go a de köndë baka. De bi o dë a katibo u wan kölö pisiten nöö (Jes. 40:2). Di soni aki bi musu u da dee Dju dee bi ta tjali u dee zöndu u de kötöhati!

5. Faandi mbei u musu dë seiki möön dee Dju taa Jehovah ta da u paadön?

⁵ Andi u ta lei a di woto aki? U ta lei taa Jehovah ta dë kabakaba u da dee dinima fëën paadon seei te dou. U musu möön dë seiki u di soni aki möön dee Dju u di ten di pasa. Faandi mbei? Wë u di u ko fusutan faandi mbei Jehovah ta da u paadon. Höndöhöndö jaa baka di Jesaaja konda dee tjabukama woto dee sikifi a di buku fëën, hën Jehovah bi manda di womi mii fëën ko a goonliba aki, ko dëdë paka paima da dee sëmbë dee ta tjali u dee zöndu u de. U di Jesosi dëdë da u, mbei Jehovah sa da u paadon te dou. Hën da an ta mëni dee zöndu fuu möön seei (Tjab. 3:19; Jes. 1:18; Ef. 1:7). Jehovah da wan Gadu di abi tjalihati u sëmbë tuutuu!

6. Unfa u sa feni wini te u ta buta pakisei a di fasi fa Jehovah ta da u paadon? (Luku di peentje tu.)

⁶ Dee soni dee sikifi a Jesaaja 55:7 sa da u kötöhati ee hati ta fon u jeti u wan soni di u bi du a di ten di pasa. A kan taa háti fuu sa ta fon so fuu jeti, hii fa u bi du soni kaa u lei taa u ta tjali u di soni di u bi du dë. Wë háti fuu sa taa fon u jeti, u di kandë u ta tja pena jeti u di soni di u bi du dë. Ma hii fa u sa ta fii sö, tökuseei u sa dë seiki taa Jehovah da u paadon ee u bi konda dee zöndu fuu da dee gaanwomi, söseei ee u bi tapa u du de. I sa dë seiki taa Jehovah da i paadon, biga te a da wan sëmbë paadon, nöö an ta mëni dee soni dë möön seei. (Luku Jelemia 31:34.) Wë ee Jehovah an ta buta mëni a dee soni dee u bi du möön, nöö hën da useei an musu ta buta mëni a de möön tu. Dee soni dee Jehovah ta luku a u, da dee soni dee u ta du nöunöu, ma an ta luku dee soni dee u bi du a di ten di pasa (Eze. 33:14-16). Abiti möön di Tata fuu di a bi tjalihati fuu, o puu hii dee soni dee ta mbei u ta tja fuka u di u bi mbei föutu a di ten di pasa.

7. Andi sa da u taanga fuu go fan ku dee gaanwomi ee u ta tjubi wan zöndu di u du?

⁷ Andi u musu du ee háti fuu ta fon u, u di u ta tjubi wan gaan zöndu di u du? Wë, di Bëibel ta da u taanga fuu go suku heepi a dee gaanwomi (Jak. 5:14, 15). Hii fa a sa taanga da u fuu konda da de andi u du, tökuseei woo kë go fan ku de ee di soni di u du ta hati u tuutuu. Söseei woo kë go suku heepi a de, ee u ta hoi a pakisei taa Jehovah ku dee womi dee a buta u heepi u aki, o lei taa de abi tjalihati fuu. Buta pakisei a di fasi fa wan baaa de kai Arthura bi feni kötöhati di Jehovah bi lei taa a abi tjalihati fëën, di háti fëën bi ta fon mëën. Arthur bi taki taa: „Bëina wan jaa longi mi bi panjan ta luku fanafiti soni u womi ku mujëë”. Ma baka di mi jei wan taki di bi ta lei faandi mbei a dë fanöudu fuu abi wan limbo háti, di wan baaa bi hoi, hën mi konda hii soni da mi mujëë ku dee gaanwomi. Mi bi ko ta fii möön bunu di mi konda hii soni da de, ma tökuseei mi bi ta tjali gaanfa jeti. Dee gaanwomi bi lei mi taa Jehovah kë dë mati ku mi jeti. A ta leti u buta a pasi u di a lobi u. Di suti fasi fa de bi fan ku mi bi dou mi hati seei. A bi heepi mi u mi ko ta si miseei kumafa Jehovah ta si mi.” Nöunöu Arthur ta du di pioniliwooko, söseei a dë wan dinai a di kemeente fëën. U ta feni kötöhati seei, te u sabi taa Jehovah ta dë kabakaba u da u paadon, te u ta tjali u dee zöndu fuu!

JEHOVAH TA LEI U TAA SONI O WAKA BUNU DA U A DI TEN DI TA KO

8. (a) Andi Jehovah bi paamusi dee Dju dee bi dë a katibo a Babilon? (b) Un wini dee Dju dee bi ta tjali u dee zöndu u de bi feni, di de bi ko sabi taa soni o waka bunu da de, te u luku Jesaaja 40:29-31?

⁸ Te i luku ën a libisëmbë fasi, nöö dee Dju dee bi dë a katibo a Babilon an bi o sa toona go a de köndë nöiti möön. Biga Babilon bi dë di möön makiti köndë a di ten dë, nöö sëmbë bi sabi dee sëmbë u Babilon, kuma sëmbë di an ta disa dee sëmbë dee de kisi u de toona go a de köndë (Jes. 14:17). Ma tökuseei Jehovah bi piki dee sëmbë fëën taa soni o waka bunu da de. A bi paamusi de taa a o puu de a katibo, nöö na wan soni bi o sa tapëën (Jes. 44:26; 55:12). Jehovah bi ta si Babilon kuma sindja (Jes. 40:15). Te i böö di sindja pikisö kaa, nöö a ta wai go seei fiaa. Sö a bi o dë wan sösö soni da Jehovah tjika, u puu dee sëmbë fëën a Babilon. Unfa di soni aki bi sa heepi dee Dju dee bi dë a katibo a Babilon? Wë a bi o da de kötöhati. Ma na di dë nöö. Jesaaja bi taki taa: „Dee sëmbë dee ta futoou Jehovah o feni kaakiti baka.” (Lesi Jesaaja 40:29-31.) Awa, di piki di Jehovah bi piki de taa soni o waka bunu da de bi da de taanga seei. A bi o dë seei kuma de „ta buwa go te a liba ala kuma de abi gabian hanza”.

9. Faandi mbei dee Dju dee bi dë a katibo a Babilon, bi sa dë seiki taa Jehovah bi o puu de a katibo tuutuu?

⁹ Jehovah bi du soni u lei dee Dju dee bi dë a katibo taa dee soni dee a bi paamusi de bi o pasa tuutuu. Buta pakisei a dee soni dee a bi taki a fesi, dee bi ko pasa tuutuu. De bi sabi taa dee Asilia sëmbë bi feti wini di teni-lö könuköndë u Isaëli, söseei taa de bi tja dee sëmbë fëën go a katibo (Jes. 8:4). De bi si taa dee Babilon sëmbë bi booko Jelusalen, söseei taa de bi tei dee sëmbë u Jelusalen tja go a katibo (Jes. 39:5-7). De bi sabi taa di könu u Babilon bi booko Sedekia wojo, hën a tjëën go a Babilon (Jel. 39:7; Eze. 12:12, 13). Hii dee soni dee Jehovah bi piki de a fesi bi pasa tuutuu (Jes. 42:9; 46:10). Dee soni aki bi musu u mbei de ko dë seiki taa Jehovah o puu de a katibo tuutuu!

10. Andi sa heepi u fuu dë seiki taa dee soni dee Jehovah paamusi u o pasa tuutuu?

¹⁰ Andi u ta lei a di woto aki? Te u ta fii bookosaka, nöö dee soni dee Jehovah paamusi taa a o du da u a di ten di ta ko sa da u taanga. U ta libi a wan taanga ten, nöö dee felantima u Gadu ta du ku u. So u de abi makiti seei. Ma dee soni dë an musu mbei u fii bookosaka poi. Biga Jehovah paamusi u wan soni di o pasa tuutuu. A paamusi u taa woo libi u teego a wan goonliba ka bööböö libi o dë, söseei ka hogi an o ta miti u möön. Wa musu ta fëëkëtë di soni di Jehovah paamusi u aki. Ee nasö di teego libi an o ta hai u sö möön. A o ko dë kuma te wan sëmbë dë taanputaanpu a wan sundjusundju gaasi fesi, ta luku wan gaan waiti kamian. A o ta si ën vilivili sö, u di di gaasi dë sundjusundju. Wë, andi sa heepi u fuu ko ta si soni gbegedee kumafa a dë? U sa ta tei ten kai pakisei a di fasi fa di libi fuu o dë a di njunjun goonliba. U sa ta lesi dee buku fuu, ta luku dee fëlön fuu, söseei u sa ta haika dee poku fuu dee ta taki u dee soni dee Jehovah paamusi u. Boiti di dë, u sa ta piki Jehovah andi ku andi u dë kabakaba ta wakiti u si a di Paladëisi.

11. Andi ta heepi wan sisa di dë ku suwaki faa sa hoi dou?

¹¹ Boo luku unfa wan sisa de kai Joy bi feni taanga di a bi buta pakisei a dee soni dee Jehovah paamusi u, hii fa a abi wan siki di data an sa kula. A ta taki taa: „Te dee bookohedi u mi ta möön mi, nöö mi ta konda da Jehovah unfa mi ta fii. Mi sabi taa a ta fusutan mi bumbuu. Baka te mi begi, nöö Jehovah ta da mi ’di gaan kaakiti’ di bigi pasa maaka” (2 Kol. 4:7). Boiti di dë, Joy ta pakisei kaa fa a o dë a di njunjun goonliba ka na wan „hojo sëmbë di ta libi a di köndë o taki taa: ’Mi suwaki’” (Jes. 33:24). Ee useei ta konda da Jehovah unfa u ta fii, söseei ee u ta buta pakisei a dee soni dee a paamusi u, nöö woo feni di kaakiti di u abi fanöudu fuu sa hoi dou.

12. Faandi mbei u sa biibi taa dee soni dee Jehovah paamusi u, o pasa tuutuu? (Luku di peentje tu.)

¹² Leti kumafa Jehovah bi lei dee Dju taa de sa dë seiki taa dee soni dee a paamusi de o pasa tuutuu, sö nöö a ta lei u a di ten aki taa u sa biibi dee soni dee a taki. Pakisei dee tjabukama woto dee u ta si ta pasa nöunöu aki. U ta si taa wan pisi u di tii u Ingisiköndë ku Amëëkanköndë ’taanga, nöö di woto pisi fëën suwaki’ (Dan. 2:42, 43). Boiti di dë, u ta jei taa ’goonliba ta seki, kamian ta bai ta latja’, söseei u ta peleiki da „hii föluku” a hii goonliba (Mat. 24:7, 14). Dee tjabukama woto aki, ku sömëni wotowan jeti, ta heepi u fuu dë seiki taa dee soni dee Jehovah paamusi u o pasa tuutuu.

JEHOVAH O HEEPI U FUU WA TA BOOKO U HEDI MÖÖN

13. (a) Andi bi o mbei soni ko möön taanga da dee Dju a di pisiten di Jehovah bi o puu de a katibo? (b) Unfa Jehovah bi da dee Dju dee bi dë a katibo taanga, te u luku Jesaaja 41:10-13?

¹³ Hii fa Jehovah bi da dee Dju taanga ku dee soni dee a bi paamusi de, tökuseei a bi sabi taa soni bi o taanga da de a di pisiten di a bi o puu de a katibo. Jehovah bi taki a fesi taa wan makiti könu bi o feti tei dee köndë dee dë lontu Babilon. Te u kaba fëën, nöö a bi o feti tei Babilon tu (Jes. 41:2-5). Dee Dju bi musu ta booko de hedi ku di soni dë u? Wë Jehovah bi da dee sëmbë fëën taanga a fesi. A bi piki de taa: „Na fëëë, biga mi dë ku i. Na fëëë, biga mi da di Gadu fii.” (Lesi Jesaaja 41:10-13.) Andi Jehovah bi kë taki di a bi taki taa: „Mi da di Gadu fii”? Wë na piki a bi ta piki de taa hën da di Gadu di de musu dini, biga de bi sabi di soni dë kaa. Ma a bi kë lei de taa a dë ku de, söseei taa a o heepi de.​—Ps. 118:6.

14. Andi da di woto soni di Jehovah bi du u kötö dee Dju hati?

¹⁴ Jehovah bi heepi dee sëmbë fëën u de an ta fëëë möön, di a bi lei taa a abi makiti ku köni pasa maaka. A bi piki dee Dju dee bi dë a katibo a Babilon u de hopo hedi luku dee teeja. A bi piki de taa na mbei nöö a mbei dee teeja, ma a sabi di në u hiniwan u de (Jes. 40:25-28). Ee Jehovah sabi dee në u dee teeja, nöö u sa dë seiki taa a sabi dee në u hii dee dinima fëën tu! Söseei ee Jehovah abi di kaakiti u mbei dee teeja, nöö a abi di kaakiti u heepi dee sëmbë fëën tu. Awa, an bi dë u dee Dju dee bi dë a katibo a Babilon fëëë seepiseepi, söseei an bi dë u de ta booko de hedi.

15. Unfa Jehovah bi seeka dee sëmbë fëën a fesi, da dee soni dee bi o pasa te a bi o puu de a katibo?

¹⁵ Jehovah bi piki dee sëmbë fëën tu andi de bi musu du te di juu dou ka a o puu de a katibo. A bi piki de taa: „Un go a unu dendu wosu, nöö un tapa dee döö. Un tjubi unuseei wan kölö pisiten, u te di hatiboonu u mi ko saka” (Jes. 26:20). A kan taa dee Dju bi du di soni aki di Könu Silosi bi ko feti tei Babilon. Wan womi u Giikiköndë di bi ta öndösuku soni fu awooten bi taki taa, di Silosi bi denda go a Babilon, hën a piki dee sodati fëën be de kii hii dee sëmbë di de o si a döö. Pakisei unfa dee sëmbë dee bi ta libi a di köndë bi ta fëëë tjika. Ma soni bi waka bunu da dee Dju dee bi dë Babilon, u di de bi du soni kumafa Jehovah bi piki de.

16. Faandi wa musu booko u hedi tumisi ku dee soni dee o pasa a di ten di ta ko? (Luku di peentje tu.)

¹⁶ Andi u ta lei a di woto aki? Abiti möön di gaan fuka o bigi. A dë wan soni di an pasa a goonliba wan daka, nöö nöiti möön a o pasa tu. Te a bigi, nöö hii sëmbë o ta fëëë seei. De an saanfa u de du. Ma u dee sëmbë u Jehovah u wa o ta booko u hedi. U sabi taa Jehovah da di Gadu fuu. Woo hopo taanpu tololoo, u di u sabi taa ’di juu zuntu fuu kumutu a di fuka di u dë aki’ (Luk. 21:28). Wa o fëëë tu te hii dee tiima u di goonliba aki tuu o hopo ko feti ku u. Jehovah o lei u andi u musu du a di ten dë, söseei a o mbei dee ëngëli fëën tjubi u. Unfa Jehovah o lei u andi u musu du? Wë wa sabi jeti. Ma a sa kan taa u jei dee soni dee u musu du a di kemeente ka u dë. Kandë dee kemeente fuu o dë kuma dee „dendu wosu” ka u musu go tjubi. Wë unfa u sa seeka useei fuu dë kabakaba ta wakiti di ten dë? U musu ko dë möön bunu mati ku dee baaa ku dee sisa fuu, u musu ta dë kabakaba u du soni kumafa dee baaa dee ta tei fesi ta lei u, söseei u musu dë seiki taa Jehovah hën ta tii di ölganisaasi fuu.​—Heb. 10:24, 25; 13:17.

17. Unfa i sa buta pakisei a Jehovah te soni ta taanga da i?

¹⁷ Hii fa soni bi ta taanga da dee Dju dee bi dë a katibo a Babilon, tökuseei Jehovah bi da de di taanga di de bi abi fanöudu. Sö nöö a o da u taanga tu. Fëën mbei aluwasi andi o pasa a di ten di ta ko, wa musu ta wei u buta pakisei a Jehovah te soni ta taanga da u. I sa dë seiki taa a abi tjalihati fii. Mbei möiti fii ko dë seiki taa dee soni dee a paamusi u o pasa tuutuu. Nöö na fëëkëtë taa u di Jehovah da di Gadu fii, mbei ja musu fëëë na wan hojo soni.