Jehovah ta feni i u bunu ö?

1. Andi so u dee dinima u Jehovah sa ta hakisi deseei so juu?

A TA da u kötöhati seei u di u sabi taa Jehovah ta feni dee sëmbë fëën u bunu! Di Bëibel ta taki taa: „Jehovah ta wai ku dee sëmbë fëën” (Ps. 149:4). Ma so juu so u de ta fii bookosaka sö tee taa de sa ta hakisi deseei taa: ’Jehovah ta feni mi u bunu ö?’ Sömëni u dee dinima u Jehovah na awooten, bi ta hakisi deseei di seei soni aki so juu.​—1 Sam. 1:6-10; Jöpu 29:2, 4; Ps. 51:11.

2. Ambë Jehovah ta feni u bunu?

² Di Bëibel ta lei u gbelingbelin taa Jehovah sa feni zöndu libisëmbë u bunu. Na un fasi? U musu lei taa u ta biibi a Jesosi, nöö u dopu (Joh. 3:16). A sö wan fasi u ta lei a lanti fesi taa u ta tjali u dee zöndu fuu, söseei taa u paamusi Gadu taa woo ta du soni kumafa a kë (Tjab. 2:38; 3:19). Jehovah ta wai seei te u du dee soni aki fuu ku ën sa ko dë mati. Solanga u ta mbei hii möiti fuu hoi useei a di buta di u buta u libi nëën maun, nöö Jehovah o feni u u bunu, söseei a o si u kuma mati fëën.​—Ps. 25:14.

3. Fuun soni woo taki?

³ Faandi mbei so juu so sëmbë sa ta si kuma Gadu an ta feni de u bunu? Unfa Jehovah ta mbei u sabi taa a ta feni u u bunu? Nöö unfa wan Keesitu sëmbë sa ko dë seiki taa Gadu ta feni ën u bunu?

FAANDI MBEI SO SËMBË SA TA SI KUMA JEHOVAH AN TA FENI DE U BUNU?

4-5. Fuun soni u sa dë seiki aluwasi ee so juu u ta si kuma wa dë wan hojo soni?

⁴ Sensi di so fuu dë miii, hën de ta si kuma de an dë wan hojo soni (Ps. 88:15). Wan baaa de kai Adrián, bi taki taa: „Sensi di mi dë kaa, hën mi ta si miseei kuma sösö sëmbë. Mi ta mëni jeti taa di mi bi ta begi Jehovah di mi bi dë mii, nöö mi bi ta hakisi ën faa heepi dee sëmbë u mi, u de sa dou a di Paladëisi. Ma mim bi dë seiki taa ma bi bunu tjika u mi dou ala.” Tony, da wan baaa di an kiija a wan wosudendu ka de bi ta dini Jehovah, nöö a bi taki taa: „Nöiti mi mama ku mi tata piki mi taa dee lobi mi, nasö taa de ta wai ku mi. Di soni dë bi mbei mi ko ta si kuma soni an dë di mi bi sa du, u mbei de wai ku mi.”

⁵ Ee so juu u ta si kuma wa dë wan hojo soni, nöö u sa hoi a pakisei taa Jehovah seei hën hai u ko nëën (Joh. 6:44). A ta si soni a u di kandë useei an ta si, nöö a sabi fa hati fuu dë (1 Sam. 16:7; 2 Klon. 6:30). Fëën mbei u sa biibi ën te a ta piki u taa a ta kai u gaan soni.​—1 Joh. 3:19, 20.

6. Unfa dee föutu dee apösutu Paulosu bi mbei, bi ta mbei a ta fii?

⁶ A kan taa ufö so fuu bi bigi lei soni u Bëibel, u bi du soni di ta mbei taa háti fuu ta fon u jeti (1 Pet. 4:3). Dee Keesitu sëmbë dee abi wan taanga biibi seei ta abi fasi di an bunu, nöö de ta mbei möiti u disa dee fasi dë. Háti fii ta fon i ö? Wë ee sö soni dë da i, nöö hoi a pakisei taa soni bi dë sö da woto dinima u Jehovah di bi abi wan taanga biibi tu. Apösutu Paulosu bi ta fii tjali te a bi mëni fa a dë zöndu libisëmbë tjika (Lom. 7:24). A dë sö tuu taa Paulosu bi tjali u dee zöndu dee a bi du, hën a dopu. Ma tökuseei a bi ta taki taa a bi dë ’di möön lagi wan u dee tjabukama u Masa Jesosi’, söseei taa a dë „di möön gaan takulibima a hii dee [takulibima] dendu”.​—1 Kol. 15:9; 1 Tim. 1:15.

7. Andi u sa hoi a pakisei te a nama ku dee zöndu dee u bi du a di ten di pasa?

⁷ Di Tata fuu di dë a liba ala paamusi u taa a o da u paadon, ee u lei taa u ta tjali u dee zöndu dee u du (Ps. 86:5). Fëën mbei ee u lei taa a hati u tuutuu taa u bi du zöndu a di ten di pasa, nöö u sa dë seiki taa Jehovah da u paadon tuutuu, leti kumafa a paamusi u.​—Kol. 2:13.

8-9. Andi sa heepi u fu wa ta si kuma nöiti woo sa du soni u mbei Jehovah wai ku u?

⁸ Hii u tuu kë dini Jehovah ka u sa dini ën dou. Ma so u de ta si kuma nöiti de o sa du soni u mbei a wai ku de. Wan sisa de kai Amanda bi taki taa: „Mi bi ta si kuma hii juu mi bi musu ta suku u du möön soni da Jehovah, faa sa si taa mi ta dini ën ka mi sa dini ën dou. A bi lo’ u pasa taa mi bi ta suku u du möön hia soni möön fa mi bi sa du tuutuu. Nöö te a bi ko pasa taa ma bi feni pasi u du so soni, nöö mi bi ta si kuma Jehovah bi o tei mi u hogi, kumafa mi bi ta tei miseei u hogi.”

⁹ Andi sa heepi u fu wa ta si kuma wa ta du soni da Jehovah tjika? Hoi a pakisei taa Jehovah ta fusutan u. Nöiti a ta hakisi u fuu du soni di wa sa du. A ta tei hiniwan soni di u ta du dëën u bigi, solanga u du ën a di möön bunu fasi fa u sa du ën. Buta pakisei tu a dee sëmbë fu awooten, dee bi dini Jehovah ku hii de hati. Pakisei soni u Paulosu. A bi wooko taanga da Jehovah sömëni jaa longi. A bi nango a sömëni longi kamian, söseei a bi hopo sömëni njunjun kemeente. Bakaten soni bi ko mbei taa an bi sa peleiki kuma fosu möön. Ma a dë sö taa Jehovah an bi feni ën u bunu möön u di soni dë hedi ö? Wë nönö. A bi mbei möiti go dou u du andi sa du, hën Jehovah mbei a feni gaan bunu (Tjab. 28:30, 31). Wë sö nöö a dë taa so juu wa o sa du so soni da Jehovah. Ma Jehovah an ta luku a di soni dë. A ta luku di soni di mbei u ta dini ën. Boo buta pakisei a wantu fasi fa Jehovah ta lei taa a ta feni u u bunu.

UNFA JEHOVAH TA LEI TAA A TA FENI U U BUNU?

10. Unfa u sa „jei” fa Jehovah ta piki u taa a ta wai ku u? (Johanisi 16:27)

¹⁰ Di Bëibel. Jehovah lo’ u suku fasi u lei dee sëmbë fëën taa a lobi de. U ta lesi a di Bëibel taa Jehovah bi piki Jesosi tu pasi taa a bi dë di lobi Womi Mii fëën, söseei taa libi fëën ta kai ku ën (Mat. 3:17; 17:5). I bi o kë u Jehovah piki i taa a feni i u bunu ö? Jehovah an ta fan ku u fuu jei hën töngö, ma a ta fan ku u, ku di Wöutu fëën. Te u ta lesi dee soni dee Jesosi bi taki, nöö a sö wan fasi a ta dë kuma u ta „jei” fa Jehovah seei ta fan ku u. (Lesi Johanisi 16:27.) Jesosi ta du soni leti kuma hën Tata. Fëën mbei te u ta lesi fa Jesosi bi ta piki dee bakama fëën taa a ta wai ku de, hii fa de bi ta mbei föutu, nöö u sa pakisei fa Jehovah ta piki u dee seei soni dë.​—Joh. 15:9, 15.

11. Faandi mbei u sa taki taa na te tesi ta miti u hën da Jehovah an ta feni u u bunu möön? (Jakobosi 1:12.)

¹¹ Dee soni dee a ta du. Jehovah dë kabakaba u heepi u, söseei a heepi u fuu sa ta feni dee soni dee u abi fanöudu. Ma so juu Jehovah ta da pasi u soni miti u, leti kumafa a bi da pasi u soni miti Jöpu (Jöpu 1:8-11). Na te tesi ta miti u hën da Gadu an ta feni u u bunu möön. Ma di soni dë ta da u pasi fuu sa lei Gadu unfa u lobi ën tjika, söseei unfa u ta futoou ën tjika. (Lesi Jakobosi 1:12.) Te tesi ta miti u, nöö woo si unfa a lobi u tjika, söseei unfa a ta heepi u tjika.

12. Andi u sa lei a di soni di miti Dmitrii?

¹² Buta pakisei a wan baaa de kai Dmitrii, di ta dë a Asia. An bi abi wooko möön, nöö a bi puu sömëni liba longi ta suku wooko, ma an bi feni möönsö. Fëën mbei a bi buta taa a o futoou Jehovah, nöö a bia ta du di peleikiwooko möön gaanfa. Sömëni liba bi ko pasa, ma tökuseei an bi feni wooko möönsö. Bakaten hën a ko dë ku suwaki sö tee taa kandikandi nöö a bi ta dë. Di soni dë bi mbei a bi bigi ta hakisi hënseei ee a bi dë wan bunu hedima u wosudendu, di ta luku di mujëë fëën ku di mii fëën bunu. Söseei a bi bigi ta hakisi hënseei ee Jehovah bi ta feni ën u bunu jeti. Wan daka, hën di mujëë mii fëën doloki di soni di sikifi a Jesaaja 30:15, buta a wan pampia. Di tëkisi dë ta taki taa: „Un dë piii, nöö un futoou mi, nöö woon feni taanga.” Di mujëë mii bi tja di pampia go buta a bandja u di bedi ka hën tata bi dë, hën taa: „Ppa, te ja ta fii bunu, nöö i sa mëni di tëkisi aki e.” Dmitrii bi ko si taa Jehovah bi mbei taa dee sëmbë fëën bi sa abi soni u njan, ku soni u bisi, ku wan kamian u dë jeti. A bi taki taa: „Di wan kodo soni di mi musu du, hën da u mi dë piii, nöö mi futoou di Gadu u mi go dou.” Ee sö wan soni ta miti i tu, nöö i sa dë seiki taa Jehovah ta booko hën hedi ku i, söseei taa a o heepi i fii hoi dou.

13. Ambë Jehovah sa tei u lei u taa a ta feni u u bunu, nöö unfa ta du di soni dë?

¹³ Dee baaa ku dee sisa fuu. Jehovah ta tei dee baaa ku dee sisa fuu u lei u taa a ta feni u u bunu. A sa mbei sëmbë taki soni u da u taanga te u abi ën fanöudu. Di soni dë wan sisa u Asia bi ko si, di soni bi ta hebi dëën gaanfa seei. An bi ko abi wooko möön, nöö a bi ko dë ku gaan suwaki. Baka di dë, hën manu bi du wan gaan zöndu, di bi mbei taa an bi dë gaanwomi möön. Di sisa bi taki taa: „Ma bi sa fusutan faandi mbei dee soni aki bi ta pasa. Mi bi ta mëni taa kandë mi bi du wan soni di an bunu, hën Jehovah an feni mi u bunu möön.” Di sisa fuu bi begi Jehovah faa heepi ën faa sa sabi ee a ta feni ën u bunu jeti. Unfa Jehovah bi piki di begi fëën? A bi taki taa: „Dee gaanwomi bi fan ku mi, hën de lei mi taa Jehovah lobi mi jeti.” Bakaten a bi toona hakisi Jehovah faa lei ën taa a ta feni ën u bunu jeti. A bi taki taa „Di seei daka dë, mi bi kisi wan biifi di wanlö baaa ku sisa u di kemeente bi manda da mi. Di mi bi ta lesi di biifi di de manda da mi, hën mi bi si taa Jehovah bi haika di begi u mi.” Awa, Jehovah lo’ u mbei sëmbë taki soni da u, u lei u taa a ta feni u u bunu.​—Ps. 10:17.

14. Andi da wan woto fasi fa Jehovah ta lei u taa a ta feni u u bunu?

¹⁴ Jehovah ta lei u taa a ta feni u u bunu a wan woto fasi tu. A ta tei dee baaa ku dee sisa fuu u bai u a soni te a dë fanöudu. A di ten di pasa, Jehovah bi mbei apösutu Paulosu sikifi 14 biifi da dee baaa ku dee sisa fëën. A dee biifi dë, Paulosu bi leti de buta a pasi, ma a bi du ën ku lobi. Faandi mbei Jehovah bi mbei Paulosu bai de a soni ku dee biifi dë? Wë Jehovah da wan Tata di sa’ u kiija miii, nöö a ta sitaafu dee mii fëën so juu, u di a „lobi” de (Nöng. 3:11, 12). Fëën mbei ee wan sëmbë tei di Bëibel u bai u a wan soni, nöö u sa si ën kuma wan soni di ta lei taa Gadu ta feni u u bunu, ma na kuma wan soni di ta lei taa an ta feni u u bunu möön (Heb. 12:6). Un woto soni ta lei tu taa Jehovah ta feni u u bunu?

WOTO SONI DI TA LEI TAA JEHOVAH TA FENI U U BUNU

15. Ambë Jehovah ta da di santa jeje fëën, nöö faandi mbei di soni aki sa da u taanga?

¹⁵ Jehovah ta da dee sëmbë dee a ta feni u bunu di santa jeje fëën (Mat. 12:18). I sa hakisi iseei taa: ’Mi bi du soni di ta lei taa mi abi so u dee fasi di di jeje u Gadu ta mbei sëmbë ko abi ö?’ I ko si taa i ko ta möön hoi pasensi da wotowan möön di ja bi sabi soni u Jehovah u? Fuu taki ën, nöö möön joo ta mbei möiti u lei taa i abi dee fasi di di jeje u Gadu ta da sëmbë, möön joo ko dë seiki taa Jehovah ta feni i u bunu!​—Luku di pisi „Dee fasi di di jeje u Gadu ta mbei sëmbë ko abi, da . . . ”

16. Ambë Jehovah ta tei u konda di bunu buka, nöö unfa i ta fii u di i sabi di soni dë? (1 Tesalonika 2:4)

¹⁶ Jehovah buta di bunu buka a dee sëmbë dee a ta feni bunu maun. (Lesi 1 Tesalonika 2:4.) Luku un wini wan sisa de kai Jocelyn bi feni, u di a ta paaja di bunu buka da sëmbë. Wan daka, Jocelyn an bi ta fii bunu seei di a weki. A bi taki taa: „Mi bi ta fii kuma ma bi a’ na wan hojo du. Ma mi bi ta du di kowoonu pioniliwooko, nöö di daka dë bi dë wan u dee daka di mi bi ta peleiki. Fëën mbei mi bi begi te mi kaba, hën mi go a di peleikiwooko.” A di mamate dë, Jocelyn bi miti wan mujëë de kai Mary. Mary bi abi bunu fasi, söseei a bi kë u Jocelyn ko ta lei ën soni u Bëibel. Wantu liba baka di dë, hën Mary bi taki taa a bi dë ta begi Gadu faa heepi ën di Jocelyn naki di döö fëën. Di Jocelyn bi kai pakisei a di soni dë te a kaba, hën a bi taki taa: „Mi bi fii seei kuma Jehovah bi ta piki mi taa: ’Mi ta feni i u bunu.’” Wë u sabi taa na hii sëmbë o haika di bosikopu di u ta tja go da de. Ma u sa dë seiki taa Jehovah ta wai te u ta mbei hii möiti u konda di bunu buka da wotowan.

17. Andi i ta lei u di soni di Vicky bi taki u di lusupaima? (Psalöm 5:12)

¹⁷ Jehovah ta mbei dee sëmbë dee a ta feni u bunu, feni wini u di lusupaima (1 Tim. 2:5, 6). Ma nöö unfa a dë ee hati fuu ta piki u taa Jehovah an ta feni u u bunu, hii fa u dopu kaa, söseei hii fa u ta biibi taa Jesosi paka di lusupaima da u? Wë hoi a pakisei taa so juu di fasi fa u ta fii sa ganjan u, ma u sa futoou Jehovah. U di a ta si dee sëmbë dee ta biibi taa Jesosi paka di lusupaima da u, kuma sëmbë di ta libi a wan leti fasi, söseei a paamusi de taa a o mbei de feni gaan bunu. (Lesi Psalöm 5:12; Lom. 3:26.) Di kai di wan sisa di ta kai Vicky bi ta kai pakisei a di lusupaima bi heepi ën. Wan daka di sisa aki bi kai pakisei bumbuu a di lusupaima. Baka di dë, hën a bi taki taa: „Wan longi pisiten kaa Jehovah ta hoi pasensi da mi. . . . Ma fuu taki ën, nöö a dë kuma mi bi ta piki ën taa: ’Di lobi fii an taanga tjika u heepi mi. Di dëdë di di Womi Mii fii ko dëdë da libisëmbë an tjika fii sa da mi paadon u dee zöndu u mi.’” U di a bi ko ta kai pakisei a di lusupaima, mbei a bi bigi biibi taa Jehovah lobi ën tuutuu. Ee useei ta kai pakisei a di lusupaima, nöö useei o si taa Jehovah lobi u tu, söseei taa a ta feni u u bunu.

18. Fuun soni u sa dë seiki ee u ta mbei möiti go dou fuu ta lobi di Tata fuu di dë a liba ala?

¹⁸ Hii fa woo mbei hii möiti u du dee soni dee u taki u de a di woto aki, tökuseei an kan taa so juu woo ta fii bookosaka, nöö woo ta hakisi useei ee Jehovah ta feni u u bunu. Ee di soni dë ko pasa, nöö hoi a pakisei taa Jehovah ta feni „dee sëmbë dee ta lobi ën” u bunu (Jak. 1:12). Fëën mbei a bunu fii ta mbei möiti go dou fii ku Jehovah ko dë möön gaan mati, söseei mbei möiti fii sa si unfa a lei i taa a feni i u bunu. Hii juu i musu ta hoi a pakisei taa Jehovah „an dë longi poi ku hibiwan fuu”.​—Tjab. 17:27.