August

Hlokomela dintlha tse pedi tsa bohlokwa tse hlahang pesalemeng ena: (1) Batho ba lokileng ba hlahelwa ke mathata. (2) Jehova o a re pholosa mathateng a rona. Jehova o re pholosa jwang? O re thusa hore re utlwisise hore re tla hlahelwa ke mathata. Le hoja Jehova a re tshepisa hore re tla thaba ha re mo sebeletsa, ha a re tshepise hore re ke ke ra ba le mathata hona jwale. (Esa. 66:14) O re kgothaletsa hore re nahane ka bokamoso boo a re tshepisang bona, moo re tla phela re thabile ka ho sa feleng. (2 Bakor. 4:​16-18) Hona jwale o re thusa hore re tswele pele ho mo sebeletsa. (Dillo. 3:​22-24) Re ka ithutang mehlaleng ya bahlanka ba Jehova bao Bibele e buang ka bona le ba mehleng ena? Re ka nna ra hlahelwa ke mathata ao re sa a lebellang empa ha re tshepile Jehova, o tla dula a re thusa.—Pes. 55:22. w23.04 14-15 ¶3-4

Re ka ithuta ho mamela mohlaleng wa Josefa le Maria. Ba ne ba ikemiseditse ho mamela balaodi ba phahameng le ha ho ne ho se bonolo ho etsa jwalo. (Luka 2:​1-6) Ha Maria a ena le dikgwedi tse ka bang robong e le moimana, mmuso o ile wa fana ka taelo e neng e tla tlama yena le Josefa hore ba etse ntho e boima haholo. Augustus ya neng a laola dibaka tsohle tse tlasa Mmuso wa Roma, o ile a laela hore batho bohle ba ngodiswe. Josefa le Maria ba ne ba lokela ho ya Bethlehema. Ba ne ba tlo tsamaya leeto la dikhilomithara tse 150 dibakeng tse maralla. E ne e tlo ba leeto le boima, haholoholo bakeng sa Maria. E ka nna yaba Josefa le Maria ba ne ba tshwenyehile ka hore na Maria le lesea la bona le eso hlahe ba tla sireletseha. Ho ne ho tla etsahalang ha ngwana a ne a ka hlaha ba ntse ba le tseleng? Ngwana eo e ne e le Mesia eo esale ba mo lebelletse. Na ba ne ba tla nka taba eo e le lebaka la ho se mamele taelo ya mmuso? Le hoja Josefa le Maria ba ne ba ena le mabaka a ho tshwenyeha, ba ile ba mamela ho ntse ho le jwalo. Ka ha ba ile ba mamela, Jehova o ile a ba hlohonolofatsa. Maria o ile a fihla Bethlehema a bolokehile, lesea la hae la hlaha le phetse hantle a ba a kenya letsoho hore boprofeta ba Bibele bo phethahale.—Mik. 5:2. w23.10 8 ¶9; 9 ¶11-12

O ka etsang haeba o utlwa o tshoha pele o arabela dibokeng? O ka thuswa ke ho lokisetsa hantle. (Diprov. 21:5) Ha o utlwisisa hantle hore na sehlooho se bua ka eng, o ke ke wa tshoha haholo ha o arabela. Lokisetsa hore o fane ka dikarabo tse kgutshwanyane. (Diprov. 15:23; 17:27) Ha o fana ka dikarabo tse kgutshwanyane, o ke ke wa tshoha haholo ho feta ha o fana ka tse telele. Ha karabo ya hao e le kgutshwanyane ebile o e beha ka mantswe a hao, o tla be o bontsha hore o lokiseditse hantle ebile o utlwisisa seo ho buuwang ka sona. O ka etsang haeba ka mora ho sebedisa ditlhahiso tsena o ntse o tshoha ha o batla ho arabela hangata? Kgodiseha hore Jehova o ananela boiteko boo o bo etsang ba ho arabela. (Luka 21:​1-4) Jehova ha a lebella hore re etse dintho tseo re ke keng ra kgona ho di etsa. (Bafil. 4:5) Nahana ka seo o batlang ho se finyella le hore na o tla se finyella jwang mme o kope Jehova hore a o thuse ho kgoba matshwafo. Mohlomong o ka qala ka ho lokisetsa hore o fane ka karabo e le nngwe e kgutshwanyane. w23.04 21 ¶6-8

Moapostola Pauluse o re bapisa le masole a apereng diaparo tsa ntwa. Lesole le lokela ho dula le itokiseditse ho lwana ka dinako tsohle. Ho jwalo le ka rona. Re dula re itokiseditse letsatsi la Jehova ka ho apara tshireletso ya sefuba ya tumelo le lerato le helmete ya tshepo. Tshireletso ya sefuba e ne e sireletsa pelo ya lesole. Ka ho tshwanang, ho ba le tumelo le lerato ho sireletsa dipelo tsa rona tsa tshwantshetso. Makgabane ana a tla re thusa hore re tswele pele ho sebeletsa Modimo le ho latela Jesu. Ho ba le tumelo ho re fa kgodiseho ya hore Jehova o tla re putsa haeba re mo batla e le ka nnete. (Baheb. 11:6) Ho tla re thusa hore re dule re tshepahalla Moetapele wa rona Jesu le ha re ena le mathata. Re ka matlafatsa tumelo ya rona e le hore re mamelle mathata ka hore re ithute mehlaleng ya bara le baradi ba bo rona ba mehleng ena, ba ileng ba tshepahala le ha ba hloriswa kapa ba ena le mathata a ditjhelete. Re ka boela ra qoba kotsi ya ho rata tjhelete le ho ba le dintho tse ngata ka hore re etsise batho ba ileng ba fokotsa dintho tseo ba neng ba ena le tsona e le hore ba behe Mmuso pele. w23.06 10 ¶8-9

Kopa Jehova hore a o thuse hore o be le boitshwaro. Re hloka ho ba le boitshwaro e le hore re finyelle dintho tseo re batlang ho di etsa, haholoholo haeba ho le thata kapa re se na tabatabelo ya ho di finyella. Hopola hore boitshwaro ke tholwana ya moya o halalelang. Ka hoo, kopa hore Jehova a o thuse a sebedisa moya wa hae o halalelang hore o be le boitshwaro. (Luka 11:13; Bagal. 5:​22, 23) O se ke wa emela hore maemo a fetohe. Maemo a rona a ka nna a se ke a fetoha. Haeba re emela hore a fetohe, re ka nna ra se ke ra finyella dintho tseo re di rerileng. Re ka nyahama ha re bona eka ho thata ho finyella dintho tseo re neng re di rerile. Ha o nyahame, ntho e ka o thusang ke hore o qale hanyane. Haeba o batla ho ba le makgabane a itseng, o ka qala ho a bontsha ka ditsela tse nyenyane. Ha o batla ho bala Bibele kaofela, o ka qala ka ho ipehela nako e kgutshwanyane ya ho e bala. w23.05 29 ¶11-13

Matsatsing ana a ho qetela Jehova o sebedisa mokgatlo wa hae ho re fa tataiso e tswang Lentsweng la hae e le hore re dule re tsamaya ‘Tseleng ya Kgalalelo.’ (Esa. 35:8; 48:17; 60:17) Ha motho a dumela ho ithuta Bibele, o ba le monyetla wa ho tsamaya ‘Tseleng ya Kgalalelo.’ Ba bang ba tsamaya nako e kgutshwanyane ebe ba a tswa. Ba bang bona ba ikemiseditse ho tsamaya ho yona ho fihlela ba fihla moo ba yang. Ba ya hokae? Batho ba nang le tshepo ya ho phela lehodimong ba ya “paradeiseng ya Modimo” e lehodimong. (Tshen. 2:7) Ba nang le tshepo ya ho phela lefatsheng ba tla phethahala ka mora Puso ya Kreste ya Dilemo Tse Sekete. Haeba o se o ntse o tsamaya tseleng ena e kgolo, o se ke wa hetla. Hape o se ke wa e tlohela ho fihlela o fihlile lefatsheng le letjha. w23.05 17 ¶15; 19 ¶16-18

Ha o nahana ka dintho tsohle tseo Jehova a o etseditseng tsona, o tla di ananela mme o tla batla ho nehela bophelo ba hao ho yena. (Pes. 116:​12-14) Bibele e re Jehova o fana ka “mpho e nngwe le e nngwe e molemo le ntho e nngwe le e nngwe e phethahetseng.” (Jak. 1:17) Mpho e kgolo eo Jehova a re fileng yona ke sehlabelo sa Mora wa hae Jesu. Nahana ka hore na mpho ena ke ya bohlokwa hakae. Sehlabelo sa Jesu se entse hore o kgone ho ba motswalle wa Jehova ebile se entse hore o be le tshepo ya ho phela ka ho sa feleng. (1 Joh. 4:​9, 10) Ha o inehela ho Jehova, o mo bontsha hore o ananela lerato leo a o bontshitseng lona le ditlhohonolofatso tseo a o fileng tsona.—Deut. 16:17; 2 Bakor. 5:15. w24.03 5 ¶8

Re ikutlwa ka tsela e tshwanang le eo Lota a ileng a ikutlwa ka yona ha re bona tsela eo boitshwaro ba batho bo leng bobe ka teng mehleng ena. Ka ha o ne a tseba hore Ntate wa rona ya lehodimong o hloile boitshwaro bo bobe, o ne “a utlwisitswe bohloko ke batho ba sa mameleng ba neng ba etsa boitshwaro bo bobe ba sa swabe.” (2 Pet. 2:​7, 8) Ka ha Lota o ne a hlompha Jehova haholo a bile a mo rata, o ne a hloile boitshwaro bo bobe boo batho ba phelang le yena ba neng ba bo etsa. Le rona re phela le batho ba sa mameleng melao ya Jehova ya boitshwaro. Le ha ho le jwalo, re ka itshwara hantle haeba re ithuta ho rata Jehova le ho mo hlompha haholo. Jehova o re thusa ka dikeletso tseo re di fumanang bukeng ya Diproverbia. Kaofela ha rona re ka rua molemo o moholo ha re bala dikeletso tse fumanehang lengolong leo ho sa tsotellehe hore na re banna kapa basadi, re banyenyane kapa re baholo. Haeba re hlompha Jehova, re tla qoba ho ba le metswalle e etsang dintho tse fosahetseng. w23.06 20 ¶1-2; 21 ¶5

Mohlomong o kile wa hanyetswa ke ba lelapa kapa o kgethile ho etsa hore Mmuso wa Modimo e be yona ntho ya bohlokwa bophelong ba hao ho ena le hore o be le tjhelete e ngata le dintho tse ngata. (Mat. 6:33) Haeba ho jwalo, Jehova o tseba dintho tsohle tseo o mo etseditseng tsona. (Baheb. 6:10) E ka nna yaba o utlwisisa hantle mantswe a Jesu a reng: “E mong le e mong ya siileng ntlo, bana babo, mme, ntate, bana kapa masimo ka lebaka la ka le ka lebaka la ditaba tse monate tsa Mmuso wa Modimo o tla fumana matlo, bana babo, bomme, bana le masimo halekgolo hona jwale, a boele a fumane mahloriso. Lefatsheng le letjha le tlang, o tla fumana bophelo bo sa feleng.” (Mar. 10:​29, 30) Ditlhohonolofatso tseo o seng o di fumane di ngata ho feta dintho tseo o di tetseng.—Pes. 37:4. w24.03 9 ¶5

Ha ho eba le tlala e kgolo Judea e ileng ya ama Bakreste, bara le baradi ba bo rona ba phutheho ya Antioke ba ile “ba dumellana hore ba romele diphallelo ho barutuwa ba Judea ho ya ka moo e mong le e mong a ka kgonang.” (Dik. 11:​27-30) Le hoja Bakreste ba anngweng ke tlala ba ne ba dula hole, phutheho ya Antioke e ne e ikemiseditse ho ba thusa. (1 Joh. 3:​17, 18) Le rona re ka bontsha hore re na le qenehelo ha re utlwa hore ho na le bana ba bo rona ba anngweng ke koduwa. Re ka ba thusa hanghang, mohlomong ka ho botsa baholo hore na ho na le mosebetsi o hlokang ho etswa oo re ka thusang ka wona, ka ho ntsha monehelo wa mosebetsi wa lefatshe lohle kapa ka ho rapella bana ba bo rona ba anngweng ke koduwa eo. Bara le baradi ba bo rona ba ka boela ba hloka hore re ba thuse ka ditlhoko tsa bona tsa mantlha. Ha Morena wa rona Kreste Jesu a tla ho tla ahlola batho, e se eka a ka fumana re ntse re bontsha qenehelo ebe o re memela hore re “je lefa la Mmuso.”—Mat. 25:​34-40. w23.07 4 ¶9-10; 6 ¶12

Jesu o ile a etsisa Jehova ka hore a fetohe le maemo. O ne a rometswe lefatsheng hore a tlo ruta “dinku tse lahlehileng tsa ntlo ya Iseraele.” Empa o ile a bontsha hore o fetoha le maemo ha a ntse a etsa mosebetsi ona. Ka nako e nngwe, mosadi e mong eo e seng Moiseraele o ile a mo kopa hore a fodise moradi wa hae ya neng a “kenwe ke modemona ya mo sotlang hampe.” Jesu o ile a hauhela mosadi eo ka hore a fodise moradi wa hae. (Mat. 15:​21-28) Nahana ka mohlala ona o mong. Qalong ya tshebeletso ya hae, Jesu o ile a re: “Mang kapa mang ya ntatolang . . . , le nna ke tla mo latola.” (Mat. 10:33) Empa na o ile a latola Petrose, ya ileng a mo latola ka makgetlo a mararo? Tjhe, ha a ka a mo latola. Jesu o ne a tseba hore Petrose o bakile le hore ke monna ya nang le tumelo. Ka mora hore Jesu a tsoswe bafung, o ile a hlaha ho Petrose mme e ka nna yaba o ile a mo kgodisa hore o mo tshwaretse le hore o a mo rata. (Luka 24:​33, 34) Jehova Modimo le Jesu Kreste ba fetoha le maemo. Empa rona re batho ba jwang? Jehova o lebeletse hore re be batho ba fetohang le maemo. w23.07 21 ¶6-7

Ke dintho dife tseo re ka di bolellang batho ba bang tse re kgodisang hore tshepiso ya Modimo ya hore ho tla ba le Paradeise e tla phethahala? Ntho ya pele, Jehova ke yena ya etsang tshepiso eo. Buka ya Tshenolo e re: “Ya dutseng teroneng a re: ‘Bona, ke etsa hore dintho tsohle di be ntjha.’” Jehova o bohlale, o matla ebile o batla hore tshepiso ya hae e phethahale. Ya bobedi, ho latela tsela eo Jehova a shebang dintho ka yona, tshepiso ya hae e se e phethahetse. Ke ka hoo a reng: “Mantswe ana . . . a a tshepahala mme ke a nnete . . . Mantswe ana a se a phethahetse.” Ya boraro, ha Jehova a qala ho etsa ntho e itseng, o etsa bonnete ba hore o a e qeta mme sena se tiiswa ke mantswe a reng: “Ke nna Alfa le Omega.” (Tshen. 21:6) Jehova o tla bontsha hore Satane o leshano le hore o hlolehile ho etsa hore morero wa Jehova o se ke wa phethahala. Ha motho a re: “Ke a di utlwa ditaba tsena empa ha ke bone eka ke ntho e ka etsahalang.” O ka mo balla le ho mo hlalosetsa Tshenolo kgaolo ya 21 temana ya bohlano le ya botshelela. Mo bontshe ka moo Jehova a re kgodisitseng ka teng hore tshepiso ya hae e tla phethahala jwalo ka ha eka o saenne.—Esa. 65:16. w23.11 7 ¶18-19

Jehova o ile a etsa tshepiso ena ho Abrahama ha a ne a le dilemo di 75 mme a se na bana. Na Abrahama o ile a bona ha tshepiso eo e phethahala? O ile a bona ha ho phethahala karolwana ya yona feela. Ka mora hore a tshele Noka ya Eufrate, o ile a ema dilemo tse 25 yaba o bona ha mora wa hae Isaka a tswalwa ka mohlolo. Ka mora dilemo tse ding tse 60, o ile a ba le ditloholo tse pedi e leng Esau le Jakobo. (Baheb. 6:15) Empa Abrahama ha a ka a bona ha bana ba hae ba fetoha setjhaba se seholo mme ba fumana naha eo Modimo a neng a ba tshepisitse yona. Le ha ho le jwalo, e ne e le motswalle ya haufi wa Mmopi wa hae. (Jak. 2:23) Ha Abrahama a se a tsositswe bafung, o tlo thaba haholo ha a utlwa hore ditjhaba tsohle di ile tsa hlohonolofatswa ka lebaka la tumelo le mamello ya hae. (Gen. 22:18) Re ithutang tabeng ee? Le rona hona jwale re ka nna ra se ke ra bona ha dintho tsohle tseo Jehova a di tshepisitseng di phethahala. Empa haeba re ena le mamello jwalo ka Abrahama, re ka kgodiseha hore Jehova o tla re putsa hona jwale a be a re putse le ho feta lefatsheng le letjha leo a re tshepisitseng lona.—Mar. 10:​29, 30. w23.08 24 ¶14

Morena Uzia o ne a ikokobeditse ha a sa le motjha. O ile a ithuta “ho hlompha Modimo wa nnete.” O phetse dilemo tse 68 mme boholo ba nako eo a e phetseng, Jehova o ile a mo hlohonolofatsa. (2 Dikron. 26:​1-4) Morena Uzia o ile a hlola ditjhaba tse ngata tseo e neng e le dira tsa setjhaba sa hae a ba a etsa hore lebotho la Jerusalema le be matla. (2 Dikron. 26:​6-15) Re kgodisehile hore Morena Uzia o ne a thabile ka lebaka la dintho tseo Modimo a ileng a mo thusa ho di etsa. (Moek. 3:​12, 13) Morena Uzia o ne a tlwaetse ho laela mme ho ka etsahala hore ebe sena se ile sa etsa hore a nahane hore a ka etsa eng kapa eng eo a e batlang. Ka letsatsi le leng, Morena Uzia o ile a ya tempeleng ya Jehova mme ka boikgohomoso a leka ho tjhesa dibano aletareng e leng seo marena a neng a sa lokela ho se etsa. (2 Dikron. 26:​16-18) Moprista ya Phahameng Azaria o ile a leka ho mo kgalemela empa sena se ile sa halefisa Uzia haholo. Ka maswabi, Uzia o ile a hloleha ho dula a tshepahala mme Jehova o ile a mo otla ka lepera. (2 Dikron. 26:​19-21) Dintho di ka be di mo tsamaetse hantle hoja o ile a tswela pele a ikokobeditse. w23.09 10 ¶9-10

Moapostola Petrose o ne a ntse a etsa diphoso le ka mora hore a tlotswe ka moya o halalelang. Ka selemo sa 36 o ne a le teng ha Korneliase wa Moditjhaba ya neng a sa bolla a tlotswa ka moya o halalelang. Ketsahalo eo e ne e bontsha hore “Modimo ha a leeme” le hore Baditjhaba ba ne ba ka kgona ho ba ditho tsa phutheho ya Bokreste. (Dik. 10:​34, 44, 45) Ka mora ketsahalo eo, Petrose o ile a ikutlwa a lokolohile hore a ka ja le Baditjhaba e leng ntho eo a neng a ke ke a e etsa pele ho moo. Le ha ho le jwalo, Bakreste ba bang ba Bajuda ba ne ba re Bajuda le Baditjhaba ha ba a lokela ho ja ha mmoho. Ha Bajuda ba bang ba Bakreste ba fihla Antioke, Petrose o ile a kgaotsa ho ja le bana ba bo ba Baditjhaba, mohlomong hobane a ne a tshaba ho kgopisa Bakreste bao ba Bajuda. Ha moapostola Pauluse a bona ketso ena e bontshang boikaketsi, o ile a mo kgalemela ka pela batho ba bang. (Bagal. 2:​13, 14) Petrose ha a ka a nyahamiswa ke phoso eo. w23.09 22 ¶8

Ha o itlhahloba ka botshepehi, o ka nna wa hlokomela hore ho na le moo o lokelang ho lokisa teng empa o se ke wa nyahama. “Morena o mosa” mme o tla o thusa hore o ntlafatse. (1 Pet. 2:3) Moapostola Petrose o ile a re: “Modimo . . . o tla qetela kwetliso ya lona. O tla le tiisa.” Ho na le nako eo ka yona Petrose a kileng a utlwa a sa tshwanelehe hore e be molatedi wa Jesu. (Luka 5:8) Empa Jehova le Jesu ba ile ba mo tshehetsa mme o ile a latela Kreste ka botshepehi. Ka hoo, Jehova o ile a fa Petrose monyetla wa hore “a kene Mmusong o sa feleng wa Morena le Mopholosi wa rona Jesu Kreste.” (2 Pet. 1:11) Ka nnete oo e ne e le moputso o moholo. Haeba o tshepahala jwalo ka Petrose ebile o dumella hore Jehova a o kwetlise, le wena o tla fumana moputso wa bophelo bo sa feleng. O tla ‘pholoswa ka lebaka la tumelo ya hao.’—1 Pet. 1:9. w23.09 31 ¶16-17

Tabernakele e ne e ena le lebala le le leng. Lebala leo le ne le le leholo ebile le kampetswe mme baprista ba ne ba etsetsa mesebetsi ya bona moo. Aletare e kgolo ya koporo ya nyehelo ya setjheso e ne e le lebaleng le beisine ya metsi e entsweng ka koporo, eo baprista ba neng ba e sebedisetsa ho itlhwekisa pele ba etsa mosebetsi o halalelang. (Ex. 30:​17-20; 40:​6-8) Mehleng ena batlotsuwa ba sebetsa ka botshepehi lebaleng le ka hare la tempele ya tshwantshetso. Beisine e kgolo ya metsi e neng e le tabernakeleng e hopotsa Bakreste bohle hore ba lokela ho phela ka tsela e thabisang Modimo le ho mamela melao ya hae. “Bongata bo boholo ba batho” bona ba rapela Modimo hokae? Moapostola Johanne o ile a ba bona ba “eme ka pela terone . . . ba sebeletsa [Modimo] bosiu le motshehare ka tempeleng ya hae.” Bongata bo boholo bo sebeletsa Modimo lebaleng le ka ntle la tempele ya tshwantshetso. (Tshen. 7:​9, 13-15) Ka nnete re ananela ho sebeletsa Jehova borapeding ba nnete boo a bo hlophisitseng. w23.10 28 ¶15-16

Jehova o boetse o sebedisa baholo ho re fa matla. (Esa. 32:​1, 2) Ka hoo, ha o utlwa o tshwenyehile, bua le baholo ka dintho tse o tshwenyang. O se ke wa tsilatsila ho amohela thuso eo ba o fang yona. Jehova a ka ba sebedisa ho o matlafatsa. Ditshepiso tse hlahang Bibeleng di ka re fa tshepo tsa ba tsa re fa matla ebang re tla phela ka ho sa feleng lefatsheng la paradeise kapa lehodimong. (Bar. 4:​3, 18, 19) Tshepo eo re nang le yona e re fa matla a ho mamella mathata, a ho bolella batho ditaba tse monate le ho etsa mesebetsi e fapaneng eo re e fuwang ka phuthehong. (1 Bathes. 1:3) Moapostola Pauluse le yena o ile a matlafatswa ke tshepo eo. O ne a “peteditswe,” a “tsielehile,” a “hloriswa” a bile a “imetswe ke mathata.” Le bophelo ba hae bo ne bo le kotsing ka dinako tse ding. (2 Bakor. 4:​8-10) Ntho e ileng ya etsa hore Pauluse a be matla ke ho dula a nahana ka tshepo eo a nang le yona. (2 Bakor. 4:​16-18) Pauluse o ile a dula a nahana ka bokamoso ba hae. Tshepo eo a neng a ena le yona ya ho phela ka ho sa feleng lehodimong. Pauluse o ile a nahanisisa ka tshepo eo mme e ile ya etsa hore a ikutlwe a ‘ntjhafetse letsatsi le letsatsi.’ w23.10 15-16 ¶14-17

Ha o rapela, ipotse hore na ke nako e loketseng ya hore Jehova a arabe kopo ya hao. Re ka nna ra ikutlwa re hloka hore dithapelo tsa rona di arajwe hanghang. Empa Jehova o a tseba hore ke nako efe e nepahetseng ya hore a re thuse. (Baheb. 4:16) Haeba re sa fumane ntho eo re e kopang hanghang, re ka nna ra nahana hore karabo ya Jehova ke ‘Tjhe.’ Empa karabo ya Jehova e ka boela ya bolela hore ‘Ha eso be nako e nepahetseng ya hore a re etsetse ntho eo re e kopileng.’ Ka mohlala, morabo rona e motjha o ile a rapella hore Jehova a mo fodise. Empa ha a ka a fola. Haeba Jehova a ne a ka mo fodisa ka mohlolo, Satane o ne a ka re morabo rona eo o sebeletsa Jehova hobane a mo fodisitse. (Jobo 1:​9-11; 2:4) Hape Jehova o se a ntse a behile nako eo ka yona a tla fodisa malwetse ohle. (Esa. 33:24; Tshen. 21:​3, 4) Ka hoo, ho fihlela nako eo e fihla, re ke ke ra lebella hore Jehova a re fodise ka mohlolo. Morabo rona o ne a ka nna a kopa Jehova hore a mo fe matla le kgotso ya kelello hore a kgone ho mamella ho kula le hore a tswele pele ho mo sebeletsa ka botshepehi. w23.11 24 ¶13

Samsone o ne a entse phoso e kgolo empa ha a ka a tela. O ile a batla monyetla wa ho phetha thomo eo Modimo a neng a mo file yona ya ho lwantsha Bafilista. (Baahl. 16:​28-30) Samsone o ile a rapela Jehova a re: “Ke kopa o nthuse . . . hore ke iphetetse ho Bafilista.” Modimo wa nnete o ile a araba kopo ya Samsone yaba o mo fa matla a sa tlwaelehang hape. Ka lebaka leo, Samsone o ile a atleha ho bolaya Bafilista ba bangata ho feta bao a neng a kile a ba bolaya pele ho moo. Le hoja Samsone a ile a fumana ditholwana tse bosula ka lebaka la phoso ya hae, ha a ka a kgaotsa ho leka ho etsa thato ya Jehova. Le haeba re ka etsa phoso yaba re a kgalemelwa kapa re lahlehelwa ke mosebetsi o itseng ka mokgatlong wa Jehova, ha re a lokela ho tela. Re lokela ho hopola hore Jehova o dula a ikemiseditse ho re tshwarela. (Pes. 103:​8, 9) Le ha re entse diphoso, Jehova a ka tswela pele a re sebedisa feela jwalo ka ha a ile a sebedisa Samsone. w23.09 6 ¶15-16

Ha o mamella, Jehova o a o amohela. Ha se hore Jehova o a thaba ha o hlahelwa ke mathata. Empa o thabiswa ke hore ebe o a mamella. Ke ntho e kgothatsang haholo ho tseba hore Jehova o a thaba ha re mamella mathata. (Pes. 5:12) Hopola hore Abrahama o ile a ba le mathata mme Jehova o ile a mo amohela hobane a ile a a mamella. Jehova o ile a mo nka e le motswalle wa hae a ba a mo nka e le motho ya lokileng. (Gen. 15:6; Bar. 4:​13, 22) Le rona Jehova a ka re nka jwalo. Modimo ha a re amohele a ipapisitse le hore na re etsa mosebetsi o mokae kapa hore na re mo sebeletsa ka ditsela dife. O re amohela a ipapisitse le mamello le botshepehi ba rona. Ho sa tsotellehe hore na re dilemo di kae, maemo a rona ke afe kapa re na le bokgoni bofe, kaofela ha rona re ka kgona ho mamella. Na hona jwale o mameletse mathata ka botshepehi? Haeba ho jwalo, hopola hore o thabisa Modimo. Ha re elellwa hore re thabisa Modimo, tshepo ya rona e ba matla le ho feta. w23.12 11 ¶13-14

Monna wa Mokreste o lokela ho ithuta ho mamela le ho buisana le batho hantle. Sena se bolela hore o lokela ho mamela le ho utlwisisa hore na batho ba bang ba nahanang le hore ba ikutlwa jwang. (Diprov. 20:5) A ka ithuta ho bona hore na motho o ikutlwa jwang ka ho mamela tsela eo a buang ka yona, ka ho mo sheba sefahlehong le boitshisinyo ba mmele. O ke ke wa kgona ho etsa dintho tsena haeba o sa qete nako o ena le batho. Haeba hangata o bua le batho ka e-mail kapa o ba ngolla melaetsa ka founu, sena se ka etsa hore o se ke wa kgona ho buisana le batho ba bang hantle kapa ho utlwisisa maikutlo a bona. Ka hoo, etsa menyetla ya hore o buisane le batho ba bang le shebane mahlong. (2 Joh. 12) Monna wa Mokreste ya nang le tumelo e matla o boetse o lokela ho kgona ho itlhokomela le ho hlokomela lelapa la hae. (1 Tim. 5:8) Ke ha bohlokwa hore o ithute ho etsa dintho tse tla o thusa hore o fumane mosebetsi. (Dik. 18:​2, 3; 20:34; Baef. 4:28) Qeta mosebetsi oo o o etsang, o se ke wa o siya hare. Sena se tla etsa hore batho ba o tsebe o le motho ya sebetsang ka thata. Ha o etsa jwalo, ho tla ba bonolo hore o fumane mosebetsi le hore o tshwarelle ho wona. w23.12 27 ¶12-13

Ha Bibele e bua ka “letsatsi la Jehova,” e bua ka nako eo Jehova a tla fedisa dira tsa hae le ho pholosa batho ba hae. Nakong e fetileng Jehova o ile a fana ka dikahlolo. (Esa. 13:​1, 6; Ezek. 13:5; Sof. 1:8) Mehleng ena “letsatsi la Jehova” le tla qala ha baetapele ba dipolotiki ba hlasela Babilona e moholo mme le fele ka ntwa ya Armagedone. Re lokela ho itokisa hona jwale e le hore re pholohe “letsatsi” leo. Jesu o ile a re ha re a lokela ho itokisetsa “mahlomola a maholo” feela empa re boetse re lokela ho ‘dula re itokisitse.’ (Mat. 24:21; Luka 12:40) Lengolong la pele leo moapostola Pauluse a ileng a le ngolla Bathesalonika, o ile a etsa dipapiso tse ngata ho thusa Bakreste hore ba itokisetse letsatsi le leholo la Jehova la kahlolo. Pauluse o ne a tseba hore letsatsi la Jehova le ne le ke ke la fihla ka yona nako eo. (2 Bathes. 2:​1-3) Le ha ho le jwalo, o ile a ba kgothaletsa hore ba itokisetse letsatsi leo jwalo ka ha eka le ne le tla fihla letsatsing le hlahlamang mme le rona re ka sebedisa keletso ya hae. w23.06 8 ¶1-2

Ka selemo sa 1978, ho ile ha hahwa mohaho o molelele haholo Tokyo, Japane. Batho ba ne ba dula ba ipotsa hore na mohaho oo o tla dula o eme ho fihlela neng ka ha ho ne ho eba le ditshisinyeho tse ngata tsa lefatshe toropong eo. Dienjiniere di ile tsa etsang e le hore mohaho oo o dule o eme? Di entse hore mohaho oo o be matla le hore o dule o tsitsitse ha ho eba le ditshisinyeho tsa lefatshe. Ke ka tsela efe Bakreste ba tshwanang le mohaho oo o molelele? Mokreste o lokela ho dula a tiile empa hape o lokela ho fetoha le maemo. O lokela ho dula a tiile le ho ikemisetsa ho mamela melao ya Jehova. “O itokiseditse ho mamela” ebile ha a inehele hore a etse dintho tse fosahetseng. Le ha ho le jwalo, o fetoha le maemo ha ho hlokahala ebile “ha a manganga.” (Jak. 3:17) Mokreste ya nang le tekatekano ha a tsitlelle hore dintho di etswe ka tsela ya hae ebile ha a dumele ntho e nngwe le e nngwe ho akareletsa le dintho tse fosahetseng. w23.07 14 ¶1-2

Jesu o ile a hana ho etsa dintho tseo Satane Diabolose a neng a re a di etse, ho akareletsa le ya hore a se ke a tshepahalla Modimo. (Mat. 4:​1-11) Satane o ne a batla hore Jesu a etse sebe e le hore a se ke a lopolla batho sebeng. Ha Jesu a ne a le lefatsheng a etsa mosebetsi wa boboledi, o ile a tlameha ho mamella mathata. Batho ba ile ba mo hlorisa mme ba leka ho mo bolaya. (Luka 4:​28, 29; 13:31) O ile a tlameha ho mamella diphoso tsa balatedi ba hae. (Mar. 9:​33, 34) Pele Jesu a bolawa, o ile a hloriswa haholo a ba a tlotlollwa. Ka mora moo, o ile a bolawa jwalo ka leshodu le ka tsela e sehloho. (Baheb. 12:​1-3) O ile a tlameha ho mamella mathata ao a le mong Jehova a sa mo sireletse. (Mat. 27:46) Jesu o ile a mamella dintho tse bohloko e le hore a ka lopolla batho sebeng le lefung. Ho nahana ka mathata a mangata ao Jesu a ileng a a mamella e le hore re ka lopollwa, ho etsa hore re mo rate le ho feta. w24.01 10-11 ¶7-9

Ho ba le mamello ho re thusa ho sebedisana hantle le batho ba bang. Ho re thusa ho mamela ka hloko ha batho ba bang ba bua. (Jak. 1:19) Hape ho re thusa ho ba le kgotso le batho ba bang. Ho re thusa hore re se ke ra etsa dintho re sa nahana le hore re se ke ra buisa batho ba bang hampe ha re imetswe kelellong. Hape haeba re ena le mamello, re ke ke ra halefa kapele ha motho e mong a re utlwisitse bohloko. Ho ena le ho iphetetsa, re tla ‘tswela pele ho mamellana le ho tshwarelana.’ (Bakol. 3:​12, 13) Ha re ena le mamello re tla etsa diqeto tse bohlale. Ho ena le ho etsa diqeto ka lepotlapotla, re tla ipha nako ya ho etsa dipatlisiso le ho etsa kgetho e molemo. Mohlala, haeba re ntse re batla mosebetsi, re ka nna ra batla ho amohela mosebetsi o mong le o mong feela o hlahang. Le ha ho le jwalo, haeba re ena le mamello, re tla ipha nako ya ho nahanisisa ka dintho tse kang hore na mosebetsi oo o tla ama lelapa la rona le kamano ya rona le Jehova jwang. Haeba re ena le mamello, re tla qoba ho etsa qeto e fosahetseng. w23.08 22 ¶8-9

Haeba o ikutlwa o nyahame ha o ntse o leka ho qoba ho etsa dintho tse fosahetseng, ho nahana ka tshepiso eo o e etseditseng Jehova ha o ne o inehela ho yena ho tla o thusa hore o kgone ho qoba ho etsa ntho e fosahetseng. Bo tla o thusa jwang? Ha o inehela ho Jehova ha o sa iphelela. Taba ena e bolela hore o tla qoba ho etsa dintho tse batlwang ke wena le tseo o batlang ho di finyella. (Mat. 16:24) Ka hoo, ha o hlahelwa ke bothata bo itseng o ke ke wa ipotsa hore na o etseng boemong boo hobane o tla be o entse qeto ya hore o tla tshepahalla Jehova. O tla dula o ikemiseditse ho thabisa Jehova. Haeba o etsa jwalo o tla be o etsisa Jobo. Le hoja a ile a hlahelwa ke mathata a boima, o ile a bua ka kgodiseho a re: “Ke tla dula ke tshepahala.”—Jobo 27:5. w24.03 9 ¶6-7

Jehova, “Modimo ya lerato,” o na le rona. (2 Bakor. 13:11) O re tsotella re le batho ka bomong. Re kgodisehile hore o re “sireletsa . . . ka lerato la hae.” (Pes. 32:10) Ha re tswela pele re nahanisisa ka moo Jehova a re bontshang hore o a re rata, re bona haholwanyane hore o a re tsotella mme seo se etsa hore re atamele haufi le yena. Re ka mo rapela ka bolokolohi mme ra mo bolella ka moo re hlokang hore a re rate. Re ka mo bolella dintho tsohle tse re tshwenyang hobane re kgodisehile hore o a utlwisisa le hore o ikemiseditse ho re thusa. (Pes. 145:19) Feela jwalo ka ha re atamela haufi le mollo ha ho bata, re atamela haufi le Jehova hobane a re rata. Jehova o re rata haholo ebile o bonolo. Ka hoo, thaba hobane Jehova o a o rata. E se eka re ka arabela leratong leo Jehova a re bontshang lona ka ho re: “Ke rata Jehova.”—Pes. 116:1. w24.01 31 ¶19-20

Jesu o ile a ruta batho hore lebitso la Modimo ke Jehova empa ha a ka a fella moo. Bajuda bao a neng a ba ruta ba ne ba se ba ntse ba tseba lebitso la Modimo. Empa Jesu o ile a etella pele ho ‘hlalosa hore na Modimo ke mang.’ (Joh. 1:​17, 18) Ka mohlala, Mangolo a Seheberu a re Jehova o mohau ebile o na le kutlwelobohloko. (Ex. 34:​5-7) Jesu o ile a hlalosa taba ena ka ho pharaletseng ha a ne a etsa papiso ya mora ya lehlaswa le ntate wa hae. Ha re bala ka ntate enwa mme re utlwa hore o ile a bona mora wa hae ya bakileng “a sa le hole,” a mo mathela, a mo haka a ba a mo tshwarela ho tswa pelong, re bona ka ho hlakileng hore na Jehova o na le kutlwelobohloko le mohau hakae. (Luka 15:​11-32) Jesu o thusitse batho hore ba utlwisise hore na hantlentle Ntate wa hae ke Modimo ya jwang. w24.02 10 ¶8-9

Jehova o kgatholla le ho tshedisa ba imetsweng, feela jwalo ka ha metsi a hlwekileng a sediba a kgatholla ba nyorilweng. Re ka etsisa Jehova jwang ka ho utlwela batho bohloko le ho ba tshedisa? Tsela e nngwe ke ka hore re lwanele ho ba le makgabane a tla re thusa hore re utlwele batho ba bang bohloko le ho ba tshedisa. Makgabane ao ke afe? Ke eng e tla re thusa hore re dule re ratana e le hore ‘re nne re tshedisane’ letsatsi le letsatsi? (1 Bathes. 4:18) Re lokela ho ba le makgabane a kang kutlwelobohloko, lerato le mosa. (Bakol. 3:12; 1 Pet. 3:8) Makgabane aa a tla re thusa jwang? Ha re utlwela bana ba bo rona bohloko ebile re ba tsotella e le ka nnete, re tla ba le takatso e matla ya ho ba tshedisa ha ba ena le mathata. Jwalo ka ha Jesu a ile a tjho, “motho o bua ntho e tletseng ka pelong ya hae. Motho ya lokileng o bua dintho tse ntle hobane ho tletse tsona ka pelong ya ha.” (Mat. 12:​34, 35) Ho tshedisa bana ba bo rona ha ba ena le mathata ke tsela ya bohlokwa ya ho bontsha hore re a ba rata. w23.11 10 ¶10-11

Re lokela ho kopa thuso haeba re batla ho utlwisisa boprofeta ba Bibele. Nahana ka mohlala ona. A re re o etetse sebaka seo o sa se tsebeng empa motswalle wa hao eo o tsamayang le yena o se tseba hantle. O tseba hantle hore na le hokae le hore tsela e nngwe le e nngwe e ya hokae. O ne o tla thaba hore ebe motswalle wa hao o dumetse ho tsamaya le wena. Ka tsela e tshwanang, Jehova o tshwana le motswalle eo mme o tseba bokamoso ba rona hantle. Ka hoo, e le hore re utlwisise boprofeta ba Bibele, re lokela ho ikokobetsa mme re kope thuso ho Jehova. (Dan. 2:28; 2 Pet. 1:​19, 20) Jehova o jwalo ka motswadi ya molemo, o batla hore re thabele bophelo nakong e tlang. (Jer. 29:11) Ha a tshwane le batho hobane ke motswadi ya kgonang ho re bolella hantle hore na ho tlo etsahalang nakong e tlang ebile o dula a nepile. Jehova o kgethile batho hore ba ngole boprofeta ka Lentsweng la hae e le hore re ka tseba ka diketsahalo tsa bohlokwa pele di etsahala.—Esa. 46:10. w23.08 8 ¶3-4