BATJHA BA A BOTSA
Nka Etsang Haeba ke Tlotse Molao wa Lapeng?
Hoo e ka bang malapa kaofela a na le melao, e kang hore na o lokela ho fihla hae ka nako efe, o lokela ho sebedisa sesebediswa sa elektronike nako e kae le hore na o lokela ho tshwara ba bang jwang.
O ka etsang haeba o tlotse molao wa lapeng? O ke ke wa kgona ho fetola seo o se entseng, empa o ka etsa hore dintho di se ke tsa mpefala. Sehlooho sena se ka o thusa hore o bone hore na o ka etsa seo jwang.
Seo o sa lokelang ho se etsa
Haeba batswadi ba hao ba sa tsebe hore o tlotse molao, o ka nna wa batla ho pata taba eo.
Haeba ba tseba hore o tlotse molao, o ka nna wa batla ho ikemela kapa o behe motho e mong molato.
Ho etsa jwalo ha ho a nepahala. Hobaneng? Hobane ho pata dintho tseo o di entseng kapa ho ikemela ho bontsha hore ha o a hola. Sena se tla bontsha batswadi ba hao hore o sa le hole le moo ho uwang.
“Ho bua leshano ha se tharollo. Ha nako e ntse e ya, nnete e tla hlahella, mme kgalemelo e tla ba matla ho feta ha o ne o buile nnete ho tloha qalong.”—Diana.
Seo o ka se etsang
Dumela hore o entse phoso. Bibele e re: “Motho ya patang diphoso tsa hae a ke ke a atleha.” (Diproverbia 28:13) Batswadi ba hao ba a tseba hore ha o a phethahala. Empa ba batla hore o tshepahale.
“Ho tla ba bonolo hore batswadi ba hao ba o tshwarele ha o bua nnete. Batswadi ba hao ba tla o tshepa ha o bua nnete.”—Olivia.
Kopa tshwarelo. Bibele e re: “Kaofela ha lona le ikokobetse.” (1 Petrose 5:5) O lokela hore o be le boikokobetso e le hore o kope tshwarelo mme o se ke wa ikemela.
“Ha batho ba tlwaetse ho ikemela, ha ba sa ikutlwa ba le molato ha ba entse phoso. Ha nako e ntse e ya, ha ba na ho ikwahlaya ho hang ha ba entse ntho e mpe.”—Heather.
Amohela ditlamorao. Bibele e re: “Mamelang tayo.” (Diproverbia 8:33) O se ke wa tletleba empa o amohele tayo eo batswadi ba hao ba o fang yona.
“Ho tletleba ho mpefatsa dintho le ho feta. Amohela dithibelo tseo o di behetsweng, mme o se ke wa nahana ka seo o seng o sa kgone ho se etsa.”—Jason.
Sebeletsa hore o tsheptjwe hape. Bibele e re: “Lahla botho ba kgale bo dumellanang le tsela eo le neng le itshwara ka yona pele.” (Baefese 4:22) Tswela pele ho etsa dintho tse ntle e le hore batswadi ba hao ba ka o tshepa hape.
“Ha o tswela pele ho etsa diqeto tse bohlale mme o bontsha batswadi ba hao hore o ke ke wa pheta phoso e tshwanang, ba tla o tshepa hape.”—Karen.
KELETSO: Etsa sohle seo o ka se kgonang ho bontsha hore o a tshepahala. Ka mohlala, ha o tsamaile, jwetsa batswadi ba hao ha o le tseleng e kgutlang le haeba o sa tlo dieha ho fihla. Le haeba o sa bue, ba tla bona hore o batla ba o tshepe hape.