Bolella Batho ba Bang Ditaba Tse Monate Tsa Hore Lefatshe le Letjha le Haufi

Ka November, ho tla ba le letsholo le kgethehileng la ho bolella batho ditaba tse monate tsa hore lefatshe le letjha le haufi. (Pes 37:10, 11; Tše 21:3-5) Lokisa maemo a hao e le hore o ka sebetsa ka mafolofolo letsholong lena. Haeba o batla ho ba pulamadiboho e thusang kgweding eo, o ka kgetha hore na o tla sebetsa dihora tse 30 kapa tse 50.

Hlophisa lengolo le buang ka lefatshe le letjha leo o ka le ballang batho ba bangata ka moo o ka kgonang. Kgetha temana ya Bibele eo batho ba sebakeng sa heno ba tla e rata. Haeba ka leeto la pele motho a bontsha hore o thabela moqoqo, o ka mo fa makasine wa batho bohle wa Tora ya ho Lebela No. 2 2021. Kgutlela ho motho eo ka pele ka moo o ka kgonang mme haeba o kgona qadisa thuto ya Bibele o sebedisa bukana ya O ka Thaba ka ho sa Feleng! Ho thabisa hakaakang ho bolella batho “ditaba tse molemo tsa ho hong ho molemo”.​—Esa 52:7.

SHEBELLANG VIDEO YA PINA YA LEFATSHENG LE LETJHA EBE LE ARABA DIPOTSO TSE LATELANG:

• Ke dintho dife tse monate tse tla etsahala nakong e tlang tseo ngwanana ya hlahang videong a ntseng a nahana ka tsona?

• Ke dintho dife tseo o tatetseng ho di bona lefatsheng le letjha?

• Ho nahanisisa ka tshepo ya lefatshe le letjha ho ka o thusa jwang hore ka mafolofolo o itokisetse ho kenya letsoho letsholong le kgethehileng le tla ba ka November?​—Lu 6:45