Labone, la 16 October
Hlekang tsela ya Jehova! Etsang tsela e kgolo e otlolohileng bakeng sa Modimo wa rona lehwatateng.—Esa. 40:3.
Leeto le boima leo Baiseraele ba neng ba tla le nka ho tloha Babilona ho ya Iseraele, le ne le ka nka dikgwedi tse nne. Empa Jehova o ile a ba tshepisa hore ditshitiso le ha e le dife tseo ba neng ba tla kopana le tsona di ne di tla suthiswa. Bajuda ba tshepahalang ba ne ba tseba hore melemo ya ho kgutlela Iseraele e mengata ho feta boitelo le ha e le bofe boo ba neng ba ka bo etsa. Tlhohonolofatso e kgolo ka ho fetisisa eo ba neng ba tla e fumana e ne e amana le borapedi ba bona. Ho ne ho se na tempele le ha e le nngwe feela ya Jehova Babilona. Ho ne ho se na aletare eo Baiseraele ba neng ba ka etsa mahlabelo ao ba neng ba lokela ho a etsa ho latela Molao wa Moshe hape ho ne ho se na baprista ba hlophisitsweng hore ba etse mahlabelo ao. Batho ba neng ba rapela medimo ya bohata motseng oo ba ne ba le bangata ho feta ba hlomphang Jehova le ho mamela melao ya hae. Ka hoo, Bajuda ba dikete ba ratang Jehova ba ne ba labalabela ho kgutlela habo bona moo ba neng ba tla rapela Jehova ka tsela eo a e batlang. w23.05 14-15 ¶3-4
Labohlano, la 17 October
Tswelang pele le phela jwalo ka bana ba lesedi.—Baef. 5:8.
Re hloka moya o halalelang wa Modimo e le hore re tswele pele re phela “jwalo ka bana ba lesedi.” Hobaneng? Hobane ha ho bonolo ho dula re hlwekile lefatsheng lena le tletseng boitshwaro bo bobe. (1 Bathes. 4:3-5, 7, 8) Moya o halalelang o ka re thusa hore re se ke ra nahana jwalo ka batho ba lefatshe lena, ba sa shebeng dintho ka tsela eo Jehova a di shebang ka yona. O boetse o ka re thusa hore re hlahise “mefuta yohle ya dintho tse molemo le tse lokileng.” (Baef. 5:9) Tsela e nngwe ya ho fumana moya o halalelang ke ka hore re o rapelle. Jesu o ile a re Jehova “o tla fana ka moya o halalelang ho ba mo kopang.” (Luka 11:13) Re boetse re fumana moya o halalelang ha re rorisa Jehova ha mmoho dibokeng tsa Bokreste. (Baef. 5:19, 20) Moya o halalelang wa Modimo o re susumeletsa hore re phele ka tsela e thabisang Modimo. w24.03 23-24 ¶13-15
Moqebelo, la 18 October
Le nne le kope, le tla fuwa. Le nne le batle, le tla fumana. Hape le nne le kokote, le tla bulelwa.—Luka 11:9.
Na o hloka ho ba le mamello? Haeba ho jwalo, rapela Jehova hore a o thuse. Mamello ke e nngwe ya ditholwana tse behwang ke moya o halalelang. (Bagal. 5:22, 23) Ka hoo, re ka kopa Jehova hore a re fe moya o halalelang le ho re thusa ho ba le ditholwana tse behwang ke wona. Haeba re le boemong boo ho bona ho leng thata ho ba le mamello, ‘re nne re kope’ hore a re fe moya o halalelang e le hore o re thuse ho ba le yona. (Luka 11:13) Re ka boela ra kopa Jehova hore a re thuse ho sheba ditaba ka tsela eo a di shebang ka yona. Ka mora hore re rapele, re lokela ho leka ho ba le mamello letsatsi le leng le le leng. Haeba re dula re kopa Jehova hore a re thuse ho ba le mamello ebile re etsa boiteko ba ho ba le yona, o tla re thusa ho ba le mamello le haeba ka tlhaho re se batho ba nang le yona. Re ka boela ra thuswa ke ho nahanisisa ka mehlala e hlahang ka Bibeleng. Ka Bibeleng ho na le mehlala e mengata ya batho ba neng ba ena le mamello. Ho nahanisisa ka mehlala ya bona ho ka re thusa ho bona hore na re ka etsang ho bontsha hore re na le mamello. w23.08 22 ¶10-11