Nahana ka melemo e tliswang ke ho mamella. Ha re ena le mamello, re tla ba le kgotso le kgutso. Ka lebaka leo, ho ba le mamello ho ka re thusa hore re dule re phetse hantle mmeleng le kelellong. Ha re mamella batho ba bang, re kgona ho sebedisana hantle le bona. Phutheho ya habo rona e tla momahana le ho feta. Haeba re dieha ho halefa ha motho e mong a entse ntho e re tenang, re tla qoba ho mpefatsa boemo. (Pes. 37:​8, nal.; Diprov. 14:29) Ka hodimo ho tsohle, re tla be re etsisa Ntate wa rona ya lehodimong ebile setswalle sa rona le yena se tla tiya le ho feta. Ho ba le mamello ke ntho e ntle ebile ho tla re tswela molemo. Ha se ka mehla ho leng bonolo hore re be le mamello empa Jehova o tla re thusa hore re dule re ena le yona. Ha re ntse re emetse hore lefatshe le letjha le fihle, re ka kgodiseha hore “leihlo la Jehova le shebile ba mo tshabang, ba emetseng hore a ba bontshe hore o a ba rata.” (Pes. 33:18) E se eka kaofela ha rona re ka ikemisetsa ho dula re ena le mamello. w23.08 22 ¶7; 25 ¶16-17

Jakobo o ile a bontsha hore motho a ka nna a re o na le tumelo empa diketso tsa hae di hanana le seo. (Jak. 2:​1-5, 9) Jakobo o boetse o bua ka motho ya bonang ngwana wabo ‘a se na diaparo kapa dijo tse lekaneng’ empa jwale a sa mo thuse. Le haeba motho eo a ne a ka re o na le tumelo, e ne e tla be e se na thuso hobane e se na mesebetsi. (Jak. 2:​14-16) Jakobo o ile a re Rahaba ke mohlala wa motho ya ileng a bontsha ka diketso tsa hae hore o na le tumelo. (Jak. 2:​25, 26) Rahaba o ne a ile a utlwela ka Jehova a ba a hlokomela hore o ne a thusa Baiseraele. (Josh. 2:​9-11) O ile a bontsha tumelo ya hae ka diketso ka hore a sireletse dihlwela tse pedi tsa Baiseraele ha di ne di le kotsing ya ho bolawa. Ka lebaka leo, jwalo ka Abrahama, mosadi enwa ya neng a sa phethahala ebile e se Moiseraele o ile a nkwa a lokile. Mohlala wa Rahaba o re ruta bohlokwa ba hore tumelo ya rona e bontshwe ka diketso. w23.12 5-6 ¶12-13

Ka ha re Bakreste, ha re a lokela ho ithuta feela dithuto tse bonolo tse ka Bibeleng. Moya wa Modimo o halalelang o re thusa hore re ithute “le dintho tse tebileng tsa Modimo.” (1 Bakor. 2:​9, 10) O ka boela wa etsa dipatlisiso ka dintho tse tla o thusa hore o dule o le motswalle wa Jehova. Ka mohlala, o ka ithuta ka hore na Modimo o ile a bontsha jwang hore o rata bahlanka ba hae ba nakong e fetileng le hore na seo se bontsha jwang hore le wena o a o rata. O ka nna wa hlahloba hore na Jehova o ne a batla hore Baiseraele ba mo rapele jwang mme wa bapisa seo le ka moo a batlang hore Bakreste ba mo rapele ka teng mehleng ena. Kapa o ka ithuta ka ho tebileng ka boprofeta boo Jesu a ileng a bo phethahatsa ha a ne a le lefatsheng. Ha o etsa dipatlisiso, o ka thuswa ke Watch Tower Publications Index kapa Tataiso ea ho Etsa Lipatlisiso ea Lipaki Tsa Jehova. Ha o ithuta Bibele ka ho tebileng, o tla matlafatsa tumelo ya hao mme e tla o thusa hore o ‘tsebe Modimo.’—Diprov. 2:​4, 5. w23.10 18-19 ¶3-5