Mookoli oa Pele

NA UA tseba hore na ntho ea pele eo Noe a ileng a e etsa ha a tsoa ka arekeng le ba lelapa la hae ke eng? O ile a etsetsa Molimo nyehelo kapa mpho. Ke seo u se bonang a se etsa mona setšoantšong se ka tlaase. Noe o ile a etsa mpho ena ea liphoofolo e le ho leboha Molimo ha a pholositse lelapa la hae moroallong o moholo.

Na u nahana hore Jehova o ile a e thabela mpho eo? E, o ile a e thabela. O ile a ba a tšepisa Noe hore ha a sa tla hlola a felisa lefatše ka moroallo hape.

Ka mor’a nakoana lefatše lohle le ile la oma, ’me Noe le ba lelapa la hae ba qala bophelo bo bocha ka ntle ho areka. Molimo o ile a ba hlohonolofatsa ’me a re ho bona: ‘Le be le bana ba bangata. Le be bangata ho fihlela batho ba lula hohle lefatšeng.’

Empa hamorao ha batho ba pheteloa ka moroallo o moholo, ba ka ’na ba tšoha hore moroallo o kang oo o tla ba teng hape. Kahoo Molimo o ile a fana ka se neng se tla hopotsa batho tšepiso ea hae ea hore ha a sa tla tlisa moroallo lefatšeng lohle. Na ua tseba hore na o ile a ba fa eng ho ba hopotsa? Mookoli.

Mookoli o atisa ho bonahala marung ha letsatsi le chaba ka mor’a hore pula e ne. Mookoli o na le mebala e mengata e metle. Na u se u kile ua o bona? Na u bona oo o setšoantšong?

Molimo o ile a re: ‘Ke tšepisa hore batho le liphoofolo kaofela ha ba sa tla hlola ba felisoa ka moroallo. Ke beha mookoli oa ka marung. Ha mookoli o hlaha, ke tla o bona ebe ke hopola tšepiso ena ea ka.’

Joale, ha u bona mookoli, u lokela ho hopola eng? E, tšepiso ea Molimo ea hore ha a sa tla hlola a felisa lefatše hape ka moroallo o moholo.