November

Ha Bibele e re Abrahama o shoele “a tsofetse ’me a khotsofetse,” seo ha se bolele hore o ne a sa labalabele ho phela nakong e tlang. Bibele e re Abrahama “o ne a letetse motse o nang le metheo ea sebele, motse oo sehahi le moetsi oa oona e leng Molimo.” (Baheb. 11:10) U ka inahanela hore na Abrahama o tla thaba hakaakang ha a se a phela paradeiseng, ’me a tsoela pele ho matlafatsa setsoalle sa hae le Molimo. O tla thaba ha a utloa hore mohlala oa hae oa ho ba le tumelo, o thusitse bahlanka ba Molimo ka lilemo tse likete! O tla lemoha hore sehlabelo seo a neng a lokela ho se etsa Thabeng ea Moria, se ne se tšoantšetsa ho hong. (Baheb. 11:19) O tla boela a hlokomele hore bohloko boo a ileng a bo utloa ha a lokisetsa ho etsa mora oa hae Isaka sehlabelo, bo thusitse bahlanka ba Jehova ba tšepahalang hore ba utloisise bohloko boo Jehova a ileng a bo utloa, ha a fana ka Mora oa hae Jesu Kreste e le thekollo.—Joh. 3:16. w16.02 1:15, 16

Re ka boetse ra bontša hore re tšepahala ho Jehova haeba mor’abo rōna ea etellang pele a re tšoara ka leeme. Morena Saule o ne a khethiloe ke Molimo, leha ho le joalo o ile a tšoara mora oa hae hampe. O ne a sa utloisise hore na ke hobane’ng ha Jonathane a rata Davida. Kahoo, ha Jonathane a leka ho thusa Davida, Saule o ile a mo halefela ’me a mo tlotlolla ka pel’a batho ba bangata. Empa Jonathane o ile a mo hlompha ho ntse ho le joalo. Ka nako e tšoanang, o ile a lula a tšepahala ho Jehova le ho Davida, eo Molimo a neng a mo khethile hore e be morena ea latelang oa Iseraele. (1 Sam. 20:31-41) Barab’abo rōna ba etellang pele ka phuthehong ba leka ho tšoara bohle ka tsela e se nang leeme. Empa ha baa phethahala. Kahoo, ba ka ’na ba se ke ba utloisisa hore na ke hobane’ng ha re etsa lintho ka tsela e itseng. (1 Sam. 1:13-17) Ka hona, haeba ba sa re utloisise kapa ba re nahanela hampe, a re luleng re tšepahala ho Jehova. w16.02 3:14, 15

Bacha ba bang e ka ’na eaba ha ba tsebe phapang pakeng tsa boinehelo le kolobetso. Mohlomong ba bang ba ipolella hore ba se ba ntse ba inehetse ho Jehova, empa ha ba e-s’o lokele ho kolobetsoa. Empa na see ke se ka etsahalang? Ha u inehela ke ha u rapela, u tšepisa Jehova hore u tla mo sebeletsa ka ho sa feleng. ’Me ha u kolobetsoa, u bontša ba bang hore u se u ntse u inehetse ho Jehova. Kahoo, pele u kolobetsoa u lokela ho utloisisa hore na ho inehela ho Molimo ho bolela’ng. Ha u inehela ho Jehova, u ua mo bolella hore joale u ikemiselitse ho mo sebeletsa ka ho sa feleng. U mo tšepisa hore ho mo sebeletsa e tla ba hona ho tlang pele bophelong ba hao. Eo ke tšepiso e tebileng!—Mat. 5:33. w16.03 1:14, 15

Pauluse o ile a etsa mohlala ka ’mele ho bontša hore Mokreste e mong le e mong a ka tlatsetsa ho etseng hore ho be le bonngoe ka phuthehong, ’me a etsise Jesu, e leng eena Moeta-pele oa phutheho. O ile a re litho tsohle tsa ’mele li sebelisana ’moho ‘lenonyellong le leng le le leng bakeng sa ho fana ka se hlokahalang.’ (Baef. 4:16) Kahoo, kaofela re lokela ho etsa’ng, ho sa tsotellehe hore na re bacha kapa re se re hōlile, re phela hantle kapa rea kula? Jesu o khethile baholo hore ba re etelle pele ka phuthehong, ’me o batla hore re ba hlomphe re be re latele tataiso eo ba re fang eona. (Baheb. 13:7, 17) Ka linako tse ling ha ho bonolo ho etsa seo. Empa re ka kōpa Jehova hore a re thuse. Ka moea oa hae o halalelang a ka re thusa hore re latele tataiso leha e le efe eo baholo ba re fang eona. Ak’u nahane kamoo re ka tlatsetsang bonngoeng ba phutheho kateng haeba re ikokobelitse re bile re sebelisana le baholo. Phutheho e tla momahana, ’me re tla ratana le ho feta. w16.03 3:8, 9

Ha barab’abo rōna ba sa le tlaase lilemong, batsoali ba bona ha baa ka ba ba khothalletsa ho ipehela lipakane tšebeletsong ea Jehova. Kahoo, ha ho mohla ho sebeletsa Molimo e kileng ea e-ba taba ea bohlokoa bophelong ba bona. (Mat. 10:24) Moholo o lokela ho ipha nako ea ho itloaetsa mor’abo rōna ea batlang ho mo koetlisa ’me a mo bolelle hore phutheho e ea mo hloka. Joale, ha nako e ntse e ea, moholo o tla lula fatše le eena ’me ba buisane ka litemana tse ka mo thusang ho nahana ka boinehelo ba hae ho Jehova. (Moek. 5:4; Esa. 6:8; Mat. 6:24, 33; Luka 9:57-62; 1 Bakor. 15:58; 2 Bakor. 5:15; 13:5) A ka leka ho mo finyella pelo ka ho mo botsa lipotso tse kang: ‘U ile ua tšepisa Jehova eng ha u inehela ho eena? U nahana hore Jehova o ile a ikutloa joang ha u kolobetsoa?’ (Liprov. 27:11) ‘Satane eena o ile a ikutloa joang?’ (1 Pet. 5:8) Baholo ba hopole kamehla hore litemana tse kang tsena li matla ’me li ka ama mor’abo rōna ka ho teba. w15 4/15 2:9, 11

Ke hobane’ng ha ka linako tse ling Jehova a sa arabe lithapelo tsa rōna hang-hang? Bibele e re Jehova ke Ntate oa rōna ’me re bana ba hae. (Pes. 103:13) Motsoali ha a fe ngoana ntho e ’ngoe le e ’ngoe eo a e kōpang, kapa a mo fe eona hang-hang. O oa tseba hore ngoana a ka ’na a fetola maikutlo eaba o se a batla ntho e ’ngoe e fapaneng. Ntate o boetse o oa tseba hore na ke’ng e ka tsoelang ngoana molemo le hore na ntho eo a e kōpang e ka ’na ea ama ba bang joang. O tseba seo ngoana a se hlokang le hore na o se hloka neng. Haeba ntate a fa ngoana ntho e ’ngoe le e ’ngoe eo a e kōpang hang-hang, ntate e tla be e le lekhoba la ngoana. Jehova, Ntate oa rōna ea leholimong o oa re rata. Kaha ke ’Mōpi oa rōna ea bohlale, o oa tseba hore na re hloka eng ’me o khetha nako e molemo ea ho re fa seo re se kōpang. Re lokela ho letela Jehova le ho bona kamoo a arabang lithapelo tsa rōna kateng.—Esa. 29:16; 45:9. w15 4/15 4:6, 7

Ha bofelo ba tsamaiso ena ea lintho bo ntse bo atamela, Satane o batla hore re “ikhauhele” ka hore re batle ho atleha lefatšeng lena. O batla ho re lebatsa hore re phela matsatsing a ho qetela ’me kahoo re khaotse ho lebela. U se ke ua lumella seo! Ho e-na le hoo, ‘lula u lebetse.’ (Mat. 16:22, 23; 24:42) U se ke ua kholoa leshano la Satane la hore bofelo bo sa le hōle kapa ha bo tle. Satane obatla hore re lumele hore Jehova ha a re rate le hore Molimo a ke ke a tšoarela libe tsa rōna. Empa ana ke mashano a Satane. Nahana ka sena, hantle-ntle ke mang eo Jehova a sa mo rateng? Ke Satane. Ke mang eo Molimo a ke keng a mo tšoarela? Ke Satane. Empa Bibele e re ka rōna: “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae.” (Baheb. 6:10) Jehova o ananela sohle seo re mo etsetsang sona, ’me tšebeletso ea rōna ho eena hase ea lefeela. (1 Bakor. 15:58) Kahoo, u se ke ua thetsoa ke mashano a Satane. w15 5/15 1:16-19

Abrahama o ne a tseba hore nakong e fetileng Jehova o ’nile a phethahatsa litšepiso tsa hae, kahoo o ne a kholisehile hore litšepiso tsohle tsa Jehova tsa nakong e tlang le tsona li tla phethahala. Kaha Abrahama o ne a e-na le tumelo litšepisong tsa Jehova, o ile a tsoela pele ho etsa seo Jehova a mo laelang sona. Ka mohlala, o ile a tloha motseng oa habo oa Ure ’me a qeta bophelo bohle ba hae e le mojaki metseng e meng. O ne a tseba hore metse eo e ke ke ea e-ba teng ka ho sa feleng, kaha babusi ba eona ba ne ba sa sebeletse Jehova. (Josh. 24:2) Empa o ne a lebeletse nako eo ka eona Jehova ka puso ea hae a tlang ho busa ka ho sa feleng lefatšeng. Puso ena ke “motse o nang le metheo ea sebele, motse oo sehahi le moetsi oa oona e leng Molimo.” (Baheb. 11:10) Abrahama, Abele, Enoke, Noe hammoho le ba bang, ba ne ba lumela tsohong. Nako le nako ha ba ne ba nahana ka ho phela ka ho sa feleng paradeiseng lefatšeng, tumelo ea bona e ne e tiea le ho feta litšepisong tsa Jehova.—Baheb. 11:15, 16. w15 5/15 3:8, 9

Jehova o ile a sebelisa Jesu Kreste ho bonahatsa matla a hae ka tsela e hlollang. Ha Jesu a ne a le lefatšeng, o ile a etsa mehlolo. Re ka bala e meng ea eona ka Bibeleng, ’me ea re matlafatsa tumelong. (Mat. 9:35; Luka 9:11) Jehova o file Jesu matla a maholo, hoo moapostola Pauluse a neng a ka re: “Kreste ke matla a Molimo.” Empa mehlolo eo Jesu a e entseng e re ama joang? Ke hobane’ng ha Pauluse a ile a re “Kreste ke matla a Molimo”? Moapostola Petrose o re Jesu o ile a etsa “limakatso,” kapa mehlolo. (Lik. 2:22) Mehlolo ee e re ruta’ng? E re bontša lintho tseo Jesu a tla li etsa nakong ea Puso ea hae ea Lilemo Tse Sekete. Ka nako eo, o tla etsa mehlolo e meholo le ho feta e tla tsoela batho bohle molemo. Mehlolo eo a e entseng e boetse e re thusa ho utloisisa litšobotsi tseo eena le Ntate oa hae ba nang le tsona. w15 6/15 1:1, 2

Jesu o ne a tseba hore ke Jehova ea folisitseng mosali eo, ’me ka mosa a re ho eena: “Morali, tumelo ea hao e u folisitse. Tsamaea ka khotso, ’me u fole boloetseng ba hao bo bohloko.” (Mar. 5:34) Ruri hoa thabisa ho bona kamoo Jesu a neng a rata batho kateng, haholo-holo ba kulang. Satane eena ha a re rate, ebile o batla re lumele hore ha re na thuso le hore ha ho na motho ea re ratang. Empa mehlolo ea Jesu e bontša hore o oa re tsotella le hore o amehile ka mathata a rōna. Rea leboha hore ebe re na le Morena le Moprista ea Phahameng ea lerato ka tsela ena! (Baheb. 4:15) Re ka ’na ra thatafalloa ho utloisisa kamoo motho ea kutseng nako e telele a ikutloang kateng, haholo-holo haeba re sa kule. Empa nahana ka Jesu. O ne a qenehela batho ba kulang, le hoja ho se mohla a kileng a kula. E se eka re ka etsa sohle se matleng a rōna ho etsisa tsela eo a neng a bontša lerato ka eona.—1 Pet. 3:8. w15 6/15 2:11, 12

Ke tlotla ho tseba lebitso la Molimo le ho ba “batho bakeng sa lebitso la hae.” (Lik. 15:14; Esa. 43:10) Re rapella hore ‘lebitso la hae le halaletsoe.’ (Mat. 6:9) Re boetse re kōpa Jehova hore a re thuse hore re se ke ra etsa kapa ra bua ntho leha e le efe e ka etsang hore lebitso la hae le hlompholloe. Ha rea lokela ho etsisa batho ba bang ba lekholong la pele la lilemo, ba neng ba sa etse lintho tseo ba neng ba li ruta ba bang, joalokaha ho boletsoe temaneng ea kajeno. Jehova o tla halaletsa lebitso la hae ka ho feletseng ha a felisa bohle ba sa mo hlompheng le ba hanang bobusi ba hae. (Ezek. 38:22, 23) Ka nako eo, batho e tla ba ba phethahetseng, ’me bohle ba leholimong le lefatšeng ba tla rapela Jehova le ho tlotlisa lebitso la hae le halalelang. Qetellong, Ntate oa rōna ea lerato e tla ba “lintho tsohle ho e mong le e mong.”—1 Bakor. 15:28. w15 6/15 4:7, 10

Ka Mangolong a Seheberu lentsoe “setuloana” le boetse le sebelisetsoa ho hlalosa tempele ea boholo-holo ea Iseraele. (1 Likron. 28:2; Pes. 132:7) Tempele ena e ne e le ntle haholo ho Jehova hobane e ne e le setsi sa borapeli ba ’nete. Hape e ne e sebelisetsoa ho tlotlisa Jehova lefatšeng. (Esa. 60:13) Setsi sa borapeli ba ’nete ke sefe kajeno? Hase mohaho o kang tempele. Empa ke tempele ea moea ’me e tlotlisa Jehova ho feta mohaho leha e le ofe. Tempele ea moea ke’ng? Ke tokisetso eo Molimo a e sebelisang, ho nolofalletsa batho hore e be metsoalle ea hae le ho mo rapela. Sena se etsahala feela ka lebaka la sehlabelo sa Jesu sa thekollo. E qalile ho sebetsa ka selemo sa 29 C.E. ha Jesu a ne a kolobetsoa ’me a tlotsoa ho ba Moprista ea Phahameng tempeleng ea moea ea Jehova.—Baheb. 9:11, 12. w15 7/15 1:1-3

Ena e tla ba nako ea ho putsa ba tšepahalang le ea ho fana ka kotlo ho ba sa tšepahaleng. (Mat. 24:46, 47, 50, 51; 25:19, 28-30) Jesu o ile a etsa papiso ho hlalosa ntlha ena. O ile a re: “Ha Mor’a motho a fihla ka khanya ea hae, ’me mangeloi ’ohle a e-na le eena, joale o tla lula teroneng ea hae e khanyang. Lichaba tsohle li tla bokelloa ka pel’a hae, ’me o tla arola batho e mong ho e mong, feela joalokaha molisa a arola linku ho lipōli. O tla beha linku ka letsohong la hae le letona, empa lipōli a li behe ka ho la hae le letšehali.” (Mat. 25:31-33) Ho tla etsahala’ng ka linku le lipōli? Li tla ahloloa. Lipōli, e leng batho ba sa tšepahaleng, “ba tla ea phelisong e sa feleng.” Empa linku, kapa batho ba tšepahalang, ba tla fumana bophelo bo sa feleng.—Mat. 25:46. w15 7/15 2:11, 12

Ka tloaelo re thabela lijo, puo, tikoloho le meetlo ea moo re hōletseng teng. Empa na re nka hore lintho tseo re li ratang li molemo ho feta tseo ba bang ba li ratang? Jehova o batla hore re thabele lintho tse sa tšoaneng tseo a li bōpileng. (Pes. 104:24; Tšen. 4:11) Kahoo, ke hobane’ng ha re ka tsitlella hore tsela e itseng ke eona feela e molemo ea ho etsa lintho? Jehova o batla hore batho ba mefuta eohle ba ithute ka eena, ba mo rapele ’me ba phele ka ho sa feleng. (Joh. 3:16; 1 Tim. 2:3, 4) Kahoo, ha barab’abo rōna ba e-na le maikutlo a sa tšoaneng le a rōna, re lokela ho ikemisetsa ho ba mamela, hafeela maikutlo a bona a amoheleha ho Jehova. Ha re etsa joalo, re tla thabela bophelo ’me re tla tsoela pele re momahane le bara le barali babo rōna. Joalokaha re bone, kaha re tšepahalla Jehova le ’Muso oa hae, ha re kenelle liqhoebeshanong tsa lefatše lena. Re hloile boikhantšo le tlhōlisano tse lefatšeng la Satane. Ruri rea leboha hore ebe Jehova o re rutile ho rata khotso le hore re ikokobetse! w15 7/15 3:17, 18

Ho na le litsela tse ngata tseo re ka bontšang Jehova ka tsona hore rea mo rata. Ka mohlala, re ka bontša lerato la rōna ho Jehova ka ho bolella ba bang litaba tse molemo tsa ’Muso ka cheseho. (Mat. 24:14; 28:19, 20) Re ka boetse ra bontša lerato la rōna ho Molimo ka ho mamella liteko ka botšepehi. (Pes. 84:11; Jak. 1:2-5) Esita le haeba re tobana le liteko tse matla, re ka kholiseha hore Jehova o bona mahloreho a rōna le hore o tla re thusa, kaha o re nka re le ba bohlokoa. (Pes. 56:8) Lerato la rōna ho Jehova le re susumelletsa hore re thuise ka lintho tsohle tse babatsehang tseo a li bōpileng. Re bontša Jehova hore rea mo rata le hore re rata Lentsoe la hae, ka ho ba liithuti tse hloahloa tsa Bibele. Kaha rea mo rata, ’me re batla ho matlafatsa kamano ea rōna le eena, re mo rapela kamehla. Ho feta moo, re thuisa ka mpho e babatsehang ea thekollo, ’me seo se etsa hore re mo rate le ho feta. (1 Joh. 2:1, 2) Tsena ke tse ling tsa litsela tse ngata tseo re ka bontšang Jehova ka tsona hore re ananela lerato la hae le tšoarellang. w15 8/15 1:6, 17, 18

Lefatšeng le lecha, ho ka ’na ha hlokahala hore re be le mamello. Ka mohlala, re ka ’na ra utloa hore batho ba bang ba thabile kaha metsoalle le beng ka bona ba tsositsoe bafung. Empa joale rōna re ka ’na ra lokela ho letela hore baratuoa ba rōna ba tsosoe. Haeba seo se etsahala, na re tla thaba le ba bang ’me re bontše mamello? (Bar. 12:15) Haeba hona joale re ithuta ho letela Jehova ka mamello hore a phethahatse litšepiso tsa hae, seo se tla re thusa hore re be le mamello nakong e tlang. Re ka boetse ra itokiselletsa ho phela lefatšeng le lecha ka hore re bontše mamello ha ho etsoa liphetoho tseleng eo re utloisisang linnete tsa Bibele ka eona. Na re bontša mamello haeba re sa utloisise ka ho feletseng tlhaloso e ncha eo re e balang? Ha re etsa joalo, seo se tla re nolofalletsa hore re be le mamello lefatšeng le lecha nako le nako ha Jehova a re fa litaelo tse ncha.—Liprov. 4:18; Joh. 16:12. w15 8/15 3:9, 10

Moapostola Pauluse o ne a batla hore Bakreste ba Efese ba hōle tsebong. O ile a ba khothalletsa hore ba momahane tumelong ’me ba tsoele pele ho ithuta ka Jesu, e le hore e be ‘banna ba hōlileng ka ho feletseng, ho isa tekanyong ea boholo ba botlalo ba Kreste.’ (Baef. 4:13) E ne e se e le lilemo phutheho ea Efese e thehiloe ha Pauluse a e ngolla lengolo. Bakreste ba bangata phuthehong eo, ba ne ba e-na le phihlelo, ’me ba hōlile tsebong. Empa ho ne ho hlokahala hore ba bang ba bona ba matlafatse kamano ea bona le Jehova. Le kajeno, bara le barali babo rōna ba bangata ba sebelelitse Jehova ka nako e telele ’me ke Bakreste ba hōlileng tsebong. Leha ho le joalo, ba bang ka phuthehong ha ba e-s’o fihle boemong boo. Ka mohlala, ho kolobetsoa batho ba likete selemo le selemo, kahoo, ba bang ba ntse ba lokela ho hōla tsebong. Uena?—Bakol. 2:6, 7. w15 9/15 1:2, 3

Batho ba bangata ba lumela hore ho ikoetlisa kamehla hoa khatholla ebile ho molemo. Empa ho thoe’ng haeba u batla ho ikoetlisa le sehlopha? Na hoa tsotelleha hore na u ikoetlisa le bo-mang? Liproverbia 13:20 e re: “Ea tsamaeang le batho ba bohlale o tla hlalefa, empa ea bang le litšebelisano le ba hlokang kelello lintho li tla mo tsamaela hampe.” Ho hlakile hore re lokela ho sebelisa matsoalo a rōna a koetlisitsoeng ka Bibele ha re khetha boikhathollo. U qeta nako e kae boikhathollong? Na ntho e tlang pele bophelong ba hao ke liboka, tšebeletso ea tšimo le ho ithuta Bibele, kapa ke boikhathollo? Ntho ea bohlokoa ka ho fetisisa ho uena ke efe? Jesu o ile a re: “Joale, le ’ne le batle ’muso pele le ho loka ha hae, ’me lintho tsena tse ling tsohle le tla li ekeletsoa.” (Mat. 6:33) Na letsoalo la hao le u hopotsa keletso ee ea Jesu, ha u etsa qeto ea hore na u tla sebelisa nako ea hao joang? w15 9/15 2:13, 15

Ha Jehova a bona hore Kaine o mothating oa ho etsa se fosahetseng, o ile a leka ho mo thusa. Empa Kaine o ile a hana thuso ea Jehova, kahoo a khola litholoana tse babang. (Gen. 4:11-13) Ka nako e ’ngoe, Jehova o ile a hlokomela hore boikutlo bo fosahetseng ba Baruke bo etsa hore a khathale a be a nyahame. Kahoo Jehova o ile a bolella Baruke hore monahano oa hae o fosahetse le hore o lokela ho fetoha. Baruke o ile a mamela keletso ea Jehova, ’me a tsoela pele a phela. (Jer. 45:2-5) Jehova o re tataisa le ho re khalemela hobane a re rata. O oa re laea ha ho hlokahala, ’me o boetse o oa re koetlisa. (Baheb. 12:6) Ka Bibeleng, re bala ka bahlanka ba tšepahalang ba Jehova bao a ileng a ba koetlisa hore e be batho ba molemo. Lintho tseo ba ileng ba ithuta tsona ha ba ntse ba tobane le liteko li ile tsa ba thusa ha Jehova a ba fa boikarabelo bo eketsehileng. w15 9/15 4:12, 13

Bagibeone ba ile ba etsa qeto e bohlale ka ho lumela hore Jehova o loanela Baiseraele Rahaba le eena o ile a lemoha matla a Jehova. E ne e se Moiseraele, empa o ne a utloetse kamoo Jehova a ileng a lopolla batho ba hae Egepeta kateng. Ha lihloela tse peli tsa Baiseraele li fihla ha hae, o ile a re ho tsona: “Ke fela ke tseba hore ka sebele Jehova o tla le fa naha ena.” Rahaba o ne a lumela hore Jehova o tla mo pholosa a be a pholose ba lelapa labo. O ile a bontša hore o lumela ho Jehova, le hoja ho etsa seo ho ne ho le kotsi. (Josh. 2:9-13; 4:23, 24) Mehlala ena e metle le e mebe ea ka Bibeleng e re thusa ho utloisisa hore na ho bolela’ng ho “bona Molimo” kapa ho lemoha matla a hae. Ha re tsoela pele ho ithuta ka Jehova le ka litšobotsi tsa hae, re khona ho lemoha matla a hae ka ‘mahlo a lipelo tsa rōna.’ (Baef. 1:18) Sena se re susumelletsa ho batla ho etsisa batho ba tšepahalang ba boholo-holo le ba mehleng ea kajeno ba boneng kamoo Jehova a ’nileng a hlokomela batho ba hae kateng. w15 10/15 1:6, 7, 9

Bibele e re Maretha e ne e le motsoalle oa Jesu, ’me Jesu a mo rata. Ke ’nete hore hase eena feela mosali eo Jesu a neng a mo rata a bile a mo hlompha. Ka mohlala, Maria ngoan’abo Maretha le eena e ne e le motsoalle oa Jesu. Jesu o ne a boetse a rata ’mè oa hae, Maria. (Joh. 19:25-27) Ebe ke hobane’ng ha Jesu a ne a rata Maretha? Jesu o ne a rata Maretha hobane o ne a le mosa, a le seatla se bulehileng, ebile a sebetsa ka thata. Empa habohlokoa le ho feta, Jesu o ne a mo rata hobane o ne a e-na le tumelo e matla. O ne a lumela lintho tsohle tseo Jesu a li rutang, ebile a kholisehile hore ke Mesia ea tšepisitsoeng. (Joh. 11:21-27) Leha ho le joalo, Maretha o ne a sa phethahala. O ne a etsa liphoso joaloka rōna bohle. Ka mohlala, ka lekhetlo le leng ha Jesu a ba etetse, Maretha o ile a koatela Maria, ’me a re Jesu a mo khalemele. Maretha o ile a re: “Morena, na ha ho tsotellehe ho uena hore ebe morali’eso o ntšiile ke le mong hore ke hlokomele lintho? Ka hona, mo bolelle hore a nthuse.”—Luka 10:38-42. w15 10/15 3:1, 2

Ho thuisa ka Jehova le Jesu ho tla u thusa hore u lule u chesehela ’nete. Ha u cheseha, u tla khothatsa balumeli-’moho le uena, esita le batho bao u kopanang le bona tšimong. Ha u thuisa ka seo Jehova a u etselitseng sona ka sehlabelo sa Jesu sa thekollo, u tla tsoela pele ho ananela kamano eo u nang le eona le Molimo. (Bar. 3:24) Mor’abo rōna e mong oa Afrika Boroa ea bitsoang Mark, ea qetileng lilemo tse tharo a le teronkong ka lebaka la tumelo ea hae o re: “Re ka bapisa ho thuisa le ho ea sebakeng se khathollang. Ha re ntse re thuisa ka lintho tsa moea, re ithuta lintho tse ling tse ncha ka Jehova, Molimo oa rōna. Ka linako tse ling ha ke ikutloa ke nyahame kapa ke tšoenyehile ka se tla etsahala, ke bala Bibele ebe ke thuisa ka seo ke se balang. Seo se etsa hore ke ikutloe ke imolohile.” w15 10/15 4:15

Batla nako e loketseng ea ho hlalosetsa ngoana hore na ke hobane’ng ha u entse qeto kapa u behile molao o itseng. A ka ’na a nolofalloa ho u mamela ha a utloisisa lebaka. Barry ea hōlisitseng bana ba bane o re: “Ha u bolella bana lebaka, ba tla u tšepa.” Ba tla hlokomela hore ha u behe molao kapa hona ho etsa liqeto hobane feela u e-na le tokelo ea ho etsa joalo, empa hobane u na le lebaka le utloahalang. Hape, u hopole hore bacha ha e sa le bana. Ba ithuta ho inahanela lintho, ’me ba batla ho iketsetsa liqeto. (Bar. 12:1) Barry o re: “Bacha ba lokela ho ithuta ho etsa liqeto hobane ba nahanisisitse ka taba, eseng hobane ba nkoa ke pelo.” Kahoo, ikokobetse ’me u hlalosetse ngoana oa hao hore na ke hobane’ng ha u entse qeto eo. Ha u etsa joalo, o tla ithuta ho iketsetsa liqeto, ’me o tla bona hore u ua mo hlompha le hore u ua hlokomela hore o se a hōlile. w15 11/15 2:11

Kajeno, ho na le batho ba limilione lefatšeng ka bophara ba sebeletsang Jehova. Ke bara le barali babo rōna. Re lokela ho ikutloa joang ka bona? (Bar. 12:10) Moapostola Petrose o ile a re ‘ho mamela ha rōna ’nete’ ho lokela ho hlahisa “lerato la bara ba motho” le se nang boikaketsi. Petrose o ile a boela a re ho Bakreste-’moho le eena: “Ka holim’a lintho tsohle, le bontšane lerato le matla haholo.” (1 Pet. 1:22; 4:8) Mokhatlo oa rōna oa lefatšeng lohle o oa ikhetha. Hobane’ng? Hobane re rata bara le barali babo rōna ka lerato la sebele. Habohlokoa le ho feta, kaha re rata Jehova ’me re mamela melao ea hae, o re tšehetsa ka moea o halalelang, e leng matla a maholo ka ho fetisisa bokahohleng. Moea oa Molimo o re thusa hore re momahane le barab’abo rōna lefatšeng lohle.—1 Joh. 4:20, 21. w15 11/15 4:8, 9

Jehova ha aa lebella hore re bue puo e itseng e le hore re mo tsebe kapa re tsebe merero ea hae. (Tšen. 7:9, 10) Batho ba bua lipuo tse ngata, empa seo hase bothata ho Jehova. Re tseba see joang? Ka Bibeleng ho na le lipolelo tse seng kae feela tseo Jesu a li buileng ka puo ea hae. (Mat. 27:46; Mar. 5:41; 7:34; 14:36) Empa Jehova o entse bonnete ba hore molaetsa oa Jesu o oa ngoloa le ho fetoleloa ka Segerike ’me hamorao oa fetoleloa ka lipuo tse ling. Kaha Bajuda le Bakreste ba ile ba kopitsa Lentsoe la Molimo hangata, seo se ile sa etsa hore molaetsa oa Molimo o bolokehe. Ha nako e ntse e ea, o ile oa fetoleloa le ka lipuo tse ling tse ngata. Lilemo tse ka bang 400 ka mor’a lefu la Kreste, John Chrysostom o ile a re lithuto tsa Jesu li ne li se li fetoletsoe ka lipuo tse buuoang Syria, Egepeta, India, Persia, Ethiopia le libakeng tse ling tse ngata. w15 12/15 1:10, 11

Haeba re bua ka nako e fosahetseng, batho ba ka ’na ba se ke ba utloisisa seo re se buang kapa hona ho re mamela. Ka mohlala, ka March 2011, metse e mengata e karolong e ka bochabela ea Japane e ile ea senngoa ke tšisinyeho ea lefatše le tsunami. Batho ba fetang 15 000 ba ile ba shoa. Le hoja Lipaki Tsa Jehova tse ngata le tsona li ne li lahlehetsoe ke ba malapa le metsoalle, li ne li batla ho tšelisa ba bang ka Bibele. Empa li ne li tseba hore boholo ba batho bao ke Mabuddha ’me ha ba tsebe Bibele hakaalo. Kahoo, ho e-na le hore barab’abo rōna ba ba bolelle ka tsoho, ba ile ba ba tšelisa, ba ba hlalosetsa hore na ke hobane’ng ha batho ba lokileng ba hlaheloa ke lintho tse bohloko. w15 12/15 3:7

Ka bomalimabe, batho ba bang le lik’hamphani tse ling ba re ba fumane pheko e ka folisang maloetse a rōna. Ba bua sena hobane ba batla ho etsa chelete. Ba ka ’na ba re batho ba bangata ba sebelisitse pheko eo ’me e ba thusitse. Haeba re kula, re ka ’na ra ikemisetsa ho etsa ntho leha e le efe e ka re folisang ’me ea lelefatsa bophelo ba rōna. Haeba re le masene, re tla khetha ka hloko hore na re lumela eng, haholo haeba motho ea re eletsang a sa fumana koetliso e nepahetseng. Re ka ipotsa: ‘O re ho noa litlhare tsena le ho ja lijo tsena ho thusitse batho, empa na ke kholisehile hore seo ke ’nete? Le haeba li thusitse ba bang, ke tseba joang hore li tla nthusa? Na ho hlokahala hore ke etse lipatlisiso ’me ke buisane le motho ea koetlisitsoeng ea ka nthusang ka boloetse ba ka?’—Deut. 17:6. w15 12/15 4:14, 15

Pauluse o ne a tseba hore haeba re lemoha hore Jesu o re rata haholo, seo se tla re qobella kapa se re susumelletse hore re mo rate re be re mo hlomphe. Ka sebele, haeba re hlile re ananela seo Jehova a re etselitseng sona, re bile re lemoha hore o oa re rata, re tla susumelletseha ho phela ka tsela e bontšang hore re hlompha Jesu. Re ka etsa seo joang? Ha re rata Jehova, re tla susumelletseha ho etsisa mohlala oa Jesu le ho o latela haufi-ufi. (1 Pet. 2:21; 1 Joh. 2:6) Re bontša hore re rata Molimo le Kreste ha re ba mamela. Jesu o ile a re: “Ea nang le litaelo tsa ka ’me a li boloka, eo ke eena ea nthatang. Ea nthatang le eena o tla ratoa ke Ntate, ’me ke tla mo rata .” (Joh. 14:21; 1 Joh. 5:3) Kahoo, ipotse: ‘Ke likarolong life tsa bophelo tseo ke seng ke ntse ke etsisa Jesu ho tsona? Nka ntlafatsa likarolong life?’ Ke habohlokoa hore re ipotse lipotso tsena, kaha batho ba bangata lefatšeng lena ba re susumelletsa hore re phele ka tsela eo ba phelang ka eona.—Bar. 12:2. w16.01 2:7-9

Na u chesehela mosebetsi oa boboleli ka tsela e khethehileng? Na ka sebele u thabela ho bala Bibele le ho ithuta “lintho tse tebileng tsa Molimo”? (1 Bakor. 2:10) Na u bona eka Jehova o u hlohonolofalitse haholo mosebetsing oa boboleli? Na ho etsa thato ea Jehova ke eona ntho e tlang pele bophelong ba hao? Na u rata batho ba bang ka ho tebileng ’me u ikutloa u tlameha ho ba thusa hore ba sebeletse Jehova? Na ho na le bopaki ba hore Jehova o u thusitse ka ho khetheha maemong a itseng bophelong ba hao? Haeba u arabetse lipotso tsena kaofela ka e, na seo se bolela hore u khethetsoe ho ea leholimong? Che. Hobane’ng? Hobane bahlanka bohle ba Molimo ba ka ikutloa ka tsela ena, ho sa tsotellehe hore na ke batlotsuoa kapa che. Hape, Jehova a ka sebelisa moea o halalelang hore a fe bahlanka leha e le bafe ba hae matla ana, ho sa tsotellehe hore na ba na le tšepo efe. Ha e le hantle, haeba u ntse u ipotsa hore na u khethetsoe ho ea leholimong kapa che, seo ke bopaki ba hore ha u ua khethoa. w16.01 3:14, 15

Jesu o ne a thabela ho sebetsa le Ntate oa hae, kaha o ne a etsa lintho tse ngata a bile a tseba hore Jehova o oa mo rata. Empa na le rōna re thabela ho sebetsa le Molimo? Jesu o ile a re rea thaba ha re fana le ha re fuoa. (Lik. 20:35) Re ile ra thaba ha re rutoa Bibele, joale ke hobane’ng ha re boetse re thaba ha re ruta batho ba bang Bibele? Hobane le bona baa thaba ha ba utloisisa seo Bibele e se rutang ’me ba qala ho ba le kamano e ntle le Molimo. Re thabisoa ke ho ba bona ba fetola tsela eo ba nahanang ka eona le eo ba phelang ka eona. Ho bolela litaba tse molemo ke mosebetsi oa bohlokoa le o khotsofatsang ka ho fetisisa oo motho a ka o etsang. O thusa batho bao e bang metsoalle ea Molimo hore ba fumane bophelo bo sa feleng.—2 Bakor. 5:20. w16.01 5:6, 7