May

Jafeta o ne a tseba hore o hloka thuso ea Molimo e le hore a ka lopolla Baiseraele ho Baammone. O ile a tšepisa Jehova hore ha a ka mo thusa ho hlola, o tla mo fa motho oa pele ea tla tsoa ka tlung ho tla mo khahlanyetsa ha a khutla ntoeng, e le “nyehelo ea secheso.” (Baahl. 11:30, 31) Seo se ne se bolela’ng? Jehova ha a rate ha batho ba etsoa mahlabelo, kahoo rea tseba hore Jafeta o ne a sa tl’o bolaea motho eo. (Deut. 18:9, 10) Molaong oa Moshe, nyehelo ea secheso e ne e le mpho e ikhethang eo motho a neng a e fa Jehova kaofela. Kahoo, Jafeta o ne a bolela hore motho eo a neng a tla mo fa Jehova o ne a tla sebeletsa tabernakeleng bophelo bohle ba hae. Jehova o ile a mamela Jafeta eaba o mo thusa ho hlola ntoeng. (Baahl. 11:32) Ha Jafeta a khutlela hae, morali oa hae ea mong ke eena ea ileng a mo khahlanyetsa. Joale o ne a tla etsa’ng? Na o ne a tla phethahatsa tšepiso ea hae? w16.04 1:11-13

Lilemong tse fetileng, re ne re ithuta buka ea Atamela ho Jehova Thutong ea Bibele ea Phutheho. U ile oa ikutloa joang ha re ne re bua ka makhabane a Jehova le ha u ne u utloa kamoo balumeli-’moho le uena ba mo ratang kateng? Ha ho potang hore sena se entse hore u rate Jehova le ho feta. Ha re le libokeng re boetse re ithuta Bibele ha ho fanoa ka lipuo, lipontšo le ha ho baloa Bibele. Liboka li re ruta ho sebelisa melao-motheo ea Bibele bophelong ba rona. (1 Bathes. 4:9, 10) Mohlala, na ho na le Thuto ea Molula-Qhooa e kileng ea etsa hore u batle ho ikakhela ka setotsoana tšebeletsong ea Jehova, kapa ea u susumelletsa hore u ntlafatse lithapelo tsa hao, kapa u tšoarele bara le barali beno? Liboka tsa har’a beke li re ruta litsela tsa ho paka ’me li re thusa ho utloisisa Bibele hamolemo.—Mat. 28:19, 20. w16.04 3:4, 5

Na u se u kile ua nahana ka litlaleho tse ka Bibeleng tsa batho ba ileng ba qabana? Likhaolong tse qalang feela tsa Genese, re ithuta hore Kaine o ile a bolaea Abele (Gen. 4:3-8); Lameke a bolaea monna ea neng a mo otla (Gen. 4:23); balisa ba Abrahama ba pheha khang le balisa ba Lota (Gen. 13:5-7); Hagare a ikhohomosetsa Sara, ’me Sara a koatela Abrahama (Gen. 16:3-6); Ishmaele o ne a sa utloane le batho bohle. (Gen. 16:12) Ke hobane’ng ha liqabang tsee li ile tsa tlalehoa ka Bibeleng? Hobane ho na le seo re ka ithutang sona mehlaleng ea batho bana ba neng ba sa phethahala, ’me ba e-na le mathata a tebileng. Le rona ha rea phethahala, ’me re tobana le mathata a tšoanang. Kahoo re ka etsisa mehlala e metle e tlalehiloeng ka Bibeleng, ra ba ra qoba e fosahetseng. w16.05 1:1, 2

Jesu le barutuoa ba hae ba ne ba phatlalatsa litaba tse molemo joang? Ba ne ba ea hohle moo ba ka fumanang batho teng. Mohlala, ba ne ba pakela batho literateng le limmarakeng. Ba ne ba boetse ba ea malapeng a batho. (Mat. 10:11; Luka 8:1; Lik. 5:42; 20:20) Ho paka ka ntlo le ntlo e ne e le tsela e hlophisehileng ea ho finyella batho ba mefuta eohle. Lipaki Tsa Jehova tsona li etsa’ng? Ke tsona feela tse phatlalatsang hore Jesu o qalile ho busa e le Morena ka 1914. Li mamela Jesu ’me li etelletsa pele mosebetsi oa boboleli. Buka e bitsoang Pillars of Faith—American Congregations and Their Partners e re Lipaki Tsa Jehova ha li lebale hore sepheo sa tsona se ka sehloohong ke ho phatlalatsa hore bofelo ba lefatše bo atametse le ho ruta batho e le hore ba tle ba bolokehe. Lipaki Tsa Jehova li tsoela pele ho phatlalatsa molaetsa ona le ho etsisa litsela tseo Jesu le barutuoa ba hae ba neng ba ruta ka tsona. w16.05 2:10, 12

Ha re etsa liqeto tse thabisang Jehova re ba le kamano e ntle le eena ’me oa re amohela le ho re hlohonolofatsa. (Jak 4:8) Hape, tumelo ea rona ho eena ea matlafala. Kahoo, a re tsoeleng pele re thuisa ka seo re se balang ka Bibeleng e le hore re utloisise hore na Jehova o nahana joang. Ke ’nete hore ho tla ’ne ho be le ntho e itseng e ncha eo re tla ithuta eona ka Jehova. (Jobo 26:14) Empa ha re ikitlaetsa ho ithuta ka eena hona joale, re tla ba bohlale ’me re tla khona ho etsa liqeto tse nepahetseng. (Liprov 2:1-5) Maikutlo le merero ea batho ea fetoha, empa Jehova ha a fetohe. Mopesaleme o ile a re: “Morero oa Jehova o tla ema ho isa nakong e sa lekanyetsoang; menahano ea pelo ea hae e teng ho isa molokong o mong ka mor’a o mong.” (Pes 33:11) Ha ho potang hore re tla etsa liqeto tse nepahetseng ha re ithuta ho nahana joaloka Jehova, ’me re tla etsa lintho tse mo thabisang. w16.05 3:17

Re kholisehile hore Jehova o khona ho khetha batho ba nepahetseng. Kahoo, ha rea lokela ho ahlola batho ba tšimong ea rona kapa ba ka phuthehong. (Joh. 6:44) Ha re nka Jehova e le Sebopi sa rona, tsela eo re tšoarang bara le barali babo rona ka eona e tla fetoha. (Esa. 64:8) Re tla nka hore Jehova ke hona a ntseng a ba bopa. Ke kamoo Jehova a ba talimang kateng. O bona seo ba leng sona ka pelong ’me oa tseba hore ho se phethahale ha bona ke ha nakoana. O boetse oa tseba hore na e mong le e mong oa bona a ka bopeha hore e be motho ea joang. (Pes. 130:3) Re ka etsisa Jehova haeba re sa nahanele bara le barali babo rona hampe. Re ka boela ra sebetsa le Sebopi sa rona ho thusa bara le barali babo rona hore ba etse liphetoho. (1 Bathes. 5:14, 15) Baholo ka phuthehong ba lokela ho etella pele ho ba thusa.—Baef. 4:8, 11-13. w16.06 1:4-6

Tšebeletso ea tšimo e ka re bopa ’me ea re thusa ho ba batho ba molemo. Joang? Ha re bolela litaba tse molemo re lokela ho ba le boikokobetso le litšobotsi tsa tholoana ea moea oa Molimo. (Bagal. 5:22, 23) Batho ba thabela molaetsa oa rona ha re etsisa Kreste, ’me ba ka ’na ba fetola le tsela eo ba itšoarang ka eona. Ka mohlala, Lipaki tse peli tsa Australia li ile tsa leka ho buisana le ’mè e mong ha hae, empa a li halefela ’me a li buisa hampe. Leha ho le joalo, Lipaki tseo li ile tsa mo mamela ka hloko. Hamorao, ’mè eo o ile a ikoahlaea ’me a ngolla ofisi ea lekala. A kopa tšoarelo ka se etsahetseng. O ile a re: “Ke ile ka ba booatla ka ho leka ho thiba batho ba buang ka Lentsoe la Molimo le ho ba leleka ka tsela eo.” Mohlaleng ona re ithuta bohlokoa ba ho khoba matšoafo ha re le tšimong. Ke ’nete hore tšebeletso ea tšimo e thusa batho ba bang, empa e boetse e re thusa hore re be le makhabane a matle. w16.06 2:12, 13

Batho bohle ba tsoetsoe ba sa phethahala ka lebaka la sebe sa Adama. (Bar. 5:12, 19) Kahoo, ka linako tse ling ba bang ka phuthehong ba ka ’na ba bua kapa ba etsa lintho tse re utloisang bohloko. Re tla etsa’ng ha seo se etsahala? Mohlala, Eli e ne e le moprista ea phahameng oa Iseraele, leha ho le joalo bara ba hae ba babeli ba ne ba sa hlomphe melao ea Jehova. Bibele e re: “Bara ba Eli e ne e le banna ba se nang molemo; ba ne ba sa ele Jehova hloko.” (1 Sam. 2:12) Eli o ne a tseba hore bara ba hae ba etsa lintho tse tsoileng tseleng. Leha ho le joalo, ha aa ka a ba khalemela ka matla. Ka nako e loketseng, Jehova o ile a khalemela Eli le bara ba hae. Hamorao a etsa hore ba leloko la Eli e se hlole e e-ba baprista ba phahameng. (1 Sam. 3:10-14) Haeba u ne u phela mehleng ea Eli ’me u tseba hore o lumella bara ba hae ho etsa lintho tse fosahetseng joalo, na u ne u tla khopeha? Na boemo boo bo ne bo tla thefula tumelo ea hao ho Jehova, ’me bo etse hore u khaotse ho mo sebeletsa? w16.06 4:5, 6

Ke hobane’ng ha Jesu a ne a bua mantsoe ao? Temaneng e tlang pele ho ena o ile a re: “Ntat’a lōna oa leholimo oa tseba hore le hloka lintho tsena tsohle,” e leng lijo, liaparo le bolulo. Jehova a ka khona ho re fa lintho tsena le pele re hlokomela hore rea li hloka. (Bafil. 4:19) Oa tseba hore na ke seaparo sefe sa rona se mothating oa ho fela. Oa tseba hore na re hloka lijo life le hore na re hloka bolulo bo joang, ho latela boholo ba malapa a rona. Jehova o tla etsa hore re fumane lintho tseo re hlileng re li hlokang. Re ka kholiseha hore haeba re etelletsa pele tšebeletso ea Jehova bophelong, a ke ke a hloleha ho re fa lintho tseo re li hlokang. ‘Boinehelo ba bomolimo’ bo tla re thusa hore re khotsofale ha re e-na le lijo, liaparo le bolulo.—1 Tim. 6:6-8. w16.07 1:17, 18

Poelano ena e etsa hore re be le khotso le Jehova. Pauluse o ile a re poelano ena e bile teng ka lebaka la mosa o sa tšoanelang oa Jehova, ’me a re ho barab’abo ba tlotsitsoeng: “Kaha joale ho boletsoe hore re lokile ka lebaka la tumelo, a re thabeleng khotso le Molimo ka Morena oa rōna Jesu Kreste, eo ka eena ka tumelo re boetseng re fumaneng katamelo ea ho kena moseng ona o sa tšoanelang oo joale re emeng ho oona.” (Bar. 5:1, 2) Ruri ena ke tlhohonolofatso! Kaofela re hlaha re sa loka. Empa moprofeta Daniele o ile a bolela esale pele hore nakong ea bofelo, “ba nang le temohisiso,” e leng batlotsuoa, ba tla ‘tlisa ba bangata ho lokeng.’ (Dan. 12:3) Batlotsuoa ba thusitse batho ba limilione ba “linku tse ling” ka ho ba ruta Bibele, e le hore le bona Jehova a ka ba nka ba lokile. (Joh. 10:16) Jehova o ba nka ba lokile ka lebaka la mosa oa hae o sa tšoanelang.—Bar. 3:23, 24. w16.07 3:10, 11

Mangeloi a neng a nkile ’mele ea batho ’me a nyala basali a ile a ba le bana ba mabifi ba bitsoang Banefilime. Ho feta moo, ‘bobe ba motho bo ne bo le bongata lefatšeng ’me tšekamelo eohle ea menahano ea pelo ea hae e le mpe feela ka linako tsohle.’ (Gen. 6:1-5) Jehova o ile a tlisa Moroallo mehleng ea Noe ho felisa batho ba khopo. Ka nako eo, batho ba ne ba phathahane ba iketsetsa mabaka a bona, ba nyala, ba nyalisoa ’me ha baa ka ba mamela “Noe, ’moleli oa ho loka” ha a ba bolella ka timetso e haufi. (2 Pet. 2:5) Jesu o ile a bapisa maemo ao le a neng a tla ba teng mehleng ena. (Mat. 24:37-39) Hona joale, batho ba bangata ha ba mamele litaba tse molemo tsa ’Muso oa Molimo tse boleloang lefatšeng lohle e le bopaki ho lichaba tsohle pele tsamaiso ena e khopo ea lintho e felisoa. Sena se re bontša hore lintho tse kang ho nyala le ho holisa bana ha lia lokela ho re sitisa hore re lule re falimehile ha letsatsi la Jehova le ntse le atamela. w16.08 1:8, 9

Kaha re phela “matsatsing a ho qetela,” re tobana “le linako tse mahlonoko tseo ho leng thata ho sebetsana le tsona.” (2 Tim. 3:1-5) Empa haeba re boloka kamano ea rona le Molimo e le matla, re tla atleha ho loantša tšusumetso e mpe ea lefatše lena. Temaneng ea letsatsi ea kajeno, Pauluse o ne a sa re banyalani ba hlokomolohe boikarabelo ba bona. Empa kaha nako e setseng e fokotsehile, ba lokela ho batla ’Muso pele. (Mat. 6:33) Le hoja re phela linakong tse thata le manyalo a mangata a qhalana, re ka khona ho atlehisa manyalo a rona. Ha e le hantle, ha banyalani ba Bakreste ba tsamaea le batho ba Jehova, ba latela keletso ea Mangolo ’me ba lumella hore Jehova a ba tataise ka moea oa hae, ba tla atleha ho baballa “seo Molimo a se kopantseng hammoho.”—Mar. 10:9. w16.08 2:17, 18

Ho hlokeha balisa ba eketsehileng ka phuthehong ea Bokreste, ’me bao e tla ba baholo nakong e tlang ba lokela ho rupeloa. Pauluse o ile a re ho Timothea: “Lintho tseo u ileng ua li utloa ho ’na ka tšehetso ea lipaki tse ngata, lintho tsena u li behe ho banna ba tšepahalang, bao, le bona, e tla ba ba tšoanelehang ka ho lekaneng ho ruta ba bang.” (2 Tim. 2:1, 2) Timothea o ile a ithuta sena ha a ntse a sebetsa le moapostola Pauluse. Hamorao Timothea o ile a sebelisa lintho tseo a ithutileng tsona ho Pauluse, ha a le tšebeletsong le likarolong tse ling tsa tšebeletso e halalelang. (2 Tim. 3:10-12) Pauluse o ile a ipha nako ea ho rupela Timothea. O ile a tsamaea le eena maetong a hae. (Lik. 16:1-5) Baholo ba ka etsisa mohlala oa Pauluse ka hore ba tsamaee le bahlanka ba sebeletsang ba tšoanelehang ha ba ea maetong a bolisa haeba maemo a lumela. Kahoo, baholo ba tla fa bara bao babo rona monyetla oa ho ithuta litšoaneleho tse hlokahalang ho balebeli ba Bakreste, joaloka tumelo, mamello le lerato. Ka tsela ena, ba tla be ba koetlisa balisa ba nakong e tlang ba “mohlape oa Molimo.” w16.08 4:16, 17

Ka linako tse ling hore matsoho a motho a tepeletse ho bolela hore motho eo o nyahame, kapa o feletsoe ke tšepo. (2 Likron. 15:7; Baheb. 12:12) Hangata ha motho a le boemong boo, oa inehela. Ka masoabi, lefatše le khopo la Satane le re bakela khatello e matla, ’me seo se etsa hore re tšoenyehe re be re tepelle. Sena se ka tšoantšoa le ankora e tšoereng sekepe, e se sitisang ho tsamaea. (Liprov. 12:25) Ke’ng e ka etsang hore u ikutloe ka tsela ee? Mohlomong u shoetsoe ke motho eo u mo ratang, oa kula, maemo a moruo a u thatafalletsa ho hlokomela ba lelapa la hao, kapa oa hanyetsoa. Ha nako e ntse e ea, khatello ea maikutlo e ka u qeta matla. E ka ba ea etsa hore u felloe ke thabo. Empa u ka kholiseha hore Molimo o ikemiselitse ho u thusa.—Esa 41:10, 13. w16.09 1:2, 4

Ba bang ba rona re lokela ho loantša bofokoli bo itseng. Ba bang bona ba lokela ho loanela ho ba le boikutlo bo nepahetseng ka tšebeletso. Mohlomong uena u ua kula kapa u jeoa ke bolutu. Ba bang bona ba thatafalloa ho tšoarela batho ba ba foselitseng. Ho sa tsotellehe hore na ke khale hakae re sebeletsa Jehova, kaofela ha rona re lokela ho loantša ntho leha e le efe e ka re sitisang ho sebeletsa Molimo, ea putsang ba tšepahalang. Haeba u hlokomela hore ho na le moo u lokelang ho ntlafatsa teng, kopa Molimo hore a u thuse ka moea o halalelang. Thapelo le moea o halalelang li tla u thusa ho etsa se nepahetseng ’me Jehova o tla u hlohonolofatsa. Etsa lintho tse lumellanang le lithapelo tsa hao. Leka ho bala Bibele letsatsi le leng le le leng, ’me u iphe nako ea ho ba le thuto ea botho le ea ho tšoara Borapeli ba Lelapa.—Pes. 119:32. w16.09 2:10, 11

Na ha se ’nete hore batho ba lumelang hore lintho li iphetotse ba re ba na le bopaki ba saense, empa ho hlokahala tumelo hore motho a lumele hore Molimo o teng? Batho ba bangata ba nahana joalo. Empa re lokela ho hopola sena: Ho hlokahala hore motho a be le tumelo, ho sa tsotellehe hore na o lumela hore Molimo o teng kapa hore lintho li iphetotse. Hobane’ng? Ha ho motho ea kileng a bona Molimo, kapa a bona ha lintho li boptjoa. (Joh. 1:18) ’Me ha ho motho, ebang ke rasaense kapa che, ea kileng a bona ntho e itseng e iphetola ho ba ea mofuta o mong. Mohlala, ha ho na motho ea kileng a bona sehahabi se fetoha phoofolo e anyesang. (Jobo 38:1, 4) Kahoo, kaofela ha rōna re lokela ho hlahloba bopaki, ’me re sebelise matla a rona a ho nahana ho etsa liqeto tse utloahalang. Ha moapostola Pauluse a bua ka popo, o ile a re: “Litšobotsi tsa [Molimo] tse sa bonahaleng li bonoa ka ho hlaka ho tloha pōpong ea lefatše ho ea pele, hobane li lemohuoa ka lintho tse entsoeng, esita le matla le Bomolimo ba hae ba ka ho sa feleng, hoo ba se nang boikemelo.”—Bar. 1:20. w16.09 4:4

Jehova o ile a etsetsa bajaki ba neng ba lula Iseraele litokisetso tse lerato tse kang ea ho khoahlapisa.(Lev. 19:9, 10) Ho e-na le hore Jehova a laele Baiseraele hore ba hlomphe balichaba, o ile a ba susumelletsa hore ba be le kutloelo-bohloko. (Ex. 23:9) Ba ne ba tseba hore na ho joang ‘ho ba bajaki.’ Le pele Baegepeta ba etsa Baheberu makhoba, ho ka etsahala hore ba ne ba se ba ntse ba ba khetholla ka lebaka la morabe le bolumeli. (Gen. 43:32; 46:34; Ex. 1:11-14) Baiseraele ba ne ba hutse ka thata ha e ntse e le bajaki, empa Jehova o ne a lebeletse hore ba tšoare motho leha e le ofe oa molichaba ‘joaloka letsoalloa la habo bona.’ (Lev. 19:33, 34) Re kholisehile hore Jehova o ntse a amehile ka batho ba tsoang linaheng tse ling ba tlang libokeng tsa rona. (Deut. 10:17-19; Mal. 3:5, 6) Haeba re nahana ka mathata ao ba tobanang le ’ona, a kang a ho khetholloa kapa ho se tsebe puo, re tla batla litsela tsa ho ba bontša mosa le qenehelo.—1 Pet. 3:8. w16.10 1:3-5

Lengolo la Jakobo le hlalosa hore tumelo ea Bokreste hase feela taba ea ho lumela; empa e bonahatsoa ka liketso. Jakobo o ile a re: “Mpontše tumelo ea hao kantle le mesebetsi, ’me ’na ke tla u bontša tumelo ea ka ka mesebetsi ea ka.” (Jak. 2:18) Jakobo o ile a tsoela pele ’me a bontša phapang pakeng tsa ho lumela feela le ho bontša hore motho o na le tumelo. Bademona baa lumela hore Molimo o teng, empa ha ba na tumelo ea sebele. Ho e-na le hoo, ba etsa lintho tse khahlanong le morero oa Molimo. (Jak. 2:19, 20) Empa ha Jakobo a bua ka monna e mong oa mehleng ea khale ea neng a e-na le tumelo, o ile a botsa a re: “Na ha hoa ka ha boleloa hore ntat’a rōna Abrahama o lokile ka mesebetsi ka mor’a hore a nyehele mora oa hae Isaka aletareng? Ua bona hore tumelo ea hae e ile ea sebetsa hammoho le mesebetsi ea hae ’me ka mesebetsi ea hae tumelo ea hae e ile ea etsoa e phethahetseng.” (Jak. 2:21-23) Jakobo o ile a hatisa mantsoe a temana ea kajeno ka hore tumelo e lokela ho bonahatsoa ka liketso.—Jak. 2:21-23, 26. w16.10 4:8

Saense e re senoletse ho hongata ka bokahohle le ka lefatše, ’me e re thusitse haholo likarolong tse sa tšoaneng. Empa ha e khone ho araba lipotso tse ngata tseo re ipotsang tsona. Mohlala, bo-rasaense ba ke ke ba re bolella hore na bokahohle bo bile teng joang kapa hore na ke hobane’ng ha ho e-na le lintho tse ngata tse phelang. Le batho ka kakaretso ba sitoa ho hlalosa hore na ke hobane’ng ha batho ba labalabela ho phela ka ho sa feleng. Ke hobane’ng ha batho ba ipotsa lipotso tse ngata tsa bohlokoa empa ho se na likarabo? Lebaka ke hore bo-rasaense ba bangata le batho ba bang ba buella khopolo e khahlanong le monahano oa Molimo ea hore lintho li ikentse. Leha ho le joalo, ka Lentsoeng la hae Jehova o araba lipotso tse ’nileng tsa tšoenya batho. Re itšetlehile ka melao e tšepahalang ea tlhaho eo Jehova a e behileng. Batsamaisi ba lifofane, litsebi tsa motlakase, tsa liphaephe tsa metsi, lienjiniere le lingaka, li sebetsa ho latela melao ena. w16.11 2:4, 5

Re na le mabaka a mangata a ho leboha Jehova. Ke ’Mopi oa rona, re teng ka eena. O re file mpho ea bohlokoa, e leng Lentsoe la hae, Bibele. Re le amohela e le molaetsa o tsoang ho Molimo, feela joalokaha Bakreste ba Thesalonika ba ile ba le amohela. (1 Bathes. 2:13) Lentsoe la Molimo le entse hore re atamele haufi le Jehova, ’me le eena a atamele haufi le rona. (Jak. 4:8) Ntate oa rona ea leholimong o re file tlotla e babatsehang ea ho ba karolo ea mokhatlo oa hae. Ruri re ananela tokelo ena! Mopesaleme o ile a re: “Lebohang Jehova, etsoe o molemo.” (Pes. 136:1) Mantsoe a reng “mosa oa hae o lerato o teng ho isa nakong e sa lekanyetsoang” a hlaha ka makhetlo a 26 Pesalemeng ea 136. Haeba re tšepahalla Jehova le mokhatlo oa hae, re tla bona ha mantsoe ao a phethahala kaha re tla phela ka ho sa feleng. w16.11 3:18, 19

Temana ena e sebelisoa khafetsa bukeng ea Ha e le Hantle ke Eng Seo Bibele e se Rutang? Mohlomong u sebelisa lengolo lena ha u ithuta khaolo ea 3, 5 le ea 6 le bana ba hao kapa batho ba bang, moo ho buuoang ka hore na Molimo o rera ho etsa’ng ka lefatše, hobane’ng ha re hloka thekollo le hore na bafu ba hokae. Empa na u ee u nahane hore na lengolo lee le ama joang liketso tsa hao, kamano ea hao le Jehova hammoho le tšepo ea hao ka bokamoso? ’Nete ke hore kaofela ha rona re baetsalibe. Re etsa liphoso kamehla. Leha ho le joalo, re kholisehile hore Molimo oa hopola hore re entsoe ka lerole, ’me o ikemiselitse ho re hauhela. (Pes. 103:13, 14) Thapelong ea hae ea mohlala, Jesu o ile a akarelletsa mantsoe a reng: “U re tšoarele libe tsa rōna.” (Luka 11:2-4) Kahoo, ha ho hlokahale hore re khathatsehe ka liphoso tseo Molimo a re tšoaretseng tsona. Leha ho le joalo, re ka fumana molemo ka ho nahana hore na Jehova o re tšoarela joang. w16.12 1:1-3

Bakreste ba Roma ba ne ba lokela ho sheba hore na ntho e tlang pele bophelong ba bona ke efe. Na ba ne ba phelela ‘lintho tsa nama’? Le rona re lokela ho ipotsa potso e tšoanang. Ke lintho life tseo re amehileng ka tsona haholo? Ke lintho life tseo re atisang ho bua ka tsona? Re phelela’ng letsatsi le letsatsi? Batho ba bang ba amehile ka ho noa mefuta e fapaneng ea joala, ho khabisa matlo a bona, feshene, ho bokella chelete, ho ikhatholla le tse ling. Ha ho letho le phoso ka lintho tsena. Mohlala, Jesu o ile a fetola metsi veine. Pauluse le eena o ile a re Timothea a noe “veine e nyenyane.” (1 Tim. 5:23; Joh. 2:3-11) Leha ho le joalo, na Jesu le Pauluse ba ne ba atisa ho bua ka veine? Che. Ho thoe’ng ka rona? Ntho ea bohlokoa bophelong ba rona ke eng? w16.12 2:5, 10, 11

Mantsoe a lengolo lena a lumellana le seo Jesu a ileng a se bua ka ho batla ’Muso pele le ho loka ha Molimo. (Mat. 6:33) Ka le leng moapostola Petrose o ile a botsa Jesu a re: “Re siile lintho tsohle ’me ra u latela; re tla fumana eng?” (Mat. 19:27) Ho e-na le ho nyatsa Petrose ka ho mo botsa potso eo, Jesu o ile a bolella barutuoa ba hae hore ba tla putsoa haeba ba itela. Baapostola ba hae ba tšepahalang le batho ba bang ba tla busa le eena leholimong. Le hona joale barutuoa bohle ba fumana moputso. Jesu o ile a re: “E mong le e mong ea siileng matlo kapa barab’abo kapa baralib’abo kapa ntate kapa ’mè kapa bana kapa masimo ka lebaka la lebitso la ka o tla amohela ho eketsehileng ka makhetlo a mangata ’me o tla rua bophelo bo sa feleng.” (Mat. 19:29) Barutuoa ba hae ba ne ba tla fumana litlhohonolofatso tse fetang hole lintho tseo ba li tetseng. Na balumeli-’moho le rona ha ba bohlokoa ho feta lintho le ha e le life tseo re li tetseng bakeng sa ’Muso? w16.12 4:4, 5

Ruri Bakreste ba ’nete ba na le tšepo e babatsehang! Kaofela ha rona, ebang re batlotsuoa kapa “linku tse ling,” re lebeletse ho bona ha morero oa Jehova oa qalong o phethahala ’me lebitso la hae le halaletsoa. (Joh. 10:16; Mat. 6:9, 10) Eo ke tebello e hlollang hakaakang! Re boetse re lebeletse ho phela ka ho sa feleng ‘maholimong a macha,’ kapa ‘lefatšeng le lecha’ leo Molimo a tla le tlisa. (2 Pet. 3:13) Empa hajoale, re tšepa hore batho ba Molimo ba tla tsoela pele ho atleha moeeng. Batho ba lefatšeng la Satane le bona ba na le tšepo, le hoja ba sa kholiseha hore seo ba se tšepileng se tla fela se etsahale. Mohlala, batho ba bangata ba bapalang lotto ba na le tšepo ea hore ba tla hapa chelete, empa ha baa kholiseha ka seo. Ha ka lehlakoreng le leng, tumelo ea sebele eona e le “tebello e tiisitsoeng” ea lintho tseo re nang le tšepo ea hore li tla etsahala. w16.10 3:1, 2

Jehova o re bontšitse mosa ka ho re fa lineo le bokhoni bo sa tšoaneng. Re ka sebelisa limpho tsena ho mo tlotlisa le ho thusa ba bang. (Bar. 12:4-8) Empa boemo ba rona ka phuthehong ea Molimo bo ka ’na ba fetoha. Nahana ka mohlala oa Jesu. Qalong, o ne a lula le Ntate oa hae feela leholimong. (Liprov. 8:22) Eaba o thusa Jehova ho bopa mangeloi a mang le lintho tse ling tsohle, ho akarelletsa le batho. (Bakol. 1:16) Hamorao Jesu o ile a fuoa kabelo e ncha ea hore a tle lefatšeng, a tsoaloa e le lesea ’me a hola ho fihlela e e-ba motho e moholo. (Bafil. 2:7) Ka mor’a hore Jesu a shoe, o ile a khutlela leholimong e le sebopuoa sa moea hore e il’o ba Morena oa ’Muso oa Molimo ka 1914. (Baheb. 2:9) Empa leo e ne e se lekhetlo la ho qetela a fuoa kabelo e ncha. Ka mor’a puso ea hae ea Lilemo Tse Sekete, Jesu o tla khutlisetsa puso ho Jehova, e le hore “Molimo e ka ba lintho tsohle ho e mong le e mong.”—1 Bakor. 15:28. w17.01 3:11, 12

Ha mosali e mong a ne a lokela ho etsa qeto, o ile a re ho motsoalle oa hae: “Mpolelle feela hore na ke etse’ng, u se ke oa mpotsa lipotso.” Mosali eo o ne a thabela ho etsetsoa liqeto, ho e-na le ho sebelisa mpho eo ’Mopi a re fileng eona, e leng bolokolohi ba ho ikhethela. Uena u ikutloa joang? Na u rata ho iketsetsa liqeto, kapa u thabela ha ba bang ba u etsetsa tsona? U ikutloa joang ka bolokolohi ba ho ikhethela? Batho ba ile ba ba le maikutlo a fapaneng tabeng ena ka lilemo tse ngata. Ba bang ba re ha re na bolokolohi ba ho ikhethela, hobane Molimo o rerile esale pele hore na re tla etsa’ng bophelong. Athe ba bang ba re bolokolohi ha boa lokela ho beheloa meeli. Empa, e le hore re utloisise taba ena hantle, re lokela ho sheba ka Lentsoeng la Molimo, e leng Bibele. Hobane’ng? Hobane ke eona e rutang hore Jehova o re bopile re e-na le bolokolohi ba ho ikhethela, e leng bokhoni ba ho etsa liqeto ka bohlale. w17.01 2:1, 2

E ka ’na eaba Davida o ile a nahana hore Solomone a ke ke a khona ho phetha kabelo eo ea bohlokoa ea ho haha ntlo ea Jehova. Etsoe tempele e ne e “lokela ho ba e hlollang ka mokhoa o fetisisang ka botle” ’me ka nako eo Solomone o ne a sa le ‘mocha ’me a se na boiphihlelo.’ Leha ho le joalo, Davida o ne a tseba hore Jehova o tla tšehetsa Solomone. Kahoo Davida o ile a etsa sohle seo a ka se khonang ho tšehetsa Solomone, ka ho hlophisa lintho tsohle tse hlokahalang. Ka ho tšoanang barab’abo rona ba holileng kajeno ha ba a lokela ho ba leqe ho fetisetsa likabelo tsa bona ho ba bacha ha ho hlokahala. Ha e le hantle, ke ha bohlokoa hore ba bacha ba rupelloe ho etsa mosebetsi o eketsehileng. Bara bana babo rona ba holileng ba lokela ho thaba ha ba bacha bao ba ba koetlisitseng ba tšoaneleha ho amohela mosebetsi o eketsehileng. w17.01 5:8, 9

Kaha Jesu ke Morena oa ’Muso oa Molimo, o tla felisa Satane ’me a tlose mathata ’ohle ao Satane a a bakileng. Ha Jesu a le lefatšeng, o ile a thusa barutuoa ba hae ho bona hore ’Muso oa Molimo ke oa bohlokoa. Hang-hang ka mor’a ho kolobetsoa, Jesu o ile a phatlalatsa “litaba tse molemo tsa ’muso oa Molimo” libakeng tsohle. (Luka 4:43) Pele Jesu a ea leholimong, o ile a bolella barutuoa ba hae hore e tla ba lipaki tsa hae “ho isa karolong e hōle-hōle ea lefatše.” (Lik. 1:6-8) Ka lebaka la mosebetsi oa ho bolela litaba tse molemo tsa ’Muso, batho lefatšeng ka bophara ba na le monyetla oa ho ithuta ka thekollo le ho tšehetsa ’Muso oa Molimo. Re bontša hore re tšehetsa ’Muso ka ho thusa batlotsuoa mosebetsing oa ho bolela litaba tse molemo tsa ’Muso oa Molimo lefatšeng lohle.—Mat. 24:14; 25:40. w17.02 2:7, 8

Le hoja barab’abo rona ba sehlopha se busang ba ne ba tataisa phutheho, ba ne ba tseba hore Jesu ke eena Moeta-pele oa bona. Moapostola Pauluse o ile a re: “A re hōleng linthong tsohle ka lerato ho eo e leng hlooho, Kreste.” (Baef. 4:15) Ho e-na le ho bitsoa baapostola, ‘barutuoa ba ile ba bitsoa Bakreste.’ (Lik. 11:26) Pauluse o ne a tseba hore o lokela ho hlompha “lineano ka tieo,” le melao eo ba neng ba e fumana ho tsoa ho baapostola le banna ba bang ba neng ba etella pele. Leha ho le joalo Pauluse o ile a boela a re: “Empa ke batla hore le tsebe hore hlooho ea monna e mong le e mong ke Kreste; hape hlooho ea mosali ke monna; hape hlooho ea Kreste ke Molimo.” (1 Bakor. 11:2, 3) Ho hlakile hore Jehova o ne a khethile mora oa hae Jesu hore a tataise phutheho. w17.02 4:7

Ho hlompha ba bang ho re thusa hore re se ke ra ikhohomosa, le hore re lule re ikokobelitse le ha ba bang ba re fa tlhompho e itseng. Ho boetse ho re thusa ho sebelisana le mokhatlo oa Jehova, o re thusang ho qoba ho fa batho tlhompho e feteletseng ebang ke Lipaki kapa ha se tsona. Ho feta moo, re fumana bohlale bo re thusang hore re se ke ra nyahamisoa ke batho bao re ba hlomphang haeba ba etsa lintho tse soabisang. Ka holimo ho tsohle re thabisa Molimo ha re hlompha batho ba bang. Re etsa seo a reng re se etse ebile re lula re mo tšepahalla. ’Me ha re etsa joalo re etsa ho re Molimo a arabe mang kapa mang ea mo qosang. (Liprov. 27:11) Lefatše le tletse ka batho ba sa hlompheng. Re motlotlo hore e be re khona ho hlompha ka tsela eo Jehova a batlang hore re hlomphe ka eona. w17.03 1:13, 20, 21

Joaloka ntata’e, Josafate o ile a khothalletsa batho ho batla Jehova. O ile a etsa seo ka ho hlophisa hore Bajuda ba rutoe ho sebelisa “buka ea Molao oa Jehova.” (2 Likron. 17:7-10) O ile a ba a etela karolong e ka leboea ea Iseraele ho batho ba sebakeng se lithaba sa Efraime, ho ba “khutlisetsa ho Jehova.” (2 Likron. 19:4) Kaofela ha rona re ka kenya letsoho mosebetsing oo Jehova a o hlophisitseng kajeno oa ho bolela litaba tse molemo. Na u ikemiselitse ho ruta batho Lentsoe la Molimo khoeli le khoeli, le ho ba khothalletsa ho sebeletsa Molimo? Na ke ntho eo u e rapellang? Ha u sebetsa ka thata hore u be le thuto ea Bibele, Molimo o tla u hlohonolofatsa. Na u nka seo e le sa bohlokoa hoo u ka telang nako ea hao? Hape, joalokaha Josafate a ile a ea Efraime ho ea thusa batho hore ba khutlele borapeling ba ’nete, le rona re ka leka ho thusa ba seng ba khaolitse ho sebeletsa Jehova. w17.03 3:10, 11