June

Kaha Jafeta o ne a se na bana ba bang, o ne a sa tl’o ba le mojalefa. (Baahl. 11:34) Leha ho le joalo, Jafeta o ile a re: “Ke ahlamisitse molomo oa ka ho Jehova, ’me ha ke khone ho koeneha.” (Baahl. 11:35) Jehova o ile a amohela nyehelo eo ea Jafeta, ’me a mo hlohonolofatsa. Na u ka be u ile oa tšepahala joaloka Jafeta? Ha re inehela ho Jehova, re ile ra mo tšepisa hore re tla etsa thato ea hae ka linako tsohle. Re ne re tseba hore ha se kamehla ho tla ba bonolo ho phethahatsa tšepiso eo. Empa re itšoara joang ha re koptjoa hore re etse ntho eo re sa e rateng? Haeba re ikemiselitse re bile re ithaopela ho mamela Molimo, re bontša hore re tšepahalla tšepiso eo re e entseng. Mahlabelo a rona a ka ’na a re utloisa bohloko, empa kamehla litlhohonolofatso tsa Jehova li ba ngata.—Mal. 3:10. w16.04 1:11, 14, 15

Jesu o sebelisa moea o halalelang ho tataisa phutheho. Moea o halalelang o ka re thusa ho hlola liteko le ho ba sebete ha re bua le batho ka Bibele. O ka boela oa re thusa ho etsa liqeto tse nepahetseng. Ke kahoo re lokelang ho etsa sohle se matleng a rona hore re be teng libokeng e le hore Molimo a ka re thusa ka moea oa hae o halalelang. Hangata re ithuta kamoo boprofeta ba Bibele bo phethahalang kateng. Sena se re tiisetsa hore litšepiso tsa Jehova li tla phethahala. Bara le barali babo rona baa re khothatsa ha ba fana ka lipuo, ha ba arabela le ha ba binela Jehova ho tsoa pelong. (1 Bakor. 14:26) Hape, ha re bua le bona pele liboka li qala le ha li tsoa, rea khothala hobane re qoqa le metsoalle ea rona e re tsotellang.—1 Bakor. 16:17, 18. w16.04 3:6, 7

Jesu o ile a re balateli ba hae ba tla bolela litaba tse molemo “lefatšeng lohle leo ho ahiloeng ho lona.” A ba laela hore ba etse batho ba “lichaba tsohle barutuoa.” (Mat. 24:14) Sena se bolela hore litaba tse molemo li lokela ho phatlalatsoa lefatšeng lohle. Ke Lipaki Tsa Jehova feela tse phethahatsang boprofeta ba Jesu ba hore litaba tse molemo li tla boleloa lefatšeng lohle. Ke hobane’ng ha re bua joalo? United States, baruti ba Bokreste-’motoana ba ka ba 600 000, ’me Lipaki Tsa Jehova tse ka bang 1 200 000 li phatlalatsa litaba tse molemo naheng eo. Lefatšeng ka bophara, ho na le baruti ba K’hatholike ba ka bang 400 000, ’me ho na le Lipaki Tsa Jehova tse fetang limilione tse 8 tse bolelang litaba tse molemo linaheng tse 240. Ho hlakile hore Lipaki Tsa Jehova li bolela litaba tse molemo lefatšeng lohle, e leng se tlotlisang Jehova!—Pes. 34:1; 51:15. w16.05 2:13, 14

Batho ba bangata ba nka hore ba na le bolokolohi ba ho ikhethela se nepahetseng le se fosahetseng. Baa ikakasa, baa ikhohomosa, ’me ba na le moea oa tlholisano, hape ha ba tsotelle hore na liqeto tsa bona li utloisa ba bang bohloko kapa che. Batho ba nang le boikutlo bona ba lula ba halefile ’me ba qabana le ba bang. (Gen. 3:1-5) Jesu Thutong ea hae ea Thabeng, o ile a ruta balateli ba hae ho bopa khotso le ho qoba liqabang, esita leha ho bonahala eka seo se ka ba ntša kotsi. Mohlala, o ile a ba ruta ho ba mosa, ho bopa khotso le ba bang, ho se halefe, ho rarolla liqabang ka potlako le ho rata lira tsa bona.—Mat. 5:5, 9, 22, 25, 44. w16.05 1:4, 5

Pele re kolobetsoa, boholo ba rona re ile ra tlameha ho etsa liphetoho tse kholo bophelong e le hore re phele ka tsela eo Bibele e reng re lokela ho phela ka eona. Empa esita le hona joale, rea hlokomela hore ho ntse ho e-na le liphetoho tse nyenyane tseo re lokelang ho li etsa e le hore re tšoane haholoanyane le Molimo le Kreste. (Baef. 5:1, 2; 1 Pet. 2:21) Mohlala, re ka ’na hlokomela hore re tletleba haholo, kapa re atisa ho seba ba bang le ho bua hampe ka bona. Kapa ka linako tse ling re ka ’na ra tšaba hore na ba bang ba nahana’ng ka rona kapa ba tla re’ng, ebe re sitoa ho etsa se nepahetseng. Mohlomong e se e le nako re ntse re leka ho fetoha, empa re ntse re etsa liphoso tse tšoanang. Hopola hore re ntse re sa phethahala. (Bakol. 3:9, 10) Re lula re etsa liphoso le hoja re se re e-na le lilemo re kolobelitsoe. Ka linako tse ling, re ka ’na ra ba le litakatso tse fosahetseng, kapa ra thatafalloa ho laola bofokoli bo itseng boo re nang le bona. Ha e le hantle, re ka ’na ra loantšana le bona ka lilemo-lemo.—Jak. 3:2. w16.05 4:3-5

Batho ba bang ba ka ’na ba re: ‘Haesale ke sa utloisise hantle hore na ke hobane’ng ha batsoali ba ka ba ne ba nkhalemela hakana, ho fihlela ha ke e-ba le bana.’ Ha re ntse re hola, re ka ’na ra ananela khalemelo kaha rea hlokomela hore ke pontšo ea lerato. (Baheb. 12:5, 11.) Kaha Jehova oa re rata, ka mamello oa re khalemela le ho re bopa. O batla hore re hlalefe re be re thabe, ’me re mo rate joaloka Ntate oa rona. (Liprov. 23:15) Ha a rate ho re bona re sotleha ’me re e-shoa re ntse re e-s’o bake. (Baef. 2:2, 3.) E ka ’na eaba pele re tseba Jehova, re ne re e-na le litloaelo tse mpe. Empa Jehova o ile a re bopa ’me a re thusa ho fetoha. Ka lebaka leo, hona joale re na le botumo bo botle.—Esa. 11:6-8; Bakol. 3:9, 10. w16.06 1:7, 8

Bana ba bangata ba banyenyane ba ikokobelitse ba bile ba rata ho ithuta. (Mat. 18:1-3) Kahoo, ke hantle hore batsoali ba rute bana ba bona ba sa le banyenyane ho rata Lentsoe la Molimo. (2 Tim. 3:14, 15) E le hore batsoali ba atlehe, ba lokela ho rata Lentsoe la Molimo ka bobona le ho tataisoa ke lona bophelong. Ha batsoali ba etsa sena, ho ba bonolo hore bana le bona ba le rate. Hape, bana ba tla utloisisa hore ha ba khalemeloa, seo se bontša hore batsoali ba bona le Jehova baa ba rata. Ha re lula re ikokobelitse re bile re mamela Jehova, o re nka re le ba bohlokoa joaloka Daniele. (Dan. 10:11, 19) Jehova o tla tsoela pele ho re bopa a sebelisa Lentsoe la hae, moea o halalelang le mokhatlo oa hae. w16.06 2:14, 17

Davida o ne a e-na le tumelo e matla, ’me Jehova o ne a mo rata. (1 Sam. 13:13, 14) Empa le eena o ile a etsa libe tse tebileng. Davida o ile a kopanela liphate le Bathe-sheba, mosali oa Uria, ha Uria a ile ntoeng, ’me mosali eo a ima. Davida o ne a sa batle ha batho ba ka tseba ka taba eo. Kahoo, a bitsa Uria ntoeng, ’me a mo khothalletsa hore a ee hae. Davida o ne a nahana hore Uria o tla kopanela liphate le Bathe-sheba, e le hore batho ba tle ba nke hore ngoana eo ke oa Uria. Empa Uria o ile a hana ho ea ha hae. Eaba Davida o loha leano la hore Uria a bolaoe ntoeng. Davida le ba lelapa la hae ba ile ba khola litholoana tse bosula ka lebaka la libe tseo tse tebileng. (2 Sam. 12:9-12) Empa Jehova o ile a mo tšoarela. O ne a tseba hore Davida o batla ho etsa se nepahetseng. (1 Mar. 9:4) Haeba u ne u phela mehleng eo, u ne u tla ikutloa joang ka seo Davida a se entseng? Na u ka be u ile oa khaotsa ho sebeletsa Jehova? w16.06 4:7

Rona Lipaki Tsa Jehova, re nka temoso ea Jesu ka ho teba. Rea tseba hore re phela “nakong ea bofelo” le hore ho setse nako e khutšoanyane pele “matšoenyeho a maholo” a qala. (Dan. 12:4; Mat. 24:21) Lefatšeng ka bophara re bona lintoa, ho hlepha ha boitšoaro, tlolo ea molao, pherekano ea malumeli, khaello ea lijo, mafu a seoa le litšisinyeho tsa lefatše. Rea tseba hore batho ba Jehova ba etsa mosebetsi o babatsehang oa ho bolela litaba tse molemo tsa ’Muso lefatšeng lohle. (Mat. 24:7, 11, 12, 14; Luka 21:11) Re lebeletse ka tjantjello ho tla ha Morena le ho phethahala ha morero oa Molimo. (Mar. 13:26, 27) Leha ho le joalo, ha re tsebe selemo, letsatsi kapa hora eo matšoenyeho a maholo a tla qala ka eona. w16.07 2:2-4

Ka mosa oa hae o sa tšoanelang, Jehova o re buletse monyetla oa hore re atamele ho eena ka thapelo. O re file tlotla ea hore re mo rapele re sebelisa lebitso la Mora oa hae, “eo ka eena re buang ka bolokolohi bona le katamelo ka kholiseho ka tumelo ea rōna ho eena.” (Baef. 3:12) Ka sebele, tlotla eo Jehova a re fileng eona ea hore re mo rapele, ke pontšo ea mosa oa hae o sa tšoanelang. Pauluse o re khothallelitse hore re rapele Jehova ka bolokolohi, “e le hore re ka fumana mohau le ho fumana mosa o sa tšoanelang bakeng sa thuso ka nako e nepahetseng.” (Baheb. 4:16b) Kamehla ha re tobane le liteko le mathata, re ka rapela Jehova hore a re thuse. Le hoja re sa tšoanelehe hore a ka araba lithapelo tsa rona, hangata o li araba a sebelisa Bakreste-’moho le rona, “e le hore re ka ba sebete ’me ra re: ‘Jehova ke mothusi oa ka; nke ke ka tšaba. Motho a ka nketsa’ng?’”—Baheb. 13:6. w16.07 3:12, 13

Noe o ne a e-na le bara ba bararo. Ka bone ba bona, e mong le e mong o ne a e-na le mosali a le mong feela. Empa batho ba mehleng eo ba ne ba nyala sethepu. Litsong tse ngata, boitšoaro bo bobe ba ho kopanela liphate bo ne bo tloaelehile, ebile bo kenyelletsoa litšebeletsong tsa bolumeli. Abrame (Abrahama) le mosali oa hae, Sarai (Sara), ba ile ba mamela Molimo ’me ba fallela Kanana, moo ba ileng ba fumana baahi ba teng ba etsa lintho tse ngata tse theolang lenyalo seriti. Jehova o ile a laela hore Sodoma le Gomora li timetsoe, kaha baahi ba teng ba ne ba etsa liketso tse feteletseng tsa boitšoaro bo bobe ba bile ba li lumella. Abrahama o ile a etella pele lelapa la hae ka tsela e loketseng, ’me Sara a beha mohlala o motle oa ho ikokobelletsa bohlooho ba monna oa hae. (1 Pet. 3:3-5) Abrahama o ile a netefatsa hore mora oa hae Isaka o nyala morapeli oa Jehova. Mora oa Isaka ea bitsoang Jakobo, eo bara ba hae e ileng ea e-ba baholo-holo ba meloko e 12 ea Iseraele, le eena o ile a latela melao-motheo e tataisang barapeli ba ’nete. w16.08 1:10

Boprofeta bona boa phethahala matsatsing ana a ho qetela. Selemong sa tšebeletso sa 2015, ho ne ho e-na le bahoeletsi ba ’Muso ba 8 220 105 ba bolelang litaba tse molemo lefatšeng lohle. Karolo e qetellang ea boprofeta bona e lokela ho re ama ka ho toba, kaha Ntate oa rona ea leholimong o re: “’Na, Jehova, ke tla ho potlakisa ka nako ea teng.” Feela joaloka bapalami ba ka koloing e tsamaeang ka lebelo, re lemoha sekhahla se ntseng se eketseha mosebetsing oa boboleli. Re ikutloa joang re le batho ka bomong ka see? Na re etsa sohle seo re ka se khonang ho ba bahoeletsi ba chesehang ba ’Muso? Bara le barali babo rona ba bangata e-ba bo-pula-maliboho ba kamehla kapa ba thusang. Kahoo, na ha re thabe ha re bona batho ba bangata ba ithaopela ho sebeletsa moo ho hlokehang bahoeletsi ba eketsehileng kapa ba kenya letsoho likarolong tse ling tsa tšebeletso? Ho phaella moo, ha ho pelaelo hore kaofela ha rona re na “le ho hongata hoo [re] ka ho etsang mosebetsing oa Morena.”—1 Bakor. 15:58. w16.08 3:1, 2

Nakoana ka mor’a hore Baiseraele ba lokolloe ka mohlolo bokhobeng Egepeta, Baamaleke ba ile ba ba hlasela. Moshe o ile a laela Joshua ea sebete hore a etelle Baiseraele pele ntoeng. Ka nako e tšoanang, Moshe a nyolohela leralleng le haufi le moo, a e-na le Arone le Hure, e le hore ba bone se etsahalang moleng oa ntoa. Moshe o ile a sebelisa leano le ileng la atleha. O ile a nka molamu oa Molimo oa ’nete ’me a o phahamisetsa holimo. Ha a o phahamisitse, Jehova o ne a matlafatsa Baiseraele, ’me ba hlola Baamaleke. Empa ha letsoho la Moshe le khathala ’me le qala ho tepella, Baamaleke ba ne ba hlola. Arone le Hure ba ile “ba nka lejoe ’me ba le beha ka tlas’a [Moshe], eaba o lula holim’a lona; Arone le Hure ba tšehetsa matsoho a hae, e mong ka lehlakoreng lena ’me e mong ka lehlakoreng lane, hoo matsoho a hae a ileng a ema nģa e le ’ngoe ho fihlela letsatsi le likela.” Ha e le hantle, letsoho le matla la Molimo le ile la thusa Baiseraele hore ba hlole ntoeng eo.—Ex. 17:8-13. w16.09 1:5-7

Pauluse o ne a kholisehile hore o tla atleha ntoeng ena, haeba a itšetleha ka Jehova a bile a bontša tumelo sehlabelong sa Jesu sa thekollo. Na le rona re ka atleha? E, re ka atleha, ha re ntse re loantša bofokoli ba rona ba ho se phethahale. Ka ho etsa’ng? Ka ho etsisa Pauluse le ho itšetleha ka Jehova ka ho feletseng, ho e-na le ho itšetleha ka matla a rona le ka ho bontša tumelo sehlabelong sa thekollo. Ka linako tse ling, Molimo a ka re fa monyetla oa ho bontša hore na re amehile hakae ka bothata boo re nang le bona. Mohlala, re tla etsa’ng haeba re kula (kapa ho kula e mong ka lapeng) kapa haeba re tšoeroe ka leeme? Re lokela ho bontša hore re tšepile Jehova ka ho feletseng ka hore re mo kope hore a re fe matla e le hore re tšepahale, ’me re se ke ra felloa ke thabo. (Bafil. 4:13) Lintho tse ileng tsa etsahalla Bakreste ba bangata mehleng ea Pauluse le mehleng ena, li bontša hore thapelo e ka re fa matla ’me ea etsa hore re be sebete e le hore re tsoele pele ka mamello. w16.09 2:14, 15

Ha phutheho ea lekholong la pele la lilemo e ntse e hola, ho ile ha hlaha boemo bo bontšang khethollo. Bajuda ba buang Segerike ba ile ba korotla ka hore bahlolohali ba bona ba ne ba hlokomolohuoa. E le ho rarolla bothata bona, baapostola ba ile ba khetha banna ba supileng ba tla netefatsa hore ha ho motho ea hlokomolohuoang. Banna bana ba ne ba e-na le mabitso a Segerike, e leng se fanang ka maikutlo a hore baapostola ba ne ba batla ho tlosa tsitsipano e teng pakeng tsa Bakreste bao ba pele ba neng ba tsoa litsong tse sa tšoaneng. (Lik. 6:2-6) Ebang rea elelloa kapa che, kaofela re susumetsoa ke litso tsa rona. (Bar. 12:2) Ho feta moo, mohlomong re ee re utloe baahelani, basebetsi-’moho kapa bana bao re kenang sekolo le bona ba bua hampe ka batho ba setso se seng, morabe kapa ba ’mala o mong. Lintho tseo ba li buang li re ama joang? Hona re ikutloa joang ha motho e mong a soma sechaba seo re tsoang ho sona, mohlomong a fetelletsa lintho tse itseng tseo re li etsang? w16.10 1:7, 8

“Ho lemoha” ho bolela ho hlokomela ntho e sa bonahaleng habonolo kapa e sa totobalang. (Baheb. 11:3) Batho ba nang le temoho ha ba sebelise mahlo le litsebe feela, empa ba sebelisa le kelello. Mokhatlo oa Jehova o re lokiselitse likhatiso tse ngata tse etselitsoeng lipatlisiso ho re thusa. Li re nolofalletsa ‘ho bona’ ’Mopi oa rona ka mahlo a tumelo. (Baheb. 11:27) Li akarelletsa video ea The Wonders of Creation Reveal God’s Glory, bukana ea Na Lintho Tse Phelang li Bōpiloe? le ea The Origin of Life—Five Questions Worth Asking, hammoho le buka ea Is There a Creator Who Cares About You? Hangata Tsoha! e hlahisa puisano eo mongoli a bileng le eona le bo-rasaense le batho ba bang ba hlalosang hore na ke’ng e entseng hore ba lumele hore Molimo o teng. Letoto la lihlooho le reng “Na e Entsoe?” le totobatsa boqapi bo hlollang boo re bo bonang linthong tsa tlhaho. Bo-rasaense ba lula ba leka ho etsisa boqapi bona bo babatsehang. w16.09 4:4, 5

Ba tšepahalang ba tlalehiloeng ho Baheberu khaolo ea 11 ba ile ba shoa pele “peō” e tšepisitsoeng, e leng Jesu Kreste a bulela batho tsela e eang leholimong. (Bagal. 3:16) Leha ho le joalo, ba tla tsosoa hore ba tl’o phela lefatšeng la paradeise e se e le batho ba phethahetseng. (Pes. 37:11; Esa. 26:19; Hos. 13:14) Ha Baheberu 11:13 e bua ka bahlanka ba Molimo ba boholo-holo, e re: “Ka tumelo bana kaofela ba ile ba shoa, le hoja ba sa ka ba fumana phethahatso ea litšepiso, empa ba ile ba li bonela hōle ’me ba li amohela.” E mong oa bona ke Abrahama. Na o ile a lula a hopola tebello e babatsehang ea ho phela a se a busoa ke “peō” e tšepisitsoeng? Jesu o ile a araba potso eo ka ho toba, ha a re ho bahanyetsi ba hae: “Abrahama o ile a thaba haholo ka tebello ea ho bona letsatsi la ka, ’me o ile a le bona ’me a thaba.” (Joh. 8:56) Sara, Isaka, Jakobo le ba bang ba bangata le bona ba ile ba lula ba behile tšepo ea bona ’Musong o tlang “oo sehahi le moetsi oa oona e leng Molimo.”​—Heb. 11:8-11. w16.10 3:4, 5

Re lokela ho leboha Jehova hore ebe o sebelisitse moea oa hae o halalelang ho re senolela ’nete le ho re nolofalletsa ho bontša tumelo. (Luka 10:21.) Re lokela ho mo leboha kamehla hore ebe o re huletse ho eena ka Mora oa hae, e leng “Moemeli ea ka Sehloohong le Mophethahatsi oa tumelo ea rōna.” (Baheb. 12:2) E le hore re bontše hore re ananela mosa ona o sa re tšoaneleng, re lokela ho lula re matlafatsa tumelo ea rona ka ho rapela le ho ithuta Lentsoe la Molimo. (1 Pet. 2:2.) Re lokela ho lula re bontša hore re na le tumelo litšepisong tsa Jehova. ’Me re etse sena ka tsela e tla totobala ho bohle. Mohlala, re lokela ho phatlalatsa ’Muso oa Molimo ’me re etse batho barutuoa. Re boetse re lokela ho sebetsa “se molemo ho bohle, empa haholo-holo ho ba amanang le rōna tumelong.” (Bagal. 6:10) Re ikitlaelletse ‘ho hlobola botho ba khale le litloaelo tsa bona.’—Bakol. 3:5, 8-10. w16.10 4:11, 12

Bokahohle bo hlophisehile ka tsela e babatsehang. Ka hona, ke ho utloahalang hore Jehova a lebelle hore barapeli ba hae ba hlophisehe. Ke kahoo Molimo a re fileng Bibele hore e re tataise. Bophelo bo ne bo tla ba bosula hoja ebe Molimo ha a re tataise ka mokhatlo oa hae le ka melao ea hae. Sechaba sa Iseraele ea boholo-holo se ne se hlophisehile. Mohlala, tlas’a Molao oa Moshe ho ne ho e-na le “makhabunyane a neng a etsa tšebeletso e hlophisitsoeng monyako oa tente ea pokano.” (Ex. 38:8) Hamorao, Morena Davida o ile a hlophisa Balevi le baprista, a ba arola ka lihlopha. (1 Likron. 23:1-6; 24:1-3) Phutheho ea lekholong la pele la lilemo e ne e hlophisehile ’me e tataisoa ke sehlopha se busang, seo qalong se neng se entsoe ka baapostola. (Lik. 6:1-6) Litho tsa sehlopha se busang sa lekholong la pele la lilemo le ba bang ba neng ba sebelisana le sona haufi-ufi, ba ile ba ngola mangolo ho fana ka keletso le litaelo.—1 Tim. 3:1-13; Tite 1:5-9. w16.11 2:3, 6, 8, 9

Ka 607 B.C.E. (e leng pele ho mehla ea Kreste), lebotho le matla la Babylona le neng le eteletsoe pele ke Morena Nebukadnezare oa II le ile la futuhela motse oa Jerusalema. Ha e bua ka tšollo ea mali e bileng teng, Bibele e re: “[Nebukadnezare o ile] a bolaea bahlankana ba bona ka sabole ka tlung ea sehalalelo sa bona, hape ha aa ka a qenehela mohlankana kapa moroetsana, ea tsofetseng kapa sekooa. . . . A chesa ntlo ea Molimo oa ’nete le ho heletsa lerako la Jerusalema; litora tsohle tsa eona tsa bolulo ba li chesa ka mollo le lintho tsohle tsa eona tse lakatsehang, e le hore ba bake tšenyo.” (2 Likron. 36:17, 19) E tlameha ebe baahi ba Jerusalema ha baa ka ba makala ha Jerusalema e timetsoa. Baprofeta ba Molimo ba ne ba qetile lilemo tse ngata ba ntse ba lemosa Bajuda hore haeba ba tsoela pele ho tlola Molao oa Molimo, Molimo o tla nehelana ka bona matsohong a Bababylona. Bajuda ba bangata ba ile ba bolaoa ka sabole; ’me baphonyohi ba qeta bophelo bohle ba le botlamuoeng Babylona. w16.11 4:1, 2

Sebe le lefu li ‘kene lefatšeng ka motho a le mong’ e leng Adama. Kahoo, “ka tšito ea motho a le mong lefu le ile la busa e le morena.” Pauluse o ile a phaella ka ho re, Molimo o ile a bonahatsa “bongata ba mosa o sa tšoanelang . . . , ka motho a le mong” e leng Jesu Kreste. (Bar. 5:12, 15, 17) Ka hona, mosa oo o sa tšoanelang oa Molimo o re tsoela molemo. Bibele e tsoela pele ho re: “Ka ho mamela ha motho a le mong [Jesu] ba bangata ba tla etsoa ba lokileng.” Ha e le hantle, ka mosa o sa tšoanelang oa Molimo re ka fumana “bophelo bo sa feleng ka Jesu Kreste.” (Bar. 5:19, 21) Jehova o ne a sa tlameha ho fana ka Mora oa hae hore e be thekollo. Empa o ile a re bontša hore o mosa ka hore a re pholose sebeng le lefung. Ha ho le ea mong oa rona ea tšoaneloang ke seo Molimo le Jesu ba re etselitseng sona. E se eka re ka bontša Jehova hore re ananela seo a re etselitseng sona ka tsela eo re phelang ka eona. w16.12 1:1, 6, 7

Ke hobane’ng ha re lokela ho itlhahloba? Pauluse o ile a re: “Ho beha kelello nameng ho bolela lefu.” (Bar. 8:6) Taba ena e tebile hobane kamano ea rona le Jehova e ka senyeha ’me ra lahleheloa ke tšepo ea ho phela ka ho sa feleng. Empa Pauluse o ne a sa bolele hore ha motho a qala a “beha kelello nameng,” joang kapa joang o tla shoa. Motho ea joalo a ka fetoha. Nahana ka monna e mong oa Korinthe ea ileng a phela tumellanong le “nama” ’me a qetella a khaotsoe. Leha ho le joalo hamorao o ile a fetoha. O ile a khaotsa ho phela tumellanong le nama ’me a boela a sebeletsa Jehova ka botšepehi. (2 Bakor. 2:6-8.) Haeba monna eo o ile a fetoha, hoa khoneha hore le Mokreste mehleng ena a fetohe. Kahoo, ho tseba hore ho “beha kelello nameng” ho ka senya kamano ea rona le Jehova, ho re susumelletsa hore re etse liphetoho leha e le life tse hlokahalang. w16.12 2:5, 12, 13

Ruri hoa re khothatsa ho lahlela ‘moroalo oa rōna ho Jehova,’ kaha rea tseba hore ‘o tla re tšehetsa’. Re ka kholiseha hore Molimo o tla re putsa ka lintho tse ngata ho feta ‘tseo re li kōpang kapa re li nahanang.’ (Baef. 3:20) E le hore Jehova a re putse, re lokela ho mo tšepa ka ho feletseng le ho mo mamela. Moshe o ile a re ho Baiseraele: “Jehova o tla le hlohonolofatsa naheng eo Jehova Molimo oa lōna a le fang eona e le lefa hore le e rue, haeba feela ruri le mamela lentsoe la Jehova Molimo oa lōna e le hore le ele hloko ho phetha litaelo tsena tsohle tseo ke le laelang tsona kajeno. Etsoe ruri Jehova Molimo oa lōna o tla le hlohonolofatsa feela joalokaha a le tšepisitse.” (Deut. 15:4-6) Na u na le tšepo e feletseng ea hore Jehova o tla u putsa ha u tsoela pele ho mo sebeletsa ka botšepehi? U na le mabaka a utloahalang a ho lumela seo. w16.12 4:8, 9

Jehova o ne a batla ho boloka tšepiso eo a ileng a e etsa ho motsoalle oa hae Abrahama. (Gen. 22:15-18) Ho feta moo, kamehla Jehova o sebelisa bolokolohi ba hae ka tsela e bontšang lerato le toka. Re bona sena tseleng eo a neng a khalemela Baiseraele ka eona ha ba ne ba furalla borapeli ba ’nete. Ha ba ikoahlaela liphoso tsa bona, Jehova o ne a ba bontša mohau. O ile a re: “Ke tla folisa ho se tšepahale ha bona. Ke tla ba rata ka boithatelo ba ka.” (Hos. 14:4) Ke mohlala o babatsehang hakaakang oa ho sebelisa bolokolohi ba ho ikhethela molemong oa ba bang. Ka lerato, Jehova o ile a khetha ho bopa mangeloi le batho ba e-na le bolokolohi ba ho ikhethela. Mora oa Molimo oa letsibolo, eo e leng “setšoantšo sa Molimo ea sa bonahaleng,” ke eena oa pele ea ileng a fuoa bolokolohi bona. (Bakol. 1:15) Le pele Jesu a tla lefatšeng, o ile a khetha ho tšepahalla Ntate oa hae, ho e-na le ho tšehetsa bofetoheli ba Satane. w17.01 2:3, 4

Ha maemo a rona a fetoha, a ka re nolofalletsa kapa a re thatafalletsa ho etsa lintho tse ling. Na u sa le mocha, kapa u se u holile? Na u phetse hantle ’meleng kapa oa kula? Jehova oa tseba hore na a ka re sebelisa joang ho latela maemo a rona. Ha aa lebella hore re etse seo re ke keng ra se khona, ebile o ananela seo re mo etsetsang sona. Jesu o ile a thabela likabelo tsohle tseo a ileng a li fuoa, ’me le rona re ka thabela tsa rona. (Liprov. 8:30, 31) Motho ea ikokobelitseng o khotsofalla litokelo le likabelo tseo a li fuoang ka phuthehong. Ha a khathatsehe ka ho fumana tse eketsehileng kapa hona ho khalla tsa ba bang. Ho e-na le hoo, o etsa sohle seo a ka se khonang hore a thabele litokelo tseo a li fuoeng, kaha o li talima li tsoa ho Jehova. O boetse o hlompha litokelo tseo Jehova a li fileng batho ba bang. Motho ea ikokobelitseng o hlompha ba bang, ebile o thabela ho ba tšehetsa.—Bar. 12:10. w17.01 3:13, 14

Ho ka etsahala hore ba bacha ba abeloe ho etella pele mosebetsi o itseng, moo ho nang le barab’abo rona ba holileng bao e leng khale ba o etsa. Ba bacha ba ka rua molemo haholo ha ba ka kopa keletso ho bona pele ba etsa liqeto. Timothea e mocha lilemong, o ile a sebetsa le moapostola Pauluse ka lilemo tse ngata. Pauluse o ile a ngolla Bakorinthe, a re: “Ke ka lebaka leo ke romelang Timothea ho lōna, kaha ke ngoana oa ka ea ratoang le ea tšepahalang Moreneng; o tla le hopotsa mekhoa ea ka mabapi le Kreste Jesu.” (1 Bakor. 4:17) Mantsoe ana a bontša hore Pauluse le Timothea ba ne ba sebelisana hammoho. Pauluse o ne a rutile Timothea mekhoa ea ho ruta. Timothea o ile a ithuta, ’me ke kahoo Pauluse a neng a mo rata a bile a kholisehile hore o tla hlokomela barab’abo ba Korinthe hantle hore ba be le kamano e ntle le Jehova. E se eka baholo ba ka etsisa mohlala ona ha ba ntse ba thusa ba bang hore ba etelle phutheho pele. w17.01 5:13, 14

Jehova ha a batle hore batho ba shoe, o rata ha ba phela. Kaha ke Mohloli oa bophelo, e tla ba ntate oa bohle ba tla tsosoa. (Pes. 36:9) Ke hantle hakaakang hore Jesu o ile a re ruta ho rapela “Ntat’a rōna ea maholimong.” (Mat. 6:9) Jehova o file Jesu boikarabelo ba bohlokoa ba ho tsosa bafu. (Joh. 6:40, 44) Paradeiseng, Jesu o tla phethahatsa boikarabelo ba hae ba hore e be “tsoho le bophelo.” (Joh. 11:25) Jehova o batla hore motho e mong le e mong e be karolo ea lelapa la hae. Jesu o re: “Mang kapa mang ea etsang thato ea Molimo, enoa ke mor’eso le morali’eso le ’Mè.” (Mar. 3:35) Molimo o batla hore “bongata bo boholo” bo tsoang lichabeng tsohle le melokong eohle le malemeng ’ohle e be barapeli ba hae. Bohle ba bontšang tumelo sehlabelong sa Kreste ’me ba etsa thato ea Molimo ba tla ba har’a ba hoeletsang ba re: “Poloko ea rōna e tsoa ho Molimo oa rōna, ea lutseng teroneng, le Konyana.”—Tšen. 7:9, 10. w17.02 2:10, 11

Liithuti tsa Bibele li ile tsa theha mokhatlo o bitsoang Zion’s Watch Tower Tract Society ka 1884 e le hore li phatlalatse ’nete ea Bibele ka lipuo tse sa tšoaneng. Mor’abo rona Russell e ile ea e-ba mopresidente oa oona. E ne e le seithuti se hloahloa sa Bibele ’me a sa tšabe ho pepesa lithuto tsa bohata tse kang thuto ea Boraro bo Teroneng le ea hore moea ha o shoe. O ile a lemoha hore Kreste o tla khutla ka tsela e sa bonahaleng le hore “linako tse behiloeng tsa lichaba” li ne li tla fela ka 1914. (Luka 21:24) Mor’abo rona Russell o ile a tela nako, matla le chelete ea hae a sa itšiele letho, e le hore a ka bolella batho molaetsa oa Bibele. Ho hlakile hore ka nako eo ea bohlokoa, Mor’abo rona Russell o ne a sebelisoa ke Jehova le Jesu. Mor’abo rona Russell o ne a sa batle hore batho ba mo rorise. Ka 1896 o ile a re: “Ha re batle tlotla kapa tlhompho e feteletseng bakeng sa rona le lingoliloeng tsa rona, ebile ha re batle ho bitsoa Baruti kapa Mesuoe. Hape ha re batle hore leha e le mang a bitsoe ka lebitso la rona.” Hamorao o ile a re: “Ona ha se mosebetsi oa batho.” w17.02 4:8, 9

Le rona re na le liqeto tseo re lokelang ho li etsa. Ha se liqeto tsohle tseo e leng tsa bohlokoa hoo li ka amang bophelo. Leha ho le joalo, boholo ba tsona li ka ama bophelo ba rona. Kahoo, haeba re khona ho etsa liqeto ka bohlale, re tla phela ka khotso ho e-na le ho phela bophelo bo tletseng pherekano le masoabi. Ke’ng e ka re thusang ho etsa liqeto ka bohlale? Re lokela ho tšepa Molimo. Re se ke ra belaella boikemisetso le bokhoni ba hae ba ho re thusa hore re etse liqeto ka bohlale. Re boetse re lokela ho tšepa Lentsoe la Jehova le tsela eo a etsang lintho ka eona. (Jak. 1:5-8) Ha re le metsoalle ea hae re bile re rata Lentsoe la hae, re tla tšepa tsela eo a shebang lintho ka eona. Ho ekelletsa moo, re tla tloaela ho batla keletso Lentsoeng la Molimo pele re etsa liqeto. w17.03 2:2, 3

Josafate o ile a etsisa ntata’e Asa, ka hore a itšetlehe ka Jehova le nakong eo lira li mo hlaselang. (2 Likron. 20:2-4) Josafate o ne a tšohile. Leha ho le joalo, o ile a ‘batla Jehova.’ Ka boikokobetso thapelong ea hae o ile a lumela hore ha ba na “matla ka pel’a bongata bona bo boholo,” ’me eena le batho ba hae ba ne ba sa tsebe seo ba ka se etsang. O ile a tšepa Jehova ka ho feletseng, ’me a bua mantsoe a hlahang temaneng ea kajeno. Ka linako tse ling le rona joaloka Josafate re ka ’na ra tšoha, ’me ebe ha re tsebe seo re lokelang ho se etsa. (2 Bakor. 4:8, 9) Empa hopola hore Josafate o ile a bontša phatlalatsa thapelong ea hae kamoo eena le batho ba hae ba ikutloang ba fokola kateng. (2 Likron. 20:5) Ba nang le boikarabelo ba ho hlokomela malapa a bona tumelong, ba ka etsisa Josafate ka ho kopa tataiso le matla ho Jehova ha ba hloka thuso bothateng bofe kapa bofe boo ba ka kopanang le bona. U se ke oa soabela hore lelapa la hao le utloe ha u kopa sena. Lelapa la hao le tla hlokomela hore u tšepa Jehova. Molimo o tla u thusa joalokaha a ile a thusa Josafate. w17.03 3:12, 13