July

Morali oa Jafeta o ile a tela ho ba le monna le bana e le hore a sebeletse Jehova. Re ka etsisa moea oa hae oa boitelo joang? Bacha ba bangata ba Bakreste ba khetha ho se kene lenyalong ’me banyalani ba bang ba khetha ho se be le bana, mohlomong ho fihlela ka nako e itseng. Hobane’ng? Hobane ba batla ho sebeletsa Jehova haholoanyane. Hape, Bakreste ba bangata ba holileng ba tela nako eo ba ka beng ba e qeta le bana ba bona le litloholo. Ho e-na le hoo, ba sebelisa nako le matla a bona tšebeletsong ea Jehova. Ba bang ba bona ba sebetsa libakeng tsa kaho kapa ba ea Sekolong sa Baevangeli ba ’Muso, e be ba ea liphuthehong tse hlokang bahoeletsi ba eketsehileng. Ba bang ba etsa litlhophiso tsa hore ba eketse tšebeletso ea bona. Jehova a ke ke a lebala mosebetsi oo bahlanka ba hae ba tšepahalang ba o entseng ka lerato. (Baheb. 6:10-12) Uena u tla etsa joang? Na u tla itela e le hore u sebeletse Jehova haholoanyane? w16.04 1:16, 17

Jesu o ile a ipapisa le molisa eaba o tšoantša balateli ba hae le mohlape oa linku. Nahana ka sena: Nka hore motho o na le linku tse hlano, tse peli li leralleng, tse ling tse peli li phuleng ’me e ’ngoe e itsamaela hlatheng, na u ne u ka re linku tseo ke mohlape? Che, hobane haeba e ne e le mohlape li ne li tla tsamaea ’moho ’me li latele molisa oa tsona. Ka tsela e tšoanang, ha rea lokela ho itšehla thajana ka ho se be teng libokeng. Ho e-na le hoo, re lokela ho bokana hammoho le barab’abo rona e le hore re ka ba “mohlape o le mong” o latelang ‘molisa a le mong.’ Liboka li re thusa ho ba lelapa le momahaneng. (Pes. 133:1) Balumeli-’moho le rona ba bang ba lahluoe ke ba malapa a habo bona. Empa Jesu o tšepisitse hore o tla ba fa lelapa le tla ba rata le ho ba hlokomela. (Mar. 10:29, 30) Haeba u ba teng kamehla libokeng, u ka phetha karolo ea ntate, ’mè, abuti, kapa ausi ho balumeli-’moho le uena. Ha re nahana ka sena re tla susumelletseha ho etsa sohle se matleng a rōna hore re be teng libokeng tsohle. w16.04 3:9, 10

Re rorisa Jehova ha re mo rapela, rea tšimong le ha re ea libokeng. Jehova a ke ke a amohela tšebeletso ea rona haeba re sa bope khotso le barab’abo rona. Re lokela ho tšoarela ba bang ha ba re sitetsoe, haeba re batla ho ba metsoalle ea Jehova. (Luka 11:4; Baef. 4:32) Jehova o batla hore bahlanka bohle ba hae ba tšoarelane ’me ba phelisane ka khotso. Re ka ipotsa: ‘Na ke potlakela ho tšoarela barab’eso? Na ke thabela ho ba le bona?’ Haeba u hlokomela hore u lokela ho ntlafatsa tabeng ea ho tšoarela, rapela Jehova ’me u mo kope hore a u thuse. Ntate oa rona ea leholimong o tla utloa thapelo eo, a be a e arabe.—1 Joh. 5:14, 15. w16.05 1:6, 7

Mosebetsi oo oa boboleli o tla tsoela pele halelele hakae? Jesu o ile a re litaba tse molemo li tla boleloa ho fihlela bofelo bo fihla. Lipaki Tsa Jehova li tsoela pele ho etsa mosebetsi ona ka mamello matsatsing ana a ho qetela, kaha Jehova o li tšehetsa ka moea oa hae o halalelang. Batho ba bang ba likereke ba ka ’na ba re: “Re na le moea o halalelang.” Empa na ba khona ho etsa mosebetsi oo Lipaki Tsa Jehova li o etsang matsatsing aa a ho qetela? (Lik. 1:8; 1 Pet. 4:14) Likereke tse ling li lekile ho re etsisa empa tsa hloleha. Tse ling li lekile ho o etsa ka nakoana feela. Batho ba bang bona ba ka ’na ba ea ka ntlo le ntlo, empa ha ba phatlalatse litaba tse molemo tsa ’Muso oa Molimo. Kahoo, ha ba etse mosebetsi oo Jesu a o qalileng. w16.05 2:13, 16

Moapostola Pauluse o ile a re ho Bakreste: “E le hore le lahle botho ba khale bo lumellanang le tsela ea lōna ea pele ea boitšoaro le bo ntseng bo bolisoa ho ea ka litakatso tsa bona tse thetsang; empa hore le nchafale matleng a susumetsang likelello tsa lona, le hore le apare botho bo bocha bo ileng ba bōptjoa ho ea ka thato ea Molimo ho lokeng ha ’nete le botšepehing.” (Baef. 4:22-24) Sena se bolela hore re lokela ho tsoela pele re ikitlaelletsa ho fetoha le ho ‘apara botho bo bocha.’ Ho sa tsotellehe hore na re na le lilemo tse kae re sebeletsa Jehova, re ntse re ka ithuta haholoanyane. Hape, Bibele e ka re thusa ho etsa liphetoho tse hlokahalang e le hore re be le kamano e haufi le Jehova. w16.05 4:8, 9

Re karolo ea phutheho ea Molimo. Ena ke tokisetso eo Jehova a e sebelisang ho re bopa. (Esa. 64:8) Re ikutloa re sireletsehile ha re le har’a batho ba Molimo le hoja re potolohiloe ke batho ba khopo. Re se re tseba hore Jehova ke Ntate oa rona ’me re thabela ho ratoa ke eena. (Jak. 4:8) Lefatšeng le lecha, re tla thabela ho ba karolo ea phutheho ena ea Molimo haholoanyane. Re tla boela re thabele ho phela paradeiseng tlas’a ’Muso oa Molimo. Ka nako eo, Jehova o tla tsoela pele ho re bopa le ho re ruta. (Esa. 11:9) Jehova o tla boela a etse hore re phethahale ’meleng le kelellong. Sena se tla re thusa ho utloisisa litaelo tsa hae le ho li latela ka ho feletseng. Kahoo, a re tsoeleng pele ho lumella Jehova hore a re bope ’me re lule re bontša hore re ananela tsela eo a re ratang ka eona. w16.06 1:8, 9

Ana ke a mang a mantsoe a ho qetela ao Moshe a a buileng ho sechaba sa Iseraele. Ka selemo sa 1473 pele ho mehla ea Kreste, sechaba se ne se le naheng ea Moabe, se le mothating oa ho tšela Noka ea Jordane ’me se kene Naheng e Tšepisitsoeng. (Deut. 6:1) Moshe o ile a etella pele sechaba sena ka lilemo tse 40, ’me o ne a batla hore se be sebete e le hore se ka tobana le maemo a boima a neng a larile kapele. Se ne se lokela ho tšepa Molimo oa sona Jehova le ho mo tšepahalla. Kahoo, mantsoe a qetellang a Moshe a ile a khothatsa Baiseraele haholo. Ka mor’a hore a ba bolelle Melao e Leshome le melao e meng ea Jehova, Moshe o ile a ba fa khopotso ena e tiileng eo re e balang ho Deuteronoma 6:4, 5. Baiseraele ba ne ba tseba hore Molimo oa bona ke “Jehova a le mong.” Baiseraele ba tšepahalang ba ne ba rapela Molimo a le mong, e leng Molimo oa baholo-holo ba bona. w16.06 3:2, 3

Jesu o ile a bua mantsoe ana ha a ntse a le lefatšeng. Empa ha Kreste a fihla leholimong, o ile a fuoa matla a hore a loantše lefatše la Satane. (Tšen. 19:11-16) Kahoo, hoa utloahala ho fihlela qeto ea hore hona joale Jesu oa tseba hore na Armagedone e tla tla neng. Empa rona ha re tsebe. Re lokela ho lula re lebetse ho fihlela matšoenyeho a maholo a qala. Ke khale Jehova a tseba hore na a tla tla neng. O behile nako eo bofelo bo tla tla ka eona. Oa tseba hore na ho setse nako e kae pele matšoenyeho a maholo a qala, ’me a tla tla ka nako e loketseng. (Hab. 2:1-3) Re tseba see joang? Lintho tseo Jehova a li buang li lula li etsahala ka nako eo a e behileng. Le rona re ka kholiseha hore tšepiso ea Jehova ea ho re sireletsa matšoenyehong a maholo e tla phethahala. Empa haeba re batla ho phonyoha timetso ea tsamaiso ena ea lintho, re lokela ho lula re lebetse. w16.07 2:4-6

Ka linako tse ling Petrose o ne a bua kapa a etsa lintho tse fosahetseng. Mohlala, Petrose o ile a re a ke ke a latola Jesu le ha ba bang ba ka mo latola. (Mar. 14:53, 54, 66-72) Empa ka mor’a hore Jesu a tšoaroe, baapostola

ho akarelletsa le Petrose ba ile ba baleha. ’Me Petrose a latola Jesu ka makhetlo a mararo. (Mar. 14:53, 54, 66-72) Ka mor’a moo, Petrose o ile a utloa bohloko haholo ka seo a se entseng. Kahoo, Jehova a mo tšoarela ’me a tsoela pele a mo sebelisa. Haeba u ne u le molateli oa Jesu ka nako eo, ’me u tseba seo Petrose a se entseng, na u ka be u ile ua tsoela pele ho tšepa Jehova? Le mehleng ena u tla hlokomela hore Jehova o mosa ’me e ka ’na eaba o emetse hore motho ea khaotsoeng a bake. Empa ka linako tse ling motho ea entseng sebe se tebileng a ka ’na a se ke a ikoahlaela seo a se entseng. Na u ka tšepa hore Jehova o tseba seo, ’me o tla nka khato ka nako e loketseng? Ha ho hlokahala a ka ba a tlosa motho eo ka phuthehong. Na oa lumela hore Jehova o tla lula a etsa se lokileng le se nepahetseng? w16.06 4:8, 9

Tlhohonolofatso e kholo eo re e fumanang ka lebaka la mosa o sa tšoanelang oa Jehova ke hore a re tšelise ha re robehile lipelo. (Pes. 51:17) Pauluse o ile a ngolla Bakreste ba Thessalonika ba neng ba hlorisoa, mantsoe a temana ea kajeno. Ka sebele hoa tšelisa ho tseba hore Jehova oa re hlokomela, ka lebaka la mosa oa hae. Kaha re baetsalibe, re ne re ke ke ra ba le tšepo ea ho phela ka ho sa feleng. (Pes. 49:7, 8) Empa Jehova o re fa tšepo eo e babatsehang. Jesu o ile a re ho balateli ba hae: “Ena ke thato ea Ntate, hore e mong le e mong ea bonang Mora le ea bontšang tumelo ho eena a be le bophelo bo sa feleng.” (Joh. 6:40) Molimo o re file mpho ea bophelo bo sa feleng ka lebaka la mosa oa hae o sa tšoanelang. Pauluse o ile a re: “Mosa o sa tšoanelang oa Molimo o tlisang poloko ho batho ba mefuta eohle o bonahalitsoe.”—Tite 2:11. w16.07 3:14, 15

Batho ba Jehova ha ba lumelle liketso tse joalo tsa bolotsana. Empa a re nke hore mora kapa morali oabo rona ea lenyalong o etsa bofebe, ’me ka mor’a moo o hlala molekane oa hae e le hore a nyalane le mosali kapa monna oa motho. Haeba mofosi a sa bake, o tla khaoloa e le hore phutheho e lule e hloekile. (1 Bakor. 5:11-13) O tla lokela ‘ho hlahisa litholoana tse tšoanelang pako’ pele a ka khutlisetsoa ka phuthehong. (Luka 3:8; 2 Bakor. 2:5-10) Ha hoa behoa nako ea hore na motho eo a ka khutlisetsoa neng. Leha ho le joalo, phutheho e ke ke ea hlokomoloha bolotsana bo joalo, le hoja bo etsahala seoelo har’a batho ba Molimo. Ho ka ’na ha nka nako, mohlomong selemo kapa ho feta hore mofosi a bontše hore o bakile e le kannete. Esita le haeba mofosi a ka khutlisetsoa ka phuthehong, o ntse a lokela ho ikarabella “ka pel’a setulo sa kahlolo sa Molimo.”—Bar. 14:10-12. w16.08 1:12, 13

Lentsoe la Segerike le fetoletsoeng e le ho “hahamalla” le bolela ho otlolla letsoho u nanabela ntho e hole le uena. Moapostola Pauluse o ile a sebelisa lentsoe leo ha a hatisa ntlha ea hore ho hatela pele moeeng ho hloka boiteko. Nahana ka mor’abo rona ea thuisang ka lipakane tsa hae ka phuthehong. E ka ’na eaba hona joale ha se mohlanka ea sebeletsang, empa oa lemoha hore o lokela ho finyella litšoaneleho tse hlokahalang. O qala ka ho hahamalla ho ba mohlanka ea sebeletsang. Ha nako e ntse e ea, o tšepa hore o tla tšoaneleha ho sebeletsa e le moholo. Maemong ana ka bobeli, o sebetsa ka thata ho finyella litšoaneleho tse hlokahalang e le hore a ka fuoa boikarabelo bo eketsehileng ka phuthehong. Ka tsela e tšoanang, bara le barali babo rona ba hahamallang ho ba bo-pula-maliboho, basebeletsi ba Bethele, kapa baithaopi ba sebetsang kahong ea Liholo Tsa ’Muso, ba sebetsa ka thata ho finyella lipakane tseo. w16.08 3:3, 4

U ka inahanela hore na Nehemia o ile a ikutloa joang ha a ea Jerusalema. Motse oo o ne o sa sireletseha, ’me Bajuda ba habo ba nyahame. Batho ba lichaba tse ling ba neng ba hanyetsa Bajuda ba ile ba etsa hore ba tepelle, ba khaotse ho tsosolosa marako a Jerusalema. Na Nehemia le eena o ile a lumella boemo boo hore bo mo nyahamise? Che! Ho tšoana le Moshe, Asa le bahlanka ba bang ba tšepahalang ba Jehova, Nehemia o ne a se a ntse a tloaetse ho itšetleha ka Jehova ka thapelo. (Ex. 17:8-13; 2 Likron. 14:8-13) O ile a etsa se tšoanang le lekhetlong lena. O ne a tobane le bothata boo Bajuda ba bang ba neng ba nahana hore ba ke ke ba bo hlola. Leha ho joalo Jehova o ile a araba thapelo ea Nehemia. Molimo o ile a sebelisa ‘matla a hae a maholo le letsoho la hae le matla’ ho matlafatsa Bajuda ba neng ba nyahame. (Neh. 2:17-20; 6:9) Na oa lumela hore Jehova o sebelisa ‘matla a hae a maholo le letsoho la hae le matla’ ho matlafatsa bahlanka ba hae mehleng ee? w16.09 1:9

Ka mor’a hore mongoli oa koranta e ’ngoe a bone baruti ba neng ba tlile sebokeng sa baruti, o ile a re: “Batho ba bangata ba ne ba ikaparetse feela, haholo-holo ha ho chesa. Sena se fapane le se etsahalang likopanong tsa Lipaki Tsa Jehova.” Ke ’nete hore hangata Lipaki Tsa Jehova lia babatsoa ka hore li apara ka tsela e “hlophehileng hantle, ka boitlhompho le ho hlaphoheloa kelellong . . . ka tsela e tšoanelang [batho] ba ipolelang hore ba fa Molimo tlhompho ea borapeli.” (1 Tim. 2:9, 10) Moapostola Pauluse o ne a bua ka basali empa molao-motheo ona oa sebetsa le ho banna ba Bakreste. Jehova o nka moaparo ka ho teba, ’me le bahlanka ba hae ba o nka ka tsela e tšoanang. (Gen. 3:21) Seo Mangolo a se buang ka moaparo se bontša ka ho hlaka hore ’Musi oa Bokahohle o batla hore barapeli ba hae ba ’nete ba apare ka tsela e hlomphehang. Kahoo, moaparo oa rona o lokela ho bontša hore re ela hloko hore na ’Musi oa Bokahohleng Jehova o batla’ng. w16.09 3:1, 2

Batho ba bang ba khethile ho ithuta boprofeta kapa histori e tlalehiloeng ka Bibeleng le ho fuputsa hore na litlaleho tsa Bibele li lumellana le seo baepolli ba lintho tsa khale le bo-rasaense ba se fumaneng kapa che. Boprofeta bo bong bo hlollang ke bo tlalehiloeng ho Genese 3:15. Temana eo e kenyelletsa taba e ka sehloohong eo ho buuoang ka eona ka Bibeleng, e leng ho tlosoa ha qoso bobusing ba Molimo le ho halaletsoa ha lebitso la hae. Temaneng eo ho sebelisitsoe puo ea tšoantšetso ho bontša kamoo Jehova a tlang ho felisa mathata ’ohle ao batho ba bileng le ’ona ho tloha Edene. U ka ’na ua ithuta boprofeta bo ho Genese 3:15 joang? Tsela e ’ngoe e ka ba ka ho etsa chate e bontšang tatellano ea liketsahalo. U ka thathamisa litemana tse bontšang kamoo Molimo a ’nileng a senola butle-butle kateng batho ba neng ba tla phethahatsa boprofeta boo le tsela eo bo neng bo tla phethahala ka eona. Ha ho pelaelo hore ha u bona kamoo litemana tsena li lumellanang kateng, u tla elelloa hore baprofeta le bangoli ba Bibele ba ne ba “khannoa ke moea o halalelang.” w16.09 4:8

Moapostola Petrose o ile a qeta nako a hloile batho bao e seng Bajuda, empa butle-butle o ile a loantša maikutlo a fosahetseng ao a neng a e-na le ’ona. (Lik. 10:28, 34, 35; Bagal. 2:11-14) Le rona haeba re hlokomela hore re na le lehloeo kapa khethollo e itseng ea morabe, re lokela ho ikitlaelletsa ho e ntša ka metso lipelong tsa rona. (1 Pet. 1:22.) Re lokela ho hopola hore kaofela ha rona re baetsalibe ’me ha ho ea tšoaneloang ke poloko, ho sa tsotellehe hore na ke oa morabe ofe. (Bar. 3:9, 10, 21-24) Joale ke hobane’ng ha re ka nka hore re phahametse ba bang? Re lokela ho ikutloa joaloka moapostola Pauluse, ea ileng a phehella Bakreste-’moho le eena ba tlotsitsoeng, a re: “Ha le sa le basele le bajaki, empa . . . le litho tsa ntlo ea Molimo.” (Baef. 2:19) Ho ikemisetsa ho se hloee batho ba litso tse ling ho tla re thusa ho apara botho bo bocha.—Bakol. 3:10, 11. w16.10 1:9

Jehova o re file Lentsoe la hae, e leng Bibele, ho re thusa hore re lule re le matla tumelong. E le hore re ‘thabe’ re be re ‘atlehe,’ re lokela ho bala Lentsoe la Molimo letsatsi le letsatsi haeba ho khoneha. (Pes. 1:1-3; Lik. 17:11.) Feela joaloka bahlanka ba Jehova ba boholo-holo, re lokela ho lula re thuisa ka litšepiso tsa Molimo ’me re mamele litaelo tsa hae. Jehova o boetse o re hlohonolofalitse ka nala ea lijo tsa moea tseo a re fang tsona ka “lekhoba le tšepahalang le le masene.” (Mat. 24:45) Kahoo, haeba re ananela litokisetso tseo Jehova a re etselitseng tsona, re tla tšoana le banna le basali ba boholo-holo ba neng ba e-na le “tebello e tiisitsoeng” ea hore ’Muso oa Molimo o tla busa. (Baheb. 11:1) Bahlanka ba Molimo ba boholo-holo ba ile ba boela ba thusoa ke thapelo hore ba lule ba le matla tumelong. Tumelo ea bona e ile ea tiea le ho feta ha Molimo a ntse a araba lithapelo tsa bona.—Neh. 1:4, 11; Pes. 34:4, 15, 17; Dan. 9:19-21. w16.10 3:7, 8

Jesu o ile a totobatsa hore ho rata Molimo ke habohlokoa ka ho fetisisa ha a araba potso e reng: “Taelo e khōlō ke efe Molaong?” (Mat. 22:35-40) Kaha bangoli ba Bibele ba ne ba tseba hore tumelo le lerato ke tsa bohlokoa, ba ile ba matahanya litšobotsi tsena ka makhetlo a ’maloa, hangata e bile e le polelong e le ’ngoe. Pauluse o ile a khothalletsa barab’abo hore ba “apare tšireletso ea sefuba ea tumelo le lerato.” (1 Bathes. 5:8) Johanne le eena o ile a re: “Ena ke taelo ea [Molimo], hore re be le tumelo lebitsong la Mora oa hae Jesu Kreste le hore re ratane.” (1 Joh. 3:23) Le hoja tumelo e le tšobotsi ea bohlokoa, ha re na ho e hloka ha litšepiso tsa Molimo li phethahala ’me lintho tseo re li lebeletseng li etsahala. Empa ho tla ’ne ho hlokahale hore re rate Molimo le baahelani ba rona. Ke kahoo, Pauluse a ileng a re: “Leha ho le joalo, ho sala tumelo, tšepo, lerato, tsena tse tharo; empa e khōlō ho tsona ke lerato.”—1 Bakor. 13:13. w16.10 4:15-17

Barab’abo rona ba neng ba etela liphutheho lebitsong la sehlopha se busang ba ile ba li bolella “melao-taelo e neng e etselitsoe qeto ke baapostola le banna ba baholo ba neng ba le Jerusalema.” (Lik. 16:4) Liphutheho li ile “tsa tsoela pele ho tiisoa tumelong le ho eketseha ka palo letsatsi le letsatsi” ha li mamela melao-taelo eo. Na ho na le seo re ka ithutang sona tlalehong ee ea Bibele? Re lokela ho etsa’ng ha mokhatlo oa Molimo o re fa tataiso kajeno? Jehova o re laela hore re mamele ’me re ikokobetse. (Deut. 30:16; Baheb. 13:7, 17) Ka mokhatlong oa Molimo ha hoa lokela hore ho be le batho ba nyatsa-nyatsang kapa ba nang le moea oa borabele, etsoe ba ka senya khotso le bonngoe ba phutheho. Ke ’nete hore ha ho Mokreste ea tšepahalang ea ka ratang ho bonahatsa moea o kang oa Diotrefe oa ho se hlomphe le ho se tšepahale. (3 Joh. 9, 10) U ka ’na ua ipotsa: ‘Na ke matlafatsa balumeli-’moho le ’na tumelong? Na ke potlakela ho amohela tataiso eo barab’abo rona ba etellang pele ba fanang ka eona esita le ho ba tšehetsa?’ w16.11 2:10, 11

Bajuda ba neng ba le botlamuoeng Babylona ba ileng ba ikokobelletsa thato ea Molimo, ba ile ba fuoa bolokolohi bo itseng. Bababylona ba ile ba ba lumella ho itsamaisetsa litaba tsa bona. Batlamuoa ba ne ba boetse ba e-na le bolokolohi ba ho ea hohle naheng eo. Babylona e ne e le setsi sa khoebo mehleng ea boholo-holo, ’me litokomane tse epolotsoeng li bontša hore Bajuda ba bangata ba ne ba reka ba bile ba rekisa, ha ba bang bona ba ne ba etsa mesebetsi ea matsoho. Bajuda ba bang ba ne ba bile ba ruile. Baiseraele ba neng ba le botlamuoeng Babylona ba ne ba fapane hole le ba neng ba le bokhobeng Egepeta. (Ex. 2:23-25) Na Baiseraele ba ne ba tla ke ba boele ba rapele Molimo ka tsela e amohelehang ka ho feletseng? Ka nako eo, ho ne ho sa bonahale eka seo se tla ke se etsahale. Bababylona ba ne ba sa lokolle batlamuoa ba bona. Jehova o ne a tšepisitse batho ba hae hore o tla ba lokolla, ’me ha fela ha e-ba joalo. Ha ho mohla litšepiso tsa Molimo li hlolehang ho phethahala.—Esa. 55:11. w16.11 4:3, 5

Ke joang mantsoe aa a neng a bua le Bakreste le hoja ba ne ba ntse ba phela? Molimo o ile a sebelisa sehlabelo sa thekollo ho Pauluse le Bakreste ba bang ba mehleng ea hae. Kahoo, a ba tšoarela libe, a ba tlotsa ka moea o halalelang, ’me a ba amohela e le bara ba hae ba moea. Ka hona, ba e-ba le tšepo ea ho phela leholimong. Haeba ba ne ba ka lula ba tšepahala ba ne ba tla busa le Kreste leholimong. Pauluse o ne a ka re ‘ba shoele mabapi le sebe’ le hoja ba ntse ba le lefatšeng. O ile a etsa mohlala ka Jesu ea ileng a shoa e le motho ’me a tsosoa e le sebopuoa sa moea se sa shoeng. Seo se bolela hore Jesu o ne a ke ke a hlola a shoa. Ka tsela e tšoanang, Bakreste ba tlotsitsoeng ba ne ba ‘shoele mabapi le sebe empa ba phela mabapi le Molimo ka Kreste Jesu.’ (Bar. 6:9, 11) Ba ne ba fetohile ka ho feletseng. Ba se ba sa laoloe ke litakatso tsa bona tsa boetsalibe. Ba shoele ka tsela ea tšoantšetso tseleng ea bona ea bophelo ea pele. w16.12 1:9, 10

Sena ha se bolele hore motho o nahana le ho bua feela ka Bibele, kamoo a ratang Molimo kateng le ka tšepo ea hae ka bokamoso. Re lokela ho hopola hore Pauluse le ba bang ba ileng ba khahlisa Molimo, ba ne ba ntse ba phela bophelo bo tloaelehileng. Ba ne ba ja, ba noa, ba nyala ’me ba hlokomela malapa a bona. (Mar. 6:3; 1 Bathes. 2:9) Leha ho le joalo, bahlanka bao ba Molimo, ha baa ka ba lumella lintho tseo hore ebe tsona tse tlang pele bophelong ba bona. Le hoja Pauluse a ne a etsa litente, ntho e tlang pele bophelong ba hae e ne e le ho bolela le ho ruta. (Lik. 18:2-4; 20:20, 21, 34, 35) Ke eona mesebetsi eo a neng a e khothalletsa balumeli-’moho le eena ba Roma. Ho sebeletsa Molimo e ne e le eona ntho ea bohlokoa bophelong ba Pauluse. Bakreste ba Roma ba ne lokela ho mo etsisa, le rona re lokela ho etsa se tšoanang.—Bar. 15:15, 16. w16.12 2:5, 15, 16

Re ka kholiseha hore Jehova o ananela boiteko boo re bo etsang ha re mo sebeletsa. O oa utloisisa hore re ka ’na ra halala kapa ra belaella seo re mo etsetsang sona. O re utloela bohloko haeba mathata a rona a lichelete, ho kula kapa tsela eo re ikutloang ka eona li sitisa borapeli ba rona. Re ka kholiseha hore Jehova o oa thaba ha a bona seo bahlanka ba hae ba se etsang e le hore ba lule ba tšepahala. (Baheb. 6:10, 11) Hopola hape hore re ka atamela ho Molimo “Ea Utloang thapelo” re kholisehile hore o tla re mamela. (Pes. 65:2) “Ntate oa mehauhelo e bonolo le Molimo oa matšeliso ’ohle” o tla re fa khothatso eo re e hlokang a be a re thuse hore re lule re e-na le kamano e ntle le eena, mohlomong a sebelisa balumeli-’moho. (2 Bakor. 1:3) Jehova oa thaba ha a bona hore re tsotella batho ba bang. (Mat. 6:3, 4) Hape o tšepisa hore o tla re putsa. w16.12 4:13, 14

Ha Jesu a ne a le lefatšeng, o ile a sebelisa bolokolohi ba ho ikhethela ho hanela liteko tsa Diabolose. (Mat. 4:10) Bosiung ba pele a bolaoa, Jesu o ile a rapela ka tieo, a bontša hore o ikemiselitse ho etsa thato ea Molimo. O ile a re: “Ntate, haeba u lakatsa, tlosa senoelo sena ho ’na. Leha ho le joalo, ho ke ho etsahale thato ea hao, eseng ea ka.” (Luka 22:42) E se eka re ka etsisa Jesu ka ho sebelisa bolokolohi ba rona ba ho ikhethela ho tlotlisa Jehova le ho etsa thato ea hae! Na re ka khona ho etsa seo? E, re ka khona ho etsisa mohlala oa Jesu, hobane le rona re entsoe ka setšoantšo sa Molimo. (Gen. 1:26) Leha ho le joalo, re behetsoe meeli. Ha re na bolokolohi bo lekanang le ba Jehova. Bibele e re Jehova o re behetse meeli e loketseng, ’me re lokela ho e hlompha. Ka mohlala, basali ba lokela ho ipeha tlas’a banna ba bona, le bana ba hlomphe batsoali.—Baef. 5:22; 6:1. w17.01 2:4, 5

Re phela linakong tse thabisang. Karolo e lefatšeng ea mokhatlo oa Jehova e ntse e hola, ’me kholo ena e etsa hore ho be le liphetoho. Haeba liphetoho tseo li re ama ka ho toba, e se eka re ka ikokobetsa ’me ra beha lithahasello tsa Jehova pele ho tsa rona. Seo se tla etsa hore re momahane. Ha Pauluse a ngolla Bakreste ba Roma, o ile a re: “Joalokaha ’meleng o le mong re e-na le litho tse ngata, empa e se litho tsohle tse nang le mosebetsi o tšoanang, kahoo rona, le hoja re le bangata, re ’mele o le mong bonngoeng le Kreste, empa ka bomong re litho tsa tse ling.” (Bar. 12:4, 5) Ho sa tsotellehe hore maemo a rona ke afe, e se eka bohle re ka tšehetsa lithahasello tsa ’Muso oa Jehova. Lona ba holileng, thusang bacha hore ba khone ho etsa mesebetsi eo le e etsang. Lona bacha, amohelang boikarabelo, le ikokobetse, ’me le bontše tlhompho ho ba holileng. Lona basali, etsisang mohlala oa Prisilla, ea ileng a lula a tšehetsa monna oa hae Akuila leha maemo a bona a ne a fetoha.—Lik. 18:2. w17.01 5:15, 16

Gideone o ile a itlhalosa hore ke motho oa boemo bo tlaase. Ka mor’a hore Gideone a amohele kabelo e tsoang ho Jehova, o ile a etsa bonnete ba hore o utloisisa seo a lokelang ho se etsa, ’me a itšetleha ka tataiso ea Jehova. (Baahl. 6:36-40) Gideone o ne a le matla, ebile a le sebete. Empa o ile a etsa lintho ka masene. (Baahl. 6:11, 27) Ha aa ka a sebelisa kabelo ea hae hore a iphumanele botumo. Ho e-na le hoo, ha a phethile kabelo eo Jehova a mo fileng eona, o ile a khutlela moo a tsoang teng. (Baahl. 8:22, 23, 29) Ho inyenyefatsa ha ho bolele hore re ke ke ra hahamalla ho fumana litokelo tse eketsehileng tsa tšebeletso, kapa ra li amohela. Mangolo a re khothalletsa hore re hatele pele. (1 Tim. 4:13-15) Empa na ho hlokahala hore re fumane kabelo e ncha e le hore re hatele pele? Che. Jehova a ka re thusa hore re hatele pele likabelong tseo re sebeletsang ho tsona hona joale. Re lokela ho tsoela pele ho ntlafatsa bokhoni boo Molimo a re fileng bona hore re etse mesebetsi e metle. w17.01 3:15, 16

Jehova o ile a itela haholo e le hore a fane ka thekollo. (1 Pet. 1:19) O ile a rata batho haholo hoo a ileng a tela Mora oa hae a le mong feela oa letsibolo hore a re shoele. Ka mantsoe a mang, Jesu o nketse Ntate oa rona oa pele Adama sebaka. (1 Bakor. 15:45) Ka ho etsa joalo, Jesu ha a re fe bophelo feela empa o re fa monyetla oa hore qetellong re boele re be karolo ea lelapa la Molimo. Ruri ka lebaka la sehlabelo sa Jesu, Jehova a ka amohela batho hape lelapeng la hae kantle le ho sekisetsa ho loka ha hae. Na ha ho thabise ho nahana ka nako eo bohle ba tšepahalang ba tla beng ba phethahetse? Ho tla ba le bonngoe karolong e leholimong le e lefatšeng ea lelapa la Molimo. Ka tsela eo, bohle re tla ba bana ba Molimo. (Bar. 8:21) Haeba re ananela thekollo re tla susumelletseha ho etsa sohle se matleng a rona ho thusa ba bang ho tseba hore le bona ba ka rua molemo mphong ena ea bohlokoa. w17.02 1:17, 19

Molula-Qhooa oa July 15, 2013 o ile oa hlalosa hore “lekhoba le tšepahalang le le masene” ke sehlopha se senyenyane sa barab’abo rona ba batlotsuoa. Barab’abo rona ba Sehlopha se Busang ba etsa liqeto tsa bohlokoa hammoho. Ba etsa seo joang? Ba kopana beke le beke ’me seo se ba thusa hore ba momahane. (Liprov. 20:18) Kaha ha ho na ea nkuoang a phahame ho feta ba bang, selemo le selemo ba lula ba fetola molula-setulo oa seboka. (1 Pet. 5:1) Likomiti tse tšeletseng tsa Sehlopha se Busang le tsona li etsa se tšoanang. E mong le e mong oa bona o inka e le karolo ea ‘bahlanka ba ntlo’ ba mamelang le ba rutoang ke lekhoba le tšepahalang, eseng moeta-pele. Barab’abo rona ba Sehlopha se Busang ha baa bululeloa ebile ha baa phethahala. Kahoo, le bona ba ka ’na ba etsa liphoso litabeng tse amanang le molaetsa oa Bibele kapa tsamaiso ea mokhatlo. w17.02 4:10-12

Tsela eo re ka bontšang ka eona hore re ananela thekollo ke ka ho inehela ho Jehova le ka ho bontša tumelo sehlabelong sa thekollo ’me re kolobetsoe. Ha re kolobetsoa re bontša hore “re ba Jehova.” (Bar. 14:8) Ntho e ’ngoe le e ’ngoe eo Jehova a e etsang e susumetsoa ke lerato, ’me o batla hore batho ba mo rapelang le bona ba be le lerato. (1 Joh. 4:8-11) Haeba re rata batho ba bang re tla be re bontša hore re batla ho ba “bara ba Ntat’a [rona] ea leng maholimong.” (Mat. 5:43-48) Taelo ea pele ke hore re rate Jehova ’me ea bobeli ke hore re rate batho ba bang. (Mat. 22:37-40) Tsela eo re ka bontšang hore re rata batho ba bang ka eona ke ka ho mamela taelo ea hore re bolele litaba tse molemo tsa ’Muso oa Molimo. Ha re rata batho ba bang, re bontša khanya ea Molimo. Ha e le hantle lerato la rona ho Molimo le tla etsoa “le phethahetseng ho rōna” haholo-holo ha re rata barab’abo rona.—1 Joh. 4:12, 20. w17.02 2:13, 14

U ka ’na oa nahana hore ho ne ho le bonolo ho etsa qeto eo, hobane oa tseba hore ho bohlokoa ho sebeletsa Jehova. Ha e le hantle, e ne e tla ba booatla ho sebeletsa Baale. Leha ho le joalo, Baiseraele bao ba ne ba ‘qeaqea . . . pakeng tsa maikutlo a mabeli a fapaneng.’ Ka bohlale, Elia o ile a ba khothalletsa hore ba rapele Jehova Molimo oa ’nete. Ke hobane’ng ha ho ne ho le thata hakaale hore Baiseraele ba etse qeto ka bohlale? Ntho ea pele, ba ile ba felloa ke tumelo ho Jehova ’me ba hana ho mamela Lentsoe la hae. Ba ne ba sa tšepe Jehova hobane ha baa ka ba ipha nako ea ho ithuta ka eena. Hoja ba ile ba etsa joalo, ba ka be ba ile ba etsa liqeto ka bohlale. (Pes. 25:12) Ho fesuew

ta moo, batho bao ba ile ba susumetsa Baiseraele hore ba etse lintho joaloka bona ’me ba rapele melimo ea bohata. Jehova o ne a ba lemositse khale hore ntho eo e tla etsahala.—Ex. 23:2. w17.03 2:6, 7

Ha u nahana ka mohlala oa Ezekiase, na u bona e ka ho na le ntho eo u tlamehang ho e tlosa e le hore e se ke ea senya kamano ea hao le Molimo? Ho hlakile hore ha re batle ho tšoana le batho ba lefatše lena ba sebelisang mecha ea puisano hampe, ’me ba nkela batho ba bang holimo. Ke ’nete, Bakreste ba bang ba ka bona ho le molemo ho sebelisa mecha ena ho buisana le metsoalle le litho tsa lelapa. Empa batho ba bang ba e sebelisa hampe ka ho buisana le batho bao ba sa ba tsebeng. Kapa ba qeta nako ba shebane le litšoantšo tsa batho kapa ba bala ka bona. Seo se ka senya nako e ngata haholo. Mokreste a ka ikhohomosa hobane batho ba rata lintho tseo a li behang mecheng eo ea puisano, hape a ka ’na a hloka thabo haeba ba sa li rate. Re ka ipotsa, ‘Na ke qoba ho nkela batho ba bang holimo le ho qeta nako e ngata ke etsa lintho tse se nang thuso?’—Baef. 5:15, 16. w17.03 3:14, 17