August

Ak’u nahane hore na masole a Baiseraele a neng a eteletsoe pele ke Moahloli Gideone a ne a loana ka thata a bile a khathetse hakae, ha a ntse a loantša lira tsa ’ona. Gideone le masole a hae ba ile ba qeta bosiu bohle ba lelekisa Bamidiane sebaka sa lik’hilomithara tse ka bang 32! Lira tsa Baiseraele li ne li ba hateletse ka nako e telele, empa Baiseraele ba ne ba sa ikemisetsa ho tela. Gideone le banna ba hae ba ile ba li lelekisa ho fihlela ba hlotse! (Baahl. 7:22; 8:4, 10, 28) Le rona re loana ntoa e thata le e khathatsang. Lira tsa rona ke Satane, lefatše la hae le ho se phethahale. Ba bang ba rona re qetile lilemo tse ngata re loantšana le lira tsena. Jehova o re thusitse ho hlola liteko tse ngata. Empa ntoa e ntse e e-s’o lale. Ka linako tse ling, re ka ’na ra khathala ke ho loana. Kapa re ka ’na ra khathala ho emela bofelo ba tsamaiso ena e khopo. Jesu o ile a re lemosa hore matsatsing a ho qetela re tla tobana le liteko tse matla le mahloriso. Empa o ile a boela a re haeba re mamella, re tla atleha.—Luka 21:19. w16.04 2:1, 2

Ha re le libokeng, re ithuta Bibele ’me Jehova o re ruta hore na re lokela ho etsa’ng le hore na re lokela ho phela joang. (Esa. 30:20, 21) Esita le batho bao re ba memelang ho tla libokeng baa hlokomela hore re tataisoa ke Jehova. (1 Bakor. 14:23-25) Jehova o tsamaisa liboka tsa rona a sebelisa moea o halalelang ’me seo re ithutang sona moo se tsoa ho eena. Kahoo ha re le libokeng, re mamela seo Jehova a se buang, re bona kamoo a re ratang kateng ’me re ba le kamano e ntle le eena. Jesu o ile a re: “Moo ho nang le ba babeli kapa ba bararo ba bokaneng ka lebitso la ka, ke teng moo har’a bona.” (Mat. 18:20) Jesu e leng eena Hlooho ea phutheho, ‘o tsamaea har’a’ liphutheho. (Tšen. 1:20–2:1) Ho totobetse hore Jehova le Jesu ba ba le rona libokeng ’me baa re matlafatsa. U nahana hore Jehova o ikutloa joang ha a bona hore u etsa sohle se matleng a hao hore u be le kamano e ntle le eena hammoho le Mora oa hae? w16.04 3:13, 14

Morali’abo rona o lumelisa barab’abo rona ba babeli. Empa mor’abo rona e mong o utloisoa bohloko ke tsela eo a mo lumelisitseng ka eona. Ha morali’abo rona a se a tsamaile, mor’abo rona ea utloileng bohloko o qala ho tletleba ka eena. Empa mor’abo rona e mong oa mo hopotsa hore morali eo oabo rona o sebelelitse Jehova ka botšepehi ka lilemo tse 40 ho sa tsotellehe mathata a ’nileng a mo hlahela. O ne a kholisehile hore morali eo oabo rona o ne a sa ikemisetsa ho mo khopisa. Mor’abo rona ea utloileng bohloko o ile a itšoara joang? O ile a re: “U bua ’nete.” Eaba o khetha ho lebala se etsahetseng. Taba ee e re ruta’ng? Ha motho e mong a re utloisa bohloko, re ka khetha hore na re itšoara joang. Motho ea lerato oa tšoarela. (Liprov. 10:12; 1 Pet. 4:8) Ha re “hlokomoloha tlōlo,” seo se thabisa Jehova. (Liprov. 19:11) Kahoo, nako e tlang ha motho e mong a bua kapa a etsa ntho e u utloisang bohloko, ipotse: ‘Na nka hlokomoloha tlolo ee? Na ehlile ke hloka ho lula ke nahana ka eona?’ w16.05 1:8, 9

Ke bo-mang ba bolelang litaba tse molemo tsa ’Muso mehleng ee? Ke Lipaki Tsa Jehova! Re tseba joang? Re tseba ka molaetsa o nepahetseng oo li o phatlalatsang, e leng litaba tse molemo tsa ’Muso. Li ea bathong, kahoo li sebelisa tsela e loketseng. Li bolela litaba tse molemo ka sepheo se nepahetseng kaha li rata Jehova le batho. Li bolela litaba tse molemo lefatšeng lohle kaha li pakela batho ba lichaba tsohle le ba lipuo tsohle. Kahoo, re tla tsoela pele ho bolela litaba tse molemo tsa ’Muso ho fihlela bofelo bo fihla! Ruri hoa hlolla ho bona mosebetsi o babatsehang oa ho bolela litaba tse molemo oo bahlanka ba Jehova ba o etsang matsatsing ana a ho qetela. Empa ke’ng e re thusang ho etsa mosebetsi oo? Moapostola Pauluse o fana ka karabo temaneng ea letsatsi ea kajeno. E se eka Jehova a ka tsoela pele ho re matlafatsa e le hore re ikitlaelletse ho bolela litaba tsena tse molemo!—2 Tim. 4:5. w16.05 2:17, 18

Ha re khetha ho mamela Jehova ’me re ikitlaelletsa ho etsa thato ea hae, re bontša hore rea mo rata re bile re batla ho mo khahlisa. Satane o re Jehova ha a na tokelo ea ho busa. Empa ha re mamela Jehova, re bontša hore re batla hore a re buse. Kahoo, re ka kholiseha hore Ntate oa rona ea lerato o ananela boiteko boo re bo etsang ba ho mo mamela. (Jobo 2:3-5; Liprov. 27:11) Ha re leka ka matla ho laola mefokolo ea rona le hoja ho le thata, re bontša hore re tšepahalla Jehova ’me re batla hore e be eena ’Musi oa rona. Jehova o re re lokela ho sebetsa ka thata e le hore re mo etsise. (2 Pet. 1:5-7; Bakol. 3:12.) O boetse o lebeletse hore re sebetse ka thata ho laola maikutlo a rona le seo re se nahanang. (Bar. 8:5) Kamehla rea thaba ha re sebelitse ka thata ’me re atlehile. w16.05 4:12, 13

Feela joalokaha motho ea bopang lintho a tseba hore na o sebelisa letsopa la mofuta ofe, Jehova le eena oa re tseba. O tseba mefokolo ea rona, matla a rona le liphetoho tseo re li entseng ’me o bopa e mong le e mong oa rona a nahanetse maemo a hae. (Pes. 103:10-14) Re ka ithuta hore na Jehova o re talima joang ka ho sheba hore na Jesu o ile a etsa’ng ha a bona mefokolo ea baapostola ba hae. Ka linako tse ling, baapostola ba ne ba phehisana khang ka hore na e moholo ke mang. Haeba u ne u le teng moo, u ne u tla talima tsela eo baapostola ba itšoarang ka eona joang? U ne u ka ’na oa nka hore ha se letsopa le bonolo. Leha ho le joalo, Jesu o ne a tseba hore ba ka bopeha haeba ba mamela likeletso tsa hae tse mosa ’me ba etsisa boikokobetso ba hae. (Mar. 9:33-37; 10:37, 41-45; Luka 22:24-27) Ka mor’a hore Jesu a tsosoe, baapostola ba ile ba fuoa moea o halalelang oa Molimo ’me ba khaotsa ho tšoenyeha ka hore na e moholo ke mang. Ho e-na le hoo, ba phathahana ka mosebetsi oo Jesu a ba fileng oona.—Lik. 5:42. w16.06 1:10

Jehova ke eena feela Molimo oa ’nete ’me ha ho molimo e mong ea tšoanang le eena. (2 Sam. 7:22) Ka hona, mantsoe a Moshe a ne a hopotsa Baiseraele hore ba lokela ho rapela Jehova feela. Ba ne ba sa lokela ho etsisa batho ba lichaba tse ba potolohileng, ba rapelang melimo e mengata ea bohata le melimotsana. Batho bao ba ne ba lumela hore melimo ea bona e ka khona ho laola lintho tsa tlhaho. Mohlala, Baegepeta ba ne ba rapela molimo oa letsatsi ea bitsoang Ra, molimotsana oa leholimo ea bitsoang Nut, molimo oa lefatše ea bitsoang Geb, molimo oa Nile ea bitsoang Hapi, hammoho le liphoofolo tse ngata. Jehova o ile a bontša hore o phahametse melimo eo ea bohata ha a ne a tlisa Likotlo Tse Leshome. Molimo ea ka sehloohong oa Bakanana e ne e le Baale, e leng molimo oa bohata eo Bakanana ba neng ba lumela hore ke eena ea fanang ka bophelo. Ba ne ba boetse ba lumela hore ke eena molimo oa leholimo, pula le sefefo. Batho ba libakeng tse ngata ba ne ba tšepile Baale hore o tla ba sireletsa. (Num. 25:3) Baiseraele ba ne ba lokela ho hopola hore Molimo oa bona ke “Molimo oa ’nete,” ’me oa ikhetha. Ke “Jehova a le mong.”—Deut. 4:35, 39. w16.06 3:4, 5

Mohlala oa Jesu o re ruta hore re lokela ho tšepahalla Jehova le batho ba hae. Ke habohlokoa hore re etse joalo. Rea hlokomela hore Jehova o tataisa bahlanka ba hae matsatsing ana a ho qetela. O ba thusa ho bolela litaba tse molemo lefatšeng lohle ’me ke bona feela ba etsang mosebetsi ona. Ba boetse ba momahane ba bile ba thabile ka lebaka la lintho tsohle tseo Jehova a ba rutang tsona. Ho Esaia 65:14, Jehova o re: “Bonang! Bahlanka ba ka ba tla hoeletsa ka thabo ka lebaka la boemo bo botle ba pelo.” Ka sebele rea thaba hore ebe Jehova oa re tataisa ’me o re thusa ho etsa lintho tse ngata tse ntle. Ka lehlakoreng le leng, batho ba lefatšeng la Satane ha baa thaba ebile ha ba na tšepo ka bokamoso. Kahoo, re lokela ho lula re tšepahala ho Jehova ’me re latele tataiso ea hae. w16.06 4:10-12

Se neng se etsahala mehleng ea boholo-holo se bontša bohlokoa ba ho lula re lebetse. Mehleng eo, metse e meholo joaloka Jerusalema, e ne e pota-potiloe ke marako a phahameng. Marako ao a ne a sireletsa motse ho ba lireng ebile e le tora ea balebeli. Ba ne ba ema moo bosiu le motšehare, ha ba bang ba eme lihekeng tsa motse. Ba ne ba lemosa baahi ka boemo leha e le bofe bo kotsi bo ka ’nang ba e-ba teng. (Esa. 62:6) E ne e le taba ea lefu le bophelo, kahoo balebeli ba ne ba lokela ho lula ba falimehile likabelong tsa bona. (Ezek. 33:6) Rahistori oa Mojuda ea bitsoang Josephus o re ka selemo sa 70, mabotho a Roma a ile a hapa Tora ea Antonia e neng e haheletsoe marakong a motse oa Jerusalema hobane balebeli ba ne ba robetse. Ka mor’a moo, Baroma ba ile ba ea tempeleng ’me ba e chesa, e leng se ileng sa etsa hore Jerusalema ho be le matšoenyeho a maholo ao Bajuda ba neng ba e-s’o ka ba a bona. w16.07 2:2, 7, 8

Le hoja re fumana litlhohonolofatso tse ngata ka lebaka la mosa o sa tšoanelang oa Jehova, ha rea lokela ho nahana hore o lumella boitšoaro bo bong le bo bong. Har’a Bakreste ba pele, ho na le ba bang ba ileng ba leka ‘ho fetola mosa o sa tšoanelang oa Molimo oa rōna boikemelo bakeng sa boitšoaro bo hlephileng.’ (Juda 4) Mohlomong Bakreste bana ba sa tšepahaleng ba ne ba nahana hore ba ka etsa sebe ka boomo, ba tšepile hore Jehova o tla ba tšoarela. Ho hobe le ho feta, ba ne ba leka ho susumetsa barab’abo bona ba bang hore ba etse liketso tse mpe. Le mehleng ena, motho ea etsang sebe ka boomo ‘o halefisa moea oa mosa o sa tšoanelang.’ (Baheb. 10:29) Satane o entse hore Bakreste ba bang ba nahane hore ba ka sebelisa mohau oa Molimo hampe ka hore ba etse sebe ebe ha ba fuoe kotlo. Le hoja Jehova a ikemiselitse ho tšoarela baetsalibe ba bakang, o lebeletse hore re loantše tšekamelo ea rona ea boetsalibe. w16.07 3:16, 17

Ho hlala ka molao empa molekane e mong a sa etsa bofebe ha ho lokolle motho hore a boele a nyale. Ke ’nete hore motho a ka ’na a khetha ho tšoarela molekane ea entseng bofebe haeba a bakile, joalokaha moprofeta Hosea a ile a tšoarela mosali oa hae Gomere ea neng a itšoere hampe. Jehova le eena o ile a tšoarela Baiseraele ba bakileng ka mor’a hore ba etse bofebe ba moea. (Hos. 3:1-5) Empa haeba motho a tseba hore molekane oa hae o entse bofebe ’me ka mor’a moo a khetha ho kopanela liphate le eena, seo se bontša hore o mo tšoaretse ’me ha a sa na lebaka la Mangolo la ho mo hlala. Ka mor’a hore Jesu a bue mantsoe a temaneng ea kajeno, o ile a bua ka “ba nang le mpho” ea ho lula e le masoha. A phaella ka ho re: “Ea ka e etsetsang sebaka a ke a e etsetse sebaka.” (Mat. 19:10-12) Ba bangata ba khethile ho lula e le masoha e le hore ba sebeletse Jehova ba se na litšitiso. Kahoo, rea ba babatsa. w16.08 1:15, 16

Bacha ba na le matla a hlokahalang e le hore ba ka khatha tema e kholo tšebeletsong ea Jehova. (Liprov. 20:29) Ba bang ba barab’abo rona ba Bethele ba ntseng ba le bacha, ba sebetsa moo ho hatisoang limakasine le moo ho kopanngoang Libibele le libuka tse thehiloeng Bibeleng. Bacha ba bangata ba kenya letsoho ha ho hahoa le ha ho lokisoa Liholo Tsa ’Muso. Ha ho e-na le likoluoa, bacha ba bangata ba thusa bara le barali babo rona ba nang le litsebo ho phallela ba hlokang. Hape, bacha ba bangata ba bo-pula-maliboho ba pakela batho ba linaheng tsa habo bona le ba buang lipuo tse ling. Mopesaleme o ile a bina a re: “Ha e le ba batlang Jehova, ba ke ke ba haelloa ke letho le molemo.” (Pes. 34:10) Ka sebele, Jehova a ke ke a soetsa ba mo sebeletsang ka cheseho. Re khona ‘ho latsoa le ho bona hore Jehova o molemo,’ ha re ntse re etsa sohle seo re ka se khonang tšebeletsong ea hae. Hape, re thaba haholo ha re sebeletsa Molimo ka pelo eohle. w16.08 3:5, 8

Jehova a ka khona ho re matlafatsa ka moea oa hae o halalelang ’me o ikemiselitse ho etsa seo. (1 Likron. 29:12) Re lokela ho latela tataiso ea moea o halalelang e le hore re loantšane le bothata leha e le bofe boo Satane le tsamaiso ea hae a re tlisetsang bona. (Pes. 18:39; 1 Bakor. 10:13) Hape, re lokela ho ananela Lentsoe la Molimo, le bululetsoeng ka moea o halalelang. Nahana ka lijo tsa moea tse thehiloeng Bibeleng tseo re li fumanang khoeli le khoeli. Mantsoe a ho Zakaria 8:9, 13 a builoe ha tempele e Jerusalema e ntse e tsosolosoa ’me aa sebetsa le ho rona kajeno. Re boetse re matlafatsoa ke thuto ea bomolimo eo re e fumanang libokeng, likopanong le likolong tsa puso ea Molimo. Koetliso eo e ka re thusa hore re be le boikutlo bo loketseng, re ipehele lipakane tsa tšebeletso le ho phetha boikarabello ba rona ba Bokreste. (Pes. 119:32) Na u leka ho fumana koetliso eo e le hore u imatlafatse? w16.09 1:10, 11

Molao oo Molimo a neng a o file Baiseraele o ne o bontša ka ho hlaka hore na Jehova o ikutloa joang ka liaparo tse sa bontšeng hore na motho ke monna kapa ke mosali. (Deut. 22:5) Kahoo, re bona ka ho hlaka hore Molimo ha a thabele liaparo tsa banna tse kang ke tsa basali le tse etsang hore basali ba shebahale eka ke banna, kapa tse etsang hore ho be thata ho bona hore na motho ke monna kapa ke mosali. Ka Lentsoeng la Molimo ho na le melao-motheo e ka thusang Mokreste ho etsa qeto e nepahetseng mabapi le moaparo. E ka mo thusa ho sa tsotellehe hore na o phela hokae, tloaelo ea moo ke efe kapa hore na boemo ba leholimo bo joang. Ha re hloke letoto la melao e bontšang hore na ke liaparo life tse loketseng le hore na ke life tse sa lokelang. Ho e-na le hoo, re tataisoa ke melao-motheo ea Mangolo e re fang bolokolohi ba ho ikhethela.w16.09 3:3, 4

Nahana kamoo bangoli ba Bibele ba bontšitseng sebete le botšepehi kateng. Bangoli ba bangata ba boholo-holo ba phafa baeta-pele ba bona le ho tlotlisa linaha tsa habo bona. Empa baprofeta ba Jehova ba ne ba bua ’nete kamehla. Ba ile ba ithaopela ho bolela liphoso tsa sechaba sa habo bona, esita le tsa marena a bona. (2 Likron. 16:9, 10; 24:18-22) Ba ile ba bolela esita le liphoso tseo bona ba li entseng le tsa bahlanka ba bang ba Molimo. (2 Sam. 12:1-14) Ka lebaka la melao-motheo e fumanoang ka ho eona, ba bangata ba kholisehile hore e bululetsoe ke Molimo. (Pes 19:7-11) Melao-motheo ea Bibele e re qobisa borapeli ba bohata ebile e re lokolla litumela-khoeleng tse entseng ba bangata makhoba. (Pes. 115:3-8) Thuto ea hore lintho li iphetotse e tlotlisa matla a tlhaho, e a fa tlhompho e lokelang ho lebisoa ho Jehova feela. Batho ba reng Molimo ha a eo, ba bolela hore bokamoso ba rona bo liatleng tsa rona. Ha ba na tšepo ea hore lintho li tla ntlafala nakong e tlang.—Pes. 146:3, 4. w16.09 4:10, 11

Puisano eo Boaze a bileng le eona le Ruthe e bontša ka ho hlaka hore o ne a amehile ka eena le ka maemo ao a ka ’nang a tobana le ’ona hobane e le molichaba. Har’a tse ling, o ile a mo bolella hore a tsamaee le baroetsana ba bang e le hore bahlankana ba sebetsang tšimong eo ba se ke ba mo tšoenya. O ile a netefatsa hore le eena o fumana lijo, feela joaloka bahiruoa ba hae. Ho phaella moo, Boaze ha aa ka a mo nyenyefatsa. Ho e-na le hoo o ile a mo khothatsa. (Ruthe 2:8-10, 13, 14) Boaze ha aa ka a khahloa feela ke hore Ruthe o rata ’m’ae matsale, Naomi, empa o ile a boela a khahloa ke hore e se e le morapeli oa Jehova. Ha e le hantle, tsela e mosa eo Boaze a ileng a mo tšoara ka eona e ne e bontša lerato le matla leo Jehova a neng a e-na le lona ho mosali eo ea neng a tlile ho tla ‘batla setšabelo tlas’a mapheo a Molimo oa Iseraele.’ (Ruthe 2:12, 20; Liprov. 19:17) Le kajeno, tsela e mosa eo re tšoarang balichaba ka eona e ka thusa “batho ba mefuta eohle” hore ba amohele ’nete ’me ba lemohe hore Jehova oa ba rata.—1 Tim. 2:3, 4. w16.10 1:10-12

Le rona re ka bolella Jehova lintho tse re tšoenyang, re kholisehile hore o tla re utloa ’me a re fe matla a ho mamella ka thabo. Tumelo ea rona e tla tiea le ho feta ha lithapelo tsa rona li ntse li arajoa. (1 Joh. 5:14, 15) Kaha tumelo ke karolo e ’ngoe ea tholoana ea moea, re lokela ho lula re kopa Molimo hore a re fe moea oa hae, joalokaha Jesu a re khothallelitse. (Luka 11:9, 13) Empa ha rea lokela ho rapela ha re kopa Molimo hore a re thuse ka ntho e itseng feela. Ho na le lintho tse ngata tse babatsehang tseo re ka lebohang Jehova le ho mo rorisa ka tsona letsatsi le letsatsi! (Pes. 40:5) Lithapelo tsa rona li lokela ho bontša hore re nahana ka balumeli-’moho le rona ba litlamong, ‘joalokaha eka re tlamiloe le bona.’ Re boetse re lokela ho rapella barab’abo rona lefatšeng ka bophara, haholo-holo “ba etellang pele har’a [rōna].” Rea hlolloa ha re bona kamoo Jehova a arabang lithapelo tsa rona kateng!—Baheb. 13:3, 7. w16.10 3:8, 9

Mehleng ena, bahlanka ba Jehova ba ’nile ba bontša hore ba na le tumelo ’Musong oa Molimo o hlonngoeng. Sena se entse hore ba momahane lefatšeng lohle, le hoja ba le ka holimo ho limilione tse robeli. Ke litho tsa mokhatlo o bonahatsang tholoana ea moea oa Molimo. (Bagal. 5:22, 23) Jehova o re hlohonolofalitse hakaakang ka lebaka la ho ba le tumelo le lerato la Bokreste! Ha ho motho ea ka etsang sena, haese Jehova feela. Mosebetsi ona o babatsehang oa Jehova “e tla ba ntho e tsebahalang [le] pontšo e ke keng ea felisoa ho isa nakong e sa lekanyetsoang.” (Esa. 55:13) Mokhatlo oa rona o momahaneng o tla tsoela pele ho hola le ho atleha ho fihlela lefatše lohle le tletse batho ba phethahetseng, ba lokileng le ba thabileng thorisong ea lebitso la Jehova. E se eka re ka tsoela pele re e-na le tumelo litšepisong tsa Jehova. w16.10 4:18, 19

Re lokela ho latela tataiso ea baholo e thehiloeng Bibeleng. Nahana ka keletso eo Pauluse a ileng a fana ka eona mabapi le ba sa laoleheng ka phuthehong. Ba bang ba ne “ba kena-kenana le se sa ba ameng.” Baholo ba ne ba ba elelitse empa ba khethile ho hlokomoloha keletso ea bona. Phutheho e ne e lokela ho etsa’ng ka batho ba joalo? Pauluse o ile a re: “Le lule le mo tšoaile, le khaotse ho tloaelana le eena.” Empa o ile a boela a ba eletsa hore ba se ke ba nka motho eo e le sera. (2 Bathes. 3:11-15) Kajeno, baholo ba ka ’na ba fana ka puo ho lemosa motho hore tsela eo a etsang lintho ka eona e senya phutheho lebitso, joaloka ho ratana le motho ea sa lumelang. (1 Bakor. 7:39) U itšoara joang ha baholo ba nka qeto ea ho fana ka puo eo? Haeba u tseba lebaka le etsang hore ho fanoe ka puo eo, na u tla qoba ho tloaelana le motho ea amehang tabeng eo? Ho bontša motho eo kameho e lerato le ho tiea ho ka ’na ha mo susumeletsa hore a tlohele tsela e sa laoleheng.w16.11 2:13

Ka Pentekonta ea 33 C.E., Bajuda ba likete le basokolohi ba ile ba tlotsoa ka moea o halalelang. Bakreste bana ba ile ba fetoha “morabe o khethiloeng, baprista ba marena, sechaba se halalelang, batho bakeng sa letlotlo le khethehileng.” (1 Pet. 2:9, 10) Ha baapostola ba ntse ba le teng, ba ne ba hlokometse batho ba Molimo. Empa ka mor’a lefu la bona, ho ile ha hlaha batho ba buang “lintho tse sothehileng” e le hore “ba ikhulele barutuoa ka mor’a bona.” (2 Bathes. 2:6-8) Ba bang ba bona ba ne ba e-na le boikarabello ka phuthehong, e le baholo ’me hamorao ea e-ba “babishopo.” Ho ile ha qaleha sehlopha sa baruti, le hoja Jesu a ne a itse ho balateli ba hae: “Bohle le bara ba motho.” (Mat. 23:8) Banna ba hlaheletseng ba neng ba nkehile ke lifilosofi tsa Aristotle le Plato ba ile ba buella likhopolo tse fosahetseng tsa bolumeli, ’me butle-butle tsa nkela lithuto tse nepahetseng tsa Lentsoe la Molimo sebaka. w16.11 4:8

Pele re e-ba Bakreste, ho ka etsahala hore ebe re entse lintho tse ngata tse mpe, re sa elelloe hore na Molimo o ikutloa joang ka tsona. Re ne re le joaloka “makhoba a ho se hloeke le a tlōlo ea molao.” Ho ka boleloa hore re ne re le “makhoba a sebe.” (Bar. 6:19, 20) Empa re ile ra ithuta ’nete ea Bibele, ra fetola bophelo ba rona, ra inehela ho Molimo ’me ra kolobetsoa. Re ile ra “lokolloa sebeng,” ’me ra fetoha “makhoba a ho loka.” (Bar. 6:17, 18) Empa re ka ‘tlohela sebe hore se tsoele pele se re busa’ ka ho etsa ntho efe kapa efe eo ’mele ea rona e sa phethahalang e re susumeletsang ho e etsa. Kaha ho ka etsahala hore re lumelle kapa re hanele sebe hore se re buse, re lokela ho ipotsa lipotso tse latelang: Ke’ng seo ke hlileng ke se labalabelang? Na ke lumella litakatso tsa ka hore li ntšusumelletse ho etsa se fosahetseng? Kapa na ke shoele mabapi le sebe? Sena se itšetlehile ka hore na re ananela hakae mosa oo Molimo a re bontšitseng ’ona ka ho re tšoarela libe.w16.12 1:11, 12

Re ka ba le khotso le ba malapa a rona le batho ba ka phuthehong. Rea utloisisa hore rona le balumeli-’moho le rona ha rea phethahala. Kahoo, ka linako tse ling mathata a ka hlaha ’me ha a se a le teng, re latela keletso ea Jesu e reng: “Etsa khotso le mor’eno.” (Mat. 5:24) Re nolofalloa ke ho bopa khotso hobane rea tseba hore Mokreste-’moho le rona o sebeletsa “Molimo ea fanang ka khotso.” (Bar. 15:33; 16:20) Kaha re “beha kelello moeeng,” re boetse re na le khotso le ’Mopi oa rona. Mantsoe a Esaia a sebetsang haholo ho rona hona joale, a re: “Ea pelo e tiileng u tla ’moloka khotsong e fetisisang, kahobane o u tšepile.”—Esa. 26:3, Bibele ea Sesotho; Bar. 5:1. w16.12 2:5, 18, 19

Le matsatsing ana a thata a laoloang ke Satane, Jehova o ntse a tsoela pele ho hlohonolofatsa bahlanka ba hae. O etsa bonnete ba hore Bakreste ba ’nete ba fumana khotso eo ho seng ntho leha e le efe e ka lekanngoang le eona. (Esa. 54:13) Joalokaha Jesu a tšepisitse, kajeno Jehova o re hlohonolofalitse ka hore ebe re karolo ea lelapa le lerato la bara ba motho ba lefatšeng ka bophara. (Mar. 10:29, 30) Ho feta moo, batho bohle ba batlang Molimo ka tieo ba hlohonolofalitsoe ka ho ba le khotso le thabo. (Bafil. 4:5-7) U ka kholiseha hore ‘ka mor’a ho etsa thato ea Molimo, u tla amohela phethahatso ea tšepiso.’ (Baheb. 10:35, 36) Kahoo, a re tsoeleng pele re matlafatsa tumelo ea rona le ho sebeletsa Jehova ka pelo eohle. Re ka etsa sena re hopola hore ka nako e tšoanetseng Jehova o tla re putsa.—Bakol. 3:23, 24. w16.12 4:17, 20

Na re ka re bolokolohi ba rona ke ba sebele empa re behetsoe meeli? E, ho joalo! Ke hobane’ng ha re cho joalo? Meeli eo re e behetsoeng e ka re sireletsa. Ka mohlala, re ka ’na ra etsa qeto ea ho etela sebakeng se seng ka koloi. Empa na u ne u tla ikutloa u sireletsehile haeba ho ne ho sa behoa melao ea tsela, motho e mong le e mong a khanna ka lebelo leo a le batlang, a bile a khanna ka lehlakoreng la tsela le ratoang ke eena? Le letho! Ho hlokahala meeli e le hore kaofela re thabele bolokolohi ba sebele. E le hore re utloisise ka ho eketsehileng hore na ke hobane’ng ha e le habohlokoa ho hlompha meeli eo Jehova a e behileng, nahana ka Adama. O ile a khetha ho tlola meeli eo Molimo a mo behetseng eona ka hore a je tholoana e hanetsoeng. Ho sebelisa bolokolohi ba ho ikhethela ka tsela ena e mpe ho ile ha fella ka bohloko le mahlomola ho Adama le bana ba hae. (Bar. 5:12) Liphello tse bohloko tseo Adama a ileng a li fumana li lokela ho re susumeletsa ho hlompha meeli ea Jehova ha re etsa liqeto.w17.01 2:6, 8

Haeba re fuoa kabelo e ncha, ho kopa tataiso ea Jehova ka thapelo le ho hlahlobisisa maemo hantle ho tla re thusa hore re qobe ho ikimetsa. Motho ea ikokobelitseng a ke ke a lumela ntho e ’ngoe le e ’ngoe. Empa haeba re amohela kabelo e ncha, mohlala oa Gideone o lokela ho re hopotsa hore re ke ke ra atleha ntle ho tlhohonolofatso le tataiso ea Jehova. Ho feta moo, Bibele e re mema hore ‘re inyenyefatse ha re tsamaea le Molimo oa rona.’ (Mik. 6:8) Kahoo, nako le nako ha re amohela kabelo e ncha, re lokela ho nahana ka hloko ka seo Jehova a re bolellang sona a sebelisa Bibele le mokhatlo oa hae. Re lokela ho lokisa monahano oa rona e le hore o lumellane le oa Jehova. A re hopoleng hore ha se ka matla a rona re khonang ho finyella lintho tse itseng, empa Jehova ke eena ea re phahamisang ka lebaka la boikokobetso ba hae. (Pes. 18:35) Ho tsamaea le Molimo ka boinyenyefatso ho tla re thusa hore re se ke ra inkela holimo kapa ra inkela tlaase haholo. w17.01 3:17, 18

Jesu o ne a tseba hore tšebeletso ea hae ea lefatšeng e ne e tla fela le hore ba bang ba ne ba tla tsoela pele ba etsa mosebetsi oo oa hae. Le hoja barutuoa ba hae ba ne ba sa phethahala, o ne a ba tšepa ’me a ba bolella hore ba tla etsa mesebetsi e meholo ho ea hae. (Joh. 14:12) O ile a ba koetlisa hantle ’me ba ile ba hasa litaba tse molemo lefatšeng lohle la mehleng eo. (Bakol. 1:23) Ka mor’a lefu la hae, Jesu o ile a tsosetsoa leholimong moo a ileng a fuoa mosebetsi o eketsehileng le matla a “ka holimo haholo ho ’muso le bolaoli le matla le borena bo bong le bo bong.” (Baef. 1:19-21) Haeba re ka shoa re tšepahala pele ho Armagedone, re tla tsosoa e le hore re tl’o phela lefatšeng le lecha le lokileng, moo re tlang ho thabela mosebetsi o mongata o khotsofatsang le o thabisang. Empa hona joale, mosebetsi oa bohlokoa ka ho fetisisa oo re ka o etsang ke ho bolela litaba tse molemo le ho etsa barutuoa. E se eka bohle, ba bacha le ba holileng, re ka tsoela pele ho ba le ‘ho hongata hoo re ka ho etsang mosebetsing oa Morena.’ w17.01 5:17, 18

Thekollo e re rekolotse ka ho feletseng. (Baheb. 9:24-26) E hlakola sebe sohle seo re se futsitseng ho Adama. Ka lebaka la sehlabelo sa lefu la Kreste, re lokolohile bokhobeng ba lefatše lena la Satane ’me ha re sa tšaba lefu. (Baheb. 2:14, 15) Kamehla re ka tšepa litšepiso tsa Molimo. Joalokaha melao ea hae ea popo e sa fetohe, Jehova a ke ke a fetoha ’me a ke ke a re soetsa. Jehova o re fa ho hoholo ho feta mpho ea bophelo. O re fa lerato. “Rea tseba ’me re lumetse lerato leo Molimo a nang le lona ho rōna. Molimo ke lerato.” (1 Joh. 4:16) Lefatše lohle e tla ba paradeise e ntle ’me motho e mong le e mong ea tla phela moo o tla bontša lerato la Molimo. ’Me batho ba lefatšeng le ba leholimong ba tla re: “Poko le khanya le bohlale le liteboho le tlhompho le bonatla le matla li be ho Molimo oa rōna ka ho sa feleng le kamehla. Amen.”—Tšen. 7:12. w17.02 2:16, 17

Molula-Qhooa oa June 1 oa Senyesemane o ile oa botsa potso ena: “Na . . . batho ba sa khaotseng ho tsuba ba ka tšoaneleha ho kolobetsoa?” Karabo e ile ea re: “Bopaki bo tsoang ka Bibeleng bo bontša hore ha ba tšoanelehe.” Ka mor’a ho qotsa mangolo a ’maloa, Molula-Qhooa o ile oa hlalosa hore na ke hobane’ng ha motho ea sa khaotseng ho tsuba a lokela ho khaoloa. (1 Bakor. 5:7) E ile ea re: “Ho hang sehlopha se busang ha se iketsetse melao empa se nka melao ka Lentsoeng la Molimo.” Buka e itseng ea morao-rao ea United States e buang ka litaba tsa bolumeli e re: “Hangata baruti ba lula ba fetola lithuto tsa Bibele ka tsela e tla lumellana le litho tsa kereke ea bona hammoho le batho ba bang.” Na ho na le bolumeli bo bong ntle ho Lipaki Tsa Jehova, bo ikemiselitseng ho itšetleha ka Lentsoe la Molimo esita leha ho le boima ho etsa joalo? w17.02 4:15

Baholo ke balisa ba ikokobelitseng le ba nang le kamano e ntle le Molimo. Kahoo, ha ba batle ho tšoaroa joaloka batho ba tummeng. Ha ba tšoane le baeta-pele ba malumeli a mehleng ena le a mehleng ea baapostola, bao Jesu a ileng a re ka bona: “Ba rata sebaka se hlaheletseng ka ho fetisisa lijong tsa shoalane le litulo tse ka pele ka lisynagogeng, le litumeliso limmarakeng.” (Mat. 23:6, 7) Kaha balisa ba Bakreste ba ’nete ba ikokobelitse, ba mamela mantsoe a Jesu ha a re: “Empa lōna, le se ke la bitsoa Rabi, kaha mosuoe oa lōna o mong, athe lōna bohle le bara ba motho. Ho feta moo, le se ke la bitsa mang kapa mang ntat’a lōna lefatšeng, kaha Ntat’a lōna o mong, Oa leholimo. Leha e le hore le bitsoe ‘baeta-pele,’ kaha Moeta-pele oa lōna o mong, Kreste. Empa e moholo har’a lōna e lokela ho ba mosebeletsi oa lōna. Mang kapa mang ea iphahamisang o tla kokobetsoa.” (Mat. 23:8-11) Ka lebaka leo Bakreste lefatšeng lohle ba rata baholo ebile baa ba hlompha. w17.03 1:14, 15

Ha re batla ho etsa liqeto ka bohlale, re lokela ho ithuta Bibele. Kahoo, ha rea lokela ho lumella batho ho re etsetsa liqeto. Ho e-na le hoo, re lokela ho ithuta hore na Jehova o batla’ng ’me re etse seo. Ke joang re ka lumellang batho ba bang hore ba re etsetse liqeto? Ka hore re ba lumelle ho re susumeletsa ho etsa liqeto tse fosahetseng. (Liprov. 1:10, 15) Ho kotsi ho lumella metsoalle ea rona ho re etsetsa liqeto. Re na le boikarabello ba hore re latele seo re ithutileng sona ka Bibeleng. Empa haeba re lumella batho ba bang hore ba re etsetse liqeto, ho tšoana le ha re khetha ho ba latela. Khetho eo e kotsi. Moapostola Pauluse o ile a eletsa Bagalata ka kotsi ea ho lumella batho ba bang hore ba ba etsetse liqeto. (Bagal. 4:17) Bakreste ba bang phuthehong ea Galatia ba ne ba batla ho etsetsa batho ba bang liqeto. w17.03 2:8-10

Josiase o ne a thabela ho khahlisa Molimo. Joaloka Josiase, ba bacha ba lokela ho sebeletsa Jehova bocheng ba bona. Morena Manase ea neng a bakile, e ka ’na eaba o ne a se a boleletse Josiase ka mohau oa Molimo. Bacha, ithuteng ho ba seng ba holile ka malapeng a lona le ka phuthehong ’me le bone kamoo Jehova a ileng a ba thusa kateng. Hopola hore Josiase o ile a thusoa ke ho bala Mangolo ’me seo se ile sa etsa hore a etse liphetoho. Ho bala Lentsoe la Molimo ho ka etsa hore u etse liphetoho tse tla etsa hore u thabe, u matlafatse kamano ea hao le Molimo le tse tla etsa hore u batle ho thusa ba bang hore ba batle Molimo. (2 Likron. 34:18, 19) Ho ka boetse ha re thusa ho ntlafatsa tšebeletso ea rona ho Molimo haeba re ikitlaetsa joaloka Josiase. w17.03 3:18, 19