March

Likhaolong tse peli tse qalang tsa Genese, rea hlokomela hore Adama le Eva ba ne ba phela bophelo boo batho ba mehleng ena ba bo labalabelang. Ba ne ba e-na le lintho tsohle tseo ba li hlokang, ba sa tšabe letho ebile ho se motho ea ba hatellang. Ba ne ba sa tšoenyeha ka lijo, mosebetsi, ho kula kapa lefu. (Gen. 1:​27-29; 2:​8, 9, 15) Ha re bua ka bolokolohi, ntlha e ka sehloohong ke hore re lule re hopola hore Jehova ke eena feela ea nang le bolokolohi bo sa lekanyetsoang. Hobane’ng? Hobane o bopile lintho tsohle ebile ke Morena oa leholimo le lefatše. (1 Tim. 1:​17; Tšen. 4:​11) Kahoo, libopuoa tsohle tse leholimong le lefatšeng li na le bolokolohi bo lekanyelitsoeng. Kaofela batho le mangeloi ba lokela ho utloisisa hore Jehova o na le matla a feletseng a ho beha meeli ea hore na re ka etsa lintho ka toka joang, hore na ke melao efe e utloahalang le e hlokehang. Jehova o ile a behela Adama le Eva meeli eo tšimong ea Edene. w18.04 4 ¶4, 6

Mehleng ena ea bofelo, Jehova ke eena ea re thusang hore re mamelle. (2 Bakor. 4:​7, 8) Joale ak’u nahane ka batho bao ho leng thata hore ba mamelle kaha ba se na kamano e ntle le Jehova. Joaloka Jesu, re ba utloela bohloko ebile re susumeletseha ho ba bolella “litaba tse molemo.” Kahoo u se ke oa fella batho pelo. Hopola hore, mohlomong ha ba e-s’o ka ba nahana ka tse ling tsa lintho tseo re ithutileng tsona ka Bibeleng. Le hore ba bangata ba kholisehile hore lintho tseo ba li tsebang ke ’nete. Ba ka ’na ba nka hore bolumeli ba bona ke ba bohlokoa kaha bo ba momahanya le ba malapa a bona, setso sa bona le batho bao ba ahisaneng le bona. Pele re ka bolella batho hore ba tlohele lintho tseo ba ithutileng tsona khale ba bile ba li rata, re ka ’na ra tlameha ho qala pele ka ho ba thusa ho ananela lintho tse ncha tseo ba ntseng ba ithuta tsona ka Bibeleng. Ka mor’a moo, ba ka ’na ba lumela ho tlohela lintho tseo tsa khale tseo ba neng ba li rata. Ho ka ’na ha nka nako hore batho ba bang ba etse liphetoho tseo.​—Bar. 12:2. w19.03 23 ¶10, 12; 24 ¶13

Jehova ke mohlala o motle oo re ka o etsisang ha re bontša batho ba bang hore rea ba rata ka hore re batle menyetla ea ho ba khothatsa. (Joh. 5:​20) Rea thaba ha batho ba re bontša hore baa re rata ba bile ba re babatsa ha re entse lintho tse ntle. Ka tsela e tšoanang, bara le barali babo rona le litho tsa malapa a rona ba hloka hore re ba babatse le ho ba rata. Ha re babatsa batho ba bang, re matlafatsa tumelo ea bona ebile re ba thusa hore ba lule ba sebeletsa Jehova ka botšepehi. Batsoali le bona ba lokela ho babatsa bana ba bona. Ha batsoali ba babatsa bana ba bona ho tsoa pelong ’me ba ba bontša hore baa ba rata, ba thusa bana hore ba atlehe. Mantsoe a reng: “Ke u amohetse,” a bontša hore Jehova o ne a tšepa hore Jesu o tla etsa thato ea hae ka ho feletseng. Kaha Jehova o tšepa Mora oa hae, le rona re ka tšepa ka ho feletseng hore Jesu o tla phethahatsa litšepiso tsohle tsa Ntate oa hae. (2 Bakor. 1:​20) Ha re nahanisa ka lintho tseo Jesu a ileng a li etsa, re tla ikemisetsa ho etsisa mohlala oa hae nthong e ’ngoe le e ’ngoe eo a ileng a e etsa.​—1 Pet. 2:​21. w19.03 8 ¶3; 9 ¶5-6

Ha re lemoha bohlokoa ba mpho e turu eo motho a re fileng eona, re mo leboha ho tloha botebong ba pelo. Baiseraele ha baa ka ba ananela tokoloho eo Jehova a ba fileng eona ka hore a ba lokolle bokhobeng Egepeta. Ka mor’a likhoeli tse ’maloa a ba lokolotse, ba ile ba qala ho lakatsa lijo tseo ba neng ba li ja ha ba le moo. Ba ne ba tletleba ka lijo tseo Jehova a ba fileng tsona ba bile ba batla ho khutlela Egepeta. Ba ne ba bona ‘tlhapi, likomkomere, mahapu, liliki, lieiee le konofolo’ li le bohlokoa ho feta bolokolohi boo Jehova a ba fileng bona ba hore ba mo rapele. Na ha se ntho e utloahalang hore ebe Jehova o ile a ba halefela? (Num. 11:​5, 6, 10; 14:​3, 4) Taba ena e re ruta thuto ea bohlokoa. Moapostola Pauluse o ile a khothalletsa Bakreste bohle hore ba nke bolokolohi boo Jehova a ba fileng bona ka Jesu bo le bohlokoa.​—2 Bakor. 6:1. w18.04 9-10 ¶6-7

Kaofela ha rona re batla ho ratoa. Ebile re batla hore litaba tsa rona li sebetsoe ka toka. Haeba ho se na motho ea re ratang ebile re sa tšoaroe ka toka, re ka ’na ra ikutloa re se na thuso. Jehova oa tseba hore re labalabela ho ratoa le ho tšoaroa ka toka. (Pes. 33:5) Re ka kholiseha hore Molimo o re rata haholo ebile o batla hore re tšoaroe ka toka. Re bona bopaki ba taba ena ha re sheba melao eo Jehova a ileng a e fa sechaba sa Iseraele mehleng ea Moshe. Ha re ithuta Molao oa Moshe re tla bona kamoo Jehova Molimo oa rona a leng lerato kateng. (Bar. 13:​8-10) Re ela hloko hore lerato ke motheo oa Molao oa Moshe hobane ke lona le susumetsang lintho tsohle tseo Jehova a li etsang. (1 Joh. 4:8) Jehova o ile a theha melao eohle e Molaong oa Moshe litaelong tse peli, e leng ea ho rata Molimo le ho rata moahelani. (Lev. 19:​18; Deut. 6:5; Mat. 22:​36-40) Melao e ka holimo ho 600 eo a ileng a e fa Moshe e bontša ka ho hlaka hore Jehova o lerato. w19.02 20-21 ¶1-4

Jobo o ne a le seli haholo tseleng eo a sebelisanang le batho ba bo-’mè ka eona. (Jobo 31:1) O ne a tseba hore ho fosahetse ho bonya-bonya le basali ba bang haese mohats’ae feela. Batho ba mehleng ena ke ba boitšoaro bo hlephileng. Na joaloka Jobo re tla ikemisetsa ho se holise maikutlo a lerato ho motho eo re sa nyalanang le eena? Na re tla boela re ikemisetse ho qoba ho sheba eng kapa eng ea boitšoaro bo bobe? (Mat. 5:​28) Haeba kamehla re loanela ho itšoara re tla matlafatsa boikemisetso ba rona ba ho lula re tšepahala. Jobo o ne a boetse a mamela Jehova tseleng eo a neng a talima maruo ka eona. O ne a tseba hore haeba a ka beha pelo ea hae maruong a hae, o tla be a entse sebe se seholo. (Jobo 31:​24, 25, 28) Batho ba mehleng ena ba rata ho rua haholo. Haeba re mamela likeletso tseo re li fumanang ka Bibeleng mabapi le chelete le maruo, re tla matlafatsa boikemisetso ba rona ba ho lula re tšepahala.​—Liprov. 30:​8, 9; Mat. 6:​19, 20. w19.02 6 ¶13-14

Jesu o ile a bontša hore o lerato nthong e ’ngoe le e ’ngoe eo a neng a e etsa. (1 Joh. 4:​8-10) Habohlokoa le ho feta, lerato le ile la susumelletsa Jesu ho tela bophelo ba hae molemong oa rona. Ebang re batlotsuoa kapa re “linku tse ling,” kaofela ha rona re rua molemo tseleng eo Jehova le Mora oa hae ba bontšitseng hore baa re rata ka eona ka hore Jesu a re shoele. (Joh. 10:​16; 1 Joh. 2:2) Lintho tse sebelisoang Sehopotsong le tsona li re thusa ho bona hore Jesu o rata barutuoa ba hae ebile oa ba nahanela. Ka tsela efe? Jesu o ile a bontša hore o rata baapostola ka hore ha a theha Sehopotso, ha aa ka a etsa lintho tse ngata tse rarahaneng. Selemo le selemo baapostola ba ne ba lokela ho ikhopotsa lefu la Jesu esita le tlas’a maemo a sa tšoaneng a akarelletsang le ho ba literonkong. (Tšen. 2:​10) Na ba ile ba mamela Jesu? E! Ho joalo. Ho theosa le lilemo haesale Bakreste ba ntse ba ikhopotsa lefu la Jesu. w19.01 24 ¶13-15

Jesu o ne a bolela hore re tla tseba Molimo, re lokolohe bolumeling ba bohata, litumela-khoeleng le tse ling tse ngata. Re tla boela re be le “tokoloho e khanyang ea bana ba Molimo.” (Bar. 8:​21) Re ka ba le eona hona joale haeba re “lula lentsoeng” la Jesu kapa re mo mamela. (Joh 8:​31) Mehleng ena, le bophelo boo ho thoeng bo monate bo tletse mathata feela ebile bo bokhutšoane. Ha re tsebe hore na letsatsi le hlahlamang le tla tla ka’ng. (Jak. 4:​13, 14) Kahoo, u ka itsoela molemo ka hore u etse lintho tse tla u thusa hore u fumane “bophelo ba sebele,” e leng bophelo bo sa feleng. (1 Tim. 6:​19) Empa Jehova ha a re qobelle hore re mo sebeletse kaha ke rona ba lokelang ho iketsetsa qeto. Etsa Jehova “kabelo” ea hao. (Pes. 16:5) ’Me o thabele lintho tse “molemo” tseo a u fileng tsona. (Pes. 103:5) E-ba le tumelo ea hore o tla u thusa hore u ‘thabe’ u be u ‘khotsofale ka ho sa feleng.’​—Pes. 16:​11. w18.12 28 ¶19, 21

Bakreste bohle ba lokela ho etsisa Jehova le Jesu ka ho hlompha lenyalo. Leha ho le joalo, ba bang ba ka ’na ba khibela ntlheng ena etsoe ha rea phethahala. (Bar. 7:​18-23) Ka hona, ha rea lokela ho makala hore manyalo a Bakreste ba bang ba mehleng ea baapostola a ne a e-na le mathata. Pauluse o ne a ile a ba ngolla a re “mosali ha aa lokela ho tloha ho monna oa hae” empa batho ba ne ba ntse ba arohana. (1 Bakor. 7:​10) Pauluse ha aa hlalosa hore na ke’ng se neng se etsa hore banyalani ba arohane. Ka mohlala, e ne e se mathata a kang hore monna o entse boitšoaro bo hlephileng e leng se fang mosali bolokolohi ba ho hlala. Pauluse o ile a re mosali ea arohaneng le monna oa hae kapa ea ngalileng, o lokela “a lule a sa nyaloa kapa ho seng joalo a boelane le monna oa hae.” Ka ho cho joalo, o ne a bontša hore mahlong a Molimo ba ntse ba nyalane. Pauluse o ile a fana ka keletso ea hore ba loanele ho khutlelana ho sa tsotellehe hore na ba tsekile’ng hafeela ho se ea entseng boitšoaro bo litšila. Ba ka kopa thuso ea Mangolo ho baholo. w18.12 13 ¶14-15

Thato ea Jehova ke hore re be metsoalle ea hae re be re phelele ho mo sebeletsa. (Mat. 28:​19, 20; Jak. 4:8) Empa batho ba bang ba ka ’na ba re liha moea e se ka sepheo se sebe. Mohlala, mohiri oa hao a ka ’na a u nyolla mosebetsing e le hore u thole moputso o betere empa mosebetsi oo a u fang oona oa u sitisa ho sebeletsa Molimo. Kapa a re re mohlomong u fumana sekolo hole le hae. Na e tla be e le nako e nepahetseng ea ho rapela, kapa ho bua le batho ba bang ebe ke hona u tla etsa qeto? E ka ba bohlale hore u nahane hona joale hore na Jehova o ikutloa joang u be u etse qeto. Ha u ka etsa joalo u tla be u iphokoletsa hobane ha u ba boemong boo u tla be u se u tseba hore na u tsoa le hokae. Hape oa tseba hore na u batla ho etsetsa Jehova eng. Kahoo, ho tla ba bonolo ha boemo bo joalo bo ka hlaha. w18.11 27 ¶18

Morena Solomone o qalile ho busa Iseraele a sa le monyane haholo. Ha a sa tsoa qala ho busa, Jehova o ile a bua le eena torong a re: “Kopa seo ke lokelang ho u fa sona.” Eaba Morena Solomone o re: “Ke sa le moshanyana. Ha ke tsebe ho tsoa le ho kena. . . . U fe mohlanka oa hao pelo e mamelang hore a ahlole sechaba sa hao.” (1 Mar. 3:​5-10) Taba ea hore ebe o ile a kopa “pelo e mamelang” ke bopaki ba hore o ne a ikokobelitse. Ha se feela Jehova a neng a mo rata. (2 Sam. 12:​24) Kaha o ne a ikokobelitse, Jehova o ile a thaba haholo eaba o mo fa “pelo e bohlale le e nang le kutloisiso.” (1 Mar. 3:​12) Jehova o ile a hlohonolofatsa Morena Solomone haholo ha a sa ntse a tšepahala. O ile a fa Solomone monyetla oa ho haha tempele bakeng sa “lebitso la [hae].” (1 Mar. 8:​20) Bohlale bona boo Molimo a neng a mo file bona bo ile ba etsa hore a tume haholo. Jehova o ile a mo bululela hore a ngole Mangolo a mararo a Bibele a akarelletsang la Liproverbia. w19.01 14 ¶1-2

Batho ba bang ha ba rate ho susumetsoa hore na ba nahane joang. Ba nka hore ha ho na motho ea lokelang ho kena-kenana le liqeto tseo ba iketsetsang tsona. Ha ba rate ho bolelloa hore na ba etse’ng empa ba batla ho itaola. Ho nahana ka tsela eo Jehova a nahanang ka eona ha ho bolele hore ha re sa na bolokolohi. 2 Bakorinthe 3:​17 e re: “Moo moea oa Jehova o leng teng, ho na le tokoloho.” Kaofela ha rona re na le bolokolohi ba ho ba batho bao re batlang ho ba bona. Re boetse re na le bolokolohi ba ho ikhethela lintho tseo re li ratang le tseo re batlang ho li etsa. Le hoja Jehova a re bopile joalo, bolokolohi bona ba rona bo na le moeli. (1 Pet. 2:​16) Ha re etsa liqeto tabeng ea hore na ntho e nepahetse kapa e fosahetse, Jehova o batla hore re nahane hore na Bibele e re’ng. w18.11 19 ¶5-6

Ha re ne re qala ho ithuta ka Jehova, re ile ra qoba hore maruo a re sitise. Ha re ikoahlaee hore ebe re khethile ho sebeletsa Molimo. Re thabile haholo hore ebe re tetse matlotlo a rona eaba re khetha ho mo sebeletsa. Leha ho le joalo, re ka ’na ra utloa eka re entse qeto e fosahetseng ha re bona bara le barali babo rona ba e-ba le lintho tseo re sa khoneng ho ba le tsona. Haeba re khalla ho ba le lintho tsena, re ka iphumana re se re sa sebeletse Molimo ka tsela eo re neng re mo sebeletsa ka eona pele. Mohlala oa Demase o tiisa taba ena. Ha a qala ho “rata tsamaiso ea lintho” o ile a tlohela ho tsamaea le moapostola Pauluse. Bibele ha e bolele hore na ke hobane’ng a ile a tlohela ho tsamaea le Pauluse empa e ka ’na eaba o ne a se a rata maruo ho feta ho sebeletsa Molimo. Rona ha re batle ho ba boemong bo tšoanang le boo ba hae. w18.11 10 ¶9

Satane o ne a bua leshano hobane o ne a tseba hantle hore Eva o ne a tla shoa ha a ka ja tholoana ea sefate seo. Adama le Eva ba ile ba shoa hobane ha baa ka ba mamela ha Molimo a ba laela. (Gen. 3:6; 5:5) Ke kahoo re shoang hobane ‘lefu le nametse ho batho bohle.’ Ha e le hantle “lefu le ile la busa e le morena ho tloha ho Adama . . . , esita le holim’a ba neng ba sa etsa sebe.” (Bar. 5:​12, 14) Hona joale ha rea phethahala ebile re phela nako e khutšoanyane le hoja Molimo a ne a rerile hore re se ke ra shoa. Re phela ‘lilemo tse mashome a supileng empa haeba e le ka lebaka la matla a khethehileng e ba lilemo tse mashome a robeli.’ Le hoja re phela nako e khutšoaane hakaalo, bophelo ba rona bo tletse mathata. (Pes. 90:​10) Mathata ana kaofela a bile teng ka lebaka la leshano leo Satane a le buileng. Ha Jesu a bua ka Satane o ile a re: “Ha aa ka a ema a tiile ’neteng, hobane ’nete ha e eo ho eena.” (Joh. 8:​44) Esita le hona joale, Satane e ntse e le raleshano hobane o ntse a ‘khelosa’ batho. (Tšen. 12:9) Leha ho le joalo, ha re batle hore a re khelose. w18.10 6-7 ¶1-4

Batho ba ikemiselitseng ho lula ba bopa khotso ba tla thaba e le kannete. Jakobo o ile a re: “Litholoana tsa ho loka peo ea tsona e jaloa tlas’a maemo a khotso bakeng sa ba etsang khotso.” (Jak. 3:​18) Haeba re e-na le likhohlano le motho e mong ka phuthehong kapa ka lapeng, re ka kopa Molimo hore a re thuse hore re khone ho bopa khotso. Jehova o tla re fa moea o halalelang e le hore re be le makhabane a hae, kahoo re tla lula re thabile. Jesu o ile a tiisa hore ho bopa khotso le batho ba bang ho bohlokoa ha a ne a re: “Joale, haeba u tlisa mpho ea hao aletareng ’me u hopola hore mor’eno o na le ho hong khahlanong le uena, u siee mpho ea hao moo ka pel’a aletare, ’me u tlohe; etsa khotso le mor’eno pele, ’me joale, ha u khutlile, u nyehele mpho ea hao.”​—Mat. 5:​23, 24. w18.09 21 ¶17

Jesu o ile a bua ka lerato ka makhetlo a ka bang 30 bosiung ba ho qetela a e-na le barutuoa ba hae. O ile a re ho bona ba lokela ho ‘ratana.’ (Joh. 15:​12, 17) Ha Bakreste ba ratana, baa bontša hore ke barutuoa ba ’nete ba Jesu. (Joh. 13:​35) Lerato lena ha se ntho eo motho a ikutloang a e-na le eona feela, empa re lokela ho le bontša ka liketso. O ile a re: “Ha ho ea nang le lerato le leholo ho lena, hore motho a nehelane ka moea oa hae molemong oa metsoalle ea hae. Le metsoalle ea ka haeba le etsa seo ke le laelang sona.” (Joh. 15:​13, 14) Mehleng ena bahlanka ba Jehova ba bonahala ka hore ba momahane hape ba ratana ka pelo eohle ba sa ikaketse. (1 Joh. 3:​10, 11) Hoa thabisa ho tseba hore bahlanka ba Jehova ba ratana ka tsela eo Jesu a re ratileng ka eona ho sa tsotellehe puo, morabe kapa maemo a bona. w18.09 12 ¶1-2

Jehova o lebeletse hore bahlanka ba hae ba hlokomele ba malapa a bona. Mohlala, haeba u ’mè ea nang le ngoana e monyenyane kapa u hlokomela batsoali ba hao ba kulang, u ka lokela ho sebetsa e le hore u tle u ba thuse ka lintho tseo ba li hlokang. Haeba u e-na le boikarabelo bo joalo, e ka ’na eaba ha u be le nako e lekaneng ea ho etsa lintho tse tla u thusa ho matlafatsa setsoalle sa hao le Jehova. Empa ha oa lokela ho nyahama. Jehova oa thaba ha u hlokomela lelapa la hao. (1 Bakor. 10:​31) Haeba ha u na boikarabelo ba ho hlokomela lelapa, mohlomong u ka ithaopela ho thusa Bakreste-’moho le uena ba kulang, ba holileng kapa ba hlokang thuso leha e le efe. U ka boela oa sheba batho ba hlokang thuso phuthehong ea heno. Ha u etsa joalo, mohlomong ke tsela eo Jehova a tla beng a araba thapelo ea motho e mong ka eona.​—1 Bakor. 10:​24. w18.08 24 ¶3, 5

Josefa e ne e le thatohatsi ea ntate oa hae, kahoo bo-abuti oa hae ba ne ba mo monela eaba ba mo rekisa hore e be lekhoba ha a le lilemo li ka bang 17. (Gen. 37:​2-4, 23-28) O ile a mamella ho ba hole le ntate oa hae, ho ba lekhoba le ho kenngoa chankaneng Egepeta ka lilemo tse ka bang 13. O ile a thusoa ke eng hore a se ke a nyahama le ho koata? Mohlomong Josefa o ne a nahana ka litlhohonolofatso tsa Jehova ha a ne a le teronkong. (Gen. 39:​21; Pes. 105:​17-19) Litoro tsa boprofeta tseo a neng a li lora ha a le monyane li ile tsa mo kholisa hore Jehova o na le eena. (Gen. 37:​5-11) E tlameha ebe o ne a phetlela Jehova sefuba hangata. (Pes. 145:​18) ’Me Jehova o ile a mo kholisa hore o tla lula a “e-na le eena” mathateng ’ohle a hae. w18.10 28 ¶3-4

Maemo a batho a lichelete a ka etsa hore re ba tšoare ka litsela tse sa tšoaneng. Empa ke joang maemo a batho a lichelete a ka etsang hore re ba talime ka tsela e fosahetseng? Moea o halalelang o ile oa susumelletsa Solomone hore a bue ’nete e hlahang temaneng ea rona ea letsatsi ea kajeno. Temana ee e re ruta’ng? Haeba re se hlokolosi, re ka iketsa metsoalle ea barui ebe ha re natse ba kollang ntsi hanong. Ke hobane’ng ha ho le kotsi ho kala batho ka maemo a bona a lichelete? Hobane ho etsa joalo hoka etsa hore Bakreste-’moho le rona ba khethollane. Jakobo o ile a re bothata bona bo ne bo arola liphutheho tse ling tsa mehleng ea hae. (Jak. 2:​1-4) Le rona re lokela ho itebela e le hore re se ke ra lumella menahano e joalo ho arola phutheho le hore re qobe ho kala batho ho ea ka maemo a bona a lichelete. w18.08 10 ¶8-10

Re bontša hore re nka setsoalle sa rona le Jehova e le sa bohlokoa haeba re sebelisana le Bakreste-’moho le rona hantle. Le bona ke bahlanka ba Jehova. Haeba re lula re hopola taba ena, re tla rata bara le barali babo rona ’me re be mosa ho bona. (1 Bathes. 5:​15) Jesu o ile a re ho barutuoa ba hae: “Bohle ba tla tseba ka sena hore le barutuoa ba ka, haeba le e-na le lerato har’a lona.” (Joh. 13:​35) Malakia o ile a re Jehova o “ela hloko” hore na batho ba hae ba sebelisana joang. (Mal. 3:​16) Jehova “o tseba ba hae.” (2 Tim. 2:​19) O bona ntho e ’ngoe le e ’ngoe eo re e etsang le eo re e buang. (Baheb. 4:​13) Jehova oa bona ha re se mosa ho bara le barali babo rona. Empa ka lehlakoreng le leng oa hlokomela ha re ba tšoarela ha ba re foselitse, ha re fana le ha re le mosa ho bona.​—Baheb. 13:​16. w18.07 26 ¶15, 17

Ke taba e utloahalang hore re lule re le haufi le Jehova kaha ha ho motho ea matla, ea bohlale le ea lerato joaloka eena. Ke mang ea sa batleng ho ba ka lehlakoreng la Jehova? (Pes. 96:​4-6) Empa ho na le bahlanka ba bang ba Jehova ba tsilatsilang ha ba tlameha ho ba ka lehlakoreng la hae. Mohlala, nahana ka Kaine. Le hoja a sa ka a rapela melimo esele, Jehova o ne a sa amohele borapeli ba hae. Bokhopo bo ile ba hola pelong ea hae. (1 Joh. 3:​12) Kahoo, Jehova o ile a re ho eena: “Haeba u fetoha hore u etse se molemo, na ho phahamisoa ho ke ke ha e-ba teng? Empa haeba u sa fetohe hore u etse se molemo, sebe se laletse monyako, ebile sea u lakatsa; na u tla se laola?” (Gen. 4:​6, 7) Ha e le hantle ha Jehova a ne a bua mantsoe ao, o ne a re: “Haeba u baka ’me u ema ka lehlakoreng la ka, le ’na ke tla ba ka lehlakoreng la hao.” Empa Kaine ha aa ka a mamela. w18.07 17 ¶1, 3; 18 ¶4

Tsela e ’ngoe eo re etsang hore leseli la rona le khanye ka eona ke ka hore re bolelle batho litaba tse molemo le ho etsa barutuoa. (Mat. 28:​19, 20) Hape, re ka tlotlisa Jehova ka hore re itšoare ka tsela eo Bakreste ba lokelang ho itšoara ka eona. Batho bao re ba fumanang malapeng hammoho le bao re kopanang le bona tseleng, ba sheba tsela eo re itšoarang ka eona. Haeba re bososela le batho re bile re ba lumelisa ka mosa, ba tla ba le maikutlo a nepahetseng ka rona le Molimo eo re mo rapelang. Jesu o ile a re ho balateli ba hae: “Ha le kena ka tlung, le lumelise ba ntlo eo.” (Mat. 10:​12) Batho ba sebaka seo Jesu le baapostola ba hae ba neng ba atisa ho bolela litaba tse molemo ho sona, ba ne ba tloaetse ho amohela baeti ka matlong a bona. Libakeng tse ngata mehleng ena ha se hangata batho ba etsang joalo. Leha ho le joalo, haeba re le mosa ha re ba hlalosetsa sepheo sa rona sa ho ba etela, ba ka phutholoha. Ho bososela le batho ke tsela e ’ngoe ea ho qalisa moqoqo le bona. Taba ena e bonahala ka ho hlaka ha bara le barali babo rona ba etsa bopaki ba phatlalatsa ba sebelisa litoroli. Ha re bososela le batho re bile re ba lumelisa, ho tla ba bonolo hore ba atamele ’me ba nke tse ling tsa lingoliloeng tsa rona. w18.06 22 ¶4-5

Moapostola Petrose o ne a etsa setsoalle le Bajuda feela. Ka mor’a hore Molimo a hlakise hore Bakreste ha baa lokela ho ba leeme, Petrose o ile a ruta lesole la Moroma le bitsoang Korneliase ka ’Muso oa Molimo. (Lik. 10:​28, 35) Ka mor’a moo, Petrose e ile ea e-ba motsoalle oa batho bao e seng Bajuda ’me a ja le bona. Leha ho le joalo, ka mor’a lilemo tse ’maloa, Petrose o ile a khaotsa ho ja le bona ha a le Antioke. (Bagal. 2:​11-14) Kahoo, Pauluse o ile a mo khalemela eaba Petrose oa mo mamela. Ha Petrose a ngola lengolo la hae la pele le eang ho Bakreste ba Bajuda le bao e seng Bajuda ba lulang Asia Minor, o ile a re ho bohlokoa ho rata barab’abo rona bohle. (1 Pet. 1:1; 2:​17) Baapostola ba ile ba ithuta ho Jesu hore ba lokela ho rata “batho ba mefuta eohle.” (Joh. 12:​32; 1 Tim. 4:​10) Le hoja ho nkile nako hore ba ithute ho rata batho bohle, ba ile ba lokisa tsela eo ba nahanang ka eona. Bakreste ba ile ba apara “botho bo bocha” ’me ba ithuta ho sheba batho ka tsela eo Jehova a ba shebang ka eona.​—Bakol. 3:​10, 11. w18.06 11 ¶15-16

E ’ngoe ea litšireletso tsa sefuba tseo masole a Roma a neng a li apara e ne e e-na le litšepe tse palamaneng. Tšireletso ena ea sefuba e ne e hloka hore lesole le netefatse hore litšepe tsa eona li ntse li lutse hantle e le ho sireletsa pelo le likarolo tsa bohlokoa tsa ’mele. Melao ea Jehova e tšoana le tšireletso eo ea sefuba hobane e sireletsa lipelo tsa rona, e leng hore e tla re thusa hore re se ke ra etsa lintho tse sa khahliseng Jehova. (Liprov. 4:​23) Lesole le ne le ke ke la sebelisa tšireletso ea sefuba e entsoeng ka tšepe ea boleng bo tlaase. Ka tsela e tšoanang, re ke ke ra etsa lintho kamoo re batlang ebe ha re mamele tataiso ea Jehova. Lebaka ke hore ha re bohlale ho lekana hore re sireletse lipelo tsa rona. (Liprov. 3:​5, 6) Kahoo, kamehla re lokela ho netefatsa hore ‘litšepe tsa tšireletso ea rona ea sefuba’ li ntse li lutse hantle ’me li sirelelitse lipelo tsa rona. Ha re ntse re rata Lentsoe la Molimo haholoanyane, ho tla ba bonolo hore re jare “tšireletso ea sefuba,” e leng ho phela ka melao ea Molimo.​—Pes. 111:​7, 8; 1 Joh. 5:3. w18.05 28 ¶3-4, 6-7

Le hoja Moshe a ile a qeta nako e telele a eteletse sechaba seo pele, ebile Jehova a ile a mo sebelisa hore a etse mehlolo, sechaba seo se ne se ntse se korotla. Ba ne ba korotlela Moshe ka hore ha ba na metsi joalokaha eka ke eena ea entseng hore a be sieo. (Num. 20:​1-5, 9-11) Moshe o ile a halefa haholo eaba o hloleha ho itšoara. Ho e-na le hore Moshe a bue le lefika joalokaha Jehova a ne a laetse, o ile a halefela sechaba a ba a se bolella hore ke eena ea tl’o etsa mohlolo. Eaba o otla lefika habeli ’me metsi a tsoa a le mangata. Ho halefa le ho hloka boikokobetso ke hona ho ileng ha etsa hore Moshe a etse phoso e kholo. (Pes. 106:​32, 33) Ka lebaka la ho hloleha ho ba bonolo, ha aa ka a lumelloa ho kena Naheng e Tšepisitsoeng. (Num. 20:​12) Mohlaleng ona, re ithuta lintlha tsa bohlokoa. Ntlha ea pele, re lokela ho sebetsa ka thata e le hore re be batho ba bonolo. Haeba re ka hloleha le ka motsotsoana feela, boikhohomoso bo ka re nanarela ebe re etsa lintho ka tsela e booatla. Ea bobeli, ha re imetsoe kelellong ho ka ba thata hore re be batho ba bonolo, kahoo re lokela ho leka ka hohle hore re be bonolo le tlas’a maemo a thata. w19.02 12-13 ¶19-21

Na ho mamela taelo ea Jesu ea ho bolela ka ’Muso ke moroalo? Che! Ka mor’a hore Jesu a bue ka papiso ea sefate sa morara, o ile a re batho ba phatlalatsang molaetsa oa ’Muso ba tla thaba. (Joh. 15:​11) O ile a re tiisetsa hore thabo ea hae e tla ba ea rona. Joang? Jesu o ile a itšoantša le sefate sa morara ’me barutuoa ba hae bona le makala. (Joh. 15:5) Sefate sa morara se tšehetsa makala. Hafeela makala a ntse a le sefateng, a fumana metsi le phepo tse teng sefateng. Ka tsela e tšoanang, ha re lula bonngoeng le Kreste ka hore re latele mehato ea hae haufi-ufi, rea thaba joalokaha le eena a thaba ka lebaka la ho etsa thato ea Ntate oa hae. (Joh. 4:​34; 17:​13; 1 Pet. 2:​21) Morali’abo rona Hanne ea nang le lilemo tse fetang 40 e le pula-maliboho o re: “Tsela eo ke ikutloang ke thabile ka eona ha ke tsoa tšimong, e ntšusumelletsa hore ke tsoele pele tšebeletsong ea Jehova.” Kannete thabo eo re bang le eona e re thusa ho tsoela pele leha re sebetsa tšimo e thata.​—Mat. 5:​10-12. w18.05 17/2 ;20/14

Moapostola Pauluse o ile a sebetsa ka thata haholo ho khothatsa Bakreste-’moho le eena. O ile a tataisoa ke moea o halalelang ho ea ruta batho ba linaheng tse ling tse neng li busoa ke Bagerike le Baroma, ba neng ba rapela melimo e mengata. (Bagal. 2:​7-9) Mosebetsi oa Pauluse o ne o akarelletsa ho ea linaheng tse hole, tse akhang Greece, Italy le naha eo hona joale e bitsoang Turkey. O ne a ruta batho bao e seng Bajuda a bile a theha liphutheho tsa Bokreste linaheng tseo. Ha batho bao ba qala ho ba Bakreste, ba ile ba “utloisoa bohloko matsohong a batho ba naha ea habo [bona].” Kahoo, ba ne ba hloka ho khothatsoa. (1 Bathes. 2:​14) Lilemo tse ka bang 17 ka mor’a hore Jesu a tlohe lefatšeng, Pauluse o ile a ngolla phutheho ea Thesalonika e neng e sa tsoa thehoa, a re: “Kamehla re leboha Molimo ha re bua ka lona bohle lithapelong tsa rona, etsoe re hopola re sa phetse mosebetsi oa lona o tšepahalang le mosebetsi oa lona o lerato le mamello ea lona.” (1 Bathes. 1:​2, 3) O ile a boela a re ho bona: “Le ’ne le tšelisane le ho hahana.”​—1 Bathes. 5:​11. w18.04 18-19 ¶16-17

Haeba mocha a ikemiselitse ho lula a rata Jehova, o lokela ho nka tšimo e le bohlokoa haholo. Mosebetsi oa ho bolela litaba tse molemo o lokela ho tla pele kaha o potlakile. U ka etsa qeto ea ho ea tšimong hangata kamoo u ka khonang kapa oa ba pula-maliboho. Empa u ka etsa’ng haeba u sa natefeloe ke tšimo? Ke’ng e tla u thusa ho thabela ho bua le batho ka Bibele? U tla thusoa ke hore u lokisetse le hore u lule u bolella batho ba bang lintho tseo u ithutileng tsona. Ha nako e ntse e e-ea, u tla thabela ho buisana le batho ka Bibele. U ka qala ka ho batlisisa karabo ea potso eo bana bao u kenang sekolo le bona ba e botsang hangata. Mohlala, e ka ba potso ea hore na ke hobane’ng ha u lumela ho Molimo. Websaete ea jw.org e na le lihlooho tse ka u thusang ho fumana karabo ea potso eo. Ha u fihla karolong eo, u tla fumana karabo ea potso eo sehloohong se reng: “Ke Hobane’ng ha ke Lumela ho Molimo?” Se tla u thusa hore u iphumanele karabo. w18.04 27 ¶10-11

Le hoja Adama le Eva ba ile ba thabela bolokolohi ka litsela tse ngata, Jehova o ne a ba behetse meeli kapa melao e itseng. Le hoja ba ne ba tseba e meng ea eona, ba ne ba e fuoe ho ntse ho le joalo. Mohlala, batsoali ba rona ba pele ba ne ba tseba hore e le hore ba lule ba phela ba lokela ho hema, ho ja, ho robala le tse ling. Na ho etsa lintho tsee ho ne ho ba amoha tokoloho? Che! Hobane Jehova o ne a tseba hore ha ba etsa lintho tseo tse tloaelehileng, ba ne ba tla thabela bophelo ’me ba khotsofale. (Pes. 104:​14, 15; Moek. 3:​12, 13) Jehova o ile a laela Adama le Eva hore ba ate ba ngatafale ba tlale lefatše le ho le hlokomela. Na taelo ee e ne e ba thibela ho ba le bolokolohi? Che! Adama le Eva ba ile ba fuoa taelo ena e le hore ba ka phethahatsa morero oa Jehova oa hore lefatše e be lehae le letle la paradeise bakeng sa hore batho ba phethahetseng ba phele ho lona ka ho sa feleng. (Pes. 127:3; Esa. 45:​18) Adama le Eva ba ne ba e-na le monyetla oa hore ba thabele lenyalo la bona ka ho sa feleng. w18.04 4-5 ¶7-8

Haeba re sa felle batho bao re kopanang le bona tšimong pelo, re ke ke ra lebella hore ba lumellane le rona ka lekhetlo la pele re bua le bona. Mohlala, ak’u nahane hore na re ka thusa motho e mong joang hore a utloisise tšepo ea ho tla phela ka ho sa feleng paradeiseng lefatšeng. Batho ba bangata ba lumela hore ha motho a hlokahala ho felile ka eena kapa hore batho bohle ba lokileng ba ea leholimong. A re ke re hlahlobeng tsela e ’ngoe eo mor’abo rona e mong a e sebelisang. O qala ka ho bala Genese 1:​28. Ebe o botsa mong’a ntlo hore na o nahana hore Molimo o ne a batla hore batho ba phele hokae le hore na ba phele joang. Batho ba bangata ba araba ka ho re, “O ne a batla hore batho ba phele ba thabile lefatšeng.” Ka mor’a moo, mor’abo rona o balla mong’a ntlo Esaia 55:​11, ebe oa mo botsa hore na o nahana hore morero oo oa Molimo o se o fetohile. Hangata, mong’a ntlo o re che. Qetellong, mor’abo rona o balla mong’a ntlo Pesaleme ea 37:​10, 11, ebe oa mo botsa hore na o nahana hore bokamoso bo tla ba joang. Ka tsela ena, mor’abo rona o se a thusitse batho ba bangata hore ba utloisise hore Molimo o ntse a batla hore batho ba lokileng ba tl’o phela lefatšeng mona ka ho sa feleng. w19.03 24 ¶14-15; 25 ¶19

Jehova o hlakisitse hore o batla hore re mamele Mora oa hae. Jesu o ile a ruta balateli ba hae hore na ba ka ruta batho ka ’Muso oa Molimo joang ’me ka ho pheta-pheta a ba hopotsa hore ba lule ba lebetse. (Mat. 24:​42; 28:​19, 20) O ile a re ba ikitlaetse ka matla ha ba etsa mosebetsi oa bona ’me a ba khothalletsa le hore ba se ke ba tela ha ba o etsa. (Luka 13:​24) Jesu o ile a boela a khothalletsa balateli ba hae hore ba ratane, ba lule ba momahane le hore ba mamele litaelo tsa hae. (Joh. 15:​10, 12, 13) Lintho tseo Jesu a ileng a re barutuoa ba hae ba li etse li ne li le bohlokoa, ’me le mehleng ena li ntse li le bohlokoa. Jesu o ile a re: “E mong le e mong ea leng ka lehlakoreng la ’nete o mamela lentsoe la ka.” (Joh. 18:​37) Re bontša hore rea mo mamela ha re “mamellana le ho tšoarelana ka bolokolohi.” (Bakol. 3:​13; Luka 17:​3, 4) Re boetse re bontša hore rea mamela ha re ruta batho ka ’Muso oa Molimo ‘nakong e tšoanelang le nakong e likhathatso.’​—2 Tim. 4:2. w19.03 10 ¶9-10