June

E tlameha ebe tšepiso ena e ile ea matlafatsa baapostola haholo. Le hoja ba ne ba sa e utloisise hantle, Jesu o ne a le haufi le ho shoa empa o ne a ke ke a ba siea feela. Jehova o ne a ikemiselitse ho araba lithapelo tsa bona nthong e ’ngoe le e ’ngoe eo ba e kopang e le hore ba ntšetse pele mosebetsi oa ho bolela ka ’Muso. Nakoana ka mor’a moo, ba ile ba bona ha Jehova a arabela lithapelo tsa bona ha ba kopa thuso. (Lik. 4:​29, 31) Taba ena e ntse e le ’nete le mehleng ena. Ha re ntse re mamella ha re beha litholoana, re thabela ho ba metsoalle ea Jesu. Ho feta moo, re ka kholiseha hore Jehova o tla araba lithapelo tsa rona e le hore re fete mathateng ao re ka kopanang le ’ona ha re ntse re bolela ka ’Muso. (Bafil. 4:​13) Rea thaba hore ebe re hlohonolofalitsoe ka hore ebe lithapelo tsa rona lia arajoa ebile re metsoalle ea Jesu. Limpho tsena tseo Jehova a re fang tsona lia re matlafatsa e le hore re tsoele pele ho beha litholoana.​—Jak. 1:​17. w18.05 21 ¶17-18

Ho ne ho e-s’o fete le lilemo tse hlano Pauluse a buile mantsoe ao ha Bakreste bana ba hlokomela hore “letsatsi . . .  la Jehova” le haufi. Ka nako eo, ba ne ba hloka ho mamela keletso ea Jesu. (Lik. 2:​19, 20; Luka 21:​20-22) Letsatsi leo le ile la fihla ka selemo sa 70 ha Baroma ba timetsa Jerusalema. Le mehleng ena ha ho pelaelo hore ‘letsatsi la Jehova le leholo le le tšosang haholo’ le haufi. (Joele 2:​11) Moprofeta Sofonia o itse: “Letsatsi le leholo la Jehova le haufi. Le haufi, ’me le potlakile haholo.” (Sof. 1:​14) Mantsoe ana a ntse a le bohlokoa le mehleng ena. Kaha letsatsi lena le atametse haholo, Pauluse o khothalletsa Bakreste ho ‘nahanelana le ho susumeletsana leratong le mesebetsing e metle.’ (Baheb. 10:​24) Kahoo, re lokela ho tsotellana e le hore re tle re tsebe ho khothatsa mang kapa mang nako eohle. w18.04 20 ¶1-2

Jehova o ile a tiisetsa Joshua hore o tla ba le eena nakong eo a etellang Baiseraele pele ho ea Naheng e Tšepisitsoeng. Jehova ha aa ka a khothatsa batho ba hae ka bomong feela, empa o ile a boela a ba khothatsa e le sechaba ka kakaretso. O ile a khothatsa bahlanka ba hae ba Bajuda ba neng ba le botlamuoeng Babylona, a re ho bona: “U se ke oa tšoha, kaha ke na le uena. U se ke oa talima koana le koana, etsoe ke ’na Molimo oa hao. Ke tla u matlafatsa. Ka sebele ke tla u thusa. Ke tla u tšoara ka tieo ka letsoho la ka le letona la ho loka.” (Esa. 41:​10) Bakreste bohle baa lumela hore Jehova o tla fela a ba matlafatse. (2 Bakor. 1:​3, 4) Jehova o ile a boela a khothatsa Jesu. Ka mor’a hore Jesu a kolobetsoe, o ile a utloa Jehova a bua a le leholimong a re: “Enoa ke Mora oa ka, ea ratoang, eo ke mo amohetseng.” (Mat. 3:​17) Jesu o ile a khothala haholo ka mor’a ho utloa mantsoe ao. w18.04 16 ¶3-5

Batho ba bang ba ka ’na ba nka hore ha Jehova a fana ka taelo eo, o ne a thibela Adama ho etsa lintho tseo a batlang ho li etsa. Batho ha ba tsebe phapang pakeng tsa ho ba le bolokolohi ba ho ikhethela le tokelo ea ho iketsetsa qeto ea hore na ntho e nepahetseng le e fosahetseng ke efe. Adama le Eva ba ne ba e-na le bolokolohi ba ho ikhethela hore na ba tla mamela Molimo kapa che. Empa ke Jehova feela ea nang le tokelo ea ho etsa qeto ea hore na ntho e nepahetseng le e fosahetseng ke efe, feela joalokaha a ile a etsa ka “sefate sa tsebo ea botle le bobe” tšimong ea Edene. (Gen. 2:9) Ha Jehova a ne a fa Adama le Eva melao, ka lerato o ne a ba ruta hore na ba lokela ho sebelisa bolokolohi ba bona joang. Joalokaha re tseba ha baa ka ba mamela. Na qeto eo Adama le Eva ba ileng ba e etsa e ba thusitse ho fumana bolokolohi bo eketsehileng? Ka masoabi ha hoa ka ha e-ba joalo. Kaha ba ne ba batla ho iketsetsa qeto ea hore na ntho e nepahetseng le e fosahetseng ke efe, ha baa ka ba hlola ba e-ba le bolokolohi boo ba neng ba e-na le bona pele. w18.04 5-6 ¶9-12

Jehova ha a utloe bohloko feela ha bahlanka ba hae ba e-na le mathata empa o etsa ho hong ho ba thusa. Mohlala, ha Baiseraele e le makhoba Egepeta, Jehova o ile a ba utloela bohloko ’me a susumetseha ho ba lopolla. O ile a re ho Moshe: “Ntle ho pelaelo ke bone mahloreho a sechaba sa ka . . . , ’me ke utloile mohoo oa sona . . . ke tseba hantle bohloko boo se bo utloang. Kea theoha ho ea se lopolla matsohong a Baegepeta.” (Ex. 3:​7, 8) Jehova o ile a lopolla Baiseraele bokhobeng kaha o ne a ba utloela bohloko. Lilemo tse makholo hamorao ha Baiseraele ba se ba le Naheng e Tšepisitsoeng, ba ile ba hlaseloa hangata ke ba lireng. Jehova o ile a etsa’ng? O ile “a ikutloa a soabisitsoe [kapa a utloisitsoe bohloko] ke ho bobola ha bona ka lebaka la bahatelli ba bona le ba neng ba ba tšoenya.” Le lekhetlong lena, Jehova o ile a ba utloela bohloko eaba oa ba thusa. O ile a romela baahloli hore ba thuse Baiseraele lireng tsa bona.​—Baahl. 2:​16, 18. w19.03 15 ¶4-5

Melao e ’meli e qalang Melaong e Leshome e ne e laela Baiseraele hore ba lokela ho rapela Jehova a le mong feela, ebile e re ba lokela ho qoba ho rapela melimo ea litšoantšo. (Ex. 20:​3-6) Litaelo tsena li ne li le molemong oa bona, eseng oa Jehova. Ha ba ne ba rapela melimo ea lichaba tse ling, ba ne ba khola litholoana tse bosula. Ka lehlakoreng le leng, Jehova o ne a hlohonolofatsa batho ba mo tšepahallang le ba tšoarang batho ba bang ka toka. (1 Mar. 10:​4-9) Ha rea lokela ho beha Jehova molato ha batho ba khetha ho se mamele melao ea hae ’me ba hlokofatsa batho ba bang. Rea tseba hore Jehova oa re rata, ebile oa bona ha re tšoaroa ka tsela e se nang toka. O re utloela bohloko haholo ho feta kamoo ’mè a ka utloelang ngoana oa hae bohloko kateng. Le hoja a ke ke a re lopolla hang-hang, haufinyane o tla ahlola baetsalibe bohle ba sa bakeng ka lebaka la tsela eo ba tšoereng batho ba hae ka eona. w19.02 22 ¶13-15

Libekeng tse etellang Sehopotso pele, re ithuta haholo ka mohlala oa Jesu le kamoo a ileng a bontša boikokobetso kateng ha a ne a fana ka bophelo ba hae e le thekollo. Re batla ho etsisa boikokobetso ba Jesu le ho etsa thato ea Jehova, esita le ha ho le boima. Re nahana kamoo a ileng a bontša sebete kateng matsatsi pele ho lefu la hae. O ne a tseba hantle hore haufinyane lira tsa hae li tla mo tlotlolla, li mo otle li be li mo khokhothele thupeng. (Mat. 20:​17-19) Ho ntse ho le joalo, o ile a e-ba sebete ho isa lefung. Ha nako e ntse e atamela, o ile a bua le baapostola ba neng ba e-na le eena Gethesemane, a re: “Emang, a re eeng. Bonang! Moeki oa ka o atametse.” (Mat. 26:​36, 46) Eitse ha mokhopi oo o fihla ho tla mo tšoara o ile a ema ka pele, a ipolela hore ke eena eo ba mo batlang ’me a kopa masole hore a tlohele baapostola ba hae ba tsamaee. (Joh. 18:​3-8) Kannete Jesu o ile a bontša hore o sebete! Le mehleng ena, batlotsuoa le Bakreste ba linku tse ling ba etsisa Jesu ka ho ba sebete. w19.01 27-28 ¶7-8

Feela joalokaha setaki se kopanya ’mala e fapaneng hore se etse setšoantšo se setle, le rona re hloka ho ba le makhabane a fapakaneng e le hore re be batho ba bonolo. A mang a makhabane ao ke boikokobetso, ho mamela, mosa le sebete. Ke batho ba ikokobelitseng feela ba khonang ho mamela Molimo le ho etsa thato ea hae. Molimo o batla hore re be batho ba bonolo. (Mat. 5:5; Bagal. 5:​23) Satane ha a thabe ha re etsa thato ea Molimo. Le hoja re le batho ba ikokobelitseng le ba bonolo, batho ba bangata ba lefatše lena ba re hloile. (Joh. 15:​18, 19) Kahoo, re lokela ho ba sebete e le hore re hlole Satane. Hangata batho ba seng bonolo baa ikhohomosa, ba bohale bo tšosang ebile ha ba mamele Jehova. Satane o joalo hantle! Ha se feela a hloileng batho ba bonolo. Ba senola hore ke motho ea khopo kaha ba na le makhabane a matle ao a se nang ’ona. ’Me ba paka taba ea hore o leshano. Hobane’ng? Hobane ho sa tsotellehe hore na o etsa’ng kapa o buang, a ke ke a thibela batho ba bonolo hore ba sebeletse Jehova.​—Jobo 2:​3-5. w19.02 8-9 ¶3-5

Jehova o ne a tseba hore Bababylona ba tla tšoha. Masole a Bamede le a Bapersia a ne a tla hlasela Babylona. Jehova o ne a tla lokolla bahlanka ba hae ka hore masole ana a hlasele Babylona. (Esa. 41:​2-4) Kaha sechaba sa Babylona le lichaba tse ling li ne li tšohile, li ile tsa khothatsana hore li be matla. Li ile tsa boela tsa iketsetsa melimo ea litšoantšo kaha li ne li lumela hore e tla li pholosa. (Esa. 41:​5-7) Ka nako eo, Jehova o ile a khothatsa Bajuda ba neng ba le Babylona ka ho re: “Uena Iseraele, u mohlanka oa ka, [ho fapana le batho ba u potolohileng] . . . U se ke oa talima koana le koana, etsoe ke ’na Molimo oa hao.” (Esa. 41:​8-10) Ha Jehova a re ho bona: “Ke ’na Molimo oa hao.” O ne a batla hore ba se ke ba tšoha a bile a ba kholisa hore a ke ke a ba lahla le hore e ntse e le sechaba sa hae. O ile a boela a re ho bona: “Ke tla nka bohato, . . . ’me ke pholose.” Mantsoe ana a ile a khothatsa Bajuda haholo a ba a ba tiisa moko.​—Esa. 46:​3, 4. w19.01 4 ¶8

Mareka 1:​9-11 e bua ka lekhetlo la pele ho a mararo leo ka lona lentsoe la Jehova le ileng la utloahala le hlaha leholimong. Jehova o ile a re: “U Mora oa ka, ea ratoang; ke u amohetse.” U nahana hore Jesu o ile a ikutloa joang ha a utloa hore Ntate oa hae oa mo rata le hore oa mo tšepa? Mantsoe ana a Jehova a ile a tiisa lintho tse tharo tsa bohlokoa ka Jesu. Ea pele, Jesu ke Mora oa Jehova. Ea bobeli, Jehova o rata Mora oa hae. Ea boraro, Jehova o amohetse Mora oa hae. Ha Jehova a re “U Mora oa ka,” mantsoe ana a ne a bontša ka ho hlaka hore o na le kamano e ntle le Mora oa hae. Pele Jesu a tla lefatšeng, e ne e se e ntse e le Mora oa Molimo. Leha ho le joalo, ha Jesu a ne a kolobetsoa e ile ea e-ba Mora oa Molimo ka kutloisiso e ’ngoe hape. Ka nako eo, Molimo o ile a tlotsa Jesu ka moea o halalelang ’me a mo fa tšepo ea hore o tla khutlela leholimong ho ea busa e le Morena le Moprista ea Phahameng ’Musong oa Molimo. (Luka 1:​31-33; Baheb. 1:​8, 9; 2:​17) Kahoo, hoa utloahala hore na ke hobane’ng ha Jehova a ile a re ho Jesu: “U Mora oa ka.”​—Luka 3:​22. w19.03 8 ¶3-4

Motho oa pele oa ho fana ka keletso e fosahetseng ke Satane. Moeletsi enoa ea fosahetseng o ile a joetsa Eva hore eena le Adama ba tla thaba ha ba ka ikhethela hore na ba batla ho phela joang. (Gen. 3:​1-6) Satane o ne a buisoa ke boithati. O ne a batla hore Adama, Eva le bana ba bona ba sebeletse eena eseng Jehova. Empa Jehova o ne a ba file ntho e ’ngoe le e ’ngoe eo ba nang le eona. O ne a ba file lehae le letle, lelapa, ’mele e phethahetseng le monyetla oa ho phela ba sa shoe. Ka bomalimabe banyalani bana ba ile ba iqabanya le Jehova ka hore ba mamele Satane. Eaba ba ikenya tloara! ka har’a mathata, ba pona joaloka lekhasi le tlositsoeng sefateng. Bana ba bona ba ne ba se na monyetla oa ho tlola. (Bar. 5:​12) Le hona joale batho ba ntse ba sa mamele Molimo, ba iketsetsa borata. (Baef. 2:​1-3) Joale rea hlokomela hore ha ho motho ea bohlale joaloka Molimo joalokaha temana ea letsatsi ea kajeno e bontša. w18.12 20 ¶3-4

Moapostola Pauluse o ne a le bohlale, a rutehile a bile a tseba puo ea Seheberu le ea Segerike. (Lik. 5:​34; 21:​37, 39; 22:​2, 3) Empa ha a ne a lokela ho etsa qeto mabapi le ntho e nepahetseng kapa e fosahetseng o ne batla keletso Lentsoeng la Molimo. (Lik. 17:2; 1 Bakor. 2:​6, 7) O ile tsoela pele a ruta batho ka ’Muso oa Molimo, ’me qetellong Jehova a mo putsa. (2 Tim. 4:8) Ho hlakile hore tsela eo Jehova a nahanang ka eona e fapane hole le eo batho ba sa mo rapeleng ba nahanang ka eona. Haeba re mo lumella hore a re tataise re tla thaba ebile re tla atleha. Empa a ke ke a re qobella hore re nahane joaloka eena. “Lekhoba le tšepahalang le le masene” le baholo ba ke ke ba re khethela hore na re nahane joang. (Mat. 24:​45; 2 Bakor. 1:​24) Ho e-na le hoo, re na le boikarabello ba ho etsa hore tsela eo re nahanang ka eona e lumellane le eo Jehova a nahanang ka eona. w18.11 20-21 ¶12-13

Molimo o ile sebelisa Esaia ho profeta hore ka mor’a hore sechaba sa hae se khutlele habo sona, se ne se tla ja poqo ka hlanaka. Se ne se sa tl’o hlaseloa ke batho kapa libatana. Bana hammoho le batho ba baholo ba ne ba tla bolokeha. (Esa. 11:​6-9; 35:​5-10; 51:3) Esaia o ile a boela a bontša hore lefatše lohle, eseng Baiseraele feela, “le tla tlala tsebo ea Jehova joalokaha metsi a koahetse leoatle.” Esaia o ile a boela a hatisa taba ea hore batho ba tsoang botlamuoeng ba ne ba ke ke ba tšosoa ke liphoofolo kapa batho. Lefatše le ne le tla ba hlahisetsa litholoana tse ngata, kaha le ne le tla be le nosetsoa ka metsi a mangata feela joalokaha serapa sa Edene se ne se nosetsoa. (Gen. 2:​10-14; Jer. 31:​12) Na boprofeta boo bo ile ba phethahala ka nako eo feela eaba ke phetho? Bo ne bo boetse bo itse batho ba tla phekoloa, empa ha ho bopaki bo tiisang hore batho ba ile ba phekoloa ka mohlolo ka nako eo. Ka mohlala, batho ba nang le bokooa ba pono ha baa ka ba bona. Molimo o ne a bolela hore batho ba tla phekoloa nakong e tlang. w18.12 5 ¶11-12

Ho sebeletsa Molimo ke ntho ea bophelo bohle. Kahoo, u ka etsa’ng e le hore u ikemisetse ho sebeletsa Jehova bophelo bohle ba hao? Lula u ipha nako ea ho ithuta ka Lentsoe la Molimo le ho nahanisisa ka lintho tseo u ithutang tsona. Ha u etsa joalo u tla rata Molimo ’me u tla ikemisetsa ho lula u mo sebeletsa. Liproverbia 23:​23 e re re boetse re hloka ho reka “bohlale, taeo le kutloisiso.” Ha se hore feela re hloka ho tseba Lentsoe la Molimo, empa re lokela ho bontša ka liketso hore rea le rata. Re tla boela re utloisise hore na Jehova o batla eng ebe re bontša hore re bohlale ka ho mo mamela. Bibele ea re laea e le ho re thusa ho itšoara ka tsela eo Jehova a e batlang. Re lokela ho ikokobelletsa taeo eo re e fumanang kaha e bohlokoa ho feta silevera.​—Liprov. 8:​10. w18.11 9 ¶3; 11 ¶13-14

Ke ntho efe eo u ke keng oa phela u se na eona? Na u ne u ka thabela ho e rekisa ka theko e tlaase? Ho rona likarabo tsa lipotso tsena li bonolo hobane ntho ea bohlokoa ke kamano ea rona le Jehova eo re ke keng ra e fa mang kapa mang. Letlotlo le leng leo re nang le lona ke ho tseba ’nete ka Bibele e re thusa hore re be metsoalle ea Jehova. (Bakol. 1:​9, 10) Ak’u nahane ka lintho tseo Morupeli oa Rona e Moholo e leng Jehova a re rutang tsona ka Lentsoeng la hae. O re thusa ho tseba makhabane a hae le hore na lebitso la hae le bolela’ng. Hape o re bolella kamoo a re pholositseng kateng ka lefu la mora oa hae. O re bolella ka ’Muso oa hae le ka tšepo ea hore lefatše e tla ba Paradeise. Jehova o boetse o re ruta hore na re lokela ho itšoara joang. Lintho tsena kaofela ke letlotlo kaha li re thusa hore re atamele haufi le Jehova Molimo oa rona, ebile li re thusa hore re thabele bophelo. w18.11 3 ¶1-2

Re lokela ho lula re hopola hore batho ba buang leshano ba ke ke ba khona ho ipatela Jehova hobane “lintho tsohle li hlobotse ’me li pepesitsoe phatlalatsa mahlong” a hae. (Baheb. 4:​13) Mohlala, Bibele e bua ka banyalani ba bang bao Satane a ileng a ba susumetsa hore ba bue leshano. Banyalani bao ba ileng ba thetsa baapostola ke Ananiase le Safira. Ba ile ba rekisa thepa ea bona eaba ba fa baapostola chelete e sa fellang. Ba ne ba batla ho bonahale eka ke batho ba fanang, kahoo ba bua leshano la hore ba fane ka chelete kaofela. Jehova o ile a bona bolotsana boo ba bona eaba oa ba khalema. (Lik. 5:​1-10) Jehova o ikutloa joang ka batho ba buang leshano? O tl’o lahlela Satane le bohle ba leshano ba bile ba sa bake ka “letšeng la mollo.” (Tšen. 20:​10; 21:8; Pes. 5:6) Rea tseba hore Jehova ha se “motho hore a bue mashano” ebile ho ke ke ‘ha khoneha hore a bue leshano.’ (Num. 23:​19; Baheb. 6:​18) Jehova o hloile “leleme la bohata.” (Liprov. 6:​16, 17) E le hore a re amohele, re lokela ho bua ’nete joalokaha a batla. w18.10 8 ¶10-13

U ka etsa’ng haeba mohiri oa hao a kopa hore u ntše chelete e le hore ho tle ho etsoe mokete oa kereke mosebetsing? E ka ba bohlale hore u nahane esale hona joale hore na ha boemo bo joalo bo hlaha u tla etsa’ng. Ha u etsa joalo, ho tla ba bonolo hore u etse qeto e nepahetseng. Haeba re nahana esale pele hore na re tla etsa’ng ha re hlaheloa ke maemo a tšohanyetso re tla lula re tšepahala. Re se re ntse re kholisehile hore re ke ke ra tšela mali kapa likarolo tsa ’ona tse ’ne empa ho na le likaroloana tse ling tseo ho tsona motho e mong le e mong a lokelang ho iketsetsa qeto ea ho li amohela kapa ho li hana. (Lik. 15:​28, 29) Ho molemo ho etsa qeto esale hona joale re tle re se ke ra iphumana re se re tlameha ho e etsa ho se ho le hobe. E ka ba hantle hore hona joale re ithute hore na Jehova o nahana joang ka taba ena, ebe re tlatsa liforomo tseo re hlokang ho li tlatsa re be re bolelle ngaka ea rona hore na re ka rata ho phekoloa joang. w18.11 24 ¶5; 26 ¶15-16

Jehova ke molisa ea molemo, oa re tsotella ebile o re sireletsa khahlanong le lira tsa rona. Kahoo, rea khothala ha bofelo bo ntse bo atamela. Jehova o tla re hlokomela le ka matšoenyeho a maholo a haufi le ho qala. (Tšen. 7:​9, 10) Ho sa tsotellehe hore na re baholo kapa re banyane, re phetse hantle kapa re phela le bokooa, re ke ke ra tšoha nakong eo. Empa re tla ba sebete re hopole mantsoe a Jesu a reng: “Le eme tsoee! ’me le phahamise lihlooho, hobane topollo ea lona ea atamela.” (Luka 21:​28) Re tla ema re tiile esita le ha Gogo a re hlasela e leng lichaba tse matla tse tla beng li ikopantse. (Ezek. 38:​2, 14-16) Ke eng e tla re thusa hore re be sebete? Re tla thusoa ke hore Jehova o ntse a e-s’o fetohe, o tla lula a re sireletsa le ho re hlokomela.​—Esa. 26:20. w18.09 26 ¶15-16

E tlameha ebe Baiseraele ba ile ba khothala haholo ha ba utloa mantsoe a na a Jehova a ka holimo. Kaha u mohlanka oa Jehova, kholiseha hore Jehova o u rata haholo. Ka Bibeleng, Jehova o tšepisa bahlanka ba hae o re: “Joaloka Ea matla, o tla pholosa. O tla thaba ka lebaka la hao ka nyakallo.” (Sof. 3:​16, 17) Ho sa tsotellehe mathata ao bahlanka ba Jehova ba kopanang le ’ona, Jehova o tšepisa hore o tla ba matlafatsa le ho ba tšehetsa kapa ho ba tšelisa. Bibele e re: “Ka sebele le tla anya. Le tla sikoa lehlakoreng, ’me le phaphathoe mangoleng. Joaloka motho eo ’m’ae a ntseng a mo tšelisa, kahoo le ’na ke tla ’ne ke le tšelise.” (Esa. 66:​12, 13) Nahana kamoo lesea le ikutloang kateng ha ’mè a le sikile kapa a le bapalisetsa mangoleng. Taba ena e re ruta kamoo Jehova a hlileng a ratang bahlanka ba hae kateng. Kholiseha hore Jehova o nka u le bohlokoa haholo.​—Jer. 31:3. w18.09 13 ¶6-7

Maemong a mang, Baiseraele ba ne ba lokela ho ithaopa ha ho ne ho hlokeha hore ba thuse. (Ex. 36:2; Neh. 11:2) Mehleng ena u ka ithaopela ho tela nako ea hao, lintho tseo u nang le tsona hammoho le litsebo tsa hao bakeng sa ho thusa bara le barali babo rona. Ha u etsa joalo, u tla thaba haholo ebile Jehova o tla u hlohonolofatsa. Batho bohle ba ithaopelang ho thusa mokhatlo oa Jehova ba ba le metsoalle. Mohlala, Morali’abo rona Margie o na le lilemo tse 18 a etsa mosebetsi oa ho haha Liholo Tsa ’Muso. Ka lilemo tse ’maloa o ’nile a ruta baralib’abo rona ba ntseng ba le bacha ho etsa mosebetsi. O hlokometse hore ha a etsa joalo, o khothatsana le Bakreste-’moho le eena hore ba tsoele pele ho sebeletsa Jehova. (Bar. 1:​12) Metsoalle eo Margie a bileng le eona ha a ntse a haha Liholo Tsa ’Muso, e mo khothatsa haholo ha ho nyolosetsa. Na u kile oa ithaopela ho haha Liholo Tsa ’Muso? w18.08 25 ¶9, 11

Timothea o ne a ka ba lilemo li 30 ha Pauluse a mo ngolla. Ka nako eo Pauluse o ne a mo file boikarabelo bo boima. Ho sa tsotellehe hore na lebaka la hore a mo eletse e ne e le lefe, keletso eo e ne e hlakile. Ha rea lokela ho kala barab’abo rona ka mahlo feela hobane ba le banyenyane. Re lokela ho hopola hore Jesu le eena o ile a etsa tšebeletso ea hae ha a le lilemong tsa bo-30. Ho ka etsahala hore ebe batho ba bacha lilemong ba khelloa fatše litsong tsa habo bona. Ka lebaka leo, baholo ba ka ba leqe ho buella barab’abo rona ba bacha lilemong hore ebe baholo kapa bahlanka ba sebeletsang. Baholo bohle ba lokela ho hopola hore Bibele ha e bolele lilemo tseo motho a lokelang ho ba ho tsona e le hore a ka buelloa hore e be moholo kapa mohlanka ea sebeletsang.​—1 Tim. 3:​1-10, 12, 13; Tite 1:​5-9. w18.08 11-12 ¶15-16

Re hloka ho tseba lintlha ka botlalo e le hore re etse liqeto tse nepahetseng. Kahoo, re lokela ho ba hlokolosi ha re khetha lintho tseo re li balang. (Bafil. 4:​8, 9) Ha rea lokela ho senya nako ka ho bala litaba liwebsaeteng tseo re sa kholisehang hantle ka tsona. Taba ea bohlokoa le ho feta ke hore re qobe ho kena liwebsaeteng tsa bakoenehi. Sepheo sa bona ke ho senya Lipaki Tsa Jehova lebitso le ho bua mashano ka mosebetsi oa rona. Ha re sa tsebe lintlha kaofela re ka etsa liqeto tse fosahetseng. Le ka mohla ha rea lokela ho nahana hore ho kena liwebsaeteng tse joalo ho ke ke ha re khelosa. Nahana ka lihloela tse 12 tseo Moshe a neng a li romme hore li il’o hloela Naha e tšepisitsoeng, tse 10 tsa tsona li ile tsa fana ka tlaleho e fosahetseng. (Num. 13:​25-33) Lihloela tseo li ile tsa feteletsa litaba eaba li tšosa batho ba Jehova. (Num. 14:​1-4, 6-10) Ho e-na le hore ba batle ho tseba lintlha kaofela le ho tšepa Jehova, ka booatla ba ile ba kholoa mashano. w18.08 4 ¶4-5

Ka kakaretso, batho ba bangata ba na le makhabane. Hape, ha se kamehla batho bao e seng Lipaki ba etsang lintho tse mpe. Haeba u tloaelane le batho ba joalo, na u nahana hore ho nepahetse ho tloaelana le bona? Na ba u susumelletsa hore u be le kamano e ntle le Jehova? Ke lintho life tseo ba li nkang e le tsa bohlokoa? Mohlala, na ba lula ba bua ka feshene, chelete, lisebelisoa tsa morao-rao tsa theknoloji, boikhathollo le lintho tse joalo? Na ba lula ba bua hampe ka batho ba bang le ho etsa mesoaso e nyonyehang? Jesu o ile a re: “Molomo o bua ho tsoa ho se tletseng pelong.” (Mat. 12:​34) Haeba u hlokomela hore metsoalle ea hao e u sitisa hore u be ka lehlakoreng la Jehova, nka bohato. Fokotsa nako eo u e qetang u e-na le bona kapa u khaotse ho ba motsoalle oa bona haeba ho hlokahala.​—Liprov. 13:​20. w18.07 19 ¶11

Ha Moshe a ne a le lilemo li 80, Jehova o ile a mo fa mosebetsi oa ho lokolla Baiseraele bokhobeng Egepeta. (Ex. 3:​10) Ka makhetlo a mangata Moshe o ile a leka ho hana. Leha ho le joalo, Jehova o ile a mo mamella a ba a mo fa matla a hore a etse mehlolo. (Ex. 4:​2-9, 21) A ka be a ile a qobella Moshe hore a mo mamele. Empa ka mosa o ile a tiisetsa mohlanka enoa oa hae ea ikokobelitseng hore o tla mo thusa. Na Jehova o ne a hamela letanteng? Le letho, qetellong Moshe e ile ea e-ba moeta-pele ea ikhethang kaha o ne a sebelisana le batho ba bang ka tsela eo Jehova a sebelisanang le eena ka eona. Ho bohlokoa hore u etsise Jehova ka hore u be mosa u be u mamelle batho bao u ba etellang pele. (Bakol. 3:​19-21; 1 Pet. 5:​1-3) Haeba u etsisa Jehova le Jesu ho tla ba bonolo hore batho ba bang ba u atamele ’me u tla ba khothatsa.​—Mat. 11:​28, 29. w18.09 24-26 ¶7-10

U ka kenya letsoho joang hore ho be le bonngoe ka phuthehong? Haeba u se u ntse u qalile ho etsa joalo, u etsa ntho e ntle. U lokela ho ‘atoloha’ e le hore u tsebe bara le barali babo rona. (2 Bakor. 6:​11-13) U ka sebetsa ka thata hore u khantše leseli ho baahisani ba hao. Mantsoe a hao a mosa le liketso tsa hao li ka etsa hore baahisani ba hao ba batle ho ithuta Bibele. Ipotse: Baahisani ba ka ba ntalima ke le motho ea joang? Na ke boloka sebaka seo ke lulang ho sona se le makhethe ka linako tsohle, e leng ntho e ka khahlang baahisani ba ka? Na ke lula ke leka ho thusa batho ba bang?’ Ha u ntse u qoqa le Bakreste-’moho le uena, u ka ba bolella kamoo mosa oa bona le boitšoaro ba bona bo botle bo thusitseng batho ba bang kateng ebang ke baahisani, basebetsi-’moho kapa batho bao u kenang sekolo le bona. U ka utloa liphihlelo tsa bona tse monate.​—Baef. 5:9. w18.06 24 ¶13-14

Batho ba bolaileng morutuoa Setefane le bona ba ne ba ikutloa ka tsela ena hammoho le ba ileng ba bolaea balateli ba Jesu. (Lik. 6:​8, 12; 7:​54-60) Hoa makatsa hore ebe batho bao ba hlanyetsang bolumeli, ba ile ba bolaea batho ’me ba tlola melao ea Molimo eo ba ipolelang hore baa mo rapela. (Ex. 20:​13) Hoa hlaka hore matsoalo a bona a ne a ba thetsa. Re ka etsa’ng ho qoba hore matsoalo a rona a se ke a sebetsa hantle? Melao le melao-motheo e hlahang ka Bibeleng e ‘molemo bakeng sa ho ruta, bakeng sa ho khalemela, bakeng sa ho otlolla lintho le bakeng sa ho laea ka ho loka.’ (2 Tim. 3:​16) Kahoo, ha re ithuta Bibele, re nahanisisa ka lithuto tsa eona, re bile re sebelisa lintho tseo re ithutileng tsona, re tla be re koetlisa matsoalo a rona hore a re thuse ho nahana ka tsela eo Jehova a nahanang ka eona. A tla re tataisa ka tsela e nepahetseng. w18.06 16-17 ¶3-4

Sabole eo lesole la Roma le neng le e sebelisa e ne e le bolelele ba lisenthimithara tse 50. E ne e sebelisoa ha motho a loana a le haufi le sera sa hae. Masole a Roma a ne a tseba ho sebelisa sabole hobane letsatsi le letsatsi a ne a ikoetlisetsa ho e sebelisa. Moapostola Pauluse o ile a re Lentsoe la Molimo le tšoana le sabole. Re lokela ho ithuta ho le sebelisa ka tsela e nepahetseng ha re buella tumelo ea rona kapa re lokisa tsela eo re nahanang ka eona. (2 Bakor. 10:​4, 5; 2 Tim. 2:​15) Ha ho hlokahale hore re tšabe Satane le bademona. Le hoja ba e-na le matla, ha ba matla ho feta Jehova. Ba ke ke ba phela ka ho sa feleng. Haufinyane, nakong ea Puso ea Kreste ea Lilemo Tse Sekete, ba tla kenngoa chankaneng ’me ba se hlole ba utloisa batho bohloko. Ka mor’a moo, ba tla felisoa. (Tšen. 20:​1-3, 7-10) Re tseba sera sa rona, merero ea sona le maqiti a sona. Jehova o tla re thusa hore re eme re tiile khahlanong le sona. w18.05 30 ¶15; 31, 19-21

Adama o ne a tseba hantle hore linoha ha li tsebe ho bua. E ka ’na eaba o ile a nahana hore lengeloi le buile le Eva le sebelisa noha. (Gen. 3:​1-6) Adama le Eva ba ne ba sa tsebe letho ka lengeloi lena. Leha ho le joalo, Adama o ile a ikhethela ho se mamele Jehova ’me a latela Satane eaba e e-ba marabele. (1 Tim. 2:​14) Hang-hang ka mor’a moo Jehova o ile a hlakisa hore na sera sena se neng se khelositse Adama le Eva ke mang, a ba a tšepisa hore qetellong se tla timetsoa. Empa Jehova o ile a re lemosa hore lengeloi lena le ileng la bua le Eva le sebelisa noha, le tla ba le matla a ho hanyetsa batho ba ratang Molimo. Leha ho le joalo, le ne le tla ba hanyetsa ho fihlela ho fetile nako e itseng. (Gen. 3:​15) Jehova o ile a khetha hore le ka mohla a se ke a re bolella lebitso la lengeloi lena le ileng la mo fetohela. Hape Molimo o ile a khetha hore a se ke a bolela le lebitso le hlalosang sera sena ho fihlela ho fetile lilemo tse fetang 2 500 le entse borabele.​—Jobo 1:6. w18.05 22 ¶1-2

Haeba u kile oa ikutloa u nyahame ha u sebetsa tšimo eo batho ba teng ba sa mameleng, u ikutloa ka tsela eo Pauluse a neng a ikutloa ka eona. Ha a ntse a etsa tšebeletso ea hae e nkileng lilemo tse ka bang 30, o ile a thusa batho ba bangata hore e be barutuoa ba Kreste. (Lik. 14:​21; 2 Bakor. 3:​2, 3) Leha ho le joalo, ha aa ka a atleha ho thusa Bajuda ba bangata hore e be barapeli ba Jehova. Ho e-na le hoo, batho ba bangata ba ile ba mo hanyetsa le ho mo hlorisa. (Lik. 14:​19; 17:​1, 4, 5, 13) Tsela eo ba ileng ba etsa lintho ka eona e ile ea ama Pauluse joang? O ile a re: “Ke bolela ’nete mabapi le Kreste . . . ke na le mesarelo e meholo le bohloko bo sa khaotseng ka pelong ea ka.” (Bar. 9:​1-3) Ke hobane’ng ha Pauluse a ne a ikutloa joalo? O ne a rata mosebetsi oa boboleli. O ne a ruta Bajuda molaetsa oa Bibele hobane a ba utloela bohloko. O ile a utloa bohloko haholo ha ba hana ho mamela. Joaloka Pauluse, le rona re bolella batho molaetsa oa Bibele hobane re ba utloela bohloko.​—Mat. 22:​39; 1 Bakor. 11:1. w18.05 13 ¶4-5

Pauluse o ile a hlakisa hore le motho ea nang le boikarabello ba ho khothatsa batho ba bang le eena o ntse a hlokoa ho khothatsoa. O ile a re ho Bakreste ba Roma: “Ke hlolohetsoe ho le bona, e le hore nka le fa mpho e ’ngoe ea moea e le hore le tiisoe; kapa, ho e-na le hoo, e le hore ho ka ba le ho khothatsana har’a lona, e mong le e mong ka tumelo ea e mong, ea lona le ea ka.” (Bar. 1:​11, 12) Le hoja a ne a tloaetse ho khothatsa batho ba bang, le eena o ne a hloka ho khothatsoa ka linako tse ling. (Bar. 15:​30-32) Batho ba iteletseng ho sebeletsa Molimo ba hloka ho babatsoa. Ho na le batho ba khethang hore ba se ke ba kena lenyalong hobane ba batla ho nyala kapa ho nyaloa feela “Moreneng.” Batho bana le bona ba hloka ho khothatsoa. (1 Bakor. 7:​39) Re boetse re lokela ho khothatsa Bakreste-’moho le rona ba kulang le ba mameletseng mathata a mang.​—2 Bathes. 1:​3-5. w18.04 21 ¶3-5