July

Re phela ‘linakong tse mahlonoko,’ “tseo ho leng thata ho sebetsana le tsona.” Pele lefatše e e-ba paradeise, bophelo bo tla ’ne bo thatafale le ho feta. (2 Tim. 3:1) Re lokela ho ipotsa: ‘Na ke tšepile Jehova hore a nthuse a be a ntataise?’ Mopesaleme o ile a bua ka bohlokoa ba hore re lule re tšepa Jehova ha re tobane le mathata. (Pes. 123:​1-4) O ile a tšoantša tsela eo re tšepang Jehova ka eona le tsela eo lekhoba le tšepang mong’a lona ka eona. Lekhoba ha le tšepe feela hore mong’a lona o tla le sireletsa le ho le fa lijo, empa le boetse lea ithuta hore na mong’a lona o rata eng ebe le sebetsa ka thata ho mo khahlisa. Ka tsela e tšoanang, re lokela ho ithuta hore na Jehova o rata eng ka hore re bale Bibele ebe rea mo mamela. Ha re etsa joalo, re kholisehile hore Jehova o tla re thusa ha re mo hloka. w18.07 12 ¶1-2

Jesu o ne a bua ka ho lokolloa litlamong kapa ‘bokhobeng ba sebe.’ (Joh. 8:​34) Kaha re baetsalibe, re ka etsa lintho tse fosahetseng ra ba ra sitoa ho etsa lintho tseo re tsebang hore li nepahetse. Ka lebaka leo, re makhoba a sebe ’me liphello ke ho se khone ho etsa lintho tse itseng, ho utloa bohloko le ho shoa. (Bar. 6:​23) Re tla ba le bolokolohi joaloka Adama le Eva hafeela re lokolotsoe molaong oa sebe le lefu. Mantsoe a Jesu a reng “haeba le lula lentsoeng la ka,” a bontša hore ho na le lintho tseo re lokelang ho li etsa e le hore a re lokolle. (Joh. 8:​31) Kaha re Bakreste, ha re sa iphelela, ho e-na le hoo re khethile ho phela tumellanong le lithuto tsa Jesu. (Mat. 16:​24) Feela joalokaha Jesu a boletse, re tla lokoloha e le kannete nakong eo re fumanang litlhohonolofatso tsohle tse tlisoang ke sehlabelo sa hae sa thekollo. w18.04 7 ¶14-16

Jehova o nahanela maikutlo a bahlanka ba hae, esita le ha ba nahana ka tsela e fosahetseng. Nahana ka mohlala oa Jonase. Jehova o ile a roma moprofeta enoa hore a il’o phatlalatsa molaetsa oa kahlolo ho Baninive. Ha ba mamela molaetsa oo ’me ba baka, Jehova o ile a khetha ho ba tšoarela. Empa qeto eo ea Jehova e ile ea halefisa Jonase. O ile “a tuka ke bohale” kaha boprofeta ba hae ha boa ka ba phethahala. Leha ho le joalo, Jehova o ile a mo mamella a ba a mo thusa hore a fetole tsela eo a nahanang ka eona. (Jon. 3:​10–4:​11) Hamorao Jonase o ile a utloisisa thuto eo Jehova a neng a mo ruta eona, kahoo o ile a khona ho sebelisoa hore a ngole tlaleho ena molemong oa rona. (Bar. 15:4) Tsela eo Jehova a ’nileng a tšoara bahlanka ba hae ka eona e bontša hore o nahanela maikutlo a batho. O tseba mathata ao e mong le e mong oa rona a thulanang le ’ona. O utloisisa tsela eo re ikutloang ka eona esita le mefokolo ea rona. Hape ‘a ke ke a re tlohela hore re lekoe ho feta seo re ka se jarang.’ (1 Bakor. 10:​13) Mantsoe aa a khothatsa hakaakang! w19.03 16 ¶6-7

Tlas’a molao oa Moshe, boikarabelo ba banna ba holileng e ne e le ho ahlola litaba tse amanang le borapeli ba Jehova, liqhoebeshano le litlolo tsa molao. A re ke re hlahlobeng mehlala e latelang. Haeba Moiseraele a ne a ka bolaea motho, o ne a sa bolaoe hang-hang. Ba boholong motseng oa habo ba ne ba tla batlisisa hore na ho etsahetse’ng pele ba etsa qeto ea hore na motho eo a bolaoe kapa che. (Deut. 19:​2-7, 11-13) Ba ne ba ahlola linyeoe tse fapaneng tsa bophelo ba letsatsi le letsatsi, tse kang litsekisano tsa thepa le mathata a malapa. (Ex. 21:​35; Deut. 22:​13-19) Ha ba boholong ba ahlola litaba ka toka le Baiseraele ba mamela Molao, kaofela ba ne ba rua molemo ba bile ba tlotlisa Jehova. (Lev. 20:​7, 8; Esa. 48:​17, 18) Kahoo, rea ithuta hore ntho e ’ngoe le e ’ngoe eo re e etsang e bohlokoa ho Jehova. O batla hore re tšoare batho ba bang ka toka, re be re ba rate. Hape, o ela hloko ntho e ’ngoe le e ’ngoe eo re e etsang, esita le moo re leng bang. w19.02 23 ¶16-18

Ho thata hore re be batho ba bonolo ha re imetsoe kelellong. Re ka ’na ra bua mantsoe a hlabang kapa ra etsa lintho tse ka utloisang batho ba bang bohloko. Haeba u kile oa imeloa kelellong, mohlala oa Jesu o ka u thusa haholo. Likhoeling tsa ho qetela Jesu a le lefatšeng, o ne a imetsoe haholo kelellong. O ne a tseba hore o tl’o ahloleloa lefu ’me a hlokofatsoe. (Joh. 3:​14, 15; Bagal. 3:​13) Nakoana pele ho lefu la hae, o ile a re o khathatsehile haholo. (Luka 12:​50) Eaba matsatsi a seng makae pele ho lefu la hae o re: “Moea oa ka o khathatsehile.” Mantsoe ao Jesu a ileng a a bua ha a ne a rapela Ntate oa hae a bontša hore o ikokobelitse le hore oa mamela. (Joh. 12:​27, 28) Ha nako ea teng e fihla, Jesu o ile a inehela ho lira tsa Molimo tse ileng tsa mo tlotlolla le ho mo bolaea ka sehloho. Ka bonolo Jesu o ile a phetha thato ea Molimo, le hoja a ne a imetsoe kelellong a bile a ntse a hlokofatsoa. Ruri re ka cho ka phatla e phahameng hore Jesu ke mohlala o babatsehang oa motho ea ileng a lula a le bonolo le hoja a ne a imetsoe kelellong.​—Esa. 53:​10. w19.02 11/14-15

Ka linako tse ling ha ho nyolosetsa re ka ’na ra hloka ho ba sebete e le hore re be teng libokeng kamehla. Bara le barali babo rona ba bang ba ba teng libokeng kamehla le hoja ba imetsoe ke matšoenyeho, ba nyahame, kapa ba kula. Ba bang ka sebete ba ba teng libokeng le hoja ba hanyetsoa ka matla ke ba malapa a bona kapa ba boholong ’musong. U ka inahanela hore na mohlala oa rona o matlafatsa bara le barali babo rona ba literonkong ka lebaka la tumelo ea bona hakae. (Baheb. 13:3) Ha ba utloa hore re ntse re tsoela pele re sebeletsa Jehova ho sa tsotellehe mathata ao re thulanang le ’ona, tumelo ea bona ea matlafala, ba tsoha molota ebile ba lula ba tšepahala. Ha Pauluse a ne a le teronkong Roma, kamehla o ne a thaba ha a utloa hore Bakreste-’moho le eena ba ntse ba sebeletsa Molimo ka botšepehi. (Bafil. 1:​3-5, 12-14) Pauluse o ile a ngolla Baheberu lengolo nakoana pele a lokolloa kapa hang ka mor’a moo. Lengolong leo, o ile a khothalletsa Bakreste ba moo hore ba se ke ba khaotsa ho bokana hammoho.​—Baheb. 10:​25. w19.01 28 ¶9

Satane o batla hore re tšoane le eena ’me re se ke ra mamela Jehova, re be baithati. O sebelisa batho bao re phelang le bona ba sa rateng Molimo a tšepile hore re tla ba etsa metsoalle ea rona ’me ba senye kamano ea rona le Molimo. (1 Bakor. 15:​33) Satane o boetse o re khelosa ka hore re itšepe ho e-na le ho tšepa Jehova. (Bakol. 2:8) O susumetsa batho hore ba utloe eka ha ba ruile ba tla phela hamonate. Ba tela ntho e ’ngoe le e ’ngoe ho akarelletsa setsoalle sa bona le Molimo le ho ja ka linako tse ling ba ke ke ba rua. (1 Tim. 6:​10) Empa rona rea thaba kaha Jehova o re thusa ho tseba hore na ntho ea bohlokoa ke efe.​—Moek. 7:​12; Luka 12:​15. w19.01 15 ¶6; 17 ¶9

Pele Jesu a tla lefatšeng, ho ne ho se ho ntse ho e-na le bahlanka ba Molimo ba neng ba khothatsa batho. Ba ne ba tseba bohlokoa ba ho khothatsa batho ba bang. Nakong eo Baassyria ba neng ba batla ho hlasela batho ba Molimo, Ezekiase o ile a khothatsa batho bohle ba Juda. Ka mor’a hore a ba khothatse, ba ile ba tsoha molota. (2 Likron. 32:​6-8) Le hoja Jobo ka boeena a ne a hloka ho khothatsoa, o ile a ruta Elifaze, Bildade le Tsofare tsela e nepahetseng ea ho khothatsa. O ile a ba bolella hore hoja e ne e le bona ba hlokang ho tšelisoa, ‘o ne a tla ba matlafatsa ka mantsoe a molomo oa hae’ le ‘matšeliso a molomo oa hae.’ (Jobo 16:​1-5) Empa qetellong Jobo o ile a khothatsoa ke Jehova le Elihu.​—Jobo 33:​24, 25; 36:​1, 11; 42:​7, 10. w18.04 16 ¶6; 17 ¶8-9

Moprofeta Esaia o ne a se a ile a re: “Jehova o tla tla joaloka ea matla, ’me letsoho la hae le tla busa bakeng sa hae.” (Esa. 40:​10) Hangata ha Bibele e bua ka matla e sebelisa lentsoe “letsoho.” Kahoo, ha e re “letsoho la hae le tla busa,” e re hopotsa hore Jehova ke Morena ea matla haholo. O ile a sebelisa matla ana ho sireletsa bahlanka ba hae nakong e fetileng, le mehleng ena o ntse a tsoela pele ho etsa joalo. (Deut. 1:​30, 31; Esa. 43:​10.) Jehova o lula a ikemiselitse ho re matlafatsa nakong eo lira tsa rona li batlang ho re tšosa. Libakeng tse ling li leka ka matla ho thibela mosebetsi oa rona. Leha ho le joalo, ha li re lihe moea hobane Jehova o re matlafatsa ka ho re: “Sebetsa le ha e le sefe se tla etsoa khahlanong le uena se ke ke sa atleha.”​—Esa. 54:​17. w19.01 5-6 ¶12-13

Ha re tšoane le liphoofolo kaha re bopiloe re e-na le boikutlo ba ho batla ho sebeletsa Molimo. (Mat. 4:4) Haeba u ikemiselitse ho mo sebeletsa u tla thaba, u be bohlale hape u be le temoho. Jehova o sebelisa Lentsoe la hae le “lekhoba le tšepahalang le le masene” ho re thusa hore re mo tsebe re be re mo sebeletse. (Mat. 24:​45) O fana ka mekhoa e mengata e ka re thusang. (Esa. 65:​13, 14) Litaba tse hlahang ka Bibeleng le tseo “lekhoba” le li ngolang li ka u thusa ho ba bohlale le ho nahana, tsa ba tsa u sireletsa. (Liprov. 2:​10-14) Ka mohlala, li u thusa ho tseba hore Molimo ke eena ea bopileng lintho. Hape li u thusa ho hlokomela hore ha se ’nete hore u ka thaba feela ha u e-na le chelete e ngata. Li boetse li u thusa ho itšoara ka tsela e tla u tsoela molemo. Ka lebaka leo, tsoela pele ho ithuta ka Molimo le ho nka lintho tsena tseo a u rutang tsona e le letlotlo. w18.12 20 ¶6-7

Na ho na le ka mohla matsatsi a rona a tla ba mangata “joaloka matsatsi a sefate”? Ho na le lifate tse ling tse phelang lilemo tse likete. Batho ba tla lokela ho phela hantle e le hore ba phele nako e telele joalo. Haeba ba tla phela lefatšeng le khutsitseng le tikolohong e ntle joalokaha Esaia a hlalositse, e tla be e le hore ba phela paradeiseng. Ruri boprofeta boo bo tla be bo phethahetse. Nahana kamoo litšepiso tseo li re tiisetsang kateng hore ho tl’o ba le paradeise nakong e tlang. Nakong eo, batho bohle ba tla be ba hlohonolofalitsoe ke Molimo. Ha ho na motho ea tla behoa tsietsing ke liphoofolo kapa batho ba khopo. Batho ba nang le bokooa ba pono, ba kutlo le ba ho tsamaea ba tla phekoloa. Batho ba tla ikahela matlo ba be ba hlahise lijo tse nang le phepo e ntle. Ba tla phela nako e telele ho feta lifate. Ha re bala Bibele re fumana hore bokamoso boo bo haufi. Ba bang ba ka ’na ba re boprofeta bona ha bo bolele hore ho tl’o ba le paradeise lefatšeng. U na le mabaka afe a utloahalang a ho lebella hore ho tla ba le paradeise lefatšeng? Motho e moholo ka ho fetisisa ea kileng a phela o ile a re fa mabaka a utloahalang a ho lumela hore paradeise ea tla.​—Luka 23:​43. w18.12 5 ¶13-15

Re ka khona ho fetoha hobane Jehova o re bopile joalo. Lintho tseo re li nahanang ke tsona tse tla cho hore na re fetoha joang. Ha re lula re nahana ka tsela eo Jehova a nahanang ka eona, re tla nka ho etsa thato ea hae e le eona ntho e nepahetseng. Ha re etsa joalo, ho tla ba bonolo hore re nahane ka tsela eo a nahanang ka eona. E le hore re nahane ka tsela eo Jehova a nahanang ka eona, re lokela ho ‘khaotsa ho ba ka sebopeho sa tsamaiso ena ea lintho.’ Re boetse re lokela ho qoba hore maikutlo a batho ba sa rapeleng Molimo a re susumetse. Re ka bapisa taba ena le lijo. Motho a ka leka ho ntlafatsa bophelo ba hae ka hore a je lijo tse nang le phepo e nepahetseng. Empa ha a boela a ja lijo tse bolileng o tla ba le mathata. Ka tsela e tšoanang ho tla be ho se na thuso haeba re nahana ka tsela eo Jehova a nahanang ka eona empa re susumetsoa ke batho ba sa mo rapeleng. w18.11 21 ¶14-15

Ikemisetse ho lula u sebeletsa Jehova le ha ho hlaha mathata. Lula u tlamile letheka la hao ka ’nete. Ka mohlala, mehleng ea ho ne ho ngoloa Bibele, lesole le ne le sireletsa letheka la lona ka ho itlama ka lebanta le sephara. E le hore lebanta leo le sireletse lesole le ne le lokela ho le tlama ka thata. Le ho rona Lentsoe la Molimo le joaloka ka lebanta leo. Haeba re le bala letsatsi le letsatsi re tla etsa liqeto tse nepahetseng. Feela joalokaha lesole le ne le ke ke la ea ntoeng le sa iphasa ka lebanta la lona, le rona ha rea lokela ho khaotsa ho ithuta Bibele. Empa re tla lula re ithuta eona e le hore re se ke ra rekisa ’nete. Haeba re lekeha ho etsa lintho tse fosahetseng, Bibele e ka re thusa ho etsa thato ea Jehova. w18.11 12 ¶15

Re ke ke ra tseba Lentsoe la Jehova ha re sa ithute lona, empa ho na le lintho tseo re lokelang ho li tela e le hore re le tsebe. Solomone o ile a re ha re se re ‘rekile ’nete’ kapa re e-na le eona, re se ke ra e “rekisa” kapa ra e lahla. Ka linako tse ling ho hlokahala boiteko e le hore re fumane ntho le hoja e le mahala. Lentsoe “reka” le hlahang ho Liproverbia 23:​23 le boetse le bolela ho “fumana.” Mantsoe ana ka bobeli a bontša hore ho hlokahala hore motho a etse boiteko e le hore a fumane ntho eo a e batlang. Ka mohlala, le ha ho ka etsahala hore lebenkele le fane ka “libanana mahala” u ke ke oa li bona li le teng ka tlung ka mohlolo empa ho tla hlokahala hore u tsamaee u il’o li lata. Le hoja u il’o li fumana mahala, u lokela hore u tele nako ea hao le matla hore u li fumane. Ka tsela e tšoanang, ha re hloke chelete e le hore re reke ’nete. Empa re lokela ho itela e le hore re be le eona. w18.11 4 ¶4-5

Jesu o ile a re Petrose, Jakobo le Johanne ba ee le eena ka holim’a thaba. Ha ba ntse ba le moo, ba ile ba bona pono e makatsang. Sefahleho sa Jesu se ile sa khanya ’me liaparo tsa hae tsa phatsima. Ponong eo, barutuoa ba Jesu ba ile bona Moshe le Elia ba bua le Jesu mabapi le lefu la hae le tsoho ea hae. (Luka 9:​29-32) Ka mor’a moo, ba ile ba koaheloa ke khanya e kholo eaba ba utloa lentsoe la Jehova le tsoa lerung. Pono eo e ne e bontša hore Jesu o ne a tla ba le matla joaloka Morena ’Musong oa Molimo. E tlameha ebe pono ena e ile ea khothatsa Jesu le ho mo matlafatsa e le hore a ka mamella mahloriso ’ohle ao a neng a tla thulana le ’ona. Pono eo e ile ea boela ea matlafatsa tumelo ea barutuoa ba Jesu le ho ba thusa ho mamella mathata ao ba neng ba tla thulana le ’ona ha ba ntse ba etsa mosebetsi oa bona. Lilemo tse ka bang 30 hamorao, moapostola Petrose o ile a bua ka pono ena ’me o ne a bontša hantle hore o ntse a e hopola.​—2 Pet. 1:​16-18. w19.03 10 ¶7-8

Bahlanka ba Jehova ba fapana le batho ba likereke tse ling kaha ba ‘bolellana ’nete.’ (Zak. 8:​16, 17) Ho tla ba bonolo hore re bue ’nete linthong tse kholo le tse nyane ha re bua le batho bao re sa ba tsebeng, basebetsi-’moho, metsoalle le batho bao re ba ratang. Ke ’nete hore mocha e mong le e mong o batla hore lithaka tsa hae li mo rate, empa o lokela ho qoba ho ba lempetje. Bacha ba bang ba iketsa batho ba lokileng ha ba le libokeng le ha ba na le batsoali ba bona empa ha ba na le batho bao e seng Lipaki kapa ba sebelisa Inthanete ba itšoara ka tsela e fapaneng. Ke baikaketsi hobane ba thetsa batsoali ba bona le Bakreste-’moho le bona, ho hobe le ho feta ke hore ba thetsa Molimo. (Pes. 26:​4, 5) Leha ho le joalo, Jehova oa bona ha re mo ‘hlompha ka melomo feela, empa lipelo tsa rona li suthetse hole le eena.’ (Mar. 7:6) Kahoo, ke bohlale ho mamela keletso e reng: “Pelo ea hao e se ke ea honohela baetsalibe, empa u tšabe Jehova letsatsi lohle.”​—Liprov. 23:​17. w18.10 9 ¶14-15

Bahlanka ba Molimo ke lelapa le thabileng le tsebahalang ka ho ratana. (1 Joh. 4: 21) Ha ba bontšane lerato linthong tse kholo feela empa le ho tse nyane tse kang ho buisana ka mosa. Haeba re nahanelana re ba “baetsisi ba Molimo, joaloka bana ba ratoang.” (Baef. 5:1) Jesu Kreste o ne a etsisa Ntate oa hae hantle. O ile a re: “Tloong ho ’na, lona bohle ba sehlang le ba imetsoeng, ’me ke tla le khatholla . . .  kaha ke na le maikutlo a bonolo ’me ke ikokobelitse pelong.” (Mat. 11:​28, 29) Rea thaba ebile Jehova oa re amohela haeba re ‘nahanela batho ba tlaase.’ (Pes. 41:1) A re tsoeleng pele re bontša lerato ka hore re nahanele ba malapa a rona, Bakreste-’moho le rona le batho bao re kopanang le bona tšimong. w18.09 28 ¶1-2

Ha ho hlaha likoluoa, re na le menyetla ea ho thusa batho ba bang ka litsela tse ngata. Mohlala, re ka fana ka chelete ho thusa batho ba anngoeng ke likoluoa. (Joh. 13:​34, 35; Lik. 11:​27-30) Re ka boela ra thusa ka hore re hloekise le ho lokisa matlo le thepa e senyehileng. Morali’abo rona Gabriela oa Poland eo ntlo ea hae e ileng ea senngoa ke likhohola, o ile a thaba haholo ha a bona bara le barali babo rona ba phuthehong e haufi le moo a lulang ba etsa tsoho la monna. O re: “Ha ke batle ho bua ka lintho tse ntahlehetseng kaha ha li bohlokoa hakaalo. Ho e-na le hoo, ke batla ho bua ka lintho tseo ke li fumaneng. Ntho ena e nketsahaletseng e nthutile hore ha ho ntho e thabisang joaloka ho ba ka har’a lelapa la Jehova.” Batho ba bangata ba ileng ba thusoa ka mor’a hore ho hlahe likoluoa ba re ba ikutloa ba khotsofetse haholo. Hape, bohle ba sebetsang ’moho le Jehova ho thusa nakong ea likoluoa, le bona ba thabile ebile ba khotsofetse.​—Lik. 20:​35; 2 Bakor. 9:​6, 7. w18.08 26 ¶12

E le hore re itšireletse, re lokela ho tseba maqiti a Satane re be re tlohe sebakeng se kotsi nako e sa le teng. Ho ‘sireletsa’ ho ka bapisoa le mosebetsi o neng o etsoa ke balebeli. Mehleng ea Morena Solomone, balebeli ba ne ba lula qhooeng e le hore ha ba lireng ba ba hlasela ba ka lemosa sechaba. Mosebetsi ona oa bona o re thusa ho utloisisa hore na re lokela ho etsa’ng e le hore Satane a se ke a re sitisa ho sebeletsa Molimo. Mehleng eo, balebeli ba ne ba ema lerakong le keiting. (2 Sam. 18:​24-26) Ba ne ba etsa bonnete ba hore keiti ea koaloa hang feela ha sera se atamela. (Neh. 7:​1-3) Ka tsela e tšoanang ha re ithuta Bibele, re tla qoba maraba a Satane a ka etsang hore re nahane le ho ikutloa ka tsela e sa khahliseng Jehova. Hang ha letsoalo la rona le re tšetšetha re lokela ho nka bohato. w19.01 17 ¶10-11

Baholo ba lokela ho buella barab’abo rona ba bacha lilemong ba sebelisa Lentsoe la Molimo ho e-na le ho latela maikutlo a bona kapa setso. (2 Tim. 3:​16, 17) Ha setso se sa lumellane le mangolo se ka etsa hore le hoja mor’abo rona a tšoaneleha a se ke a buelloa. Naheng e ’ngoe, mor’abo rona e mong eo e leng mohlanka ea sebeletsang o ile a fuoa mesebetsi e mengata ka phuthehong. Le hoja baholo ba phutheho eo a neng a le ho eona ba ile ba lumellana hore oa tšoaneleha hore e ka ba moholo, ha ba aa ka ba mo buella. Baholo ba seng ba kae ba holileng ba ile ba re o shebahala a le monyenyane bakeng sa hore e ka ba moholo. Ho utloisa bohloko hore ebe mor’abo rona eo ha aa ka a buelloa ka lebaka la tsela eo a shebahalang ka eona. Litlaleho li bontša hore hona le barab’abo rona ba bangata ba etsang lintho ka tsela e tšoanang le ena. Baholo ba lokela ho tataisoa ke Mangolo ho e-na le ho etsa lintho ho latela hore na ba sheba lintho joang. Ha ba etsa joalo, ba tla be ba mamela Jesu ’me ba ke ke ba kala batho ho ea ka hore na ba shebahala joang.​—Joh. 7:​24. w18.08 12 ¶16-17

Ho potlakela ho fetisa molaetsa hang-hang ho kotsi. Libakeng tse ling, mosebetsi oa rona o thibetsoe. Kahoo, libakeng tse joalo bahanyetsi ba rona ba ka re ferekanya ka ho bua mashano. Nahana ka lintho tse neng li etsahala linaheng tse tlas’a Soviet Union. Mapolesa a mautloela a neng a bitsoa KGB, a ile a hasa mashano ka barab’abo rona ba hlaheletseng ’me ba re ba tsoile Lipaki tse ling tlaase. Ka bomalimabe Lipaki tse ngata li ile tsa kholoa mashano ao ’me hamorao tsa ikarola mokhatlong oa Jehova. Empa hoa thabisa hore ebe Lipaki tse ling li ile tsa khutla. Leha ho le joalo, ba bang ha baa ka ba khutla hobane ba ile ba felloa ke tumelo. (1 Tim. 1:​19) Re ka qoba kotsi e joalo joang? Re lokela ho qoba ho hasa litaba tseo re sa kholisehang ka tsona. Ha rea lokela ho lumela ntho e ’ngoe le e ’ngoe. Re boetse re lokela ho tseba lintlha kaofela. w18.08 4 ¶8

Meqolong ea boholo-holo ea Segerike, ho bonahala matšoao a puo a ne a sa sebelisoe kamehla. Joale potso ke hore na: Jesu o itse, “Ke re ho uena, kajeno u tla ba le ’na Paradeiseng”? Kapa o itse, “Ke re ho uena kajeno, u tla ba le ’na Paradeiseng”? Hopola hore pejana ho ketsahalo ena, Jesu o ne a ile a re ho barutuoa ba hae: “Mor’a motho o tla ba pelong ea lefatše ka matsatsi a mararo le masiu a mararo.” (Mat. 12:​40; 16:​21; 17:​22, 23; Mar. 10:​34; Lik. 10:​39, 40) Ka hona, Jesu ha aa ka a ea Paradeiseng letsatsing leo eena le senokoane seo ba shoeleng ka lona. Jesu o ne a le lebitleng [kapa “Hadese”] ka matsatsi a mararo ho fihlela Molimo a mo tsosa. (Lik. 2:​31, 32) Senokoane seo se neng se le makhatheng a lefu, se ne se sa tsebe hore Jesu o entse selekane le baapostola ba hae ba tšepahalang hore o tla ba le bona ’Musong oa hae oa leholimo. (Luka 22:​29) Ho phaella moo, senokoane seo se ne se e-s’o kolobetsoe le ho khethoa ka moea o halalelang. (Joh. 3:​3-6, 12) Ka tsela e joalo, Jesu o ile a se tšepisa hore se tla ba paradeiseng mona lefatšeng nakong e tlang. w18.12 6 ¶17-18, 20-21

Ka mor’a nako e khutšoanyane feela, Baiseraele ba ile ba qala ho rapela namane ea khauta. Ba ile ba ithetsa eaba ba nahana hore ba ntse ba le ka lehlakoreng la Jehova. Arone o ile a ba a re borapeli boo ba bona ke “mokete oa Jehova.” Jehova o ile a etsa’ng? O ile a bolella Moshe hore sechaba sa Iseraele se “entse ka mokhoa o senyehileng” hape “se khelohile ka potlako tseleng eo [A] se laetseng hore se tsamaee ka eona.” Jehova o ile a tuka ke bohale eaba o nahana ho felisa sechaba sohle sa Iseraele. (Ex. 32:​5-10) Empa, ha aa ka a ba felisa. (Ex. 32:​14) Le hoja Arone a ile a etsa namane ea khauta, o ile a baka eaba o ba ka lehlakoreng la Jehova hammoho le Balevi ba neng ba ipolela hore ba eme le Jehova. Batho ba likete ba ile ba shoa ka lebaka la ho rapela litšoantšo eaba Jehova o tšepisa batho ba ka lehlakoreng la hae hore o tla ba hlohonolofatsa.​—Ex. 32:​26-29. w18.07 20 ¶13-16

Ke mang eo re lokelang ho sebetsa ka thata hore a re tsebe a be a re rate? Ha rea lokela ho sebeletsa hore batho ba re tsebe ka thuto e phahameng, khoebo kapa mefuta ea boithabiso ea lefatše lena. Ho e-na le hoo, re lokela ho nahana ka mantsoe a Pauluse a reng: “Kaha joale le tseba Molimo, kapa ho e-na le hoo kaha joale le tsejoa ke Molimo, ho tla joang hore le khutlele hape linthong tse fokolang le tse futsanehileng tsa motheo ’me le batle ho ba makhoba a tsona hape?” (Bagal. 4:9) Ke tlotla e kholo ho tsejoa ke Molimo, ea bopileng lintho tsohle. Ho ka khoneha hore re tsejoe ke ’Musi oa leholimo le lefatše kaha o ikemiselitse ho ba motsoalle oa rona ea haufi-ufi. Setsebi se seng sa Bibele se ile sa re Jehova ‘o tla re nka re le batho ba bohlokoa.’ Re fumana lebaka le utloahalang la ho phela haeba re le metsoalle ea Molimo.​—Moek. 12:​13, 14. w18.07 8 ¶3-4

E le hore melao ea Molimo e re tsoele molemo, re lokela ho e rata le ho e hlompha. (Amose 5:​15) Empa re ka etsa joalo joang? Ntlha ea bohlokoa ke hore re ithute ho sheba lintho ka tsela eo Jehova a li shebang ka eona. Mohlala: Nka hore u sitoa ho robala hantle bosiu. Ngaka e u fa litaelo tsa hore u je hantle, u ikoetlise le hore u etse liphetoho tse ling. Ka mor’a hore u mamele litaelo tseo, oa hlokomela hore li u tsoela molemo. Ha ho pelaelo hore u ne u tla ananela hore ebe ngaka e u thusitse hore u ntlafatse bophelo ba hao. Ka tsela e tšoanang, ’Mopi oa rona o re file melao e re sireletsang hore re se ke ra khola litholoana tse bosula tsa sebe e le hore re ntlafatse bophelo ba rona. Nahana kamoo u ka ruang molemo kateng ha u latela melao ea Bibele e akarelletsang ho qoba lintho tse kang: Ho bua leshano, ho qhekella, ho utsoa, ho kopanela liphate kantle ho lenyalo, ntoa le ho sebelisana le bademona. (Liprov. 6:​16-19; Tšen. 21:8) Ha Jehova a re hlohonolofatsa ka lebaka la ho etsa lintho ka tsela eo a e batlang, re mo rata ho tsoa pelong ebile re ananela melao ea hae. w18.06 17 ¶5-6

Pilato o ne a tšohile hore Jesu o ne a tla etsa hore batho e be marabele ’me ba fetohele puso ea Roma. Jesu o ile a mo araba a re: “ ’Muso oa ka hase karolo ea lefatše lena.” (Joh. 18:​36) O ne a ke ke a kenella lipolotiking kaha ’Muso oa hae o ne o tla ba leholimong. O ile a bolella Pilato hore mosebetsi oa hae e ne e le hore a “pakele ’nete.” (Joh. 18:​37) Ha re utloisisa mosebetsi oa rona hantle joaloka Jesu, re tla qoba ho tšehetsa mekha ea lipolotiki ka tsela leha e le efe, esita le ka lipelong tsa rona feela. Empa ha ho bonolo. Mopotolohi e mong o re: “Batho ba tikolohong ea rona ba rata lipolotiki ho tlola. Ba rata bochaba haholo ’me ba lumela hore bophelo ba bona bo tla ntlafala haeba ba busoa ke batho ba sechaba sa habo bona. Rea thaba hore ebe bara le barali babo rona ba sirelelitse bonngoe ba bona ka hore ba phathahane ka mosebetsi oa ho ruta ka ’Muso. Ba na le tšepo ea hore Jehova o tla felisa ho hloka toka le mathata ao re tobanang le ’ona.” w18.06 4-5 ¶6-7

Ke libuka tse tharo feela tsa Mangolo a Seheberu e leng 1 Likronike, Jobo le Zakaria tse buang ka Satane e bolelang “Mohanyetsi.” Ha hoa ka ha buuoa hakaalo ka sera sena pele Mesia a fihla. Hobane’ng? E ka ’na eaba Jehova o ne a sa batle ho fa Satane tlokola ka hore Mangolong a Seheberu a bue ka eena haholo le ka ntho eo a e entseng. Morero o ka sehloohong oa Jehova oa ho bululela Mangolo ao, e ne e le ho re tsebisa ka Mesia le ho tataisetsa batho ho eena. (Luka 24:​44; Bagal. 3:​24) Ha Jehova a se a phethile morero oo ’me Mesia a fihlile, o ile a mo sebelisa le barutuoa ba hae ho re bolella haholoanyane ka Satane le mangeloi a ileng a mo latela. Ke taba e utloahalang hobane Jehova o tla sebelisa Jesu le babusi-’moho le eena ho felisa Satane le balateli ba hae. (Bar. 16:​20; Tšen. 17:​14; 20:​10) Re lokela ho hopola hore matla a Diabolose a lekanyelitsoe. Re tšehelitsoe ke Jehova, Jesu le mangeloi a tšepahalang. Ka thuso ea bona re ka khona ho hanyetsa sera sena sa rona. w18.05 22-23 ¶2-4

Jehova o re nka re le bahlanka ba hae hafeela re beha litholoana. (Mat. 13:​23; 21:​43) Leha le joalo, papiso e ho Johanne 15:​1-5 ha e bolele hore ho beha litholoana ke ho thusa batho hore e be balateli ba Jesu. (Mat. 28:​19) Haeba ho ne ho le joalo, Bakreste ba sa atleheng ho thusa batho ka lebaka la maemo a tšimo, ba ne ba tla be ba tšoana le makala a sa beheng papisong eo Jesu a buileng ka eona. Ho hlakile hore taba ena e ne e ke ke ea utloahala. Hobane’ng? Hobane re ke ke ra qobella batho hore e be balateli ba Jesu. Ho etsa joalo ho ne ho tla be ho le khahlanong le tsela eo Jehova a etsang lintho ka eona. Ha a qobelle batho hore ba etse lintho tseo ba ke keng ba li khona. Taelo e ’ngoe le e ’ngoe eo Jehova a re fang eona ha e thata. (Deut. 30:​11-14) Ha e le hantle re lokela ho beha litholoana life? Ho hlakile hore ho beha litholoana ho itšetlehile ka tsela eo re sebetsang ka eona. Ke mosebetsi ofe o re thusang? Ke oa ho ruta batho ka ’Muso oa Molimo.​—Mat. 24:​14. w18.05 14 ¶8-9

Mehleng ena baruti ba bangata ba ruta batho lintho tse fosahetseng ka Molimo joaloka ba mehleng ea Jesu. Kaofela ha bona ‘ba hatella ’nete’ ebile ba “fapanyetsa ’nete ea Molimo ka leshano.” (Bar. 1:​18, 25) Ba re motho ha a tsoetsoe la bobeli ha a sa na sebe, ha a shoa moea oa hae o ea leholimong, kapa o boela a phela ka mor’a a shoe e se e le ntho e ’ngoe. Ba bile ba re Molimo o lumella ha batho ba bong bo tšoanang ba nyalana. Bo-ralipolotiki le bona ba khelosa batho. Ke hona batho ba tl’o bua leshano le leholo ka ho fetisisa la hore ba fumane “khotso le tšireletseho” empa “timetso ea tšohanyetso e tla ba holim’a bona hang-hang.” Rona ha rea lokela ho kholoa hore ho tla ba le khotso le tšireletseho hobane lefatše lena le haufi le ho timetsoa.​—1 Bathes. 5:​1-4. w18.10 7-8 ¶6-8

Jesu Kreste o sebelisa batlotsuoa le linku tse ling tseo e leng “likhosana” ho khothatsa batho ba nyahameng le ba imetsoeng ke mathata. Baholo ha se balaoli empa ke “basebetsi-’moho” le Bakreste ba bang. Ba batla ho re thusa hore re lule re thabile. (Esa. 32:​1, 2; 2 Bakor. 1:​24). Moapostola Pauluse o re behetse mohlala o motle haholo. O ile a re ho Bakreste ba Thesalonika: ‘Re na le lerato le mofuthu bakeng sa lona, ha rea ka ra khahloa ke ho le fa litaba tse molemo feela tsa Molimo, empa le meea ea rona, hobane le bile ba ratoang ho rona.’ (1 Bathes. 2:8) Pauluse o ile a bontša hore ha hoa lekana ho khothatsa motho ka mantsoe feela, ke kahoo a ileng a bua mantsoe a hlahang temaneng ea letsatsi ea kajeno ho baholo ba Efese. w18.04 21-22 ¶6-8

E le hore re thabele tokoloho eo, re lokela ho “retelehela ho Jehova” e leng hore re lokela ho ba le kamano e ntle le eena. (2 Bakor. 3:​16) Baiseraele ba ne ba sa shebe lintho ka tsela eo Jehova a li shebang ka eona. Ba bile ba sa bone lintho tse ntle tseo a ba etsetsang tsona. Ba ne ba batla ho sebelisa bolokolohi ba bona ho etsa lintho tseo ba li ratang. (Baheb. 3:​8-10) Tokoloho eo re e fumanang ka lebaka la moea oa Jehova e fapane haholo le tokoloho ea ha motho a lokolloa bokhobeng. Moea oa Jehova o ka re lokolla linthong tseo batho ba ke keng ba re lokolla ho tsona. O ka re ntša bokhobeng ba sebe, lefu le bolumeli ba bohata hammoho le lithuto tsa bona. (Bar. 6:​23; 8:2) Ruri ena ke tokoloho ea ’nete! Motho a ka thabela bolokolohi bona esita leha a le teronkong kapa a le bokhobeng.​—Gen. 39:​20-23. w18.04 9 ¶3-5