August

Ha re le libokeng re lula re hopotsoa lintho tse ntle tseo Jehova le Jesu ba re etselitseng tsona. Re leka ho etsisa Jesu nthong e ’ngoe le e ’ngoe eo re e etsang, kaha re batla ho mo leboha. (2 Bakor. 5:​14, 15) Ho phaella moo, re susumelletseha ho rorisa Jehova ka hore ebe o re file thekollo. Tsela e ’ngoe eo re ka mo rorisang ka eona ke ka ho araba ha re le libokeng. Re ka bontša hore re rata Jehova le Mora oa hae ka hore re ikemisetse ho tela eng kapa eng bakeng sa bona. Hangata re lokela ho etsa joalo e le hore re be teng libokeng kamehla. Liphuthehong tse ngata ho tšoaroa liboka mantsiboea ha ho tsuoa mesebetsing, ka nako eo boholo ba batho bo khathetseng. Seboka se seng se tšoaroa mafelo-beke ha batho ba bang ba qhanolotse. Na Jehova oa bona hore re ba teng libokeng kamehla le hoja re khathetse? Hantle haholo! Ha e le hantle, Jehova o bona matsapa ’ohle ao re a etsang, ebile oa a ananela.​—Mar. 12:​41-44. w19.01 29 ¶12-13

Ha Jesu a le lefatšeng, o ile a thulana le mathata ao batho ba kopanang le ’ona. Mohlala, Jesu o holetse lelapeng le ikapang le itlohela. Ha a ntse a sebetsa le ntate ea mo holisitseng e leng Josefa, Jesu o ile a ithuta ho itšoarela ka matsoho. (Mat. 13:​55; Mar. 6:3) Ho ka etsahala hore ebe Josefa o ile a hlokahala nakoana pele Jesu a qala tšebeletso ea hae. Kahoo, Jesu o ne a tseba bohloko ba ho shoeloa ke motho eo a mo ratang. Hape Jesu o ne a tseba hore na ke ntho e joang ho phela lelapeng la batho ba nang le litumelo tse fapaneng. (Joh. 7:5) Mabaka ana le a mang a mangata a ile a etsa hore Jesu a utloisise mathata a batho le hore na ba ikutloa joang. Jesu o ile a bontša ka ho hlaka hore o nahanela batho nakong eo a neng a etsa mehlolo. O ne a sa etse mehlolo ho phetha molao feela. Ha a ne a bona batho ba le mahlomoleng, o ne a “susumetsoa ke khauho” hore a ba thuse. (Mat. 20:​29-34; Mar. 1:​40-42) Jesu o ne a utloela batho bohloko ’me a ba thusa.​—Mar. 7:​32-35; Luka 7:​12-15. w19.03 16 ¶10-11

Ke bosiung ba ho qetela Jesu a le lefatšeng. Nahana hore na e tlameha ebe Jesu o ne a imetsoe hakaakang bosiung boo. Na o ne a tla tšepahala ho isa lefung? Bophelo ba batho ba libilione bo ne bo le mahetleng a hae. (Bar. 5:​18, 19) Habohlokoa le ho feta, tsela eo a neng a tla etsa lintho ka eona e ne e tla ama botumo ba Ntate oa hae. (Jobo 2:4) Lijong tsa mantsiboea tsa ho qetela a e-na le baapostola ba hae lefatšeng, ho ile ha qhoma “phehisano e chesang” har’a bona mabapi le “hore na ke ofe ho bona ea neng a bonahala eka ke e moholo.” Empa, Jesu ha aa ka a ba tenehela. O ile a lula a khobile matšoafo. Ka mosa o ile a ba hlakisetsa hore na ke hobane’ng ha ba sa lokela ho itšoara ka tsela eo. Eaba o qetella ka ho ba babatsa ka hore haesale ba mo tšehelitse. (Luka 22:​24-28; Joh. 13:​1-5, 12-15) Re lokela ho etsisa Jesu ka hore re lule re khobile matšoafo le ha re imetsoe kelellong. Re lule re hopola hore kaofela ha rona re na le ho utloisa batho ba bang bohloko ka lintho tseo re li buang le tseo re li etsang. (Liprov. 12:​18; Jak. 3:​2, 5) Hape, re lokela ho babatsa batho ba bang ka lintho tse ntle tseo ba li etsang.​—Baef. 4:​29. w19.02 11-12 ¶16-17

Molao oa Moshe o ne o entse hore ho be thata hore motho a qosoe ka bohata. Moqosuoa o ne a e-na le tokelo ea ho tseba hore na o qosoa ke mang. (Deut. 19:​16-19; 25:1) Hape, pele ho ka thoe motho ea itseng o molato, ho ne ho lokela hore bonyane ho be le lipaki tse peli. (Deut. 17:6; 19:​15) Joale, ho ne ho etsoa’ng haeba Moiseraele a tlotse molao ’me ho e-na le paki e le ’ngoe feela? O ne a ntse a lokela ho ahloloa. Jehova o ne a tseba hore na o entse’ng. Kannete Jehova o re behetse mohlala o motle, kaha o etsa lintho tse lokileng kamehla. O hlohonolofatsa batho bohle ba ikobelang melao ea hae, empa o otla bohle ba sebelisang matla a bona hampe. (2 Sam. 22:​21-23; Ezek. 9:​9, 10) Batho ba bang ba ka ’na ba etsa lintho tse tsoileng tseleng eaba ho bonahala eka ha ba hlaheloe ke letho, empa ka nako ea Jehova e nepahetseng o tla etsa bonnete ba hore baa ahloloa. (Liprov. 28:​13) Ho feta moo, haeba ba sa bake, haufinyane ba tla ithuta hore “ke ntho e tšabehang ho oela matsohong a Molimo ea phelang.”​—Baheb. 10:​30, 31. w19.02 23-24 ¶20-21

Moshe o ne a tšepile hore Jehova o tla mo tataisa le ho mo thusa. Bibele e re “o ile a tsoela pele a tiile joalokaha eka o bona Ea sa bonahaleng.” (Baheb. 11:​24-27) Ho ne ho e-s’o fete likhoeli tse peli Baiseraele ba tlohile Egepeta ha ba thulana le bothata le pele ba fihla Thabeng ea Sinai. Ba ile ba lla ka hore ha ba na metsi. Ba boela ba korotlela Moshe hoo a ileng a bua le Jehova a re: “Ke tla etsa’ng ka sechaba see? Ho se ho se hokae ’me se tla ntlepetsa ka majoe!” (Ex. 17:4) Jehova o ile a mo fa litaelo tse hlakileng tsa hore a nke molamu ’me a otle lefika la Horebe e le hore metsi a tsoe. Bibele e re: “Moshe a etsa joalo mahlong a banna ba baholo ba Iseraele.” Kahoo, Baiseraele ba ile ba noa metsi ho fihlela ba khotsofetse.​—Ex. 17:​5, 6. w18.07 13 ¶4-5

Jehova o boetse o re matlafatsa ka Bakreste-’moho le rona. Haeba re rata Bakreste-’moho le rona, re bontša hore re rata Jehova. Re lokela ho bontša hore rea ba rata ka hore re ba thuse hore ba lule ba tšepahalla Jehova re be re ba khothatse. (1 Joh. 4:​19-21) Ha moapostola Pauluse a bua le Bakreste o ile a re: “Le ’ne le tšelisane le ho hahana, feela joalokaha le etsa.” (1 Bathes. 5:​11) Ha se baholo feela ba lokelang ho etsa joalo. Le rona re lokela ho etsisa Jehova le Jesu ka hore re tšelise bara le barali babo rona le ho ba khothatsa. (Bar. 15:​1, 2) Ho na le bara le barali babo rona ba nang le khatello ea maikutlo ’me ba hloka ho bona lingaka. (Luka 5:​31) Baholo le Bakreste ba bang ka phuthehong ba lokela ho hopola hore le hoja e se lingaka, ho bohlokoa hore ba khothatse batho ba joalo ’me ba ba thuse. Kaofela ha rona ka phuthehong re lokela ho phetha boikarabelo ba bohlokoa ba hore re ‘bue ka mokhoa o tšelisang le meea e tepeletseng maikutlo, re tšehetse ba fokolang, re be le tiisetso ho bohle.’​—1 Bathes. 5:​14. w18.09 14 ¶10-11

Re tla tšepa Jehova haeba re ikitlaelletsa ho mo tseba. Tsela feela ea hore re mo tsebe, ke ha re ithuta Bibele ebile re nahanisisa ka eona. Ha re e bala, re tla fumana lipale tsa kamoo a ileng a sireletsa batho ba hae kateng. Li tla etsa hore re be sebete re be re tšepe hore Jehova o tla re hlokomela. A re hlahlobeng mohlala oo Esaia a ileng a o sebelisa ha a bontša hore Jehova o tla re sireletsa. O ile a tšoantša Jehova le molisa, eaba o tšoantša barapeli ba hae le likonyana. O ile a re ka Jehova: “O tla bokella likonyana ka letsoho la hae; o tla li beha sefubeng.” (Esa. 40:​11) Ha re hlokomela hore Jehova oa re tsotella re ikutloa re sireletsehile. E le hore u khobe matšoafo ha u e-na le mathata lula u nahanisisa ka mantsoe ana a temana ea letsatsi ea kajeno. Ha u ka lula u nahana ka mantsoe ana a khothatsang u ka khona ho mamella mathata a ka u hlahelang. w19.01 7 ¶17-18

Na ho na le lintho tseo u ikemiselitseng ho li etsa tse tla u thusa ho lula u rata Jehova? Mohlomong u leka ho bala Bibele letsatsi le letsatsi. Kapa u ithuta mokhoa o motle oa ho bua le batho le oa ho ruta Bibele. Ho sa tsotellehe hore na ke efe, ha u atleha kapa batho ba bang ba u babatsa u ba motlotlo hape oa thaba. Kaha u etsa thato ea Jehova ebile u etsisa Jesu, e tlameha ebe u thabile haholo. (Liprov. 27:​11) Ha u lula u ikemisetsa ho sebeletsa Jehova u tla lula u khotsofetse kaha u etsa lintho tse molemo. Moapostola Pauluse o ile a re: “Le be ba tiileng, ba sa sutheng, kamehla le e-na le ho hongata hoo le ka ho etsang mosebetsing oa Morena, le tseba hore mosebetsi oa lona ha se oa lefeela mabapi le Morena.” (1 Bakor. 15:​58) Le haeba re ka atleha hona joale ha re sebeletsa ho rua, qetellong re tla be re sebelelitse lefeela.​—Luka 9:​25. w18.12 22 ¶12-13

Davida o ne a bua ka nako eo ka eona batho ba tla phela ho ea ka lipallo tsa Molimo tsa toka. (2 Pet. 3:​13) Boprofeta bo ho Esaia 65:​22 bo re: “Matsatsi a sechaba sa ka a tla ba joaloka matsatsi a sefate.” Sena se bolela hore batho ba tla phela ka lilemo tse likete. Ho ea ka Tšenolo 21:​1-4, Molimo o tla lebisa tlhokomelo ea hae ho batho ’me e ’ngoe ea lintho tseo a tla e felisa ke lefu. Adama le Eva ba ile ba iteleka serapeng sa Edene, empa ha se mara ha se ho fela. Joalokaha Molimo a re tšepisitse, o tl’o hlohonolofatsa batho mona lefatšeng. Davida o ile a bolela hore ba bonolo ba tl’o rua lefatše ’me ba tla phela ho lona ka ho sa feleng. (Pes. 37:​11) Boprofeta ba buka ea Esaia bo lokela ho etsa hore re khalle ho phela maemong ao a thabisang ao Molimo a re tšepisang ’ona. (Esa. 11:​6-9; 35:​5-10; 65:​21-23) Neng? Ha tšepiso ea Jesu ho senokoane sa Mojuda e se e phethahetse. (Luka 23:​43) Le uena u ka ba teng Paradeiseng. w18.12 7 ¶22-23

Na re ka khona ho qoba ho ba har’a batho ba sa sebeletseng Jehova? Che! Lintho tse ling re ke ke ra khona ho li qoba. (1 Bakor. 5:​9, 10) Ha re ruta molaetsa oa Bibele re kopana le bona. Le hoja maemong a mang re tlameha ho ba le batho ba sa sebeletseng Jehova, re lokela ho etsisa Jesu ka hore re potlakele ho hana tsela eo ba nahanang ka eona. Hape re lokela ho qoba ho ba le batho bana. Mohlala, re lokela ho ba hlokolosi ha re khetha metsoalle. Bibele e re eletsa hore haeba re tloaelana le batho ba sa rateng Jehova, ba ka re susumetsa hampe. (Liprov. 13:​20; 1 Bakor. 15:​12, 32, 33) Re tla boetse re etsa hantle ha re qoba ho ithabisa ka lintho tseo Jehova a sa li rateng joaloka ntoa, boitšoaro bo bobe le tse ling, hobane re tla be re qoba ho itšilafatsa ka lintho tse “khahlanong le tsebo ea Molimo.”​—2 Bakor. 10:5. w18.11 21 ¶16-17

Re ka ikemisetsa ho lula re tsamaea ’neteng joang? Etsa ntho e ’ngoe le e ’ngoe eo u ka e khonang hore u bolelle batho ba bang molaetsa oa Bibele. Ha u etsa joalo u tla lula u rata “Lentsoe la Molimo.” (Baef. 6:​17) Kaofela ha rona re lokela ho ntlafatsa tsela eo re rutang Bibele ka eona e le hore re ka ‘tšoara lentsoe la ’nete ka nepo.’ (2 Tim. 2:​15) Ha re ntse re tsoela pele ho ruta batho ba bang Bibele re ba thusa hore ba sebeletse Molimo le tumelo ea rona e ba matla. Ha re etsa joalo re tla lula re ikemiselitse ho sebeletsa Molimo. Bibele ke mpho e molemo ka ho fetisisa eo Jehova a re fileng eona. E re file monyetla oo re neng re ke ke ra o fumana le ka mohla kaha e re thusitse ho tseba Jehova le hore re be le kamano e ntle le eena. Hona joale re sa le qalong, ke hona re sa ntse re tla ithuta lintho tse ngata ka Jehova. O re thusitse ho mo tseba hape o re tšepisa hore ha re sa tla shoa. Kahoo, lula u ithuta Lentsoe la Molimo le ho le rata joalokaha eka ke taemane. ​—Liprov. 23:​23. w18.11 8 ¶2; 12 ¶15-17

Mosebetsi oa ho bolela oo a o entseng pele ho moroallo o ne o akarelletsa ho lemosa batho ka timetso e tlang. Hlokomela hore na Jesu o ile a re’ng: “Etsoe joalokaha matsatsing ao pele ho moroallo, ba ne ba ja ’me ba noa, banna ba nyala ’me basali ba nyalisoa, ho fihlela letsatsing leo Noe a ileng a kena ka arekeng ka lona; ’me ba se ke ba elelloa ho fihlela moroallo o tla ’me o ba hohola bohle, ho ba teng ha Mor’a motho ho tla ba joalo.” (Mat. 24:​38, 39) Le hoja batho ba ne ba sa nkele Noe hloohong, o ile a tsoela pele ho phatlalatsa molaetsa oa temoso oo a neng a o filoe. Mehleng ena re bolela molaetsa oa ’Muso e le hore re thuse batho ho ithuta hore na morero oa Molimo ke ofe ka batho. Joaloka Jehova, re labalabela eka batho ba ka mamela molaetsa ’me ba ‘tsoela pele ho phela.’ (Ezek. 18:​23) Hape, ha re bolela ka ntlo le ntlo le phatlalatsa, re lemosa batho ba bangata hore ’Muso oa Molimo o tla tla ’me o felise batho ba sa mameleng.​—Ezek. 3:​18, 19; Dan. 2:​44; Tšen. 14:​6, 7. w18.05 19 ¶8-9

Haeba mosebetsi oa rona u thibetsoe naheng eo u phelang ho eona, na u lokela ho bua ’nete ha ba boholong ba u botsa ka oona? Jesu eena o ile a etsa’ng ha ’musisi oa Moroma a mo botsa lipotso? O ile a ipapisa le molao-motheo o reng “ho na le nako . . . ea ho khutsa le nako ea ho bua” eaba oa itholela. (Moek. 3:​1, 7; Mat. 27:​11-14) Haeba u le boemong bo kang boo, u lokela ho etsa lintho ka bohlale e le hore u se ke oa beha barab’abo rona bothateng. (Liprov. 10:​19; 11:​12) Hape u tla etsa’ng haeba motsoalle oa hao oa hlooho ea khomo kapa mong ka uena a etsa sebe se tebileng ’me u tseba ka sona? Bibele e re: “[U] tla bolela se lokileng [kapa u bue ’nete].” U lokela ho bolella baholo ’nete feela ho se ke ha e-ba le lintho tseo u li patang. Ba lokela ho tseba ’nete e le hore ba tsebe ho thusa moetsalibe hore a lokise kamano ea hae le Jehova.​—Jak. 5:​14, 15. w18.10 10 ¶17-18

Re ka matlafatsa Bakreste-’moho le rona joang? Ka hore re ba mamele ka hloko. (Jak. 1:​19) Ha u mamela Mokreste-’moho le uena u bile u mo utloela bohloko, oa bontša hore oa mo rata. Ho e-na le ho mo botsa lipotso tse ka mo utloisang bohloko, mo botse lipotso tse bontšang hore oa mo tsotella. Ha u etsa joalo, u tla mo matlafatsa. Ha u ntse u bua le eena, le sefahleho sa hao se bontše hore oa mo tsotella le hore oa mo rata. Mo mamele ’me u se ke oa mo kena hanong ha a ntse a u phetlela sefuba. U tla khona ho utloisisa hore na o ikutloa joang ha u mo mamela u sa mo felle pelo. Ha u etsa joalo, o tla u tšepa a be a u mamele ha u mo khothatsa. O tla tšeliseha ha a bona kamoo u mo tsotellang kateng. w18.09 14 ¶10; 15 ¶13

Motho e mong le e mong o hloka ho tela nako e le hore a reke Lentsoe la Molimo. Re hloka ho ipha nako ea ho mamela molaetsa oa Bibele, ho ithuta Bibele le lingoliloeng tse thehiloeng ho eona, ho lokisetsa liboka le ho ea ho tsona. Re hloka ho reka nako ka hore re tlohella mabaka a mang e le hore re be le nako ea ho ithuta Bibele. (Baef. 5:​15, 16) Kaha ha re utloisise lintho ka tsela e tšoanang, nako eo re e hlokang ea ho utloisisa hore na Bibele e na le molaetsa ofe e ke ke ea tšoana. Ha ho mohla re tla qeta ho ithuta ka Jehova, ka bohlale ba hae, litsela tsa hae esita le mesebetsi ea hae, ka lebaka leo re lokela ho lula re ithuta Bibele. (Bar. 11:​33) Ha Molula-Qhooa o qala ho lokolloa o ile oa bapisa ’nete le lipalesa. Eaba o re ha rea lokela ho khotsofalla ho ba le palesa e le ’ngoe feela empa re sebeletse ho ba le serapa sa tsona. Hoja e le ’ngoe e ne e lekane ho ka be ho se na mefuta e mengata tjena. Re lokela ho ipotsa hore na serapa sa rona se seholo hakae. Re tla lula re ithuta lintho tse ngata ka Jehova ho sa tsotellehe hore na re phela nako e telele hakae. Ha rea lokela ho senya nako re etsa lintho tse se nang thuso empa re lokela ho ithuta ka Molimo. w18.11 4 ¶7

Banna ba lokela ho lula le basali ba bona “ho ea ka tsebo” e leng ho bolelang hore ba lokela ho ba nahanela le ho leka ho ba utloisisa. (1 Pet. 3:7) Ho ba utloisisa le ho ba nahanela ke kobo le lemao. Monna ea tsebang mosali oa hae oa utloisisa hore ke motlatsi oa hae le hore ba ka fapana ka lintho tse ngata empa ha ho bolele hore mosali oa hae oa fokola. (Gen. 2:​18) O hlompha maikutlo a hae ebile o mo siela seriti. Monna ea mosa o etsa hore mosali oa hae a mo tšepe le ha a sebelisana le batho ba bo-’mè. Kahoo, ha a sebelisana le batho ba bong bo fapaneng ha a ba fe maikutlo a hore oa ba rata. (Jobo 31:1) O boetse o ba hlokolosi ha a sebelisa mecha ea puisano le Inthanete. Kaha o hloile se sebe, o rata Jehova ebile o rata mosali oa hae, o lula a tšepahala ka linako tsohle.​—Pes 19:​14; 97:​10. w18.09 29 ¶3-4

Ho ka ba thata hore re phele tumellanong le lintho tseo re ithutang tsona ka Bibeleng. Hobane’ng? Ho hlokeha hore re ikokobetse e le hore re etse liqeto tse nepahetseng. Leha ho le joalo, e le hore re lule re ikokobelitse, re lokela ho sebetsa ka thata. Kaha re phela ‘matsatsing a ho qetela batho ba bangata ke baithati, ba rata chelete, ba ikhopola ho tlola, baa ikhohomosa ebile ba hloka boitšoaro.’ (2 Tim. 3:​1-3) Le hoja bahlanka ba Jehova ba hloile lintho tse mpe tseo batho ba sa rapeleng Jehova ba li etsang, ho ka etsahala hore ba ba khalle ha ba bona ba atleha. (Pes. 37:1; 73:3) Mohlomong baa ipotsa hore na ho sa ntse ho e-na le thuso ea hore ba etelletse lithahasello tsa batho ba bang pele ho tsa bona. Kapa hore na haeba ba itšoara joaloka “e monyenyane,” batho ba sa ntse ba tla ba hlompha. Haeba re lumella batho ba sa rapeleng Jehova hore ba re susumetse hampe, likamano tsa rona le batho ba bang ka phuthehong li ka senyeha ebile re tla itheola seriti. Empa Jehova o tla re hlohonolofatsa haeba re etsisa mehlala e metle ea batho ba hlahang ka Bibeleng. w18.09 3 ¶1

Le hoja Jehova a ne a le mong ha a qala ho bopa, o ne a sa nahana ka eena feela. O file mangeloi le batho mpho ea bophelo. Jehova ke “Molimo ea thabileng” ea ratang ho fa batho lintho tse ntle. (1 Tim. 1:​11; Jak. 1:​17) Kaha o batla hore re thabe, o re ruta hore re fane. (Bar. 1:​20) Molimo o re bopile ka setšoantšo sa hae. (Gen. 1:​27) Kahoo, re na le makhabane ao a nang le ’ona. Re lokela ho etsisa Jehova ka hore re rate batho ba bang re be re fane. Haeba re etsa joalo, Jehova o tla re hlohonolofatsa ebile re tla thaba. (Bafil. 2:​3, 4; Jak. 1:5) Hobane’ng? Hobane Jehova o re bopile ka tsela eo. Le hoja re sa phethahala, re ka atleha ho etsisa Jehova ka hore re fane. Kaha Jehova o batla hore re mo etsise, oa thaba ha re fana.​—Baef. 5:1. w18.08 18 ¶1-2; 19 ¶4

Balateli ba Jesu ba bontša ka liketso hore baa mo mamela. Ha ba lumelle “matšoenyeho a bophelo” hore a ba sitise ho mamela. (Luka 21:​34) Ba lula ba mamela litaelo tsa Jesu ho bata kapa ho chesa. Ho sa tsotellehe mathata ana ao ba thulanang le ’ona, bara le barali babo rona ba lula ba tšepahala ho Jehova. Tsela e ’ngoe eo re ka bontšang ka eona hore re mamela Jesu ke ka hore re sebetse ’moho le bao a ba behileng hore ba re etelle pele. (Baheb. 13:​7, 17) Morao tjena, mokhatlo oa Molimo o entse liphetoho tse ngata tse akarelletsang tsela eo liboka tsa har’a beke li tšoaroang ka eona, lintho tseo re li sebelisang tšebeletsong ea tšimo le tsela eo re hahang le ho hlokomela Liholo Tsa ’Muso ka eona. Rea ananela hore ebe Jehova o re tataisa ka tsela ena e bontšang hore oa re rata le ho re nahanela. Re ka kholiseha hore Jehova o tla re hlohonolofatsa haeba re mamela le ho latela tataiso eo re e fuoang ke mokhatlo oa hae. w19.03 10-11 ¶11-12

Nahana ka ntho e ileng ea etsahalla Baiseraele ba neng ba lula lehlakoreng le ka bophirimela ho noka ea Jordane mehleng ea Joshua. (Josh. 22:​9-34) Ba ile ba utloa tlaleho e reng Baiseraele ba lulang ka bochabela ba hahile aletare e kholo e ntle. Karolo e itseng ea litaba e ne e le ’nete. Ka lebaka la hore ba ne ba sa fumana lintlha tse feletseng tsa litaba, Baiseraele ba ka bophirimela ho Jordane ile ba etsa qeto ea hore meloko ena e meng e sitetsoe Jehova. (Josh. 22:​9-12) Empa pele ba ka ea ho ea ba loantša, ba ile ba romela banna bao ba neng ba ba tšepa hore ba tle le lintlha tse feletseng. Ba ile ba hlokomela eng? Hore ba ne ba hahile aletare eo e le sehopotso, eseng bakeng sa ho etsetsa mahlabelo ho eona. Sepheo sa ho haha aletare eo e ne e le hore batho ba tle ba bone hore le bona ba ne ba tšepahalla Jehova. Hoa thabisa hore ebe Baiseraele bao ha baa ka ba bolaea bana babo bona pele ba ka tseba lintlha tse feletseng. w18.08 5 ¶9-10

Joalokaha Pauluse a boletse, Bakreste ba ’nete le bona ba ka kenella mekhoeng e sa nepahalang. Esita le ba ntseng ba etsa lintho tse mpe, ba ka ithetsa ba nahana hore ba ntse ba le ka lehlakoreng la Jehova. Empa ho ba motsoalle oa Jehova kapa ho ipolela feela hore rea mo tšepahalla ha se kamehla ho bontšang hore re na le kamano e ntle le eena. (1 Bakor. 10:​1-5) Feela joalokaha Baiseraele ba ile ba tšoenyeha ha Moshe a ne a lieha ho theoha thabeng ea Sinai, Bakreste le bona ba ka ’na ba tšoenyeha ha ba bona eka Jehova o lieha ho tlisa lefatše le lecha. Ba ka ’na ba bona eka Jehova o lieha ho phethahatsa litšepiso tseo a li entseng kapa ba bona eka ke litoro tse ke keng tsa phethahala. Haeba re hloleha ho ithiba hore re se ke ra ba le menahano e joalo, re ka iphumana re shebane le maruo le lintho tse ling ho e-na le ho etsa thato ea Jehova. Ha nako e ntse e e-ea, kamano ea rona le Jehova e ka senyeha ’me ra qetella re etsa lintho tseo re neng re ke ke ra li etsa ha re e-na le kamano e ntle le eena. w18.07 21 ¶17-18

Haeba le rona re tsejoa ke Jehova, o tla re hlohonolofatsa. Empa re ka etsa’ng hore re tsejoe ke Jehova? Re lokela ho mo rata ’me re inehele ho eena. (1 Bakor. 8:3) Leha ho le joalo, re lokela ho lula re matlafatsa kamano ea rona le Ntate oa rona ea leholimong hobane re e nka e le ea bohlokoa. Pauluse o ile a eletsa Bakreste ba Galatia hore ba khaotse ho sebeletsa ‘lintho tse fokolang le tse futsanehileng tsa motheo.’ Le rona re lokela ho qoba lintho tse joalo, tse akarelletsang ho batla ho amoheloa ke batho. (Bagal. 4:9) Bakreste ba mehleng ea Pauluse ba ne ba se ba tsejoa ke Jehova. Leha ho le joalo, Pauluse o ile a re ba ne ba ‘khutletse’ linthong tse se nang thuso. Ha e le hantle o ne a re: “Ka mor’a hore le sebetse ka thata hakaale, ke hobane’ng ha le ka khutlela linthong tse se nang thuso?” w18.07 8 ¶5-6

Ha ho hlokahale hore re khole litholoana tse bosula tsa ho se mamele melao ea Molimo. Re ka ithuta liphosong tsa batho ba tlalehiloeng ka Bibeleng. Ha re ithuta le ho nahanisisa ka litlaleho tse hlahang ka Bibeleng, re fumana litaelo tsa bohlokoa tse tsoang ho Molimo. Mohlala, nahana ka bohloko boo Morena Davida a ileng a bo utloa ka mor’a ho tlola molao oa Molimo ka ho etsa bofebe le Bathe-sheba. (2 Sam. 12:​7-14) Ha re bala re bile re nahanisisa ka tlaleho ena, re ka ipotsa: ‘Morena Davida a ka be a ile a qoba boemo boo bo utloisang bohloko joang? Haeba nka thulana le boemo bo tšoanang, na ke tla khona ho itšoara? Na ke tla baleha joaloka Josefa kapa ke tla inehela joaloka Davida?’ (Gen. 39:​11-15) Haeba re nahana ka litla-morao tse tlisoang ke ho etsa sebe, re tla imatlafatsa e le hore re ‘hloee se sebe.’​—Amose 5:​15. w18.06 17 ¶5, 7

Ho hloka toka ke hona ho hlohlelletsang moea oa lipolotiki. Mehleng ea Jesu, ho lefa lekhetho e ne e le eona taba e ka sehloohong lipolotiking. Bafo ba ’muso oa Roma hammoho le batho ba neng ba mamela Jesu, ba ne ba lokela ho lefa lekhetho la lintho tse ngata tse kang matlo le litša. Hape, kaha babokelli ba lekhetho ba ne ba tletse bobolu, ba ne ba ekelletsa batho moroalo le ho feta. Ha ho etsoa lifantisi, babokelli ba lekhetho ba ne ba ntša tjotjo e le hore ba fumane maemo a phahameng sechabeng ’me ba etse phaello e ngata. ’Mokelli ea ka sehloohong oa lekhetho e leng Zakiase, e ne e le morui hobane o ne a lefisa batho chelete e ngata haholo. (Luka 19:​2, 8) E ka ’na eaba ba bang le bona ba ne ba etsa joalo. Lira tsa Jesu li ile tsa batla maikutlo a hae tabeng ea ho lefa lekhetho e le hore li ka mo tšoasa. Li ile tsa mo botsa ka “lekhetho la hlooho,” e leng lekhetho la denari leo Bajuda bohle ba neng ba lokela ho le lefa. (Mat. 22:​16-18) Bajuda ba ne ba sa batle ho lefa lekhetho leo hobane le ne le ba hopotsa hore ba ntse ba le tlas’a puso ea Roma. w18.06 5-6 ¶8-10

Kamehla litla-morao tsa ho mamela Satane li bohloko haholo ho feta melemo eo a ka fanang ka eona. (Jobo 21:​7-17; Bagal. 6: 8) Ke melemo efe eo re e fumanang ha re tseba maraba a Satane? Re leka ka matla hore re leka-lekanye lintho pakeng tsa mosebetsi oa boipheliso le oa boboleli. Rea utloisisa hore Jehova o batla hore re hlomphe babusi le balaoli. (1 Pet. 2:​17) O lebeletse hore re hlomphe melao ea moo re lulang teng hafeela e se khahlanong le melao ea hae. (Bar. 13:​1-4) Empa rea hlokomela hore ha rea lokela ho jela paate litabeng tsa lipolotiki kapa ho rata moeta-pele ea itseng ho feta e mong. (Joh. 17:​15, 16; 18:​36) Kaha rea lemoha hore Satane o batla ho silafatsa lebitso la Jehova le botumo ba hae, re ikutloa re tlameha ho bolella batho ’nete ka Molimo oa rona. Re motlotlo ho bitsoa ka lebitso la hae le ho le sebelisa, hobane rea tseba hore ho rata Jehova ho molemo ho feta ho rata chelete kapa maruo.​—Esa. 43:​10; 1 Tim. 6:​6-10. w18.05 24 ¶8-9

Na ke lebaka le utloahalang ho siea molekane e mong lenyalong ha ho e-na mathata? Mangolo ha a hlalose hore na ke tlas’a maemo afe moo molekane e mong a ka sieang e mong. Pauluse o ile a ngola a re: “Mosali ea nang le monna ea sa lumelang, ’me leha ho le joalo monna eo a lumela ho lula le eena, a se ke a tlohela monna oa hae.” (1 Bakor. 7:​12, 13) Keletso ena e ntse e sebetsa le kajeno. Ke ’nete hore ho na le maemo ao ho ’ona ho bonahalang hore “monna ea sa lumelang” ha a batle ‘ho lula le mosali’ oa hae. E ka ’na eaba o mo hlekefetsa ka sehloho hoo bophelo ba hae bo ka bang kotsing. Kapa o hana ho hlokomela lelapa kapa o mo sitisa ho tšepahalla Molimo. Maemong a joalo, Bakreste ba bang ba ee ba bone ho le molemo hore ba arohane. Empa ka lehlakoreng le leng, Bakreste ba bang ba maemong a tšoanang, ba khethile ho mamella, e le hore ba leke ho lokisa lintho. w18.12 13 ¶14, 16; 14 ¶17

Papisong ea mojali e hlahang lengolong la Luka 8:​5-8, 11-15, peo ke “lentsoe la Molimo,” kapa molaetsa oa ’Muso. Mobu o emela pelo ea motho ea tšoantšetso. Peo e oetseng mobung o motle e ile ea atleha ’me “ea hlahisa litholoana tse lekholo.” Joalokaha mobu o motle o ile oa amohela peo, le rona re ile ra amohela molaetsa ’me ra tsepama ho oona. Hamorao molaetsa oa ’Muso o ile oa thopothela lipelong tsa rona ’me oa hola, oa beha litholoana. Joalokaha koro e sa hlahise mahlaka a macha, empa e hlahisa peo, le rona ha re bolelle batho ba bacha ka ’Muso feela re ba bolella litaba tseo ba neng ba sa li tsebe. Re hlahisa peo e ncha joang? Ha re buisana le batho ka molaetsa oa Bibele, ho tšoana le ha re jala le ho hasanya peo e ncha, e ileng ea thopothela lipelong tsa rona. (Luka 6:​45; 8:1) Kahoo, papiso ena e re ruta hore ha re lula re phatlalatsa molaetsa oa Bibele, re “beha litholoana ka mamello.” w18.05 14 ¶10-11

Pauluse o ne a sa khothatse ka molomo feela empa o ne a ikemiselitse ho itella Bakreste-’moho le eena. (2 Bakor. 12:​15) Baholo le bona ba lokela ho etsisa mohlala ona oa Pauluse ka hore ba tsotelle Bakreste-’moho le bona. (1 Bakor. 14:3) Re ka boela ra khothatsa batho ka ho ba eletsa. Empa pele baholo ba etsa joalo, ba lokela ho ithuta hore na Bibele e re motho o lokela ho eletsoa joang. Nakoana ka mor’a hore Jesu a tsosoe bafung, o ile a bontša hore na batho ba ka eletsoa joang. Hlokomela hore na o ile a etsa’ng pele a fana ka keletso e matla ho liphutheho tse ling tse Asia Minor. Nakong eo a neng a hloka ho khalemela Bakreste ba phutheho ea Efese, Pergame le Thyatire o ile a ba babatsa pele a ba khalemela. (Tšen. 2:​1-5, 12, 13, 18, 19) E ka ba hantle hore baholo ba etsise Jesu tabeng ena. w18.04 22 ¶8-9

Batsoali, le na le boikarabelo ba ho sireletsa bana ba lona hore Satane a se ke a ba hlasela. Mohlala, le sebetsa ka thata e le hore le lule le phetse hantle le bana ba lona ka hore le hloekise mahae a lona. Ka tsela e tšoanang, le tlameha ho ba thusa ho qoba ho ithabisa ka lintho tse ka senyang kamano ea bona le Molimo. Le ba thuse ho ba hlokolosi ha ba khetha lifilimi, mananeo a thelevishene, liwebsaete le lipapali. Le lokela ho sebetsa ka thata ho ba thusa hore e be metsoalle ea Molimo. (Liprov. 1:8) Kahoo, le behe melao e lumellanang le hore na Jehova o rata’ng, le be le ba hlalosetse hore na ke hobane’ng ha le e beha. (Mat. 5:​37) Ha bana ba lona ba ntse ba thuthuha le ka ba thusa hore ba iketsetse liqeto tse thabisang Jehova. (Baheb. 5:​14) Le lokela ho hopola hore ba ithuta haholo ka lintho tseo le li etsang.​—Deut. 6:​6, 7; Bar. 2:​21. w19.01 16 ¶8

Haeba u mocha u ka kopa motho ea holileng hore a u phetele hore na ho ne ho le joang ha a ntse a sebeletsa Jehova lilemong tse ngata tse fetileng. Pale eo e tla ruta mocha thuto ea bohlokoa ’me e ba matlafatse ka bobeli. Ntho e ’ngoe eo kaofela re ka e etsang ke ho amohela batho ba qalang ho tla libokeng. Haeba u tšoara seboka sa tšebeletso ea tšimo, ho na le lintho tse ngata tseo u ka li etsang ho thusa batho ba holileng. U ka lokisetsa hore batho ba holileng ba sebetse tšimo e haufi. Ka linako tse ling u ka ba fa mocha eo ba ka sebetsang le eena e le hore a sebelise matla a hae ho ba thusa. U ka boela oa nahanela batho ba kulang le bao maemo a bona a sa ba lumelleng ho sebetsa haholo. Ha u etsa joalo, u tla thusa batho ba holileng, bacha, ba nang le boiphihlelo ba ho sebetsa tšimo hammoho le ba se nang bona hore ba chesehele ho bolela litaba tse molemo.​—Lev. 19:​32. w18.06 23-24 ¶10-12

Re lokela hore le ka mohla re se ke ra lebala hore Jehova o re lokolotse bokhobeng ba sebe le lefu. Ka lebaka la sehlabelo sa Jesu, re khona ho sebeletsa Molimo ka matsoalo a khutsitseng re bile re thabile. (Pes. 40:8) Leha ho le joalo, ha rea lokela ho ananela feela hore Jehova o re file bolokolohi, empa re boetse re lokela ho ela hloko hore re se ke ra bo sebelisa hampe. Moapostola Petrose o ile a re eletsa hore re se ke ra sebelisa bolokolohi ba rona ho etsa lintho tse fosahetseng. Keletso ena e re hopotsa lintho tse ileng tsa etsahalla Baiseraele ha ba le lefeelleng. E ntse e le bohlokoa le mehleng ena, mohlomong le ho feta mehleng ea pele. Satane le batho ba hae ba fana ka lintho tse ngata tseo re ka li khallang tse kang liaparo, lijo, lino, boithabiso le tse ling. Lipapatso li hlahisa batho ba batle e le hore re reke lintho tseo re sa li hlokeng. Ho ka ba bonolo hore re thetsehe ’me re sebelise bolokolohi ba rona ka tsela e fosahetseng. w18.04 10 ¶7-8