September

Jesu o ile a bontša hore o nahanela Maria le Maretha. O ile “a ntša meokho” ha a ba bona ba siametse khaitseli ea bona e leng Lazaro. (Joh. 11:​32-35) O ne a sa llisoe ke hobane a se a ke ke a kopana le Lazaro. Jesu o ne a tseba hore o tl’o tsosa motsoalle eo oa hae. Ho e-na le hoo, Jesu o ile a lla hobane a utloela Maria le Maretha bohloko kaha o ne a bona mesarelo ea bona. Ho tseba hore Jesu o khona ho utloela batho bohloko hoa re khothatsa. Ke ’nete hore ha rea phethahala joalokaha a ne a phethahetse. Leha ho le joalo, rea mo rata hobane o ne a utloela batho bohloko. Re boetse re khothatsoa ke ho tseba hore hona joale ke Morena ’Musong oa Molimo, le hore haufinyane o tla felisa lintho tsohle tse re utloisang bohloko. Kaha Jesu o kile a phela lefatšeng mona, ke eena ea loketseng ho re lopolla pusong ea Satane, hobane o utloisisa hantle bohloko le mahlomola ao re phelang ho ’ona. Rea thaba hore ebe re na le Morena ea khonang ho “utloela mefokolo ea rona bohloko.”​—Baheb. 2:​17, 18; 4:​15, 16. w19.03 17 ¶12-13

Re kenya letsoho ho thuseng batho ho tseba Molimo, empa ha se rona ba etsang mosebetsi oa bohlokoa ka ho fetisisa. (1 Bakor. 3:​6, 7) Jehova ke eena ea hulelang batho ho eena. Qetellong, taba ea hore na motho o tla amohela litaba tse molemo kapa che e itšetlehile ka hore na pelo ea hae e sekametse hokae. (Mat. 13:​4-8) Hopola hore batho ba bangata ha baa ka ba amohela molaetsa oa Jesu le hoja e ne e le Mosuoe ea hloahloa ka ho fetisisa. Kahoo, ha rea lokela ho nyahama haeba batho ba bangata bao re lekang ho ba thusa ba sa amohele molaetsa oa rona. Re tla ba le liphello tse ntle haeba re nahanela batho bao re kopanang le bona tšimong. Re tla thabela mosebetsi oa boboleli haholoanyane. Re tla fumana thabo e tlisoang ke ho fana. Hape, re tla etsa hore ho be bonolo hore bohle ba nang “le tšekamelo e nepahetseng bakeng sa bophelo bo sa feleng” ba utloe litaba tse molemo. (Lik. 13:​48) Kahoo, “hafeela re sa na le nako e loketseng, a re sebetseng se molemo ho bohle.” (Bagal. 6:​10) Ha re etsa joalo re tla thabela hore ebe re tlotlisa Jehova Molimo oa rona.​—Mat. 5:​16. w19.03 25 ¶18-19

Morena Davida o kile a re: “Jehova o moholo ’me o lokela ho rorisoa.” (Pes. 145:3) O ne a rata Jehova hoo a neng a mo rorisa “har’a phutheho.” (1 Likron. 29:​10-13; Pes. 40:5) Mehleng ena, e ’ngoe ea litsela tseo re ka rorisang Jehova ka tsona ke ka hore re arabele ha re le ka libokeng. Kaofela ha rona rea thaba ha batho ba araba ka libokeng. Mohlala, rea thaba ha ngoana a arabela, ha motho a bua a thabile ka ntho eo a ithutileng eona le ha motho ea ithutang puo ea rona kapa ea lihlong a “iteta sebete” ’me a araba. (1 Bathes. 2:2) Empa re ka bontša joang hore re ananela likarabo tsa bona? Ka hore re ba babatse ka mor’a liboka. Re ka boela ra ba khothatsa ka hore le rona re arabe. Kahoo, ha re le libokeng rea khothatsana.​—Bar. 1:​11, 12. w19.01 8 ¶1-2; 9 ¶6

Ho ne ho e-na le Basamaria ba leshome ba neng ba le maqakabetsing. Ba ne ba e-na le lepera ’me ba bona eka ba ke ke ba fola. Ka letsatsi le leng ba ile ba bona Jesu a le hojana. Ba ne ba ile ba utloela hore Jesu o khona ho phekola maloetse a mefuta eohle. Eaba baa mo hoeletsa ba re: “Jesu, Morupeli, re hauhele!” Jesu o ile a folisa Basamaria bao. Kaofela ha bona ba ile ba thaba hore ebe Jesu o ba bontšitse mosa. Leha ho le joalo, e mong oa bona ha aa ka a thabela feela hore o folisitsoe empa o ile a bontša ka liketso hore o leboha Jesu. Mosamaria eo o ile a susumelletseha ho rorisa Jehova “ka lentsoe le phahameng.” (Luka 17:​12-19). Joaloka Mosamaria eo, le rona re lokela ho bontša ka liketso ha re leboha batho ba re bontšang mosa. Mohlala oo re ka o etsisang ke oa Jehova hobane o ile a bontša hore ke motho ea lebohang. O etsa joalo ka hore a putse batho ba mo mamelang. (2 Sam. 22:​21; Pes. 13:6; Mat. 10:​40, 41) Bibele e re khothalletsa hore re “be baetsisi ba Molimo, joaloka bana ba ratoang.” (Baef. 5:1) Kahoo, lebaka leo ka lona re susumelletsehang ho bontša hore re batho ba lebohang, ke hobane re batla ho etsisa Jehova. w19.02 14 ¶1-2; 15 ¶4

Morali’abo rona e mong ka tlhompho eohle o hana ho keteka letsatsi le itseng la phomolo sekolong sa hae hobane a tseba hore le khahlanong le melao ea Molimo. Mor’abo rona ea lihlong o ntse a bolela litaba tse molemo ka ntlo le ntlo. O kokota habo moithuti-’moho le eena ea sa rateng Lipaki. Ka letsatsi le leng ha mor’abo rona a le mosebetsing, mohiri oa hae o ile a re a etse ntho e seng molaong. Le hoja a ne a tseba hore a ka lahleheloa ke mosebetsi, o ile a hlalosetsa mohiri oa hae hore o lokela ho tšepahala kaha Molimo o lebeletse hore bahlanka ba hae ba tšepahale. (Bar. 13:​1-4; Baheb. 13:​18) Ke makhabane afe ao morali’abo rona le barab’abo rona ba a bontšitseng? A mang a ’ona ke sebete le botšepehi. Empa botšepehi ke bona bo hlaheletseng. Kaofela ha bona ba ile ba tšepahalla Jehova. Ba ile ba hana ho etsa letho le khahlanong le melao ea hae. Ba ile ba etsa joalo hobane ba rata Jehova. O ne a ikotla sefuba ka bona hobane ba ile ba mo tšepahalla. Le rona re batla hore Jehova a be motlotlo ka rona. w19.02 2 ¶1-2

Ka ho khetheha Molao o ne o sireletsa batho ba sa khoneng ho itšireletsa, ba kang likhutsana, bahlolohali le bajaki. Baahloli ba mehleng ea Baiseraele ba ile ba fuoa taelo e reng: “U se ke oa khopamisa kahlolo ea mojaki kapa ea moshanyana ea se nang ntate, ’me u se ke oa nka seaparo sa mohlolohali hore e be tebeletso.” (Deut. 24:​17) Jehova o ne a amehile ka ho khetheha ka batho ba sa khoneng ho itšireletsa. O ne a ahlola batho ba ba tšoarang hampe.(Ex. 22:​22-24) Jehova o batla hore batho bao a ba fileng boikarabelo ba ho etella pele batho ba bang ba rate batho bao. O hloile thobalano e etsoang ke batho ba amanang ’me o batla hore batho bohle, haholo-holo ba sa khoneng ho itšireletsa ba sireletsoe ba be ba ahloleloe ka toka. (Lev. 18:​6-30) Ha re kholisehile hore Jehova o re tšoere ka tsela e nang le toka, re tla mo rata le ho feta. Hape ha re rata Molimo le melao ea hae, re tla susumelletseha ho rata batho le ho ba tšoara ka tsela e nang le toka. w19.02 24-25 ¶22-26

Re ka itšireletsa joang e le hore Satane a se ke a re sitisa ho sebeletsa Jehova? Bibele e re: “Bohlola le ho se hloeke ha mofuta o mong le o mong . . . le ho boleloa li se ke tsa boleloa har’a [rona].” (Baef. 5:3) Joale u tla etsa’ng haeba bana bao u kenang sekolo le bona kapa basebetsi-’moho ba bua ka thobalano? Molebeli oa rona e leng letsoalo, a ka ’na a re lemosa hore taba eo e kotsi. (Bar. 2:​15) Na u tla mo mamela? U ka ’na oa khalla ho mamela batho ba lekang ho u khelosa kapa ho sheba litšoantšo tseo ba batlang ho u bontša tsona. Empa u tla be u etsa hantle ha u ka bua ka taba e ’ngoe kapa oa itsamaela. Ha u le sebete u ke ke oa lumella lithaka tsa hao hore li u susumelletse ho etsa lintho tse fosahetseng. U lule u hopola hore Jehova oa bona ha u iteka, kahoo o tla u fa sebete le bohlale e le hore u nahane joaloka eena.​—2 Likron. 16:9; Esa. 40:​29; Jak. 1:5. w19.01 17-18 ¶12-13

Kaha Morena Solomone o ne a ruile a bile a le matla o ile a re: “E-re ke u leke ka thabo [ke bone hore na ho tla etsahala’ng].” (Moek. 2:​1-10) O ile a haha matlo, a etsa lirapa, liphaka le lintho tse ling tseo a neng a nahana hore li tla mo thabisa. Na ka mor’a ho li etsa o ile a utloa a khotsofetse? Temaneng ea letsatsi ea kajeno, o re boleletse hore na o ne a ikutloa joang. Thuto ena e bohlokoa ebile re lokela ho nahanisisa ka eona ka thata. Jehova o batla ho u thusa hore u utloe ka tsebe eseng ka letlalo. Empa u tlameha ho ba le tumelo e le hore u mo mamele u be u phelele ho etsa thato ea hae. Tumelo eo e bohlokoa haholo, ebile u ke ke oa soetseha ha u e-na le eona. Jehova a ke ke a lebala ‘lerato leo u le bontšang bakeng sa lebitso la hae.’ (Baheb. 6:​10) Kahoo, u sebeletse ho ba le tumelo u tle u tsebe ho bona hore Jehova oa u rata.​—Pes. 32:8. w18.12 22 ¶14-15

Motho ea batlang ho sebeletsa Jehova o ba le tumelo ho eena hape o nahana ka tsela eo Jehova a nahanang ka eona. O batla tataiso ea Jehova ebile o ikemisetsa ho mo mamela. (1 Bakor. 2:​12, 13) Davida ke mohlala o motle tabeng ena. O ile re: “Jehova ke karolo ea kabelo eo ke e filoeng le ea senoelo sa ka.” (Pes. 16:5) “Kabelo” ena e akarelletsa setsoalle sa Davida le Jehova kaha Davida o ne a mo tšepa. (Pes. 16:1) Qetellong o ile a “thaba” kaha e ne e le motsoalle oa Jehova. (Pes. 16:​9, 11) Ha motho a batla ho rua kapa ho ba le lintho tse ling tseo ho thoeng lia thabisa, a ke ke a thaba joalokaha Davida a ne a thabile. (1 Tim. 6:​9, 10) Ha re e-na le tumelo ho Jehova ebile re mo sebeletsa re tla tseba hore na re phelela’ng hape re tla khotsofala. Re ka ba le tumelo e matla joang? Ka hore re iphe nako ea ho bala Bibele e le hore re ithute ka Molimo, re nahane ka lintho tseo a li bopileng, makhabane a hae a akarelletsang hore oa re rata.​—Bar. 1:​20. w18.12 25 ¶7-8

Ha se hore Pauluse o ne a tlosa molomo bolutu ka ho bua ka lenyalo. O ne a bolella Bakreste hore ba hlomphe lenyalo, ba se ke ba le nka joaloka papali. Na u hlompha lenyalo, haholo-holo la hao? Haeba u hlompha lenyalo, u etsisa mohlala oa Jesu. Ha Bafarisi ba mo botsa ka tlhalo, o ile a qotsa mantsoe ao Molimo a ileng a a bua ho monna oa pele, moo a itseng: “Ka lebaka lena monna o tla siea ntat’ae le ’m ’ae, ’me bao ba babeli e tla ba nama e le ’ngoe.” O ile a phaella ka ho re: “Seo Molimo a se kopantseng hammoho ho se ke ha e-ba le motho ea se arolang.” (Mar. 10:​2-12; Gen. 2:​24) Jesu o ile a totobatsa hore lenyalo le qapiloe ke Molimo le hore e lokela ho ba khomareli ea kokotane. Ha ho moo Molimo a ileng a bolella Adama le Eva hore ba ka hlalana. Molimo o ile a beha molao oa hore “ba babeli” ba tla lula ’moho ho ea ho ile. w18.12 10-11 ¶2-4

Ha re qala ho tseba Jehova re ile ra bona bohlokoa ba ho mamela melao ea hae. Ha re ntse re tsoela pele ho ithuta ka eena, re ithuta tsela eo a nahanang ka eona, lintho tseo a li ratang le tseo a sa li rateng ’me ha re etsa joalo, re tla etsa liqeto tse nepahetseng. Le hoja ho nahana joaloka Jehova ho le monate, ha se ntho e bonolo. Ka linako tse ling re sitoa ho nahana joaloka eena hobane ha rea phethahala. Mohlala, re ka thatafalloa ho utloisisa ha Jehova a re re lule re itšoere hantle, re se ke ra rata chelete, re rute batho ka Bibele, re se ke ra tšela mali kapa ho etsa lintho tse ling. Empa re lokela ho etsa’ng ha re le boemong boo? Ke eng e ka re thusang hore re lule re ntlafatsa tsela eo re nahanang ka eona? Re ka thusoa ke hore re fetole likelello tsa rona ka ho ithuta Lentsoe la Molimo le ho nahanisisa ka lona e le hore re ka nahana ka tsela eo Jehova a nahanang ka eona. w18.11 23-24 ¶2-4

Habakuke o phetse nakong e thata haholo. O ne a utloisoa bohloko ke ho phela har’a batho ba khopo, a ipotsa hore na ba tla tlohella liketso tsa bona tse khopo neng le hore na ke hobane’ng ha Jehova a ba tloheletse nako e telele hakaalo. Batho ba mehleng ea hae ba ne ba boetse ba hloka toka ba bile ba hatella batho ba bang. Kahoo, moprofeta enoa o ne a ikutloa a nyahame. Ha lintho tsena li etsahala o ile a rapela Jehova hore a mo thuse. E ka ’na eaba Habakuke o ne a bona eka Jehova ha a tsotelle hore na o ikutloa joang. O ile a boela a bona eka Jehova o lieha ho araba thapelo ea hae. Na le uena ka linako tse ling u ikutloa joaloka Habakuke? Na ebe lipotso tseo Habakuke a ileng a li botsa Jehova li ne li bontša a se a sa mo tšepe? Na o ile a felloa ke tumelo ea hore Molimo o tla phethahatsa litšepiso tsa hae? Le hanyenyane. Taba ea hore ebe o ile a bolella Jehova mathata a hae eseng batho e bontša hore o ne a ntse a mo tšepa. O ne a sa utloisise hore na ke hobane’ng ha Molimo a sa felise lintho tse bohloko. w18.11 14 ¶4-5

Ha Jesu a re Petrose le Andrease e be “batšoasi ba batho” ha baa ka ba senya nako empa ba ile ba “tlohela matlooa, ba mo latela.” (Mat. 4:​18-20) Ke ’nete hore ha se kaofela ha rona re ka khonang ho tlohella mesebetsi ea rona kaha ba bang ba na le boikarabello ba ho hlokomela malapa a bona. (1 Tim. 5:8) Empa hangata ha motho a qala ho sebeletsa Jehova, o lokela ho fetola tsela eo a ikutloang ka eona ka ho ba le chelete. Nahana ka mohlala oa morali’abo rona Maria. O ne a rata papali ea kolofo haholo hoo a neng a batla hore e be mosebetsi oa hae. Leha ho le joalo, o ile a qala ho ithuta Bibele eaba o fetola tsela eo a phelang ka eona ’me o thabela hore ebe o ile a etsa qeto ea ho ithuta. O ile a bona hore a ke ke a khona ho etsa thato ea Jehova a be a etse mosebetsi oo a neng a o rata. (Mat. 6:​24) Morali enoa oabo rona o ile a tela mosebetsi oa hae. Hona joale ke pula-maliboho ’me o re o rata bophelo boo a bo phelang. w18.11 5 ¶9-10

Ha a le lilemo li 30, o ile a emisa ho betla mapolanka eaba o ameha haholo ka ho ruta batho ka Molimo. Jesu o ile a re ho etsa mosebetsi ona ke eona ntho ea bohlokoa hobane ntate oa hae o ne a mo rometse ho tla o etsa. (Mat. 20:​28; Luka 3:​23; 4:​43) E ile ea e-ba mosebetsi o tlang pele bophelong ba hae, o ne a o nka e le oa bohlokoa hoo a neng a batla hore le batho ba bang ba o etse. (Mat. 9:​35-38) Le rona re etsisa Jesu ka hore re amehe ka ho ruta batho ba bang Lentsoe la Molimo. Mosebetsi ona ke oa bohlokoa hobane re o etsa le Jehova, ke kahoo Bibele e reng re “basebetsi-’moho.” (1 Bakor. 3:9; 2 Bakor. 6:4) Ka hona rea elelloa hore ‘boleng ba lentsoe la hae ke ’nete.’ (Pes. 119:​159, 160) Ka lebaka lena re batla ho etsa bonnete ba hore re ‘tšoara lentsoe la ’nete ka nepo.’ (2 Tim. 2:​15) Kaha Bibele ke eona buka e ka sehloohong eo re e sebelisang, re lokela ho lula re ntlafatsa mokhoa oo re e sebelisang ka oona e le hore batho ba ka tseba Jehova, ’Muso oa hae le Jesu. w18.10 11 ¶1-2

Ha monna a etsisa hlooho ea hae e leng Jesu Kreste o thusa mosali oa hae hore a mo ‘hlomphe ka ho tebileng.’ (Baef. 5:​22-25, 33) Ha mosali a hlompha monna oa hae, o tla mo nahanela. Ha batsoali ba nahanelana ba behela bana ba bona mohlala o motle. Ha e le hantle ke boikarabello ba batsoali ho ruta bana ba bona hore ba nahanele batho ba bang. Ka mohlala, batsoali ba lokela ho ruta bana ba bona hore ba se ke ba matha ka Holong ea ’Muso. Ba ka boela ba ruta bana ba bona hore ha ba eme moleng ba lumelle batho ba baholo ba fetele ka pel’a bona. Ha ngoana a entse ntho e bontšang hore o nahanela batho ba bang, mohlomong a re buletse lemati, re ka mo babatsa. Ha re etsa joalo re tla be re thusa ngoana ho bona hore “ho fana ho tlisa thabo e kholo ho feta ho amohela.” w18.09 29 ¶5-6

Re bone hore morena oa rona Jesu oa re tataisa ebile o tla tsoela pele ho etsa joalo. Kahoo, e se eka re ka lula re ananela re bile re thabile ha mokhatlo oa Molimo o etsa liphetoho. Mohlomong borapeling ba lelapa le ka buisana ka hore na ke liphetoho life tseo le ileng la rua molemo ho tsona ha li ne li etsoa libokeng le tšimong. Haeba re hlokomela hore litaelo tseo re li fuoang ke mokhatlo li tsoa ho Jehova re tla li mamela ebe rea thaba. Re ananela hore ebe mokhatlo o fokolitse palo ea lingoliloeng tse hatisoang hape o sebelisa theknoloji e bolokang chelete le e etsang hore mosebetsi oa ho bolella batho molaetsa oa Bibele o be bonolo. Re tla li sebelisa ka hohle kamoo re ka khonang. Ha re etsa joalo re tla be re bontša hore re mamela Kreste kaha re tla be re sebelisa lintho tseo mokhatlo o re fang tsona ka bohlale. Haeba re lumella Kreste hore a re tataise, re tla matlafatsa tumelo ea ba bang ebile re tla etsa hore ho be le bonngoe. w18.10 25-26 ¶17-19

Ha re e-na le kutloelo-bohloko, Jehova a ka re sebelisa ho araba lithapelo tsa motho e mong ea nyahameng. (2 Bakor. 1:​3-6) U lokela ho utloisisa hore Bakreste-’moho le uena ha baa phethahala. Ha u ka nahana hore ba ke ke ba etsa liphoso, u tla soetseha. (Moek. 7:​21, 22) Hopola hore Jehova le eena oa tseba hore re tla etsa liphoso. Kahoo, haeba re mo etsisa, re tla khona ho mamellana ha re etsetsana liphoso. (Baef. 4:​2, 32) Re se ke ra etsa hore Bakreste-’moho le rona ba utloe eka ba botsoa kapa ra ba bapisa le ba bang. Empa re ba babatse ka bonyane boo ba bo etsang tšebeletsong ea Molimo. Ha re etsa joalo, ba tla khothala. Hape ba tla ba le “sesosa sa thabo” ha ba etsetsa Jehova tšebeletso e halalelang.​—Bagal. 6:4. w18.09 16 ¶16-17

Jesu o ne a lumela hore ho tataisoa ke Jehova ke karolo ea lijo tsa hae. Joang? Ha re ja lijo tse nang le phepo e nepahetseng, re tla phela hantle. Ka tsela e tšoanang tumelo ea rona e ba matla ha re etsa thato ea Jehova ’me re ba le tšepo ea ho phela ka ho sa feleng. Ha re phela tumellanong le lintho tseo re ithutang tsona Bibeleng, re bontša hore re bohlale. (Pes. 107:​43) Ha re sebetsa ka thata ho ba bohlale, re tla fumana melemo e mengata. Bibele e re: “Lintho tse ling tsohle tseo u li thabelang li ke ke tsa lekanngoa le bona. . . . Ke sefate sa bophelo ho ba bo tšoarang, ’me ba lulang ba bo tšoere ka tieo ba tla bitsoa ba thabileng.” (Liprov. 3:​13-18) Jesu o ile a re: “Haeba le tseba lintho tsena, lea thaba haeba le li etsa.” (Joh. 13:​17) Barutuoa ba Jesu ba ne ba tla thaba kamehla hafeela ba ne ba ka lula ba mamela litaelo tsa hae. Ba ne ba lokela ho etsisa Jesu le ho mo mamela bophelo bohle ba bona. w18.09 4 ¶4-5

Adama le Eva ba ne ba le bang Edene ha Molimo a ba fa litaelo. Empa ha ba ne ba li mamela ba ne ba tla be ba bontša hore ba nahanela batho ba bang. Jehova o ile a boela a ba hlohonolofatsa ’me a re ba ate, ba tlale lefatše ’me ba le buse. (Gen. 1:​28) Kaha Jehova o bopile lintho tsohle, o ne a amehile ka popo ea hae. Adama le Eva le bona ba ne ba lokela ho ameha ka bana bao ba neng ba tla ba le bona. Ba ne ba lokela ho etsa hore lefatše e be Paradeise e le hore bana bohle ba bona ba thabele ho phela ho lona. Ba ne ba lokela ho thusana kaha mosebetsi oa bona o ne o le mongata. E le hore morero oa ho etsa hore lefatše e be Paradeise o atlehe, Adama le Eva ba ne ba lokela ho sebetsa le Jehova. Ha ba etsa joalo, ba ne ba tla kena phomolong ea hae. (Baheb. 4:​11) Nahana feela hore na mosebetsi ona e ne e tla ba o thabisang le o khotsofatsang hakaakang. Ba ne ba tla khotsofala ’me Jehova a ba hlohonolofatse kaha ba ne ba tla be ba nahanetse batho ba bang. w18.08 18 ¶2; 19-20 ¶8-9

Re lokela ho etsa’ng ha motho a bua mashano ka rona? Jesu le Johanne ba ile ba etsahalloa ke ntho e joalo. (Mat. 11:​18, 19) Jesu o ile a etsa’ng? Ha aa ka a qeta nako ea hae le matla a ntse a leka ho itšireletsa. Ho e-na le hoo, o ile a khothalletsa batho hore ba shebe lintho tseo a neng a li etsa le tseo a neng a li ruta. O ile a re: “Bohlale bo pakoa ke mesebetsi ea bona.” (Mat. 11:​19) Ho na le ntho ea bohlokoa eo re lokelang ho ithuta eona. Ka linako tse ling batho ba ka bua lintho tse fosahetseng ka rona tse ka re senyang lebitso. Leha ho le joalo, ho na le ntho eo re ka e etsang. Haeba motho a bua mashano ka rona, re lokela ho etsa lintho ka tsela eo batho ba tla bona hore ho ne ho buuoe mashano feela ka rona. Joalokaha re ithutile ho Jesu, tsela eo re phelang ka eona e tla bontša batho hore lintho tse fosahetseng tse buuoeng ka rona ha se ’nete. w18.08 6 ¶11-13

Litlaleho tsa Bibele tse buang ka ho se mamele ha Kaine, Solomone le Baiseraele ha ba le thabeng ea Sinai, li na le ntlha ea bohlokoa eo li tšoanang ka eona. Kaofela ha bona ba ne ba e-na le monyetla oa ho ‘baka, le ho sokoloha.’ (Lik. 3:​19) Ha e le hantle Jehova o lieha ho halefela bafosi. O ile a tšoarela Arone ha a baka. Mehleng ena, Jehova a ka re khalemela a sebelisa Bibele, lingoliloeng tse thehiloeng ho eona le Bakreste-’moho le rona. Ha re amohela keletso Jehova o tla re tšoarela. Ho na le lebaka la hore ebe Jehova o re fa mosa oa hae o sa tšoanelang. (2 Bakor. 6:1) Mosa ona o re thusa “ho hana ho hloka bomolimo le litakatso tsa lefatše.” (Tite 2:​11-14) Hafeela re ntse re phela “har’a tsamaiso ena ea hona joale ea lintho,” re tla thulana le mathata a tla etsa hore re bontše hore na re rata Jehova hakae. E se eka re ka lula re ikemiselitse ho ema ka lehlakoreng la hae. w18.07 21 ¶20-21

Re ka etsa’ng hore re lule re ikemiselitse ho tsejoa le ho ratoa ke Jehova eseng batho ba lefatše? Re lokela ho hopola lintho tse peli tsa bohlokoa. Ea pele, kamehla Jehova o hopola batho ba mo sebeletsang ka botšepehi ebile oa ba rata. (Baheb. 6:​10; 11:6) O ananela mohlanka e mong le e mong oa hae ’me o nka e le ho hloka toka ho iphapanyetsa batho ba mo tšepahallang. O “tseba litsela tsa ba lokileng” ebile o tseba ho ba lopolla mathateng. (Pes. 1:6; 2 Pet. 2:9) Ea bobeli, Jehova a ka bontša ka litsela tseo re sa li lebellang hore oa re rata. A ke ke a hlohonolofatsa batho ba etsang lintho tse ntle e le hore feela ba bonoe ke batho. Hobane’ng? Hobane ba se ba fumane moputso oa bona ka botlalo. (Mat. 6:​1-5) Jesu o ile a re Ntate oa hae “ea talimang sephiring” o bona batho ba sa babatsoeng ka lebaka la lintho tse ntle tseo ba li etsetsang batho ba bang ’me oa ba hlohonolofatsa. w18.07 9 ¶8, 10

Petrose o ile a ipotsa hore na ebe Jehova o ne a batla ho mo ruta eng. Hang-hang, manģosa a Korneliase a ile a fihla ho Petrose. Ka mor’a hore Petrose a tataisoe ke moea o halalelang, kapele-pele o ile a tsamaea le manģosa ao ho ea ntlong ea Korneliase. Kaha Petrose o ne a sa ahlole Korneliase ho latela boemo, o ile a lumela ho ea ntlong ea hae. Bajuda ba ne ba sa kene matlong a balichaba. Ke hobane’ng ha Petrose a ile a khaotsa ho ba le khethollo? O ile a thusoa ke moea o halalelang hammoho le pono eo a ileng a e bona. Ka mor’a hore Petrose a utloe mantsoe a Korneliase, o ile a susumelletseha hore a re: “Kannete-nete kea lemoha hore Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.” (Lik. 10:​34, 35) Petrose o ile a ithuta thuto ea bohlokoa ea hore Jehova ha a leeme. w18.08 9 ¶3-4.

Le hoja re ka ’na ra qoba ho etsa lintho tseo Jehova a li hloileng, ho na le maemo ao ho ’ona Mangolo a sa faneng ka melao e tobileng. Maemong aa, ke joang re ka tsebang lintho tse amohelehang? Ke moo matsoalo a rona a koetlisitsoeng ke Bibele a tla sebetsa hantle. Jehova o re file melao-motheo e sebetsang tumellanong le matsoalo a rona a koetlisitsoeng ke Bibele. O re: “ ’Na, Jehova, ke Molimo oa hao, ke ’na Ea u rutang hore u itsoele molemo, Ea etsang hore u tsamaee tseleng eo u lokelang ho tsamaea ka eona.” (Esa. 48:​17, 18) Ha re nahanisisa ka melao-motheo ea Bibele re bile re e lumella hore e ame lipelo tsa rona re tla khona ho koetlisa matsoalo a rona ka tsela e nepahetseng. Kahoo re tla etsa liqeto tse nepahetseng. Molao-motheo ke ntho e ke keng ea fetoha eo ho etsoang melao ho ipapisitsoe le eona. Melao-motheo e boetse e akarelletsa ho utloisisa tsela eo mofani oa molao a ikutloang ka eona le lebaka leo a faneng ka melao ka lona. w18.06 17 ¶5; 18 ¶8-10

Balateli ba sehlopha sa Heroda ba ne ba tšepile hore ha Jesu a ka re ba se ke ba lefa lekhetho, ba ne ba ka mo qosa ka bofetoheli. Haeba Jesu a ne a ka re ho lefa lekhetho ke ntho e nepahetseng, o ne a ka lahleheloa ke balateli. Jesu o ne a le hlokolosi hore a se ke a jela paate tabeng ena. Jesu o ne a tseba hore babokelli ba lekhetho ba bangata ba ne ba tletse bobolu. Empa ha aa ka a ameha ka taba eo. O ile a ameha ka taba ea bohlokoa, e leng ’Muso oa Molimo kaha ke oona o tla tlisetsa batho tharollo ea mathata a bona. Kahoo, o re behetse mohlala. Re lokela ho qoba ho kenella lipolotiking esita le hoja ho ka bonahala eka mokha o itseng o bua lintho tse utloahalang. Kaha re Bakreste, re lokela ho tsepamisa likelello tsa rona ’Musong oa Molimo le linthong tseo Jehova a li nkang li lokile. Re qoba ho belaela ka mekha ea lipolotiki e hlokang toka. (Mat. 6:​33) Lipaki Tsa Jehova tse ngata li atlehile ho fetola tsela eo li neng li ikutloa ka eona ka lipolotiki. w18.06 6 ¶9-11

Mohlomong Satane ha aa ka a hohela mangeloi a sa kang a mamela ka ho kopanela liphate feela, empa o ile a boela a ba tšepisa hore ba tla busa batho. Ho ka etsahala hore e be morero oa hae e ne e le ho sitisa ho ba teng ha ‘peo ea mosali.’ (Gen. 3:​15) Leha ho le joalo, Jehova o ile a nyopisa merero eo ea Satane le marabele ao ka hore a tlise moroallo holim’a lefatše. Kahoo, le ka mohla ha rea lokela ho halala leraba la ho kopanela liphate kapa kotsi ea ho ikhohomosa. Mangeloi a ileng a ba ka lehlakoreng la Satane, a ne a ile a sebetsa haufi le Molimo ka lilemo tse ngata. Ho ntse ho le joalo, a mangata a ile a itumella hore a nahane ka lintho tse fosahetseng. Ka tsela e tšoanang, e ka ’na eaba re se re sebelelitse mokhatlo oa Jehova ka lilemo tse ngata. Le hoja mokhatlo oo o hloekile, re ntse re ka ’na ra ba le mehopolo e fosahetseng. (1 Bakor. 10:​12) Ho bohlokoa hore re itlhahlobe khafetsa, re hanele likelello tsa rona ho nahana lintho tse fosahetseng, re be re ikokobetse.​—Bagal. 5:​26; Bakol. 3:5. w18.05 25 ¶11-12

Pauluse o ile a nyahama ka lebaka la Bajuda ba neng ba sa batle ho mamela molaetsa oa ’Muso. Leha ho le joalo, ha aa ka a tlohela ho ba bolella. Hlokomela hore na o ile a boela a re’ng ha a hlalosa tsela eo a ikutloang ka eona ka Bajuda bao lengolong le eang ho Bakreste ba Roma: “Khahleho ea pelo ea ka le thapeli ea ka ho Molimo bakeng sa bona e bakeng sa poloko ea bona. Etsoe kea ba pakela hore ba chesehela Molimo; empa eseng ho ea ka tsebo e nepahetseng.” (Bar. 10:​1, 2) Pauluse o ile a hlalosa hore na ke hobane’ng ha a ile a tsoela pele ho bolella Bajuda molaetsa oa Bibele. O ne a susumetsoa ke “khahleho ea pelo ea [hae].” O ne a labalabela hore Bajuda ba bang ba tle ba pholohe. (Bar. 11:​13, 14) O ile a rapela Molimo hore a thuse Bajuda hore ba amohele molaetsa oa ’Muso. Pauluse o ile a eketsa ka hore “ba chesehela Molimo.” O ile a bona hore ba ka khona ho etsa lintho tse nepahetseng. Pauluse o ne a tseba hore ha batho ba thusoa hore ba chesehe ka tsela e nepahetseng, ba ka khona ho fetola bophelo ba bona hore e be barutuoa ba Kreste. w18.05 13 ¶4; 15-16 ¶13-14

Kaofela ha rona re lokela ho tsotellana re tsebe hore na e mong o hloka eng. Pauluse o ile a re ho Bakreste ba Baheberu: “Otlollang matsoho a lepeletseng le mangole a tšeremang, ’me le ’ne le otlolle litsela bakeng sa maoto a lona, e le hore se holofetseng se se ke sa ntšoa lenonyellong, empa ho e-na le hoo e le hore se ka fola.” (Baheb. 12:​12, 13) Ho sa tsotellehe hore na re banyenyane kapa re baholo, kaofela ha rona re lokela ho khothatsana. Moapostola Pauluse o ile a eletsa phutheho ea Filipi a re: “Haeba ho e-na le khothatso leha e le efe ho Kreste, haeba ho e-na le matšeliso leha e le afe a lerato, haeba ho e-na le karolelano leha e le efe ea moea, haeba ho e-na le lerato le mofuthu le qenehelo leha e le efe, le tlatse thabo ea ka ka hore le na le kelello e tšoanang ’me le na le lerato le tšoanang, le kopane hammoho moeeng, le bolokile kelellong monahano o le mong, le sa etse letho ka lebaka la ho rata likhang kapa ka lebaka la ho ipolelisa, empa ka ho ikokobetsa kelellong le nka hore ba bang ba le phahametse, le sa hlokomele lithahasello tsa litaba tsa lona feela, empa hape le hlokomela lithahasello tsa ba bang.”​—Bafil. 2:​1-4. w18.04 22 ¶10; 23 ¶12

Lebaka le ka sehloohong la hore Jehova a re lopolle bokhobeng ba sebe le lefu ka Jesu ke hore re Mo sebeletse bophelo bohle ba rona. Tsela e molemo ka ho fetisisa ea ho sebelisa bolokolohi ba rona ka tsela e nepahetseng ke ka hore re sebelise nako le matla a rona ho sebeletsa Jehova ka hohle. Ha re etsa joalo, re ke ke ra lumella hore lintho tsa lefatše lena hammoho le lintho tseo re li batlang e be tsona tsa bohlokoa bophelong ba rona. (Bagal. 5:​16) Nahana ka mohlala oa Noe le lelapa la hae. Ba ne ba phela har’a batho ba khopo ba bileng ba hlokang boitšoaro. Leha ho le joalo, ba ne ba sa etse lintho tseo batho bao ba li etsang. Ba ne ba phathahane ka ho etsa mosebetsi oo Jehova a ba fileng oona. Ba ile ba haha areka, ba bokella lijo bakeng sa bona le liphoofolo ’me ba lemosa batho ka moroallo. “Eaba Noe o etsa ho ea ka sohle seo Molimo a mo laetseng sona. A fela a etsa joalo.” (Gen. 6:​22) Kahoo, Noe le lelapa la hae ba ile ba pholoha ha Molimo a felisa lefatše.​—Baheb. 11:7. w18.04 10 ¶8; 11 ¶11-12

Satane le bademona ha ba sebelise mebuso feela ho khelosa batho empa ba boetse ba sebelisa bolumeli ba bohata le khoebo ho khelosa “lefatše lohle leo ho ahiloeng ho lona.” (Tšen. 12:9) Satane o sebelisa bolumeli ba bohata ho ruta mashano ka Jehova. Ho ekelletsa moo, Diabolose o ikemiselitse ho etsa hore batho ba bangata ba lebale lebitso la Molimo. (Jer. 23:​26, 27) Ka lebaka leo batho ba bangata ba nahanang hore ba rapela Molimo, ha e le hantle ba rapela bademona. (1 Bakor. 10:​20; 2 Bakor. 11:​13-15) Satane o boetse o sebelisa khoebo ho jala mashano. Mohlala, batho ba rutoa hore ba tla thaba hafeela ba e-na le chelete le maruo a mangata. (Liprov. 18:​11) Batho ba lumelang mashano ana ba qeta bophelo bohle ba bona ba batlana le “Maruo” ho e-na le ho sebeletsa Molimo. (Mat. 6:​24) Qetellong tsela eo ba ratang maruo ka eona e bipetsa lerato leo ba neng ba rata Molimo ka lona.​—Mat. 13:​22; 1 Joh. 2:​15, 16. w18.05 23 ¶6-7