February

Iphe nako ea ho ithuta ka bara le barali beno e le hore u ba tsebe haholoanyane. Bua le bona pele ho liboka le ka mor’a tsona, sebetsa tšimo le bona ’me ha ho khoneha u ba memele lijong. Ha u etsa joalo, u ka ’na oa elelloa hore morali’abo rona eo e kang ha a na botsoalle ha e le hantle o lihlong. Athe mor’abo rona eo u neng u nahana hore o rata maruo, o seatla se bulehileng. Kapa lelapa le fihlang hangata liboka li kene le tobane le khanyetso. (Jobo 6:29) Leha ho le joalo, ha rea lokela ho ‘kena-kenana le litaba tsa batho ba bang.’ (1 Tim. 5:13) Empa ke ntho e ntle hore re tsebe lintho tse itseng tse hlahetseng bara le barali babo rona bophelong e le hore re ba tsebe haholoanyane. Ha u ipha nako ea hore u tsebe balumeli-’moho le uena hantle bao ka linako tse ling u ka bonang eka baa tena, u ka ’na oa leka ho utloisisa hore na ke hobane’ng ha ba le joalo. U hloka ho etsa boiteko e le hore u ba tsebe hantle. Kahoo, ha u mamela keletso ea Bibele ka hore u etse lintho tsena, u etsisa Jehova ea ratang “batho ba mefuta eohle.”​—1 Tim. 2:3, 4; 2 Bakor. 6:11-13. w20.04 16-17 ¶10-12

Bosiung ba ho qetela pele Jesu a shoa, o ile a hopotsa barutuoa ba hae hore ba lokela ho ratana. O ne a tseba hore haeba ba itela ebile ba ratana, ba ne ba tla lula ba momahane hape ba e-na le mamello ha batho ba bang ba ba hloile. Nahana ka mohlala oa phutheho ea Thesalonika. Haesale Bakreste ba phutheho eo ba hlorisoa ho tloha ha e ne e thehoa. Leha ho le joalo, ba ile ba beha mohlala o motle oa ho tšepahala le ho bontša lerato. (1 Bathes. 1:3, 6, 7) Pauluse o ile a ba khothalletsa hore ba tsoele pele ba ratana haholo. (1 Bathes. 4:9, 10) Lerato le ne le tla ba susumelletsa ho khothatsa ba tepelletseng maikutlo le ho tšehetsa ba fokolang. (1 Bathes. 5:14) Ba ile ba mamela litaelo tsa Pauluse hobane selemo hamorao ha a ne a ngola lengolo la hae la bobeli o ile a re ho bona: “Lerato la e mong le e mong le la lona kaofela lea eketseha e mong ho e mong.” (2 Bathes. 1:3-5) Lerato leo ba neng ba e-na le lona le ile la ba thusa hore ba mamelle mathata le ho hlorisoa. w21.03 22 ¶11

Haeba re batla ho fumana moputso oa bophelo bo sa feleng, re lokela ho matha tseleng eo Jehova a batlang hore re mathe ho eona. (Lik. 20:24; 1 Pet. 2:21) Leha ho le joalo, Satane le batho bohle ba mo latelang ba batla hore re etse khetho e fapaneng ea hore re “tsoele pele ho matha le bona.” (1 Pet. 4:4) Ba soma tsela eo re e khethileng hape ba bolela hore tsela eo bona ba e khethileng e fana ka bolokolohi bo bongata. Empa taba ena ha se ’nete. (2 Pet. 2:19) Ke habohlokoa hore re khethe tsela e nepahetseng. Satane o batla hore kaofela ha rona re khaotse ho matha tseleng e patisaneng “e isang bophelong” ’me re tšelele ho e pharaletseng eo batho ba bangata ba lefatše lena ba mathang ho eona. Batho ba bangata ba rata tsela ena hape ke bolacha feela ho tsamaea ho eona. Empa bohloko ba eona ke hore ‘e isa timetsong.’ (Mat. 7:13, 14) E le hore re lule re matha tseleng e nepahetseng le hore re se ke ra khelosoa, re lokela ho tšepa Jehova le ho mo mamela. w20.04 26 ¶1; 27 ¶5, 7

Lilemong tsa morao tjena, Russia le linaha tse e tšehetsang li ile tsa kena “naheng ea Mokhabiso.” (Dan. 11:41) Joang? Ka 2017, Russia e ile ea thibela mosebetsi oa Lipaki Tsa Jehova ea ba ea kenya bara le barali babo rona lichankaneng. E ile ea boela ea thibela lingoliloeng tsa rona ho akareletsa le Phetolelo ea Lefatše le Lecha. Hape e ile ea nka ofisi ea lekala e Russia, Liholo Tsa ’Muso le Liholo Tsa Likopano. Ka mor’a hore ho etsahale lintho tsena, ka 2018 Sehlopha se Busang se ile sa re Russia le linaha tse e tšehetsang ke morena oa leboea. Ho sa tsotellehe hore na ba hlorisoa hakae, bahlanka ba Molimo ba ke ke ba loantša ’muso kapa hona ho leka ho liha ’muso. Empa leha ho le joalo, ba latela keletso ea Bibele e reng ba rapelle bohle ba “boemong bo phahameng,” haholo-holo ha mebuso eo e etsa qeto ea hore na re tla sebeletsa Molimo ka bolokolohi kapa che. w20.05 14 ¶9

Batsoali, haeba bana ba lona ba hloka ho kholiseha hore lintho tseo Bibele e li rutang ke ’nete, ba lokela ho ba metsoalle ea Jehova ba be ba kholisehe hore lintho tseo Bibele e li rutang ke ’nete. E le hore batsoali ba tle ba khone ho ruta bana ba bona ka Molimo, ba lokela hore e be mehlala ea bona ka hore ba ithute Bibele. Le lokela ho nahanisisa ka lintho tseo le ithutang tsona. Ka tsela eo, ho tla ba bonolo hore le rute bana ba lona hore le bona ba etse ntho e tšoanang. Batsoali le lokela ho ruta bana ba lona mekhoa e fapa-fapaneng ea ho etsa lipatlisiso, joalokaha le khona ho thusa lithuto tsa lona hore li etse joalo. Ha le etsa joalo, le tla thusa bana ba lona hore ba ananele mocha oo Jehova a o sebelisang e leng lekhoba le tšepahalang le le masene le re fang lijo tse re thusang ho ba le kamano e ntle le eena. (Mat. 24:45-47) Batsoali ha lea lokela ho khotsofalla ho ruta bana ba lona lithuto tsa motheo feela tsa Bibele. Empa le lokela ho ba thusa hore ba be le tumelo e matla ka ho ba ruta “lintho tse tebileng tsa Molimo” ho itšetlehile ka hore na ba lilemo li kae kapa hore na ba na le bokhoni bo bokae.​—1 Bakor. 2:10. w20.07 11 ¶10, 12-13

Ke batho ba bakae mehleng ee ba thabelang ho ba metsoalle e haufi ea Jehova? Ke batho ba baloang ka limilione. Setsoalle sena se khonahala ka lebaka la tumelo eo ba nang le eona sehlabelong sa Jesu sa thekollo. Ka lebaka la sehlabelo sa thekollo sa Jesu, re ka khona ho ba metsoalle ea Jehova ra ba ra inehela ho eena le ho kolobetsoa. Ha re etsa joalo, re khema le batho ba limilione ba inehetseng, ba kolobelitsoeng ebile ba thabela ho ba le kamano e haufi le motho ea phahameng ka ho fetisisa bokahohleng! Re ka bontša joang hore re ananela ho ba metsoalle e haufi ea Jehova? Feela joalokaha Abrahama le Jobo ba ile ba lula ba tšepahalla Molimo ka lilemo tse ka holimo ho lekholo, le rona re lokela ho lula re tšepahala ho sa tsotellehe hore na re na le nako e kae re sebeletsa Jehova. Joaloka Daniele, re lokela ho nka setsoalle sa rona le Jehova se le bohlokoa le ho feta bophelo ba rona. (Dan. 6:7, 10, 16, 22) Ha Jehova a re tšehelitse re ka khona ho mamella liteko tseo re thulang le tsona e le hore re lule re le metsoalle ea hae.​—Bafil. 4:13. w20.05 27 ¶5-6

Morena Davida o ile a bona mosali oa monna e mong a ntse a hlapa. O ne a tseba molao ona oa Jehova: “U se ke ua lakatsa mosali oa oa heno.” (Ex. 20:17) Ho ntse ho le joalo, o ile a ba lehala eaba o tsoela pele ho sheba mosali eo. Pelo e ’ngoe ea Davida e ile ea lakatsa mosali eo, e leng, Bathe-sheba, ha e ’ngoe eona e ne e lakatsa ho khahlisa Jehova. Le hoja ka nako e telele Davida a ne a rata Jehova le ho mo hlompha, Davida o ile a itumella hore a phethe litakatso tsa hae. Ka lebaka leo, Davida o ile a etsa lintho tse ngata tse mpe. O ile a etsa hore lebitso la Jehova le rohakoe. O ile a tlisetsa le batho ba se nang molato mathata, ho akareletsa le lelapa la hae. (2 Sam. 11:1-5, 14-17; 12:7-12) Jehova o ile a khalemela Davida eaba Davida o boela e-ba motsoalle oa hae hape. (2 Sam. 12:13; Pes. 51:2-4, 17) Davida o ile a hopola mathata le mahlomola ao a bileng le ’ona nakong eo a neng a itumella hore pelo ea hae e se ke ea fella ho Jehova. Mantsoe a hae a hlahang ho Pesaleme ea 86:11 a ka boetse a behoa tjena: “Mphe pelo e feletseng.” Na Jehova o ile a boela a thusa Davida hore a be le pelo e feletseng kapa e ikemiselitseng ho mo sebeletsa? E! o ile a mo thusa hobane Lentsoe la Jehova le hlalosa Davida e le monna eo pelo ea hae e neng e feletse ho Jehova Molimo oa hae.​—1 Mar. 11:4; 15:3. w20.06 11 ¶12-13

Bibele e re lerato leo Jehova a re ratang ka lona le tšoana le ropo. Hobane’ng? Nahana ka mohlala ona: A re nke hore oa teba leoatleng kapa u nkoa ke noka ebe motho e mong ea haufi le uena o u akhella ntho e tla u thusa hore u se ke oa qoela. U tla thaba hobane joale u tla khona ho phaphamala ka holim’a metsi. Empa u ntse u tlameha ho tsoa ka metsing ana a batang, kahoo u hloka motho ea ka u akhellang ropo ebe o u hulela ka thoko. Jehova o ‘’nile a hula’ Baiseraele ba neng ba khaolitse ho mo sebeletsa joalokaha temana ea letsastsi ea kajeno e bontša. Le mehleng ena Jehova o ntse a ikutloa ka tsela e tšoanang ka batho ba khaolitseng ho mo sebeletsa, ba qoetseng ka har’a mathata le ba nang le khatello ea maikutlo. O batla ba tsebe hore oa ba rata ebile o batla ba khutlele ho eena. Jehova a ka u sebelisa ho bontša bahlanka bao ba hae hore oa ba rata. Re etsa hantle ha re bolella batho ba seng ba sa tle libokeng hore Jehova oa ba rata le hore le rona rea ba rata. w20.06 27 ¶12-13

Ha morutuoa Setefane a ne a bolaoa, Bakreste ba bangata ba ile ba baleha Jerusalema, “ba hasana ho pholletsa le libaka tsa Judea le Samaria” eaba qetellong ba fihla le libakeng tse hole tse kang Cyprase le Antioke. (Lik. 7:58–8:1; 11:19) U se u ka inahanela feela hore na barutuoa bao ba ile ba tlameha ho mamella mathata a mangata hakae. Empa ba ile ba ’na ba tsoela pele ho bua ka Jesu ka cheseho moo ba neng ba le hona teng ’me liphutheho li ile tsa thehoa ’musong oo oa Roma. (1 Pet. 1:1) Empa tseo e ne e sa le linyane feela bakeng sa Bakreste bao. Mohlala, hoo e ka bang ka selemo sa 50 mehleng eo, Claudiase ’Musisi oa Roma o ile a laela Bajuda bohle hore ba tlohe Roma. Kahoo, Bajuda bao e neng e se e le Bakreste ba ile ba qobelloa hore ba tlohe mahaeng a bona ’me ba il’o lula libakeng tse ling. (Lik. 18:1-3) Hoo e ka bang ka selemo sa 61, moapostola Pauluse o ile a bontša hore Bakreste-’moho le eena ba bang ba ile ba rohakoa, ba lahleloa ntloana-tšoana ba ba ba nkeloa thepa ea bona ka mahahapa. (Baheb. 10:32-34) Hape joaloka batho ba bang, Bakreste ba ile ba tlameha ho mamella mathata a tlala ea sekoboto le ho kula.​—Bar. 15:26; Bafil. 2:25-27. w21.02 26-27 ¶2-4

Ha ho na letho leo Satane kapa batho ba susumetsoang ke eena ba ka le etsang ho fokolisa motho ea matlafalitseng tumelo ea hae. (2 Joh. 8, 9) Re lokela ho lebella hore batho ba lefatše lena ba re hloee. (1 Joh. 3:13) Johanne o ile a re hopotsa hore “lefatše lohle le rapaletse matleng a ea khopo.” (1 Joh. 5:19) Ha tsamaiso ena e khopo e ntse e-ea bofelong, Satane o tla koata le ho feta. O sebelisa maraba a poteletseng ho re hlasela a kang, boitšoaro bo bobe le mashano a buuoang ke bakoenehi. Empa o boetse o re hlasela ka tsela e tobileng ka ho re hlorisa hampe. Satane oa tseba hore o saletsoe ke nako e khutšoanyane haholo ea hore a leke ho thibela mosebetsi oa rona le ho fokolisa tumelo ea rona. Kahoo, ha ho makatse hore ebe linaheng tse ling likarolo tse itseng tsa mosebetsi oa rona li thibetsoe kapa ebe o thibetsoe ka ho feletseng. Ho ntse ho le joalo, bara le barali babo rona ba lulang libakeng tseo ba ntse ba mameletse. Ba fana ka bopaki ba ho re, ho sa tsotellehe hore na Satane o re hlasela ka’ng, re lula re le bahloli! w20.07 24 ¶12-13

Jehova o ne a rerile hore batho ba thabele ho phela ka ho sa feleng lehaeng le letle leo a ba etselitseng lona. Empa nakong eo Adama le Eva ba neng ba fetohela ntate oa bona ea lerato, sebe le lefu li ile tsa aparela lefatše lohle. (Bar. 5:12) Jehova o ile a etsa’ng? Kapele-pele o ile a hlakisa hore na o tla pholosa batho ka tsela efe. (Gen. 3:15) Jehova o ne a tla fana ka thekollo e neng e tla etsa hore bana ba Adama ba tle ba lokolohe sebeng le lefung. Ka tsela eo, o ne a tla lumella motho e mong le e mong a khethe hore na o batla ho mo sebeletsa kapa che e le hore a tle a fumane bophelo bo sa feleng. (Joh. 3:16;1 Bakor. 15:21, 22) Nakong eo Jehova a sebelisang Mora oa hae ho tsosa batho ba limilione tse se nang palo, re ka ’na ra lumela hore ho ke ke ha tsosoa batho bao ka nako e le ’ngoe. Ke hobane’ng ha re cho joalo? Hobane haeba lefatše le ka tlala ka batho ba bangata ka tsela eo, e ka ’na ea e-ba moluba-lube le moferefere feela. Hape ha ho le ka mohla Jehova a etsang eng kapa eng ka tsela e sa hlophisehang kapa e se nang taolo. Oa tseba hore e le hore ho lule ho e-na le khotso, ho tlameha ho be le taolo.​—1 Bakor. 14:33. w20.08 14 ¶3; 15 ¶5

Motho eo u ithutang le eena o lokela ho utloisisa hore sepheo sa ho ithuta Bibele le eena ke ho mo thusa hore a qetelle e le Paki ea Jehova. Ha motho ea ntseng a ithuta Bibele a batla ho kolobetsoa, ho na le mehato eo a e nkang. O qala pele ka ho ithuta ka Jehova, ho mo rata le ho ba le tumelo ho Eena. (Joh. 3:16; 17:3) Ka mor’a moo e ba motsoalle oa Jehova le motsoalle oa bara le barali babo rona ka phuthehong. (Baheb. 10:24, 25; Jak. 4:8) Qetellong o tlohela mekhoa e mebe ebe o bakela libe tsa hae. (Lik. 3:19) Hape o bolella batho ba bang ka lintho tseo a li lumelang. (2 Bakor. 4:13) Ka mor’a moo o inehela ho Jehova ebe oa kolobetsoa ho bontša hore o inehetse ho Jehova. (1 Pet. 3:21; 4:2) Letsatsi leo a kolobetsoang ka lona le monate haholo ho motho e mong le e mong. Ha motho eo u ithutang Bibele le eena a etsa lintho tsohle tseo a lokelang ho li etsa e le hore a qetelle a kolobelitsoe, u lule u mo babatsa u be u mo khothalletse hore a tsoele pele ho li etsa. w20.10 18 ¶12-13

Haeba re ipapisa le batho ba bang ka phuthehong, re ka ’na ra se ke ra bona hore na re bohlokoa hakae. Batho ba bang ka phuthehong e ka ba mesuoe e hloahloa, ba hlophisehileng haholo, ba khonang ho tšelisa kapa ho khothatsa ba bang. E ka ’na eaba u utloa eka u ke ke oa khona ho etsa lintho tseo hantle joaloka bona. Taba eo e bontša hore u ikokobelitse hape u tseba moo matla a hao a fellang teng. (Bafil. 2:3) Empa u lokela ho ba hlokolosi. Haeba u lula u ipapisa le batho ba bang ba nang le bokhoni bo itseng, u tla soetseha. U ka ba oa ikutloa eka ha u na sebaka ho hang ka phuthehong joalokaha moapostola Pauluse a bontšitse. Jehova o ile a fa Bakreste ba mehleng ea Pauluse limpho tsa moea o halalelang empa ha se bohle ba ileng ba fuoa limpho tse tšoanang. (1 Bakor. 12:4-11) Empa kaofela ha bona ba ne ba le bohlokoa. Mehleng ena, ha re fuoe moea o halalelang hore re etse mehlolo. Empa re ka ithuta thuto e tšoanang. Kaofela ha rona re bohlokoa ho Jehova le hoja re sa tšoane ka bokhoni. w20.08 23 ¶13-15

Ha u rapella ho ba sebete le ho se tšabe letho, Jehova o tla arabela lithapelo tsa hao ’me a ke ke a u tlohela. (Lik. 4:29, 31) O tla lula a u tšehetsa. Nahana ka hore na o u thusitse joang hore u hlole mathata a itseng le hore ebe o u file matla a ho etsa liphetoho bophelong ba hao. Kannete Molimo ea ileng a ntša batho ba hae Leoatleng le Lefubelu, a ka u thusa hore u be morutuoa oa Kreste. (Ex. 14:13) E-ba le tumelo e tšoanang le ea Mopesaleme ea ileng a bua mantsoe a temana ea kajeno. Jehova o boetse a ka thusa bahoeletsi ba bacha hore ‘ba be sebete.’ Nahana ka mohlala oa Morali’abo rona Tomoyo. Ha a ne a a qala ho bolela ka ntlo le ntlo, ntlo ea pele eo a ileng a kena ho eona, mong’a ntlo o ile a re: “Ha ke batle ho utloa letho le tsoang ho lona Lipaki Tsa Jehova!” eaba o khahlela lemati. Morali’abo rona Tomoyo o ne a sa tšoha eaba o re ho motsoalle oa hae: “Na u utloile ntho eo ke e utloileng? Ha ho na ntho eo ke e buileng empa o khonne ho bona hore ke Paki ea Jehova. Ke thabile ho re!” Hona joale Morali’abo rona Tomoyo ke pula-maliboho ea kamehla. w20.09 6 ¶13-14

Asa o ile a bolella sechaba hore ke Jehova ea neng a ba file “phomolo ka hohle.” (2 Likron. 14:6, 7) Ha aa ka a nka hore nako eo ea khotso e ne e le ea hore ba rahe qhebelele. Ho fapana le hoo, o ile a qala mosebetsi oa ho haha metse, marako, litora le liheke. O ile a bolella sechaba sa Juda a re: “Re sa ntse re e-na le naha.” Asa o ne a bolele’ng? O ne a bolela hore batho ba na le bolokolohi ba ho haha le ho tsamaea naheng eo Molimo a ba fileng eona ntle ho tšitiso ea ba lireng. O ile a khothaletsa batho hore ba nke monyetla ka nako eo ea khotso. Asa o ile a boela a sebelisa nako eo ea khotso ho matlafatsa sesole sa hae. (2 Likron. 14:8) Na taba eo e ne e bontša hore o ne a sa tšepe Jehova? Le letho. Ho e-na le hoo, Asa o ne a tseba hore ke mosebetsi oa hae joaloka morena ho thusa sechaba ho itlhophela mathata ao se neng se ka ’na sa thulana le ’ona nakong e tlang. Asa o ne a tseba hore khotso eo Juda e nang le eona e ka ’na ea se be teng ho ea ho ile ’me taba eo e ne e le ’nete. w20.09 15 ¶4-5

A se na maikutlo a mabe, moholo a ka etsa melao ka tšepo ea hore o tla sireletsa linku tsa Molimo. Leha ho le joalo, ho na le lintho tsa bohlokoa tse sa tšoaneng ka matla ao lihlooho tsa malapa le baholo ba nang le ’ona. Mohlala, Jehova o khethile baholo hore ba sebetse joaloka baahloli hape o ba file boikarabelo ba hore ba tlose baetsalibe ba sa bakeng ka phuthehong. (1 Bakor. 5:11-13) Ka lehlakoreng le leng, o file lihlooho tsa malapa matla a mang ao a sa a abelang baholo. Mohlala, o file hlooho ea lelapa matla a ho etsa melao le ho e kenya tšebetsong. (Bar. 7:2) Hlooho ea lelapa e na le tokelo ea ho etsetsa bana ba eona qeto ea hore na ba lokela ho fihla hae ka nako mang. E boetse e lokela ho fa bana kotlo haeba ba sa mamele molao oo. (Baef. 6:1) Ke ’nete hore monna ea ratang lelapa la hae o tla bua le mosali oa hae pele a etsa melao ea lelapa haholo joang ha eena le mosali oa hae e le “nama e le ’ngoe.”​—Mat. 19:6. w21.02 16-18 ¶10-13

Lebaka le leng leo ka lona linnete tse ka Bibeleng li leng bohlokoa ka lona ke hobane Jehova o li senoletse batho ba ikokobelitseng ba nang le “tšekamelo e nepahetseng.” (Lik. 13:48) Batho bao ba mamela mocha oo Jehova a o sebelisang ho ba thusa ho utloisisa linnete tsena mehleng ena. (Mat. 11:25; 24:45) Re ke ke ra utloisisa linnete tseo ka borona, kahoo ho bohlokoa hore re thusoe ho li utloisisa. (Liprov. 3:13) Jehova o boetse o re file tlotla ea ho ruta batho ba bang ’nete ka eena le merero ea hae. (Mat. 24:14) Molaetsa oo re o bolelang o bohlokoa hobane o thusa batho hore e be litho tsa lelapa la Jehova le ho ba le monyetla oa ho fumana bophelo bo sa feleng. (1 Tim. 4:16) Ebang re khona ho etsa mosebetsi oa boboleli haholo feela kapa hanyane, kaofela ha rona re kenya letsoho mosebetsing ona oa bohlokoa o etsoang hona joale. (1 Tim. 2:3, 4) Re na le tlotla e kaakang ea ho sebetsa ’moho le Molimo!​—1 Bakor. 3:9. w20.09 26-27 ¶4-5

Ha moapostola Pauluse a ne a le tseleng e eang Roma, Jehova o ile a sebelisa Bakreste-’moho le eena ka makhetlo a mangata ho mo thusa. Mohlala, metsoalle e ’meli ea Pauluse e leng Aristakase le Luka, e ile ea etsa qeto ea ho ea Roma le Pauluse. Ha ho bonahale eka Jesu o ile a ba tšepisa hore ba tla fihla Roma ba ntse ba phela. Kahoo ha ba etsa joalo, ba ne ba bontša hore ba ikemiselitse ho beha maphelo a bona kotsing hore ba thuse Pauluse. Ba ile ba tseba hamorao ha ho se ho le hobe hore ba tla fihla moo ba eang ba ntse ba phela Ha ba fihla motseng oa Sidone, Juliase o ile a lumella Pauluse “ho ea ho metsoalle ea hae le ho thabela tlhokomelo ea eona.” (Lik. 27:1-3) Hamorao ha ba le motseng oa Puteoli, Pauluse le metsoalle ea hae “ba ile ba fumana barab’abo rona ’me ba koptjoa ka tieo hore ba lule le bona matsatsi a supileng.” Ha Bakreste ba lulang libakeng tseo ba ntse ba hlokometse Pauluse le metsoalle ea hae, ba tlameha ba ile ba thaba haholo ha Pauluse a ba bolella tse ling tsa lintho tse khothatsang tse mo etsahalletseng.​—Bapisa Liketso 15:2, 3. w20.11 15-16 ¶15-17

Motsoali, ruta bana ba hao ka mantsoe le ka liketso, e le hore ba bone hore u rata Jehova haholo. Ha u thusa bana ba hao hore ba rate Jehova, u tla be u ba etsetsa ntho e kholo ka ho fetisisa. Hape e ’ngoe ea lintho tsa bohlokoa haholo tseo u ka li etsang ke hore u ba rute ho tloaela ho bala Bibele, ho rapela le ho ea libokeng le tšimong. (1 Tim. 6:6) Ke ’nete hore u lokela ho ba hlokomela ka lintho tseo ba li hlokang hore ba ’ne ba phele. (1 Tim. 5:8) Empa hopola hore ntho e tla thusa bana ba hao ho pholoha ha lefatše lena le timetsoa le hore ba fihle lefatšeng le lecha ke ho ba le kamano e ntle le Jehova, eseng ho ba le chelete kapa maruo a mangata. (Ezek. 7:19) Ke ntho e thabisang haholo ho bona hore batsoali ba bangata ba Bakreste ba etsa liqeto tse nepahetseng tse thusang bana ba bona hore ba be le kamano e ntle le Jehova. Bana ba holelang ka har’a malapa a tjena hangata ba hola ba e-na le mekhoa e metle eo ba ithutileng eona ho batsoali ba bona ’me ha ba ikoahlaele tsela eo ba holisitsoeng ka eona.​—Liprov. 10:22. w20.10 28-29 ¶10-11

Ka linako tse ling, moapostola Petrose o ne a ikoahlaela lintho tseo a ileng a li bua kapa a li etsa. Mohlala, ha Jesu a bolella baapostola ba hae hore o tla hlorisoa a be a shoe, Petrose o ile a mo khalemela a bua mantsoe a ka holimo. (Mat. 16:21-23) Eaba Jesu o khalemela Petrose. Ha sekhakhatha sa batho se tla ho tla tšoara Jesu, Petrose o ile a etsa lintho a sa nahana ka hore kapele feela a hlathe tsebe ea lekhoba la moprista ea phahameng. (Joh. 18:10, 11) Jesu o ile a khalemela Petrose hape. Ntle le moo, Petrose o ne a ile a ithorisa ka hore le ha baapostola ba bang kaofela ba ka siea Jesu, eena a ke ke a ba a khola phalo. (Mat. 26:33) Petrose o ne a itšepa ho tlola. Hamorao o ile a tšaba batho eaba o latola Jesu ka makhetlo a mararo. Eaba “o tsoela ka ntle ’me o lla habohloko” hobane a ne a nyahame haholo. (Mat. 26:69-75) E ka ’na eaba o ile a ipotsa hore na ebe Jesu o sa tla mo tšoarela. Petrose ha aa ka a itumella ho nyahama ’me o ile a tsoela pele ho sebeletsa Jehova. Ka mor’a hore a etse phoso eo, o ile a tsoela pele ho sebeletsa Jehova hammoho le baapostola ba bang.​—Joh. 21:1-3; Lik. 1:15, 16. w20.12 20 ¶17-18

Monna eo e leng hlooho ea lelapa a ka bontša boikokobetso ka litsela tse ngata. Mohlala, ha aa lebella hore mosali le bana ba hae ba phethahale. O mamela maikutlo a lelapa la hae le ho nahana ka ’ona le ha le sa lumellane le eena. Ho phaella moo, monna ea ikokobelitseng o ithaopela ho etsa mesebetsi ea lapeng esita le hoja moo a phelang teng mesebetsi e joalo e nkuoa e le ea bo-’mè. Ntho eo e ka ba pharela. Hobane’ng? Morali’abo rona Rachel o re: “Moo ke phelang teng, haeba monna a thusa mosali oa hae ka ho hlatsoa lijana kapa ho hloekisa ntlo, baahisane le beng ka eena ba ka mo botsa hore na ehlile ke monna oa ’mankhonthe na. Ba ka nahana hore a ke ke a khona ho laola mosali oa hae.” Haeba mokhoa ona ke oo batho ba nang le oona moo u phelang teng, u hopole hore Jesu o ile a hlatsoa maoto a barutuoa ba hae le hoja mosebetsi oo o ne o nkoa e le oa makhoba. Hlooho ea lelapa e molemo ha e tšoenyehe ka hore e etse hore batho ba bang ba nahane hore e na le matla kapa e bohlokoa ka tsela e itseng empa e ameha haholo ka hore mosali oa eona le bana ba ikutloe hantle. w21.02 2 ¶3; 4 ¶11

Jehova o re hlohonolofalitse ka ho re fa bokhoni ba ho hopola lintho tse monate tse re etsahalletseng bophelong. Empa le haeba bophelo ba rona nakong e fetileng bo ne bo le monate, ha se letho ha bo bapisoa le bophelo boo re tla bo phela lefatšeng le lecha. Batho ba ka re utloisa bohloko empa haeba re khetha ho ba tšoarela, re tla khona ho ea pele ka bophelo. Re ka sitoa ho sebeletsa Jehova re thabile haeba re qeta nako e telele re ikutloa re le molato ka lebaka la liphoso tseo re li entseng. Empa joaloka moapostola Pauluse, re lokela ho lumela hore Jehova o re tšoaretse. (1 Tim. 1:12-15) Re na le monyetla oa ho phela ka ho sa feleng. Ha re se re le lefatšeng le lecha, bohloko bo bakoang ke ho hopola lintho tse bohloko tse re etsahalletseng e tla be e le pale ea maobane. Bibele ha e bua ka lefatše le lecha e re: “Lintho tsa pele li ke ke tsa hopoloa.” (Esa. 65:17) Ak’u nahane feela, ba bang ba rona re sebelelitse Jehova ho fihlela re se re ile lilemong empa lefatšeng le lecha re tl’o ba bacha hape. (Jobo 33:25) Ka hona a re itjoetseng hore re ke ke ra khutlela morao empa re tla sheba pele ’me re sebeletse ho fihla lefatšeng le lecha! w20.11 24 ¶4; 29 ¶18-19

Re lebelletse’ng? Nakong ea matšoenyeho a maholo, Jehova o tla re sireletsa ka litsela tse peli tse ikhethang. O tla qala pele ka ho sireletsa bahlanka ba hae ba tšepahalang nakong eo a etsang hore marena a lefatše a felise Babylona e Moholo e leng ’muso oa bolumeli ba bohata. (Tšen. 17:16-18; 18:2, 4) Ka mor’a moo, o tla sireletsa batho ba hae nakong eo a felisang puso eohle ea Satane ka Armagedone. (Tšen. 16:14, 16) Ha re lula re e-na le kamano e ntle le Jehova, Satane a ke ke a re utloisa bohloko ho ea ho ile. Ho e-na le hoo, e tla ba eena ea tla felisoa ka ho felletseng. (Bar. 16:20) Kahoo, lula u apere lihlomo tsa hao tse feletseng tsa ntoa. U se ke oa leka ho loantša Satane le lefatše la hae u le mong. Tšehetsa Bakreste-’moho le uena. Latela tataiso ea Jehova. Haeba u etsa joalo, u tla kholiseha hore Ntate oa hao ea lerato o tla u matlafatsa le ho u sireletsa.​—Esa. 41:10. w21.03 30 ¶16-17

Re ka bontša joang hore re tšepa Jehova? Ka ho mamela tataiso ea hae. Bibele e na le litlaleho tse ngata tse bontšang bohlokoa ba ho lula re khobile matšoafo ’me re tšepile Jehova. Ha u ntse u bala litlaleho tsena, nahana hore na ke’ng e ileng ea thusa bahlanka ba Molimo hore ba lule ba khobile matšoafo le ha ba ne ba tobane le likhanyetso tse boima. Ka mohlala, baapostola ha baa ka ba tšoha ha lekhotla le phahameng la Bajuda le ne le ba laela hore ba khaotse ho bua ka Jesu. Ho e-na le hoo, ka sebete ba ile ba re: “Re tla mamela Molimo e le ’musi ho e na le batho.” (Lik. 5:29) Le ka mor’a hore ba shapuoe, ha baa ka ba tlakasela. Hobane’ng? Hobane ba ne ba tseba hore Jehova o tla ba thusa. Ba ne ba mo thabisitse. Kahoo, ba ile ba tsoela pele ho bolela ka Jesu. (Lik. 5:40-42) Ka tsela e tšoanang, Setefane ha a tjamelane le ho bolaoa, o ile a lula a e-na le khotso le khutso hoo sefahleho sa hae se neng “se le joaloka sefahleho sa lengeloi.” (Lik. 6:12-15) Hobane’ng? Hobane o ne a kholisehile hore o thabisitse Jehova. w21.01 4 ¶10-11

Taba ena e bontša hore ba na le letsoalo le hloekileng le hore Jehova o ba amohetse. (Esa. 1:18) Ke Bakreste ba inehetseng, ba kolobelitsoeng, ba bontšang tumelo e matla sehlabelong sa Jesu le ho ba le setsoalle le Jehova. (Joh. 3:36; 1 Pet. 3:21) Kahoo, baa tšoaneleha ho ema ka pel’a terone ea Molimo ba mo etsetsa “tšebeletso e halalelang bosiu le motšehare” mona lefatšeng. (Tšen. 7:15) Le hona joale ba chesehela ho bolela le ho etsa barutuoa le ho beha ’Muso pele bophelong ba bona. (Mat. 6:33; 24:14; 28:19, 20) Bongata bo boholo bo phonyohileng matšoenyeho a maholo, bo kholisehile hore Jehova o tla tsoela pele ho bo hlokomela kaha “ea lutseng teroneng o tla ala tente ea hae holim’a bona.” Tšepiso eo linku tse ling esale li emetse ho bona ha e phethahala, ke e reng: “[Molimo] o tla hlakola meokho eohle mahlong a bona.”​—Tšen. 21:3, 4. w21.01 16 ¶9-10

Re rata ho ba litho tsa lelapa la Jehova hape re leka kahohle kamoo re ka khonang ho hlompha tokisetso ea bohlooho eo Jehova a faneng ka eona. Bibele e bontša hore Jehova o nka banna le basali ba le bohlokoa ka tsela e tšoanang ho eena. Mohlala, Bibele e bontša hore mehleng ea baapostola, Jehova o ile a fana ka moea o halalelang ho basali le banna ’me a ba fa matla a hore ba etse mehlolo e kang ho bua lipuo tse sa tšoaneng. (Lik. 2:1-4, 15-18) Basali hammoho le banna ba tlotsitsoe ka moea o halalelang ’me ba na le tšepo ea ho ea busa le Kreste. (Bagal. 3:26-29) Basali le banna ba tla fumana moputso oa ho phela ka ho sa feleng lefatšeng. (Tšen. 7:9, 10, 13-15) Hape banna le basali ba filoe mosebetsi oa ho bolela le ho ruta molaetsa oa Bibele. (Mat. 28:19, 20) Ha e le hantle, buka ea Liketso e bua ka mosali ea bitsoang Prisilla eo monna oa hae e neng e le Akuila ’me ba ile ba hlakisetsa Apolose monna ea rutehileng haholo linnete tsa Mangolo.​—Lik. 18:24-26. w21.02 14 ¶1; 15 ¶4

Baholo le na le boikarabelo bo boima ba ho thusa bahoeletsi hore ba atlehe tšebeletsong ea tšimo ha ba bolela le ha ba ruta. Haeba mohoeletsi a tšaba ho khanna thuto u le teng, ithaopele ho e khanna. Baholo ba ka khothatsa bahoeletsi haholo le ho ba thusa hore ba se ke ba tela. (1 Bathes. 5:11) Le haeba hona joale ha ho na motho eo u ithutang Bibele le eena, u ka khona ho thusa motho e mong hore a kolobetsoe. Re ka khona ho thusa mohoeletsi ha a ntse a ruta motho Bibele ka hore re bue lintlha tse lokiselitsoeng hantle empa re sa bue haholo. Re ka ba metsoalle ea batho ba ithutang Bibele ha ba tla Holong ea ’Muso re be re ba behele mohlala o motle. Hape baholo ba ka khothatsa batho ba ithutang Bibele ka hore ba iphe nako ea bona ’me ba thuse bahoeletsi ka ho ba koetlisa le ho ba babatsa. Kannete re thaba haholo ha re thusa motho ea ithutang Bibele hore a rate Jehova le ho mo sebeletsa leha e ka ba ka tsela e nyane feela. w21.03 13 ¶18-19

Davida o ile a bontša hore o na le boikarabelo hape oa tšepahala. Ka mohlala, ha e sa le mocha o ile a sebetsa ka thata ho hlokomela linku tsa ntate oa hae. Mosebetsi oo o ile oa ba kotsi. Hamorao Davida o ile a re ho Morena Saule: “Mohlanka oa hao e bile molisa oa tsa ntat’ae har’a mohlape, ’me ho ile ha tla tau, le bere, ’me e ’ngoe le e ’ngoe ea nka nku mohlapeng. Ka e sala morao eaba kea e hlaba ’me ke e pholosa molomong oa eona.” (1 Sam. 17:34, 35) Davida o ne a tseba hore ke boikarabelo ba hae hore a hlokomele linku tseo. Barab’abo rona ba bacha ba ka etsisa Davida ka hore ka mafolo-folo ba phethe mosebetsi o mong le o mong oo ba o fuoang. Ha Davida e sa le mocha o ile a ba le kamano e ntle haholo le Jehova. Setsoalle sa hae le Jehova se ne se le bohlokoa haholo ho feta sebete seo a neng a e-na le sona kapa bokhoni ba hae ba ho letsa harepa. Ho Davida Jehova e ne e se Molimo feela tjee, e ne e le motsoalle oa hae ea haufi-ufi. Barab’abo rona ba bacha, ntho ea bohlokoa eo le lokelang ho e etsa ke ho matlafatsa kamano ea lona le Jehova. w21.03 3 ¶4-5