April

Jesu o ile a bontša hore o re rata haholo ka hore a tele bophelo ba hae bakeng sa rona. (Joh. 15:13) Re ke ke ra khona ho busetsa letho ho Jehova le Jesu ka lebaka la hore ba re bontšitse lerato ka tsela ena. Empa letsatsi ka leng, re ka ba bontša hore rea ba leboha ka tsela eo re phelang ka eona. (Bakol. 3:15) Batlotsuoa ba ananela thekollo haholo hobane e entse hore ba be le tšepo e babatsehang ka ho fetisisa. (Mat. 20:28) Jehova o ba nka ba lokile hore a ba amohele e le bana ba hae hobane ba bontša tumelo sehlabelong sa Kreste. (Bar. 5:1; 8:15-17, 23) Linku tse ling le tsona li ananela thekollo. Kaha li lumela sehlabelong sa Jesu, li na le letsoalo le letle ka pel’a Molimo hape li na le tšepo ea hore li tla pholoha ‘matšoenyeho a maholo.’ (Tšen. 7:13-15) Lihlopha tsena tse peli libontša hore li ananela thekollo ka hore li be teng Sehopotsong selemo le selemo. w22.01 23 ¶14-15

Jesu o ne a tšoentsoe ke lebaka le fanoeng e le sesosa sa hore ebe o bolailoe ka tsela eo. O ne a qositsoe ka leshano la hore ke monyefoli kapa motho ea sa hlompheng Molimo le lebitso la hae ho hang. (Mat. 26:64-66) Ntho ena e ile ea tšoenya Jesu hoo a neng a lakatsa eka Ntate oa hae a ka be a sa lumella hore a tlotlolloe ka tsela eo. (Mat. 26:38, 39, 42) Jesu o ne a lokela hore a fanyehoe palong e le hore Bajuda ba tlosoe thohako. (Bagal. 3:10) Ba ne ba tšepisitse hore ba tla ikobela Melao ea Molimo eo ba ileng ba hloleha ho e mamela. Kahoo, kaha e ne e le bana ba Adama hape ba e-na le thohako eo, ba ne ba lokela ho shoa. (Bar. 5:12) Molao oa Molimo o ne o re ha motho a entse sebe se lokeloang ke lefu a bolaoe. Ka mor’a moo, setopo sa hae se ne se ka fanyehoa palong. (Deut. 21:22, 23; 27:26) Le hoja Bajuda ba ne ba sa batle Jesu, taba ea hore ebe o ile a fanyehoa palong, e ile ea bula monyetla bakeng sa hore ba ka rua molemo sehlabelong sa hae. w21.04 16 ¶5-6

U nahana hore letsatsi pele Jesu a bolaoa ho ne ho le joang? Masole a Baroma a mo otla ka sehloho. (Mat. 26:52-54; Joh. 18:3; 19:1) Masole ao, a mo shapa ka sephali se hlenhlanyang nama ea hae. Hamorao, ba mo jarisa palo e boima ka mokokotlong o tletseng mali. Ka mor’a moo, o qalella ho hulela palo eo moo a il’o bolaeloa teng empa ho e-s’o ee kae, motho e mong o laeloa hore a mo jarise eona. (Mat. 27:32) Ha ba fihla moo Jesu a tl’o bolaeloa teng, babolai ba hae ba mo kokotella palong ka lipekere maotong le matsohong. Boima ba ’mele oa hae, bo etsa hore maqeba a lipekere a tabohe le ho feta. Metsoalle ea hae e utloile bohloko, ’mè oa hae eena oa lla athe baeta-pele ba Bajuda bona ba tšeha Jesu. (Luka 23:32-38; Joh. 19:25) Hora e le ’ngoe ekare ke selemo hore e fete. Pelo ea hae le matšoafo li imetsoe ’me ho thata hore a ka hema. Ha a se a le haufi le ho shoa, o etsa thapelo ea ho qetela. Ka mor’a moo, o kebisa hlooho oa shoa. (Mar. 15:37; Luka 23:46; Joh. 10:18; 19:30) Kannete ena e bile tsela e bohloko haholo, e tlotlollang ka ho fetisisa le e nkileng nako e telele hore motho a shoe. w21.04 16 ¶4

Jesu o ile a bua le baapostola ba hae ba 11 ba tšepahalang ka lilekane tse peli kapa litumellano e leng selekane se secha le selekane sa ’Muso. (Luka 22:20, 28-30) Lilekane tsena li ile tsa bula monyetla bakeng sa baapostola bao le palo e fokolang ea batho ba neng ba tla busa e le marena le baprista leholimong. (Tšen. 5:10; 14:1) Ke masala a batlotsuoa feela a leng lilekaneng tseo tse peli a ka jang bohobe le ho noa veine Sehopotsong. Jehova o ba file tšepo e babatsehang haholo ea ho thabela bophelo ba ho se shoe leholimong ba sebetsa le Jesu Kreste ea tsositsoeng hammoho le bohle ba 144 000. Hape ba tla thabela ho bona Jehova Molimo ka sebele. (1 Bakor. 15:51-53; 1 Joh. 3:2) Batlotsuoa baa tseba hore ba lokela ho tšepahala ho isa lefung.—2 Tim. 4:7, 8. w22.01 21 ¶4-5

Likebekoa tse peli li ne li khokhothetsoe haufi le Jesu. (Luka 23:40, 41) E mong oa banna bao o ile a re ho Jesu: “U nkhopole ha u kena ’Musong oa hao.” (Luka 23:42) Jesu o ile a bua mantsoe a neng a fa motho eo tšepo kaha o ne a tseba hore Ntate oa hae o mohau. (Pes. 103:8; Baheb. 1:3) Jehova o tla re tšoarela le ho re bontša mohau haeba feela re soabela lintho tse mpe tseo re li entseng le haeba re lumela hore ka sehlabelo sa Jesu re ka tšoareloa libe. (1 Joh. 1:7) Batho ba bang bona ba thatafalloa ho lumela hore Jehova a ka ba tšoarela. Haeba ka linako tse ling u ee u ikutloe joalo, u hopole hore nakoana feela pele Jesu a e-shoa, o ile a hauhela senokoane sane se neng se se se qalile ho bontša tumelo ho eena. Joale u se u ka inahanela hore na Jehova eena o re hauhela hakaakang ha re tšepahala ho eena.—Pes. 51:1; 1 Joh. 2:1, 2. w21.04 9 ¶5-6

Jesu o phethahalitse lintho tse ngata kaha o ile a tšepahala ho fihlela lefung. Ntho ea pele eo a e entseng ke ho paka hore Satane o leshano. Jesu o bontšitse hore motho ea phethahetseng a ka khona ho tšepahala ka ho felletseng ho sa tsotellehe hore na Satane o etsa’ng. Ntho ea bobeli ke hore Jesu o ile a fana ka bophelo ba hae e le thekollo. Sehlabelo sa hae se entse hore batho ba sa phethahalang ba khone ho ba le setsoalle le Molimo le hore ba be le tšepo ea ho phela ka ho sa feleng. Ea boraro ke hore Jesu o bontšitse hore Jehova ke eena feela ea loketseng ho busa ’me a ba a tlosa le qoso lebitsong la hae. Re lokela ho ikemisetsa ho tšepahala letsatsi le leng le le leng. Kahoo, leha re ka shoa re tla khona ho re, “Jehova, ke lekile matsapa ’ohle hore ke lule ke tšepahala le ho tšehetsa bobusi ba hao ebile ke bontšitse hore Satane o leshano.” w21.04 12 ¶13-14

Ka mor’a hore Jesu a etselletsoe ka mashano, a ahloloe ka ho hloka toka ka hore o entse tlolo ea molao, o tleptjoa litšeho, o hlorisoa ka sehlooho hape o khokhotheloa palong. O khokhotheloa ka lipekere maotong le matsohong. Ha a re oa bua feela, le ha a re oa hema, oa opeloa. Empa joale o lokela ho bua kaha ho na le lintho tsa bohlokoa tseo a lokelang ho re bolella tsona. Re ithuta lithuto tsa bohlokoa haholo mantsoeng a ho qetela a Jesu. A re hopotsa hore re lokela ho tšoarela batho ba bang re be re tšepe hore Jehova le eena o tla re tšoarela. Rea thaba hore ebe bara le barali ba bo rona ba ikemiselitse hore thusa. Empa re lokela ho nka bohato ba hore re kope thuso ha re e hloka. Rea tseba hore Jehova o tla re thusa ho mamella bothata leha e le bofe boo re tobanang le bona. Re boetse re bona bohlokoa ba hore letsatsi ka leng re tšepahale joalokaha eka ha ho na letsatsi le hlahlamang. Re kholisehile hore Jehova o tla re tsosa ha re ka shoa. w21.04 8 ¶1; 13 ¶17

Ha re latela mehato ea Jesu re tla fumana bophelo bo sa feleng. Ha monna ea ruileng a botsa hore na o lokela ho etsa’ng e le hore a fumane bophelo bo sa feleng, Jesu o ile a re ho eena: ‘Tloo u be molateli oa ka.’ (Mat. 19:16-21) Jesu o ile a re ho Bajuda ba bang ba neng ba sa lumele hore ke eena Kreste: “Linku tsa ka . . . lia ntatela. Ke li fa bophelo bo sa feleng.” (Joh. 10:24-29) Re bontša hore re na le tumelo ho Jesu ka hore re etse lintho tseo a re rutileng tsona le hore re mo etsise. Haeba re etsa joalo, re tla lula tseleng e isang bophelong bo sa feleng. (Mat. 7:14) Re lokela ho tseba Jesu pele e le hore re latele mehato ea hae haufi-ufi. Ha rea lokela ho khaotsa ho etsa joalo. Empa re tlameha ho tsoela pele re ithuta ka eena, makhabane a hae, tsela eo a nahanang ka eona le lintho tseo a li ratang. Ho sa tsotellehe hore na e se e le nako e kae re le Lipaki, re lokela ho ikitlaetsa ho tsoela pele ho ithuta ka Jehova le Mora oa hae. w21.04 4 ¶9-10

Ho ka etsahala hore ebe ka linako tse ling moapostola Pauluse o ne a utloisoa bohloko ke bophelo ba hae ba nakong e fetileng. O ile a itlhalosa e le moetsalibe ea “ka pele-pele” ’me ha ho makatse. (1 Tim. 1:15) Pele Pauluse a tseba ’nete, o ne a hlorisa Bakreste motseng o mong ka mor’a o mong, a ba lahlela lichankaneng a bile a lumella hore ba bang ba bolaoe. (Lik. 26:10, 11) U nahana hore Pauluse o ne a ikutloa joang ha a kopana le Mokreste ea mocha eo mohlomong batsoali ba hae ba ileng ba bolaoa ka tumello ea Pauluse? Pauluse o ile a ikoahlaela liphoso tsa hae empa o ne a tseba hore a ke ke a fetola lintho tse etsahetseng. O ile a lumela hore Kreste o mo shoetse eaba ka kholiseho o re: “Ke seo ke leng sona ka mosa o sa tšoanelang oa Molimo.” (1 Bakor. 15:3, 10) Re ithuta’ng? Amohela hore Kreste o u shoetse le hore u betlile tsela bakeng sa hao e le hore u ka ba le setsoalle se haufi-ufi le Jehova. (Lik. 3:19) Ntho ea bohlokoa ho Jehova ke hore na re etsa’ng hona joale le nakong e tlang e seng liphoso tseo re li entseng khale.—Esa. 1:18. w21.04 23 ¶11

Le hoja Bajuda ba bangata mehleng ea Jesu ba ne ba sa lebella hore Mesia a shoe, hlokomela hore na boprofeta bo ile ba re’ng: “O tšolotse moea oa hae lefung, ’me o ile a balelloa le batloli; o jere libe tsa batho ba bangata, ’me a kena lipakeng bakeng sa batloli.” (Esa. 53:12) Kahoo, Bajuda ba ne ba se na lebaka la ho khopeha ha Jesu a ne a bolaoa joaloka moetsalibe. Mehleng ena, re ka qoba ho khoptjoa haeba re tseba lintlha kaofela. Ho Matheu khaolo ea bohlano, Jesu o ile a lemosa balateli ba hae hore “ka leshano [batho ne ba tla] bua ntho ea mofuta o mong le o mong e khopo” ka bona. (Mat. 5:11) Mohloli oa mashano ana ke Satane. O susumetsa bahanyetsi ba rona hore ba bue mashano a kotsi ka rona. (Tšen. 12:9, 10) Ha rea lokela ho mamela mashano ao bahanyetsi ba rona ba a buang. Re se ke ra lumella mashano ao hore a re tšose kapa a fokolise tumelo ea rona. w21.05 11 ¶14; 12 ¶16

Thusa motho eo u ithutang le eena hore a tšepe Jehova. Jesu o ile a tiisetsa barutuoa ba hae hore Jehova o ne a tla ba thusa hobane a ba rata. (Mat. 10:19, 20, 29, 30) Hopotsa motho eo u ithutang Bibele le eena hore Jehova o tla mo thusa le eena. U ka mo thusa hore a itšetlehe ka Jehova ka ho rapela le eena ka lintho tseo a batlang ho li finyella. Mor’abo rona Franciszek ea lulang Poland o re: “Hangata ha motho ea neng a ithuta Bibele le ’na a ne a rapela, o ne a bua ka lintho tseo ke batlang ho li finyella. Ha ke ne ke bona kamoo Jehova a ileng a arabela lithapelo tsa hae kateng, ke ile ka qalella ho rapela. Ke ile ka bona hore Jehova oa nthusa nakong eo ke neng ke hloka ho nka matsatsi mosebetsing oa ka o mocha hore ke ee libokeng le kopanong.” Jehova o tsotella batho bao re ithutang Bibele le bona haholo. O ananela kamoo Bakreste ba sebetsang ka thata ho thusa batho hore e be metsoalle ea hae ’me oa ba rata. (Esa. 52:7) Haeba hona joale ha ho na motho eo u ithutang Bibele le eena, u ntse u ka khona ho thusa batho ba ithutang Bibele hore ba kolobetsoe ka hore u tsamaee le bahoeletsi ba bang ha ba ea ho batho ba ithutang Bibele le bona. w21.06 7 ¶17-18

Re ka bontša hore re ananela mpho ea ho ba le Lentsoe la Molimo ka ho le bala letsatsi le letsatsi. Re lokela ho ipehela nako ea ho bala Bibele le ho ithuta eona eseng mohlang re nang le nako feela. Ha re lula re ithuta Bibele ka nako eo re ipehetseng eona, re tla ba le tumelo e matla haholo. Ho fapana le batho “ba bohlale le ba nang le kelello” ba lefatše lena, rona re na le tumelo e matla e thehiloeng Lentsoeng la Molimo. (Mat. 11:25, 26) Kaha re ithuta Bibele, ea re bolella hore na ke hobane’ng ha maemo a lefatše a ntse a mpefala le hore na Jehova o tla etsa’ng ho a lokisa. Kahoo, a re ikemisetseng ho matlafatsa tumelo ea rona le ho thusa batho ba bang kahohle kamoo ho ka khonehang hore le bona ba be le tumelo ea hore ho na le ’Mopi. (1 Tim. 2:3, 4) Hape a re luleng re emetse nako eo ka eona batho bohle ba tla bua mantsoe a tšoanang le a ho Tšenolo 4:11 a reng: “Jehova, Molimo oa rona, oa tšoaneleha ho amohela khanya le tlhompho . . . hobane u bopile lintho tsohle.” w21.08 19 ¶18-20

Kaha baholo ke balisa, ba na le boikarabelo ba ho fana ka keletso e hlokahalang. Ba lokela ho fana ka keletsoe khothatsang le e ‘thabisang pelo.’ (Liprov. 27:9) Baholo ba rata bara le barali babo rona. Ka linako tse ling, ba bontša lerato lena ka ho eletsa Mokreste-’moho ea haufi le ho etsa phoso. (Bagal. 6:1) Leha ho le joalo, pele moholo a buisana le Mokreste-’moho, ho ka ba molemo hore a hopole lintho tseo moapostola Pauluse a buileng ka tsona mabapi le lerato. O ile a re: “Lerato lea tiisetsa ’me le mosa . . . Le jara lintho tsohle, le lumela lintho tsohle, le tšepa lintho tsohle, le mamella lintho tsohle.” (1 Bakor 13:4, 7) Haeba moholo a nahanisisa ka litemana tsena, li tla mo thusa hore a khone ho fa bara le barali babo rona keletso ka tsela e lerato. Haeba motho ea fuoang keletso a bona hore moholo oa mo tsotella, ho ka ba bonolo hore a amohele keletso eo a mo fang eona. w22.02 14 ¶3; 15 ¶5

Jehova o bopile mangeloi le batho ba phethahetse, ba se na sekoli. Empa Satane (e bolelang “Mohanyetsi”) e leng lengeloi le sa mameleng, o ile a etsa hore Adama le Eva ba phethahetseng le bona ba se ke ba mamela Jehova. Mangeloi a mang le batho ba ile ba khetha ho se mamele Molimo. (Juda 6) Jehova o ile a utloa bohloko haholo. Ho ntse ho le joalo, Jehova o mamelletse ’me o tla etsa joalo ho fihlela a felisa batho bohle ba khopo. Ka mor’a moo, Jehova le bohle ba mo tšepahallang ba tla thaba ha ba se ba sa mamelle lintho tse mpe tse teng lefatšeng. Satane o ile a qosa Jobo le bahlanka ba Jehova hore ba sebeletsa Jehova ka mabaka a boithati. (Jobo 1:8-11; 2:3-5) Maikutlo a Diabolose a ntse a tšoana le ho fihlela lena le holimo. (Tšen. 12:10) Re ka bontša hore Satane o leshano ka hore re mamelle mathata ao re nang le ’ona le hore re lule re tšepahalla Jehova hobane re mo rata. w21.07 9 ¶7-8

Moapostola Pauluse o ile a etsa mohlala ho bontša hore ho bohlokoa haholo ho fetola tsela eo re phelang ka eona. O ile a re re tlameha ho khokhothela botho ba rona ba khale “thupeng.” (Bar. 6:6) Jesu o ile a ikemisetsa ho khokhotheloa thupeng e le hore a thabise Jehova. Ka tsela e tšoanang, le rona e le hore re thabise Jehova re lokela ho ikemisetsa hore re tlohele lintho tseo a li hloileng. Haeba re etsa joalo re tla ba le letsoalo le se nang molato le ho ba le tšepo ea ho phela ka ho sa feleng. (Joh. 17:3; 1 Pet. 3:21) Jehova a ke ke a fetola melao ea hae e le hore feela a re thabise. Ho e-na le hoo, re lokela ho fetola tsela eo re leng ka eona ’me re mamele melao ea hae. (Isa. 1:17, 18; 55:9) Le ka mor’a hore u kolobetsoe, u lokela ho tsoela pele ho qoba lintho tse fosahetseng. Kopa hore Jehova a u thuse ’me u itšetlehe ka moea oa hae eseng ka matla a hao. (Bagal. 5:22; Bafil. 4:6) Re tlameha ho sebetsa ka thata haeba re batla ho hlobola botho ba rona ba khale le hore bo lule bo le sieo. w22.03 6 ¶15-17

Jehova o tšepisa hore o tla re fa lijo, liaparo le bolulo haeba re batla ’Muso oa hae pele le ho phela ka melao ea hae e lokileng. (Mat. 6:33) Ha re tšepa tšepiso eo, re ke ke ra nahana hore lintho tseo lefatše lena le fanang ka tsona li tla re sireletsa le ho re thabisa ka ho sa feleng. Rea tseba hore tsela feela ea hore re be le khotso e le kannete ke ka ho etsa thato ea Jehova. (Bafil. 4:6, 7) Le haeba re e-na le chelete ea ho reka lintho tse ngata, re lokela ho ipotsa hore na ebe re na le nako le matla a ho li sebelisa le ho li hlokomela. Na re tla li rata ho feta tekano? Hopola hore Molimo o lebelletse hore re etse mosebetsi oo a re fileng oona lelapeng la hae. Kahoo, ha rea lokela ho lumella eng kapa eng ho re sitisa. Ha re batle ho tšoana le monna ea ileng a hana monyetla oa ho sebeletsa Jehova le ho ba e mong oa bara ba hae ka lebaka feela la ho rata lintho tseo a neng a e-na le tsona haholo.—Mar. 10:17-22. w21.08 6 ¶17

Ha u ntse u ithuta Bibele, u tla hlokomela makhabane a Jehova ao u ileng oa a bona ha u ne u ithuta ka popo. Ho ithuta ka makhabane ao ho tla u kholisa hore Jehova o teng. (Ex. 34:6, 7; Pes. 145:8, 9) Kahoo, ha u ntse u ithuta ka Jehova haholoanyane tumelo ea hao e tla matlafala, u tla mo rata haholo ’me setsoalle sa hao le eena se tla tiea le ho feta. Bolella batho ba bang ka tumelo eo u nang le eona ho Molimo. Empa u tla etsa’ng haeba motho eo u buang le eena ka Bibele a u botsa potso ea hore na ho na le ’Mopi ebe ha oa kholiseha hantle hore na u tlameha ho mo araba joang? Leka ho fumana karabo e tsoang Bibeleng ho lingoliloeng tsa rona ebe u bua le motho eo ka eona. U ka boela oa kopa thuso ho Lipaki tse nang le boiphihlelo. Ebang motho eo o lumela karabo ea Bibele kapa che, u tla fumana molemo oa hore ebe u ile oa etsa lipatlisiso. Tumelo ea hao e tla tiea le ho feta. w21.08 18 ¶14-15

Ha se hore re lokela ho tela lintho tsohle tseo re li ratang e le hore re khahlise Jehova. (Moek. 5:19, 20) Leha ho le joalo, haeba re khetha hore re se ke ra sebeletsa Molimo haholoanyane hobane re sa batle ho tela lintho tse itseng tseo re li ratang, re tla be re etsa phoso e tšoanang le ea monna eo Jesu a buileng ka eena papisong ea hae ea ileng a sebetsa ka thata hore a be le lintho tse ngata tse ntle empa a se na taba le Molimo. (Luka 12:16-21) Ha re e-na le mathata, re rapela Jehova hore a re thuse ebe re sebelisa matla a rona a ho nahana ho bona hore na re ka sebetsana le ’ona joang. (Liprov. 3:21) Jehova o re hlohonolofatsa ka litsela tse ngata. Re ka bontša hore re ananela lintho tseo a re etsetsang tsona ka ho etsa kahohle kamoo re ka khonang ho mo rorisa. (Baheb. 13:15) Re ka etsa joalo ka ho eketsa tšebeletso ea rona’me Jehova o tla re hlohonolofatsa ka ho eketsehileng. Letsatsi le letsatsi a re batleng litsela tseo re ka “latsoang ’me [re] bone hore Jehova o molemo.” (Pes. 34:8) Ha re etsa joalo, re tla tšoana le Jesu ea ileng a re: “Lijo tsa ka ke hore ke etse thato ea ea nthomileng le hore ke qete mosebetsi oa hae.”—Joh. 4:34. w21.08 30-31 ¶16-19

Satane o batla hore re ikhohomose. Oa tseba hore ha re ka ikhohomosa re tla tšoana le eena ebe re lahleheloa ke tšepo ea ho phela ka ho sa feleng. Kahoo, moapostola Pauluse o ile a re eletsa hore re se ke ra “ikhohomosa ka boikakaso eaba [re] oela kahlolong eo Diabolose a ahlotsoeng ka eona.” (1 Tim. 3:6, 7) Kaofela ha rona ntho eo e ka re etsahalla ho sa tsotellehe hore na re na le nako e kae re sebeletsa Jehova. Hangata batho ba ikhohomosang ba icheba bobona feela. Satane o leka hore re ikhohomose ka hore re ichebe borona ho feta ho nahana ka Jehova haholo-holo ha re e-na le mathata. Mohlala, na u se u kile oa etselletsoa? Kapa na u kile oa tšoaroa ka ho hloka toka? Satane a ka batla hore u behe Jehova kapa banab’eno molato. Hape o batla hore u nahane hore tsela feela ea ho rarolla mathata a hao ke ho etsa lintho ka tsela ea hao eseng ho mamela litaelo tseo Jehova a re fang tsona ka Lentsoeng la hae.—Moek. 7:16, 20. w21.06 15 ¶4-5

Jehova o ile a fa moprofeta Hagai mosebetsi oa bohlokoa. Ho ka etsahala hore Hagai o ne a le har’a batho ba ileng ba khutlela Jerusalema ho tsoa Babylona ka selemo sa 537. Hang ka mor’a hore ba fihle Jerusalema, bahlanka bao ba Jehova ba ile ba haha motheo oa tempele ea Jehova. (Esdr. 3:8, 10) Empa ho e-s’o ee kae ho ile ha etsahala ntho e nyahamisang. Ba ile ba oa moea hoo ba ileng ba khaotsa ho sebetsa ka lebaka la ho hanyetsoa. (Esdr. 4:4; Hag. 1:1, 2) Kahoo, ka selemo sa 520 Jehova o ile a fa Hagai mosebetsi oa hore a tsose Bajuda molota le ho ba khothalletsa hore ba qete tempele. (Esdr. 6:14, 15) Morero oa molaetsa oa Hagai e ne e le ho etsa batho hore ba be le tumelo ho Jehova. Poleloana e re’ng “Jehova oa mabotho” e tlameha ebe e ile ea ba khothatsa haholo. Jehova o na le lebotho le leholohali la mangeloi a mo mamelang. Kahoo, Bajuda ba ne ba lokela ho itšetleha ka eena e le hore ba atlehe. w21.09 15 ¶4-5

Mehleng ena, Lipaki Tsa Jehova lia ratana ebile li na le bonngoe lefatšeng lohle. Ha ho na mokhatlo o tšoanang le oa rona hobane rona rea ratana ho sa tsotellehe hore na re ba morabe ofe kapa re tsoa linaheng life. Re bona bopaki bo totobetseng ba lerato leo ha re le libokeng le likopanong tse nyane le tse kholo. Bopaki boo bo matlafatsa kholiseho eo re nang le eona ea hore borapeli ba rona bo amoheloa ke Jehova. (Joh. 13:34) Mangolo a re khothalletsa hore re “bontšane lerato le matla haholo.” (1 Pet. 4:8) Tsela e ’ngoe eo ka eona re bontšang hore rea ratana ke ka ho tšoarelana le ho mamellana mefokolo ea rona. Re boetse re leka ho batla menyetla ea ho fana le ho mema bohle malapeng a rona esita le bao ho ka etsahalang hore ba ile ba re utloisa bohloko. (Bakol 3:12-14) Ha re bontša lerato le joalo re tla be re paka hore re feela re le Bakreste ba ’nete. w21.10 22 ¶13-14

Na ho khaoloa ho ka thusa motho hore a bake? Ho joalo. Bara le barali ba bo rona ba bangata ba ileng ba etsa sebe se tebileng ba re ho khaoloa ho ile ha ba thusa hore ba hlokomele hore na ba entse sebe se tebileng hakae, ba bake le ho fetola tsela eo ba phelang ka eona ’me ba khutlele ho Jehova. (Baheb. 12:5, 6) Nahana ka mohlala ona. Molisa oa hlokomela hore e ’ngoe ea linku tsa hae ea kula. Oa tseba hore boloetse boo e nang le bona bo hloka hore a e tlose ho tsena tse ling. Leha ho le joalo, linku li rata ho ba har’a mohlape ebile ha li thabele ho arohana le tse ling. Na ebe re ka re molisa o tšoara nku eo hampe haeba a e tlosa har’a tse ling? Ha ho joalo. Oa tseba hore haeba a lumella hore nku ena e be le linku tse ling e tla li tšoaetsa. Kahoo, ka ho tlosa nku ena e kulang, o sireletsa mohlape oohle. w21.10 10 ¶9-10 

Ke ntho e thabisang haholo ho ba setho sa lelapa le leholohali la machaba. Re batla hore batho ba bangata kahohle kamoo ho ka khonehang ba rapele Molimo oa rona hammoho le rona. Re nahanne ka taba ena re lokela ho ela hloko hore re se ke ra etsa eng kapa eng e ka etsang hore Jehova kapa bahlanka ba hae ba hlahe hampe. Re leka ho itšoara ka tsela e tla etsa hore batho ba batle ho mamela molaetsa oa ’Muso. Ka linako tse ling batho ba bang ba ka re soma kapa ba re hlorisa hobane feela re mamela Ntate oa rona. Empa re tla etsa’ng haeba re tšoha ha re bua le batho ba bang ka lintho tseo re li lumelang? Re ka tšepa Jehova le Mora oa hae hore ba tla re thusa. Jesu o ile a tiisetsa barutuoa ba hae hore ha baa tlameha ho tšoenyeha ka hore na ba tla bua joang kapa na ba tla re’ng. O ne a bolela’ng? O ile a re: “Seo le tla se bua le tla se fuoa ka hora eo; etsoe ha se lona ba buang, empa ke moea oa Ntat’a lona o buang ka lona.”—Mat. 10:19, 20. w21.09 24 ¶17-18

Moshe o ile a bua mantsoe a tšoanang ha a ne a bua ka sebaka sa ho itšireletsa. (Pes. 90:1) Nakoana ka mor’a moo, Moshe o ile a boela a bua mantsoe a mang a khothatsang pele a hlokahala. O ile a re: “Molimo oa nakong ea boholo-holo ke sebaka seo ho ipatoang ho sona, ka tlaase ke matsoho a hlolang ka nako e sa lekanyetsoang.” (Deut. 33:27) Mantsoe a reng “ka tlaase ke matsoho a hlolang ka nako e sa lekanyetsoang” a re bolella’ng ka Jehova? Ha Jehova e le Setšabelo sa rona re ikutloa re sireletsehile. Ho ntse ho le joalo, ka matsatsi a mang re ka ’na ra nyahama ha ba ha e-ba thata ho khaotsa ho ikutloa ka tsela eo. Jehova o tla re thusa joang ha re ikutloa ka tsela eo? (Pes. ea 136:23) O tla re tšehetsa a be a re thuse hore re se ke ra hlola re ikutloa ka tsela eo. (Pes. 28:9; 94:18) Ho tseba hore Molimo o lula a re tšehetsa ho re thusa ka litsela tse peli. Ea pele, ho sa tsotellehe hore na re lula hokae rea tseba hore Jehova o tla lula a re sireletsa. Ea bobeli, Ntate oa rona ea lerato o re tsotella haholo. w21.11 6 ¶15-16 

Jesu o ne a tseba hore ho tšoaroa ka ho hloka toka ho ne ho tla leka tumelo ea barutuoa ba hae. E le ho ba thusa hore ba mamelle, o ile a ba etsetsa papiso e tlalehiloeng lengolong la Luka. Jesu o ile a ba bolella ka mohlolohali ea neng a lula a kopa moahloli ea sa lokang hore a mo sebeletse ka toka. Mohlolohali eo, o ne a kholisehile hore haeba a lula a kopa o tla qetella a fumane thuso. Qetellong moahloli o ile a thusa mohlolohali eo. Re ithuta’ng tabeng ee? Jehova o na le toka. Jesu o ile a re: “Joale, na ka sebele Molimo a ke ke a etsa hore toka e etsetsoe bakhethoa ba hae ba hoeletsang ho eena bosiu le motšehare?” (Luka 18:1-8) Jesu o ile a eketsa ka ho re: “Ha Mor’a motho a fihla, na ka sebele o tla fumana tumelo lefatšeng?” Ha re tšoaroa ka ho hloka toka, re ka bontša hore re na le tumelo e matla joaloka ea mohlolohali eo ka hore re mamelle re be re phehelle. Ha re e-na le tumelo e joalo, re ka kholiseha hore Jehova o tla re thusa. Re boetse re lokela ho lumela hore thapelo e na le matla a maholo. w21.11 23 ¶12; 24 ¶14

Bacha, na ka linako tse ling le na le ho utloa eka ho thata ho mamela melao ea Jehova? Satane o batla hore le nahane joalo. O batla hore le bone eka batho ba tsamaeang tseleng e pharaletseng ba thabela bophelo. A ka sebelisa lithaka tsa hao sekolong kapa lintho tseo u li shebang Inthaneteng hore u bone eka ha u thabele bophelo joaloka batho ba bang. Satane o batla hore u bone eka melao ea Jehova e u thibela hore u thabele bophelo ka ho felletseng. Leha ho le joalo, hopola hore Satane ha a batle hore batho ba tsamaeang tseleng ea hae ba tsebe hore na tsela eo e ba lebisa hokae. (Mat. 7:13, 14) Empa Jehova eena o batla hore u tsebe hore na bophelo ba hao bo tla ba monate hakaakang haeba u lula tseleng e isang bophelong.—Pes. 37:29; Esa. 35:5, 6; 65:21-23. w21.12 23 ¶6-7

Rea tseba hore ho tšoarelana ke ntho ea bohlokoa eo re tlamehang ho e etsa. Empa re ka ’na ra thatafalloa ke ho etsa joalo. E ka ’na eaba ka linako tse ling moapostola Petrose o ne a ikutloa joalo. (Mat. 18:21, 22) Re ka thusoa ke’ng? Qala pele ka ho nahanisisa ka hore na Jehova o u tšoaretse hakae. (Mat. 18:32, 33) Ha re tšoaneloe ke hore Jehova a re tšoarele empa o etsa joalo ka ho rata. (Pes. 103:8-10) Le rona ka tsela e tšoanang, “re tlamehile ho ratana.” Kahoo, ha re na boikhethelo tabeng ea ho tšoarelana. Re tlamehile ho lula re tšoarela Bakreste-’moho le rona. (1 Joh. 4:11) U ka boela oa nahanisisa ka hore na ho tšoarelana ho tla re tsoela molemo joang. Re ka thusa motho ea re utloisitseng bohloko, ra momahanya phutheho, ra sireletsa setsoalle sa rona le Jehova le ho imoloha. (2 Bakor. 2:7; Bakol. 3:14) U ka qetella ka ho rapela Molimo oa rona ea reng re tšoarelane. U se ke oa lumella Satane a senye khotso eo u nang le eona le balumeli-’moho le uena. (Baef. 4:26, 27) Re hloka hore Jehova a re thuse haeba re batla ho qoba leraba leo la Satane. w21.06 22 ¶11; 23 ¶14

Davida o ne a baleha hobane Saule e leng morena ea matla oa Iseraele o ne a batla ho mo bolaea. Ha Davida a ne a hloka lijo, o ile a ea motseng oa Nobe moo a ileng a kopa mahobe a mahlano feela. (1 Sam. 21:1, 3) Hamorao eena le banna bao a neng a e-na le bona ba ile ba balehela ka lehaheng. (1 Sam. 22:1) Ho tlile joang hore Davida a be boemong boo? Saule o ne a monela Davida haholo hobane batho ba bangata ba ne ba rata Davida ebile ba mo rorisa hobane a ile a hlola lintoa tse ngata. Saule o ne a boetse a tseba hore Jehova ha a sa mo nka e le morena oa Iseraele ka lebaka la ho se mamele ha hae le hore Jehova o khethile Davida hore e tl’o ba morena. (1 Sam. 23:16, 17) Saule e ne e ntse e le morena oa Iseraele kahoo o ne a e-na le lebotho le leholo la masole le batho ba bangata ba mo tšehetsang, ke kahoo Davida a ileng a lokela ho baleha. Na ebe kannete Saule o ne a nahana hore a ka thibela Molimo hore a etse Davida morena? (Esa. 55:11) Bibele ha e re letho ka taba eo empa re ka kholiseha ka ntho e le ’ngoe feela hore Saule o ne a ipeha boemong bo kotsi. Batho ba khahlanong le Molimo kamehla baa hloloa. w22.01 2 ¶1-2

Jesu o ne a sebetsa ka thata mosebetsing oa ho bolela. O ile a bontša hore o rata batho ka hore a nke monyetla o mong le o mong o hlahang hore a ba rute. (Luka 19:47, 48) O ne a susumetsoa ke’ng? Jesu o ne a ba utloela bohloko. Ka linako tse ling batho ba bangata ba ne ba batla ho utloa molaetsa oa Jesu, hoo eena le barutuoa ba hae “ba neng ba sa khone le ho ja lijo.” (Mar. 3:20) Hape ha monna e mong a ne a batla ho bua le eena bosiu, Jesu o ne a ikemiselitse ho kopana le eena. Batho ba bangata ba neng ba mamela Jesu ha ba aa ka ba fetoha barutuoa ba hae. Empa bohle ba ileng ba mo utloa ba ile ba fumana bopaki bo phethahetseng. Le rona kajeno re batla ho fa motho e mong le e mong monyetla oa ho utloa molaetsa oa ’Muso. (Lik. 10:42) E le hore re atlehe ho etsa joalo, re lokela ho fetola linako tseo re pakang ka eona. Ha rea lokela ho khotsofalla feela ho paka ka nako e nepahetseng bakeng sa rona empa re lokela ho ikemisetsa ho fetola linako tsa rona tsa ho paka e le hore re ka fumana batho ba bangata. Ha re etsa joalo, re ka kholiseha hore Jehova o tla thaba. w22.01 17 ¶13-14

Mehleng ena batho ba bangata ba thatafalloa ho tšepa batho ba boholong. Ba hlokometse hore hangata mebuso le melao e sireletsa batho ba ruileng le ba nang le matla empa ha e thuse batho ba futsanehileng. Hape baeta-pele ba bang ba bolumeli ba etsa lintho tse mpe ’me taba ena e entse hore batho ba bang ba se ke ba tšepa Molimo. Kahoo ha re ithuta Bibele le motho, re lokela ho mo thusa hore a ithute ho tšepa Jehova le batho bao a ba khethileng hore ba re etelle pele. Ke ’nete hore batho bao re ithutang Bibele le bona ha se bona feela ba hlokang ho ithuta ho tšepa Jehova le mokhatlo oa hae. Esita le haeba re sebelelitse Jehova ka lilemo tse ngata, le ka mohla ha rea lokela ho lebala hore kamehla tsela eo Jehova a etsang lintho ka eona e nepahetse. Ka linako tse ling ho ba le maemo a hlahang a ka etsang hore ho be thata ho tšepa Jehova. w22.02 2 ¶1-2