May

E le ho re thusa hore re tsebe Mora oa hae, Jehova o re file Likosepele tse ’ne ka Lentsoeng la hae. Likosepele tsena li re bolella pale ea bophelo ba Jesu le tšebeletso ea hae. Li re bolella lintho tseo Jesu a ileng a li bua, tseo a ileng a li etsa hape li re thusa ho tseba hore na o ne a ikutloa joang. Li boetse li re thusa hore re “nahane ka hloko” ka mohlala oa Jesu. Ha e le hantle, libuka tseo li na le mehato eo Jesu a re sietseng eona. Kahoo, ha re ithuta Likosepele re tla khona ho tseba Jesu haholoanyane. Ha re etsa joalo re tla latela mehato ea hae haufi-ufi. E le hore re tle re khone ho rua molemo haholoanyane Likosepeleng, ha rea lokela ho li bala feela. Re lokela ho ipha nako ea hore re ithute tsona haholoanyane re be re thuise ka tsona ka botebo. (Bapisa le Joshua 1:8) Phelisa likosepele tseo. Sebelisa kelello ea hao hore u bone, u mamele le hore u utloe hore na ho ne ho etsahala’ng. E le hore u khone ho etsa joalo, u lokela hore u etse lipatlisiso u sebelisa lingoliloeng tsa mokhatlo. w21.04 4-5 ¶11-13

Lilemo tse makholo pele Jesu a tla lefatšeng, Jehova o ile a hla a bolela ka Lentsoeng la hae hore Mesia o ne a tla ekoa ka likotoana tse 30 tsa silevera. (Zak. 11:12, 13) O ne a tla ekoa ke motsoalle oa hae ea haufi. (Pes. 41:9) Moprofeta Zakaria o ile a boela a re: “Otla molisa, ’me tsa mohlape li ke li hasanngoe.” (Zak. 13:7) Batho ba lipelo li ntle ba ne ba ke ke ba hanyetsa Jesu feela ka lebaka la liketsahalo tsena empa tumelo ea bona e ne e tla matlafala le ho feta ha ba bona boprofeta bo buang ka Jesu bo phethahala ho eena. Ho joang mehleng ee? Hoa tšoana. Mehleng ena, bahlanka ba Jehova ba ’maloa ba tsebahalang, ba khaolitse ho mo sebeletsa ’me ke bakoenehi hape ba lekile ho khelosa ba bang. Ba hasitse litlaleho tse mpe tse fanang ka maikutlo a fosahetseng hape ba bua mashano ka Lipaki Tsa Jehova ba sebelisa mecha ea phatlalatso le Inthanete. Empa batho ba lipelo li ntle ha ba khelosoe. Ho e-na le hoo, baa tseba hore Bibele e ile ea bolela esale pele hore lintho tse kang tsena li ne li tla etsahala.—Mat. 24:24; 2 Pet. 2:18-22. w21.05 11 ¶12; 12-13 ¶18-19

Taba eo ha e re makatse. Mangolo a hlakisa taba ea hore tsebo e nepahetseng e hlaka le ho feta ha nako e ntse e ea. (Bakol. 1:9, 10) Jehova o senola ’nete butle-butle ’me re lokela hore re ikemisetse ho mo letela ka mamello ha re ntse re emetse hore leseli la ’nete le eketsehe. Ha ba etellang pele ba hlokomela hore tsela eo re utloisisang taba e itseng ka eona e lokela ho ntlafatsoa kapa ho hlakisoa, ha ba qea-qee ho etsa liphetoho. Leha ho le joalo, likereke tse ngata mehleng ena li etsa liphetoho ho khahlisa litho tsa tsona kapa hore li amoheloe ke lefatše. Empa liphetoho tse etsoang ke mokhatlo oa Jehova li etselitsoe ho thusa batho hore ba atamele haufi le Molimo le ho mo sebeletsa ka tsela eo Jesu a neng a mo sebeletsa ka eona. (Jak. 4:4) Liphetoho tse etsoang ha li etsoe ho ipapisitsoe le hore na lefatše le fetohile hakae kapa batho ba rata’ng empa li etsoa hobane re se re utloisisa Bibele haholoanyane. Re ikotla sefuba kannete!—1 Bathes. 2:3, 4. w21.10 22 ¶12

U ka etsa’ng haeba u utloa u le motoai-toai? Nahana kamoo Jehova a ntseng a u thusa kateng. (Pes. 55:22) Ha u etsa joalo, ntho eo e tla u thusa hore u bone hore ha u mong. Nahana hape kamoo Jehova a thusang bara le barali ba bo rona ba ikutloang eka ha ba na mang oe. (1 Pet. 5:9, 10) Mor’abo rona Hiroshi eo e bileng Paki nako e telele a le mong lelapeng la bo o re: “Ho tseba hore re sebeletsa Jehova kahohle kamoo re ka khonang ho khothatsa le rona bao e leng rona feela Lipaki.” Lula u rapela, u bala Bibele ’me u ea le libokeng. U lokela ho bolella Jehova hore na u ikutloa joang. Ke habohlokoa ho bala Lentsoe la Molimo kamehla ’me u nahanisise ka litlaleho tse u tiisetsang hore Jehova oa u rata. Bakreste ba bang ba tšoara mangolo a ba khothatsang ka hlooho a kang Pesaleme ea 27:10 le Esaia 41:10. Batho ba bang ba re ho mamela lintho tse rekotiloeng ha ba lokisetsa liboka le ha ba bala Bibele ho ba thusa haholo hore ba se ke ba ikutloa eka ba bang. w21.06 9-10 ¶5-8

Na u ntse u utloile bohloko ka lebaka la ho hlokahalloa ke motho eo u mo ratang? Nka nako u matlafatsa tumelo ea hao tšepong ea tsoho ka hore u bale litlaleho tsa Bibele tsa batho ba ileng ba tsosoa bafung. Na u utloisitsoe bohloko ke ho khaoloa ha setho sa lelapa? Ithute e le hore u ikholise hore kamehla tsela eo Molimo a re khalemelang ka eona e nepahetse. Ho sa tsotellehe hore na u na le bothata bofe, bo nke e le monyetla oa ho matlafatsa tumelo ea hao. Bolella Jehova hore na u ikutloa joang. Lula u le haufi le bara le barali ba bo rona, u se ke oa ikarola ho bona. (Liprov. 18:1) Etsa lintho tse tla u thusa hore u mamelle esita le haeba ka linako tse ling u lla ha u hopola hore na u etsahalletsoe ke’ng. (Pes. 126:5, 6) Tsoela pele ho ea libokeng, tšimong le ho bala Bibele. Hape tsoela pele u nahana ka lintho tse molemo tseo Jehova a u tšepisitseng ho u etsetsa tsona nakong e tlang. Ha u bona kamoo Jehova a u thusang kateng hona joale, tumelo ea hao ho eena e tla ba matla le ho feta. w21.11 23 ¶11; 24 ¶17

Barutuoa ba Jesu ba joaloka “ba banyenyane” ka tsela efe? Batho ba lefatše lee bona ba re batho ba bohlokoa ke ba joang? Ke ba ruileng, ba tummeng le ba nang le matla. Empa hangata barutuoa ba Jesu ha ba joalo. Ba nkoa ba se bohlokoa, e le “ba banyenyane” ba se nang thuso. (1 Bakor. 1:26-29) Empa Jehova eena ha a ba bone ka tsela eo. Jesu o ile a susumetsoa ke’ng hore a bue ka “ba banyenyane”? Barutuoa ba hae ba ile ba mo botsa ba re: “Ha e le hantle ke mang e moholo ’Musong oa maholimo?” (Mat. 18:1) Mehleng eo, Bajuda ba bangata ba ne ba nka maemo le ho hlahella e le lintho tsa bohlokoa haholo. Mongoli e mong o re: “Batho ba ne ba phelela ho hlomphuoa, ho tuma, le ho amoheloa ke batho ba bang.” Jesu o ne a tseba hore barutuoa ba hae ba ne ba tlameha ho sebetsa ka thata hore ba se ke ba e-ba le moea oa ho hlolisana o neng o rena mehleng eo ea Bajuda. w21.06 20 ¶2; 21 ¶6, 8; 22 ¶9

Moapostola Pauluse e ne e le moholo ea behang mohlala o motle. Ka mohlala, ha Bakreste ba Thesalonika ba ne ba hloka ho eletsoa, Pauluse ha aa ka a qea-qea ho ba fa keletso. Leha ho le joalo, ha Pauluse a ne a ba ngolla lengolo, o ile a qala pele ka ho ba babatsa ka mosebetsi oa bona o tšepahalang, lerato la bona le mamello ea bona. O ile a boela a nahana ka maemo a bona le ho ba bolella hore oa tseba hore bophelo ba bona bo ne bo se bonolo le hore ba ne ba mamelletse mahloriso ka botšepehi. (1 Bathes. 1:3; 2 Bathes. 1:4) O ile a ba a ba bolella hore ke mehlala ho Bakreste ba bang. (1 Bathes. 1:8, 9) E tlameha ebe ba ne ba thabile haholo ha ba utloa kamoo Pauluse a neng a ba babatsa kateng. Ha ho pelaelo hore Pauluse o ne a ba rata haholo. Ke kahoo mangolong a hae a mabeli a eang ho Bathesalonika a ileng a khona ho ba fa keletso e ka ba thusang.—1 Bathes. 4:1, 3-5, 11; 2 Bathes. 3:11, 12. w22.02 15 ¶6

Satane o sebelisa baeta-pele ba bolumeli ba bohata ho ruta batho ba hore Jehova o khopo ebile ke eena ea bakelang batho mathata. Ba bang ba re ha bana ba shoa, ke Molimo ea ba nkileng hobane a hloka mangeloi. Ruri ba hlompholla Molimo ka tsela e ikhethang! Rea tseba hore taba ena ha se ’nete. Ha re kula haholo kapa ha motho eo re mo ratang a hlokahala, ha re behe Molimo oa rona molato. Ho e-na le hoo, re na le tšepo ea hore o tla lokisa lintho. Kahoo, re bolella batho ba batlang ho re mamela hore Molimo oa re rata. Ka tsela eo, Jehova o khona ho fana ka karabo ho ea mo nyelisang. (Liprov. 27:11) Jehova o re utloela bohloko. O utloa bohloko haholo ha a bona re mamelletse lintho tse bohloko tse kang ho hlorisoa, ho kula kapa mefokolo ea rona. (Pes. 22:23, 24) Jehova o utloisisa maemo a rona hantle ebile o batla ho a lokisa ’me o tla etsa joalo.—Bapisa Exoda 3:7, 8; Esaia 63:9. w21.07 9-10 ¶9-10

Haufinyane batho ba mamelang ba tla ba le monyetla o babatsehang oa ho rata Jehova le ho mo sebeletsa ka ho sa feleng. Jesu o tla felisa mathata ’ohle a bakiloeng ke Adama le Eva ha ba ne ba etsa qeto ea ho tlohela lelapa la Molimo. Jehova o tla tsosa batho ba bangata ’me a ba fe monyetla oa ho phela ka ho sa feleng lefatšeng la paradeise ba phethahetse. (Luka 23:42, 43) Ha batho bao e leng karolo ea lelapa la Jehova ba phethahala, ba tla ba le “khanya le bokhabane” boo Davida a buileng ka bona. Haeba u e mong oa ba “bongata bo boholo,” u na le tšepo e babatsehang. (Tšen. 7:9) Molimo oa u rata ebile o batla hore u be karolo ea lelapa la hae. Kahoo, etsa kahohle kamoo u ka khonang ho mo khahlisa. Letsatsi le letsatsi, lula u nahana ka litšepiso tseo Molimo a re tšepisang tsona. Ananela monyetla oa ho sebeletsa Jehova hona joale le oa ho tl’o mo sebeletsa ka ho sa feleng nakong e tlang. w21.08 7 ¶18-19

Moprofeta Jeremia o ile a bolela molaetsa oa Molimo ka lilemo tse fetang tse 40 ho batho ba neng ba sa batle ho mo mamela le ba neng ba mo hanyetsa. O ile a nyahamisoa ke ho ‘nyelisoa le ho songoa’ ke bahanyetsi ba hae hoo a ileng a nahana ka ho tlohela mosebetsi oa hae. (Jer. 20:8, 9) Empa Jeremia ha aa ka a tela. Ke’ng e ileng ea mo thusa hore a lule a thabile tšebeletsong ea hae? O ile a ameha ka lintho tsena tse peli tsa bohlokoa. Ntho ea pele ke hore molaetsa oa Molimo oo Jeremia a neng a o bolella batho o ne o bua ka “bokamoso le tšepo.” (Jer. 29:11) Ea bobeli, Jeremia e ne e le moemeli oa Jehova. (Jer. 15:16) Le rona re bolella batho molaetsa o nang le tšepo ebile re jere lebitso la Jehova kaha re Lipaki tsa hae. Ha re ameha ka lintho tsena, re tla thaba ho sa tsotellehe hore na batho ba amohela molaetsa oa rona kapa che. Ka hona u se ke oa nyahama le haeba seithuti sa hao se nka nako e telele ho feta kamoo o neng o lebeletse kateng. Ho etsa barutuoa ho hloka mamello.—Jak. 5:7, 8. w21.10 27 ¶12-13

Ho sa tsotellehe hore na re na le nako e kae re sebeletsa Jehova, re lokela ho lula re matlafatsa tumelo ea rona ho eena. Hobane’ng? Hobane haeba re sa hlokomele, tumelo ea rona e ka fokola. U hopole hore tumelo e akarelletsa bopaki ba lintho tse sa bonoeng. Lintho tseo re sa li boneng re ka li lebala habobebe. Kahoo Pauluse o ile a re ho hloka tumelo ke “sebe se re tšoasang habonolo.” Ka hona, re ka etsa’ng hore re qobe leraba leo? (2 Bathes. 1:3) Ntlha ea pele, kopa Jehova hore a u fe moea o halalelang ’me u etse joalo nako le nako. Hobane’ng? Hobane tumelo ke tholoana ea moea. (Bagal. 5:22, 23) Re ke ke ra ba le tumelo e matla ho ’Mopi oa rona haeba re sa thusoe ke moea o halalelang. Haeba re lula re kopa Jehova hore a re fe moea o halalelang, o tla re fa oona. (Luka 11:13) Ka ho khetheha re ka ba ra rapela ra re: “Re fe tumelo e eketsehileng.” (Luka 17:5) Ho ekelletsa moo, e-ba le nako ea ho ithuta Bibele letsatsi le letsatsi.—Pes. 1:2, 3. w21.08 18-19 ¶16-18

Ho na le ho hongata hoo batho ba holileng ba ka ho etsang ka mokhatlong oa Jehova. Le hoja ba ka ’na ba se be le matla joaloka pele, ba na le boiphihlelo bo bongata boo ba ileng ba bo fumana ka lilemo tse ngata. Jehova a ka tsoela pele ho ba sebelisa ka litsela tse ngata. Ka mohlala Bibele e re bolella ka batho ba ileng ba tsoela pele ho sebeletsa Jehova leha ba se ba holile. E re Moshe o ne a le lilemo tse ka bang 80 ha a ne a qala ho sebeletsa e le moprofeta le moemeli oa Jehova ho sechaba sa Iseraele. Jehova o ile a tsoela pele a sebelisa Daniele e le moprofeta ha a ne a le lilemo tse ka bang tse ka holimo ho 90. Moapostola Johanne e ka ’na eaba o ne a le lilemo tse ka bang 90 ha a ne a bululeloa hore a ngole buka ea Tšenolo. Bibele ha e bue haholo ka monna ea neng “a lokile ’me a e-na le tlhompho ea borapeli” e leng Simeone, empa Jehova o ne a mo tseba hore na ke mang ’me o ile a mo fa tlotla ea ho bona Jesu ha e sa le lesea le ho profeta ka eena le ’mè oa hae.—Luka 2:22, 25-35. w21.09 3-4 ¶5-7

Batsoali ba lokela ho ela hloko hore ba se ke ba bapisa bana ba bona le bana ba bang kapa ba lebelle hore bana ba bona ba etse lintho tseo ba ke keng ba khona ho li etsa. Ha batsoali ba etsa joalo, ba ka nyahamisa bana ba bona haholo. (Baef.6:4) Morali’abo rona Sachiko o re: “’Mè oa ka o ne a batla hore ke lule ke nepa ntho e ’ngoe le e ’ngoe ha re ne re ngola litlhahlobo, e leng ntho e neng e ke ke ea khoneha hore ke e etse. Le hoja ke qetile sekolo lilemo tse ngata tse fetileng, ka linako tse ling kea ipotsa hore na ebe Jehova o thabisoa ke lintho tse ngata tseo ke khonang ho mo etsetsa tsona.” Morena Davida o ile a re ha aa ka a etsa ‘lintho tse kholo haholo’ kapa tse fetang matla a hae. Kaha e ne e le motho ea ikokobelitseng, o ne a khotsofetse ebile a e-na le khotso. (Pes. 131:2) Batsoali ba ka ithuta’ng mantsoeng a Davida? E le hore batsoali e be batho ba ikokobelitseng, ha baa lokela ho lebella ho etsa lintho tse fetang matla a bona kapa hore bana ba bona ba etse tse fetang matla a bona. Batsoali ba ka etsa hore bana ba bona ba ikutloe e le batho ba bohlokoa ka hore ba ba thuse ho bona hore na ke lintho life tseo ba ka khonang ho li etsa le tseo ba sa khoneng ho li etsa. Hape ba ka ba thusa hore ba ipehele lintho tseo ba ka khonang ho li finyella. w21.07 21-22 ¶5-6

Re lokela ho hopola hore Jehova o file e mong le e mong oa rona bolokolohi ba ho ikhethela. Taba ena e bolela hore re ka ikhethela hore na re batla ho mo mamela kapa che. Bana ba bang ba ne ba se na batsoali ba ba behelang mohlala o motle empa ba ile ba etsa qeto ea ho sebeletsa Jehova le ho lula ba tšepahala. Ba bang batsoali ba bona ba ile ba sebetsa ka thata ho ba ruta hore ba rate Jehova empa hamorao ha ba hola ba ile ba tlohela ho sebeletsa Jehova. Qetellong e mong le e mong oa rona o lokela ho etsa qeto ea hore na o sebeletsa Jehova kapa che. (Josh. 24:15) Joale lona batsoali ba ileng ba utloa bohloko ka lebaka la hore bana ba lona ba ile ba tlohela ho sebeletsa Jehova, le se ke la nahana hore ke phoso ea lona. Ka linako tse ling ntate kapa ’mè a ka tlohela ho sebeletsa Jehova a ba a tlohela le lelapa la hae. (Pes. 27:10) Ntho eo e ka utloisa bana bohloko haholo ba neng ba hlompha le ho rata batsoali ba bona. Mocha, haeba e mong oa batsoali ba hao a khaotsoe kholiseha hore Jehova oa tseba hore na taba ena e u utloisa bohloko hakae. oa u rata ebile o thabisoa ke ho bona u mo sebeletsa ka bošepehi. Hape hopola hore ha u ikarabelle liqetong tseo batsoali ba hao ba li entseng. w21.09 27 ¶5-7

Ha Mokreste a khaoloa re ka ’na ra mo nka joaloka nku e kulang. Oa kula hobane kamano ea hae le Jehova e senyehile. (Jak. 5:14) Joalokaha motho ea kulang a ka khona ho tšoaetsa batho ba bang le motho eo kamano ea hae le Jehova e senyehileng a ka khona ho tšoaetsa batho ba bang hore ba etse lintho tse mpe. Kahoo, maemong a mang ho hlokahala hore motho ea entseng sebe se tebileng a tlosoe ka phuthehong. Khalemelo ena e bontša kamoo Jehova a ratang bahlanka ba hae ba tšepahalang kateng hape e thusa mofosi hore a hlokomele hore o entse sebe se tebileng hakae. Ha motho a ntse a khaotsoe a ka khona ho ea libokeng moo a tla ithuta ho eketsehileng ka Bibele le ho matlafatsa tumelo ea hae hape. A ka boela a fumana lingoloa tseo a ka ipallang tsona le ho shebella lenaneo la JW Broadcasting^®. Ha baholo ba hlokomela hore o ntse a etsa liphetoho, nako le nako ba ka ’na ba mo fa likeletso tse tla mo thusa hore a lokise kamano ea hae le Jehova e le hore e ka ba Paki ea Jehova hape. w21.10 10 ¶9, 11

Mehleng ena re etsisa mokhoa oo Bakreste ba pele ba neng ba rapela Jehova ka oona. Ka mohlala, tsela eo mokhatlo oa rona o hlophisitsoeng ka eona e tšoana hantle le eo baapostola ba neng ba hlophisitsoe ka eona. Re na le bapotolohi, baholo le bahlanka ba sebeletsang joaloka bona. (Bafil. 1:1; Tite 1:5) Hape re hlompha melao ea Jehova e mabapi le thobalano, lenyalo, ho sebelisa mali le ho sireletsa phutheho ho baetsalibe ba sa bakeng. (Lik. 15:28, 29; 1 Bakor. 5:11-13; 6:9, 10; Baheb. 13:4) Bibele e hlakisa taba ea hore ho na le “tumelo e [le] ’ngoe” feela eo Molimo a e amohelang. (Baef. 4:4-6) Kannete re motlotlo hore ebe re batho ba Jehova le hore ebe re tseba ’nete ka eena le merero ea hae. E se eka re ka tsoela pele re ikholisa hore re fumane ’nete. w21.10 22-23 ¶15-17

Josafate o ile a ba le bothata bo boholo. Lebotho le leholo la Baammone, Bamoabe le banna ba sebaka se lithaba sa Seire le ne le batla ho loantša eena, lelapa la hae le batho ba hae. (2 Likron. 20:1, 2) Josafate o ile a etsa’ng? O ile a kopa Jehova hore a mo thuse le ho mo fa matla. Thapelo ea Josafate e ho 2 Likronike 20:5-12, e bontša kamoo a neng a tšepile Jehova kateng. Jehova o ile a bua mantsoe a temaneng ea kajeno le Josafate a sebelisa Jahaziele oa Molevi. Josafate o ne a tšepile Molimo kahoo o ile a etsa feela joalokaha a ne a laetsoe. Ha eena le sechaba ba ne ba il’o kopana le lira tsa bona, ha aa ka a beha masole a nang le bokhoni kapele empa o ile a beha libini tse neng li sa tšoara libetsa. Jehova ha aa ka a phoqa Josafate empa o ile a hlola lebotho leo joalokaha a ne a tšepisitse.—2 Likron. 20:18-23. w21.11 15-16 ¶6-7

Ha re e-na le mathata re ka kholiseha hore Jehova o tla re tšehetsa le ho re thusa hore re lule re tšepahala. (2 Bakor. 4:7-9) Re ka kholiseha hore Jehova o tla lula a re bontša mosa oa hae o lerato joalokaha mopesaleme a ile a re tiisetsa a re: “Leihlo la Jehova le ho ba mo tšabang, ho ba letetseng mosa oa hae o lerato.” (Pes. 33:18-22) Pele re sebeletsa Jehova, o ne a re bontša lerato leo a le bontšang batho bohle empa hang feela ha re e-ba bahlanka ba hae o ile a re bontša le mosa o lerato. Kaha Jehova oa re rata oa re sireletsa. O tla lula a re thusa hore re be metsoalle ea hae e haufi-ufi ’me o tla phethahatsa litšepiso tseo a re tšepisitseng tsona. O batla hore re be metsoalle ea hae ka ho sa feleng. (Pes. 46:1, 2, 7) Kahoo, ho sa tsotellehe hore na re ba le mathata afe, Jehova o tla re fa matla ao re a hlokang hore re lule re tšepahala. w21.11 7 ¶17-18

Boholo ba rona re tseba motho ea ileng a koatela mosebetsi-’moho, motho ea kenang sekolo le eena kapa e mong oa lelapa ka lilemo tse ngata. Hopola hore bara ba bo Josefa ba leshome ba ne ba mo koatetse haholo hoo ba ileng ba etsa ho hong hobane ba mo hloile. (Gen. 37:2-8, 25-28) Empa Josefa eena ha aa ka a ba tšoara hampe. Ha Josefa a ne a e-na le matla ’me a ne a ka khona ho iphetetsa ho bara ba bo ha aa ka a etsa joalo, ho e-na le hoo o ile a ba bontša mohau. Josefa ha aa ka a lula a ba tšoere ka pelo empa o ile a etsa se ileng sa ngoloa ho Levitike 19:18. (Gen. 50:19-21) Bakreste ba batlang ho thabisa Molimo ba lokela ho etsisa Josefa ea ileng a tšoarela bara ba bo ho e-na le ho iphetetsa. Jesu o ile a re re lokela ho tšoarela batho ba re siteloang. (Mat. 6:9, 12) Ka ho tšoanang moapostola Pauluse o ile a eletsa Bakreste a re: “Le se ke la iphetetsa, baratuoa.”—Bar. 12:19. w21.12 11 ¶13-14

Bosiung ba la 14 Nisane selemong sa 33, Jesu o ile a ea serapeng sa Gethesemane. Ha a le moo, o ile a tšollela pelo ea hae ho Jehova. (Luka 22:39-44) Nakong eo e thata, Jesu “o ile a nyehela lithapeli . . . ka mehoo e matla le meokho.” (Baheb. 5:7) Ke’ng eo Jesu a ileng a e rapella bosiung boo ba ho qetela pele a bolaoa? O ile a rapella matla a ho lula a tšepahalla Jehova le ho etsa thato ea Hae. Jehova o ile a utloa thapelo ea Mora oa hae e tsoang botebong ba pelo, eaba o romela lengeloi ho mo matlafatsa. Jesu o ne a tseba hore na ho bohlokoa hakae hore a lule a tšepahala le hore a sireletse lebitso la Molimo. Jehova o ile a mamela likopo tsa Jesu tse matla. Hobane’ng? Hobane Jesu o ne a amehile haholo ka ho lula a tšepahalla Ntate oa hae le ho sireletsa lebitso la Hae. Haeba ntho e tlang pele ho rona e le ho etsa se tšoanang, o tla mamela likopo tsa rona ha re kopa thuso.—Pes. 145:18. w22.01 18 ¶15-17

Batho ba bangata mehleng ena, ba khopisoa ke taba ea hore ha re kenelle litabeng tsa lipolotiki. Ba lebelletse hore le rona re khethe likhethong. Empa rea tseba hore ho ea ka Jehova, haeba re khetha ho busoa ke batho, re tla be re mo hlanohela. (1 Sam. 8:4-7) Batho ba ka boela ba bona ho loketse hore re hahe likolo le lipetlele le ho thusa sechaba. Ba koatisoa ke hore re qeta nako le matla a rona re ruta batho ka Bibele ho e-na le ho leka ho rarolla mathata a lefatše lena. Re ka etsa’ng hore re se ke ra khoptjoa? (Mat. 7:21-23) Morero oa rona o ka sehloohong e lokela ho ba ho etsa mosebetsi oo Jesu a re laetseng hore re o etse. Ha rea lokela ho ferekanngoa ke lipolotiki le ho batla ho rarolla mathata a lefatše lena. Re rata batho ebile re ameha ka mathata a bona empa rea tseba hore tsela e molemo ka ho fetisisa ea ho thusa baahelani ba rona ke ka ho ba ruta ka ’Muso oa Molimo le ho ba thusa hore ba be le setsoalle se haufi le Jehova. w21.05 7 ¶19-20

Le hoja bongata ba babusi ba lichaba kajeno ba re ba sebeletsa Molimo, ha ba batle ho tlohela bolaoli le matla a bona. Kahoo, joaloka babusi ba mehleng ea Jesu le mehleng ena babusi ba hanyetsa Mokhethoa oa Jehova ka hore ba hlasele balateli ba hae ba tšepahalang. (Lik. 4:25-28) Jehova o ikutloa joang? Pesaleme ea 2:10-12 e re: “Joale, lona marena, le sebelise temohisiso; itlohelleng hore le khalemeloe, lona baahloli ba lefatše. Sebeletsang Jehova ka tšabo le thabe ka ho thothomela. Akang mora, hore a tle a se ke a tuka ke bohale le tle le se ke la timela tseleng, etsoe bohale ba hae bo tuka habonolo. Ho thaba bohle ba tšabelang ho eena.” Ka mosa Jehova o fa bahanyetsi bana monyetla oa hore ba etse qeto e nepahetseng. Ba ntse ba ka khona ho fetola maikutlo a bona eaba ba amohela ’Muso oa Jehova. Leha ho le joalo, nako e se e balehile haholo. (Esa. 61:2) Ha ho e-s’o ka ho e-ba le nako e potlakileng joaloka ena hore batho ba tsebe ’nete ’me ba etse liqeto tse nepahetseng. w21.09 15-16 ¶8-9

Pauluse o ne a bolela hore re lokela ho khotsofalla ntho e ’ngoe le e ’ngoe eo re nang le eona. (Bafil. 4:12) Ntho e lokelang ho ba bohlokoa bophelong ba rona ke kamano ea rona le Molimo oa rona eseng lintho tseo re nang le tsona. (Baheb. 3:17, 18) Nahana ka seo Moshe a ileng a se bolella Baiseraele ka mor’a hore ba qete lilemo tse 40 ba le lefeelleng, o ile a re: “Jehova Molimo oa lona o le hlohonolofalitse mosebetsing o mong le o mong oa matsoho a lona . . . Jehova Molimo oa lona o ’nile a ba le lona ka lilemo tsena tse mashome a mane. Ha lea haelloa ke letho.” (Deut. 2:7) Lilemong tseo tse 40, Jehova o ile a fa Baiseraele manna hore ba je. Liaparo tseo ba neng ba li apere ha ba ne ba tloha Egepeta ha lia ka tsa fela. (Deut. 8:3, 4) Jehova o tla thaba haeba re ka ithuta ho khotsofala le ho ananela lintho tseo a re fang tsona ebile re li nka e le tlhohonolofatso e tsoang ho eena. w22.01 5 ¶10-11

Banna, le na le boikarabelo ba ho hlokomela malapa a lona, kahoo le sebetsa ka thata ho a sireletsa le ho a fa lintho tseo a li hlokang. Ha u e-ba le mathata u ka ’na oa nahana hore u ka khona ho a rarolla u le mong. Leha ho le joalo, qoba ho itšepa. Ho e-na le hoo, kopa Jehova hore a u thuse moo u leng mong. Hape rapela Jehova ka tieo le mosali oa hao. Batla tataiso ea Jehova ka ho bala Bibele le lingoloa tse tsoang mokhatlong oa Molimo ’me u sebelise keletso eo u e fumanang. Batho ba bang ba ka ’na ba se lumellane le liqeto tseo u li etsang u susumetsoa ke Bibele. Ba ka ’na ba re chelete le ho ba le lintho tse ling ke tsona tse ka sireletsang lelapa la hao. Empa hopola mohlala oa Morena Josafate. (2 Likron. 20:1-30) O ile a tšepa Jehova ’me a bontša ka liketso. Jehova ha aa ka a lahla monna eo ea tšepahalang ’me le uena a ke ke a u lahla.—Pes. 37:28; Baheb. 13:5. w21.11 15 ¶6; 16 ¶8

Molimo o re bopile re e-na le bokhoni ba ho bontša makhabane a tšoanang le a hae. Ke kahoo re batlang ho bona batho ba tšoaroa ka toka. (Gen. 1:26) Empa kaha ha rea phethahala, re ka ’na ra se ke ra ahlola litaba hantle le hoja re ka nahana hore re na le lintlha kaofela. Ka mohlala, hopola hore Jonase ha aa ka a thabisoa ke qeto eo Jehova a ileng a e etsa ea ho hauhela batho ba Ninive. (Jon. 3:10–4:1) Empa nahana ka se ileng sa etsahala ka lebaka la hore Jehova o ile a ba bontša mohau. Batho ba ka holimo ho 120 000 ba ile ba bolokeha. Qetellong Jonase ke eena ea sa kang a ahlola litaba ka toka eseng Jehova. Ha ho letho le tlamang Jehova hore a bolelle batho mabaka ao a etsang liqeto ka ’ona. Ke ’nete hore nakong e fetileng Jehova o ile a lumella batho ba hae ho ntša maikutlo ka liqeto tseo a li entseng kapa tseo a neng a tla li etsa. (Gen. 18:25; Jon. 4:2, 3) Hape ka linako tse ling o ile a hlalosa hore na ke hobane’ng ha a etsa liqeto tse itseng. (Jon. 4:10, 11) Leha ho le joalo Jehova ha a hloke tumello ea rona pele kapa ka mor’a hore a etse ntho e itseng.—Esa. 40:13, 14; 55:9. w22.02 3-4 ¶5-6

Re itšoara joaloka “ba banyenyane” ha re nka batho ba bang ‘ba re phahametse.’ (Bafil. 2:3) Ha re loanela ho ba ka tsela eo, e tla ba ka seoelo re ka utloisang batho ba bang bohloko. Ka tsela ena kapa eane, bara le barali ba bo rona bohle ba re phahametse. Ho bonolo ho elelloa taba eo haeba re nahana haholo ka makhabane a bona. Re lokela ho mamela keletso eo moapostola Pauluse a ileng a e fa Bakorinthe e reng: “Ke mang ea etsang hore u se ke oa tšoana le e mong? Ka sebele, u na le eng eo u sa kang oa e amohela? Joale, haeba ka sebele u ile oa e amohela, ke hobane’ng ha u ithorisa joalokaha eka ha oa ka oa e amohela?” (1 Bakor. 4:7) Re lokela ho itlhokomela hore re se ke ra ipitsetsa mahlo a batho kapa ho nahana hore re phahametse batho ba bang. Haeba mor’abo rona a fana ka lipuo tse monate haholo kapa morali’abo rona a e-na le bokhoni ba ho ithuta Bibele le batho, ka bobeli ba lokela hore ba lebohe Jehova kamehla. w21.06 22 ¶9-10

Ho ntse ho e-ba thata le ho feta hore Lipaki Tsa Jehova li fumane batho malapeng a bona. Bahoeletsi ba bang ba lula libakeng tseo mehaho ea teng e kampetsoeng le ho sireletsoa ka thata. Libakeng tseo, ho ka ’na ha e-ba le motho ea katileng ea sa lumelleng batho hore ba kene haeba ho se na motho ea itseng ea lulang moo eo ba eang ho eena. Libakeng tse ling, bahoeletsi ba fumana batho ba ’maloa malapeng a bona kapa ba bolela libakeng tse ka thoko moo ho lulang batho ba ’maloa. Bahoeletsi ba ka ’na ba tsamaea nako e telele e le hore ba fumane motho a le mong eo ba ka mo bolellang molaetsa oa Bibele ebe ba fumana motho eo a le sieo lapeng. Haeba re kopana le mathata ana ha rea lokela ho tela. Leka ho fumana batho ka linako tse sa tšoaneng. Re ka buisana le batho ba bangata ka molaetsa oa Bibele haeba re ea ho bona ka nako eo ba leng teng malapeng, etsoe ha ho na hore ba ke ke ba khutlela malapeng a bona. Bara le barali ba bo rona ba bangata ba bone ho le molemo hore ba bolelle batho molaetsa oa Bibele motšehare kapa mantsiboea hobane ba fumana batho ba bangata ba le teng malapeng. Hape ho ka etsahala hore ka nako eo, ba iketlile ebile ba batla ho qoqa le rona. w21.05 15 ¶5, 7

Ho joang mehleng ee? Ho ntse ho tšoana. Batho ba bangata baa koata ha Lipaki Tsa Jehova li sa keteke mekete e sa thehoang Mangolong e kang matsatsi a tsoalo le Keresemese. Ba bang bona ba halefisoa ke hore Lipaki Tsa Jehova ha li be meketeng ea sechaba kapa hona ho etsa meetlo e etsoang ha ho e-na le lefu eo e leng hore ha e lumellane le Lentsoe la Molimo. Batho ba utloisoang bohloko ke mabaka ao ba ka ’na ba lumela hore kannete bona ba rapela Molimo ka tsela e loketseng. Empa ba ke ke ba khahlisa Molimo haeba ba rata meetlo ea batho ho feta lithuto tse hlakileng tse tsoang ka Bibeleng. (Mar. 7:8, 9) Re ka etsa’ng hore re se ke ra khoptjoa? Re lokela ho rata melao le melao-motheo ea Jehova ka lipelo tsohle tsa rona. (Pes. 119:97, 113, 163-165) Ha re rata Jehova, re tla nena meetlo eohle e sa mo khahliseng. Re ke ke ra lumella ntho leha e le efe hore e be bohlokoa haholo ho rona ho feta lerato la rona ho Jehova. w21.05 6 ¶15-16

Re ka etsa’ng hore re sebelise keletso ea moapostola Pauluse? Re lokela ho matlafatsa tumelo ea rona ka hore re ithute kamehla, re rapele khafetsa hape re lule re phathahane mosebetsing oo Jehova a re fileng oona. (2 Tim. 4:4) Ha re e-na le tumelo, re ke ke ra tšoenyeha ha re utloa litlaleho tse mpe ka Lipaki Tsa Jehova. (Esa. 28:16) Ho rata Jehova, Lentsoe la hae le Bakreste-’moho le rona, ho tla re thusa hore re se ke ra khopisoa ke batho ba sa sebeletseng Jehova. Mehleng ea Jesu, batho ba bangata ba ile ba khopeha eaba ba hana ho mo mamela. Leha ho le joalo, ba bang ba bangata ba ile ba mo mamela. Ba ne ba akareletsa bonyane setho se le seng sa Sanhedrine le “bongata bo boholo ba baprista.” (Lik. 6:7; Mat. 27:57-60; Mar. 15:43) Ka tsela e tšoanang, le mehleng ena batho ba bangata ba khetha ho re mamela. Hobane’ng? Hobane baa tseba le ho rata lintho tseo ba ithutileng tsona ka Mangolong. Bibele e re: “Ba ratang molao oa hao ba na le khotso e ngata, ha ho khopiso ho bona.”—Pes. 119:165. w21.05 13 ¶20-21

Moapostola Pauluse o ile a hlokomela hore ntho e ’ngoe le e ’ngoe eo a neng a e etsa ha a ntse a sebeletsa Jehova, o e entse ka matla a Molimo e seng a hae. Jehova o ile a fa Pauluse matla a sebelisa moea o halalelang hore a phethe mosebetsi ba hae ka botlalo ho sa tsotellehe ho hlorisoa, ho koalloa teronkong le mathata a mang ao a neng a e-na le ’ona. Mosebetsi-’moho le Pauluse ea neng a le monyane ho eena e leng Timothea, le eena o ne a itšetlehile ka Molimo e le hore a tsoele pele a mo sebeletsa. Timothea o ne a tsamaea le Pauluse maetong a hae a malelele a boromuoa. Hape Pauluse o ne a romela Timothea hore a etele liphutheho e le hore a li khothatse. (1 Bakor. 4:17) E ka ’na eaba Timothea o ne a utloa a sa tšoanelehe ho etsa mosebetsi oo. Mohlomong ke lona lebaka le entseng hore Pauluse a re ho eena: “Ho se ke ha e-ba le motho eo le ka mohla a khellang bocha ba hao tlaase.” (1 Tim. 4:12) Ho ekelletsa moo, hona ka nako eo, Timothea o ne a e-na le moutloa nameng e leng “maemo a [hae] a ho kula khafetsa.” (1 Tim. 5:23) Empa Timothea o ne a tseba hore moea o halalelang oa Jehova o tla mo fa matla ao a a hlokang ho etsa mosebetsi oa boboleli le ho sebeletsa Bakreste-’moho le eena.—2 Tim. 1:7. w21.05 21 ¶6-7

Molao-motheo o hlahang lengolong la Jakobo 1:19 o ka thusa batho ba fanang ka keletso. Jakobo o ile a re: “Motho e mong le e mong a potlakele ho utloa, a liehe ho bua, a liehe ho halefa.” Moholo a ka ’na a nahana eka o tseba maemo ’ohle a Mokreste-’moho empa na kannete oa a tseba? Liproverbia 18:13 e re hopotsa hore “ha mang kapa mang a araba taba pele a e utloa, hoo ke booatla ho eena le tlotlollo.” Ho ka ba molemo ho kopa motho hore a hlalose mathata a hae. Ho ka ba hantle hore moholo a mamele pele a ka bua. Moholo a ka ’na a botsa: “Ho ntse ho ea joang?” “Nka u thusa joang?” Ha baholo ba ipha nako ea ho tseba ka maemo a bara le barali babo rona, ba ka ba boemong bo botle ba ho ba thusa le ho ba khothatsa. Ho fana ka keletso e ka thusang motho ha ho bolele feela ho bala mangolo a ’maloa kapa ho fana ka litlhahiso tse itseng. Bara le barali babo rona ba lokela ho hlokomela hore rea ba tsotella, rea ba utloisisa le hore re batla ho ba thusa. w22.02 17 ¶14-15