June

Bophelo ba mohlolohali bo boima haholo hobane ho ka etsahala hore ebe o thatafalloa ke ho fumana lintho tsa mantlha bophelong. Leha ho le joalo, o ea ho le leng la matlole ’me o tšela licheletana tse peli tseo a neng a e-na le tsona a patile mohoasa, tseo mohlomong li sa etseng lerata ha li oela ka letloleng. Jesu o ne a tseba hore na o tšetse’ng ka mono. O ne a tšetse licheletana tse peli tsa tšepe tseo e neng e le tse nyane ka ho fetisisa tse neng li sebelisoa ka nako eo. Chelete eo e ne e fokola hoo e sa khoneng le ho reka serobele, e leng nonyana e neng e le chipi ka ho fetisisa. Mosali enoa oa mohlolohali o hapa thahasello ea Jesu haholo. Kahoo, Jesu o bitsa barutuoa ba hae eaba o supa mosali eo, ha a qeta o re ho bona: “Mohlolohali enoa oa mofutsana o akhetse ho fetang ha bohle.” Eaba o tsoela pele ho re: “[Barui] ba akhetse ho tsoa botlallong ba bona empa eena ho tsoa bohloking ba hae o akhetse sohle seo a neng a e-na le sona, sohle seo a neng a phela ka sona.” (Mar. 12:43, 44) Ha mohlolohali eo ea tšepahalang a ne a tšela cheletana ea hae ea ho qetela ka letloleng letsatsing leo, o ne a beha tšepo eohle ea hae ho Jehova hore o tla mo hlokomela.—Pes. 26:3. w21.04 6 ¶17-18

Ha Jesu a ne a le lefatšeng, o ne a lula a ruta batho a bile a e-na le tšepo ea hore ba tla mo mamela ’me o ne a batla hore balateli ba hae le bona ba be le maikutlo a tšoanang ha ba ntse ba etsa mosebetsi ona. (Joh. 4:35, 36) Ha Jesu a ntse a e-na le barutuoa ba hae, ba ne ba etsa mosebetsi oa boboleli ka mafolo-folo. (Luka 10:1, 5-11, 17) Leha ho le joalo, ka mor’a hore Jesu a tšoaroe le ho bolaoa, barutuoa ba hae ba ne ba se ba sa thabele ho etsa mosebetsi oa boboleli. (Joh. 16:32) Empa ka mor’a hore a tsosoe, o ile a ba khothalletsa hore ba lule ba etsa mosebetsi oa boboleli. Kahoo, ka mor’a hore a nyolohele leholimong, ba ile ba bolela ka mafolo-folo hoo lira tsa bona li ileng tsa tletleba joalokaha re bona temaneng ea letsatsi ea kajeno. Jesu o ne a tataisa mosebetsi o neng o etsoa ke Bakreste ba mehleng eo ’me Jehova o ile a ba hlohonolofatsa kaha batho ba bangata ba ile ba amohela molaetsa oa bona. Ka mohlala, ka Pentekonta ea 33, ho ile ha kolobetsoa batho ba ka bang 3 000. (Lik. 2:41) Ka mor’a moo, palo ea barutuoa e ile ea tsoela pele ho eketseha haholo. (Lik. 6:7) Leha ho le joalo, Jesu o ile a re mosebetsi oa boboleli o ne o tla atleha le ho feta matsatsing a ho qetela.—Joh. 14:12; Lik. 1:8. w21.05 14 ¶1-2

Na u sa hopola lekhetlo la pele leo ka lona u neng u qala ho ithuta Bibele? U ne u nahana hore batho ba tla thabela molaetsa ona oo u sa tsoa ithuta oona. U ne u kholisehile hore molaetsa oa Bibele o tla ba thusa hore ba phele bophelo bo nang le morero hona joale le hore ba be le tšepo bakeng sa ka moso. (Pes. 119:105) Kahoo, u ile oa bolella metsoalle ea hao le beng ka uena molaetsa oo u ithutileng oona oa Bibele. Empa ho ile ha etsahala’ng? U ile oa makala ha u bona ba bangata ba sa amohele molaetsa oa hao. Ha rea lokela ho makala ha batho ba sa mamele molaetsa oa Bibele oo re ba bolellang oona. Mehleng ea Jesu, batho ba bangata ba ne ba mo hanyetsa le hoja a ne a etsa mehlolo e neng e paka hore Molimo o na le eena. Mohlala, Jesu o ile a tsosa Lazaro, e leng mohlolo oo le bahanyetsi ba hae ba neng ba ke ke ba o latola. Ho ntse ho le joalo, baeta-pele ba Bajuda ha baa ka ba amohela hore Jesu ke Mesia. Ba ne ba boetse ba batla ho bolaea Jesu le Lazaro.—Joh. 11:47, 48, 53; 12:9-11. w21.05 2 ¶1-2

Etsa kahohle hore u be teng libokeng kamehla. Liboka li tla u khothatsa hape u tla tseba bara le barali ba bo rona. E-ba motsoalle le batho bao u ka ithutang ho bona ka phuthehong, e ka ’na ea e-ba ba morabe o fapaneng le oa hao kapa lilemo tse sa lekaneng le tsa hao. Bibele e re hopotsa hore bohlale re bo fumana “har’a ba holileng.” (Jobo 12:12) Batho ba holileng le bona ba ka ithuta ho hongata ho bacha ba tšepahalang. Davida o ne a le monyane haholo ho Jonathane empa ntho eo ha e-ea ka ea ba thibela hore e be metsoalle e haufi-ufi. (1 Sam. 18:1) Davida le Jonathane ba ile ba thusana ho sebeletsa Jehova ho sa tsotellehe mathata a mangata ao ba neng ba e-na le ’ona. (1 Sam. 23:16-18) Morali’abo rona Irina eo e leng eena feela Paki lelapeng la bo o re: “Bara le barali ba bo rona ba ka ba joaloka batsoali ba rona kapa bana ba bo rona. Jehova a ka etsa hore e be lelapa leo re le hlokang.” Metsoalle ea hao e batla ho u khothatsa le ho u tšehetsa empa e hloka hore u e bolelle hore na e ka etsa joalo joang. w21.06 10-11 ¶9-11

Jesu o ile a etsa papiso ea morena le lekhoba la hae. Morena o ile a hlakola sekoloto se seholohali seo lekhoba leo le ileng la hloleha ho se patala. Hamorao monna eo oa lekhoba o ile a hana ho hlakola sekoloto se senyenyane sa lekhoba-’moho le eena seo le neng le mo kolota sona. Qetellong morena o ile a lahlela lekhoba leo le khopo teronkong. Lintho tseo monna eo oa lekhoba a ileng a li etsa li ile tsa utloisa eena le batho ba bang bohloko. Taba ea pele, o ile a tšoara lekhoba-’moho le eena ka tsela e seng mosa a ba a le utloisa bohloko ka ho le ‘lahlela chankaneng ho fihlela le ka lefa seo le neng le se kolota.’ Ea bobeli o ile a utloisa makhoba a ileng a bona hore na o entse’ng bohloko. “Ha makhoba-’moho le lona a bona lintho tse neng li etsahetse, a sareloa haholo.” (Mat. 18:30, 31) Ka tsela e tšoanang, liketso tsa rona li ama batho ba bang. Haeba motho e mong a re tšoara hampe ebe ha re mo tšoarele, ho ka etsahala’ng? Taba ea pele, re mo utloisa bohloko ka ho se mo tšoarele, ho se mo fe nako ea rona le ho se mo rate. Ea bobeli, re etsa hore ba bang ka phuthehong ba se ke ba phutholoha ha ba hlokomela hore re na le bothata le motho eo. w21.06 22 ¶11-12

Molimo o bopile batho ka setšoantšo sa hae empa Satane eena o thabela ho ba susumeletsa ho etsa boitšoaro bo bobe. Ha Molimo “a bona hore bobe ba motho bo bongata lefatšeng” mehleng ea Noe, o ile a ikoahlaea “hore ebe o entse batho lefatšeng ’me pelo ea hae ea utloa bohloko.” (Gen. 6:5, 6, 11) Na maemo a ntlafetse ho tloha ka nako eo? Le letho! Diabolose o thaba haholo ha liketso tsohle tse mpe tsa ho etsa thobalano e e-ba ntho e tloaelehileng mehleng ena, e bang ke lipakeng tsa batho ba bong bo fapaneng kapa bo tšoanang. (Baef. 4:18, 19) Satane o thaba le ho feta ha a etsa hore barapeli ba Jehova ba etse sebe. Pusong ea Satane motho o busa e mong “ho mo ntša kotsi” hape ha a hlokomele lefatše le liphoofolo tseo Jehova a li behileng tlhokomelong ea hae. (Moek. 8:9; Gen. 1:28) Liphello ke life? Litsebi tse ling li re ka lebaka la lintho tseo batho ba li etsang, mefuta ea liphoofolo le limela tse ka bang milione li kotsing ea ho fela lilemong tse seng kae tse tlang. w21.07 12 ¶13-14.

Bahlanka ba bang ba Molimo ha ba khone ho khaotsa ho ikutloa ba le molato ka lebaka la liphoso tseo ba ileng ba li etsa. Ba ntse ba nahana hore Jehova a ke ke a ba tšoarela le hoja ba kopile tšoarelo ’me ba khaolitse ho etsa lintho tse mpe tseo ba neng ba li etsa. Haeba u ikutloa ka tsela ee, ho utloisisa hore Molimo o batla ho u bontša mosa oa hae o lerato ho tla u thusa hore ho sebeletsa Jehova u thabile ebile u sa ikutloe u e-na le molato hobane “mali a Mora oa hae Jesu a re hloekisa sebeng sohle.” (1 Joh. 1:7) Haeba u nyahamisoa ke mefokolo e itseng eo u nang le eona hopola hore Jehova o ikemiselitse ho u tšoarela haeba u bakile. Hlokomela seo Mopesaleme Davida a ileng a se bua ha a bua ka mosa o lerato le ho tšoarela. O ile a re: “Joalokaha maholimo a phahame ho feta lefatše, mosa oa hae o lerato o phahame ho ba mo tšabang. Joalokaha bochaba-tsatsi bo le hole le bophirima-tsatsi, ka ho tšoanang o suthiselitse litlolo tsa rona hole le rona.”—Pes. 103:11, 12. w21.11 5-6 ¶12-13

Monna oa Mokreste o lokela ho hlompha mosali oa hae. (1 Pet. 3:7) Ho hlompha ho akarelletsa ho tsotella motho e mong. Ka mohlala, monna o bontša hore o hlompha mosali oa hae ka hore a mo nke e le motho oa bohlokoa. Ha aa kope mosali oa hae hore a etse lintho tseo a ke keng a khona ho li etsa. Hape ha ho mohla a mo bapisang le basali ba bang. Ebe mosali a ka ikutloa joang haeba monna oa hae a mo bapisa le basali ba bang? Monna oa Morali’abo rona Rosa eo e seng Paki hangata o mo bapisa le basali ba bang. Mantsoe a hae a bohloko a entse hore Morali’abo rona Rosa a se ke a itšepa. O re: “Ke hloka hore ke lule ke hopotsoa hore Jehova o ’nka ke le motho oa bohlokoa.” Leha ho le joalo, monna oa Mokreste o hlompha mosali oa hae. Oa tseba hore ho etsa joalo ho ama kamano ea hae le mosali oa hae le kamano ea hae le Jehova. Monna ea hlomphang mosali oa hae o bua hantle ka eena bathong, oa mo bolella hore oa mo rata ebile oa mo babatsa. w21.07 22 ¶7-8

Na u ikutloa u soetsehile haeba u lebelletse ntho e itseng eo u e hlokang ebe ha e fihle ka nako eo u e lebelletse’ng? Empa haeba u utloa lebaka le utloahalang le hlalosang hore na ke hobane’ng u ka ’na oa ba le mamello ’me oa ikemisetsa ho e emela. Liproverbia 13:11 ea re ruta hore na ke hobane’ng ha re lokela ho ba le mamello. E re: “Lintho tsa bohlokoa tse hlahisoang ke lefeela lia fokotseha, empa ea bokellang ka letsoho ke eena ea eketsang.” U ithuta’ng temaneng ee? Ke bohlale hore motho a etse lintho hanyane ka hanyane ka mamello. Liproverbia 4:18 e re: “Tsela ea ba lokileng e joaloka leseli le khanyang le ntseng le khanya ka ho eketsehileng ho fihlela motšehare o moholo.” Mantsoe ana bontša ka ho hlaka hore Jehova o thusa bahlanka ba hae hore ba utloisise morero oa hae hanyane ka hanyane. Temana ena e boetse e re thusa ho utloisisa hore na Mokreste o etsa liphetoho joang bophelong ba hae e le hore e be motsoalle oa Jehova. Ho nka nako hore motho e be motsoalle oa Jehova. w21.08 8 ¶1, 3-4

Re na le mosebetsi o mongata oo re lokelang ho o etsa ha lefatše lena le ntse le atamela ho fela. (Mat. 24:14; Luka 10:2; 1 Pet. 5:2) Kaofela ha rona re batla ho sebeletsa Jehova ka mafolo-folo ’ohle. Batho ba bangata ba eketsa tšebeletso ea bona. Ba bang e-ba bo-pula-maliboho. Ba bang ba ea Bethele kapa ba sebetsa kahong. Hape barab’abo rona ba bangata ba sebetsa ka thata hore e be bahlanka ba sebeletsang kapa baholo. (1 Tim. 3:1, 8) E tlameha ebe Jehova o thaba haholo ho bona ha bahlanka ba hae ba ikemiselitse ho mo sebeletsa. (Pes. 110:3) Empa na u nyahamisitsoe ke hobane ha u e-s’o finyelle ntho eo u neng u batla ho e etsetsa Jehova? Haeba ho joalo, bolella Jehova kamoo u ikutloang kateng. (Pes. 37:5-7) U ka boela oa botsa Bakreste-’moho ba nang le boiphihlelo hore na u ka etsa’ng hore u atlehe ha u ntse u sebeletsa Jehova ’me oa leka kahohle ho sebelisa litlhahiso tsa bona. Haeba u etsa joalo, u ka fuoa mosebetsi oo kapa ho finyella ntho eo u neng u batla ho e etsa. w21.08 20 ¶1; 21 ¶4

Moprofeta Anna eo e leng mohlolohali. O ne a le lilemo li 84 empa ho ne ho se “mohla a neng a sa hlokoe tempeleng.” Jehova o ile a mo hlohonolofatsa kaha o ne a lula a e-ea tempeleng ka hore le eena a bone Jesu ha e sa le lesea (Luka 2:36-38) Mehleng ena ho na le ba holileng bao e leng mehlala e metle bakeng sa bacha. Ho tla re khothatsa haholo haeba re behella nako ka thoko ’me re ba botsa lipotso le ho ba mamela ha ba ntse ba re bolella ka lintho tse ileng tsa ba thabisa ka mokhatlong oa Jehova. Bara le barali ba bo rona ba seng ba holile ke batho ba bohlokoa ka mokhatlong oa Jehova. Ba bone kamoo Jehova a ileng a ba hlohonolofatsa le ho hlohonolofatsa mokhatlo oa hae ka litsela tse ngata. Ba ithutile lintho tsa bohlokoa liphosong tseo ba ileng ba li etsa. Ba nke e le “seliba sa bohlale” u be u ithute ho bona. (Liprov. 18:4) Haeba u nka nako ho ba tseba u tla ba le tumelo. w21.09 3 ¶4; 4 ¶7-8; 5 ¶11, 13

Joalokaha Esaia a boletse, “lebese la lichaba” lea fumaneha bakeng sa bahlanka ba Jehova. (Esa. 60:5, 16) Ka bokhoni le litsebo tse sa tšoaneng tsa banna le basali bana ba ratehang, mosebetsi oa boboleli o ntse o etsoa linaheng tse 240 le lingoloa li ntse li hatisoa ka lipuo tse fetang tse sekete. Nakong ena ea bofelo, ho sisinngoa ha lichaba ho qobella batho hore ba etse qeto. Na ba tla tšehetsa ’Muso oa Molimo kapa na ba tla tšepa mebuso ea lefatše lee? Ena ke qeto ea bohlokoa eo kaofela re lokelang ho e etsa. Le hoja bahlanka ba Jehova ba mamela molao oa ’Muso o busang moo ba lulang teng ba lula ba sa nke lehlakore lipolotiking. (Bar. 13:1-7) Baa tseba hore ’Muso oa Molimo ke oona feela tharollo ea mathata ’ohle a batho. ’Muso oo ha se karolo ea lefatše lena.—Joh. 18:36, 37. w21.09 17-18 ¶13-14

Ha motho eo u mo ratang a tlohela ho sebeletsa Jehova, ke habohlokoa hore u tsoele pele ho imatlafatsa le ho matlafatsa litho tse ling tsa lelapa. U ka etsa joalo joang? Tumelo ea hao e tla ba matla haeba u lula u bala Lentsoe la Molimo kamehla, u nahanisisa ka lona ebile u e-ea libokeng. Morali’abo rona Joanna eo ntate oa hae le ausi oa hae ba ileng ba tlohela phutheho o re: “Ke lula ke khobile matšoafo ha ke bala ka litlaleho tsa Bibele tse buang ka Abigai, Esthere, Jobo, Josefa le Jesu. Mohlala oa bona o nkhothatsa haholo ebile o nthusa hore ke se ke ka nyahama.” Ha u tšoenyehile u se ke oa tlohela ho bua le Jehova. Tsoela pele u kopa Molimo oa rona ea lerato hore a u thuse hore u nke boemo boo u leng ho bona ka tsela eo a bo nkang ka eona le hore a u fe “temohisiso ’me [a] u rupele ka tsela eo u lokelang ho tsamaea ka eona.” (Pes. 32:6-8) Ho ka ’na ha u utloisa bohloko haholo ho bolella Jehova hore na u ikutloa joang. Empa Jehova o utloisisa hantle hore na u ikutloa joang. O u rata haholo hoo a reng u mo bolelle ntho e ’ngoe le e ’ngoe e ka sefubeng sa hao.—Ex. 34:6; Pes. 62:7. w21.09 28 ¶9-10

Ka mor’a Paseka ea selemo sa 32 mehleng ea baapostola, moapostola Petrose, Jakobo le Johanne ba ile ba bona pono e hlollang. Ho ka etsahala hore ha Jesu a ne a le thabeng e phahameng, o ne a le karolong e itseng ea Thaba ea Hermone, e leng moo a ileng a fetoha sebopeho ka pel’a bona. “Sefahleho sa hae sa khanya joaloka letsatsi, le liaparo tsa hae tsa ka ntle tsa phatsima joaloka leseli.” (Mat. 17:1-4) Baapostola ba ile ba utloa Molimo a re: “Enoa ke Mora oa ka, ea ratoang, eo ke mo amohetseng; mo mameleng.” Ka mor’a pono ena, baapostola bao ba bararo ba ile ba bontša ka tsela eo ba phelang ka eona hore ba ile ba mamela Jesu. Re batla ho etsisa mehlala ea bona. Rea thaba hore ebe Jehova o re fa tataiso ka “hlooho ea phutheho,” Jesu Kreste. (Baef. 5:23) Joaloka moapostola Petrose, Jakobo le Johanne, a re ikemisetseng ho ‘mo mamela.’ Ha re etsa joalo re tla fumana litlhohonolofatso tse ngata, re fumane le thabo e sa feleng lefatšeng le lecha. w21.12 22 ¶1; 27 ¶19

Mokreste e mong phuthehong ea Korinthe o ne a etsa boitšoaro bo bobe le mosali oa ntate oa hae. Moapostola Pauluse o ile a bolella phutheho hore e khaole monna eo. Boitšoaro ba hae bo ne bo tšoaetsa ba bang ka phuthehong hoo ba neng ba nahana hore bo ne bo se bobe hakaalo. (1 Bakor. 5:1, 2, 13) Ha nako e ntse e ea, Pauluse o ile a bolella baholo hore ba mo ‘tšoarele ka mosa le ho mo tšelisa.’ Hlokomela hore na ke hobane’ng ha Pauluse a ile a cho joalo ho bona, o ile a re: “E le hore ka tsela e itseng motho ea joalo a se ke a sithabetsoa ke ho hlomoha ka ho fetisisa.” Moapostola Pauluse o ne a utloela monna enoa ea bakileng bohloko. O ne a sa batle ho bona monna eo a sithabetse ka lebaka la phoso eo a e entseng hoo a ka telang ho khutlela ka phuthehong. (2 Bakor. 2:5-8, 11) Joaloka Jehova baholo ba rata ho bontša mohau. Ba khalemela mofosi ka thata ha ho hlokahala empa ha ho khoneha ba bontša mohau ha ho e-na le lebaka la hore ba etse joalo. Haeba baholo ba sa khalemele mofosi, ba tla be ba mo lumella hore a tsoele pele ho etsa lintho tse mpe tseo a ntseng a li etsa. w21.10 11-12 ¶12-15

Motho ea utloileng bohloko a ka bapisoa le motho ea tsoileng leqeba. Maqeba a mang a manyane athe a mang ’ona a maholo. Ka mohlala ha re bula enfelopo re ka ’na ra sehoa ke pampiri eo hanyane. Leqeba leo le ka ’na la e-ba bohloko empa ka mor’a matsatsi a ’maloa mohlomong u ka ’na oa se ke oa hopola hore na pampiri eo e u sehile hokae. Ka ho tšoanang, lintho tse bohloko tseo batho ba bang ba ka re etsang tsona ha li mpe hakaalo. Ka mohlala, motsoalle oa rona a ka ’na a bua kapa a etsa ntho e itseng e re utloisang bohloko a sa nahana empa re khona ho mo tšoarela habonolo. Leha ho le joalo, haeba re e-na le leqeba le leholo le ka ’na la hloka hore ngaka e le roke le ho le tlamisa. Empa haeba re lula re tšoara leqeba leo ho ka ’na ha etsahala hore le se ke la fola empa le be bohloko le ho feta. Ka masoabi motho a ka ’na a etsa ntho e tšoanang ha a utloisitsoe bohloko haholo. A ka ’na a lula a nahana kamoo motho e mong a mo utloisitsoeng bohloko kateng. Leha ho le joalo, batho ba tšoarang ba bang ka pelo ba ikutloisa bohloko. Ke kahoo ho leng molemo hore re mamele keletso e hlahang temaneng e kajeno. w21.12 12 ¶15

A re re mohlomong moholo o tšoenyehile ka tsela eo Mokreste-’moho le eena a aparang kapa a itlhophang ka eona. A ka ’na a ipotsa: ‘Na ho na le lengolo la Bibele le mphang lebaka la hore ke fane ka keletso?’ Kaha moholo eo ha a batle hore ha a fana ka keletso a fane ka maikutlo a hae, a ka ’na a botsa moholo e mong hore na o nahana’ng ka taba eo kapa Mokreste-’moho le eena ea nang le boiphihlelo. Ka mor’a moo, ba ka ’na ba buisana ka keletso ea Pauluse e buang ka moaparo le ho itlhopha. (1 Timothea 2:9, 10) Pauluse o ile a bua ka melao-motheo e meng e neng e hlalosa hore Mokreste o lokela ho apara ka tsela e hlomphehang le e tla tlisa thoriso ho Jehova. Empa Pauluse ha aa ka a etsa melao ea hore motho o lokela ho apara eng kapa a se ke a apara eng. O ne a tseba hore Bakreste-’moho le eena ha ba rate lintho tse tšoanang. Kahoo ba ka khetha hore na ba batla ho apara eng, hafeela e se khahlanong le Mangolo. Kahoo baholo ba lokela ho sheba hore na motho eo o apara ka tsela e hlomphehileng. w22.02 16 ¶9-10

Re na le mabaka a utloahalang a hore re bontšane mosa o lerato. A mang a mabaka ao ke afe? Bona kamoo maele ana a ka Bibeleng a arabang potso ena kateng, a re: “E se eka mosa o lerato le ’nete li ke ke tsa u tlohela. . . . Kahoo u fumane kamohelo le temohisiso e molemo mahlong a Molimo le a motho oa lefatše.” “Motho ea nang le mosa o lerato o sebetsana ka mokhoa o putsang le moea oa hae.” “Ea phehellang ho loka le mosa o lerato o tla fumana bophelo.” (Liprov. 3:3, 4; 11:17; 21:21) Maele ana a bontša mabaka a mararo ao ka ’ona re lokelang ho bontšana mosa o lerato. Lebaka la pele, ha re bontša mosa o lerato re ba batho ba bohlokoa mahlong a Molimo. La bobeli, ha re bontšana mosa o lerato re itsoela molemo. Ka mohlala, re ba le setsoalle se tšoarellang le batho ba bang. La boraro, ha re bontšana mosa o lerato re tla fumana litlhohonolofatso nakong e tlang ho akareletsa le bophelo bo sa feleng. Kannete re na le mabaka a utloahalang a hore re mamele Jehova ha a re: “Le etsetsane mosa o lerato le mehauhelo.” w21.11 8 ¶1-2

Haeba liteko tse u hlahetseng nakong e fetileng kapa tse u hlahelang hona joale li bontša hore tumelo ea hao ea fokola, u se ke oa nyahama. Nka boemo boo e le monyetla oa ho matlafatsa tumelo ea hao. Rapela Jehova ka matla, haholo-holo ha u tobane le bothata bo boholo. Ela hloko hore Jehova a ka fana ka thuso eo u e hlokang a sebelisa lelapa le metsoalle. Ha u lumella Jehova hore a u thuse ho mamella liteko tseo u kopanang le tsona hona joale, u tla kholiseha le ho feta hore o tla u thusa ho mamella liteko tseo u ka ’nang oa ba le tsona nakong e tlang. Jesu o ile a thusa barutuoa ba hae ho bona hore na ke hokae moo ba hlokang tumelo e eketsehileng empa ha aa ka a belaella taba ea hore ba tla khona ho mamella liteko nakong e tlang ka thuso ea Jehova. (Joh. 14:1; 16:33) O ne a kholisehile hore ho tla ba le bongata bo boholo bo tla pholoha matšoenyeho a maholo hobane bo e-na le tumelo e matla. (Tšen. 7:9, 14) Ka thuso ea Jehova u tla ba e mong oa bona haeba u etsa sohle seo u ka se khonang hona joale ho matlafatsa tumelo ea hao.—Baheb. 10:39. w21.11 25 ¶18-19

Ke ’nete hore ha rea lebella hore Jehova a re sireletse ka mohlolo. Leha ho le joalo, rea tseba hore batho bohle ba tšepang Jehova ba tla fumana bophelo bo sa feleng le hoja ba ka shoa. Haufinyane lintho tse tla etsahala li tla leka tumelo eo re nang le eona ea hore Jehova o tla re sireletsa. Ha Gogo oa Magogo e leng lichaba tse ikopantseng a hlasela bahlanka ba Molimo, re ka ’na ra bona eka bophelo ba rona bo kotsing. Re lokela ho kholiseha hore Jehova o tla re pholosa. Lichaba tseo li tla bona re le joaloka linku tse sa khoneng ho itšireletsa. (Ezek. 38:10-12) Re tla be re se na libetsa ebile re sa koetlisetsoa ntoa. Lichaba tseo li tla bona eka ho tla ba bonolo hore li re hlole. Li tla be li sa tsebe hore mangeloi a Jehova a itokiselitse ho re pholosa empa kaha rona re na le tumelo re tla be re tseba hore a tla re sireletsa. Kaha ha li lumele ho Molimo, li tla makala haholo ha li bona lebotho la mangeloi le re loanela.—Tšen. 19:11, 14, 15. w22.01 6 ¶12-13

Bara le barali ba bo rona bohle ba bohlokoa ho Jehova kahoo ba lokela ba be bohlokoa joalo le ho rona. Re tlameha ho etsa boiteko bohle ho ba sireletsa le ho ba hlokomela. Haeba re hlokomela hore re utloisitse motho e mong bohloko kapa ho mo koatisa, ha rea lokela ho iphapanya ebe re nahana hore motho eo o lokela ho re tšoarela a be a lebale ka taba eo. Ke hobane’ng ha bara le barali ba bo rona ba bang ba ka utloa bohloko? Mohlomong ba bang ba ka ’na ba ikutloa e se batho ba bohlokoa ka lebaka la tsela eo ba holisitsoeng ka eona. Ba bang e sa tsoa ba Lipaki ’me ha ba e-s’o ithute ho re na ba lokela ho sebetsana joang le mefokolo ea batho ba bang. Ho sa tsotellehe hore na boemo ke bofe, re lokela ho sebetsa ka thata ho lokisa lintho. Ho feta moo, motho ea khopisoang ke batho ba bang habonolo, o lokela ho tseba hore mokhoa oo o mobe ’me a o tlohele. O lokela ho etsa joalo molemong oa hore a be le khotso le bakeng sa setsoalle se setle le Bakreste-’moho le eena. w21.06 21 ¶7

Jesu oa utloisisa hore na u ikutloa joang. Ha re tšoenyehile rea thaba ha re e-na le motsoalle ea utloisisang hore na re ikutloa joang, haholo-holo haeba a kile a kopana le mathata a tšoanang le a rona. Jesu ke motsoalle ea joalo, oa tseba hore na ho joang ho ikutloa u fokola ebile u hloka thuso. O utloisisa mefokolo ea rona ebile o tla etsa bonnete ba hore re fumana thuso eo re e hlokang “ka nako e nepahetseng.” (Baheb. 4:15, 16) Jesu o ile a amohela thuso ea lengeloi ha a ne a le serapeng sa Gethesemane. Le rona re lokela ho amohela thuso eo Jehova a re fang eona, ebang ke ka sengoloa, video, puo kapa khothatso eo re e fuoang ke moholo kapa Mokreste-’moho. (Luka 22:39-44) Jehova o tla re matlafatsa joang? Ha re rapela re tla fumana “khotso ea Molimo e fetang monahano oohle.”—Bafil. 4:6, 7. w22.01 18-19 ¶17-19

Kamehla Jehova o etsa se nepahetseng. Leha ho le joalo, bothata boo re ka kopanang le bona ke ho tšepa batho bao a ba khethileng. Re ka ’na ra ipotsa hore na ba etellang pele ka mokhatlong oa Jehova ehlile ba mamela tataiso ea hae kapa ba iketsetsa liqeto tsa bona. Jehova o tšepa batho bao a ba khethileng hore ba etelle pele ka mokhatlong le ka phuthehong. Kahoo, haeba re sa ba tšepe re ke ke ra re re tšepa Jehova. Mehleng ena Jehova o etella pele mokhatlo oa hae o lefatšeng a sebelisa “lekhoba le tšepahalang le le masene.” (Mat. 24:45) Joaloka sehlopha se busang sa mehleng ea baapostola, lekhoba lena le etella pele batho ba Molimo lefatšeng lohle le ho fa baholo ba liphutheho tataiso. Baholo bona ba etsa bonnete ba hore ba latela tataiso eo liphuthehong. Re ka bontša hore re tšepa tsela eo Jehova a etsang lintho ka eona ka hore re mamele tataiso eo re e fuoang ke mokhatlo le baholo. w22.02 4 ¶7-8

Rea thaba ebile re motlotlo ho ba Lipaki Tsa Jehova. Rea thaba ha re khona ho thusa motho ea nang le “tšekamelo e nepahetseng bakeng sa bophelo bo sa feleng” hore a sebeletse Jehova. (Lik. 13:48) Re ba le maikutlo a tšoanang le a Jesu ha a ne “a nyakalla ka moea o halalelang” ha barutuoa ba hae ba ne ba thabile ha ba tsoa mosebetsing oa boboleli. (Luka 10:1, 17, 21) Moapostola Pauluse o ile a khothalletsa Timothea a re: “Ikele hloko kamehla ’me u e le hloko le ho ruta ha hao . . . kaha ka ho etsa sena u tla ipholosa ’me u pholose le ba u mamelang.” (1 Tim. 4:16) Bophelo ba batho bo kotsing. Kahoo, re ikela hloko tseleng eo re phelang ka eona kaha re bafo ba ’Muso oa Molimo. Re lula re itšoara ka tsela e tlotlisang Jehova le e lumellanang le molaetsa oo re o bolellang batho. (Bafil. 1:27) Re bontša hore re ‘ela hloko tsela eo re rutang ka eona’ ka hore re lokisetse hantle pele re ea tšimong le ho kopa Jehova hore a re thuse pele re bua le batho ba bang ka Bibele. w21.10 24 ¶1-2

Motho ea nang le “botho bo bocha” o etsisa Jehova. O apara botho bo bocha ka hore a be le litholoana tsa moea oa Molimo ’me o lumella moea o halalelang hore o susumetse tsela eo a nahanang ka eona, a ikutloang ka eona le ho etsa lintho ka eona. Ka mohlala, motho ea nang le botho bo bocha o rata Jehova le bahlanka ba Hae. (Mat. 22:36-39) O lula a thabile leha a e-na le mathata. (Jak. 1:2-4) Ke motho ea phehellang khotso. (Mat. 5:9) O mamella batho ba bang ebile o ba bontša mosa. (Bakol. 3:13) O rata se nepahetseng ebile oa se etsa. (Luka 6:35) O bontša ka tsela eo a etsang lintho ka eona hore o na le tumelo e matla ho Ntate oa hae ea leholimong. (Jak. 2:18) O lula a khobile matšoafo ha ba bang ba mo koatisa ’me o bontša boitšoaro ha a lekeha. (1 Bakor. 9:25, 27; Tite 3:2) E le hore re apare botho bo bocha, re lokela ho ba le makhabane ’ohle a hlahang ho Bagalata 5:22, 23 le litemaneng tse ling. w22.03 8-9 ¶3-4

Baholo ba ka etsisa moapostola Pauluse ka hore ba etse mosebetsi oa boboleli ka ntlo le ntlo le ho sebelisa menyetla eohle e hlahang ho etsa mosebetsi ona. (Baef. 6:14, 15) Baholo ba ka etsisa Pauluse ka hore ha ba le mosebetsing oa boboleli ba koetlise ba bang, ho akareletsa le bahlanka ba sebeletsang. (1 Pet. 5:1, 2) Empa baholo ha baa lokela ho phathahana haholo ka mesebetsi hoo ba ka hlolehang ho fumana nako ea ho etsa mosebetsi oa boboleli. (Mat. 28:19, 20) Ka linako tse ling ba ka ’na ba lokela ho hana ho fuoa mesebetsi e eketsehileng e le hore ba ka ba le nako ea ho etsa lintho tse ling tseo ba lokelang ho li etsa. Ka mor’a ho rapela le ho nahanisisa pele ba etsa qeto, ba ka ’na ba hlokomela hore haeba ba ka amohela mosebetsi o itseng, ba ka ’na ba se ke ba e-ba le nako ea ho etsa lintho tse ling tsa bohlokoa haholo, joaloka ho tšoara borapeli ba lelapa, ho etsa mosebetsi oa boboleli le ho koetlisa bana hore ba etse mosebetsi ona. Ba ka kholiseha hore Jehova oa utloisisa hore ba batla ho leka-lekanya lintho. w22.03 27 ¶4, 7; 28 ¶8

Na u hopola eka u ne u tšaba ho ba e mong oa Lipaki Tsa Jehova? Mohlomong u ne u ikutloa eka u ke ke oa khona ho bolela molaetsa oa Bibele phatlalatsa. Kapa mohlomong u ne u tšaba hore lelapa leno kapa metsoalle ea hao e tla u hanyetsa. Haeba ho joalo, u tla utloisisa ha motho eo u ithutang Bibele le eena a ikutloa ka tsela e tšoanang. Jesu o ile a hlokomela hore batho ba bang ba ka ’na ba tšaba lintho tseo. Leha ho le joalo, o ile a khothalletsa balateli ba hae hore ba se ke ba lumella ho tšoha ho ba thibele ho sebeletsa Jehova. (Mat. 10:16, 17, 27, 28) Koetlisa motho eo u ithutang Bibele le eena hore a bolelle batho ba bang lintho tseo a li lumelang. E ka ’na eaba barutuoa ba Jesu ba ne ba tšohile ha a ne a re ba il’o etsa mosebetsi oa boboleli. Empa Jesu o ile a ba thusa ka ho ba bolella hore ba lokela hore ba il’o bolela ka ’Muso oa Molimo hokae le hore na molaetsa oa bona o ne o tla bua ka’ng. (Mat. 10:5-7) U ka etsisa Jesu joang? Thusa motho eo u ithutang Bibele le eena hore na a ka bolella batho molaetsa oa Bibele hokae. Ka mohlala, mo botse hore na ho na le motho eo a mo tsebang ea ka thusoang ke ho ithuta thuto e itseng ea Bibele. Ka mor’a moo, mo thuse hore a lokisetse hore na a ka bolella motho eo thuto eo joang. w21.06 6 ¶15-16

Ka metsotsoana feela mehaho ea khale le lishopo li ile tsa qala ho soahlamana. “Motho e mong le e mong o ne a tšohile . . . Batho ba bangata ba ile ba re ho sisinyeha hoo ho nkile metsotso e ka bang e ’meli feela. Empa ’na ke utloile eka e nkile nako e telele hona hoo.” Ana ke maikutlo a batho ba bang ba ileng ba pholoha tšisinyeho ea lefatše e neng e le Nepal ka 2015. Leha ho le joalo, hona joale re etsahalloa ke tšisinyeho e fapaneng e etsahalang lichabeng tsohle. moprofeta Hagai o ile a re: “Sena ke seo Jehova oa mabotho a se boletseng, ‘Hang hape—ka mor’a nakoana e seng kae—’me ke sisinya maholimo le lefatše.’” (Hag. 2:6) Tšisinyeho eo Hagai a buileng ka eona ha e tšoane le ho reketla ha lefatše ho bakang tšenyo. Ho e-na le hoo, e tlisa litholoana tse ntle. Jehova o ile a re: “Ke tla sisinya lichaba tsohle, ’me lintho tse lakatsehang tsa lichaba tsohle li tla kena; ’me ke tla tlatsa ntlo ena ka khanya.” w21.09 14 ¶1-3

Setsoalle se tiileng pakeng tsa batho ba babeli se tiisoa ke hore ba lule ba buisana le ho phetlelana lifuba. Hoa tšoana le ka setsoalle sa rona le Jehova. Ha re ntša maikutlo a rona, menahano ea rona le lintho tseo re amehileng ka tsona thapelong, re bontša hore rea mo tšepa le hore rea tseba hore oa re rata. (Pes. 94:17-19; 1 Joh. 5:14, 15) Ikamahanye le metsoalle e tšepahalang kaha ke mpho e tsoang ho Jehova. (Jak. 1:17) Ntate oa rona oa bontša hore o amehile ka rona ka ho re fa bara le barali ba bo rona ba re ratang “ka linako tsohle.” (Liprov. 17:17) Lengolong leo moapostola Pauluse a ileng a le ngolla Bakolose, o ile a bua ka Bakreste ba ileng ba mo tšehetsa a ba hlalosa e le “thuso e matlafatsang ho [eena].” (Bakol. 4:10, 11) Esita le Kreste Jesu o ne a hloka thuso ea metsoalle ea hae a bile a e ananela e bang kea batho kapa mangeloi. (Luka 22:43) Ho bua ka lintho tse re tšoenyang le Mokreste ea nang le tumelo e matla ha se letšoao la hore rea fokola empa ke ntho e ka re sireletsang. w21.04 24-25 ¶14-16

U lokela ho etsa’ng haeba molumeli-’moho le uena a u tšoere ka tsela e u utloisitseng bohloko? Leka kahohle hore le lule le e-na le khotso. Rapela Jehova ho tsoa pelong. Mo kope hore a thuse motho ea u utloisitseng bohloko le hore a u thuse ho bona makhabane ao motho eo a nang le ’ona ao Jehova a a ratang ka eena. (Luka 6:28) Haeba u sa khone ho lebala ntho eo Mokreste-’moho le uena a e entseng, e ka ba hantle hore u bue le eena ka taba eo. U tla be u etsa hantle ha u ka nahana hore Mokreste-’moho le uena o ne a ke ke a u utloisa bohloko ka boomo. (Mat. 5:23, 24) Ha u bua le eena, u se ke oa nahana hore o na le maikutlo a fosahetseng. Empa u tla etsa’ng haeba a sa batle ho bopa khotso? Tsoela pele ho mo mamella. U se ke oa mo tenehela. (Bakol. 3:13) Taba ea bohlokoa le ho feta ke hore, u se ke oa lula u koatile hobane ha u ka etsa joalo, u tla senya setsoalle sa hao le Jehova. U se ke oa lumella eng kapa eng hore e u utloise bohloko. Ha u etsa joalo u tla be u bontša hore u rata Jehova ho feta ntho leha e le efe.—Pes. 119:165. w21.06 23 ¶15