July

Molimo oa rona ea lerato o re file bokhoni ba ho bua. Leha ho le joalo, batho ba ile ba qala ho sebelisa mpho ena ea ho bua hampe. Satane Diabolose o ile a thetsa Eva ’me leshano leo le ile la etsa hore batho e be baetsalibe. (Gen. 3:​1-4) Adama o ile a sebelisa mpho ea ho bua hampe ha a ne a beha Eva le Jehova molato ka lebaka la liphoso tsa hae. (Gen. 3:12) Kaine eena o ile a thetsa Jehova ka mor’a hore a bolaee ngoan’abo e leng Abele. (Gen. 4:9) Mehleng ena li-movie tse ngata li sebelisa puo e litšila. Bana ba sekolo ba utloa puo e litšila sekolong ’me batho ba baholo ba e utloa mosebetsing. Re ka tloaela ho utloa batho ba bua puo e litšila ebe le rona rea ba etsisa re sa hlokomele. Kaha re Bakreste ’me re batla ho thabisa Jehova, ha re batle ho bua lintho tse mpe. Re batla ho sebelisa mpho ena e babatsehang ea ho bua ka tsela e nepahetseng e le hore re rorise Molimo. w22.04 4 ¶1-3

Jesu o ne a sa nke lintho tseo a nang le tsona e le tsa bohlokoa ka ho fetisisa. E ne e le motho ea thabelang lijo. (Luka 19:​2, 6, 7) Ka letsatsi le leng o ile a etsa veine e monate haholo ’me oo e ne e le mohlolo oa hae oa pele. (Joh. 2:​10, 11) O ne a apere seaparo se turang letsatsing leo a shoeleng ka lona. (Joh. 19:​23, 24) Ho ntse ho le joalo, Jesu ha aa ka a nka lintho tseo a neng a e-na le tsona e le tsa bohlokoa ka ho fetisisa bophelong ba hae. Jesu o ile a re haeba re batla ’Muso pele, Jehova o tla etsa bonnete ba hore o re fa lintho tseo re li hlokang. (Mat. 6:​31-33) Ho mamela keletso ea Jehova e mabapi le chelete ho thusitse bara le barali ba bo rona ba bangata. Nahana ka mohlala oa Mor’abo rona Daniel oa lesoha. O re: “Ha ke sa le mocha, ke ile ka etsa qeto ea hore ntho e tla tla pele bophelong ba ka ke ho sebeletsa Jehova.” Daniel o ne a se na lintho tse ngata ’me seo se ile sa etsa hore a etse mesebetsi e mengata ka mokhatlong oa Jehova. Daniel o boetse o re: “Ha ho na chelete e ka lekanang le litlhohonolofatso tseo Jehova a mphileng tsona.” w22.05 21-22 ¶6-7

Re ka bontša hore re rata ’nete ka hore kamehla re ithute Bibele le lingoloa tse thehiloeng ho eona. Ho sa tsotellehe hore na re bile Lipaki nako e kae, ho tla lula ho e-na le lintho tseo re tla lokela ho ithuta tsona. Ho ithuta ha ho bonolo empa ho na le molemo o moholo. Ha se kaofela ha rona re ratang ho bala le ho ithuta. Leha ho le joalo, Jehova o batla hore re tsoele pele ho “batla” le ho “batlisisa” e le hore re utloisise ’nete haholoanyane. (Liprov. 2:​4-6) Ho etsa boiteko boo ho lula ho re tsoela molemo. Mor’abo rona Corey o re ha a bala Bibele o hlahloba temana e le ’ngoe ka nako. O re: “Ke bala lintlha tsohle tse mongolong o botlaseng ba leqephe, ke sheba litšupiso tse bohareng ba leqephe ’me ke etsa le lipatlisiso. . . . Ke ithuta lintho tse ngata ha ke bala ka tsela ena!” Re bontša hore re ananela ’nete ha re ipha nako ebile re etsa boiteko ba ho ithuta eona ebang re sebelisa mokhoa ona kapa o mong.—Pes. 1:​1-3. w22.08 17 ¶13; 18 ¶15-16

Ha Jesu a se a le lefatšeng, o ile a sebelisa lintho tse bopiloeng ho ruta barutuoa ba hae ka Ntate oa hae. A re bueng ka e ’ngoe ea lithuto tseo a ileng a li ruta. Jehova o rata batho bohle. Thutong ea hae ea Thabeng, Jesu o ile a ruta barutuoa ba hae ka lintho tse peli tseo batho ba bangata ba sa li nkeng e le tsa bohlokoa hakaalo e leng letsatsi le pula. Lintho tsena ke tsa bohlokoa hobane li re thusa hore re ’ne re phele. Jehova a ka be a ile a khetha hore batho ba sa mo sebeletseng ba se ke ba fumana letsatsi le pula. Ho e-na le hoo, batho bohle baa li fumana. (Mat. 5:​43-45) Jesu o ile a sebelisa lintho tsena ho ruta barutuoa ba hae hore Jehova o batla hore re rate batho bohle. Nako le nako ha re bona letsatsi le likela le ha pula e na hamonate, re lokela ho hopola hore Jehova o rata batho bohle. Mohlala oo Jehova a re behetseng oona, o ka re susumetsa hore re bontše batho ba bang lerato ka hore re ba rute Bibele. w23.03 17 ¶9-10

Moapostola Johanne o ne a makaletse eng? E ne e le mosali ea palameng sebata se ’mala o sekareleta. Ke “seotsoa se seholo” ’me lebitso la hae ke “Babylona e Moholo.” O etsa “bohlola” le “marena a lefatše.” (Tšen. 17:​1-5) “Babylona e Moholo” ke mang? Mosali enoa ha a emele mokhatlo oa lipolotiki hobane Tšenolo e re o etsa bohlola le baeta-pele ba lefatše ba lipolotiki. (Tšen. 18:9) Ha e le hantle, taba ea hore ebe ho thoe o palame sebata, e bontša hore o leka ho laola babusi bana. Hape ha a tšoantšetse khoebo e meharo ea lefatše la Satane. Khoebo e meharo ho buuoa ka eona litemaneng tse ling tsa Tšenolo e le “bahoebi ba tsamaeang ba lefatše.” (Tšen. 18:​11, 15, 16) Babylona ea boholo-holo e ne e le motse-moholo oa bolumeli ba bohata. Kahoo, e tlameha ebe Babylona e Moholo e emela mefuta eohle ea borapeli ba bohata. Ha e le hantle ke ’muso oa lefatše oa bolumeli ba bohata.—Tšen. 17:​5, 18. w22.05 11 ¶14-16

Bo-’mè ba tšoenyeha ka hore na bana ba bona ba tla khetha ho sebeletsa Jehova. Batsoali ba tseba hantle khatello eo bana ba kopanang le eona lefatšeng lena la Satane. Hape bo-’mè ba bangata ha ba na balekane ba ba thusang ho holisa bana kapa balekane ba bona ha ba sebeletse Jehova. Ha se batsoali bao balekane ba bona e seng barapeli ba Jehova feela ba kopanang le mathata ha ba thusa bana ba bona ho rata Jehova. Leha batsoali ka bobeli ba sebeletsa Jehova, ho ntse ho ka ba thata ho thusa bana ba bona hore ba sebeletse Jehova. Leha ho le joalo, u se ke oa tšoenyeha haholo. Jehova o tla u thusa. U ka kopa batsoali ba nang le boiphihlelo ba ho holisa bana hore ba u fe litlhahiso tsa kamoo u ka sebelisang lithulusi tseo mokhatlo o faneng ka tsona bakeng sa borapeling ba lelapa. (Liprov. 11:14) U ka kopa Jehova hore a u thuse ho sebelisa lipotso ka tsela e bohlale ho fumana hore na bana ba hao ba ikutloa joang le hore na ba nahana eng.—Liprov. 20:5. w22.04 17 ¶4, 7; 18 ¶9

Jesu o ile a etsisa botho ba Jehova ka ho phethahetseng. Kahoo, ha re tseba Jesu hamolemo re tla rata Jehova le ho feta. (Baheb. 1:3) Re ka tseba Jesu haholoanyane ka ho ithuta Likosepele tse ’nè tsa Bibele. Haeba ha u e-s’o itloaetse ho bala Bibele letsatsi le letsatsi, ke hobane’ng ha u sa qale hona joale? Ha u ntse u bala litlaleho tse buang ka Jesu, lebisa tlhokomelo makhabaneng a hae. O ne a atameleha ’me ka lerato o ile a sika bana ba banyenyane matsohong a hae. (Mar. 10:​13-16) Jesu o ne a le mosa ebile a le botsoalle hoo barutuoa ba hae ba neng ba ikutloa ba lokolohile ho mo phetlela sefuba. (Mat. 16:22) Ka ho etsa joalo, Jesu o ne a etsisa Ntate oa hae ea leholimong. Jehova le eena o atameleha haholo. Re ka bua le eena ka thapelo. Ha re rapela, re ka mo bolella ntho e ’ngoe le e ’ngoe eo re e nahanang le tsela eo re ikutloang ka eona. Re kholisehile hore a ke ke a re ahlola.—1 Pet. 5:7. w22.08 3 ¶4-5

Jehova ke eena ea re bopileng, kahoo o tseba ntho e ’ngoe le e ’ngoe ka rona ’me taba ena ea hlolla. (Pes. 139:​15-17) O khona ho bona lintho tseo re li etsang ka lebaka la ho se phethahale hoo re ho futsitseng ho batsoali ba rona. O tseba lintho tse re etsahaletseng bophelong, tse etsang hore re be ka tsela eo re leng ka eona. Taba ea hore Jehova o re tseba hantle e mo susumeletsa hore a re bontše mohau. (Pes. 78:39; 103:​13,14) Jehova o re bontšitse hore o batla ho re tšoarela. Oa utloisisa hore ka lebaka la motho oa pele e leng Adama, kaofela ha rona re baetsalibe ebile rea shoa. (Bar. 5:12) Re ke ke ra khona ho itokolla sebeng le lefung kapa ra lokolla batho ba bang. (Pes. 49:​7-9) Leha ho le joalo, Molimo oa rona ea lerato o ile a re qenehela eaba o lokisetsa ho re lokolla. Johanne 3:16 e bontša hore Jehova o ile a romela Mora oa hae a le mong feela hore a tl’o re shoela.—Mat. 20:28; Bar. 5:19. w22.06 3 ¶5-6

Taba ea hore ba tšoarelang ba bang le bona Jehova o tla ba tšoarela e bonahala hantle ho seo Jehova a ileng a se bolella mohlanka oa hae Jobo. Monna enoa ea tšepahalang o ile a utloisoa bohloko haholo ke seo Elifaze, Bildade le Tsofare ba ileng ba se bua. Jehova o ile a laela Jobo hore a ba rapelle. Ka mor’a hore Jobo a rapele, Jehova o ile a mo hlohonolofatsa. (Jobo 42:​8-10) Re ikutloisa bohloko ha re lula re halefile. Jehova o batla hore re be le khotso ’me re se ke ra imeloa ke ho lula re halefile. (Baef. 4:​31, 32) O re re ‘tlohele bohale ’me re lese khalefo.’ (Pes. 37:8) Ho mamela keletso eo ho tla re thusa. Ha re lula re halefetse motho ea re utloisitseng bohloko, seo se ka re kulisa ’meleng le kelellong. (Liprov. 14:30) Ke rona ba tla utloa bohloko haeba re lula re halefetse motho e mong feela joalokaha ho noa chefo ho ka kulisa rona eseng motho e mong. Kahoo, re itsoela molemo ha re tšoarela batho ba bang. Re ba le khotso ebile re khona ho tsoela pele re ntse re sebeletsa Jehova. w22.06 10 ¶9-10

Tšepo ea rona e tšoana le helmete ea tšoantšetso e sireletsang menahano ea rona ’me e re thusa hore re se ke ra inahana borona feela e leng ntho e ka senyang kamano ea rona le Jehova. (1 Bakor. 15:​33, 34) Tšepo e ka re thusa hore re se ke ra nahana hore ha ho mohla re tla khona ho khahlisa Jehova. Re lokela ho hopola hore Elifaze ea neng a etsa eka o tšelisa Jobo, o ile a bua lintho tse tšoanang le tseo ho Jobo. O ile a re: “Ha ho mohla motho e ka bang ea hloekileng.” A boela a re: “Molimo ha a tšepe mangeloi a hae le maholimo ha aa hloeka mahlong a hae.” (Jobo 15:​14, 15) Ao ke mashano e le kannete! Re lokela ho hopola hore Satane ke eena ea susumetsang mashano ana. Oa tseba hore ha re lula re nahana ka tsela eo, re ka qetella re se re se na tšepo. Le ka mohla u se ke oa lumela mashano ao. Kholiseha hore Jehova o batla u phele ka ho sa feleng hape o tla u thusa hore u finyelle seo.—1 Tim. 2:​3, 4. w22.10 25-26 ¶8-10

Satane o ne a batla hore Jobo a lumele hore o hlaheloa ke mathata hobane Jehova a mo halefetse. Satane o ile a etsa hore moea o matla o heletse ntlo eo bana ba leshome ba Jobo ba neng ba tšoaretse mokete ho eona. (Jobo 1:​18, 19) O ile a boela a etsa hore mollo o theohe leholimong, o bolaee mehlape ea Jobo le bahlanka ba hae ba neng ba e lisitse. (Jobo 1:16) Kaha mollo le moea li ne li tsoa leholimong, Jobo o ile a nahana hore li ne li tsoa ho Jehova Molimo. Ke ka lebaka leo Jobo a ileng a nahana hore o ne a halefisitse Jehova. Ho ntse ho le joalo, Jobo o ile a hana ho rohaka Ntate oa hae ea leholimong. Jobo o ne a tseba hore ka lilemo tse ngata, Jehova o ’nile a mo etsetsa lintho tse ngata tse ntle. O ne a lumela hore haeba a ile a amohela lintho tse ntle, o ne a tlameha ho amohela le tse mpe. Kahoo o ile a re: “Lebitso la Jehova le ke le tsoele pele ho bokoa.”—Jobo 1:​20, 21. w22.06 21 ¶7

Jesu o ile a lemosa barutuoa ba hae ka eona taba ena lengolong la Johanne 17:14. Re se re bone ha karolo ea boprofeta bona e phethahala, haholo-holo lilemong tse lekholo tse fetileng. Boprofeta boo bo phethahetse joang? Satane o ile a lelekoa leholimong nakoana ka mor’a hore Jesu e be Morena ka 1914. Hona joale o lefatšeng ’me o emetse ho felisoa. (Tšen. 12:​9, 12) Empa ha aa phutha matsoho feela, o halefile haholo ebile o hlasela bahlanka ba Molimo. (Tšen. 12:​13, 17) Ke kahoo batho ba busoang ke Satane ba hloileng bahlanka ba Molimo hakana. Leha ho le joalo, ha rea lokela ho tšaba Satane le balateli ba hae. Ho e-na le hoo, re ka kholiseha joaloka moapostola Pauluse ea ileng a re: “Haeba Molimo a eme le rona, ke mang ea tla ba khahlanong le rona?” (Bar. 8:31) Re ka tšepa Jehova ka ho feletseng. w22.07 18 ¶14-15

Jesu o ne a sa tšoenyeha ka hore na ho tla ba le basebetsi ba lekaneng matsatsing a ho qetela kapa che. O ne a tseba hore boprofeta ba mopesaleme bo tla phethahala bo reng: “Batho ba hao ba tla itlhahisa ka ho rata letsatsing la lebotho la hao la sesole.” (Pes. 110:3) Haeba le uena u bolela litaba tse molemo, u tšehetsa Jesu le lekhoba le tšepahalang ho phethahatsa boprofeta boo. Mosebetsi o tsoela pele le hoja ho e-na le litšitiso. Bothata boo baboleli ba litaba tse molemo ba kopanang le bona ke ho hanyetsoa. Bakoenehi, baeta-pele ba bolumeli le bo-ralipolotiki ba boleletse batho ba bangata mashano ka mosebetsi oa rona. Haeba beng ka rona, batho bao re ba tsebang le batho bao re sebetsang le bona ba thetsitsoe ke mashano ana, ba ka re susumeletsa ho khaotsa ho sebeletsa Jehova le ho khaotsa ho bolela. Linaheng tse ling, lira tsa rona li tšosa bara le barali ba bo rona, lia ba hlasela, lia ba tšoara ebile li ba isa chankaneng. w22.07 8 ¶1; 9 ¶5-6

Jehova o lebeletse hore re be le nako ea ho ithuta Bibele kamehla le ho nahanisisa ka ho teba ka seo re se balang. Ha re sebelisa lintho tseo re ithutang tsona, tumelo ea rona ea matlafala le setsoalle sa rona le Jehova sea tiea. Ka lebaka leo, re ba le matla a ho mamella mathata. Hape Jehova o fa batho ba itšetlehang ka Lentsoe la hae moea o halalelang. Moea oo o halalelang o re fa “matla a fetang se tloaelehileng” e le hore re ka mamella mathata. (2 Bakor. 4:​7-10) Ka thuso ea Jehova “lekhoba le tšepahalang le le masene” le etsa lingoloa tse ngata, livideo le lipina tse re thusang hore re be le tumelo e matla le hore re lule re e-na le setsoalle se haufi le Jehova. (Mat. 24:45) Jehova o rutile batho ba hae hore ba ratane ba be ba tšelisane linakong tse thata. (2 Bakor. 1:​3, 4; 1 Bathes. 4:9) Bara le barali ba bo rona ba ikemiselitse ho re thusa hore tumelo ea rona e lule e le matla leha re e-na le mathata. w22.08 12 ¶12-14

Ha re bua ka makhabane a bara le barali ba bo rona, re ba thusa hore ba momahane, e leng se tla etsa hore ho be le lerato ka phuthehong. Ho ka etsahala hore ka linako tse ling Bakreste ba nang le boiphihlelo ba ngangisane kapa ba se ke ba lumellana ka taba e itseng. Ntho ena e ile ea etsahalla moapostola Pauluse le motsoalle oa hae Barnabase. Banna bana ba babeli ba ne ba sa lumellane ka hore na ba tsamaee le Mareka leetong la bona le latelang la boromuoa. Ho ile ha e-ba le “ho phatloha ho hoholo ka bohale” ’me ba ile ba etsa qeto ea hore ba arohane. (Lik. 15:​37-39) Leha ho le joalo, Pauluse, Barnabase le Mareka ba ile ba etsa khotso. Hamorao Pauluse o ile a bua lintho tse ntle ka Barnabase le Mareka. (1 Bakor. 9:6; Bakol. 4:10) Le rona re lokela ho etsa khotso le Bakreste-’moho le rona ’me re tsoele pele ho sheba lintho tse ntle tseo ba li etsang. Ha re etsa joalo re tla etsa hore ho be le khotso le bonngoe ka phuthehong. w22.08 23 ¶10-11

Ha re ntse re leka kahohle ho mamela melao ea Jehova e lokileng, re lokela ho qoba ho ahlola batho ba bang le ho inka re ba phahametse. Re lokela ho hopola hore Jehova ke “Moahloli oa lefatše lohle.” (Gen. 18:25) Jehova ha aa re fa tokelo ea ho ahlola batho ba bang. Nahana ka mohlala oa monna ea neng a lokile e leng Josefa. O ne a qoba ho ahlola batho ba bang esita le ba neng ba mo tšoara hampe. Bara babo ba ne ba mo loantša, ba ile ba mo rekisa hore e e’o ba lekhoba ’me ba ile ba re ho ntate oa bona o shoele. Lilemo hamorao, Josefa o ile a ba le lelapa labo hape. Ka nako eo Josefa e ne e se e le molaoli ea matla ’me a ka be a ile a ahlola bara babo ka sehloho le ho batla ho iphetetsa. Bara ba bo Josefa ba ne ba tšohile hore o ne a ka etsa joalo, le hoja ba ne ba ikoahlaela lintho tseo ba neng ba li entse. Empa Josefa o ile a re ho bona: “Le se ke la tšoha, etsoe na ke sebakeng sa Molimo?” (Gen. 37:​18-20, 27, 28, 31-35; 50:​15-21) Josefa o ne a tseba hore ke Jehova feela ea nang le tokelo ea ho ahlola bara babo. w22.08 30 ¶18-19

Jehova a ka u sebelisa ho araba thapelo ea motho e mong. A ka u sebelisa ebang u moholo, u mohlanka ea sebeletsang, u pula-maliboho kapa u mohoeletsi. A ka boela a u sebelisa ebang u mocha, u se u holile, u mora kapa morali oa bo rona. Ha motho ea ratang Jehova a kopa thuso ho eena, hangata o sebelisa baholo le bahlanka ba bang ba hae ho mo ‘tšelisa haholo.’ (Bakol. 4:11) Re thabela ho sebeletsa Jehova ka tsela ena le ho thusa Bakreste-’moho. Re ka khona ho thusa le ho khothatsa Bakreste-’moho le rona ha ho e-na le mafu a seoa, likoluoa kapa ba hlorisoa. Re ka batla ho thusa ba bang empa ho ka ba thata haeba lelapa la rona le lona le e-na le mathata. Leha ho le joalo, re batla ho thusa Bakreste-’moho le rona ’me Jehova oa thaba ha re etsa sohle seo re ka se khonang ho ba thusa.—Liprov. 19:17. w22.12 22 ¶1-2

Lerato le re thusa ho tšepahala. Jesu o ile a re litaelo tse kholo tse peli ke ho rata Jehova le ho rata moahelani. (Mat. 22:​37-39) Kaha re rata Jehova, re batla ho etsisa mohlala oa hae o phethahetseng oa botšepehi. Ka mohlala, ho rata bara le barali ba bo rona ho re susumeletsa ho boloka makunutu a bona. Re ke ke ra batla ho bua lintho tse ka ba utloisang bohloko kapa tsa ba hlabisa lihlong. Boikokobetso le bona bo tla etsa hore batho ba bang ba re tšepe. Mokreste ea ikokobelitseng ha a leke ho khahlisa batho ba bang ka hore lintho li hlahe ka eena. (Bafil. 2:3) Ha a etse hore batho ba bang ba nahane hore o tseba makunutu ao a ke keng a bua ka ’ona. Kahoo, ha re e-na le boikokobetso re tla qoba ho bua maikutlo a rona litabeng tse sa hlalosoang ka Bibeleng kapa lingoloeng tse thehiloeng Bibeleng. w22.09 12 ¶12-13

Lengeloi le ile la bolella Daniele hore bahlanka ba Molimo ke bona ba ka utloisisang boprofeta ba Daniele haholoanyane, le hore “ho hang ha ho ba khopo ba tla utloisisa.” (Dan. 12:10) Hona joale re lokela ho bontša ka lintho tseo re li etsang hore ha re har’a batho ba khopo. (Mal. 3:​16-18) Jehova o ntse a bokella batho bao a ba nkang e le “thepa e khethehileng,” e leng batho ba bohlokoa ho eena. Kannete re batla ho ba har’a batho bao. Re phela nakong e thabisang haholo. Haufinyane ho tl’o etsahala lintho tse thabisang le ho feta. Re tla bona ha lintho tsohle tse mpe li felisoa. Hape re tla bona ha Jehova a phethahatsa litšepiso tseo a ileng a li tšepisa Daniele ha a ne a re: “U tla ema bakeng sa kabelo ea hao bofelong ba matsatsi.” (Dan. 12:13) Na u emetse ho bona ha Daniele le batho bao u ba ratang ba hlokahetseng ba “ema” hape kapa ba tsoha? Haeba ho joalo etsa sohle seo u ka se khonang hore u tšepahale hona joale ’me ha u etsa joalo u ka kholiseha hore Jehova a ke ke a hlakola lebitso la hao bukeng ea bophelo. w22.09 24 ¶17; 25 ¶19-20

E tlameha ebe mantsoe ao a ile a matlafatsa Ezekiele. Hobane’ng? Hobane e ka ’na eaba Ezekiele o ile a hopola hore ha Jehova a ne a khetha Moshe le Esaia hore e be baprofeta ba hae, o ile a ba bolella mantsoe a kang ao. (Ex. 3:10; Esa. 6:8) Ezekiele o ne a boetse a tseba kamoo Jehova a ileng a thusa baprofeta bana ba babeli hore ba phethe mesebetsi ea bona e thata. Ha Jehova a ne a re ho Ezekiele ka makhetlo a mabeli, ‘Kea u roma,’ moprofeta Ezekiele o ne a e-na le lebaka le utloahalang la ho tšepa hore Jehova o tla mo tšehetsa. Hape Ezekiele o ile a re ka makhetlo a mangata: “Jehova a re ho ’na.” (Ezek. 3:16) O ile a boela a re: “Jehova a boela a bua le ’na.” (Ezek. 6:1) Kannete Ezekiele o ne a kholisehile hore o ne a ronngoe ke Jehova. Ntate oa Ezekiele e ne e le moprista, kahoo ho ka etsahala hore o ile a ruta Ezekiele hore Jehova o ne a lula a thusa baprofeta ba hae. Ka mohlala, Jehova o ile a re ho Isaka, Jakobo le Jeremia: “Ke na le uena.”—Gen. 26:24; 28:15; Jer. 1:8. w22.11 3 ¶3

Le hoja Adama le Eva ba ile ba etsa sebe se ileng sa fella ka hore bana ba bona ba shoe, Jehova ha aa ka a fetola morero oa hae. (Esa. 55:11) O ntse a rerile hore batho ba tšepahalang ba phele ka ho sa feleng. Nahana ka lintho tseo Jehova a ileng a li bua le ho li etsa ho phethahatsa morero oa hae. Jehova o tšepisitse ho tsosa bafu le ho ba fa monyetla oa ho phela ka ho sa feleng. (Lik. 24:15; Tite 1:​1, 2) Jobo ea tšepahalang o ne a kholisehile hore Jehova o labalabela ho tsosa bafu. (Jobo 14:​14, 15) Moprofeta Daniele o ne a tseba hore batho ba tla tsosoa le ho fuoa monyetla oa ho phela ka ho sa feleng. (Pes. 37:29; Dan. 12:​2, 13) Bajuda ba mehleng ea Jesu le bona ba ne ba tseba hore Jehova a ka fa bahlanka ba hae ba tšepahalang “bophelo bo sa feleng.” (Luka 10:25; 18:18) Jesu o ile a bua ka tšepiso ena ka makhetlo a mangata ’me eena ka boeena o ile a tsosoa ke Ntate oa hae.—Mat. 19:29; 22:​31, 32; Luka 18:30; Joh. 11:25. w22.12 4-5 ¶8-9

Jehova o re kopa hore re be haufi le eena. (Jak. 4:8) O batla ho ba Molimo oa rona, Ntate oa rona le motsoalle oa rona. O araba lithapelo tsa rona hape oa re thusa ha re e-na le mathata. O boetse o sebelisa mokhatlo oa hae ho re ruta le ho re sireletsa. Re ka atamela ho Jehova ka ho mo rapela, ho bala Lentsoe la hae le ho nahana ka lona. Ha re etsa joalo, re tla mo rata re be re mo nke a le bohlokoa ho rona. Hape re tla susumeletseha ho mo fa tlhompho le thoriso tse mo loketseng. (Tšen. 4:11) Re tla tšepa Jehova le mokhatlo oo a re fileng oona bakeng sa ho re thusa ha re ntse re ithuta ka eena haholoanyane. Diabolose o leka ho etsa hore butle-butle re khaotse ho tšepa Jehova le mokhatlo oa hae. Empa re ka hlola maqiti a hae. Haeba tumelo ea rona e le matla ebile re tšepa Jehova ka ho feletseng, re ke ke ra furalla Molimo oa rona le mokhatlo oa hae.—Pes. 31:​13, 14. w22.11 14 ¶1-3

Bakreste ba ’nete ba ile ba beha bophelo ba bona kotsing le ho tela bolokolohi boo ba nang le bona hobane ba rata Jehova eo e leng ’Musi oa bona. Bakreste bao ba ikemiselitse ho tšepahalla Jehova joaloka Baheberu ba bararo ba ileng ba pholosoa mollong ka lebaka la ho tšepahalla Ea Holimo-limo. Mopesaleme Davida o ile a bua ka bohlokoa ba ho tšepahalla Molimo, o ile a re: “Jehova o tla ahlola batho. Nkahlole hle Jehova, u bone hore na ke lokile le hore na kea tšepahala.” (Pes. 7:8) Davida o ile a boela a re: “E se eka nka sireletsoa hobane kea tšepahala ebile ke etsa lintho tse lokileng.” (Pes. 25:21) Tsela e molemo ke hore re tšepahalle Jehova bophelo bohle ba rona. Kahoo, re tla ikutloa joaloka mongoli e mong oa pesaleme ea ileng a re: “Ho thaba batho ba tšepahalang le ba mamelang molao oa Jehova.”—Pes. 119:1. w22.10 17 ¶18-19

Jobo o ile a buisana le batho ba bangata bophelong ba hae empa puisano e thahasellisang ka ho fetisisa ke eo a ileng a ba le eona le Jehova Molimo. Puisanong eo, Jehova o ile a re Jobo a shebe tse ling tsa lintho tse ntle tseo a li bopileng. Sena se ne se tla thusa Jobo hore a bone kamoo Jehova a leng bohlale kateng le hore a kholisehe hore Jehova o fa bahlanka ba hae lintho tsohle tseo ba li hlokang. Ka mohlala, Molimo o ile a hopotsa Jobo hore o hlokomela liphoofolo ’me le eena a ka mo hlokomela. (Jobo 38:​39-41; 39:​1, 5, 13-16) Jobo o ile a ithuta lintho tse ngata ka makhabane a Molimo linthong tse bopiloeng. Re ka ithuta ka Molimo haholoanyane ha re sheba lintho tseo a li bopileng. Leha ho le joalo, ka linako tse ling ho ka ba thata hore re etse joalo. Haeba re lula toropong, re ka ’na ra bona lintho tse ’maloa tseo Molimo a li bopileng. Leha re lula lekeisheneng kapa mahaeng, re ka ’na ra bona eka ha re na nako e lekaneng ea ho sheba lintho tseo Molimo a li bopileng. Leha ho le joalo, ho bohlokoa hore re iphe nako ea ho sheba lintho tseo Molimo a li bopileng. w23.03 15 ¶1-2

Jesu o ile a re “litšisinyeho tse kholo tsa lefatše” le likoluoa tse ling li ne li tla etsahala pele bofelo bo tla. (Luka 21:11) O ile a boela a bolela hore ‘tlolo ea molao e tla ata’ ’me ke sona se etsahalang kajeno. Ka mohlala, ho na le bokebekoa, lintoa le bokhukhuni. (Mat. 24:12) Jesu ha aa ka a re lintho tsena li tla hlahela batho ba sa mameleng Jehova feela. Bahlanka ba bangata ba tšepahalang ba Jehova le bona ba ile ba hlaheloa ke likoluoa. (Esa. 57:1; 2 Bakor. 11:25) Jehova a ka ’na a se ke a re sireletsa ka mohlolo ha re hlaheloa ke likoluoa empa o tla re fa lintho tsohle tseo re li hlokang e le hore re lule re khobile matšoafo. Ha re itokiselitse maemo ana ho tla ba bonolo hore re sebetsane le ’ona. Empa na ho itokisa ho bolela hore ha re tšepe Jehova? Ha ho joalo. Ha e le hantle, ho itokiseletsa likoluoa ho bontša hore re na le tumelo ea hore a ka khona ho re hlokomela. Joang? Lentsoe la Molimo le re khothaletsa hore re itokiseletse likoluoa tse ka ’nang tsa re hlahela. w22.12 18 ¶9-10

Ha Josefa a ntse a le teronkong, Jehova o ile a etsa hore morena oa Egepeta a lore litoro tse peli tse mo tšoenyang. Ha morena a utloa hore Josefa o khona ho hlalosa litoro, o ile a re a bitsoe. Jehova o ile a thusa Josefa ho hlalosa litoro tseo ’me Faro o ile a thabela keletso eo a ileng a mo fa eona. Faro o ile a bona hore Jehova o thusa Josefa ’me o ile a mo khetha hore e be eena ea laolang tsela eo lijo li tla fanoa ka eona. (Gen. 41:​38, 41-44) Hamorao ho ile ha e-ba le tlala e kholo naheng ea Egepeta le ea Kanana e leng moo lelapa la bo Josefa le neng le lula teng. Josefa o ne a tla thusa lelapa labo hore le fumane lijo ’me sena se ne se tla thusa hore ho bolokoe leloko leo Mesia a neng a tla hlaha ho lona le phela. Ho hlakile hore ke Jehova ea neng a etsa hore Josefa a atlehe linthong tsohle. Le hoja bara ba bo Josefa ba ne ba batla ho mo bolaea, Jehova o ile a fetola boemo boo e le hore a ka phethahatsa morero oa hae. w23.01 16-17 ¶11-12

Motho ea itlhokomelang o hlokolosi ka lintho tse ka senyang setsoalle sa hae le Jehova ’me oa li qoba. Ha a etsa joalo, Molimo o tla lula a mo rata. (Liprov. 22:3; Juda 20, 21) Moapostola Pauluse o ile a eletsa Bakreste hore ba itlhokomele. Ka mohlala, o ile a re ho Bakreste ba Efese: “Le ichebe hore na le itšoere joang. Le se ke la itšoara joaloka batho ba se nang kelello empa le itšoare joaloka ba bohlale.” (Baef. 5:​15, 16) Satane o lula a batla ho senya setsoalle sa rona le Jehova. Kahoo, Bibele e re eletsa hore ‘re utloisise hore na thato ea Jehova ke efe’ e le hore re khone ho itšireletsa khahlanong le Satane. (Baef. 5:17) E le hore re khone ho etsa liqeto tse bohlale, re lokela ho utloisisa “thato ea Jehova.” Re ka etsa joalo ka ho ithuta Lentsoe la Molimo le ho nahanisisa ka lona kamehla. Ha re ntse re utloisisa thato ea Jehova haholoanyane re bile re leka ho “nahana joaloka Kreste,” ho tla ba bonolo hore re etse lintho ka bohlale le haeba ho se na molao o tobileng oa hore na re etse eng.—1 Bakor. 2:​14-16. w23.02 16-17 ¶7-9

U hloekisa ntlo ea hao hangata hakae? E ka ’na eaba pele u qala ho lula ho eona u ile oa e hloekisa haholo. Empa e ne e tla ba joang haeba u ne u ke ke oa hlola u e hloekisa ka mor’a moo? Kapele feela e ne e tla ba lerole ’me e be bohlasoa. U lokela ho hloekisa ntlo ea hao hangata e le hore e lule e hloekile. Ka tsela e tšoanang, re lokela ho lula re lokisa tsela eo re etsang lintho ka eona le eo re nahanang ka eona. Pele re kolobetsoa, re ile ra sebetsa ka thata ho lokisa tsela eo re etsang lintho ka eona e le hore re ‘itlhoekise ’meleng le kelellong.’ (2 Bakor. 7:1) Leha ho le joalo, re lokela ho latela keletso ea moapostola Pauluse e reng ‘re ’ne re nchafatse tsela eo re nahanang ka eona.’ (Baef. 4:23) Lefatše le ka etsa hore re silafale kapele feela. E le hore re qobe ho silafatsoa ke lefatše lena le hore re lule re khahlisa Jehova, re lokela ho lula re hlahloba lintho tseo re li ratang, tseo re li nahanang le botho ba rona. w23.01 8 ¶1-2

U ka inahanela hore na ho ne ho le joang ho mamela ha Jesu a ruta. Hangata o ne a qotsa Mangolo a Halalelang ka hlooho. Nakong eo Jesu a neng a kolobetsoa le ha a ne a tlotsoa ka moea o halalelang, Molimo o ile a mo hopotsa lintho tseo a neng a li tseba ha a ne a le leholimong. Jesu o ile a qotsa Mangolo ha a ne a bua mantsoe a pele ka mor’a hore a kolobetsoe le ha a ne a bua mantsoe a ho qetela pele a shoa. (Deut. 8:3; Pes. 31:5; Luka 4:4; 23:46) Nakong ea lilemo tse tharo le halofo, pakeng tsa liketsahalo tsena tse peli, hangata Jesu o ne a balla batho Mangolo, a a qotsa ebile a a hlalosa. (Mat. 5:​17, 18, 21, 22, 27, 28; Luka 4:​16-20) Lilemo pele Jesu a qala tšebeletso ea hae, hangata o ne a bala le ho utloa Lentsoe la Molimo. Ha ho pelaelo hore ha ba le lapeng, Jesu o ne a utloa Maria le Josefa ba qotsa Mangolo. (Deut. 6:​6, 7) Hape Jesu o ne a lula a ea ntlong ea thapelo ka Sabatha e ’ngoe le e ’ngoe le lelapa labo. (Luka 4:16) Ha a le moo, e tlameha ebe o ne a mamela ka hloko ha Mangolo a baloa. w23.02 8 ¶1-2

Re na le mabaka a mangata haholo a ho rata Jehova. Ka mohlala, u se u tseba hore ke eena “mohloli oa bophelo” le hore ke mofani oa “mpho e ’ngoe le e ’ngoe e molemo le ntho e ’ngoe le e ’ngoe e phethahetseng.” (Pes. 36:9; Jak. 1:17) Lintho tsohle tse molemo tseo u nang le tsona li tsoa ho Molimo oa rona ea lerato le ea seatla se bulehileng. Mpho e babatsehang ka ho fetisisa eo Jehova a re fileng eona ke sehlabelo sa Mora oa hae. Ke hobane’ng ha re cho joalo? Nahana ka kamano e haufi eo Jehova a nang le eona le Mora oa hae. Jesu o ile a re: “Ntate oa nthata,” a ba a re: “Ke rata Ntate.” (Joh. 10:17; 14:31) Ka lilemo tse libilione tseo ba li qetileng ba le ’moho, setsoalle sa bona se ile sa tiea le ho feta. (Liprov. 8:​22, 23, 30) Nahana hape hore na Molimo o ile a utloa bohloko hakae ha a lumella Mora oa hae hore a utloe bohloko a be a shoe. Jehova o rata batho, le uena oa u rata. O u rata hoo a ileng a ikemisetsa ho fana ka Mora oa hae ea ratoang e le sehlabelo e le hore uena le batho ba bang le phele ka ho sa feleng. (Joh. 3:16; Bagal. 2:20) Ha ho na lebaka le fetang lena la ho rata Molimo. w23.03 4-5 ¶11-13

Re lokela ho qoba lithuto tsa bakoenehi. Jesu o ile a khalemela Bakreste ba bang ba Pergame hobane ba ne ba baka likarohano ka phuthehong. (Tšen. 2:​14-16) O ile a babatsa Bakreste ba Thyatire ba neng ba suthetse hole le “lintho tse tebileng tsa Satane” ’me a ba khothaletsa ho tšoara ’nete ka tieo. (Tšen. 2:​24-26) Bakreste ba neng ba itumeletse ho khelosoa ke lithuto tsena tsa bohata ba ne ba lokela ho baka. Taba ee e re ama joang? Re lokela ho qoba lithuto leha e le life tse sa lumellaneng le tsela eo Jehova a nahanang ka eona. Bakoenehi ba ka ’na ba bonahala eka baa tsotella hore na Bibele e re’ng empa liketso tsa bona li bontša hore ha ho joalo. (2 Tim. 3:5) Ho ba bonolo ho hlokomela le ho qoba lithuto tsa bohata haeba re le baithuti ba hloahloa ba Lentsoe la Molimo. (2 Tim. 3:​14-17; Juda 3, 4) Re tlameha ho etsa bonnete ba hore borapeli ba rona boa amoheleha ho Jehova. Haeba ho e-na le ntho eo re ntseng re e etsa e ka etsang hore Jehova a se ke a amohela borapeli ba rona, re lokela ho nka khato hang-hang ’me re lokise lintho.—Tšen. 2:​5, 16; 3:​3, 16. w22.05 4 ¶9; 5 ¶11