August

Ke hobane’ng ha Jehova a ngola mabitso ‘bukeng ea khopotso’ a batho ba buang lintho tse bontšang hore baa mo tšaba le ho nahanisisa ka lebitso la hae? Lebaka ke hobane lintho tseo re li buang li bontša se ka lipelong tsa rona. Jesu o ile a re: “Molomo o bua ho tsoa ho se tletseng pelong.” (Mat. 12:34) Jehova o batla hore batho ba mo ratang ba thabele ho phela ka ho sa feleng lefatšeng le lecha. Lintho tseo re li buang li ka etsa hore Jehova a amohele tšebeletso ea rona. (Jak. 1:26) Batho ba bang ba sa rateng Molimo ba bua ka tsela e bontšang hore ba bohale, ha ba nahanele ebile baa ikhohomosa. (2 Tim. 3:​1-5) Ha re batle ho tšoana le bona. Re batla ho thabisa Jehova ka lintho tseo re li buang. Leha ho le joalo, na Jehova o ne a ka thaba haeba re bua ka tsela e mosa ha re le libokeng le ha re le tšimong empa re bua le ba malapa a rona ka tsela e sa nahaneleng moo batho ba bang ba sa re boneng kapa ba sa re utloeng?—1 Pet. 3:7. w22.04 5 ¶4-5

Molimo o kentse monahano oa hae ka lipelong tsa linaka tse leshome le sebata ho felisa Babylona e Moholo. Jehova o tla susumeletsa lichaba ho sebelisa sebata se ’mala o sekareleta, e leng Machaba a Kopaneng, ho hlasela ’muso oa lefatše oa bolumeli ba bohata le ho o felisa ka ho feletseng. (Tšen. 18:​21-24) See se bolela eng ho rona? Re lokela ho tsoela pele re le ka har’a “mofuta oa borapeli o hloekileng le o sa silafalang ponong ea Molimo.” (Jak. 1:27) Ha rea lokela ho itumella ho susumetsoa ke Babylona e Moholo ka lithuto tsa bohata, mekete ea bohetene, boitšoaro bo bobe le ho sebelisana le meea. Hape re lokela ho tsoela pele ho hlokomelisa batho ho “tsoa ho eena,” e le hore ba ka qoba ho kenella likotlong tseo Molimo a mo tlisetsang tsona.—Tšen. 18:4. w22.05 11 ¶17, 18

Batsoali, batlang litsela tsa ho ruta bana ba lona ka Jehova le ka lintho tse ngata tseo a le etselitseng tsona. (Deut. 6:​6, 7) Ho etsa joalo ke habohlokoa, haholo-holo ha le sa khone ho ithuta kamehla le bana ba hao ha le le lapeng hobane molekane e mong e se Paki ea Jehova. Morali oa bo rona Christine o re: “Kaha ke ne ke e-na le menyetla e fokolang ea ho buisana le bana ba ka ka Jehova, ke ile ka sebelisa monyetla o mong le o mong o hlahang ho bua le bona ka eena.” Ho ekeletsa moo, bua lintho tse ntle ka mokhatlo oa Jehova le ka bara le barali ba bo rona. U se ke oa tšoaea baholo liphoso. Lintho tseo u li buang ka baholo li ka thusa bana ba hao hore ba bue le bona ha ba hloka thuso. Khothaletsa khotso ka lapeng. Kamehla bontša monna oa hao le bana hore oa ba rata. Bua ka mosa le tlhompho ha u bua ka monna oa hao u be u rute bana ba hao hore le bona ba etse joalo. Ha u etsa joalo ho tla ba bonolo hore bana ba hao ba ithute ka Jehova.—Jak. 3:18. w22.04 18 ¶10-11

Molaetsa oa Jesu o eang phuthehong ea Efese o bontša hore ba ne ba ile ba mamella ’me ba tsoela pele ho sebeletsa Jehova leha ba ne ba e-na le mathata a mangata. Leha ho le joalo, ba ne ba tlohetse lerato leo ba neng ba e-na le lona pele. Haeba ba ne ba sa tsosolose lerato leo, borapeli ba bona bo ne bo ke ke ba amoheleha. Le rona kajeno ha se hore re lokela ho mamella feela. Mabaka a rona a ho mamella e tlameha ho ba a nepahetseng. Molimo oa rona ha a thahaselle feela hore na re etsa eng empa hape o thahasella le lebaka leo re etsang lintho ka lona. Mabaka ao re etsang lintho ka ’ona a bohlokoa ho Jehova hobane o lebeletse hore borapeli ba rona bo susumetsoe ke lerato le tebileng le kananelo bakeng sa hae. (Liprov. 16:2; Mar. 12:​29, 30) Re lokela ho lula re falimehile. Bakreste ba phutheho ea Sarda ba ne ba e-na le bothata bo bong bo fapaneng. Ba ne ba kile ba sebeletsa Jehova pele empa joale ba ne ba se ba khoehlisitse. Jesu o ile a re ba “tsohe.” (Tšen. 3:​1-3) Ke ’nete hore Jehova a ke ke a lebala mosebetsi oa rona.—Baheb. 6:10. w22.05 3 ¶6-7

Solomone o ile a re motho o thabisoa ke ho sebetsa ka thata ’me o ile a re seo ke “mpho ea Molimo.” (Moek. 5:​18, 19) Solomone o ne a tseba hore na o bua ka’ng hobane o ne a sebetsa ka thata. O ile a ikahela matlo, a itemela lirapa tsa morara, a iketsetsa lirapa le matamo a metsi a ba a haha metse. (1 Mar. 9:19; Moek. 2:​4-6) Kannete Solomone o ne a sebetsa ka thata ’me seo se ne se etsa hore a thabe. Solomone o ne a tseba hore ho sebetsa ka thata ha se eona feela ntho e neng e ka etsa hore a thabe empa o ne a ka thabisoa ke ho sebeletsa Jehova. Ka mohlala, o ile a etella pele mosebetsi oa ho haha tempele e ntle ea Jehova o ileng oa nka lilemo tse supileng. (1 Mar. 6:38; 9:1) Ka mor’a hore Solomone a etse lintho tsena kaofela, o ile a hlokomela hore ntho ea bohlokoa eo motho a ka e etsang ke ho sebeletsa Jehova. O ile a re: “Qetello ea taba, ha ntho e ’ngoe le e ’ngoe e se e utloiloe, ke ena: Tšaba Molimo oa ’nete ’me u boloke litaelo tsa hae.”—Moek. 12:13. w22.05 22 ¶8

Bibele e bua ka batho ba bangata bao Jehova a ileng a ba tšoarela. Uena u hopola mang? Mohlomong u hopola Morena Manase. Monna eo ea khopo o ile a siteloa Jehova ka ho etsa lintho tse mpe haholo. O ile a rapela melimo ea bohata ’me a khothalletsa le batho ba bang hore ba e rapele. O ile a bolaea bana ba hae ’me a fana ka bona e le sehlabelo ho melimo ea bohata. O ile a ba a beha setšoantšo sa molimo oa bohata ka tempeleng ea Jehova e halalelang. Bibele e re ka eena: “A etsa se sebe mahlong a Jehova ka tekanyo e kholo, ho mo siteloa.” (2 Likron. 33:​2-7) Leha ho le joalo, ha Manase a bontša hore o bakile, Jehova o ile a mo tšoarela. (2 Likron. 33:​12, 13) Mohlomong u hopola le Morena Davida ea ileng a etsa libe tse tebileng tse akarelletsang bofebe le ho bolaea. Le eena Jehova o ile a mo tšoarela ha a lumela liphoso tsa hae ebile a baka. (2 Sam. 12:​9, 10, 13, 14) Kahoo, re ka kholiseha hore Jehova o batla ho re tšoarela. w22.06 3 ¶7

Ha se ka linako tsohle ho leng bonolo hore re lule re e-na le tšepo e tiileng. Re ka ’na ra felloa ke tšepo ha re ntse re emetse Molimo hore a phethahatse litšepiso tsa hae. Ke khale Jehova a le teng kahoo nako e ka bonahalang e le telele ho rona, ho eena ke nako e khutšoanyane. (2 Pet. 3:​8, 9) Jehova o tla etsa seo a se tšepisitseng, leha ho le joalo e ka ’na ea se ke ea e-ba ka nako eo rona re e lebeletseng. Ke’ng e ka re thusang hore re lule re e-na le tšepo e tiileng ha re ntse re emetse hore Molimo a etse lintho tseo a li tšepisitseng? (Jak. 5:7) Re lula re le haufi le Jehova e leng eena ea fanang ka tšepo. E le hore re be le tšepo, re lokela ho ba le tumelo ea hore Jehova o teng ’me “o putsa ba mo batlang e le kannete.” (Baheb. 11:​1, 6) Haeba re lumela hore Jehova o teng, re tla kholiseha hore o tla etsa lintho tseo a li tšepisitseng. Re be le tšepo e tiileng. Re lokela ho rapela Jehova ’me re bale Lentsoe la hae. Le hoja re ke ke ra bona Jehova, re ka khona ho atamela ho eena. Re ka bua le eena ka thapelo re kholisehile hore o tla re mamela.—Jer. 29:​11, 12. w22.10 26-27 ¶11-13

Leka ho nahana ka boemo ba Jobo. Oa opeloa ebile o lutse moloreng. (Jobo 2:8) Metsoalle ea hae e mo emelletse ka hore ha se motho ea lokileng ebile e re ha ho letho le molemo leo a kileng a le etsa. Mathata a Jobo a boima haholo hape o ntse a utloile bohloko haholo ka lebaka la ho hlokahalloa ke bana. Qalong Jobo ha a ba arabe. (Jobo 2:13) Haeba metsoalle ea Jobo e ne e nahana hore o thotse hobane a se a batla ho fetohela Jehova, e ne e fositse haholo. Qetellong Jobo o araba metsoalle ena ea hae ea bohata, o re: “Nke ke ka tlosa botšepehi ba ka ho ’na ho fihlela ke shoa!” (Jobo 27:5) Ke eng e ileng ea etsa hore Jobo a be sebete hakaale ’me a tšepahale ho sa tsotellehe mathata a hae? Nakong eo a neng a nyahame haholo, ha aa ka a lahleheloa ke tšepo ea hore Molimo oa hae ea lerato o tla mo imolla. O ne a tseba hore leha a ka shoa, Jehova o tla mo tsosa.—Jobo 14:​13-15. w22.06 22 ¶9

Moetsi oa leholimo le lefatše o re file mpho ea bohlokoa ea hore re mo rapele. Ak’u nahane feela hore re ka khona ho bolella Jehova kamoo re ikutloang kateng ka puo e ’ngoe le e ’ngoe. Re kholisehile hore Ntate oa rona ea lerato o tla re utloa, ebang re bua le eena re le betheng ea sepetlele kapa re le teronkong. Re leboha haholo ka mpho ena. Morena Davida o ne a nka mpho ea ho rapela e le ea bohlokoa. O ile a binela Jehova a re: “E se eka thapelo ea ka e ka lokisoa joaloka libano ka pel’a hao.” (Pes. 141:​1, 2) Mehleng ea Davida libano tse halalelang tseo baprista ba neng ba li sebelisetsa borapeli ba ’nete, li ne li lokisoa hantle. (Ex. 30:​34, 35) Kahoo, Davida o ne a batla ho nahana ka seo a neng a tla se bua ha a rapela Ntate oa hae ea leholimong feela joalokaha libano le tsona li ne li lokisoa hantle. Le rona re batla ho etsa sona seo e le hore Jehova a thabisoe ke lithapelo tsa rona. w22.07 20 ¶1-2; 21 ¶4

Phetetso ke ea Jehova. Jehova ha aa re fa tokelo ea hore re iphetetse haeba motho e mong a re foselitse. (Bar. 12:​20, 21) Kaha ha rea phethahala, ha re khone ho ahlola lintho hantle joaloka Molimo. (Baheb. 4:13) Hape ka linako tse ling re ka nkoa ke maikutlo ’me ha e-ba thata hore re bone lintho ka tsela e nepahetseng. Jehova o ile a susumetsa Jakobo hore a re: “Khalefo ea motho ha e hlahise ho loka ha Molimo.” (Jak. 1:20) Re ka kholiseha hore Jehova o tla etsa ntho e nepahetseng le ho etsa bonnete ba hore toka ea phethahatsoa. Ha re tšoarela batho ba bang, re bontša hore re kholisehile hore Jehova o tla phethahatsa toka. Ha re tlohela lintho matsohong a Jehova, re bontša hore re kholisehile hore Jehova o tla felisa lintho tsohle tse re utloisang bohloko tse bakiloeng ke sebe. Lefatšeng le lecha leo a le tšepisitseng, lintho tse bohloko li “ke ke tsa hopoloa kapa tsa fihla ka pelong.”—Esa. 65:17. w22.06 10 ¶11-12

Ho hlouoa ka tsela ena ke bopaki ba hore Jehova oa re amohela. (Mat. 5:​11, 12) Diabolose ke eena ea etsang hore re hanyetsoe. Empa Jesu o matla haholo ho feta Satane. Kaha Jesu oa re tšehetsa, litaba tse molemo li boleloa ho batho ba lichaba tsohle. Nahana ka bopaki ba sena. Bothata bo bong boo re kopanang le bona ha re bolela ke hore batho ba bua lipuo tse ngata tse fapaneng. Jesu o ile a senolela moapostola Johanne hore mehleng ea rona bothata bona bo ne bo tla hloloa ’me litaba tse molemo li boleloe. (Tšen. 14:​6, 7) Seo se ne se tla etsahala joang? Re fa batho ba bangata kahohle kamoo ho ka khonehang monyetla oa hore ba utloe molaetsa oa ’Muso. Kajeno batho lefatšeng lohle ba ka bala lingoloa tse thehiloeng Bibeleng tse fumanehang websaeteng ea rona ea jw.org kaha e fetoletsoe ka lipuo tse fetang sekete. Sehlopha se Busang se fane ka tumello ea hore ho fetoleloe buka ea U ka Thaba ka ho sa Feleng! ka lipuo tse fetang 700. Buka ena ke eona e ka sehloohong eo re e sebelisang ho etsa batho barutuoa. w22.07 9 ¶6-7

Jesu o ne a utloela batho bohloko. Moapostola Matheu o re: “Ha a bona bongata a bo hauhela, hobane bo ne bo sohlokehile ’me bo qhalakane joaloka linku tse se nang molisa.” (Mat. 9:36) Jehova eena o ikutloa joang? Jesu o ile a re: “Hase ntho e lakatsehang ho Ntate ea leholimong hore e mong oa ba banyenyane bana a timele.” (Mat. 18:14) Mantsoe ana aa re thabisa hobane a bontša hore Jehova o re rata haholo. Lerato la rona ho Jehova le ba matla le ho feta ha re ntse re tseba Jesu haholoanyane. Ntho e ’ngoe e ka u thusang ho ba Mokreste ea tiileng le ho rata Jehova haholo, ke ho qeta nako u e-na le bara le barali babo rona ba matla tumelong phuthehong ea heno. Hlokomela kamoo ba thabileng kateng. Ha ba ikoahlaele qeto ea bona ea ho sebeletsa Jehova. Ba kope hore ba u qoqele lintho tse ba etsahalletseng ha ba ntse ba sebeletsa Jehova. Ba kope hore ba u eletse ha ho e-na le qeto ea bohlokoa eo u lokelang ho e etsa. Hopola hore “ho na le [katleho] ha baeletsi ba le bangata.” w22.08 3 ¶6-7

Kaofela ha rona re hlaheloa ke mathata a itseng. Re ke ke ra sebetsana le ’ona re le bang. Joaloka ntate ea lerato, Jehova o lula a re hlokomela. O lehlakoreng la rona ebile o malala-a-laotsoe ho utloa likopo tsa rona, ho re thusa le ho re tšehetsa. (Esa. 43:2) Re kholisehile hore re ka mamella mathata hobane ka lerato Jehova o re file sohle seo re se hlokang e le hore re ka mamella. O re file monyetla oa hore re bue le eena ka thapelo. O re file Bibele, thuto e ngata e re thusang ho ba le tumelo e matla le lelapa la bara le barali babo rona ba re ratang ho re thusa linakong tse thata. Re motlotlo hore ebe re na le Ntate oa rona ea leholimong ea re hlokomelang. “Lipelo tsa rona li ithabela ho eena.” (Pes. 33:21) Re ka bontša hore re ananela lerato leo Jehova a re bontšang lona ka ho sebelisa lintho tsohle tseo a re fang tsona ho re thusa. Re boetse re lokela ho etsa sohle se matleng a rona hore re lule re le metsoalle ea Jehova. Ha re etsa sohle seo re ka se khonang ho mamela Jehova le ho etsa lintho tse nepahetseng, o tla lula a re hlokomela ka ho sa feleng. w22.08 13 ¶15-16

Batho ba bangata mehleng ena ha ba tsebe hore na ba ka tšepa mang. Baa ipotsa hore na batho bao ba ba hlomphang ba kang bo-ralipolotiki, bo-rasaense le bo-rakhoebo ehlile ba etsa sohle ho ba etsetsa lintho tse molemo ka linako tsohle. Ho feta moo, ha ba hlomphe baeta-pele ba bolumeli ba reng ke Bakreste. Kahoo, ha ho makatse hore ebe ha ba tšepe buka eo baeta-pele ba bolumeli ba reng baa e sebelisa e leng Bibele. Batho bohle ba Jehova ba kholisehile hore ke “Molimo oa ’nete” le hore o re batlela se molemo. (Pes. 31:5; Esa. 48:17) Rea tseba hore re ka tšepa Bibele. Re lumellana le seo setsebi se seng sa Bibele se ileng sa se bua ha se re: “Ha ho mohla Molimo a buang leshano ebile ntho e ’ngoe le e ’ngoe eo a e buang ea phethahala. Batho ba Molimo ba tšepa seo a se buang hobane baa mo tšepa.” w23.01 2 ¶1-2

Re haha Bakreste-’moho le rona ha re matlafatsa tumelo eo ba nang le eona ho Jehova. Bakreste ba bang ba songoa ke batho bao eseng Lipaki. Ba bang ba kula haholo kapa ba ntse ba utloisitsoe bohloko ke lintho tse ba hlahetseng. Ha ba bang bona e se e le nako e telele ba emetse hore lefatše lena le felisoe. Bakreste ba mehleng ea baapostola ba ile ba hlaheloa ke mathata a kang ana ’me le mehleng ena mathata ao a ka leka tumelo ea Bakreste-’moho le rona. Moapostola Pauluse o ile a matlafatsa tumelo ea Bakreste-’moho le eena a sebelisa Mangolo. Ka mohlala, e ka ’na eaba Bakreste ba Bajuda ba ne ba sa tsebe hore na ba re’ng ho ba lelapa bao e neng e se Bakreste ba neng ba re Bojuda bo phahametse Bokreste. Ha ho pelaelo hore lengolo leo Pauluse a neng a le ngolletse Baheberu le ile la matlafatsa Bakreste bao haholo. (Baheb. 1:​5, 6; 2:​2, 3; 9:​24, 25) Ba ne ba ka sebelisa tsela eo Pauluse a neng a beha mabaka ka eona ho araba batho ba neng ba ba qosa. w22.08 23-24 ¶12-14

Batho ba lefatše lena la Satane ha ba tsebe hore na ba lokela ho tšepa mang. Ba lula ba soetsoa ke boitšoaro ba bo-rakhoebo, bo-ralipolotiki le baeta-pele ba bolumeli. Taba ena e etsa hore ba qetelle ba sa tšepe metsoalle, baahisane hammoho le ba malapa a bona. Sena ha sea lokela ho re makatsa. Bibele e ile ea bolela esale pele ea re: “Matsatsing a ho qetela . . . , batho e tla ba . . . ba sa tšepahaleng, . . . baetselletsi, . . . baeki.” Taba ena e bolela hore batho ba ne ba tla ba joaloka Satane e leng molimo oa tsamaiso ena ea lintho ea ke keng a tšeptjoa. (2 Tim. 3:​1-4; 2 Bakor. 4:4) Rea tseba hore re lokela ho tšepa Jehova ka ho felletseng kaha re Bakreste. Re kholisehile hore oa re rata le hore a “ke ke a tlohela” metsoalle ea hae. (Pes. 9:10) Re ka boela ra tšepa Jesu Kreste hobane o fane ka bophelo ba hae bakeng sa rona. (1 Pet. 3:18) Re boetse re bone bophelong ba rona hore Bibele e fana ka tataiso e tšepahalang.—2 Tim. 3:​16, 17. w22.09 2 ¶1-2

Ho thaba ha se boikutlo feela bo tlang bo feta. Motho a ka khona ho thaba bophelo bohle ba hae. Ke eng e ka re thusang hore re thabe? Thutong ea Thabeng, Jesu o ile a re: “Ho thaba ba hlokomelang hore ba hloka Molimo.” (Mat. 5:3) Jesu o ne a tseba hore batho ba bopiloe ka tsela e tla etsa hore ba batle ho tseba le ho sebeletsa ’Mopi oa bona Jehova Molimo. Ha ba etsa joalo ke hona ha ba ‘hlokomela hore ba hloka Molimo.’ Kaha Jehova ke “Molimo ea thabileng” le batho ba mo sebeletsang le bona ba ka thaba. (1 Tim. 1:11) Na re ka thaba feela ha re se na mathata? Che. Thutong ea Thabeng, Jesu o ile a re le batho ba utloileng bohloko ba ka thaba. O ile a boela a re batho “ba hlorisitsoeng ka lebaka la ho loka.” (Mat. 5:​4, 10, 11) Jesu o ne a re ruta hore ho thaba ha hoa itšetleha ka maemo a rona empa re ka thaba ha re sebeletsa Molimo leha re e-na le kamano e ntle le eena.—Jak. 4:8. w22.10 6 ¶1-3

Ho ba le temoho ho tla re thusa ho tseba “nako ea ho khutsa le nako ea ho bua.” (Moek. 3:7) Ho na le maele a tloaelehileng litsong tse ling a reng: “Ho bua ke silevera empa ho thola ke khauta.” Sena se bolela hore ho molemo ho thola ho feta ho bua. Nahana ka mohlala ona. Ho na le moholo ea nang le boiphihlelo ea kopuoang hangata hore a thuse liphutheho tse ling ka mathata a tsona. Hlokomela seo moholo e mong a ileng a se bua ka eena. O ile a re: “O lula a le hlokolosi hore a se ke a bua lintho tseo batho ba bang ba sa lokelang ho li tseba ka liphutheho tseo.” Ho ba le temoho ha moholo eo ho ile ha mo thusa ho ikhapela tlhompho ho tsoa ho baholo-’moho le eena phuthehong ea habo. Baa tseba hore a ke ke a bua litaba tsa baholo ho batho ba bang. Ho bua ’nete ho bohlokoa e le hore batho ba re tšepe. Re ka tšepa motho ea buang ’nete hobane o bontša hore oa tšepahala.—Baef. 4:25; Baheb. 13:18. w22.09 12 ¶14-15

Batho ba bangata baa iphapanya ha bohlale ba ’nete “bo hoeletsa seterateng.” (Liprov. 1:20) Bibele e bua ka lihlopha tse tharo tsa batho ba iphapanyetsang bohlale bona e leng “ba se nang tsebo,” “basomi” le “ba se nang kelello.” (Liprov. 1:​22-25) Batho “ba se nang tsebo” ba lumela ntho e ’ngoe le e ’ngoe eo batho ba e buang ’me ba thetseha habonolo. (Liprov. 14:15) Ka mohlala, nahana ka batho ba limilione ba thetsoang ke baeta-pele ba bolumeli le ba lipolotiki. Ba bang baa makala ha ba elelloa hore baeta-pele ba bolumeli le ba lipolotiki ba ba thetsitse. Empa batho bao ho buuoeng ka bona ho Liproverbia 1:22 ba ikhethela ho lula ba le lefifing. (Jer. 5:31) H a ba batle ho ithuta hore na Bibele e re’ng kapa ho mamela melao ea eona. Ho hang ha re batle ho etsisa mofuta ona oa batho o ikhethelang ho se mamele.—Liprov. 1:32; 27:12. w22.10 19 ¶5-7

Mokhatlo oa Molimo o re fa litaelo tse re thusang hore re lule re sireletsehile. Re lula re khothaletsoa hore re fe baholo linomoro tsa rona e le hore ba tle ba re letsetse ha ho hlaha boemo ba tšohanyetso. Re ka ’na ra fuoa litaelo tsa hore re lule sebakeng se itseng kapa re tlohe sebakeng se itseng kapa litaelo tsa hore na re ka fumana liphallelo joang kapa hore na re thuse batho ba bang joang. Ha re sa mamele litaelo tseo re ka ’na ra beha bophelo ba rona le ba baholo ba lulang ba re hlokometse kotsing. (Baheb. 13:17) Bara le barali ba bo rona ba bangata ba ileng ba tlameha ho tloha malapeng a bona ka lebaka la likoluoa kapa lintoa, ba lekile ho tloaela maemo a macha ’me ba sebeletsa Jehova haholoanyane. Ba etsisa Bakreste ba khale ba neng ba “bolela litaba tse monate tsa lentsoe la Molimo” le hoja ba ne ba hasane ka lebaka la mahloriso. (Lik. 8:4) Ho ruta batho Bibele ho ba thusa hore ba nahane ka ’Muso oa Molimo ho e-na le ho nahana ka mathata a bona. Ka lebaka leo ba lula ba thabile ’me ba e-na le khotso. w22.12 19 ¶12-13

Jehova o nka e mong le e mong oa rona e le oa bohlokoa. Pele Jesu a romela baapostola ba hae hore ba e’o bolela, o ile a ba thusa hore ba se ke ba tšaba batho ba tla ba hanyetsa. (Mat. 10:​29-31) O ile a etsa sena ka hore a ba bolelle ka linonyana tse neng li tloaelehile Iseraele e leng lirobele. Linonyana tseo e ne e se tsa bohlokoa mehleng ea Jesu. Empa o ile a re ho barutuoa ba hae: “Ha ho le se le seng sa tsona se tla oela fatše Ntate oa lona a sa tsebe.” O ile a boela a re: “Le bohlokoa ho feta lirobele tse ngata.” Kahoo, Jesu o ile a kholisa barutuoa ba hae hore Jehova o nka e mong le e mong oa bona e le oa bohlokoa. Kahoo, ba ne ba sa lokela ho tšaba batho ba ba hlorisang. Barutuoa ba Jesu ba ne ba tla hopola mantsoe a hae ha ba bona lirobele ba ntse ba bolela metseng le metsaneng. Nako le nako ha u bona nonyana e nyenyane, hopola hore Jehova o u nka u le motho oa bohlokoa hobane le uena u oa “bohlokoa ho feta lirobele tse ngata.” Jehova a ka u thusa ha batho ba bang ba u hanyetsa. w23.03 18 ¶12

Ka linako tse ling re ba le mathata a kang ho hanyetsoa ke ba lelapa kapa ho felloa ke mosebetsi. Ha re hlaheloa ke mathata nako e telele, re ka ikutloa re nyahame re bile re se na tšepo. Nakong eo, Satane o nka monyetla ebe o etsa hore re utloe eka Jehova ha a re rate. Diabolose o batla hore re nahane hore re bakeloa mathata ke Jehova le mokhatlo oa hae. Baiseraele ba ile ba etsahalloa ke ntho e kang ena ha ba le Egepeta. Qalong ba ne ba lumela hore Jehova o khethile Moshe le Arone ho ba lopolla bokhobeng. (Ex. 4:​29-31) Empa eitse ha Faro a ba tšoara ka thata, ba beha Moshe le Arone molato bakeng sa mathata a bona. (Ex. 5:​19, 20) Ke ntho e utloisang bohloko hakaakang hore ebe ba ile ba beha bahlanka ba tšepahalang ba Molimo molato bakeng sa mathata a bona! Haeba u mameletse mathata nako e telele, rapela Jehova u mo phetlele sefuba ’me u itšetlehe ka eena. w22.11 15 ¶5-6

Jehova ke Mofani oa bophelo ’me o na le matla a ho tsosa bafu. O ile a fa moprofeta Elia matla a ho tsosa mora oa mohlolohali oa Sarepta. (1 Mar. 17:​21-23) Hamorao Molimo o ile a thusa moprofeta Elisha ho tsosa mora oa mosali oa Moshuneme. (2 Mar. 4:​18-20, 34-37) Mehlala eo le e meng e bontša hore Jehova o na le matla a ho tsosa bafu. Ha Jesu a ne a le lefatšeng, o ile a bontša hore Ntate oa hae o mo file matla ao a ho tsosa bafu. (Joh. 11:​23-25, 43, 44) Hona joale Jesu o leholimong ’me o “filoe matla holim’a ntho e ’ngoe le e ’ngoe e leholimong le lefatšeng.” Kahoo, a ka khona ho phethahatsa tšepiso ea hore “bohle ba mabitleng” ba tla tsosoa ba e-na le monyetla oa ho phela ka ho sa feleng.—Mat. 28:18; Joh. 5:​26-29. w22.12 5 ¶10

Ha Baiseraele ba ne ba hana ho mamela Ezekiele, ho ne ho tšoana le ha ba hana ho mamela Jehova. Mantsoe a temana ea letsatsi ea kajeno a ile a kholisa Ezekiele hore le hoja batho ba ne ba sa batle ho mo mamela, seo se ne se sa bolele hore ha aa ka a etsa mosebetsi oa hae hantle. Jehova o ile a kholisa Ezekiele hore batho “ba tla tseba hore kannete moprofeta o ne a le teng har’a bona” ha likahlolo tseo a ba bolelletseng tsona li phethahala. (Ezek. 2:5; 33:33) Ha ho pelaelo hore mantsoe ao a khothatsang a ile a matlafatsa Ezekiele hore a tsoele pele ka mosebetsi oa hae. Re na le sebete sa ho ruta batho Bibele hobane rea tseba hore Jehova ke eena ea re rommeng. Oa re tlotla ka hore ebe o re bitsa “lipaki” tsa hae. (Esa. 43:10) Ona ke monyetla o babatsehang. Joalokaha Jehova a ile a re ho Ezekiele: “U se ke oa tšaba.” Le ho rona o re: “Le se ke la tšoha.” (Ezek. 2:6) Ke hobane’ng ha re sa lokela ho tšaba bahanyetsi ba rona? Hobane joaloka Ezekiele re ronngoe ke Jehova hape oa re tšehetsa.—Esa. 44:8. w22.11 3-4 ¶4-5

Mehleng ena re ananela baholo le bahlanka ba sebeletsang ba tšepahalang. Re ananela hore ebe bara bana ba bo rona ba tšepahalang ba re thusa ho ba metsoalle ea Jehova ’me re leboha Jehova ka ho re fa bona. Empa ke ka litsela life re ka bontšang hore rea tšepahala? Re rata bara le barali ba bo rona ’me re amehile ka bona. Leha ho le joalo, ha rea lokela ho ba phenya-phenya le ho batla ho tseba ntho e ’ngoe le e ’ngoe ka bona. Bakreste ba bang lekholong la pele la lilemo ba ne ba ‘kena-kenana le litaba tsa batho ba bang, ba bua ka lintho tseo ba sa tšoanelang ho bua ka tsona.’ (1 Tim. 5:13) Kannete ha re batle ho tšoana le bona. A re re mohlomong motho e mong o u bolella bothata boo a sa batleng hore u bo bolelle batho ba bang. Ka mohlala, morali oabo rona a ka ’na a re bolella boloetse bo mo tšoereng kapa bothata bo bong boo a tobaneng le bona ’me a re kopa hore ho se ke ha e-ba le motho eo re mo bolellang. Re lokela ho hlompha maikutlo a hae. w22.09 10 ¶7-8

Poleloana ea Segerike e fetoletsoeng e le ‘ho fetola tsela eo le nahanang ka eona’ e ka boela ea bolela ho lokisa tsela eo re nahanang ka eona joalokaha motho a nchafatsa ntlo. Sena se bolela hore ha rea lokela ho etsa lintho tse seng kae feela tse ntle. Ho e-na le hoo, re lokela ho itseba hantle hore na re batho ba joang ’me re etse liphetoho tse hlokahalang e le hore re ka mamela melao ea Jehova kahohle kamoo re ka khonang. Re lokela ho etsa sena kamehla eseng hanngoe feela. Ha re se re phethahetse, re tla lula re etsa lintho tse khahlisang Jehova nthong e ’ngoe le e ’ngoe eo re e etsang. Empa hona joale ha re ntse re emetse nako eo, re lokela ho sebetsa ka thata hore re khahlise Jehova. Ho Baroma 12:​2, Pauluse o re re lumelle Molimo hore a fetole tsela eo re nahanang ka eona e le hore re tsebe hore na thato ea hae ke efe. Ho e-na le ho lumella lefatše hore le susumetse tsela eo re etsang lintho ka eona, re lokela ho itlhahloba e le hore re bone hore na liqeto tseo re li etsang le lintho tseo re li labalabelang li susumetsoa ke Molimo kapa ke lefatše lena. w23.01 8-9 ¶3-4

Na Jehova o laola lintho tsohle tse re hlahelang? Na o etsa hore re hlaheloe ke lintho tse mpe e le hore qetellong li re tsoele molemo? Che, ha se seo Bibele e se rutang. (Moek. 8:9; 9:11) Empa ntho eo re e tsebang ke hore Jehova oa bona ha re hlaheloa ke mathata ebile oa utloa ha re kopa thuso. (Pes. 34:15; Esa. 59:1) Hape Jehova a ka re thusa hore re mamelle ha re e-na le mathata. A ka re thusa joang? Tsela e ’ngoe eo Jehova a re thusang ka eona ke ka ho re tšelisa le ho re khothatsa ka nako e nepahetseng. (2 Bakor. 1:​3, 4) Na u ntse u hopola nako eo Jehova a ileng a u thusa ka ho u tšelisa le ho u khothatsa ka nako e nepahetseng? Hangata re bona tsela eo Jehova a re thusitseng ka eona ha mathata a rona a se a fetile. w23.01 17-18 ¶13-15

Sebata sena se batla se tšoana le sebata se lihlooho li supileng empa sona se ’mala o sekareleta. Se bitsoa “setšoantšo sa sebata” hape se hlalosoa e le “morena oa borobeli.” (Tšen. 13:​14, 15; 17:​3, 8) Johanne o ile a ithuta hore “morena” enoa o ile a ba teng, a nyamela, a boela a ba teng hape. Tlhaloso ee e lumellana hakaakang le se ileng sa etsahala ka mokhatlo oa Machaba a Kopaneng, o etelletsang pele lithahasello tsa mebuso ea lefatše ea lipolotiki! Pele, mokhatlo ona o ne o bitsoa Selekane sa Lichaba eaba oa nyamela nakong ea Ntoa ea Bobeli ea Lefatše. Hamorao o ile oa hlaha hape e se e le Machaba a Kopaneng. Libata tsena kapa mebuso, li sebelisa mashano ho susumeletsa batho hore ba hanyetse Jehova le bahlanka ba hae. Johanne o itse ho tšoana leha mebuso ena e bokellela “marena a lefatše lohle leo ho ahiloeng ho lona” ntoeng ea Armagedone, e leng “letsatsi le leholo la Molimo ea Matla ’Ohle.”—Tšen. 16:​13, 14, 16. w22.05 10 ¶10-11

Ha Jesu a ne a ithuta ho bala Mangolo a Halalelang a le mong, ha aa ka a tseba Mangolo feela empa o ile a boela a a rata ’me a lumella hore a susumetse tsela eo a etsang lintho ka eona. Ka mohlala, hopola hore na ho ile ha etsahala’ng ka tempeleng ha Jesu a le lilemo li 12. Mesuoe e neng e tseba Molao oa Moshe hantle, e ne e “makatsoa ke likarabo tsa [Jesu] le hore o tseba lintho tse ngata.” (Luka 2:​46, 47, 52) Ka tsela e tšoanang, le rona re ka tseba le ho rata Lentsoe la Molimo haeba re le bala kamehla. Re tla ithuta ho seo Jesu a ileng a se bua ho batho ba neng ba tseba Molao e leng bakopitsi, Bafarisi le Basaduse. Hangata baeta-pele bao ba bolumeli ba ne ba bala Mangolo empa a ne a sa ba tsoele molemo. Jesu o ile a bua ka lintho tse tharo tseo banna bana ba neng ba lokela ho li etsa e le hore lintho tseo ba li balang Mangolong li ba tsoele molemo. Mantsoe ao a ileng a ba bolella ’ona a ka re thusa hore re ntlafatse bokhoni ba rona ba (1) ho utloisisa seo re se balang, (2) ho fumana lithuto tsa bohlokoa le (3) ho lumella Lentsoe la Molimo hore le re fetole. w23.02 8-9 ¶2-3

Tse ling tsa lintho tse kotsi tseo re lokelang ho li qoba li akarelletsa ho bapala ka maikutlo a motho oa bong bo fapaneng ka ho etsa lintho tse ka etsang hore a nahane hore rea mo rata, ho noa haholo, ho ja ho tlola, ho bua lintho tse utloisang batho ba bang bohloko, ho shebella lintho tse nang le ntoa, pornography le lintho tse ling tse kang tseo. (Pes. 101:3) Diabolose o lula a batla menyetla ea ho senya setsoalle sa rona le Jehova. (1 Pet. 5:8) Haeba re se hlokolosi, Satane a ka re susumetsa hore re be le mekhoa e mebe e kang mohono, ho se tšepahale, meharo, lehloeo, boikakaso le bohale. (Bagal. 5:​19-21) Haeba re sa potlakele ho tlohela mekhoa ena, e ka hola kapele joaloka lehola eaba e re bakela mathata. (Jak. 1:​14, 15) Kotsi e ’ngoe e poteletseng ke ho tloaelana le batho ba etsang lintho tse mpe. Re lokela ho hopola hore ho ka ba bonolo hore re iphumane re etsa lintho joaloka batho bao re qetang nako re e-na le bona. (1 Bakor. 15:33) Re tla be re itlhokomela haeba re qoba ho tloaelana le batho ba sa pheleng ka melao-motheo ea Jehova. (Luka 21:34; 2 Bakor. 6:15) Re tla bona kotsi ebe rea e qoba. w23.02 16 ¶7; 17 ¶10-11

U ile oa rata Jehova le ho feta ha u ntse u ithuta ka eena. E tlameha ebe u batla ho lula u atamela haufi le eena hona joale le ka ho sa feleng. U ka khona. Ka mosa o u khothaletsa hore u thabise pelo ea hae. (Liprov. 23:​15, 16) U ka mo thabisa ka mantsoe le ka liketso. Tsela eo u phelang ka eona e tla bontša hore u hlile u rata Jehova. Ho phela ka tsela eo ke ntho e molemo ka ho fetisisa eo u ka khethang ho e etsa. U ka bontša joang hore u rata Jehova? Ntho ea pele eo u lokelang ho e etsa ke hore u rapele Molimo oa ’nete u inehele ho eena. (Pes. 40:8) Ea bobeli ke hore u bontše batho ba bang hore u inehetse ka hore u kolobetsoe. Ho kolobetsoa ke ntho ea bohlokoa ka ho fetisisa le e thabisang haholo. U qala bophelo bo bocha u se u sa iphelele empa u phelela Jehova. (Bar. 14:8; 1 Pet. 4:​1, 2) U ka ’na oa utloa eka ho kolobetsoa ke mohato o moholo haholo ’me ehlile ho joalo. Empa ho u fa monyetla oa ho phela bophelo bo molemo ka ho fetisisa. w23.03 5-6 ¶14-15