October

Kaofela ha rona re ka khona ho nka karolo ha re le libokeng ka hore re bine le ho fana ka likarabo tse lokiselitsoeng hantle. Batho ba bang ba thatafalloa ke ho bina kapa ho arabela libokeng. Na le uena oa thatafalloa? Haeba ho joalo, ithute hore na batho ba bang ba ile ba thusoa ke’ng hore ba se ke ba tšaba ho bina kapa ho arabela libokeng. Batho ba bang ba hlokometse hore ho bina ho tsoa pelong hoa thusa. Lebaka le ka sehloohong leo ka lona re binang lipina tsa ’Muso libokeng ke ho rorisa Jehova. Kahoo, ha u lokisetsa liboka, u lokisetse le lipina. Leka ho bona hore na mantsoe a tsona a amana joang le lintlha tse tla tšohloa libokeng. Hape u amehe haholo ka mantsoe a pina ho e-na le ho tšoenyeha ka hore na u tseba ho bina kapa che. Batho ba bang ba thatafalloa ke ho arabela libokeng. Ba ka thusoa ke’ng? Ke ho leka ho arabela kamehla. U lule u hopola hore ha ho na bothata ha karabo ea hao e le khutšoanyane ebile e le e tobang taba. Jehova o ananela boiteko boo re bo etsang ba ho mo rorisa libokeng. w22.04 7-8 ¶12-15

Lentsoe “mothusi” le bolela motho ea potlakelang ho e’o thusa motho e mong ea kopang thuso. Ak’u nahane Jehova a potlakela ho e’o thusa motho e mong ea mathateng. Taba ena ea re kholisa hore Jehova o ikemiselitse ho re thusa. Ha Jehova a re thusa re ka khona ho mamella mathata re thabile. Tse ling tsa litsela tseo Jehova a re thusang ka tsona hore re mamelle mathata ke life? Ho fumana karabo ea potso ena, a re baleng lengolo la Esaia. Hobane’ng? Hobane boholo ba lintho tseo Jehova a ileng a susumetsa Esaia hore a li profete li sebetsa le ho bahlanka ba Hae ba mehleng ena. Hangata ha Esaia a hlalosa Jehova o sebelisa mantsoe ao ho leng bonolo ho a utloisisa. Esaia khaolo ea 30 e na le e meng ea mehlala ea sena. Khaolong eo, Esaia o sebelisa mehlala e bonolo ho hlalosa hore na Jehova o thusa bahlanka ba hae joang. O ile a re Jehova o re thusa ka hore (1) a mamele ka hloko ha re rapela le ho arabela lithapelo tsa rona, (2) a re fe likeletso le ka (3) litlhohonolofatso tseo a re fang tsona hona joale le tsa nakong e tlang. w22.11 8 ¶2-3

Melaetseng ea Jesu e eang phuthehong ea Smyrna le ea Filadelfia, o ile a bolella Bakreste ba moo hore ba se ke ba tšaba ho hlorisoa hobane Jehova o tla ba putsa haeba ba lula ba tšepahala. (Tšen. 3:10) Re tlameha ho lebella hore re tla hlorisoa ’me re ikemisetse ho mamella. (Mat. 24:​9, 13; 2 Bakor. 12:10) Lengolo la Tšenolo lea re bolella hore bahlanka ba Molimo ba ne ba tla hlorisoa “letsatsing la Morena,” e leng mehleng ena eo re phelang ho eona. (Tšen. 1:10) Tšenolo khaolo ea 12 e re bolella hore ho ile ha e-ba le ntoa leholimong hang-hang ka mor’a hore Jesu e be Morena oa ’Muso oa Molimo. Mikaele, e leng Jesu Kreste ka mor’a hore a khutlele leholimong, hammoho le mangeloi a hae, ba ile ba loantša Satane le bademona. (Tšen. 12:​7, 8) Ntoa ena e ile ea fella ka hore lira tsena tsa Molimo li hloloe ’me li lahleloe lefatšeng moo li baketseng batho mathata a mangata.—Tšen. 12:​9, 12. w22.05 5 ¶12-13

Jehova o lula a ahlola ka toka ebile ha a na khethollo. Ha ho mohla a tšoarelang motho hobane a le motle, a ruile, e le motho ea hlaheletseng kapa a e-na le litalenta. (1 Sam. 16:7; Jak. 2:​1-4) Ha ho na motho ea ka fang Jehova tjotjo kapa a mo qobella ho etsa ntho leha e le efe. Ha ho mohla Jehova a etsang liqeto a halefile. (Ex. 34:7) Kannete Jehova ke Moahloli ea molemohali hobane o tseba lintlha kaofela. (Deut. 32:4) Bangoli ba Mangolo a Seheberu ba ne ba hlokomela hore Jehova o tšoarela ka tsela e fapaneng le ea batho. Maemong a mang, ba sebelisitse lentsoe la Seheberu leo buka e ’ngoe e reng “le ne le sebelisoa feela ho hlalosa tsela eo Molimo a tšoarelang baetsalibe ka eona. Lentsoe leo ha le hlalose tsela eo batho ba tšoarelanang ka eona.” Jehova ke eena feela ea nang le matla a ho tšoarela moetsalibe ea bakileng ka ho feletseng. w22.06 4 ¶10-11

Haeba u holisa bana u se na molekane kapa uena le molekane oa hao ha le bolumeling bo le bong, kholiseha hore mohlala oa hao o matlafatsa batho ba bang ebile oa ba susumetsa. U ka etsa joang haeba ho bonahala eka boiteko ba hao ba ho thusa ngoana oa hao ha bo atlehe? Hopola hore ho ruta ngoana ho nka nako. Ha u jala peo ka linako tse ling u ka ipotsa hore na e tla hola e be e behe litholoana. Le hoja u ke ke oa etsa hore semela se behe litholoana, u tsoela pele u se nosetsa e le hore se tle se hole. (Mar. 4:​26-29) Ka tsela e tšoanang, ka linako tse ling ’mè a ka ’na a ipotsa hore na boiteko ba hae ehlile bo thusa bana ba hae ho rata Jehova. U ke ke oa etsetsa bana ba hao liqeto. Empa ha u tsoela pele ho etsa sohle seo u ka se khonang ho ba ruta, u ba fa monyetla oa hore e be metsoalle ea Molimo. w22.04 19-20 ¶16-17

Ha Solomone a ntse a sebeletsa Jehova o ne a sa nke hore o bohlokoa ho feta batho ba bang. Ha e ntse e le mocha, o ne a utloisisa hore ho na le lintho tseo a sa khoneng ho li etsa ’me o ne a kopa keletso ho Jehova. (1 Mar. 3:​7-9) Ha Solomone a ne a qala ho busa o ne a tseba kotsi e ka bakoang ke ho ikhohomosa. Ka masoabi, hamorao Solomone ha aa ka a sebelisa keletso eo ea hae. Nakoana ka mor’a hore e be morena, o ile a ikhohomosa ’me a qala ho se mamele melao ea Molimo. Ka mohlala, molao o mong o ne o re morena oa Moheberu ha aa lokela ho “ikekeletsa basali, hore pelo ea hae e se ke ea kheloha.” (Deut. 17:17) Solomone ha aa ka a mamela molao oo eaba o ba le basali ba 700 le lirethe tse 300. (1 Mar. 11:​1-3) Mohlomong Solomone o ne a nahana hore taba eo e ke ke ea mo bakela mathata. Leha ho le joalo, o ile a etsahalloa ke lintho tse bohloko ka lebaka la ho se mamele Jehova.—1 Mar. 11:​9-13. w22.05 23 ¶12

Mehleng ena batho ba tlameha ho etsa qeto ea bohlokoa. Ba tlameha ho khetha hore na ba tla tšehetsa Jehova Molimo ea nang le tokelo ea ho busa kapa ba tla latela sera sa hae se sehloho e leng Satane Diabolose. Ha ba na mokhoa oa ho ema terateng. Qeto leha e le efe eo ba tla e etsa, e tla ama bokamoso ba bona. (Mat. 25:​31-33, 46) Nakong ea ‘matšoenyeho a maholo,’ ba tla lokela ho tšoaeloa pholoho kapa timetso. (Tšen. 7:14; 14:​9-11; Ezek. 9:​4, 6) Haeba u khethile ho tšehetsa bobusi ba Jehova, u entse qeto e bohlale. Joale u batla ho thusa batho ba bang hore le bona ba etse qeto e nepahetseng. Jehova o tla putsa batho ba tšehetsang bobusi ba hae ka botšepehi. Re tlameha ho ithuta litaba tsena tsa bohlokoa. Ho etsa joalo ho tla re thusa hore re ikemisetse le ho feta ho tsoela pele ho sebeletsa Jehova. Ho feta moo, re ka sebelisa lintho tseo re ithutileng tsona ho thusa batho ba bang hore ba khethe ho sebeletsa Jehova le hore ba tsoele pele ho mo sebeletsa. w22.05 15 ¶1-2

Re lokela ho mamela Jehova eseng lira tsa rona. Jobo o ne a mametse ka hloko ha Jehova a bua le eena. Molimo o ile a botsa Jobo lipotso tse ileng tsa mo thusa ho bona kamoo a mo tsotellang kateng. Jobo o ile a araba Jehova a ikokobelitse ’me a bontša hore o ananela lintho tse molemo tseo a mo etselitseng tsona. O ile a re: “Ke utloile ka uena ka monyenyetsi empa joale leihlo la ka lea u bona.” (Jobo 42:5) Mohlomong ha Jobo a ne a bua mantsoe ao, o ne a ntse a lutse moloreng, ’mele oa hae o tletse liso. Ho ntse ho le joalo, Jehova o ile a bontša Jobo hore oa mo rata a ba a mo kholisa hore o ntse a mo amohela. (Jobo 42:​7, 8) Le mehleng ena batho ba ka re soma le ho re tšoara joalokaha eka ha re na thuso. Ba ka ’na ba leka ho senya botumo ba rona kapa ba bua hampe ka mokhatlo oa rona. Paleng ea Jobo, re ithuta hore Jehova o kholisehile hore re ka lula re mo tšepahalla leha re thulana le mathata. w22.06 23-24 ¶15-16

Le hoja ho tla ba le thabo e kholo leholimong ha Babylona e Moholo e timetsoa, ho na le ntho e ’ngoe hape e tla tlisa thabo le ho feta. (Tšen. 19:​1-3) Ha e le hantle, ke ketsahalo ea bohlokoa ka ho fetisisa e tlalehiloeng lengolong la Tšenolo. Ketsahalo eo ke “lenyalo la Konyana.” Ba 144 000 kaofela ba tla be ba le leholimong pele ntoa ea Armagedone e qala. Leha ho le joalo, eo e tla be e e-s’o be nako ea lenyalo la Konyana. (Tšen. 21:​1, 2) Lenyalo la Konyana le tla ba ka mor’a ntoa ea Armagedone ha lira tsohle tsa Molimo li se li felisitsoe. (Pes. 45:​3, 4, 13-17) Lenyalo la Konyana le bolela’ng ho ba amehang? Joalokaha lenyalo le kopanya monna le mosali, lenyalo la Konyana le kopanya Morena Jesu Kreste le “monyaluoa” oa hae e leng ba 144 000. Ketsahalo eo ea bohlokoa e tla etsa hore ho be le ’Muso o tla busa lefatše ka lilemo tse sekete.—Tšen. 20:6. w22.05 17 ¶11-13

Jesu o ile a bolela esale pele hore matsatsing a ho qetela, o tla khetha “lekhoba le tšepahalang le le masene” ho fa balateli ba hae koetliso e tsoang Lentsoeng la Molimo. (Mat. 24:45) Sena ke sona se hlileng se etsahalang. Moeta-pele oa rona Jesu o sebelisa sehlopha sena se senyenyane sa bara ba bo rona ba tlotsitsoeng ho fa batho ba Molimo le ba bang ba thahasellang ‘lijo ka nako e tšoanetseng.’ Bara bana ba bo rona ha ba nke hore ba lokela ho laola tumelo ea batho ba bang. (2 Bakor. 1:24) Ho e-na le hoo, ba nka Jesu Kreste e le eena “moeta-pele le molaoli” oa batho ba hae. (Esa. 55:4) Ho tloha ka 1919, haesale lekhoba le tšepahalang le hatisa lingoliloeng tse fapa-fapaneng ho fa batho ba qalang ho ithuta monyetla oa ho tseba ’nete e ka Lentsoeng la Molimo. Ka 1921, lekhoba le tšepahalang le ile la lokolla buka ea The Harp of God ho thusa batho ba thahasellang e le hore ba ithute lithuto tsa motheo tsa Bibele. Ha mehla e ntse e fetoha, ho ile ha lokolloa lingoloa tse ling. Uena ke sengoliloeng sefe se u thusitseng ho tseba le ho rata Ntate oa rona ea leholimong? w22.07 10 ¶9-10

Jehova ke motho ea fanang ka ho fetisisa. Ho sa tsotellehe hore na u mo fa eng, o tla lula a u buseletsa haholo ho feta kamoo u mo fileng. (Mar. 10:​29, 30) Le lefatšeng lena le khopo, o tla u fa bophelo bo monate le bo khotsofatsang ka ho fetisisa. Hona e sa le linyane feela. U ka khona ho sebeletsa Ntate oa hao eo u mo ratang ka ho sa feleng. Lerato leo uena le Ntate oa hao le ratanang ka lona le tla tsoela pele ho eketseha. U tla phela ka ho sa feleng joaloka eena. Ha u inehela ebile u kolobetsoa, u ba le monyetla oa ho fa Ntate oa hao ntho ea bohlokoahali. O u file lintho tsohle tse molemo le linako tsohle tse monate tseo u kileng oa li thabela. Le uena ha u sebeletsa Jehova ka pelo eohle, u tla be u mo fa ntho ea bohlokoa haholo. (Jobo 1:8; 41:11; Liprov. 27:11) Ena ke tsela e molemo ka ho fetisisa ea ho phela. w23.03 6 ¶16-17

Ha u kena lilemong tsa bocha, takatso ea ho etsa thobalano e ka ba matla haholo. Ka linako tse ling batho ba bang ba ka u phehella hore u etse boitšoaro bo bobe. Satane o batla hore u inehele litakatsong tsena. U ka thusoa ke eng hore u lule u hloekile boitšoarong? (1 Bathes. 4:​3, 4) Ha u rapela moo u leng mong, bolella Jehova kamoo u ikutloang kateng ’me u mo kope hore a u matlafatse. (Mat. 6:13) Hopola hore Jehova u batla ho u thusa eseng ho u ahlola. (Pes. 103:​13, 14) U se ke oa leka ho itharollela mathata a hao u le mong. Bua le batsoali ba hao. Ho ka ba thata ho bua ka litaba tsena empa ke habohlokoa ho etsa joalo. Ha u bala Bibele ebile u nahanisisa ka seo u se balang ho tla ba bonolo ho uena hore u etse liqeto tse thabisang Jehova. U tla hlokomela hore ha u hloke molao bakeng sa ntho e ’ngoe le e ’ngoe hobane u tla be u utloisisa tsela eo Jehova a nahanang ka eona. w22.08 5 ¶10-12

Mokreste eo e leng hlooho ea lelapa o nka boikarabelo ba hae ba ho hlokomela lelapa ka ho teba. Haeba u hlooho ea lelapa, e ka ’na eaba u tšoenyehile ka hore u tla thatafalloa ke ho hlokomela lelapa ka lijo le ho patalla bolulo. Hape e ka ’na eaba u tšoenyehile ka hore haeba u ka lahleheloa ke mosebetsi oa hao, u ke ke oa khona ho fumana o mong. Kapa e ka ’na eaba u tšoenyehile ka hore u ke ke oa khona ho phela ka chelete e nyane. Satane o khonne ho etsa hore batho ba bangata ba khaotse ho sebeletsa Jehova hobane ba ikutloa ka tsela eo. Satane o leka ho etsa hore re lumele hore Jehova ha a re tsotelle ebile a ke ke a re thusa hore re hlokomele ba malapa a rona. Ka lebaka leo, re ka ’na ra nahana hore re tlameha ho etsa ntho efe kapa efe e le hore re se ke ra lahleheloa ke mosebetsi. Re ka ba ra qetella re entse ntho e tla senya setsoalle sa rona le Molimo. w22.06 15 ¶5-6

Rea tseba hore Molimo oa rona ke Molimo “ea mohau le ea mosa, ea liehang ho halefa le ea tletseng mosa o lerato le ’nete.” (Ex. 34:6) Jehova o rata toka. (Esa. 61:8) O utloa bohloko ha re hlaheloa ke mathata ebile o ikemiselitse ho felisa mathata ’ohle a rona ka nako e nepahetseng. (Jer. 29:11) Re emetse nako eo ka tjantjello e kholo. Lena ke le leng la mabaka a etsang hore re rate Jehova hakana. Lebaka le leng leo re ratang ’nete ka lona ke lefe? Ho tseba ’nete ho re thusa haholo. A re bueng ka mohlala ona. Lintho tseo re ithutang tsona ka Bibeleng li akareletsa tšepo eo re nang le eona ka bokamoso. Tšepo eo re nang le eona e thehiloeng Bibeleng e re thusa hore re khobe matšoafo ha re e-na le mathata feela joalokaha ankora e thusa sekepe hore se se ke sa tsoa taolong. Temaneng ea letsatsi ea kajeno, moapostola Pauluse o ne a bua ka tšepo eo Bakreste ba tlotsitsoeng ba nang le eona ea ho ea leholimong. Leha ho le joalo, seo a se buileng se ntse se sebetsa le ho Bakreste ba nang le tšepo ea ho phela ka ho sa feleng paradeiseng lefatšeng. (Joh. 3:16) Ho ithuta ka tšepo ea ho phela ka ho sa feleng ho re thusitse hore re tsebe hore na re phelela’ng. w22.08 14-15 ¶3-5

Lerato ke motheo oa ho tšepana. Bakorinthe ba pele khaolo ea 13 e hlalosa lintho tse fapaneng tseo lerato le ka re thusang ho li etsa e le hore re ka tšepa batho ba bang. (1 Bakor. 13:​4-8) Ka mohlala, temana ea bone e re “lerato lea tiisetsa ’me le mosa.” Jehova oa re mamella leha re mo siteloa. Ka sebele re tla mamella bara le barali ba bo rona ha ba re utloisa bohloko ka lintho tseo ba li buang kapa tseo ba li etsang. Ho ekelletsa moo, temana ea bohlano e re: “[Lerato] ha le itšoare ka mokhoa o sa hlompheheng. Ha le boloke tlaleho ea bobe.” Kahoo, ha re batle ho hopola lintho tse bohloko tseo bara le barali ba bo rona ba ileng ba re etsa tsona nakong e fetileng. Moeklesia 7:9 e re re ‘se ke ra potlakela ho khopeha.’ Leka ho sheba bara le barali beno ka tsela eo Jehova a ba shebang ka eona. Molimo oa ba rata ebile ha a boloke tlaleho ea liphoso tsa bona. Le rona ha rea lokela ho etsa joalo. (Pes. 130:3) Ho e-na le ho sheba liphoso tsa bona, sheba makhabane a bona.—Mat. 7:​1-5. w22.09 3-4 ¶6-7

Buka ea Daniele ea bontša hore na lintho tse thabisang li tla etsahala ka tatellano joang matsatsing a ho qetela. Ka mohlala, Daniele 12:1 e bua ka Mikaele, e leng Jesu Kreste ea “emeng molemong oa bara ba sechaba sa [Molimo].” Karolo eo ea boprofeta e qalile ho phethahala ka 1914 ha Jesu a ne a khethoa hore e be Morena oa ’Muso oa Molimo o leholimong. Daniele o ile a boela a re Jesu o ne a “tla raoha” nakong ea “mahlomola eo e joaloka eona e e-s’o ka e etsoa hore e be teng ho tloha ha ho e-ba le sechaba ho fihlela ka nako eo.” “Nako ea mahlomola” ke “matšoenyeho a maholo” ao ho buuoeng ka ’ona ho Matheu 24:21. Qetellong ea nako ena ea mahlomola e leng ka Armagedone, Jesu o tla raoha kapa a sireletse batho ba Molimo. Ha buka ea Tšenolo e bua ka batho bana ba Molimo e ba bitsa bongata bo boholo bo “tsoang matšoenyehong a maholo.”—Tšen. 7:​9, 14. w22.09 21 ¶4-5

Mabitso a ngotsoeng bukeng ea bophelo a ka hlakoloa. Ho joalokaha eka Jehova o ngotse mabitso ana ka pentšele. (Tšen. 3:5) Re lokela ho etsa bonnete ba hore mabitso a rona a lula a ngotsoe bukeng ena ho fihlela a ngoloa ka pene. Sehlopha se seng sa batho bao mabitso a bona a ngotsoeng bukeng ea bophelo ke sa batho ba khethetsoeng ho e’o busa le Jesu leholimong. Ha moapostola Pauluse a bua le “basebetsi-’moho” le eena ba Filipi, o ile a re mabitso a batlotsuoa ba tla busa le Jesu a se a ngotsoe bukeng ea bophelo. (Bafil. 4:3) Empa ba lokela ho lula ba tšepahala e le hore mabitso a bona a lule a le bukeng ena ea tšoantšetso. Mabitso a bona a tla ngoloa bukeng ena ’me a ke ke a hlakoloa ka mor’a hore ba fumane tiiso ea bona ea ho qetela. Sena se tla etsahala pele ba hlokahala kapa pele matšoenyeho a maholo a qala.—Tšen. 7:3. w22.09 15 ¶3, 5-6

Na u kile oa etsahalloa ke ntho ee? Motho e mong o pheha lijo tseo u li ratang. Ka lebaka la hore u potlakile kapa ho na le ntho eo u ntseng u nahana ka eona, u ja lijo tseo u tatile u sa khone le ho utloa monate oa tsona. Ka mor’a hore u qete ho ja oa hlokomela hore u jele kapele ’me u lakatsa eka u ka be u ile oa li thabela. Ka tsela e tšoanang, ka linako tse ling re ka bala Bibele re tatile ebe ha re khone ho utloisisa le ho thabela seo re se balang. Iphe nako ea ho thabela ho bala Lentsoe la Molimo, ipone u le moo, nahana ka melumo le mantsoe a batho bao u ntseng u bala ka bona ’me u nahanisise ka seo u se balang. Ha u etsa joalo u tla thaba le ho feta. Jesu o ile a khetha “mohlanka ea tšepahalang le ea bohlale” ho re fa lintho tse tla re thusa hore re be le kamano e ntle le Jehova ka nako e nepahetseng ’me o fela a etsa joalo. (Mat. 24:45) Mohlanka ea tšepahalang le ea bohlale o sebelisa Bibele ho etsa lintho tse re thusang hore re ithute ka Jehova haholoanyane.—1 Bathes. 2:13. w22.10 7-8 ¶6-8

Bibele e ile ea bolela esale pele hore matsatsing a ho qetela ho tla ba le basomi ba bangata. (2 Pet. 3:​3, 4) Ba etsa joalo hobane ba batla ho khotsofatsa “litakatso tsa bona tse khopo.” (Juda 7, 17, 18) Lintho tse etsoang ke bakoenehi le batho ba hanyetsang Jehova li lumellana hantle le tsela eo Bibele e hlalosang basomi ka eona. Ke’ng e ka re thusang hore re se ke ra fetoha basomi? Re ka etsa joalo ka ho qoba ho tloaelana le batho ba tloaetseng ho korotla. (Pes. 1:1) Sena se bolela hore ha re mamele kapa hona ho bala ntho leha e le efe e tsoang ho bakoenehi. Ha re sa hlokomele ho ka ba bonolo hore re fetohe batho ba korotlang ’me re ka qala ho se tšepe Jehova le tataiso eo mokhatlo oa hae o fanang ka eona. Re ka qoba mekhoa eo ka hore re ipotse lipotso tsena: ‘Na ke lula ke belaela ha ke fumana tlhaloso kapa tataiso eo ke qalang ho e utloa? Na ke lula ke batla ho tšoaea ba etellang pele liphoso?’ Haeba re potlakela ho etsa liphetoho re tla thabisa Jehova.—Liprov. 3:​34, 35. w22.10 20 ¶9-10

Moea oa Molimo o ile oa fa Ezekiele matla a hore a bolelle batho ba “manganga” molaetsa. Jehova o ile a re ho Ezekiele: “Ke entse hore u tiee ’me u be manganga joaloka bona. Ke entse hore phatla ea hao e be thata joaloka taemane, e be thata ho feta lejoe le thata. U se ke oa ba tšaba kapa oa tšosoa ke bona.” (Ezek. 3:​8, 9) Ha e le hantle, e ne eka Jehova o re ho Ezekiele: ‘U se ke oa lumella hore batho bana ba manganga ba u nyahamise, ke tla u matlafatsa.’ Ka mor’a moo, moea oa Molimo o ile oa thusa Ezekiele ho etsa mosebetsi oa hae oa ho bolela. Ezekiele o ile a re: “Moea oa Jehova oa sebetsa ho ’na ka matla.” Ho ile ha nka beke hore Ezekiele a ithute le ho utloisisa molaetsa oo a neng a tlameha ho o bolella batho e le hore a fane ka oona ka sebete. (Ezek. 3:​14, 15) Jehova o ile a laela Ezekiele hore a ee thoteng, moo ‘moea oa Molimo o ileng oa kena ho eena.’ (Ezek. 3:​23, 24) Ezekiele o ne a se a loketse ho qala tšebeletso ea hae. w22.11 4-5 ¶8-9

Moprofeta Habakuke o ile a ba le mathata a mangata. Ka nako e ’ngoe o ile a belaela hore na ebe Jehova oa mo tsotella. Kahoo, o ile a rapela eaba o bolella Jehova kamoo a ikutloang kateng. Jehova o ile a araba thapelo e tsoang pelong ea mohlanka enoa oa hae ea tšepahalang. (Hab. 2:​2, 3) Habakuke o ile a thaba hape ka mor’a hore a nahanisise ka tsela eo Jehova a ileng a pholosa batho ba hae ka eona. O ile a kholiseha hore Jehova oa mo tsotella le hore o tla mo thusa ho mamella mathata leha e le afe. (Hab. 3:​17-19) Re ka ithuta’ng tabeng ee? Ha u e-ba le mathata, rapela Jehova ’me u mo bolelle kamoo u ikutloang kateng. Ka mor’a moo, u itšetlehe ka eena. Ha u etsa joalo u tla kholiseha hore Jehova o tla u fa matla ao u a hlokang hore u mamelle. Ha u bona hore Jehova o u tšehelitse, tumelo ea hao ho eena e tla ba matla. Haeba u tsoela pele ho etsa lintho tse tla u thusa hore u lule u le haufi le Jehova, le uena u ke ke oa lumella mathata kapa lipelaelo hore li u arohanye le Jehova.—1 Tim. 6:​6-8. w22.11 15 ¶6-7

Jesu le banna ba babeli ba litlokotsebe ba neng ba khokhothetsoe haufi le eena ba ile ba utloa bohloko bo boholo pele ba e-shoa. (Luka 23:​32, 33) Banna bao ba litlokotsebe ba ile ba rohaka Jesu. (Mat. 27:44; Mar. 15:32) Empa e mong oa bona o ile a fetola tsela eo a neng a ikutloa ka eona. O ile a re: “Jesu, u nkhopole ha u kena ’Musong oa hao.” Jesu o ile a mo araba ka mantsoe a hlahang temaneng ea letsatsi ea kajeno. (Luka 23:​39-42) Mantsoe ao Jesu a ileng a a bolella monna oa setlokotsebe a lokela ho etsa hore re nahane hore na bophelo bo tla ba joang Paradeiseng. Ha e le hantle, re ka ithuta ho hong ka Paradeise pusong ea Morena Solomone e neng e e-na le khotso. Bibele e re Jesu o bohlokoa ho feta Solomone. Kahoo, re ka lebella hore Jesu le batho bao a tla busa le bona ba tla tlisa maemo a molemo le ho feta paradeiseng. (Mat. 12:42) Ho hlakile hore batho bao e leng karolo ea “linku tse ling” ba lokela ho batla ho tseba hore na ba tlameha ho etsa’ng e le hore ba tšoanelehe ho phela ka ho sa feleng Paradeiseng.—Joh. 10:16. w22.12 8 ¶1; 9 ¶4

Esaia oa re kholisa hore Jehova o tla mamela ha re mo kopa hore a re thuse hape o tla araba lithapelo tsa rona ka potlako. O boetse o re: “Hang ha a utloa seboko sa lona, o tla le araba.” Mantsoe ana a khothatsang a re hopotsa hore Ntate oa rona o ikemiselitse ho re thusa. Kahoo, ho tseba taba ena ho re thusa hore re mamelle re thabile. Jehova o mamela ka hloko thapelo ea motho e mong le e mong. Ke hobane’ng ha re cho joalo? Ho Esaia khaolo ea 30 lentsoe “le” le sebelisoa ha ho buuoa ka batho ba bangata. Sena se bontša hore Jehova o ne a bua le bahlanka ba hae e le sehlopha. Leha ho le joalo, Bibeleng ea Phetolelo ea Lefatše le Lecha ea Mangolo a Halalelang (bi12) temaneng ea 19 ho sebelisitsoe lentsoe “u” hobane ho buuoa le motho a le mong. Esaia o ile a re: “Ho hang u ke ke ua lla”; “o tla u bontša mohau”; “o tla u araba.” Jehova ke Ntate oa rona ea re ratang, oa re tsotella ’me o mamela lithapelo tsa rona.—Pes. 116:1; Esa. 57:15. w22.11 9 ¶5-6

Ho ruta batho Bibele le hoja re hanyetsoa ho etsa hore re thabe ’me re be le khotso. Mehleng ea baapostola ha babusi ba Bajuda ba ne ba re baapostola ba tlohele ho bolela litaba tse monate, baapostola bao ba ile ba khetha ho mamela Molimo. Ba ile ba tsoela pele ka ho ruta ’me mosebetsi oo o ile oa ba thabisa. (Lik. 5:​27-29, 41, 42) Ke ’nete hore ha mosebetsi oa rona o thibetsoe re lokela ho ba hlokolosi ha re ruta batho Bibele. Ha re etsa sohle seo re ka se khonang re tla ba le khotso e tlisoang ke ho thabisa Jehova le ho fa batho molaetsa o tla ba pholosa. Re ka kholiseha hore le linakong tse thata re ka lula re e-na le khotso. Linakong tseo tse joalo re lokela ho hopola hore khotso eo re e hlokang ke khotso eo re ka e fuoang ke Jehova feela. Itšetlehe ka eena ha u kopana le mathata a kang mafu a seoa, likoluoa kapa mahloriso. Lula u le haufi le mokhatlo oa hae. Nahana ka bokamoso bo monate boo re tl’o bo thabela. Ha u etsa joalo, ‘Molimo oa khotso o tla ba le uena.’—Bafil. 4:9. w22.12 21 ¶17-18

Re lokela ho sebetsa ka thata e le hore re etse joalo. Re lokela ho sebetsa ka thata ho hlola mekhoa e mebe joaloka bohale le lehloeo. (Baef. 4:​31, 32) Ke hobane’ng ha ho ka ba thata? Hobane mekhoa e meng ho ka ba thata ho e tlohela. Ka mohlala, Bibele e re batho ba bang ‘ba bohale’ hape ‘ba rata ho halefa.’ (Liprov. 29:22) Ho ke ke ha e-ba bonolo ho laola mekhoa ena ha re se re e tloaetse. Kahoo, ho hlokahala hore re lule re sebetsa ka thata esita le ka mor’a hore re kolobetsoe. (Bar. 7:​21-23) Rapela Jehova hore a u thuse ho sebetsana le mekhoa e mebe eo ho leng thata ho e tlohela, u kholisehile hore o tla arabela thapelo ea hao ’me a u thuse. (1 Joh. 5:​14, 15) Jehova a ka u fa matla a ho loantša mekhoa e mebe eo u nang le eona le hoja a ke ke a e felisa ka mohlolo. (1 Pet. 5:10) Ho ntse ho le joalo, sebetsa ka thata hore u etse lintho tumellanong le lithapelo tsa hao ka hore u qobe lintho tse tla etsa hore u khutlele bothong ba khale. Hape u se ke oa lumella kelello ea hao hore e lule e nahana ka lintho tse fosahetseng.—Bafil. 4:8; Bakol. 3:2. w23.01 10 ¶7, 9-10

Tsela e ’ngoe eo re bontšang ka eona hore rea ba rata ke ka ho ruta molaetsa oa Bibele ka cheseho. Re bua le motho e mong le e mong eo re kopanang le eena. Ha re khetholle batho ka lebaka la morabe, setso, maemo a bona a lichelete le hore na ba rutehile kapa che. Ha re etsa joalo, re etsa seo Jehova a se batlang hobane thato ea hae ke hore “batho ba mefuta eohle ba pholohe le hore ba fumane tsebo e nepahetseng ea ’nete.” (1 Tim. 2:4) Re boetse re bontša hore re rata Molimo le Kreste ka hore re rate Bakreste-’moho le rona. Re bontša hore rea ba khathalla hape rea ba thusa ha ba e-na le mathata. Rea ba tšelisa ha ba hlokahaletsoe, rea ba etela ha ba kula hape rea ba khothatsa ha ba nyahame. (2 Bakor. 1:​3-7; 1 Bathes. 5:​11, 14) Re lula re ba rapella hobane rea tseba hore “thapeli ea motho ea lokileng e matla haholo.”—Jak. 5:16. w23.01 28-29 ¶7-8

Re ka khona ho ntlafatsa bokhoni ba rona ba ho khothatsa batho ba bang ha nako e ntse e ea feela joalokaha motho ea hahang le eena a ntlafatsa bokhoni ba hae ba ho haha ha a ntse a sebetsa. Re ka thusa ba bang hore ba be le matla a ho mamella mathata ka hore re ba bolelle ka batho ba ileng ba mamella mathata nakong e fetileng. (Baheb. 11:​32-35; 12:1) Re ka etsa hore ho be le khotso ka phuthehong ka hore re bue ka lintho tse ntle tseo batho ba bang ba li etsang le ka hore re lokise litaba haeba ho e-na le liqabang kapa ho se utloisisane. (Baef. 4:3) Re ka tsoela pele ho haha tumelo ea Bakreste-’moho le rona ka hore re buisane le bona ka lintho tsa bohlokoa tseo re ithutileng tsona ka Bibeleng, ka ho ba thusa ka lintho tseo ba li hlokang le ka ho tšehetsa bao tumelo ea bona e seng e fokola. Le rona re ka thaba le ho khotsofala ha re haha tumelo ea Bakreste-’moho le rona. Mehaho e ka senyeha empa melemo ea mosebetsi oa rona oa ho khothatsa ba bang e tla lula e le teng ka ho sa feleng. w22.08 22 ¶6; 25 ¶17-18

Jesu o ile a re re lokela ho ba le temoho e le hore re utloisise seo re se balang Lentsoeng la Molimo. (Mat. 24:15) Ho ba le temoho ho bolela’ng? Ke ho ba le bokhoni ba ho utloisisa ntho e sa hlakang le hore na e amana le ho fapana joang le lintho tse ling. Jesu o ile a bontša hore re lokela ho ba le temoho e le hore re bone liketsahalo tse phethahatsang boprofeta ba Bibele. Re boetse re hloka temoho e le hore re ka rua molemo ho seo re se balang Bibeleng. Jehova a ka thusa bahlanka ba hae hore ba be le temoho. Kahoo, u ka rapella hore u be le eona. Ke joang u ka etsang lintho tumellanong le seo u se rapeletseng? Hlahloba lintho tseo u li balileng ’me u ngole hore na li amana joang le lintho tseo u li tsebang. Batla se boleloang ke seo u se balileng Bibeleng le ho bona hore na u ka se sebelisa joang bophelong ba hao. (Baheb. 5:14) Ha u bala u sebelisa temoho, u tla utloisisa Bibele haholoanyane. w23.02 10 ¶7-8

Nka hore motsoalle oa hao o u file ntlo. Ntlo ena ea nela ebile pente ea eona e thuntse. Ho sa tsotellehe mathata ana, ntlo ena e ka rekisoa limilione tsa Maluti. Ho hlakile hore u tla e ananela u be u e sireletse. Ka tsela e tšoanang, Jehova o re file mpho ea bohlokoa haholo e leng bophelo. Ha e le hantle, Jehova o bontša kamoo a nkang bophelo ba rona bo le bohlokoa kateng ka hore ebe o re file Mora oa hae hore a re lopolle. (Joh. 3:16) Jehova ke Mohloli oa bophelo. (Pes. 36:9) Moapostola Pauluse le eena o ne a lumela taba eo. O ile a re: “Ke ka eena re phelang, re sisinyehang ’me re leng teng.” (Lik. 17:​25, 28) Kahoo, re ka cho ra re bophelo ke mpho e tsoang ho Molimo. Kaha oa re rata, o re fa lintho tsohle tseo re li hlokang e le hore re ’ne re phele. (Lik. 14:​15-17) Empa Jehova ha a sireletse bophelo ba rona ka mohlolo. O lebeletse hore re etse sohle ho itlhokomela e le hore re lule re phetse hantle re be re mo sebeletse.—2 Bakor. 7:1. w23.02 20 ¶1-2

Re ananela hore ebe Jehova Molimo o re file Bibele. Bibele e fana ka likeletso tse re thusang hore na re ka etsa’ng ha re e-na le mathata mehleng ena. Jehova o boetse o re fa tšepo e babatsehang ka bokamoso. Ntho ea bohlokoa ka ho fetisisa ke hore Jehova o sebelisa Bibele ho re bolella ka makhabane a hae. Ha re nahana ka makhabane a hae, sena se re ama maikutlo ebile se etsa hore re batle ho ba metsoalle ea hae. (Pes. 25:14) Jehova o batla hore batho ba mo tsebe. Nakong e fetileng, o ile a itsebahatsa ho ba bang ba bahlanka ba hae ka ho etsa hore ba lore litoro, ba bone lipono ’me a sebelisa le mangeloi hore a fetisetse molaetsa oa hae ho batho ba bang. (Num. 12:6; Lik. 10:​3, 4) Re ne re sa tl’o khona ho ithuta ka lipono, litoro le melaetsa eo e tsoang ho mangeloi haeba e ne e sa ngoloa. Ke kahoo Jehova a ileng a khetha banna hore ba ngole seo a batlang hore re se tsebe ‘bukeng.’ Kaha “lintho tsohle tseo Molimo oa ’nete a li etsang li phethahetse,” re ka kholiseha hore tsela ena eo re buisanang le eena ka eona e molemo ebile e ka re thusa.—Pes. 18:30. w23.02 2 ¶1-2

Ipehele lintho tseo u batlang ho li finyella tse molemo. Batla ho finyella lintho tse tla matlafatsa tumelo ea hao le ho u thusa hore u be Mokreste ea tiileng. (Baef. 3:16) Ka mohlala, u ka ’na oa etsa qeto ea ho ntlafatsa ntlheng ea ho ithuta le ho bala Bibele kamehla. (Pes. 1:​2, 3) Kapa u ka leka ho rapela ka makhetlo ’me u rapele ho tsoa pelong. Mohlomong u lokela ho ba hlokolosi haholoanyane ka boithabiso boo u bo khethang le lintho tseo u qetang nako u li etsa. (Baef. 5:​15, 16) U tla ba Mokreste ea tiileng tumelong haholoanyane ha u thusa ba bang. Ka mohlala, u ka etsa hore ntho eo u batlang ho e finyella e be ho thusa bara le barali ba bo rona ba holileng ka phuthehong kapa ba nang le bokooa, u ka ba ela mabenkeleng kapa oa ba thusa ka lisebelisoa tsa bona tsa elektronike. U boetse u bontša lerato ho batho ba ka ntle ho phutheho ha u ba ruta ka molaetsa oa ’Muso oa Molimo. (Mat. 9:​36, 37) Haeba ho khoneha, etsa hore tšebeletso ea nako e tletseng e be ntho eo u batlang ho e finyella. w22.08 6 ¶16-17