November

Mokreste ha aa lokela ho bua puo e litšila. Leha ho le joalo, ho na le puo e nyefolang empa e le e poteletseng eo re lokeng ho e qoba. Ka mohlala, ha rea lokela ho bua lintho tse mpe ka batho ba litso tse ling, morabe kapa linaha tse ling. Hape ha rea lokela ho bua lintho tse ka utloisang batho ba bang bohloko. Khothatsa ba bang. Potlakela ho babatsa batho ba bang ho e-na le ho ba tšoaea-tšoaea liphoso kapa ho tletleba. Baiseraele ba ne ba e-na le lintho tse ngata tseo ba ka li ananelang empa ba ne ba lula ba tletleba. Ha re lula re tletleba, re tla etsa hore le batho ba bang ba tletlebe. Hopola hore tlaleho e mpe ea lihloela tse leshome e ile ea etsa hore ‘bara bohle ba Iseraele ba . . . korotlele Moshe.’ (Num. 13:31–14:4) Ka lehlakoreng le leng, ha re babatsa batho ba bang, seo se tla ba khothalletsa hore ba ’ne ba etse lintho tse ntle. Kahoo, batla menyetla ea ho babatsa Bakreste-’moho. w22.04 8 ¶16-17

Haesale ho tloha khale Jehova a thusa bana hore e be metsoalle ea hae. A ka thusa le bana ba hao hore e be metsoalle ea hae haeba ba rata. (1 Bakor. 3:​6, 7) Esita le haeba bana ba hao ba sa sebeletse Jehova ka lipelo tsohle, o tla tsoela pele a ba rata. (Pes. 11:4) Haeba ba etsa lintho tse bontšang hore ba batla ho thabisa Jehova, o ikemiselitse ho ba thusa ho ba metsoalle ea hae. (Lik. 13:48; 2 Likron. 16:9) O tla u thusa ho bua ntho e loketseng ka nako e nepahetseng eo bana ba hao ba hlokang ho e utloa ka eona. (Liprov. 15:23) Kapa a ka susumetsa mora kapa morali oa bo rona ka phuthehong ho ba bontša botsoalle. Esita leha bana ba hao ba se ba holile, Jehova a ka ba hopotsa lintho tseo u ba rutileng tsona ha ba ntse ba hola. (Joh. 14:26) Jehova o tla u putsa ha u ntse u tsoela pele ho koetlisa bana ba hao ka lintho tseo u li buang le tseo u li etsang. w22.04 21 ¶18

Kaha Satane ha a sa khona ho kena leholimong, o hlasela batlotsuoa ba ntseng ba le lefatšeng, bao e leng baemeli ba ’Muso oa Molimo le ba nang le “mosebetsi oa ho paka ka Jesu.” (2 Bakor. 5:20; Baef. 6:​19, 20) Ka 1918, bara ba bo rona ba robeli ba neng ba hlaheletse ka mokhatlong ba ile ba qosoa ka bohata, ba fumanoa ba le molato ’me ba ahloleloa ho ea teronkong ka lilemo tse ngata. Ho ne ho bonahala eka mosebetsi oa bara bana ba bo rona ba tlotsitsoeng o felisitsoe. (Tšen. 11:​3, 7-11) Leha ho le joalo, ka March 1919 bara bao ba bo rona ba tlotsitsoeng ba ile ba lokolloa teronkong ’me hamorao liqoso tsa bona tsa hlakoloa. Hang-hang ba ile ba qalella ho etella pele mosebetsing oa ho bolela le ho ruta. Empa Satane ha aa ka a khaotsa ho hlasela batho ba Molimo. Ho tloha ka nako eo, haesale Satane a tlisetsa bahlanka ba Molimo mahloriso a kang “noka.” (Tšen. 12:15) Ruri kaofela ha rona re lokela ho ba le “mamello le tumelo.”—Tšen. 13:10. w22.05 5-6 ¶14-16

Ponong moapostola Johanne o bona lihlopha tse peli tsa batho ba tšehetsang puso ea Jehova ’me ba fumana litlhohonolofatso tsa bophelo bo sa feleng. Sehlopha sa pele se na le batho ba 144 000. Ba khethiloe lefatšeng e le hore ba il’o theha ’Muso le Jesu leholimong. Ba busa lefatše le eena. (Tšen. 5:​9, 10; 14:​3, 4) Ponong Johanne o ba bona ba eme le Jesu leholimong Thabeng ea Sione. (Tšen. 14:1) Ho tloha mehleng ea baapostola ho fihlela hona joale, batho ba likete ba ’nile ba khethoa hore e be karolo ea ba 144 000. (Luka 12:32; Bar. 8:17) Leha ho le joalo, Johanne o bolelloa hore ke masala feela kapa palo e nyenyane e tla be e ntse e phela lefatšeng matsatsing a ho qetela. (Tšen. 12:17) Nakong ea matšoenyeho a maholo, masala a tla nkeloa leholimong hore a il’o kopana le karolo e ’ngoe ea ba 144 000 ba ileng ba shoa ba tšepahala. Ba tla busa le Jesu ’Musong oa Molimo.—Mat. 24:31; Tšen. 5:​9, 10. w22.05 16 ¶4-5

Jesu o ile a ruta balateli ba hae hore ba se ke ba ikhalala. O ile a re ho bona: “Moriri oa lihlooho tsa lona o baliloe kaofela.” (Mat. 10:30) Mantsoe ao aa re khothatsa, haholo-holo haeba re na le ho ikutloa eka ha re batho ba bohlokoa. Mantsoe ao a bolela hore Ntate oa rona ea leholimong oa re tsotella ebile o re nka re le batho ba bohlokoa. Ha re batle ho belaella taba ea hore Jehova o re nka re le batho ba bohlokoa ka hore re nahane hore ha re tšoanelehe ho mo sebeletsa le ho fumana bophelo bo sa feleng. Lilemo tse 15 tse fetileng, Molula-Qhooa o mong o ile oa re re se ke ra ikhalala kapa ra nka hore re bohlokoa ho feta batho ba bang. O ile oa re: “Ka sebele, ha re batle ho iphahamisa hoo re inahanang borona feela, ebile ha re batle ho etsa se fapaneng le seo ebe re inka re se letho. Ho e-na le hoo, sepheo sa rona e lokela ho ba ho italima ka tsela e nepahetseng, re tsebe makhabane le likoli [kapa mefokolo] ea rona.” w22.05 24-25 ¶14-16

Motho e mong le e mong o lokela ho etsa’ng e le hore phutheho e lule e momahane? Kaofela ha rona re lokela ho bopa khotso le batho ba bang. (Mat. 5:9; Bar. 12:18) Kamehla ha re etsa hore re be le khotso le batho ba bang ka phuthehong, sena se etsa hore re momahane. Re lokela ho hopola hore Jehova o huletse motho e mong le e mong ea mo sebeletsang bolumeling ba ’nete. (Joh. 6:44) Ak’u nahane kamoo Jehova a thabang kateng ha a bona re sebetsa ka thata hore ho lule ho e-na le khotso re momahane kaha re batho ba bohlokoa ho eena. (Esa. 26:3; Hag. 2:7) Jehova o fa bahlanka ba hae lintho tse ngata tse molemo. Kahoo, re ka fumana molemo joang ho tsona? Re ka nahanisisa ka lintho tseo re ithutileng tsona Lentsoeng la Molimo. Ho ithuta le ho nahanisisa ho tla re thusa hore re be le makhabane a Bokreste a tla etsa hore re “ratane ka matla joaloka bana ba Molimo” ka phuthehong.—Bar. 12:10. w22.11 12-13 ¶16-18

Ha re lumela hore Jehova o re tšoaretse, re thabela “linako tse khathollang” tse akarelletsang ho ba le khotso ea kelello le letsoalo le se nang molato. Ke “Jehova” feela ea ka re tšoarelang ka tsela e ka etsang hore re ikutloe joalo. (Lik. 3:19) Ha Jehova a re tšoarela, o re lumella hore re boele re be metsoalle ea hae joalokaha eka ha rea ka ra etsa sebe ho hang. Ha Jehova a re tšoarela, a ke ke a hlola a re qosa kapa a re fa kotlo ka sebe seo re se entseng. (Esa. 43:25) Jehova o suthiselitse litlolo tsa rona hole le rona “joalokaha bochaba-tsatsi bo le hole le bophirima-tsatsi.” (Pes. 103:12) Ha re nahana kamoo Jehova a re tšoarelang kateng, re utloa re mo ananela ebile re mo hlompha. (Pes. 130:4) Ha Jehova a tšoarela motho, ha a itšetlehe ka hore na sebe seo a se entseng se tebile hakae. Kaha Jehova ke ’Mopi, Mofani oa molao le Moahloli, o khona ho etsa qeto ea ho tšoarela motho. w22.06 4 ¶12; 5 ¶14

Jehova o file batho bohle ba mo ratang tšepo e thabisang ea hore o tla felisa ho kula, mesarelo le lefu. (Tšen. 21:​3, 4) O tla thusa batho “ba bonolo” ba mo tšepang hore ba etse lefatše paradeise. (Pes. 37:​9-11) Hape o tla etsa hore setsoalle sa rona le eena se be matla le ho feta. Kannete eo ke tšepo e thabisang. Empa ke eng e re kholisang hore litšepiso tsa Molimo li tla fela li phethahale? Re kholisoa ke hore kamehla Jehova o phethahatsa litšepiso tsa hae, ke kahoo re nang le lebaka le utloahalang la ho “tšepa Jehova.” (Pes. 27:14) Re ka bontša hore re tšepa Jehova ha re leka kahohle-hohle hore re lule re thabile ha re ntse re mo emetse ka mamello hore a phethahatse litšepiso tsa hae. (Esa. 55:​10, 11) Le rona a re luleng re tšepahalla Jehova ’me re kholisehe hore o tla putsa “ba mo batlang ka tieo.” w22.06 20 ¶1; 25 ¶18

Jehova ke eena Hlooho ea lelapa lena ’me re ka kholiseha hore o tla etsa seo a reng lihlooho tsohle tsa malapa li lokela ho se etsa ho 1 Timothea 5:8. Haeba re kholisehile hore Jehova oa re rata hammoho le ba malapa a rona, re ke ke ra ba le bothata ba ho lumela hore re tla ba le lintho tseo re li hlokang. (Mat. 6:​31-33) Jehova o batla ho re hlokomela ’me ke Mohlokomeli ea lerato le ea fanang. Ha a bopa lefatše, ha aa ka a re fa feela lintho tseo re li hlokang bakeng sa bophelo. Ka lerato, o tlatsitse lefatše ka lintho tse ngata tse re thabisang. (Gen. 2:9) Ka linako tse ling re ka ’na ra ba le lintho tsa motheo feela, eseng lintho tse ling tse eketsehileng. Leha ho le joalo, re lokela ho hopola hore re na le lintho tseo hobane Jehova a re file tsona. (Mat. 6:11) Re lokela ho lula re hopola hore nakong e tlang Molimo o tla re fa lintho tsa bohlokoa haholo ho feta tseo re li telang hona joale hape o tla re fa bophelo bo sa feleng nakong e tlang.—Esa. 65:​21, 22. w22.06 15 ¶7-8

Ha se batho ba qalang ho ithuta feela ba hlokang ho ba le tsebo e tebileng ka Jehova le ka Bibele. Kaofela ha rona rea e hloka. Moapostola Pauluse o ile a ngola a re ho sebelisa seo re ithutileng sona Bibeleng ho tla re thusa “ho khetholla se nepahetseng le se fosahetseng.” Mehleng ena, ha ho bonolo ho mamela melao ea Jehova hobane boitšoaro ba batho ba bangata bo bobe haholo. Empa Jesu o etsa bonnete ba hore re ithuta lintho tse tla re thusa ho lula re e-na le tumelo e matla. Thuto ena e tsoa ka Lentsoeng la Molimo le bululetsoeng e leng Bibele. Joaloka Jesu, le rona re fa lebitso la Molimo tlotla e le tšoanetseng. (Joh. 17:​6, 26) Ka mohlala, ka 1931 re ile ra qala ho ipitsa ka lebitso le thehiloeng Bibeleng e leng Lipaki Tsa Jehova. Ka ho etsa joalo, re ile ra bontša hore lebitso la Ntate oa rona ea leholimong le bohlokoa haholo ho rona le hore re batla ho tsejoa ka lona. (Esa. 43:​10-12) Ho feta moo, Phetolelo ea Lefatše le Lecha ea Mangolo a Halalelang e khutliselitse lebitso la Molimo sebakeng sa lona se nepahetseng. w22.07 11 ¶11-12

Lintho tseo re ithutang tsona ka Bibeleng li akareletsa litaba tse monate ka ’Muso oa Molimo. Jesu o ile a bapisa ’nete e mabapi le ’Muso le letlotlo le patiloeng. Ho Matheu 13:44 o ile a re: “’Muso oa maholimo o joaloka letlotlo le patiloeng tšimong, leo motho a ileng a le fumana ’me a le pata; ka lebaka la thabo eo a nang le eona oa ea ’me a rekise lintho tseo a nang le tsona ’me a reke tšimo eo.” Hlokomela hore monna eo o ne a sa batlane le letlotlo leo. Empa ha a le fumana o ile a tela lintho tse ngata e le hore a be le lona. Ha e le hantle, o ile a rekisa ntho e ’ngoe le e ’ngoe eo a neng a e-na le eona. Hobane’ng? Hobane o ne a tseba hore letlotlo leo ke la bohlokoa. Rea tseba hore ha ho na ntho eo lefatše lena le ka re fang eona e ka bapisoang le thabo eo re nang le eona ea ho sebeletsa Jehova hona joale le tšepo eo re nang le eona ea ho phela ka ho sa feleng tlas’a ’Muso oa Molimo. Ho ba le kamano e ntle le Jehova ke habohlokoa ho feta ntho leha e le efe eo re lokelang ho e tela. Re thabisoa ke ho mo ‘khahlisa ka botlalo.’—Bakol. 1:10. w22.08 15 ¶8; 17 ¶9, 12

Josefa o ne a tseba joang hore Molimo o nka bofebe e le ho etsa ‘bobe bo boholo’? Baiseraele ba ile ba fumana Molao oa Moshe o neng o re “u se ke oa feba” lilemo tse 200 hamorao. (Ex. 20:14) Ho ntse ho le joalo, Josefa o ne a tseba Jehova hantle le hore na o ikutloa joang ha batho ba etsa bofebe. Ka mohlala, Josefa o ne a tseba hore Jehova o thehile lenyalo pakeng tsa monna a le mong le mosali a le mong. Ho ka etsahala hore ebe o ile a utloa kamoo Jehova a ileng a sireletsa nkhono oa hae Sara ka makhetlo a mabeli ha a ne a le kotsing ea hore banna ba bang ba batle ho etsa thobalano le eena. (Gen. 2:24; 12:​14-20; 20:​2-7) Ha Josefa a nahana ka maemo ao, o ile a bona hore na ke’ng seo Molimo a se nkang se nepahetse le seo a se nkang se fosahetse. Kaha Josefa o ne a rata Jehova, o ne a boetse a rata le melao ea hae ebile a ikemiselitse ho e mamela. w22.08 26 ¶1-2

Boprofeta bona ha bo bue ka batho ba tla tsosetsoa ho ea phela leholimong matsatsing a ho qetela joalokaha re ne re utloisisa joalo nakong e fetileng. Leha ho le joalo, bo bua ka bafu ba tla tsoha lefatšeng le lecha. Ke hobane’ng ha re cho joalo? Ho sebelisitsoe lentsoe ‘lerole’ ho Jobo 17:16 le ka boelang la bolela “Sheole,” kahoo taba ena e bontša hore Daniele 12:2 e bua ka batho ba tla tsosoa ka mor’a matsatsi a ho qetela le ka mor’a ntoa ea Armagedone. Daniele 12:2 e bolela’ng ha e re batho ba bang ba tla tsohela “bophelong bo hlolang ka nako e sa lekanyetsoang”? Sena se bolela hore nakong ea lilemo tse sekete, batho bohle ba tla beng ba tsositsoe ba bile ba ithuta kapa ba tsoele pele ba ithuta le ho mamela Jehova le Jesu, qetellong ba tla fumana bophelo bo sa feleng.—Joh. 17:3. w22.09 21 ¶6-7

Sena ha se bolele hore Jehova o batla re tšepe batho ka hlooho e ntšo feela. Ho e-na le hoo, o batla hore re ba tšepe hobane ba bontšitse hore baa tšepahala. Ho nka nako ho tšepa batho ba bang feela joalokaha ho nka nako ho ba hlompha. Kahoo, u ka etsa’ng hore u tšepe bara le barali ba bo rona? Iphe nako ea ho ba tseba. Bua le bona ha le le libokeng tsa phutheho. E-ea tšebeletsong ea tšimo le bona. E-ba le mamello ’me u ba fe monyetla oa ho bontša hore ke batho ba ka tšeptjoang. Ke ’nete hore qalong u ka ’na oa khetha hore na u bua ka eng ho motho eo u ntseng u ithuta eena. Ha u ntse u ba tseba haholoanyane u ka nolofalloa ke ho ba phetlela sefuba. (Luka 16:10) Empa u ka etsa’ng haeba liketso tsa mora kapa morali oa bo rona li etsa hore u se ke oa mo tšepa? Ha seo se etsahala, u se ke oa potlakela ho khaotsa setsoalle empa u mo fe nako. Hape u se ke oa lumella liketso tsa batho ba ’maloa feela hore li u sitise ho tšepa bara le barali ba bo rona kaofela. w22.09 4 ¶7-8

Moholo e mong eo lebitso la hae e leng Miqueas o kile a utloa eka bara ba bang ba bo rona ba nang le boikarabelo ka phuthehong ba ne ba mo tšoere hampe. Ho ntse ho le joalo, o ile a nahana lintho hantle ’me a sebetsa ka thata hore a khone ho laola maikutlo a hae. O ne a rapela Jehova hangata ’me a mo kopa hore a mo fe moea o halalelang le matla a hore a khone ho mamella. O ile a boela a batla lingoloa tsa rona tse ka mo thusang. Re ithuta’ng? Haeba u utloa eka mora kapa morali oa bo rona o u tšoere hampe, khoba matšoafo ’me u leke ho tlosa maikutlo a mabe ao e ka ’nang eaba u na le ’ona ka eena. E ka ’na eaba ha u tsebe ntho e entseng hore motho eo a bue kapa a etse lintho ka tsela eo a li entseng ka eona. Rapela Jehova ’me u mo kope hore a u thuse hore u bone lintho ka tsela eo motho eo a li bonang ka eona. Leka ho utloisisa hore e ka ’na eaba mora kapa morali oa bo rona o ne a sa ikemisetsa ho u utloisa bohloko u be u leke ho mo tšoarela. (Liprov. 19:11) Hopola hore Jehova o tseba boemo ba hao hantle ’me o tla u fa matla a hore u khone ho mamella.—Moek. 5:8. w22.11 21 ¶5

Khetha metsoalle e ratang Jehova. Ho khetha metsoalle e nepahetseng ho ka re thusa hore re be Bakreste ba nang le boiphihlelo. (Liprov. 13:20) Julien eo hona joale e seng e le moholo o re: “Ha ke ntse ke hola, batho bao ke neng ke sebetsa tšimo le bona e ile ea e-ba metsoalle ea ka. Metsoalle ena ea ka e ne e cheseha ’me e ile ea nthusa ho bona hore na nka thabela tšimo haholo hakae. . . . Ke ile ka boela ka hlokomela hore ntho e ’ngoe e neng e etsa hore ke seke ka ba le metsoalle e mengata e molemo ke hobane ke ne ke etsa setsoalle le lithaka tsa ka feela.” U lokela ho etsa eng ha u hlokomela hore ho qeta nako le motho ea itseng ka phuthehong ho ka senya setsoalle sa hao le Jehova? Pauluse o ile a hlokomela hore batho ba itseng ka phuthehong ba ne ba sa nahane kapa ho etsa lintho joaloka Bakreste. Kahoo, o ile a bolella Timothea hore a ba qobe. (2 Tim. 2:​20-22) Setsoalle sa rona le Jehova ke sa bohlokoa haholo. Re sebelitse ka thata haholo ho ba le setsoalle se haufi le Jehova kahoo ha re batle ho ba le metsoalle e tla senya setsoalle seo. w22.08 5-6 ¶13-15

Ha re tšoane le batho bao ba hloileng keletso ea Molimo. Ho e-na le hoo re ithuta ho rata melao ea Molimo le tsela eo a nahanang ka eona. Re tla rata tsela eo Molimo a nahanang ka eona le melao ea hae le ho feta haeba re bapisa melemo ea ho mamela le litla-morao tsa ho se mamele. Sheba mathata ao batho ba ipakelang ’ona ha ka booatla ba hana keletso ea Jehova e bohlale. Joale ebe u sheba tsela e molemo eo u phelang ka eona ka lebaka la ho mamela Molimo. (Pes. 32:​8, 10) Jehova o entse hore batho bohle ba be le monyetla oa ho fumana bohlale ba hae empa ha a ba qobelle hore ba bo amohele. Leha ho le joalo, o hlalosa se etsahalang ha batho ba sa amohele bohlale boo a fanang ka bona. (Liprov. 1:​29-32) “Ba tla kotula seo ba se jetseng.” Ha nako e ntse e ea, ba tla utloa bohloko hape ba be le mathata a mangata ka lebaka la tsela eo ba phelang ka eona. Qetellong Jehova o tla ba felisa. Ka lehlakoreng le leng Jehova o re ho ba mamelang keletso ea hae e bohlale le ba e sebelisang: “Ea ’mamelang o tla lula a sireletsehile, a ke ke a khathatsoa ke ho tšaba tlokotsi.”—Liprov. 1:33. w22.10 20 ¶11; 21 ¶12-13

Ho tšaba Jehova ho bolela ho mo hlompha haholo hoo re qobang ho etsa lintho tse mo utloisang bohloko. (Liprov. 16:6) Kahoo, re lula re etsa sohle seo re ka se khonang ho mamela melao ea Jehova ea se nepahetseng le se fosahetseng, eo a re hlaloselitseng eona ka Bibeleng. (2 Bakor. 7:1) Re tla thaba haeba re etsa lintho tseo Jehova a li ratang ’me re tlohela ho etsa tseo a sa li rateng. (Pes. 37:27; 97:10; Bar. 12:9) Motho a ka ’na a tseba hore Jehova ke eena ea nang le matla a ho etsa qeto ea hore na se nepahetseng le se fosahetseng ke sefe. Leha ho le joalo, motho eo ke eena ea tla ikhethela hore na o tla mamela melao ea Molimo kapa che. (Bar. 12:2) Re bontša ka liketso hore re fela re kholisehile hore ho phela ka melao ea Jehova ke eona tsela ea bohlokoa. (Liprov. 12:28) Davida o ne a ikutloa ka tsela eo, o ile a re ka Jehova: “U ntsebisa tsela ea bophelo. Motho ea pel’a hao o thaba haholo, ea ka letsohong la hao le letona o lula a thabile.”—Pes. 16:11. w22.10 8 ¶9-10

Jesu o ile a lula a ikokobelitse a bile a sa nke hore o bohlokoa ho feta batho ba bang. Pele Jesu a tla lefatšeng, o ile a etsa lintho tse ngata tse babatsehang ha a ntse a sebeletsa Jehova. “Lintho tse ling tsohle tse maholimong le tse lefatšeng li ile tsa boptjoa” ho sebelisoa Jesu. (Bakol. 1:16) Ha Jesu a kolobetsoa o ile a hopola lintho tseo a ileng a li etsa ha a ne a e-na le Ntate oa hae leholimong. (Mat. 3:16; Joh. 17:5) Ho hopola lintho tseo ha hoa ka ha etsa hore Jesu a ikhohomose. Hape ha aa ka a iphahamisetsa batho ba bang. O ile a bolella barutuoa ba hae hore ha aa ka a tla lefatšeng “ho sebeletsoa, empa ho sebeletsa le ho fana ka moea oa hae hore e be thekollo e le phapanyetsano bakeng sa ba bangata.” (Mat. 20:28) O ile a boela a re a ke ke a etsa ntho leha e le efe e itsoelang ho eena. Kannete Jesu o ne a ikokobelitse! O re behetse mohlala o motle oo re ka o latelang. w22.05 24 ¶13

Ha Jehova a khetha hore na o tšoarela motho kapa che, o nahana ka hore na mofosi o ne a tseba hore o etsa ntho e fosahetseng. Jesu o ile a hlakisa taba ena ho Luka 12:​47, 48. Motho o tla be a etsa sebe se tebileng haeba a rera ho etsa ntho e mpe a tseba hantle hore Jehova ha a e rate. Jehova a ka ’na a etsa qeto ea hore a se ke a tšoarela motho eo. (Mar. 3:29; Joh. 9:41) Empa na a ka khetha ho mo tšoarela? Ho joalo. Ntho e ’ngoe eo Jehova a e shebang ke hore na mofosi o bakile e le kannete. Ho baka ho bolela hore motho a fetole tsela eo a nahanang ka eona le ho etsa lintho ka eona. Ho akarelletsa hore a ikoahlaee a be a utloisoe bohloko ke lintho tse mpe tseo a li entseng le ho nahana ka lintho tse nepahetseng tseo a neng a lokela ho li etsa. Motho ea bakileng o boetse o utloisoa bohloko ke hore o ile a lumella kamano ea hae le Jehova e senyehe, e leng se ileng sa etsa hore a etse lintho tse mpe. w22.06 5-6 ¶15-17

Lira tsa rona li ka sebelisa mecha ea liphatlalatso kapa ea lipuisano ho jala mashano le litaba tse ka etsang hore re se ke ra tšepa bara ba bo rona ba etellang pele ka har’a mokhatlo oa Jehova. (Pes. 31:13) Bara ba bang ba bo rona ba ile ba tšoaroa ha thoe ke litlokotsebe. Bakreste ba mehleng ea pele le bona ba ile ba tobana le boemo bo tšoanang nakong eo moapostola Pauluse a neng a qosoa ka bohata a bile a tšoaroa. Ha moapostola Pauluse a ne a tšoeroe Roma, Bakreste ba bang ba ile ba khaotsa ho mo tšehetsa. (2 Tim. 1:​8, 15; 2:​8, 9) Nahana feela hore na Pauluse o ile a ikutloa joang. O ile a mamella mathata a mangata a ba a beha bophelo ba hae kotsing molemong oa bona. (Lik. 20:​18-21; 2 Bakor. 1:8) Le ka mohla ha rea lokela ho tšoana le Bakreste bao ba sa kang ba thusa Pauluse. Ka lebaka leo, ha rea lokela ho makala ha Satane a hlasela ka ho khetheha bara ba bo rona ba etellang pele. O batla hore bara bana ba bo rona ba khaotse ho tšepahalla Jehova ebile le rona o batla ho re tšosa. (1 Pet. 5:8) Tsoela pele ho tšehetsa Bakreste-’moho le ho ba tšepahalla.—2 Tim. 1:​16-18. w22.11 16-17 ¶8-11

Ho ka etsahala hore ebe setlokotsebe se neng se khokhothetsoe haufi le Jesu e ne e le Mojuda. Bajuda ba ne ba rapela Molimo a le mong, empa batho ba lichaba tse ling ba ne ba rapela melimo e mengata. (Ex. 20:​2, 3; 1 Bakor. 8:​5, 6) Haeba monna eo e ne e se Mojuda, a ka be a ile a botsa potso e hlahang temaneng ea letsatsi ea kajeno tjena, “Na ha u tšabe melimo?” Ho feta moo, Jesu o ne a sa rongoa ho batho ba lichaba tse ling, empa o ne a ronngoe ho “linku tse lahlehileng tsa ntlo ea Iseraele.” (Mat. 15:24) Molimo o ne a joetsitse Baiseraele hore o tla tsosa bafu. Mohlomong setlokotsebe se ileng sa baka se ne se tseba ka taba ena ’me mantsoe a sona a ne a bontša hore se lumela hore Jehova o tla tsosa Jesu hore a buse ’Musong oa Molimo. Ho bonahala hore monna enoa o ne a tšepa hore Molimo o tla mo tsosa le eena. Kaha setlokotsebe se ileng sa baka e ne e le Mojuda, se tlameha se ne se tseba ka Adama le Eva le ka Paradeise eo Jehova a neng a ba etselitse eona. Ka lebaka leo, ho ka etsahala hore ebe setlokotsebe seo se ne se nahana hore Paradeise eo Jesu a neng a bua ka eona e ne e tla ba serapa se setle hona lefatšeng mona.—Gen. 2:15. w22.12 8-9 ¶2-3

Re ka khona ho bolela molaetsa oa ’Muso hafeela re thusoa ke moea o halalelang oa Molimo. Hobane’ng? Hobane Satane o leka ka hohle ho emisa mosebetsi oa rona oa boboleli. (Tšen. 12:17) Batho ba bangata ba nahana hore Satane o matla hoo re ke keng ra khona ho mo hlola. Leha ho le joalo, rea mo hlola ha re ntse re tsoela pele ho etsa mosebetsi oa boboleli. (Tšen. 12:​9-11) Ka tsela efe? Ha re etsa mosebetsi oa boboleli re bontša hore ha re mo tšabe. Kahoo rea bona hore Jehova o re fa matla a sebelisa moea oa hae o halalelang ebile o thabisoa ke seo re se etsang. (Mat. 5:​10-12; 1 Pet. 4:14) Moea oa Molimo o ka re fa matla ao re a hlokang ho hlola bothata boo re ka bang le bona ha re etsa mosebetsi oa boboleli. (2 Bakor. 4:​7-9) Ke’ng seo re ka se etsang hore re tsoele pele ho fumana moea oa Molimo? Re lokela ho lula re o kopa, re kholisehile hore Jehova o tla re utloa. w22.11 5 ¶10-11

Re bontša hore re rata Bakreste-’moho le rona ka hore re sebetse ka thata hore re lule re e-na le khotso le bona. Re leka ho etsisa tsela eo Jehova a tšoarelang batho ba bang ka eona. Haeba Jehova o ne a ikemiselitse ho tela Mora oa hae e le hore a shoele libe tsa rona, na le rona re ka ikemisetsa ho tšoarela Bakreste-’moho le rona ha ba re khopisa? Ha re batle ho tšoana le lekhoba le khopo leo Jesu a buileng ka lona ho e ’ngoe ea lipapiso tsa hae. Le ka mor’a hore mong’a lona a hlakole sekoloto sa lona se seholo, lekhoba leo lona ha lea ka la tšoarela lekhoba-’moho le lona le neng le le kolota chelete e nyenyane. (Mat. 18:​23-35) Haeba ho bile le ho se utloisisane pakeng tsa hao le Mokreste-’moho le uena, na u ka ea ho eena e le hore le bope khotso pele u ea Sehopotsong? (Mat. 5:​23, 24) Ha u etsa joalo, u tla be u bontša hore u rata Jehova le Jesu haholo. w23.01 29 ¶8-9

Tsela e ’ngoe eo u ka tsebang hore na Bakreste-’moho le uena ba hloka eng ke ka ho ba botsa lipotso ka bohlale. (Liprov. 20:5) Na ba na le lijo tse lekaneng, meriana le lintho tse ling tseo ba li hlokang? Na ba ka ’na ba lahleheloa ke mosebetsi kapa sebaka seo ba lulang ho sona? Na ba hloka ho thusoa ho ngolisa hore ’muso o ba thuse? Jehova o batla hore kaofela ha rona re khothatse le ho thusa Bakreste-’moho le rona. (Bagal. 6:10) Ntho leha e le efe eo re ka e etsang ho thusa motho ea kulang, ho sa tsotellehe hore na e nyenyane hakae e ka mo khothatsa haholo. Ngoana a ka khothatsa mor’abo rona ka ho mo ngolla karete kapa ho mo toroeela setšoantšo. Mocha a ka thusa morali oa bo rona ka ho e’o mo rekela lintho tseo a li hlokang. Ba bang ba ka phehela motho ea kulang lijo. Bara le barali ba bo rona ba bang ba rometse baholo ba sebetsang ka thata nakong ea seoa likarete tse nang le melaetsa e ba lebohang. Hoa thabisa ha re ‘tsoela pele ho khothatsana le ho matlafatsana.’—1 Bathes. 5:11. w22.12 22 ¶2; 23 ¶5-6

Basaduse ba ne ba tseba libuka tsa pele tse hlano tsa Mangolo a Seheberu hantle empa ba ne ba iphapanyetsa lithuto tsa bohlokoa tse Mangolong ao. Ka mohlala, hlokomela seo Jesu a ileng a se bua ha Basaduse ba mo botsa ka tsoho. O ile a re ho bona: “Na ha lea ka la bala bukeng ea Moshe moo ho buuoang ka sehlahla se meutloa, hore Molimo o ile a re ho eena: ‘Ke ’na Molimo oa Abrahama, Isaka le Jakobo’?” (Mar. 12:​18, 26) Le hoja Basaduse ba ile ba bala ka taba eo ka makhetlo, potso eo Jesu a ileng a ba botsa eona e ile ea bontša hore ba iphapanyetsa thuto ea bohlokoa e hlahang ka Mangolong e mabapi le tsoho. (Luka 20:38) Re ithuta’ng? Ha re bala Bibele, re lokela ho ela hloko lintlha tsohle tseo re ka ithutang tsona temaneng e itseng kapa tlalehong ea Bibele. Le hoja re batla ho utloisisa lithuto tse bonolo, re boetse re batla ho utloisisa le lithuto tsa bohlokoa le melao-motheo. w23.02 11 ¶9-10

Kaofela lipaki tseo ho buuoang ka tsona temaneng ea letsatsi ea kajeno li ile tsa kopana le mathata a mangata empa li ile tsa lula li tšepahalla Jehova. (Baheb. 11:​36-40) Na e ile ea e-ba ha lefeela hore ebe ba ile ba mamella le ho sebetsa ka thata? Che! Le hoja litšepiso tsa Molimo li sa ka tsa phethahala kaofela nakong eo ba ntseng ba phela, ba ile ba lula ba ntse ba tšepa Jehova. Kaha ba ne ba kholisehile hore Jehova oa ba rata, ba ile ba e-ba le tumelo ea hore ba tla bona ha litšepiso tsa hae li phethahala. (Baheb. 11:​4, 5) Mohlala oa bona o ka re thusa hore re tsoele pele ho tšepa Jehova. Mehleng ena lintho li ntse li tloha bobeng ho ea bobeng bo fetisisang. (2 Tim. 3:13) Satane o ntse a bakela batho ba Molimo mathata. Ke ’nete hore re tla kopana le mathata a mangata empa re lokela ho lula re ikemiselitse ho sebetsa ka thata bakeng sa Jehova. Hape re lokela ho ba sebete kaha “re behile tšepo ea rona ho Molimo ea phelang.”—1 Tim. 4:10. w22.06 24 ¶17; 25 ¶18

Lebaka le leng leo re lokelang ho lula re phetse hantle ka lona ke hore haeba re etsa joalo, re tla khona ho sebeletsa Jehova haholoanyane. (Mar. 12:30) Kahoo, re qobe ho etsa lintho tseo re tsebang hore li ka re kulisa. (Bar. 12:1) Ke ’nete hore ho sa tsotellehe hore na re etsa’ng e le hore re lule re phetse hantle, re ntse re ka ’na ra kula. Empa re etsa sohle seo re ka se khonang ho bontša Ntate oa rona ea leholimong hore re ananela mpho ea bophelo. Haeba re kula kapa re tsofala, re ka ’na ra se ke ra khona ho etsa lintho tse ngata tseo re neng re li etsa pele. Ntho eo e ka re ferekanya ea ba ea re utloisa bohloko. Empa re ntse re lokela ho leka ho etsa sohle e le hore re itlhokomele. Hobane’ng? Hobane ho sa tsotellehe hore na rea kula kapa re holile hakae, re ntse re ka khona ho sebeletsa Jehova joaloka Morena Davida. Hoa tšelisa ho tseba hore re batho ba bohlokoa ho Molimo leha re se re kula kapa re holile. (Mat. 10:​29-31) Le haeba re ka shoa, o tla labalabela ho re tsosa. (Jobo 14:​14, 15) Ha re sa ntse re phela, re batla ho etsa sohle ho baballa bophelo ba rona. w23.02 20-21 ¶3-5

Na mabitso a bongata bo boholo ba linku tse ling a tla ’ne a be teng bukeng ea bophelo ka mor’a hore ba pholohe Armagedone? Ho joalo. (Tšen. 7:14) Jesu o ile a re batho bana ba tšoanang le linku ba tla ea “bophelong bo sa feleng.” (Mat. 25:46) Empa batho ba tla pholoha Armagedone ba ke ke ba fumana bophelo bo sa feleng hang-hang. Nakong ea Puso ea Lilemo Tse Sekete, Jesu o “tla ba tataisetsa lilibeng tsa metsi a bophelo.” Batho ba tla mamela tataiso ea Kreste le bao Jehova a tla ba nka ba tšepahala, mabitso a bona a tla ngoloa bukeng ea bophelo ’me a ke ke a hlakoloa. (Tšen. 7:​16, 17) Leha ho le joalo, lipoli li tla felisoa ka Armagedone. Jesu o ile a re “ba tla ea phelisong e sa feleng.” (Mat. 25:46) Jehova o ile a susumetsa moapostola Pauluse hore a re: “Bana ba tla feta kotlong ea boahloli ea timetso e sa feleng.”—2 Bathes. 1:9; 2 Pet. 2:9. w22.09 16 ¶7-8

Ha lelapa le thabela ho sheba lintho tseo Jehova a li bopileng le ka khona ho khatholoha le ho thaba ’moho ’me sena se ka le thusa hore le ratane le ho feta. Jehova o bopile libaka tse ntle moo re ka thabelang ho etsa lintho tseo re li ratang. Malapa a mangata a rata ho ea mahaeng, lithabeng, libakeng tseo ba ka shebang lintho tse bopiloeng ba le hammoho kapa leoatleng. Lefatšeng le lecha la Molimo, batsoali le bana ba tla thabela ho sheba lintho tseo Jehova a li bopileng ho feta leha e le neng pele. Ka nako eo, re ke ke ra tšaba liphoofolo ’me le tsona li ke ke tsa re tšaba. (Esa. 11:​6-9) Re tla thabela lintho tseo Jehova a re etselitseng tsona bophelo bohle. (Pes. 22:26) Batsoali, ha lea lokela ho emela nako eo ho thusa bana ba lona hore ba thabele ho sheba lintho tse bopiloeng. Ha u ntse u sebelisa lintho tse bopiloeng ho ruta bana ba hao ka Jehova, ba tla lumellana le seo Morena Davida a se buileng. O ile a re: ‘Ha ho na ea entseng lintho tse tšoanang le tseo Jehova a li entseng.’—Pes. 86:8. w23.03 25 ¶16-17