U ka Rapela Joang e le Hore Molimo a U Utloe?

RAPELA JEHOVA MOLIMO KA LEBITSO LA JESU

“Haeba le kopa Ntate ntho leha e le efe o tla le fa eona ka lebitso la ka.”​—Johanne 16:23.

Mantsoe a Jesu a bontša ka ho hlaka hore Jehova ha a batle ha re mo rapela re sebelisa litšoantšo, bahalaleli, mangeloi kapa balimo empa o batla hore re sebelise lebitso la Jesu Kreste. Ha re sebelisa lebitso la Jesu ha re rapela, seo se bontša hore rea utloisisa hore Molimo o tla re utloa ka lebaka la seo Jesu a ileng a re etsetsa sona. Jesu o itse: “Ha ho ea tlang ho Ntate haese ka ’na.”​—Johanne 14:6.

RAPELA HO TSOA PELONG

“Tšollelang lipelo tsa lona ka pel’a hae.”​—Pesaleme ea 62:8.

Ha re rapela Jehova, re lokela ho bua joalokaha re ne re tla bua le ntate ea lerato. Ho e-na le hore re bue mantsoe a bukeng kapa re bue mantsoe ao re a tšoereng ka hlooho, re lokela hore ka tlhompho re rapele Jehova ho tsoa pelong.

RAPELLA LINTHO TSE LUMELLANANG LE THATO EA MOLIMO

“Ho sa tsotellehe hore na ke eng eo re e kopang ho ea ka thato ea hae, oa re utloa.”​—1 Johanne 5:14.

Ka Bibeleng, Jehova Molimo oa re bolella hore na o tla re etsetsa’ng le hore na rona re mo etsetse’ng. E le hore lithapelo tsa rona li amohelehe ho Molimo, re lokela ho rapela “ho ea ka thato ea hae.” E le hore re etse joalo, re lokela ho ithuta Bibele e le hore re mo tsebe haholoanyane. Haeba re etsa joalo, o tla thabisoa ke lithapelo tsa rona.

RE KA RAPELLA ENG?

Rapella Litlhoko Tsa Hao. Re ka rapela Molimo hore a re thuse ka litlhoko tsa letsatsi le letsatsi joaloka lijo, liaparo le sebaka sa bolulo. Re ka boela ra rapella hore Molimo a re fe bohlale ba hore re etse liqeto tse nepahetseng le matla a hore re mamelle mathata. Re ka rapella hore re be le tumelo, hore Molimo a re tšoarele le hore a re thuse.​—Luka 11:​3, 4, 13; Jakobo 1:​5, 17.

Rapella Batho ba Bang. Batsoali ba ratang bana ba bona baa thaba ha bana ba bona ba ratana. Kaha re bana ba Jehova, Jehova le eena o batla hore re tsotellane ’me re ratane. Ho loketse ho rapella balekane ba rona, ba malapa a rona, bana ba rona le metsoalle ea rona. Morutuoa Jakobo o ile a ngola a re: “Le rapellane.”​—Jakobo 5:16.

E-ba ea Lebohang. Bibele e re ka ‘Mopi oa rona: “O ile a etsa se molemo, a le fa lipula tse tsoang leholimong le linako tse behang, a tlatsa lipelo tsa lona ka ho phethahetseng ka lijo le ho hlasimoloha ho molemo.” (Liketso 14:​17) Ha re nahana ka lintho tsohle tseo Molimo a re etselitseng tsona, seo se tla re susumelletsa hore re mo lebohe ha re rapela. Re boetse re lokela ho bontša Molimo hore rea mo leboha ka hore re mo mamele.​—Bakolose 3:15.

E-BA LE MAMELLO ’ME U PHEHELLE THAPELONG

Ka linako tse ling, re ka nyahama ha Molimo a sa arabe lithapelo tsa rona hang-hang. Na seo se bolela hore Molimo ha a re tsotelle? Le letho! Ela hloko mehlala e latelang e bontšang hore ke habohlokoa ho tsoela pele ho rapela.

Steve, eo ho buuoeng ka eena sehloohong se qalang o re: “Haeba e ne e se ka thapelo, nkabe ke se na tšepo ea hore ke tla thaba hape.” Ke’ng e ileng ea mo thusa hore a fetohe? O ile a qala ho ithuta Bibele ’me a ithuta hore na ke hobane’ng ha a lokela ho rapela le ho phehella ho eona. O re: “Ha ke rapela Molimo, kea mo leboha ka tšehetso eo ke ileng ka e fumana ho tsoa ho metsoalle. Hona joale ke thabile ho feta pele.”

Ho thoe’ng ka Jenny, ea neng a ikutloa eka ha a na thuso hoo Molimo a ke keng a mo mamela? O re: “Ha ke ne ke ikutloa ke se na thuso, ke ile ka kopa Molimo hore a nthuse hore ke utloisise hore na ke hobane’ng ha ke ikutloa joalo.” Seo se ile sa mo thusa joang? O re: “Ho bua le Molimo ho ile ha nthusa hore ke ipone ka tsela eo a mponang ka eona le hore ke bone hore le hoja nka ipona eka ha ke na thuso, Jehova o nka ke le oa bohlokoa. Ho boetse ho nthusitse hore ke se ke ka tela.” Qetellong ho ile ha etsahala’ng? O re: “Thapelo e nthusitse ho nka Jehova e le Ntate ea lerato ea ntsotellang hape e le Motsoalle ea lulang a ntšehetsa le ea nthusang hafeela ke etsa lintho tseo a batlang hore ke li etse.”

Nahana ka mohlala ona oa Isabel. Eitse ha e-ba moimana, lingaka tsa hae li ile tsa mo bolella hore ngoana oa hae o tl’o hlaha a sa itekanela. E ne eka o chella ka tlung. Batho ba bang ba ile ba mo eletsa hore a ntše mpa. O re: “Ke ile ka utloa eka ke tl’o bolaoa ke pelo-bohloko.” O ile a etsa’ng? O re: “Ke ile ka rapela Molimo hangata hore a ntšehetse.” Hamorao Isabel o ile a tsoala mora eo lebitso la hae e leng Gerard ’me o ile a hlaha a sa itekanela. Na Isabel o utloa eka Molimo o arabetse lithapelo tsa hae? E, ho joalo! Ka tsela efe? O re: “Ha ke bona mora oa ka eo hona joale a seng a le lilemo li 14 a thabela bophelo ho sa tsotellehe bokooa ba hae, kea hlokomela hore ke karabo ea lithapelo tsa ka, le hore Jehova o ntlhohonolofalitse haholo ka ho mpha eena.”

Mantsoe ao a Isabel a tsoang pelong a etsa hore re nahane ka mantsoe a mopesaleme a re’ng: “Jehova . . . u tla utloa litakatso tsa ba bonolo. U tla lokisa lipelo tsa bona. U tla sekeha tsebe.” (Pesaleme ea 10:​17) Kannete re na le mabaka a utloahalang a hore re lule re rapela Molimo!

Ka Bibeleng ho na le lithapelo tse ngata tsa Jesu. E tsebahalang ka ho fetisisa ke eo a ileng a e ruta barutuoa ba hae. Re ka ithuta eng ho eona?