Bibele e Re’ng ka Batho ba Lulang Hammoho Pele ba Nyalana?

Karabo e tsoang ka Bibeleng

Bibele e re thato ea Molimo ke hore batho ba “ile bohlola.” (1 Bathesalonika 4:3) Joalokaha Bibele e bontša, lentsoe “bohlola” le akarelletsa bofebe, batho ba bong bo tšoanang ba etsang thobalano le monna le mosali ba etsang thobalano ba sa nyalana.

Ke hobane’ng ha e le ha bohlokoa ho Molimo hore batho ba nyalane?

Molimo ke eena ea qalileng lenyalo. O le qalile ha a ne a kopanya Adama le Eva. (Genese 2:22-24) O ne a sa rera hore monna le mosali ba lule hammoho ba sa nyalana.
Molimo o tseba se molemo bakeng sa batho. O entse hore lenyalo e be tlamo ea ka ho sa feleng e tla tsoela monna le mosali molemo le ho sireletsa lelapa la bona. Nahana ka mohlala ona o bonolo. Joalokaha moetsi oa feneshara a fana ka litaelo tsa hore na u lokela ho kopanya feneshara joang, litaelo tsa Molimo le tsona lia bontša hore na u ka etsa’ng e le hore lelapa la hao le thabe. Melao ea Molimo e tsoela batho ba lulang ba e boloka molemo.—Esaia 48:17, 18.

tsa hore na o lokela ho kopanya feneshara joang
Ho etsa thobalano pele ho lenyalo ho ka ba le litla-morao tse bohloko. Ka mohlala, ho ka etsa hore motho a ime a sa rera, a be le maloetse ’me a ferekane maikutlong.
Molimo o file monna le mosali bokhoni ba ho etsa bana. Molimo o nka bophelo bo halalela ’me bokhoni ba ho etsa bana ke mpho e molemo. Molimo o batla hore re hlomphe mpho eo ka hore re nke lenyalo e le la bohlokoa.—Baheberu 13:4.

Na batho ba babeli ba sa nyalanang ba lokela ho lula hammoho ho bona hore na baa tšoanelana?

E le hore batho ba atlehe lenyalong, ha ho hlokahale hore ba lule nakoana hammoho pele ba nyalana. Ho e-na le hoo, baratani ba ka atleha haeba ba ratana ebile ba sebetsa hammoho hore ba hlole mathata.a Lenyalo le etsa hore batho ba tšepane.—Matheu 19:6.

Baratani ba ka etsa’ng hore ba be le lenyalo le atlehileng?

Ha ho na lenyalo le se nang mathata. Leha ho le joalo, baratani ba ka atleha lenyalong haeba ba sebelisa keletso ea Bibele. Ba ka etsa lintho tse latelang:

Beha litlhoko tsa molekane oa hao pele ho tsa hao.—1 Bakorinthe 7:3-5; Bafilipi 2:3, 4.
Ratanang ’me le hlomphane.—Baefese 5:25, 33.
Khetha mantsoe ha u bua.—Liproverbia 12:18.
E-ba le mamello ’me u potlakele ho tšoarela.—Bakolose 3:13, 14.

a Joalokaha moetsi oa feneshara a fana ka litaelo tsa hore na u lokela ho kopanya feneshara joang, litaelo tsa Molimo le tsona lia bontša hore na u ka etsa’ng e le hore lelapa la hao le thabe.