Lithaba—Ke Mang ea Tla li Sireletsa?
KA 2002, ho ile ha e-ba le Seboka sa Lithaba Tsa Lefatše Bishkek, Kyrgyzstan (Asia bohareng) ka matsatsi a mane. E ne e le seboka sa pele sa machaba se reretsoeng ho tšohla litaba tsa lithaba. Ba se lokiselitseng ba ne ba tšepa hore selemo sa 2002 se ne se tla tšoaea “qalo ea mehla e mecha e tla hlokomela bohlokoa ba sebele ba lithaba.”
Ba neng ba le teng sebokeng ba ile ba e-ba ntsoe-leng ho amoheleng “Leano la Lithaba la Bishkek,” le neng le e-na le melao e tataisang bakeng sa e mong le e mong ea amehileng ka ho baballa lithaba. Sepheo sa lona e ne e le “ho ntlafatsa bophelo ba batho ba lithabeng, ho sireletsa tikoloho ea lithaba le lihloliloeng tse ho tsona hammoho le ho sebelisa matlotlo a lithaba ka bohlale haholoanyane.”
Ho na le ntlafatso e entsoeng. Tsamaiso ea lefatše lohle ea libaka tsa boikhathollo e sireletsa libaka tse ikhethang ka botle le tse nang le lintho tse phelang ka mefuta-futa ea tsona. Likarolong tse ngata tsa lefatše, lihlopha tsa paballo ea tikoloho li atlehile ho thibela tšenyo e bakoang tikolohong. Bohato bo bong bo ileng ba etsetsoa qeto Sebokeng sa Lithaba sa Bishkek e ne e le ba ho hloekisa manya a nyutlelie a neng a lahletsoe lithabeng tsa Kyrgyzstan. Manya ana a nang le chefo e ngata a ne a ka ’na a silafatsa phepelo ea metsi bakeng sa batho ba etsang karolo ea 20 lekholong ba Asia bohareng.
Leha ho le joalo, mathata a amanang le ho sireletsa lithaba tsa lefatše a ntse a le maholo. Ka mohlala, ka 1995 ba boholong Canada ba ile ba theha “Molao oa ho Sebelisa Meru” e le ho sireletsa meru e setseng ea British Columbia e nang le pula e ngata. Leha ho le joalo, liphuputso tse ileng tsa etsoa ka mor’a moo li ile tsa sibolla hore lik’hamphani tse remang meru ha li latele molao oo ’me li tsoetse pele ho rema lifate esita le matsoapong a emeng haholo. Molao oo o ile oa nyehlisoa ka 1997 kaha indasteri ea lehong e ile ea tletleba ka hore molao oo o boima haholo.
Tšitiso ha e bakoe ke tsa khoebo feela. Polelo ea ho qetela Sebokeng sa Bishkek e ile ea bolela hore ntoa, bofutsana le tlala kaofela ha tsona li tlatsetsa ho senngoeng ho tsoelang pele ha tikoloho ea lithaba le lihloliloeng tse ho tsona. Lithaba, hammoho le lefatše kaofela, li tla tsoela pele ho ameha hafeela lisosa tsena tse senyang tikoloho li sa fele.
Ho Ameha ha Molimo ka Pōpo ea Hae
Ho sa tsotellehe boemo bona bo nyahamisang, re na le lebaka la ho ba le tšepo. Molimo ea Matla ’Ohle o bona sohle se etsahalang pōpong ea hae. Bibele e mo hlalosa e le “Eo litlhōrō tsa lithaba e leng tsa hae.” (Pesaleme ea 95:4) O boetse o tsotella liphoofolo tse phelang lithabeng. Ho ea ka Pesaleme ea 50:10, 11, Jehova o re: “Phoofolo e ’ngoe le e ’ngoe e hlaha ea moru ke ea ka, liphoofolo tse holim’a lithaba tse sekete. Ke tseba hantle sebōpuoa se seng le se seng se nang le mapheo sa lithaba, le mehlape ea liphoofolo tsa naha e sabaletseng e na le ’na.”
Na Molimo o na le mokhoa oa ho sireletsa tikoloho e mathateng ea lefatše? E! Bibele e re o ‘emisitse ’muso o ke keng oa senngoa le ka mohla.’ (Daniele 2:44) Jesu Kreste, ’Musi ea khethiloeng oa ’muso oa leholimo, o na le thahasello e khethehileng ka lefatše le batho ba phelang ho lona. (Liproverbia 8:31) Puso ea hae e tla tlisa khotso lefatšeng, e felise tšenyo eohle ’me e lokise e seng e entsoe lefatšeng.—Tšenolo 11:18.
Haeba u labalabela tharollo e joalo, ha ho pelaelo hore u tla tsoela pele u rapella hore ‘’muso oa Molimo o tle.’ (Matheu 6:9, 10) Lithapelo tse joalo li tla arabeloa. Haufinyane ’Muso oa Molimo o tla felisa ho hloka toka ’me o lokise tšenyo e bakiloeng lefatšeng. Ha sena se etsahala, ka tsela ea tšoantšetso, lithaba li tla “hoeletsa ka thabo.”—Pesaleme ea 98:8.