Bacha Baa Botsa

Nka Etsa’ng Hore ke Itšepe Haholoanyane?

E CHE

Na u khona ho mamella khatello ea lithaka? ◯ ◯

Na u ikutloa eka ua ratoa? ◯ ◯

Na u itlhokomela ’meleng? ◯ ◯

Na u thabela ho bona ba bang ba atleha? ◯ ◯

Na u inka u le motho ea atlehileng? ◯ ◯

Haeba u arabetse ka che, lipotsong tse ’maloa ho tsena tse ka holimo, e ka ’na eaba ho ikhalala ho entse hore u se ke ua hlokomela bokhoni ba hao. Sehlooho sena se tla u thusa hore u bo hlokomele!

BACHA ba bangata ba ikutloa ba sa kholiseha ka ponahalo ea bona le bokhoni ba bona le ka hore na ba tšoana le ba bang. Na le uena u ikutloa joalo? Haeba ho joalo, hase uena feela ea ikutloang ka tsela eo!

● “Mefokolo ea ka ea ’nyahamisa. Ke lula ke itšoaea liphoso nako ena kaofela.”—Leticia.a

● “Ho sa tsotellehe hore na u motle hakae, u tla lula u kopana le ba bang ba batle ho u feta.”—Haley.

● “Ho hang ha ke phutholohe ha ke e-na le bacha ba bang. Ke tšaba hore ba tla nka hore ha ke motho oa bohlokoa.”—Rachel.

Haeba u ikutloa joaloka bacha bana ba qotsitsoeng ka holimo, u se ke ua nyahama. U ka fumana thuso. Nahana ka lintlha tse tharo tse tla u thusa hore u itšepe haholoanyane le hore u be le maikutlo a matle ka uena.

1. Etsa Metsoalle

Lengolo la sehlooho. “Motsoalle oa ’nete o lerato ka linako tsohle, ’me ke mor’abo motho ea tsoaletsoeng ha ho e-na le mahlomola.”—Liproverbia 17:17.

Seo le se bolelang. Motsoalle oa sebele a ka u thusa haholo nakong ea tlokotsi. (1 Samuele 18:1; 19:2) Esita le ho nahana feela hore ho na le motho ea u tsotellang ho ka u tsosa molota. (1 Bakorinthe 16:17, 18) Kahoo, atamela haufi le batho ba nang le tšusumetso e ntle ho uena.

“Metsoalle ea sebele e ke ke ea u tlohela hore u lule u nyahame.”—Donnell.

“Ka linako tse ling, ntho ea bohlokoa ka ho fetisisa ke ho tseba hore ho na le motho ea u tsotellang e le kannete. Seo se ka etsa hore u ikutloe u le motho ua bohlokoa.”—Heather.

Temoso: Etsa bonnete ba hore metsoalle ea hao e u thusa hore u be seo u hlileng u leng sona—eseng hore feela u amohelehe ho eona. (Liproverbia 13:20; 18:24; 1 Bakorinthe 15:33) Ho etsa liketso tse mpe e le hore feela u khahlise ba bang ho tla etsa hore u ikutloe u tlotlolotsoe ebile u qhekeletsoe.—Baroma 6:21.

Ke nako ea hao. Ka tlaase mona, ngola lebitso la motsoalle ea ka u thusang hore u itšepe haholoanyane.

․․․․․

U khothalletsoa ho etsa litokisetso tsa hore u qete nako e itseng u e-na le motho eo. (Tlhokomeliso: Hase hore e tlameha ebe thaka ea hao.)

2. Thusa ba Bang

Lengolo la sehlooho. “Ho fana ho tlisa thabo e khōlō ho feta ho amohela.”—Liketso 20:35.

Seo le se bolelang. Ha u thusa batho ba bang, le uena ua ithusa. Joang? Maele a Bibele a re: “Ea tsebang ho fana o tla nona; ea nosetsang o tla nosetsoa le eena.” (Liproverbia 11:25, Bibele ea Sesotho) Ke ’nete e ke keng ea latoloa hore ha u thusa batho ba bang, le uena u ikutloa u le motho oa bohlokoa!b

“Ke nahana ka seo nka se etsetsang ba bang ’me ke leka ho thusa ba bang ka phuthehong ea heso. Ho rata ba bang le ho qeta nako ke e-na le bona hoa ntlhasimolla.”—Breanna.

“Tšebeletso ea Bokreste ea thabisa kaha e u susumelletsa ho se amehe ka uena haholo empa ho ameha ka batho ba bang.”—Javon.

Temoso: U se ke ua thusa batho ba bang hobane feela u batla hore ba tle ba u buseletse. (Matheu 6:2-4) Ho fana ka sepheo se sebe ho ke ke ha u thusa ka letho. Hangata batho ba tla hlokomela ha u etsa lintho ka sepheo se sebe!—1 Bathesalonika 2:5, 6.

Ke nako ea hao. Nahana ka motho eo u ileng ua mo thusa nakong e fetileng. Motho eo ke mang, hona u ile ua mo etsetsa eng?

․․․․․

U ile ua ikutloa joang ka mor’a moo?

․․․․․

Nahana ka motho e mong hape eo u ka mo thusang ’me u ngole hore na u ka mo thusa joang.

․․․․․

3. U se ke Ua Tela ha U Etsa Liphoso

Lengolo la sehlooho. “Bohle ba entse sebe ’me ba haelloa ke khanya ea Molimo.”—Baroma 3:23.

Seo le se bolelang. Ke ’nete hore ha ua phethahala. Sena se bolela hore ka linako tse ling u tla bua esita le ho etsa lintho tse fosahetseng. (Baroma 7:21-23; Jakobo 3:2) Le hoja u ke ke ua qoba ho etsa liphoso, u ka laola tsela eo u itšoarang ka eona ha u li entse. Bibele e re: “Ea lokileng a ka ’na a oa esita le ka makhetlo a supileng, ’me ka sebele o tla ema.”—Liproverbia 24:16.

“Ha re bapisa mefokolo ea rōna le bokhoni ba motho e mong, ka linako tse ling seo se etsa hore re se ke ra itšepa.”—Kevin.

“Motho e mong le e mong o na le makhabane le mefokolo. Re lokela ho ba motlotlo ka makhabane a rōna ’me re ntlafatse moo re fokolang teng.”—Lauren.

Temoso: U se ke ua sebelisa ho se phethahale e le lebaka la ho itloaetsa ho etsa sebe. (Bagalata 5:13) Ho etsa phoso ka boomo ho tla etsa hore u lahleheloe ke ntho ea bohlokoa ka ho fetisisa—e leng kamano e ntle le Jehova Molimo!—Baroma 1:24, 28.

Ke nako ea hao. Ka tlaase mona, ngola tšobotsi eo u ka ratang ho e ntlafatsa.

․․․․․

Ngola letsatsi la kajeno pel’a tšobotsi eo u e ngotseng. Etsa lipatlisiso mabapi le hore na u ka e ntlafatsa joang ’me ka mor’a khoeli u hlahlobe hore na u hatetse pele hakae.

Ruri Ua Bohlokoa

Bibele e re: “Molimo o moholo ho lipelo tsa rōna.” (1 Johanne 3:20) Sena se bolela hore a ka bona kamoo u leng oa bohlokoa kateng esita le haeba uena u sa hlokomele. Empa na mefokolo ea hao e fetola seo? Nka hore u na le R100 ea pampiri empa e tabohile ho se hokae. Na u ne u tla e lahla kapa u bone e se ea bohlokoa hobane feela ho na le moo e tabohileng teng? Che! E ntse e le R100—ebang e tabohile kapa ha ea taboha.

Hoa tšoana le kamoo Molimo a u talimang u le oa bohlokoa kateng. O hlokomela boiteko boo u bo etsang ba ho mo khahlisa ebile oa bo ananela, ho sa tsotellehe hore na uena u nka bo fokola hakae! Ka sebele, Bibele e re tiisetsa hore “Molimo hase ea sa lokang hoo a ka lebalang mosebetsi oa lōna le lerato leo le ileng la le bontša bakeng sa lebitso la hae.”—Baheberu 6:10.

Lihlooho tse ling tsa “Bacha Baa Botsa” li ka fumanoa mocheng oa boitsebiso oa Inthanete ho www.watchtower.org/ype

[Mongolo o botlaaseng ba leqephe]

SEO U KA NAHANANG KA SONA

U tla etsa’ng ha u ikutloa u nyahame hobane

● Lithaka tsa hao li u nyatsa?

● U ikutloa eka ha u tšoane le ba bang?

● U bona mefokolo ea hao feela?

[Ntlha e Qolotsoeng e leqepheng la 27]

“Motho a ka ba motle haholo empa a ’na a ikutloa eka o mobe. Kapa motho a ka ’na a se ke a ba motle hakaalo empa a inka hore o motle ho feta batho kaofela. Ke taba feela ea hore na o ikutloa joang.”—Alyssa

[Lebokose/Litšoantšo tse leqepheng la 27]

SEO BACHA BA BANG BA SE BUANG

“Esita le mohaho o matla ka ho fetisisa o lokela ho hlokomeloa ’me ka linako tse ling o be o lokisoe. Hangata ke ne ke khothatsoa ke mantsoe a lerato a motsoalle esita le ha a bososela feela kapa a nkopa ka matsoho.”

“Ho e-na le ho honohela ba bang ka makhabane ao ba nang le ’ona, re ka rua molemo ho ’ona—feela joalokaha le bona ba ka rua molemo ho a rōna.”

[Litšoantšo]

Aubrey

Lauren

[Setšoantšo se leqepheng la 28]

Boleng ba chelete ha bo theohe hobane feela e tabohile. Ka ho tšoanang, tsela eo u leng oa bohlokoa ka eona mahlong a Molimo ha e fetoloe ke ho se phethahale.